رواية واكتشفت اني لقيطه كامله

26 - 3 - 2014, 08:02 PM

وبأحدى ساحات الجامعه الكثيره ..
في الساحه الخلفيه ..
المكان بقمة الهدوء والاسترخاء ..
قليل طلاب يجوا فيه ..
المكان فاضي تقريبا وحتى الموجودين فيه يأما جوا يذاكروا في هذا الهدوء او انهم نايمين ..
لا .. السالفه ما تضحك لأنه فعلا كان فيه طالب منسدح على الكرسي ومغطي وجهه بالكتاب وبسابع نومه ..
ابتسم سامي وقال: اقول دانا .. تصدقي اني بأول سنه لي بالجامعه قد نمت فيها مثل هذا الطالب .. كنت وقتها مواصل وما نمت وما قدرت اصبر للظهر فنمت هني ..
ابتسمت دانا وقالت: ياخي فشله .. اموت ولا انام بالجامعه ..
سامي: ههههههههههه على طاري الفشله .. فاتج اليوم الصبح عماد ..
دانا: ليه شصار ..؟!
سامي: مو امس كان يقول انه راح يرفع ضغط لينا ويغير ترتيب القنوات .. لما رجع البيت وكان بيغير قالت له امه ان لينا يت وغيرت ترتيب قنواتهم عشان ترفع ضغطه ههههههههه .. ياينا اليوم معصب بشكل مو طبيعي هههههه ..
دانا: هههههههههه احس تفكيرهم واحد ..
سامي: ايه والله صح .. كلهم فكروا بنفس الشيء بس الفرق ان لينا غيرت كل القنوات حقت بيتها وبيته وهو كان ناوي يغير قنوات بيته بس .. هههههه واللحين يقولنا فكروا لي بطريجه ارفع فيها ضغطها ..
دانا: الله يعينه ..
سامي: امشي امشي نيلس هناك ..
جاء عند الجدار وكان المكان مظلل بشجره كبيره ..
جلس وتكى ظهره عالجدار فجلست جنبه ..
سامي: جم باجي على محاضرتج ..؟!
دانا: تقريبا عشر دقايق ..
تنهد سامي وهو يقول: الله يعين .. راح اظل حول نص ساعه لوحدي حتى يطلعوا يزيد وريان .. المره اليايه بأحاول اني ما انطرد ..
دانا: اصلا انت بصراحه غبي .. ماكو مخلوق ينسخ اسم المنتدى مع اخر المواضيع اللي فيه مع النص الاساسي ..
سامي: كلها كانت مكتوبه بالانجليش شدراني ..
دانا: يعني مالاحظت بالنهايه فقرات صغيره .. هذه هي المواضيع الخاصه بنفس العضو اللي منزل الموضوع ..
هز سامي كتفه وهو يقول: إلا لاحظتها بس حسبتها تلخيص لأهم النقاط في الموضوع .. وكمان انا مو السبب .. السبب هو العضو لأن كل مواضيعه انجليزي .. لو له موضوع واحد عربي جان قريته وعرفت ان هذه النقاط هي مواضيع مو تلخيص .. غبي وقسم ..
هزت دانا راسها بيأس وهي تقول: مسجين العضو .. هو شذنبه عشان تسبه ..؟! وكمان انت دامك ما تعرف انجليزي جان طلبت من احد يعدل لك الموضوع ويشوف ان كان فيه اخطاء قبل لا تسلمه ..
سامي بتفكير: فعلا .. معاج حق .. خلاص المره اليايه راح اعمل جذي ..
دانا: هههههههههههههه وربي غبي ههههههههه ..
ابتسم بهدوء وهو يطالع في ضحكتها ..
ما يدري ليش يجيه احساس يقول انها اخر ضحكه راح يشوفها منها ..
يحس ان هذه اللحضات هي اخر اللحضات اللي راح يقضيها بحياته ..
اخذ نفس عميق وتعوذ من الشيطان وهو يتمنى ..
يتمنى ان هذه الاحاسيس تكون فعلا وساوس من الشيطان ..
انتبه لدانا وقفت ضحكتها فجأه ورافعه راسها تطالع في شخص واقف قدامهم ..
لف وجهه ورفع راسه يطالع في هذا الشخص فأنصدم لما شاف انها اروى ..
وقف وقال بطريقه حاده: انا شنو قلت لج قبل جذي ..!!!
اروى: اعرف .. اعرف وفاهمه شنو قلت لي .. انا يايه اقولك كل اللي عندي وغصب عنك تسمعه ..
لفت وطالعت في دانا اللي كانت خايفه من جيت اروى ..
خايفه ومرتعبه من ذي البنت اللي قد هددتها اكثر من مره ..
قالت لها تبعد عن سامي ولا تقرب منه ابدا بس ما سمعت لتهديدها ..
ودها اللحين تقولها اطمئني لأننا مستحيل نكون لبعض ..
هو رافضني وانا ما اقدر وما عندي الجرئه اني اعترف له واتمسك فيه ..
ودها تقولها انها تمشي مع سامي على اساس انهم اصحاب وبس وان هالعلاقه راح تنتهي تماما بعد اقل من اسبوعين ..
بعد اقل من اسبوعين ما راح تشوفه ابدا ..
ابدا لأن اخوها راح يدرس وهي بترجع لجامعتها القديمه ..
طالعت اروى في دانا لفتره طويله فلفها سامي على جهته وهو يقول: خير تطالعين في دانا جذي ..؟! اروى انتي وين مخج بالضبط ..؟! من فين تسمعين عشان اعيد لج الكلام اللي قلته لج لاخر مره ..؟!
مسكت اروى ايده وابعدتها عن كتفها بهدوء وهي تقول: اسمع من اذني ومخي براسي .. وماني رايحه من هني إلا لما اقول كل اللي عندي فأنصحك تهدأ وتستمع لي قبل لا اروح واعلم المدير عن حقيقة رفيجتكم ..
عصب سامي وتنرفز من كلامها ..
اخذ نفس عميق بعدها قال: اوكي .. قولي اللي عندج واتمنى يكون محترم لأني انسان ما اقدر اتحكم بأعصابي ..
ابتسمت اروى وطالعت في دانا اللي كانت لساتها جالسه وتطالع فيها بعيون خايفه ..
رجعت نظرها لسامي وقالت: خلاص .. كل شيء انتهى .. انا اتبهذلت واخذت لي تهزيء محترم من ابوي بعد ما اتصل عليه ابوك وعلمه عن كل عمايلي وكل هذا بفضلك .. واليوم هو اخر يوم لي بهذه الجامعه .. باخذ اوراقي وارجع لجامعتي القديمه .. فشكرا لك على تحطيمي .. لكن مع هذا وما ادري ليش ما قدرت اكرهك .. حبيتك من اول مره وكنت مستعده اصلح اي شيء عشان اوصلك واخليك تحبني ..
هزت راسها وهي تقول: لكن كل محاولاتي كانت نهايتها الفشل .. راح اظل احبك وانا متأكده انك مب لي ولا راح تكون لي ابدا .. وكل اللي اتمناه انه يصير الكلام اللي قلته لي بالمطعم ذاك اليوم .. راح انقل لجامعه ثانيه واحاول انساك ويمكن ربي يوفقني بشخص يحبني واحبه ..
سكتت فتره بعدها قالت: كنت عارفه ان كل اللي اساويه غلط وكل شوي احاول اعدل من نفسي .. بس ما كنت اقدر اتمالك نفسي واسيطر على لساني .. كنت اهدد واهدد وانا بصراحه ما كنت صادقه بتهديداتي ابدا .. دانا .. ابدا ما كنت افكر اني افضحها .. كنت كل ما شفتها هددتها بس ما كنت اقصد هالتهديد بصوره حقيقيه .. كنت ارفع صوتي ضد اصحابك .. كنت وقحه وياهم بس انا اذا انفعلت ما اقدر اسيطر على لساني .. انا ييت اعتذر .. عن كل شيء .. عن المشاكل اللي سببتها لك .. عن الوقاحه اللي صدرت مني .. عن ازعاجي لك .. واتمنى انك ما تلومني وتسامحني ..
طالع سامي فيها بعيون مصدومه ..
لا .. مو مصدق ..
ما كان يتوقع انه بيسمع هذا الكلام منها ..
ابدا ما كان يتوقع ..
حتى دانا ظلت تطالع فيها وهي مو مستوعبه ..
بعدها ابتسمت .. لأنها عرفت غلطها واعترفت فيه ..
اروى: كنت ابغى اعتذر كمان من اصحابك بس مالقيتهم .. فوصل لهم كلامي .. انا جدا اسفه .. غلطت كثيير وكنت عارفه ان اللي اسويه غلط بس ما كنت اعرف كيف اتحكم بنفسي وتصرفاتي ..
طالعت في الارض لفتره بعدها قالت: سامي .. لا تكرهني ..
ظل سامي يطالع فيها لفتره بعدها قال بهدوء: طيب .. انا اقدر اعترافج بغلطج .. واكون لئيم إذا ما سامحتج .. خلاص اعتبري انه ما صار شيء ..
طالعت فيه وابتسمت وهي تحس بالعبره تخنقها فكمل: ان شاء تلقي واحد يحبج ويعاملج احسن معامله .. صدقيني انا ابدا ما انفع ابدا ..
هزت راسها بإيه وقالت: طيب .. انا رايحه اللحين .. بس لا تنسى .. ارسلي بطاقة دعوه إذا تزوجت عشان اشوف من هي سعيدة الحظ هذه اللي بتاخذ ولد الراهي .. مع السلامه ..
وراحت وسامي واقف بمكان يطالع في الارض ..
بطاقة دعوه ..!!!
زواج ..!!!
سعيدة الحظ اللي بتاخذه ..!!
لا .. هذه اشياء مستحيله ..
مستحيله تماما ..
عن اي بطاقة تتكلم واي زواج ..
وفوق هذا تقول سعيدة الحظ ..!!
المسمى المفروض انه ينقال هو تعيسة الحظ ..
منو بيقبل بولد حرام ..؟!
منو بيقبل بواحد ماله اصل يناسبهم ..؟!
منو بيقبل انه يكون له اولاد مالهم اصل لأن ابوهم ماله اصل كمان ..؟!
لا هو .. ولا اي بنت راح يقبلوا بكل هذا ..
لا هو .. ولا اهل البنت راح يقبلوا بذي المواصفات ..
هذا قدره ..
ممنوع من الزواج ..
ممنوع من الحب ..
ممنوع حتى من الاعتراف بهذا ..
بس المشكله ان حب ..
حب له وحده غصب عنه وهو عارف وش نهاية هذا الحب ..
نهايته ألم .. ووهم ..
طول عمره وهو يحاول يعيش على حسب ماهو مكتوب له ..
لكن غصب عنه حبها ..
جلس واسند ظهره عالجدار ودانا تطالع فيه ..
طالع قدامه بسرحان ..
ليه ..؟!!
ليه يعيش هذه الحياة القاسيه بسبب طيش اهله ..
هو شذنبه عشان يعيش كذا ..؟!
ليه ما ذبحوه من وقت ما طلع لهالحياة بدل من انه يعيش كذا ..
لا اصل .. ولا فصل ..
ولد حرام منبوذ من المجتمع ..
محد يرغب فيه ولا احد يتمناه لبنته ..
حتى لو كان ولد عز وله مال ماله نهايه فمستحيل احد يرغب فيه ..
مو بس هم ..
حتى هو ما يبغى يتزوج اي بنت ..
ما يبغى اولاده لا طلعوا عالدنيا يصير اسمهم فلان بن سامي وبس ..
بس .. ماكو لقب .. يعني ماكو اصل ..
راح يتعذبوا بوجودهم بمجتمع كل جيل يكون اسوء من اللي قبله ..
لا .. ما يبغاهم يكونوا قذرين مثله ..
يبغالهم حياة نظيفه .. بلقب و اصل ..
لكن هذا مستحيل ..
تماما ..
ترددت دانا لكن في نهاية ترددها قررت تتكلم وقالت: سامي ..
فقال وبمنتهى الهدوء: نعم ..
دانا: انا عارفه بشنو تفكر ..؟! بس .. لا تشغل بالك بهذا كثير .. لا تضايق نفسك .. انسى ..
ابتسم بإستهزاء ..
جاه ريان رقم اثنين .. تقوله انسى ..
صدق اللي مو عايشين هالحياة مستحيل يحسون بمثل الاحساس اللي هو يحسها ..
دانا: سامي .. الزواج فطره .. وهو نصف الدين .. إلا وتلقى بنت تقبل فيك ..
لف سامي عليها وهو يقول: لا تكملين .. لا .. حتى لو .. سامعتني .. حتى ولو قبلت وحده فأنا ما راح اقبل ..
دانا: يعني تظل جذي معذب نفسك ..؟!
سامي: انا حر .. لأنه مالي خيار ثاني ..
اخذ نفس بعدها قال بهدوء: اتمنى اموت .. في الموت راحه ..
دانا بسرعه: بسم الله عليك .. سامي لا تتمنى مثل هذه الامنيه ..
لف يطالع فيها وقال بإبتسامه: تخافين علي ..؟! كلام ريان صج .. انتي فعلا تحبيني ..
انصدمت من كلامه فبغت تفتح فمها عشان تنكر بس قاطعها يقول بهدوء: لا تنكرين مثل اول مره .. لأني هالمره انا مختلف .. انا صحيح خبرتكم اني ما راح اتزوج وفي البدايه هاوشتج لأني قلت لج المفروض ما تحبيني لأني قلت هذا الكلام .. لكن اللحين اكتشفت ان الحب يي للانسان غصب عنه مو بهواه .. ما راح الومج لأني متأكد انج حاولتي تكرهيني بس ما قدرتي .. لأني انا حاليا امر بنفس المرحله ..
تفاجأت من كلامه .. شيقصد ..؟!
ظل يطالع فيها لفتره بعدها قال: بس ريان قالي .. صحيح ان قدري يحتم علي اني ما احب ولا اتزوج لكن ريان قالي انه مو ممنوع الواحد يعترف .. يعترف بأحاسيسه ومشاعره ..
طالعت دانا فيه وهي مو فاهمه ..
لكن كلامه خوفها والاحساس اللي بقلبها يزيد ..
معقوله الشيء اللي كانت خايفه من راح يصير اللحين ..؟!!
مد ايده وحط راسها على كتفه وقال بهمس: راح اعترف .. دانا .. انا احبج ..
انصدمت دانا من كلامه وارتعش جسمها لا ايراديا ..
يحبها ..!!
سامي يبادلها نفس الشعور ..!!
كمل بنفس الهمس: لو كنت انسان مثل باجي البشر جان ما اخترت غيرج .. كنت راح اطلب ايدج من اخوج .. وقسم حبيتج من زمان بس كنت ارفض هذا الشيء .. كنت اقنع نفسي انه ميرد احاسيس غبيه بس ما قدرت .. عالعموم كل هذا ميرد كلام ما راح يصير .. واتمنى تشوفي لج واحد ثاني يحبج .. راح تلقي .. فيج صفات تخلي ألف واحد يتمناج ويعيشج بحياة مكرمه .. حياة محترمه .. وانا آسف لأني متأكد ان كلامي آذاج .. بس نصيحتي انج تنسيني .. وعالعموم انا حاس ومتأكد اني ممكن اموت .. اليوم .. باجر .. او بعد شهر ..
بعد عنها وطالع في دموعها اللي تسيل من عيونها ..
شهقت وارتجفت شفاتها ..
تبغى تفتح فمها .. تبغى تتكلم ..
بس مو قادره ..
قام وقال بهدوء: ياء وقت محاضرتج ..
وبعدها راح وهي لساتها تحاول تفتح فمها .. عشان تناديه ..
بس كمان مو قادره ..
اختفى عن نظرها فحطت ايدها على فمها وبكت ..
ما تدري دموعها شنوعها ..؟!
دموع فرح .. او حزن ..؟!!
فرح لأنه يحبها ..
يبادلها نفس الشعور ..
او حزن لأنه ما زال عايش بعالم غير عالمها ..
يطلب منها نسيانه ..
مو عارفه شنو بالضبط ..
مو عارفه ..

26 - 3 - 2014, 08:03 PM

بالجامعه الثانيه .. وباحدى الكراسي الموجوده بالساحه ..
باقي على محاضرتها ربع ساعه .. وحتى اللي معها باقي على محاضرتها ربع ساعه ..
لأول مره يكون بريكهم في نفس الوقت ..
لفت وصايف على اسيل وقالت: يعني اللحين بشنو اناديج .. اسيل ولا سجى ..؟!
هزت اسيل كتفها وهي تقول بهدوء: مدري ..
تنهدت وصايف وقالت: خلاص اسيل انسي اللي صار امس .. ترى السالفه ما تستاهل انج تشغلي بالج فيها ..
اسيل بهدوء: انسى ..!! تبغيني انسى قد ايش ابوي كان قاسي ..؟! تبغيني انسى كلامه ..؟! ما اقدر ..
وصايف بلا مبالاه: خليه يولي .. عساه بشاحنة ديزل تصدمه عشان ترتاحي من شره ..
طالعت اسيل فيها وقالت: انتي ليه اسلوبج قاسي جذي ..؟! حتى ادعيتج قاسيه ..
وصايف: هههههههههههههه مدري .. يمكن عشاني عشت طفوله قاسيه هههههه ..
طالعت اسيل فيها بهدوء ..
تذكرت امها .. اللي قتلت ام وصايف ..
ولا احد من عائلتها طبيعي .. ولا احد ..
وصايف: المهم بغيت اقولج شيء .. اذا حصل وشفتي ابوج مره ثانيه لا تخافي ولا ترتبكي مثل امس .. لا اوقفي بكل ثقه وقولي له / تقول ما عندك بنات .. هه انا بنتك غصب عنك واتحداك تثبت عكس جذي .. ههههههه صدقيني انه راح يتنرفز وقتها ..
اسيل: نصائحج غريبه ..
وصايف: اسلوب اللي امسكي نفسج .. حاولي تنسيه .. تغلبي على ضعفج ما يمشي معي .. الاساليب العاطفيه ترى ما تفيد .. استخدمي اسلوب التحدي وبتتغلبي على خوفج الغبي هذا .. واجهي الامر ولا تتهربي .. يعني لو بغيتي تدخلي لمحل وسمعتي ان ابوج مويود بالمحل لا تغيري رايج .. ادخل وطز فيه .. خليج قويه .. الضعيف بذا الزمن ما يعيش .. واللحين استهبلي واضحكي ولا تشغلي بالج فيه .. منو يكون عشان تهتمي فيه ..؟! ما رباج ولا اعتنى فيج .. عيل هو مو ابوج .. اسلوب العزا اللي انتي عايشه فيه بطليه ..
اسيل: الكلام سهل ..
وصايف: ايه .. والفعل اسهل بكثيير ..
اسيل: ما اضن ..
وصايف: بصراحه صعب اقناعج .. اسمعي .. انتي اللحين تحتاجي ابوج ..؟! يعني تحتاجي فلوسه او ابتسامته او حنانه ..؟!
هزت اسيل راسها بلا وهي تقول: ما ابغى شيء منه ..
وصايف: عيل ليه تفكري فيه ..؟! انا عشت طفولتي بدون لا ام ولا اب .. لكن ربي في النهايه عوضني بعمي اللي كان سيء الطباع تقريبا .. ربي هداه وارسله لي عشان يطلعني من الضياع اللي كنت فيه .. انتي كمان .. لج ام ولج اب بس اذوج بطفولتج .. في النهايه ربج عوضج بخال مافي احسن منه .. عيشي واتركي الماضي خلفج مثلي .. اللي يفكر في الايام السيئه بحياته مستحيل يقدر يعيش يوم حلو .. استوعبي كلامي شوي .. احنا ليه عايشين ..؟! عشان طاعة الله و عمارة الارض .. عيل ليه تفكري بشيء ما يستحق ..؟! فكري بربج .. وبمستقبلج .. انتي كنتي لقيطه .. بس اللحين لا .. عارفه شنو يعني لا ..؟! انتي مو لقيطه واللي يستخف دمه ويناديج جذي اضحكي وادعي له بالشفاء العاجل .. مريض لا تهتمي لكلامه .. اكبري .. تزوجي .. ييبي عيال .. احفاد .. وعيشي .. بدون لا ام .. ولا اب .. يكفي ان عندج خال .. وصاحبات .. واقارب يحبونج .. احنا نغنيج عن اللي باعوج .. لأنهم للأسف لهم عقول مريضه ما نعرف إذا كانت لها علاج ولا لا ..
طالعت اسيل فيها لفتره فقالت وصايف: اطلعي من العزا ذا واللي يسلمج ..
ابتسمت اسيل وهي تقول: نصائحج فيها شيء غريب .. بس مقنعه ..
وصايف بإبتسامه: يعني اقتنعتي ..؟!
اسيل: تقريبا .. بس احتاج وقت عشان اتعود اخلي قلبي حجر ههههه ..
وصايف: ههههههههههه يعني هذا اللي فهمتيه من حجيي ..!!
اسيل: احس جملة خلي قلبج حجر هو ملخص كل الكلام اللي قلتيه ..
وصايف: صراحه توني انتبه لكن فعلا .. خلي قلبج حجر .. انا من طفولتي وانا قلبي حجر .. كان شكلي غريب بالمدرسه والكل يبتعد عني بس ما اهتميت .. الشارع .. الييران .. والجامعه .. كان كل مكان اكون فيه يتكلموا الناس فيه عني بس ما كنت اهتم .. هههههههههه بأقولج سالفه .. مره وانا بالثانويه العامه طلعت لحديقه اشم لي هوا شافتني طفله وقالت لي انتي ساحره صح ..؟! ههههههههه وربي انها خبله ..
اسيل: ههههههههههههههه اهمم شيء .. الاطفال دايم تفكيرهم بريء ..
وصايف: هذا زمان .. اطفال هاليومين تفكيرهم يجلطج من الصدمه ..
اسيل: بصراحه صدقتي ..
وصايف: اوكي خلاص باجي خمس دقايق على المحاضره خلينا نروح ..
طالعت اسيل في ساعتها وقالت: طيب ..
قامت وصايف وراحت هي واسيل بإتجاه المبنى ..
لما وصلوا قالت وصايف: انا رايحه لكلاسي .. لا تنسي تسلمي لي على سلاحف النينجا اوكي ..
اسيل: ههههههه طيب ..
افترقوا وكل وحده راحت لقاعتها ..
اتجهت اسيل لجهة كلاسها وهي تفكر بكلام وصايف ..
كلامها صح .. ليش تشغل نفسها وتفكيرها بناس ما يستاهلوا ..؟!
اخذت نفس عميق وطالعت بالطريق فلاحظت الدكتور راكان اللي هو عليهم اللحين مستند عالجدار ويقلب في الاوراق اللي بإيده وهو عاقد حواجبه ..
اكيد عنده مشكله بالاوراق ..
رفع راسه فشافها متجهه للكلاس ..
ابتسم وقال: هيه اسيل لحضه ..
لفت عليه فاشر لها انها تجي فجت عنده ..
اسيل: نعم دكتور ..
د.راكان: اخبارج ..؟!
اسيل: الحمد لله تمام ..
ابتسم بإنتصار وهو يقول: فهمت وش هي نوع العلاقه اللي بينج وبين طارق ..
اندهشت من كلامه بعدها قالت: اها .. يعني واخيرا ارضيت فضولك ..
هز راسه بإيه وقال: بس ابسألج .. ليه انتي قاسيه جذي ..؟! انس يقول ان طارق يحبج وايد ..
هزت كتفها وهي تقول: ماكو نصيب ..
د.راكان بإستنكار: وبكل برود ..!! الاحساس ميت عندج ..
اسيل: دكتور اعذرني بس انا ما ابغى افتح هذا الموضوع لأنه منتهي بالنسبه لي ..
د.راكان: اول قلت لج اوكي بس اللحين فلا .. ترى طارق شاب محترم ..
اسيل: احلف ..
د.راكان: ههههههههههههه ما عليج ترى تييني لحضات اتسمج فيها .. المهم سمعت انه قال لأمه عنج بس امه هاوشته وقالت له ما ارضى بوحده لقيطه بس كان متمسك فيج .. لو انا منج ما افرط فيه ابدا ..
طالعت اسيل فيه فتره بعدها قالت: يعني هو عينك محامي له ..؟!
د.راكان: هههههههههه يا شين سوء الضن .. لا تراه مو داري عني .. عرفت كل هذا من رفيجه انس ..
اسيل: انس ..!! ليه وش علاقتك فيه ..؟!
د.راكان بتفكير: اممم تقريبا كنا نسايب .. بس ما حصل نصيب ..
اسيل: يعني كنت خاطب اخته ..؟!
د.راكان: ايه ..
اسيل: طيب مين كان سبب الخلاف .. انت ولا هي ولا الاهل ..؟!
تنهد الدكتور وقال: كان انا .. المهم روحي اللحين عالكلاس .. شوي واييكم ..
اسيل: اوكي ..
لفت ودخلت للكلاس والدكتور يراقبها بعيونه ..
ابتسم وهو يتذكر الموقف اللي صار امس بالليل ..

::::::::::::::::::::::::::::::::::::::::
كان بطريقه لبيته بس وقف عند بوفيه ياكل له شيء لأنه حاس بجوع فضيع ..
نزل ودخل لداخل البوفيه ..
تنهد لما شاف طابور من سبع اشخاص ..
ياليييييل .. شكل السالفه مطوله ..
عقد حواجبه وهو يطالع في اخر فرد في الطابور ..
ايه هو متأكد ان هذا انس ويطقطق بجواله ..
ابتسم ووقف وراه وقال: اهليين انوسه ..
استغرب انس ولف ورى ولما شافه ظهر الانزعاج على وجهه وهو يقول: اسمي انس ..
ضحك راكان وقال: ههههه اوكي اوكي .. غريبه ياي البوفيه ..؟! آه عرفت .. ياي تشتري عشاء لك ولرفيجك .. حياة العزاب صعبه والله ..
انس: محد طلب منك ترثى لحالنا ..
د.راكان: ياخي ما تعرف تغير اسلوبك الجاف .. عالأقل تحمد لي بالسلامه .. مو فرحان لأني طلعت من المستشفى ..؟!
انس: امبلا فرحان .. لأنك رجعت لجامعتك وفكيتنا ..
ابتسم وقال: اتحداكم إذا كنتم مو مشتاقين لي ..!
انس: يا شين الثقه .. خلاص لا تزعجني ..
ورجع يطالع قدام ..
ظل الدكتور راكان ساكت يفكر بعدها قال: شعلاقة اسيل بطارق ..؟!
اندهش انس من كلامه ولف عليه وهو يقول: وانت شدراك ان بينهم علاقه او معرفه ..؟! اصلا شلون تعرف اسيل ..؟!
د.راكان: هي وحده من طلابي حاليا .. اما عن سؤالك بوش دراني ان بينهم علاقه فهو لأنه في نفس اليوم اللي انتشرت الاشاعه عنها بالجامعه ياني طالب من طلاب كلاسكم يبلغني ان طارق يتهاوش مع اللي انشر الاشاعه .. لما وصلت مالقيت احد .. فإيش سبب الهواش وبمثل هذا الوقت ..؟! اليواب هو لأنه اكيد بينهم علاقه وطارق يدافع عنها ..
انس: ما شاء الله عليك .. ما تترك شيء بدون لا تفسره ..
د.راكان: لا صج شنوع علاقتهم ..؟! حتى اسيل لما سألتها تضايقت وقالت لا تفتح هالموضوع مره ثانيه ..
انس: هي قالت جذي ..؟!
هز الدكتور راكان راسه بإيه ..
انس بهدوء: شكلها لحد الآن تكرهه ..
طالع الدكتور راكان فيه بفضول فحكى انس كل شيء لراكان ..
وبالنسبه للطابور فخلص وياء قبلهم ناس واشتروا وهم لساتهم بعالم ثاني ..
بعد ما خلص انس من كلامه قال الدكتور راكان: هذا الطارق فعلا جاف ومتعجرف مثل ما كنت متوقع .. اللي كان يسويه غلط ..
انس: غبي .. اكثر من مره كلمته بس كان ميبس راسه .. ندم بوقت متأخر ..
د.راكان: حتى اسيل غبيه .. بس ما الومها .. لكن المفروض تسامح .. وبنفس الوقت اذا ما سامحت ما الومها ..
انس: مو انت قبل شوي قلت انها من طلابك .. شلون ..؟!
د.راكان: يب .. شكلها نقلت للجامعه اللي ادرس فيها .. هي في احد الكلاسات اللي ادرسها ..
انس: اها ..
انتبه انس للطابور وان قدامهم ست اشخاص فقال بقهر: كله بسببك اخرتني .. لو ما ييت جان اشتريت وخلصت .. ليتك لساتك بالمستشفى ياخي ..
ابتسم الدكتور راكان وقال: لا تحاول .. سمعتك .. سمعتك وانت تعتذر عن تصرفاتك اللي تصرفتها ضدي كل هالسنوات ..
انصدم انس من كلامه وقال: انت .. انت .. شتقصد ..؟!
د.راكان بإبتسامة ثقه: لا تحاول تنكر .. لأني فعلا سمعتك .. وتصدق اني ارتحت كثيير من الكلام اللي قلته ..
سكت شوي بعدها كمل: كنت احس بالذنب كل ما تكلمت معي على اساس اني مذنب .. احس بتأنيب ضمير اضعاف اللي مفروض احس فيه .. كنت انت تفرغ الألم اللي بجواتك وانت ما تدري انك تزيده عندي .. ما كنت تفكر إلا بمشاعرك وناسي مشاعري .. بس ما الومك ولا راح ألومك .. بس كلامك اللي قلته لي وانا بالمستشفى ريحني .. ياليتك قلته من زمان ..
ظل انس يطالع فيه لفتره طويله فقال الدكتور راكان: الطابور مشي ..
لف انس وتقدم خطوتين وفكره مشغول بكلام الدكتور راكان ..
::::::::::::::::::::::::::::::::::::::::

دخلت اسيل للكلاس وجلست في مكانها ..
لفت عليها صبى وهي تقول: كنتي بالبريك مع وصايف الشرسه .. ليش ..؟!
طلعت اسيل كتابها وهي تقول: رفيجتي وكنت اسولف وياها ..
صبى بإستنكار: رفيجتج ..!!! شلون تصاحبيها .. وقسم انها مرعبه ..
ابتسمت اسيل وهي تقول: هي مرعبه مع الاغبياء ..
صبى: ما فهمت ..
لفوا الثلاثه على ورى وطالعوا بأسيل ..
عواد: اسيل .. ترى خلاص احنا صرنا زملاء ..
عايد: صحيح بالبدايه كنا ضدج بس اللحين عرفنا اننا كتا غلطانين بحقج ..
عيد: انسي اللي فات ومن اليوم ورايح بنكون اصحاب ..
ابتسمت لهم اسيل ولما فتحت فمها بتتكلم سبقتها صبى اللي تقول بنص عين: صاحبوج مو ندم او طيبه منهم .. لما عرفوا انج من عائلة الراهي تمصلحوا معج .. صداقة مصلحه ..
لفوا الثلاثه عليها بسرعه وهم يحاولوا يسكتوها .. فضحتهم ..
زادت ابتسامة اسيل ..
هالشله بالمره ممتعه ..
دخل الدكتور راكان للكلاس فهجد الكل وردوا على سلامه ..
حط كتابه عالطاوله وبدأ محاضرته ..

========================================

26 - 3 - 2014, 08:05 PM

الساعه وحده الظهر ..
في نهاية اخر محاضره لهذا اليوم ..
كانت الدكتوره تشرح وتشرح بس ما كانت معها ابدا ..
كانت عيونها على الساعه الكبيره الموجوده فوق البورد ..
تنتظر الثواني تمر ..
اختناق .. تحس بإختناق فضيع ..
متى تنتهي المحاضره عشان تقدر تطلع من هالمكان ..؟!
حطت إيدها على صدرها فحست بدقات قلبها المتسارعه ..
طيب ليه ..؟!
كل شيء انتهى فليه ..؟!
من الصبح وهي تحس بهذا الاحساس ..
من وقت ما صحيت وهي تحس بهذا الاحساس بس خلاص المفروض يخلص ..
اكيد هذا الاحساس سببه الكلام اللي قاله لها في الساحه الخلفيه ..
بس لحضه ..
دام الاحساس ما وقف فهذا يعني ان اعتراف سامي لها ماهو الشيء اللي كانت خايفه منه ..
فيه شيء ثاني ..
شيء راح يصير قريب ..
حست بالعبره تخنقها ومو عارفه وش السبب ..
اول ما خلصت الدكتوره محاضرتها ما انتظرتها حتى تطلع ..
على طول طلعت قبلها واتجهت لمكان الشله ..
خايفه على سامي .. فيه شيء راح يصير لسامي ولازم توقفه مهما كان ..
وقفت تلف نظرها بينهم ..
ريان .. عماد .. يزيد .. صالح .. بس سامي مو موجود ..
عماد: اوه اهلييين دانا .. اسمعي ابغـ....
قاطعت كلامه تقول بخوف: وين سامي ..؟!
استغربوا من سؤالها فقال ريان: والله ما ندري .. من وقت ما طرده الدكتور ما شفناه ..
يزيد: يمكن رجع للبيت مع انه مو من عادته يرجع من دون لا يقولنا ..
عماد: مستحيل .. هو بنفسه قالي لما اطلع من المحاضره راح اعطيك طريجه ترفع فيها ضغط لينا ..
صالح: طيب يمكن يت له مكالمه طارئه ..
طلع ريان جواله ودق على سامي وهو يقول: اللحين نعرف السبب ..
طالعت دانا فيه والخوف اللي بصدرها زاد اضعاف الاضعاف ..
انتظر ريان سامي يرد عليه والحمد لله في اخر رنه رد وهو يقول بهدوء: نعم ..
ريان براحه: ياخي خوفتنا عليك .. وينك ..؟!
سامي بنفس الهدوء: ليه تسأل ..؟!
ريان بإستغراب: شفيه صوتك تعبان ..؟!
سامي: يتهيأ لك .. ماهو تعبان ولا شيء ..
ريان بخوف: اسمع سامي .. انت وينك اللحين عشان اييك .. وضع صوتك مو مريحني ..
ضغط سامي على البنزين واسرع اكثر ..
لف نظره على اللوحه الجانبيه وطالع فيها لفتره بعدها قال: بشارع الـ***** بس لا تييني لأنه ما راح اوقف سيارتي ..
ريان: سامي انا متأكد انك تمشي فوق 120 كيلو .. هد سرعتك ووقف في اقرب مكان مناسب عشان اقابلك فيه .. لا تسرع ووقف في اقرب مكان ..
سامي: ريان ترى مو وقتك .. انا ابي اكون لحالي فتره عشان ...
عقد حواجبه وهو يشوف من بعيد زحمه ..
زحمه على الطريق السريع ..!!!
غريبه .. بس يمكن صار حادث ..
ضغط على المكابح عشان يوقف سيارته اللي تمشي حول 170 كيلو ..
سرعه جنونيه كالعاده ..
تصلبت رجله للحضه والصدمه تغطي ملامح وجهه بالكامل ..
المكابح ..
المكابح ما هي راضيه .. ما هي راضيه تنضغط ..!!!
مــاهـو قــادر يوقـــف سيـارتـه ..!!!!!!
هز راسه بلا وضغط عالمكابح بقووووه ..
يحاول .. ويحاول انها تنضغط بس مو راضيه ..!
ليش ..؟!!
شنو صار فيها ..؟!!
اليوم الصبح كانت تمام و .....
مر براسه صورة جاك ..
لا .. مستحييييل ..!!
ريان: الو .. الو سامي وين رحت ..؟!
رفع سامي راسه يطالع في الطريق ..
السيارات ..!!
الناس ..!!
الشرطه ..!!!!
كلها موقفه قدامه ..
راح يصدم .. راح يموت .. راح ينتهي فعلا ..!
لا يمكن .. لا ابدا لا يمكن ..
هز راسه وهو يقول: مستحيل .. مستحيل ..
ضغط اكثر من مره واكثر واكثر ..
بس من دون فايده ..
خاف ريان من كلام سامي وقال بخوف: الو ســــامي شفيـــــك ..؟!!
طالعوا الشله كلها بريان وهم مو فاهمين شفيه ..
بس واضح ان السالفه كبيره ..
وقف ريان فجأه عن الكلام وبإذنه يسمع كل شيء ..
صراخ سامي ..
صوت قوي ومخيف ..
تكسر .. وتحطم وبعدها طوط طوط ..
انقطع الخط ..!
ظل على نفس وقفته وبعيونه نظرات الصدمه اللي خوفت اصحابه ..
يزيد: ريان .. ريان شسالفه ..؟!
ريان بذهول: صدم ..!!! حادث ..
شهقت دانا لما سمعت كلامه ..
حادث ..!!! حادث سياره ..!!
لا يكون صدم ..؟!
لا يكون مات ..؟!!
صالح: انت شقاعد تخربط ..؟! عن اي حادث تتكلم ..؟!!
عماد: لا .. اكيد انت ما تقصد اللي ببالي ..
جلس ريان على الكرسي اللي وراه وقال بصدمه: إلا .. انا سمعت .. بس يمكن اتخيل .. بس لا .. هذا اكيد حادث .. اكيد صلح حادث .. بس يمكن تكون هذه الاصوات مقلب ..
مسك راسه بقوه وهو يقول: لا لا انا ما اتوهم ..
وقف وكمل: سامي صلح حادث .. بس مستحيل يكون مات .. انا رايح اشوف ..
مسكه يزيد من ايده وهو يقول: ريان اهدأ .. انت متأكد من اللي سمعته ..
صرخ ريان وهو يقول: ايـــه متأكد .. سمعت صوته .. سمعت صوت ارتطام قوي كمان .. غبـــــي .. اكثر من مره قلت له لا تسرع .. لا تسرع بس ما يفهم ..
قام عماد: انا حأروح معك .. بس انت عارف هو فين ..؟!
ريان: بشارع الـ****** .. عيل في اقرب مستشفى بيكون فيها .. انا رايح واللي يبغى يي يركب معي قبل لا احرك السياره ..
واتجه مسرع ناحية سيارته ولحقه يزيد وصالح ..
طالع عماد في دانا اللي كانت واقفه وواضح عليها انها بتبكي في اي لحضه ..
مسك ايدها وقال: امشي .. اعرف انج اكثر وحده خايفه لدرجة ان ايدج ترتجف ..
وسحبها معاه لبرى الجامعه ..

========================================

جالس بكل برود بالصاله وحاط السماعات على اذنه وكأنه يترقب اللحضه الحاسمه ..
وزوجته جالسه عالكنبه المقابله تطالع فيه وهي خايفه ..
لا .. المفروض ما تخاف ..
هي بالأمس راحت لسلطان واكيد هو منع ولده من الخروج برى البيت ..
اكيد منعه ..
لأنه إذا ما منعه فراح ينفذ زوجها خطته في تعطيل المكابح وبعدها ولدها راح يموت ..
زوجها جاك مصر على قراره ولا قدرت عليه ..
بنتها امس كلمته .. بس ما قدرت تقنعه ..
باتريك كلمه .. بس ما قدر يقنعه ..
محد يقدر يغير رايه .. محد ..
متى ينتهي العذاب النفسي اللي هي عايشه فيه ..؟!
متــــى ..؟!
صحيت من سرحانها على صوت ضحكته العاليه ..
دخل الخوف لقلبها ..
ولدها .. شصار على ولدها ..؟!
حست بقلبها ينقبض .. حست بالألم في صدرها ..
فتحت فمها وقالت بخوف: لماذا .. لماذا تضحك ..؟!
ابتسمت بإنتصار وحرك جواله وهو يقول: لقد وضعت هاتف اخر بداخل السياره وابقيته طول هذه المده متصلا بهاتفي .. هههههههههه اجل لقد سمعته .. لقد سمعته وهو يموت .. انه شيء جميل لا يمكنك تخيله بتاتا ..
بلعت ريقها من الصدمه وهي تطالع فيه ..
لا .. لا يمكن ..
هذا خطأ .. هذا مستحيل ..
نزلت دموعها على خدها فتقدم منها وجلس بجنبها ..
مسح دموعها وهو يقول: لما هذا البكاء .. انه مجرد طفل قذر .. والقذارة يجب التخلص منها .. ان كنتي تريدين ولدا بهذه الشده فيمكنك ان تنجبي واحدا غيره .. لا تقلقي ..
شهقت ولفت تطالع فيه ..
انتبهت لضربه في خده من تحت توها تشوفها ..
ما ركزت عالامر كثير ..
لأنها مو قادره تركز في اي شيء ..
كيف تركز وهي توها سامعه ان ولدها مات على ايد زوجها ..
هذا كثير عليها ..
مره كثيييير ..
طيب ليه ..؟!
هي ولأول مره تستنجد له فليش ما منع ولده من الخروج برى البيت ..؟!
ليه ما منعه ..؟!
ليه ..؟!

........................................

بعد ساعه من مرور هذه الاحداث ..
سلطان الراهي .. ابو سامي كان جالس على طاولة الطعام ويتغدا وفكره مشغول بأحدى امور شركته ..
لف على ريندا الواقفه جنبه لما تذكر سامي وسألها: ما رجع سامي من جامعته ..؟!
ريندا: لا .. لم يرجع حتى الان ..
استغرب وطالع في ساعته .. الساعه 2 ..
المفروض يرجع ..
تذكر كلام سيلينيا امس وهي تحاول فيه انه يمنع سامي من الخروج ..
هو متأكد انها صادقه .. بس هذا الجاك ما يقدر يقرب من ولده ابدا ..
راح اليوم الجامعه وواحد من حرسه الاشداء يراقبه ..
واللحين قبل ساعه راح ذاك الحارس للجامعه عشان يراقبه في طريق العوده بعد ما يتأكد من سلامة السياره ..
انفتح الباب ودخل ذاك البودي قارد المصري اللي ارسله سلطان لمراقبة ولده وواضح على وجهه الارتباك ..
استغرب سلطان لما شافه فقال ذاك الحارس: انا بأعتذر على الدخول من غير اذن بس .. بس فيه مصيبه صارت ..
حس سلطان بالخوف وهو يقول: عن اي مصيبه تتكلم ..؟!
الحارس: انا روحت للجامعه الساعه 12 ونص عشان انتظر سامي لحد ما يطلع .. ومثل ما امرتني رحت اولا لسيارته عشان اتأكد من سلامة المكابح بس ما لقيت اي اثر لسيارته .. طلع الكل من الجامعه وراحت معظم السيارات وهو مالوش اثر .. انا اتوقع انه استأدن بدري وطلع ..
انصدم سلطان ووقف من مكانه وهو يقول: مستحيل .. هو قال انه راح يطلع اليوم الساعه وحده ونص او ثنتين عالاكثر .. روووح بسرعه دور عنه في كل مجان وناد لي مراد على طريجك ..
الحارس: حاضر ..
طلع فشد سلطان على قبضته دليل الانزعاج وريندا تطالع فيه بإستغراب ..
تقريبا هذه المره الاولى اللي تشوفه فيها منفعل ..
بالعاده حتى لو كانت فيه مصيبه يكون محافظ على هدوءه وبروده ..
بس ما تلومه .. مهما كان فهذا قطعه منه ومن حقه ينفعل ..
حتى هي بنفسها بدأت تخاف والوسوسه مسيطره على مخها ..
كلام زوجته السابقه امس كان يخوف ..
تهور وطيش سامي كمان يخوف ..
الله يستر ..
تتمنى يكون بخير .. البيت ماله طعم من دونه ..
هزت راسها .. وشو يعني البيت ماله طعم من دونه ..؟!
ليه ..؟! ليه تفكر بهذه الطريقه التشاؤميه ..
ان شاء الله الموضوع مو كبير وراح يدخل عليهم كالعاده يصرخ وهو يلقي السلام ..
راح يرجع ويضايقها بخصوص لغتها الفصحى ..
راح يرجع .. هي مؤمنه بهذا الشيء ..
راح يرجع ..

========================================

26 - 3 - 2014, 08:25 PM

وقف قدام موضف الاستقبال وقال بسرعه: لو سمحت .. في مجان قريب من هني صار حادث سير .. ياكم مصاب اسمه سامي ..؟!
طالع الموضف في وجه الشاب اللي ما كان غير ريان وقال: تقصد الحادث اللي على شارع ال***** ..؟!
ريان: ايه هو .. بالله عليك بسرعه شوف .. ياكم مصاب من ذاك الحادث اسمه سامي ..
قلب الموضف في الاوراق بعدها قال: ايه .. واحد اسمه سامي كان سائق السياره وللأسف كان السبب الاساسي للحادث منه و .....
قاطعه ريان: مالي دخل في التفاصيل .. وينه اللحين ..؟!
الموضف: اخذوه لغرفة الطوارئ لأن حالته كانت حرجه جدا .. تنفس بطيء ودقات قلب ابطأ ..
ريان: جم رقم الغرفه ..؟!
طالع الموضف في الورقه بعدها قال: غرفة العمليات السابعه في قسم الطوارئ العامه ..
اشر عاليسار وهو يقول: من هذه الجهه ..
طالع ريان لجهة اليسار ..
ظل واقف لفتره بعدها راح لهناك ومعاه شلته ..
قبل شوي راحوا للشارع ذاك وشافوا حادث سير كبير وعرفوا ان المصابين اخذوهم لهذا المستشفى وحمدوا ربهم ان سامي ما كان من بين الاموات اللي كانوا يغطوهم ..

وقدام غرفة العمليات السابعه وقف ريان يطالع في الباب المقفل وفي الأشاره الداله على وجود عمليه بالداخل ..
يزيد: هو هني ..؟!
هز ريان راسه بإيه بهدوء ..
جلسوا عماد ودانا على الكراسي الموجوده بالقرب من الباب ..
استند صالح عالجدار اما يزيد فظل واقف قريب من ريان ..
خرجت ممرضه من الداخل مسرعه فمسك ريان إيدها بسرعه وهو يقول: لو سمحتي .. المريض اللي داخل هو سامي صح ..؟!
سحبت ايدها وهي تقول بلغتها العربيه المكسره: ايوا هو .. هو في مشكل واجد كبير .. الدكتور حازم واجد كويس بس المريض مشكله ..
بعدها راحت مسرعه تنفذ الامر اللي طلبه منها الدكتور حازم المشرف على هذه العمليه ..
عماد: الله يستر .. عمليه ..!! الوضع ما يطمن ..
هز ريان راسه بهدوء وهو يطالع في باب الغرفه ..
لا .. مو كل اللي يعملوا حادث خطير يموتون ..
مو كل اللي يعملوا عمليه خطيره يموتون ..
سامي ما راح يموت ..

"عالعموم يمكن بأي وقت تسمعوا خبر وفاتي"
عض على شفته وهو يتذكر ذي الجمله اللي قالها سامي ..
مستحيل تكون حقيقه ..!!
هو عارف ان الموت حق .. بس مو بذي السرعه ..
تعوذ من الشيطان وبدأ يهدئ نفسه بذكر ربه والدعاء ..
لف عماد وطالع في دانا اللي تطالع بالأرض وتفرك إيدها ببعض بقوه لدرجة الاحمرار ..
حط ايده على كتفها فأنتفضت فقال: معليش ما كان قصدي افزعج .. بس اهدئي .. الكل يصلح حادث .. والبعض منهم ينجون ..
فقالت بهمس وبصوت فيه رجفة البكاء: البعض ..!! يعني معظمهم يموتوا .. يعني سامي بيموت .. بيروح ..
عماد: دانا لا .. استهدي بربج .. الله فوق وهو القادر على كل شيء .. محد بيموت قبل يومه ..
شهقت ونزلت دموعها المتجمعه وهي تقول: كنت حاسه .. من الصبح وانا حاسه انه فيه شيء مو طبيعي راح يصير .. هو قالها .. هو قال انه يحس ان موته قريب .. بس مستحيل ..
بكت وهي تكمل: مستحيل .. مستحيل ..
وغطت وجهها بإيدها وهي تبكي ..
ما قدر عماد يصلح شيء ..
هو بنفسه متضايق ومهموم ومو قادر يشيل هم احد ..
طالع صالح في دانا وهي تبكي ..
بس لا تبكين .. يحس ان بكائها يأكد له ان سامي ما راح يخرج حي ..

ومن خلف ابواب غرفة العمليات ..
كان الدكتور حازم .. ويعتبر من اكفاء الدكاتره في هذا المستشفى ..
كان يقوم بعمله على اكمل وجه ..
اذا تولى امر مريض فهو ما يتركه إلا وهو بخير مهما كانت العقبات اللي ممكن تواجهه ..
طالع في وجه سامي ..
الحادث كان عنيف ..
كسر في الرجل وشعر في احد فقرات العمود الفقري ..
سيلان الدم ما وقف بسبب قلة وجود الصفائح الدمويه في الدم واللي تساعد على تجلط الدم ..
كدمات في ايده .. ووجهه .. وبظهره ..
اما بخصوص رجله الثانيه فشكلها انسحقت تماما ..
عمل ربط الاورده .. وخياطة الجروح .. ومد الجسم بالدم الكافي ..
رفع عيونه وهو يراقب الشاشه .. معدل الضغط ينخفض بشكل كبير ..
لف عيونه شوي وشاف ان حتى نبضات القلب بدأت تنخفض بشكل خرافي ..
رجع بعيونه على موضع يده يكمل شغله ..
فقالت وحده من الممرضات: دكتور .. القلب نبضاته تقل بشكل كبير ..
د.حازم: شش .. انا شايف شايف .. راح اتصرف .. انتي راقبي الوضع وإذا وصل للمرحله الحرجه اعطيني ...
وقبل لا يكمل كلامه قاطعته تقول بخوف: دكتور النبض وقف تماما .. وقف ..
انصدم الدكتور وبسرعه حط قبضة ايده في العضمه الموجوده مابين الرئتين وبدأ بعمل انعاش يدوي للقلب ..
مره ورى مره .. ومره ورى مره ..
لف على الممرض اللي جنبه وقال بسرعه: هات جهاز الانعاش .. بسرعه ..
توتر الوضع جدا بالداخل ..
ونفس التوتر كان موجود بالخارج ..
لف ريان على يزيد وهو يقول: الريال مويود بغرفة العمليات من قبل لا نيي ولحد الآن ما طلع .. ليش ..؟!
يزيد: اهدأ .. ان شاء الله مو صاير إلا كل خير ..
ريان بإنفعال: عن اي خير انت تتحجى .. مرت اكثر من نصف ساعه ولحد الآن ماكو اي خبر .. ماكو خبر ابدا ..
يزيد: ريان لا توترنا اكثر ما نحن متوترين .. مو من عادتك تنفعل فلا تزيد الخوف بداخلنا ..
ضرب ريان بقبضته على الجدار بقوه لعل ألم ايده يغطي على ألم صدره ..
صالح ما زال ساند ظهره عالجدار ويدعي بداخله ..
عماد جالس ويطالع في الأرض بهدوء شديد ..
ودانا ضامه رجلها وتبكي بصمت ..
ألم قلبها يزيد ما يوقف ولا يقل ..
الاربعين دقيقه هذه اللي مرت كانت بمثل عذاب لها ولكل اصحابه ..
سامي بالنسبه لهم مو مجرد صديق ..
بالنسبه لهم اكثر من اخ ..
تعذب كثير بحياته ومع هذا ما كان يظهر الألم لهم ..
البسمه دوم على وجهه والضحكه ما تفارقه ..
يستهبل ويضحك وحياته مجرد عذاب ..
كان بالفعل غير ..

انفتح باب غرفة العمليات في هذا الوقت ..
وقفوا عماد ودانا وتقدم صالح ..
طلع الدكتور حازم وهو ينزل الكمامه اللي على وجهه ..
انصدم لما شافهم لأنه بالبدايه كان يتوقع ان المريض ماله احد يرافقه ..
طالع ريان في الدكتور من دون لا يتكلم ..
ما عنده جرأه يسأل لأن وجه الدكتور ما يطمن ..
تنهد الدكتور وقال: انتم من اقرباء الريال اللي داخل ..؟!
تقدمت دانا وسألته بخوف: سامي .. شنو فيه ..؟!
لف بعيونه عليهم .. يكره اللحضات هذه ..
اخذ نفس بعدها قال: انتم عارفين الدنيا شلون ماشيه .. ناس يولدوا وناس يموتوا .. الدنيا ميرد محطه صغيره وكلنا مصيرنا الموت ..
ارتعبت دانا من كلامه فقالت بصوت مرتجف: مات ..؟!
فتح فمه بيتكلم وهي تتمنى انه ما يتكلم ..
لا ما تبغى تسمع .. ما تبغى ..
الدكتور: إنا لله .. وإنا اليه راجعون .. محد يموت قبل او بعد موته .. عملت كل اللي اقدر عليه لكن قدرت الله فوق كل شيء ..
فكمل بهدوء: ادعوا له بالرحمه ..
ادعوا له بالرحمه ..!
ادعوا له بالرحمه ...!!
ادعوا له ... بالرحمه ..!!!!
يعني مات .. سامي مات ..
صرخت دانا ورجعت خطوتين ورى وهي تهز راسها بلا ..
تهز راسها وكأنها تنفي ..
تنفي هالكلام .. تنفي هذا الواقع ..
ظل ريان واقف يطالع في الدكتور واخر كلماته يتردد كالصدى في راسه ..
محد يموت قبل او بعد يومه ..
إنا لله وإنا إليه راجعون ..
ادعوا له بالرحمه ..
هذا كذب ..!
هذا شيء مو صحيح ..
قبل كم ساعه كان يستهبل بالمحاضره ..
قبل كم ساعه كانوا يضحكوا ..
قبل كم ساعه كان عايـــش ..
كـــان عايــــــــش ..!!
هز راسه بلا وهو يقول بلخبطه: كان عايش ..! عايش .. حي ويضحك ..
طالع في ايده وكمل: كيف راح ..؟! كيف يعني مات ..؟! كيف انا مب فاهم ..
حط الدكتور إيده على كتفه وهو يقول: كلنا راح نمشي في نفس الطريج .. الموت يي فجأه .. ادع له بالرحمه وتماسك يا ابني ..
هز ريان راسه بإستنكار وهو يتذكر صاحبه ..
اعز اصحابه .. شلون مات ..
شلون راح وتركه ..؟!
ليه راح وخلاه لوحده ..؟!
اسند ظهره عالجدار وجلس عالارض وهو يحس بألم ..
ألم يعتصر قلبه من جوا ..
سامي راح ..
ارتجفت شفته وهو يقول: راح .. ما راح اشوفه .. ابدا .. اختفى ..
تجمعت الدموع بعيونه وحاس بالعبره تخنقه ..
ليـــــــه ..؟!
ليـــــــه مات سامي ..؟!
شلون يموت وهو ما حقق شيء من اللي كان يتمناه ..؟!
كان يتمنى يعيش طبيعي .. مثل بقية الناس ..
كان يتمنى يسمع كلمة بابا .. يتزوج ..
كان يقول ان امنياته هذه مستحيله ..
عاش بعذاب محد عاشه وكان يكتمه بصدره ..
يوم ورى يوم والعذاب يزيد ..
ليه يموت وهو متعذب ..؟!
ليه يموت وهو ما ذاق طعم الراحه ..؟!
حتى البنت اللي يحبها ويتمنى يتزوجها ما قدر انه يتحقق امنيته فيها ..
عض على شفته وهو يمنع دموعه من النزول ..
كيف راح يعيش بحياة ما فيها سامي ..؟!!
ما فيها استهباله ولا عبطه .. ولا ضحته ومزاحه ..؟!!
كيـــــــف ..؟!!
ولا احد من اصحابه .. يزيد وعماد وصالح قادرين يستوعبوا السالفه ..
يستوعبوا ان هذه الدنيا ما صار فيها واحد اسمه سامي ..
آلام تقطع صدورهم ..
آهات تمزق احشائهم من جوا ..
جلس يزيد على الكرسي وطالع في الارض وهو يذكر الله ..
العبره خنقته ومع هذا يحاول يقوي نفسه ..
نزلت دمعته غصب عنه .. نزلت لفراق صاحب كان غير عن كل الاصحاب ..
مسحها بإيده اللي ترتجف ..
طالع في ايده لفتره .. قفلها وشد عالقبضه عشان توقف ارتجاف ..
يبغى يقوي نفسه بس مو قادر ..
مات سامي ..!!!
جمله ما راح يقدر يستوعبها طول عمره ..
مصيبه ما يدري ان كان يقدر يتجاوزها او لا ..
ما يدري ..
لف صالح وابتعد عن المكان ..
طلع من المستشفى كله ..
ما راح يظل هنا اكثر .. هو من النوع اللي يتأثر بسرعه ..
وكل نفس ذائقة الموت ..
الكل راح يموت .. الكل ..
محد راح يظل عايش غير رب العباد ..
اخذ له تاكسي يوصله للجامعه عشان ياخذ سيارته وهو لحد هذه اللحضه متماسك ..
لكن تماسكه ما راح يطول وهو عارف هذا الشيء مثل ماهو عارف ان سامي ما عاد له رجعه ..
تركهم وراح للعالم الثاني ..

طالع الدكتور فيهم شوي وفي حالاتهم ..
هو فعلا يكره هذه المواقف ..
حاول قد ما يقدر لكن الله هو الواحد القادر المقدر ..
لف وابتعد عنهم ..
طالع عماد في الدكتور وهو يبتعد ..
طالع فيه وبعيونه نظره حزينه ..
لف بعيونه على اصحابه ..
ناقصهم سامي .. اللي راح للأبد ..
اسند راسه على ايده وتجمعت الدموع بعيونه ..
ليـــ ـ ــه مـــ ــ ــات .. ؟!
جلست دانا عالأرض وهي مصدومه ..
صدمتها كبيره .. قاتله ..
هزت راسها بلا وهي تقول: ما مات .. لا هذا جذب .. سامي ما راح يموت ويخليني ..
لف عماد عيونه وطالع فيها ..
قام من مكانه وجلس على رجله جنبها وقال وهو يحط إيده على كتفها: دانا .. ادعي له بالرحمه بدل ما ...
قاطعته تقول بصراخ: لا مــــا مـــــــات .. سامــــي ما راح يموووت ويخيلينــــي ...
ارتجفت شفاتها وهي تقول: الامر مو مقبول .. لسى .. بدري .. ما راح يموت .. لا .. احبه .. احبه فليش يتركني بعد ما قال لي انه هو بعد يحبني .... ليه القسوه هذه ..
اندهش عماد من كلامها لفتره بعدها تنهد وقال: خلاص .. دانا ماكو شيء بالموت اسمه بدري او متاخر .. كلن يموت بيومه ..
هزت راسها بلا وهي تبكي ..
لا ما تقدر تصدق ..
الامر لحد الان مو راضي يدخل مخها ..
شلون يموت ..؟!
شلون يموت ويخليها ..؟!
مـــــات ..!!!
هالكلمه لسى مو قادره تستوعب حروفها ..
شهقت وهزت راسها بلا وهي تقول ما بين دموعها: ما راح يموت .. سامي لا ما راح يتركني .. مستحيـــــــل ..
حاول عماد يفتح فمه ويهديها بس مو قادر ..
نزل نظره لتحت وبلع ريقه اكثر من مره عشان يمنع نفسه من البكاء ..
قامت دانا وهي تقول: لا مو صحيح .. يمكن لسى هو حي بس هم ما يدرون .. يمكن توقف قلبه شوي وحسبوه ميت .. يمكن ...
فتحت الباب فقام عماد بسرعه وراها يوقفها .. البنت فعلا راح تنجن ..
سحبت ايدها منه بقوه ودخلت للغرفه تدور بصيص امل ان سامي ما زال عايش ..
اول ما شافوها الممرضات حاولوا يطلعونها بس ماهي راضيه تطلع ..
حست بجسمها يرتجف وهي تشوفه هناك على السرير والشرشف الابيض يغطيه بالكامل ..
لا .. مستحيل ..!!
سحبت نفسها من بين الممرضات وهي تقول بهستريا: بعــــدوا عنـــــي .. ابـــــي سامـــــــي .. ابعـــــــدوا ..
دفتهم بعيد وجت عند سامي تطالع فيه ..
قربوا الممرضات منها عشان يطلعوها بس عماد وقفهم وطلب منهم انهم يتركوها شوي ..
بعدها طالع في دانا اللي كانت تطالع في سامي بهدوء ..
مدت إيدها ومسكت إيده اللي كان الشرشف مو مغطيها ..
بـــــارد ..!!
المكان بــــارد .. والايد بارده ..!!
كل شيء بارد .. وهادي ..
رفعت إيدها وطالعت فيها ..
احمر .. اصطبغت إيدها باللون الاحمر اللي كان موجود بإيده ..
احمر ..!!
لون الدم ..!!!
تقوست شفتها ونزلت دموعها مره ثانيه على خدها وقالت بإرتجاف: سـ ـامـ ـي ..
شهقت وهي تنتظر رد منه ..
بس ما سمعت صوته .. ولا تحركت ايده ..
فقالت بصوت باكي: رد علي .. سامي انا دانا .. سامي واللي يسلمك رد علي .. لا تكون اناني .. لا تكون قاسي .. مو انت كنت تقولي انك راح تساعدني اذا احتجت مساعده ..؟!
حطت إيدها على صدرها وهي تقول: قلبي يعورني .. ساعدني يا سامي .. انت وعدتني ..
بكت وكملت: انت وعدتني .. مسكت بإيدي وقلت لي ثقي فيني .. راح اساعدج .. طيب ياللا ساعدني .. انا اتألم يا سامي ..
شهقت تنتظر منه يساعدها مثل ما وعدها ..
تنتظر منه يبتسم بوجهها ويقولها لا تبجي زي الاطفال ..
تنتظر منه يخلصها من العذاب اللي هي فيه ..
تنتظر وهي عارفه ان انتظارها ما راح يكون له نهايه ..
لأن اللي تنتظره وصل لنهاية حياته ..
وغادرت روحه الارض ..
وللأبد ..
جلست عالأرض وضمت رجلها وبكت بصوت مرتفع ..
بكت بكاء ما قد بكت مثله بحياتها ..
قالها انسيني .. بس مو بذي الطريقه ..
قالها راح ابعد .. بس مو بذي الطريقه ..
تقدم عماد منها بعد ما قاله الممرض انهم راح يودوا الجثه للثلاجه لحد ما يجي ولي الامر ويهتم بموضوع الغسل والدفن ..
حط ايده على شعرها وقال: دانا .. سامي حتى لو مات فهو حي بداخلنا وما راح يموت .. وصدقيني راح نقابله بإذن الله في الينه ووقتها ما راح يكون فيه شيء اسمه موت او خوف من الفراق ..
سمعها تقول بصوت خافت باكي: طيب .. طيب متى اموت انا بعد عشان اشوفه ..؟! متى اترك هذا العالم اللي ما فيه سامي ..؟!
طالع فيها عماد وقال بهدوء: محد يدري .. غير رب العالمين ..
مسك إيدها ووقفها وقال: هيا نطلع ..
شهقت اكثر من مره ولفت تطالع في هذا الجسد اللي ممدد على هذا السرير الابيض ..
ظلت تطالع فيه والاختناق اللي بحلقها يزيد ويزيد ..
مو قادره تتحمل منظره ..
مو قادره تتحمل هذه الحقيقه المُره ..
عماد بهدوء: دانا .. هيّا ..
صار شكل سامي باهت ..
مو واضح بعيونها .. مشوش ..
وكل شيء يدور ويدور .. واختفى كل شيء من قدامها ..
كل شيء ..
انصدم عماد وهو يشوفها تهوي على الارض ..
مسكها قبل لا تطيح وهزها وهو يقول: دانا ..! دانـــا .. دانـــــــا ..
وبعدها اختفى صوته وما عاد سمعت بعدها شيء ..
هل ماتت ..؟!
ابتسمت .. ايه تبغى تموت .. وتختفي من ذي الحياة مثل ما اختفى منها سامي ..
تختفي وتلتقي بسامي في الجهه الاخرى ..
تتمنى انها فعلا تكون ماتت مو مجرد اغماء ..
لأنها إذا صحيت فما راح تتحمل تعيش بحياة يستحيل فيها انها تقابل سامي ..
سامي اللي كانت نهاية قصته في روايتنا هي الموت ..
خلاصه من كل عذابه كان الموت ..
وماذا عن الباقي ..؟!
هل كل النهايات متشابهه ..؟!

x .. انتهـــــــى .. X
وصلنا لنهاية البارت الثاني والعشرون الجزء الاول ..
بصيغة اخرى وصلنا لنهاية البارت ما قبل الاخير الجزء الاول ..
بقي ثلاث اجزاء تقريبا عن النهايه ..
دعمكم راح يساعدني كثييير فلا تبخلوا علي بآرائكم اللي استفيد من بعضها ..
محبتككم // صوصتككم ()*

|$[ نهاية البارت ]$|

27 - 3 - 2014, 12:45 AM

|$[ البآرت الثاني والعشرون الجزء الثاني ]$|

كُل شيء تغير ’ تراجعتْ ..
بـِ تفڪِيري .. كلِماتِي .. وُعودِي !
والسّبب .. مجہُول ’!

يوم .. يومين ... ثلاث ..
لا .. اسبوع .. مر اسبوع من اخر حدث صار ..
الاوضاع تمام وماشيه بهدوء كدوران الأرض حول نفسها ..
ناس رايحه وناس راجعه ..
ارواح تموت .. وارواح تنولد ..
هذه هي الحياة وهذا هو قانونها اللي فرضه رب السماء ..
قانون اقوى من رغبة اي بشري ..
تعالى صوت ضحكات هذه الطفله اللي ما وصل عمرها لعشر سنوات ..
ابتسم وقال: اليوم مبسوطه بزياده ..
هزت راسها وهي تقول: شلون ما انبسط وعمو طارق اخيرا زارنا .. من زمان وانا انتظرك ومهند دايما يقولي ان عمو راح يي ويزورج فاصبري وانتظري .. انتظرت وخلاص .. انت زرتنا ههههههه ..
ابتسم لها ففكت الكرتون وطلعت الهولز وهي تقول: وهذه المره ما يبت حبه او حبتين هولز .. يبت لي الكرتون كله .. انت وايد طيب و....
وقفت كلامها فتره وهي تطالع فيه ..
كان سرحان يطالع في الفراغ وكأنه يفكر في امر يشغله ..
هزته وهي تقول: هيه .. عمو طارق .. عمو ..
انتبه لها وقال بإبتسامه: هلا ..
رزان: شفيك ..؟! احسك مرآ زعلان ..
هز راسه بلا وهو يقول: مو زعلان ولا شيء .. بس تذكرت شيء ..
رزان: وشهو هذا الشيء ..؟!
طارق: اممم شيء مزعج وينرفز .. بس طيب .. لا تشغلي بالج .. ها كيف دراستج ..؟!
رزان بهدوء: بخير .. عمو طارق ..
طارق: نعم ..
رزان بنفس الهدوء: اخوي مهند .. طيب ولا شرير ..؟!
اندهش طارق من سؤالها بس ما يلومها ..
هي بعيونها شافت اخوها يحاول يقتلها ويقتل الشخص اللي كان لها مثل العم ويساعدها ..
ابتسم وقال: لا .. مهند وايد طيب ..
قوست فمها وواضح انها شوي وتبكي وقالت: لا .. هو يصلح نفسه طيب ولمن ما اكون فيه يصير شرير .. اخذ مسدس الاشرار وكان يبغى يقتلك .. وكمان طلق علي مثل الاشرار .. قالي انه ما كان يقصد وعاملني بطيبه بس انا مو عارفه وشهو الصج ..؟!
رفعها طارق وحطها على رجله وقال: اسمعي حبيبتي .. لو مهند شرير جان ما اعطاج مصروف ولا وداج الملاهي ولا وصلج للمدرسه .. لو كان شرير جان ما ودى امج لعند دكتور بعيد وشاطر ولا ابتسم بويهج ولا لعب معاج .. هو وايد طيب .. ويحبج ويحب امج .. يحبكم كلكم ..
رزان: لا .. لو كان طيب جان ما طلق علينا النار ..
سكت طارق لفتره يدور له شيء يناسب عقلها الصغير ..
شوي ابتسم وقال: لا .. مو مهند اللي اطلق النار .. هذا شرير ثاني تنكر بشكل مهند عشان يخليج تكرهينه .. هو يكره مهند وعشان جذي يبغاج تكرهينه .. مثل اللي بأفلام الكرتون لما الاشرار يقلدون الطيبين عشان يخلون الناس يكرهونهم ..
طالعت رزان فيه بذهول وقالت: يعني زي لما الشرير صلح نفسه سبايدر مان وصلح اشياء شريره وصار كل الناس يكرهونه ..
هز طارق راسه بإيه مع انه مو عارف ايش تقصد ..
ظلت تطالع فيه بعدها تجمعت الدموع بعيونها وقالت: الحمد لله ..
طارق: وخلاص اطمئني الشرير هذاك مسكوه الشرطه وصار بالسجن ..
انفتح الباب في هذا الوقت ودخل مهند ..
اندهش لما شاف طارق موجود ..
نزلت رزان من فوق طارق وجريت لمهند تحضنه وهي تقول: مهنـــــــد احبـــــــك ..
جلس مهند وحضنها فقالت: ليه ما قلت لي من اول انك مو انت اللي بغيت تقتلني .. لو علمتني جان صرت احبك اكثر وما اخاف منك ..
استغرب مهند من كلامها ..
ايش تقصد ..؟!
قام طارق وقال: السلام عليكم مهند .. اعذرني لأني ييت وانت مو مويود .. توقعتك فيه بس اللي فتح لي كانت رزان ..
وقف مهند وقال: لا عادي ..
طارق: كيف هي صحة امك ..؟!
ابتسم مهند لا إيراديا وهو يقول: قبل شوي كلمني رفيجي وبشرني بأنها بحدود شهر واحد راح تسترد كامل عافيتها .. بتصير بخير واقدر ارجعها لهني ..
ابتسم طارق وقال: الحمد لله على سلامتها .. ألف مبروك ..
رزان بفرحه: راح ترجع ماما ..؟!
ابتسم لها اخوها وقال: طبعا .. وبتكون بخير ..
اتسعت ابتسامتها وفرحتها الطفوليه ازدادت ..
مبسوطه لأنها راح تشوف امها وبتكون كمان بخير ..
اتجه طارق للباب وهو يقول: ياللا انا استأذن .. وراي شغله وايد مهمه ..
مهند: وايد مهمه ..!! شنهي ..؟!
طارق بإبتسامه: ايش هالاهتمام ..؟!
رفع مهند كتفه وهو يقول: طبيعي اهتم بأمور احد تلاميذ ابوي ..
طارق: اهتمام ..!! ليه ما تعترف وتقول فضول ..
مهند: ههههههههههههههه تقدر تقول جذي .. خلني اخمن .. السالفه تخص البنت اللي تحبها صح ..؟!
تذكر طارق اسيل وقالت: هي من اكبر اهتماماتي .. لكن الشغله ما تخصها .. لحضه .. إلا تخصها لكن من بعيد .. يعني من الاخر ما تخصها وبس ..
مهند: ههههههه حيرتني بصراحه ..
طارق: عالعموم شغله خاصه ما اقدر اقولها لأي احد فاعذرني ..
رفع مهند حاجبه وهو يقول: اها .. طيب ابسألك .. رفيجك اللي معك بنفس السكن يعرف عنها ..؟!
هز طارق راسه بإيه فقال مهند: عيل ليه تقول ما اقدر ..
طارق: هههههههه لأنه هو الوحيد اللي فعلا ما اقدر اخبي اي شيء عنه ..
مهند بلا مبالاه: اوكي اوكي .. ومثل ما قال المثل الخبر باجر بيكون ببلاش ..
طارق: مو كأن المثل ناقص ..
مهند: إختصار .. شالفايده من المثل كله ..؟!
ابتسم طارق بعدها قال: ياللا انا تأخرت وايد .. مع السلامه ..
مهند: باي ..
وطلع بعدها طارق من الشقه ..
تنهد مهند بعدها طالع في اخته اللي كانت واقفه تطالع فيه وسألته: عن ايش كنتم تتكلمون ..؟!
ابتسم وقال: كلام كبار ..
ابتسمت هي كمان وقالت: اها .. يعني انتم اصحاب ..؟!
طالع فيها شوي بعدها قال بإبتسامه: لا .. لكن قريب بنكون اصحاب ..
زادت ابتسامتها الجميله من بعد جملته الاخيره اللي قالها ..

========================================

27 - 3 - 2014, 12:45 AM

الساعه خمسه وخمس العصر ..
في الصاله الكبيره ..
كان واقف على الجدار قريب من الزاويه والضجر واضح على وجهه ..
تأفف وهو يقول: طفش .. زهق .. اووف ..
نزلت بنت عمه من الدرج ولما شافته ضحكت وهي تقول: ههههههههه ها كيف عقاب امي يا شدوي ..؟!
طالع شادي فيها بنص عين وقال: اقول جب بس يا سهاموه ..
ارتفع ضغط سهام من الكلمه ذي ..
من كثر ما سمعها من امها عرف انها تكره تسمعها ..
سهام: اقول انجب حظرتك واستمتع بعقابك المريح جدا ..
وبعدها اتجهت للمطبخ فضحك شادي وهو يقول: ههههههههآي بتروح تبلع هالقدر المستدير هههههههههههههههه ..
وقفت سهام بمكانها بعدها لفت عليه وقالت: انت متى بتبطل تناديني بهذا الاسم ..؟! وزني تمام يا احول وانا اكل طبيعي مثل ما ياكلون كل الناس .. الشخص اللي مو طبيعي هني هو انت ..
شادي: ههههههههههههههههههه اقول يالقدر المستدير امس استاذ الرياضيات قالنا ييبوا امثله على المجسمات الكرويه قلت له وحده اعرفها اسمها سهاموه ههههههههههه وكان فعلا من افضل الامثله ..
ارتفع حاجبها وانخفض من العصبيه بعدها تقدمت لعنده فإبتسم بإنتصار ..
لما قربت من عنده وهي ناويه تأدبه بطريقتها رفع صوته ينادي: خـــــــاله .. تعالــــي شوفـــي لقدرج .. اقصد لبنتج .. يالسه تضايقنـــي ..
سهام بقهر: صج حيوان .. انقلع ..
وراحت للمطبخ ..
ضحك شادي عليها بعدها تنهد بطفش ..
تقدم شوي وطالع في التلفزيون ..
تأفف ورجع مكانه وهو يقول: باجي ساعه وعشر دقايق اظل فيها واقف .. عقاب قاسي اوووف ..
شوي ابتسم .. كل شيء يهون ..
كل شيء يهون دامهم عايشين كلهم مع بعض ..
هو ووسيم واثير مع شهد وشادن ..
لحد الآن ما نسي اللحضه اللي شافهم فيها داخلين مع الباب ..
ما كان مصدق .. ما كان مستوعب ..
واخيرا شاف اخته .. شيء كان مثل الجنه بالنسبه له ..
حتى لو ما قالها بلسانه لكنه يعترف انه ما يقدر يعيش من دونها ..
ما يقدر على فراقها .. يخاف عليها كثيير ..
هي اللي بقيت لهم من بعد امهم وابوهم ..
لو غابت عن عينه لحضه تجيه وساوس بأنه راح يفقدها مثل ما فقد ابوه وامه من قبل ..
لكن .. واخيرا .. كل شيء انتهى ..
ايام الخوف .. والذل .. وعدم الامان راحت ..
كل هالايام راحت .. ومالها رجعه ..
واللحين عايشين حياة ماكو افضل ولا أأمن منها ..
حياة مريحه .. هاديه .. جميله ..
قطع تفكيره صوت خطوات الام وهي تنزل من الدرج فأعتدل بسرعه في وقفته ..
طالعت فيه فرسم على وجهه ملامح البراءه فقالت: قديمه .. راح تظل ساعتين واقف عقاب عشان المره اليايه تتعظ ..
شادي: تبت .. تبت الى الله وقسم .. والله ما عاد اعيدها ..
عصبت الام وجت عنده ..
مسكته من اذنه وهي تقول: انا جم مره قلت لا عاد تحلف وانت جذاب ..
شادي: آيي آه اذني .. خلاص خلاص توبه والله توبه ..
شدت على اذنه اكثر وهي تقول: لا تحلف ابدا حتى لو كنت صاج .. مو على كل كبيره وصغيره تحلف .. فاهم ..؟!
شادي بألم: آييي آيي فاهم فاهم ..
فكته ففرك اذنه وقال بإنزعاج: هذا غش .. ليش ما تعاقبين ذاك الطفل وسيم .. حتى هو ما ذاكر ويلس يطالع معاي مصارعه ..
الام: جب .. ماكو صغير يعلم اللي اكبر منه الصح من الغلط .. ووسيم مسجين ماله ذنب .. انت اساس البلا .. اللحين دام المصارعه تيي بالليل وتشوفوها فإيش حقه تطالعوا اعادتها بالظهر ها ..؟! هاد الدراسه اللي مستواك نازل فيها عشان إعاده ..!!!
شادي: اصلا الحلقه كانت حلوه .. وكنت ابغى اشوف حركة شو لما غير ملامح ويه المدير .. والله حركه خطيييييره .. فاتتج .. من جد برد حرتي في ذاك الظالم اللي يذكرني بالدب المتغطرس ..
الام: يالس تحكي لي ها ..؟! يعني ابدا ماكو مشاعر ندم ..؟!
بعدها كملت بلهجة امر: اسمع .. انا وقت لكم ونظمت يومكم ولازم تمشوا على هذا النظام .. لكم وقت تذاكروا ووقت تلعبوا ووقت تطالعوا بالتلفزيون ووقت تناموا .. اللي يخترق هذا القانون اللي حطيته فراح يظل واقف مده نفس المده اللي اخترق فيها كلامي .. ساعه .. ساعتين او حتى خمس .. وعشان جذي خلك هني واقف لمدة ساعتين عشان المره اليايه تكون اكثر عقلانيه ..
فقال شادي بصوت منخفض: وسيم الغشاش .. لما اناديه يي معاي ولما ننكشف يبجي ويقول شادي ناداني .. له حساب وياي ..
الام: اشوفك بس تضايقه بكلمه ياويلك ..
شادي بإندهاش: اهب ..!! سمعتيني ..؟!
الام: هو صغير ولو انك ما تشوشر عليه جان سمع الكلام وما راح يعمل اي خطأ .. انت السبب الاساسي فلا اشوفك المره اليايه إذا بتسوي خراب تناديه معك .. فاهم ..؟!
شادي بتسليك: فاهم فاهم ..
رفعت الام حاجبها وهي تقول: وش تسمى ذي الطريجه ..؟!!
شادي: يسمونها تسليك ..
انتبه على نفسه وقال بسرعه: اسليك اسليك .. هذه الطريجه هي نوع من انواع التسليه ..
طلعت سهام من المطبخ في هذا الوقت وبإيدها صحن ورق عنب ..
دق تلفون البيت فتركته فوق الكنبه وراحت ترد ..
ميل شادي فمه وهو يقول: حطي كمان قوانين لسهام .. تقهرني ..
الام: مالك شغل .. هي لما كانت صغيره كنت احط لها واللحين اعتدلت ..
شادي بإستهزاء: ما اشوف فيها شيء معدل ..
شوي سألها يقول: حتى طارق ..؟!!
اخذت الام الكتاب اللي نزلت تاخذه من فوق التلفزيون وهي تقول: ايه حتى طارق كان له نظام غصب عنه يمشي عليه ..
ضحك شادي بنفسه وهو يتخيل طارق وهو صغير واقف عالجدار ..
طلعت الام الدرج وهي تقول: اعرف انك يالس تتخيل تخيلات مالها داعي .. الافضل انك تفكر بدروسك عشان تطلع شاطر مثل اولاد عمك ..
شادي: حـــــاضر ..
وكمل بصوت منخفض: يمكن يكون طارق شاطر لكن وين هي الشطاره المويوده بالقدر المستدير ..
ولف يطالع في سهام ..

بعد خمس دقايق خلصت سهام مكالمتها مع وحده من صحباتها كانت تبغى منها شيء ..
اخذت الصحن وطلعت لفوق ..
دخلت لغرفتها وكانت شهد وقتها جالسه وتطقطق عاللاب توب ..
قفلت سهام الباب وهي تقول: وين اثير ..؟!
شهد: نزلت تذاكر بحوشكم .. البنت بالمره مفتونه بالشجر والزرع اللي بالحوش ..
حطت سهام الصحن وجلست عالسرير وطالعت في شاشة اللاب فقالت: اووووه .. في اسبوع بس صرتي تعرفي كل شيء باللاب والنت ..
شهد: ههههههههه ما عمري مسكت لي كومبيوتر .. امنيتي اني املك واحد مثله .. ما توقعت اني بيوم من الايام راح استعمله بحريه ..
سهام: بس يعني تعلمتي بسرعه ما شاء الله .. صايره تعرفي كل شيء لدرجة تثبيت وتحديث البرامج اللي انا لين اللحين اخبص فيها ..
شهد: هههههههههه كل واحد وقدراته ..
سهام: احس في كلامج اهانه غير مباشره ..
شهد: ههههههه اخبار شادي ..؟! لين اللحين واقف ..؟!
سهام بضجر: اخوج شيطان على هيئة بشر .. ما يحتاج تقلقي عليه ..
تربعت عالسرير وكملت بنفس النبره: ما حكيتج عن اللي ساواه فيني اليوم الصبح .. امي وهي بتوصلنا للمدارس كالعاده انا كنت راكبه جدام بس مدري شفيه اخوج العله اصر انه يركب معي جدام .. الزبده كان ماسك قلم ويلعب فيه فطاح تحت عند ريلنا فنزل عشان ييبه .. يا شيخه ذي اخر مره اسمح له ييلس ينبي .. حركته كثيره ..
شهد: هههههههه يبي يغيضج ..
سهام: لأنه جلب .. الزبده لما وقفت امي عند مدؤستي فتحت الباب عشان انزل وادخل للمدرسه .. فطلع ان ابن اللذين ربط رباط جزماتي ببعض فتشقلبت وطخت برى السياره وهو انصرع من الضحك .. الفشيله الكبيره انه كانت فيه بنت من شلة ثوالث متناجرين مع شلتنا شافتني وانصرعت هي بعد ضحك .. وقسم انه في الفسحه يت مع شلتها لشلتنا وهاك مضايقات .. فصارت هوشه كبيره بيننا وفي النهايه صفينا طابور جدام المديره .. اصلا هي من شافت ان شلتنا احد الاطراف غسلت ايدها من الموضوع وودتنا عند الوكيله تتصرف معنا .. بس وربي اني ما انساها ذي الحركه .. خليه بس ينتظرني وانا بأردها له اضعاف ..
شهد: هههههههههههههههههه انتي وشادي مثل توم وجيري .. هو يصلح مقلب وانتي ترديها له ههههههههه ..
سهام بغيظ: لا تدخليني بأي تشبيه معه ..
شهد: هههههههههههههههههههههههه ..
ابتسمت سهام وهي تطالع في شهد ..
صديقتها وبنت عمها ..
مو مصدقه ان اعز صاحباتها صارت قريبه منها دووم ..
اهم شيء بالنسبه لها اللحين هي ان بنت عمها صارت بأمان وارتاحت اخيرا من تسلط راشد وشره ..
شهد: سهام ..
سهام: هلا ..
شهد: ابغى اقولج شيء ..
سهام: قولي ..
شهد: اممم ابغاج تياوبيني بصج .. احنا عبء عليكم ..؟! احس اننا ...
قاطعتها سهام تقول: اي عبء يا شيخه .. بالعكس امي بالمره استانست لما ييتوا .. حسينا ان في البيت حركه لأنه من بعد ما راح طارق للدراسه صار الهدوء في كل مجان .. وثانيا انتم لكم حق كبير من هذا البيت .. يدي حرم ابوج من حصته بالورث وقسم حصته على ابوي وعمتي .. يعني انتم من اهل البيت غصب عنا ..
طالعت شهد فيها بعدها قالت: اها .. المهم على طاري طارق نسيت اقولج شيء عنه .. لما ياء ياخذني من عند راشد احرجني بكلامه لما قال اني غبيه لأني مثلج ما لاحظت تشابه الاسماء .. وبصراحه كان واضح انه منزعج ..
سهام: ههههههههه ما عليج منه .. تراه هاوشني وهزئني عشان ذي السالفه .. له فتره طويله ما يرتاح في النوم عشانه يدور عنكم .. ما صار عنده وقت فراغ من كثر ما كان يلفلف ويسأل عنكم .. وفي النهايه يكتشف ان اخته هي صديقة بنت عمه وما لاحظت فإيش تتوقعي انه يصلح .. هههههههه بصراحه شيء يقهر بس احسن يستاهل لأنه صرخ في ويهي وهاوشني ..
ابتسمت شهد وهي تقول: انتي تتمشكلي مع الكل ..
سهام: هههههههههههههه على قد ما اتهاوش معاه إلا اني مستحيل اكره او ازعل منه .. حتى لو هو الغلطان ما اشيل بخاطري عليه .. المهم بحكيلج عن قصة حب اخوي مع طالبه بالجامعه ..
شهد: شنهي ..؟!
اخذت سهام حبة ورق عنب واكلته وهي تقول: اسمعي .. بجامعته بنت اسمها ....
وقفت عن الكلام وبعدها ظهر الغضب على ملامحها ..
اخذت كوب العصير حق شهد وشربته كله وشهد تطالع فيها بإستغراب ..
سهام بعصبيه: شدوووي الجلب ..
شهد: شفيج ..؟!
سهام بقهر: الغبي الاهبل الحيوان حاط على الورق عنب خل .. حاط خل ابن اللذين .. وقسم اني لا اردها له ..
شهد: هههههههههههههههههههه ..
سهام: وربي انه نذل .. ما يكفي تشبيهي بالقدر المستدير .. ما زال يضايقني اللي ما يتسمى ..
شهد: ههههههههه اهم شيء هي القدر المستدير هذا هههههههه ..
سهام بقهر: لازم تأدبي اخوج هذا .. انا وحده طبيعي بس كل ما قال القدر المستدير اتخيل نفسي مثل القدر .. النخيل يقتلني وقسم ..
شهد: ههههههه طيب طيب راح اكلمه ..
سهام: اقول شهد عارفه اي نوع من القدور اتخيل .. ذيج الجره اللي دايم تكون في علاء الدين ولها غطاء .. شايفه قد ايش لعوزني ..
شهد: هههههههههههههههههه ..

========================================

27 - 3 - 2014, 12:47 AM

نزل من سيارة التاكسي اللي وصلته ..
فتح الشنطه الرياضيه اللي فيها كم لبس له وطلع محفضته ..
اعطى السايق حقه بعدها اتجه لبوابة هذا القصر ..
دق الجرس بهدوء تام ففتحت له احد الخدم وقالت: نأم ..
طالع فيها لفتره بعدها قال بهدوء: ابغى ادخل ..
طالعت فيه شوي بعدها تذكرت من يكون فبعدت وقالت: ادخل ..
دخل لداخل ولف نظره عالمكان بس ما لقي احد ..
نزل الكاب اللي كان لابسه ورماه عالكنبه ورمى الشنطه الرياضيه معه ..
جلس جنب اغراضه واخذ ريموت المكيف المركزي وحط التبريد على اقصى حد ..
رمى الريموت جنبه وهو يقول: التاكسي ما فيه ذرة هوا .. كنت راح اموت من الحر ..
التاكسي ..!!
ابتسم بهدوء .. من بعد سياراته الرياضيه اللي كل شهر كان يغيرها الى تاكسي ..
من بعد بطائق الائتمان والصرافات الي كم فلس بمحفضه ..
من بعد القصور اللي يعيش فيها الى مشرد من دون بيت ..
وكله بسبب تجارات ابوه اللي كان اساسها حرام ..
واللحين الحكومه حجزت على كل املاكه لحد ما يسلم نفسه للشرطه ويتحاكم .. ومن بعدها الاموال يا اما كلها تروح للحكومه يا اما بعضها ..
القاضي هو اللي يحكم ويحدد ..
فعشان كذا ماله مكان ولا سياره ولا حساب بالبنك لأنها كلها تخص ابوه ..
استرخى عالكنبه وغمض عيونه وحاول يشغل تفكيره بأي شيء ..
بعد عشر دقايق نزلت وحده من الدرج وحست ببرد شديد بالمكان فقالت: لا يكون المينوته سيرين رفعته إلى هذا الحد ..؟!
تأففت واتجهت للكنبه اللي حطت الريموت فوقها لكنها لما شافت الشاب اللي هو إياد موجود استغربت ..
قربت منه فشافته نايم وبطريقه غلط كمان ..
لفت تطالع في الشنطه والكاب وقالت: متى ياء لهني ..؟! شكله هو اللي رفع مستوى المكيف ..
هزته من كتفه وهي تقول: إياد .. إياد اصحى ..
فتح عيونه فأستوعب انه نام وهو ما يدري ..
عدل جلسته وقال: هلا رؤى ..
رفعت رؤى حاجبها وهي تقول: ما تعرف تقول خاله ..
طالع فيها وقال: رؤى .. ممكن ايلس عندكم لحد ما يفكوا الحجز عن بيتنا ..؟!
طالعت فيه شوي .. فعلا حالته تحزن ..
انقلبت كل حياته بسبب ابوه ..
ابتسمت وقالت: إيه طبعا .. بيت خالتك هو بيتك والمفروض ما تستأذن ..
هز راسه بإيه بعدها قام وقال: خلاص بأخلي اغراضي هني وعندي شغله بروح اسويها ..
رؤى بإستغراب: شنهي ..؟!
لبس الكاب حقه وقال: بأشوف اختي ..
رؤى: سجى ..؟!!
إياد: ايه .. ما عمري شفتها .. عرفت من قبل عن مجان الشقه اللي هي فيها ولما زرتها وقتها ما كانت مويوده واللحين بأروح كمان وإن شاء الله تكون مويوده ..
رؤى: اوكي الله معك .. لا تنسى تسلم لي عليها ..
إياد: طيب .. باي ..
وطلع من البيت ..
تنهد بعدها وقف له تاكسي بعد عشر دقايق من الانتظار ..
هذه المنطقه نادرا تمر فيها سيارات التاكسي ..
كلها نصف ساعه تقريبا بعدها وصل للعماره اللي مستأجره اخته شقه فيها ..
نزل ودفع للسايق حقه بعدها دخل للعماره ..
طلع للدور اللي فيها الشقه ودق الجرس وهو يطالع في ساعته ..
الساعه 7 ونص المغرب ..
إذا اكيد بيلقاها ..
دق الجرس مره واثنين وثلاثه بس ما طلع احد ..
لا .. لا يكون مو موجوده كمان ..
حضه دايم بصفه بس ليش إذا كان الامر يخص اخته يكون حضه ضده ..
انفتح باب شقة باسل وطلع باسل منها ..
تكى على عابر الباب وقال: اوووه المزعج إياد هني وانا ما ادري ..
لف إياد عليه .. استغرب لما شافه ..
هو يعرف انه يسكن بشقه بس توه يدري ان شقته جنب شقة اخته ..
ابتسم بإستهزاء وهو يقول: بسوله حبيب ألبي .. ازيك يا راجل ..
انزعج باسل من كلمة بسوله ذي اللي دايم يرددها ..
كمل إياد استهزائه يقول: يا مرحبا .. تو ما شعلل المجان ..
باسل: اسمها نور المجان مو شعلل ..
إياد: هذا انتو تقولوا نور .. انا مو مثلكم يا بسولتي .. اللي اخترع جملة نور المجان ماهو احسن مني .. حتى انا اعرف اخترع وأقول شعلل المجان ..
باسل: صج اثول وتفكيرك دووم مشقلب ..
إياد بإبتسامه: تغار ..!! هذا لأن عقلك فاضي .. وثور تقلد الناس وما تعرف تخلي نفسك غير ..
باسل: ما بأرد عليك تعرف ليه ..؟! لأنك بزر واصغر مني بخمس سنوات .. اوووه الفرق شاسع ..
إياد: فعلا معاك حق .. الفرق شاسع حتى في مستوى العقل والذكاء .. الله يعينك يا بسولتي ..
باسل: وبعدين معاك انت ..؟! بطل هذا الاسم الغبي اللي تناديني فيه ..
إياد: اووبس .. بسولتي زعل هههههههه ..
تكتف باسل وقال: اها نسيت اقولك شيء .. حكاية الفرق الشاسع في مستوى الذكاء اكيد تقصد فيها انك اذكى مني .. لكني للأسف اشك انك تعرف تفكر اصلا ..
إياد بإستغراب: شتقصد ..؟!
باسل: انت ياي عشان اختك .. اوووه ياي لها ركض .. لهالدرجه تحبها ..؟!
إياد: ليه ..؟! حرام ..؟!
باسل: لا بس اللي اعرفه انك شخصيه انانيه وتوقعتك راح تكرها .. عالعموم تراها مب مويوده لأن خالها ياء واخذها ..
إياد: اها .. طيب .. وشو اللي تقصده من كلامك ..؟!
باسل بإبتسامه: سيرو حبيبت ألبي قالت انك تقول ما قد شفت اختك ابدا .. يا حرام .. تحزن ..
رفع إياد حاجبه وهو يقول: هذا اللي عندك بس ..؟!
تقدم باسل من عنده وقال: لا .. بغيت اقولك انك غبي وما تعرف تفكر .. سجى اختك يا الفاهي انت قد قابلتها .. لا واكلت معها وسولفت معها وتمشيت معها ..
استغرب إياد من كلامه بعدها ابتسم وهو يقول: لا تحاول تعمل حالك فاهم وتفر راسي .. انا اعرف نفسي اكثر منك ..
هز باسل كتفه وهو يقول: انت حر لا تصدقني بس لعلمك ترى سجى هي بنفسها قالت لي .. لا وعالجتك هي بنفسها من جرحك ومن الحراره ..
اختفت ابتسامة إياد وهو يطالع في باسل بدهشه ..
عالجته من جرحه ..!
ومن الحراره ..!
اكل معها .. وشرب معها ..
تكلم معها .. وتمشى معها ..!!!
هذا اكيد يقصدها هي .. لأنها هي الوحيده اللي ......
ابتسم باسل لما شاف دهشة إياد وقال: ها .. عرفت قد ايش انت ما تملك اي قدره على التفكير .. ثلاث ايام تقريبا وانت معها ومع هذا ما اكتشفت يا الفاهم العبقري خارق الذكاء ..
إياد: بس هي قالت انها تعيش بالشقه مع امها المريضه .. ام سجى ميته .. وكمان قالت ان اسمها سهى .. كيف ..؟!
باسل: من الصدمه وقف عقلك فعلا عن التفكير .. اولا هي شدراها عن اسمها دام انها قبل فتره اكتشفت انها لقيطه ..؟! ثانيا شدراها انت منو تكون عشان تعلمك كل شيء عنها ..؟! لعلمك هي عرفت انك اخوها بعد ما طلعت من عندها وتركت ارقام تلفوناتك .. قرأت اسمك وعرفت انك اخوها ..
إياد: هههههههههههههههههههههههههههههههههههههههه ..
استغرب باسل من ضحكه المفاجئ فقال: شفيك ..؟! استخفيت ..!!
إياد: هههههههأآي اثبت لي انك انت اللي ما تفكر .. قبل شوي قلت لي انها ما تعرف اسمها الحقيقي وبعدها قلت انها لما شافت اسمي عرفت اني اخوها .. ايش التناقض هذا هههههههههههههههههههه ..
ارتفع حاجب باسل من شدة الانزعاج وقال: جب .. انا ....
قاطعه إياد يقول بحيره: اخر شيء ممكن اتخيله هو ان سهى اختي .. شلون ما انتبهت ..؟! صح هي كان عيونها مثل عيوني .. اممم مدري عن التشابه لأني نادر اشوف نفسي بالمرايا عشان واثق اني حلو .. عيل ليش ما توقعت هذا التوقع ..؟! ليه ما فكرت بذا الشيء .. لو بس حكاية انها ممكن تكون اختي يت ببالي جان لاحظت اشياء كثيره وجان اكتشفت .. سهى ..!! صج اني ماني مصدق ..
باسل: ما تبطل عادتك في مقاطعة اللي هم اكبر منك .. اسمع المفروض .....
قاطعه إياد يكمل كلامه مع نفسه ويقول: حتى انها ما اتصلت علي .. كنت مستغرب فتوقعت انها ما عرفت يواب اللغز اللي عطيتها إياه مع انه اليواب بالمره سهل .. اللحين عرفت السبب .. عشانها عرفت اني اخوها ..
انزعج باسل وقال: انت ما تتعلم شلون تترك اللي اكبر منك يكملوا كلامهم و ......
قاطعه إياد يقول بإبتسامه: وناسه .. صديقتي اللي ساعدتني طلعت اختي .. وقسم انها وناسه .. وخصوصا انها من النوع اللي يتنرفز بسرعه مثل سام ..
اختفت ابتسامته ..
سامي ..!! لحضه ..!
له فتره طويله ما سمع عنه شيء ..
حتى قبل يومين جاه عمه سلطان للمستشفى بس سامي ما كان معاه مثل المره اللي فاتت ..
حتى وضع عمه مو مريحه ابدا ..
كلامه كان غريب ..
من كلامه انه كان يلوم سعد على اهماله لأهله .. بنته وولده ..
كان يقول ان الاهل اغلى ما يملك الانسان .. بس سعد مو حاس بالنعمه اللي هو فيها ..
ليه كان يتكلم بهذه الطريقه ..؟!
بدأ القلق يدخل لقلب إياد ..
كلام سلطان وراه سبب .. واكيد هالسبب يخص سامي ..
لازم يسأله .. ويستفسر عن ولد عمه ..
عن سامي ..
استغرب باسل من انقلاب حال إياد ..
قبل شوي مبسوط واللحين واضح انه قلقان ..
مشي إياد ونزل من الدرج بسرعه فقال باسل بإستغراب: شفيه ..؟!
ظل في مكانه فتره واقف بعدها هز كتفه ودخل لداخل الشقه ..
وقفل الباب ..

========================================

صعد المصعد للأعلى والجو هادئ جدا بداخله ..
اثنينهم ساكتين وكل واحد يفكر بشيء يختلف عن الثاني ..
لكن الاختلاف بسيط ..
لفت وجهها عليه وسألته بهدوء: بسام .. ليه يايبني هني ..؟!
ظل بسام ساكت لفتره بهدها قال: اللحين تعرفي ..
تنهدت وسكتت وهي تفكر ..
الوضع مو مريحها ..
جاء اليوم ولسبب تجهله طلب منها تجي معاه ..
واللحين هم متجهين لجناحه ويقول اللحين بتعرفي السبب ..
ليه ..؟! وشو يكون هذا السبب ..؟!
من اي نوع ..؟!
اما بسام فكان متكي وهو يفكر بالموقف اللي صار اليوم الظهر ..
ومن بعد الغداء بالتحديد ..

::::::::::::::::::::::::::::::::::::::::
جالس بغرفته ويتصفح الانترنت بملل ..
هالايام مواضيع الانترنت ما صارت مميزه او مختلفه ..
لا اخبار جديده .. ولا اكتشافات قويه .. ولا غرائب مذهله ..
اليوتيوب كمان ممل ..
لا مقاطع غريبه .. ولا افلام مثيره .. و لا صوتيات حلوه ..
مواضيع المنتدى اللي مشترك فيه ممله .. او معاده .. او تافهه ..
الاعضاء اللي يعرفهم صاروا قليلي الدخول مثله ..
يعني بإختصار صاير المنتدى نايم بنظره ..
لا لا .. الاختصار الانسب هو ان بسام اليوم صاير ممل وعشان كذا كل شيء بنظره تافه وممل ..
انفتح باب الغرفه في ذا الوقت فرفع راسه عن شاشة اللاب وقال: اهلين سميه ..
طالعت سميه فيه بهدوء بعدها قالت: ابغى اشوفها .. اقصد سجى ..
انصدم بسام من كلامها ..
له اكثر من اسبوع فاتحها بالامر ولما ما ردت توقعها خلاص طنشت السالفه ..
لكن فعلا صدمته بكلامها فقال عشان يتأكد: تشوفي مين ..؟!
سميه بهدوء: سجى .... بنتي ..
بعد ما نطقت بآخر كلمه حست بشعور غريب ..
بنتي ..!
بنتي ..
فعلا فيه شعور غريب مو عارفه نوعه ..
بنتي ..!
بنتها .. هي ام .. لها بنت ..
تقريبا كانت ناسيه هذه الاشياء من بعد ما اختفت من المستشفى ..
من قبل 17 سنه .. يعني بعد سنتين تقريبا من ولادتها ..
بنتي ..!
بنتها اللي كانت تتمناها تموت عشان بس زوجها اللي كانت مثل المجنونه بحبه ..
بلعت ريقها وقالت بنفس الهدوء: ابغى اشوفها .. انت قلت انها حيه وما ماتت .. ييبها لي ..
طالع فيها لفتره طويله يستوعب بعدها قال: اولا لازم اشوف راييها .. يمكن ما توافق تقابلج مع انها لحد الان تضنج ميته ..
سميه: مو لازم .. ييبها ولا تخبرها بأي شيء .. ابغاها اليوم ..
ظل ساكت لفتره بعدها قال: سميه انا راح اييبها لكن اسمعي .. البنت تراها .....
قاطعته سميه تقول: راح اصلح اللي اصلحه ومالك شغل بالموضوع عشان تطلب مني اني اراعي الضروف اللي عاشتها ..
وبعدها طلعت من الغرفه وقفلت الباب وراها ..
::::::::::::::::::::::::::::::::::::::::

لف وطالع بأسيل لفتره وبعدها انفتح باب المصعد فأتجه لجناحه واسيل تمشي وراه ..
طلع المفتاح وفتح باب الجناح ودخل فدخلت وراه ..
لف بعيونه في المكان فشافها جالسه عالكنبه .. واول ما دخلوا لفت تطالع فيهم ..
طالعت في بسام لثانيه بعدها لفت تطالع بالبنت اللي معاه واللي اكيد هي سجى ..
بنتها ..
اول ما طاحت عينها عليها حست بشعور غريب بداخلها ..
ماهي فاهمه هالشعور .. او معناه ..
استغربت اسيل من هذه الحرمه اللي كانت جالسه وتطالع فيها بنظرات غريبه ..
لفت تطالع ببسام وسألته: منو ذي ..؟!
ما رد بسام عليها فرجعت تطالع بهذه الحرمه وبالنهايه تجرأت وقالت: السلام عليكم ..
ما ردت سميه السلام فقالت اسيل: اهلين .. بس عفوا ممكن اعرف انتي منو ..؟!
قامت سميه من مكانها وتقدمت من اسيل وبسام يراقبها بحذر ..
اخته لساتها ما شفيت من مرضها النفسي تماما وخايف انها تتهور وتصلح ببنتها شيء مو كويس ..
وقفت سميه قدام اسيل وبعدها تكلمت اخيرا وقالت: منو انتي ..!!!! لو الناس شافوا هذا الموقف وسمعوا هذا السؤال راح يتشمتوا فينا .. عارفه ليه ..؟!
اسيل بإستغراب: ليه ..؟!
سميه بهدوء: لأنه سؤال صادر من بنت ...... لأمها ..
انصدمـــــــت اسيل من كلامها ..
فكملت سميه تقول بإستهزاء: شايفه كيف ..؟! شايفه كيف حالتنا تضحك ..؟! والسبب يرجع لغبائنا .. ام وبنتها .. وكل وحده منهم عايشه بحياتها الخاصه وما يعرفوا عن بعض ولا اشكال بعض ولا حتى ان كانوا احياء او ميتين .. والسبب هو قلة تفكيرنا ..
بسام: سميه ....
سميه: لا تتدخل ..
طالعت في اسيل المصدومه وكملت: ما اهتم بشلون عشتي او وين .. او مع منو كنتي وفين .. لكن حطي ببالج شيء واحد بس .. اني انا فعلا تمنيت موتج عشان حياتي الزوجيه تستقر ..
فتح بسام فمه عشان يمنعها من الكلام اكثر ..
من التجريح اكثر ..
اسيل اللي فيها كافيها وما كان متوقع ان اخته راح تتصرف كذا ..
لكن قاطعته اخته تقول لأسيل: ايه .. كنت اتمنى موتج عشان الاستقرار .. عشان استقر بحياتي وما ابتعد عن سعد .. هذه كانت امنيتي بس ....
طالعت في دموع اسيل اللي بدت تنزل على خدها وكملت: بس كنت غافله .. غلطانه .. غبيه .. لأني كنت اقول اني اقدر اييب بنت ثانيه بس ما اقدر اييب زوج مثل سعد .. كان تفكيري غلط .. ومشاعري ملخبطه .. فقدت الاحساس والضمير .. كياني كان مكسور من بعد كلام سعد لي فصرت مثل المينونه بطريجة تفكيري ..
حطت إيدها على اكتاف اسيل وبعدها ضمتها وقالت: في النهايه انا ام .. وعندي شعور الامومه .. طول حياتي كنت حاسه بعدم الراحه .. فيه شيء ناقصني .. كنت مريضه نفسيه لأسباب كثيره ولما شفتج عرفت ان احد هذه الاسباب هو لأني فقدتج .. انت غلطت بس مع هذا ما راح اطلب منج تسامحيني .. كنت مريضه نفسيه وشفيت منها لكني كنت واعيه واعرف بكل الاشياء اللي عملتها .. انا ما راح اطلب مسامحة احد لأني عارفه ان اللي ساويته كان كبير .. شيء مستحيل احد يسامحني .. عارفه انج تكرهيني فما راح اطلب منج انج تحبيني لأني ما استحق .. ما راح اطلب منج اي شيء صعب .. لا مسامحه .. ولا حب .. ولا راح اضايقج واعتبريني ميته .. كنت بس ابغى اشوفج .. من سمعت بأنج حيه وانا مو قادره ارتاح في نومي .. بس افكر فيج وعرفت ان هذا الشيء يسمونه بإحساس الام .. شيء بداخلي كان يؤلمني ولما شفتج زاد الألم .. ألم الندم .. وألم غريب معاه مو عارفه سببه .. انتي قطعه مني وانا امج فعشان جذي انا ما اقدر من اللحين اعتبر نفسي ام .. ما استحق هذه الكلمه لأني ....
سكتت لفتره بعدها كملت بهمس: ضيعتج على حساب سعادتي ففعلا ما استحق هذه الكلمه .. مهما ندمت فالندم ما راح يفيدني لأن اللي ساويته مب سهل .. مو بس انتي اللي آذيتج .. اذيت نفسي واهلي .. واخيرا آذيت ودمرت حياة طفله كنت السبب بموت امها .. ما كان قصدي لكني في النهايه اسمي قاتله حتى لو كنت متعمده او لا .. ما اطلب المسامحه لا منج ولا منها لأني ما استحقها .. كل اللي ابغاه منج شيء بسيط ومن بعدها راح اختفي من حياتج واعتبريني ميته ..
حست بالعبره تخنقها وكملت بألم: ناديني بأمي ..
شهقت اسيل غصب عنها من بعد اخر جمله قالتها امها ..
امها ..!!
عضت شفاتها وبكت بصمت ..
اسباب بكائها كثيره وملخبطه ..
مو عارفه .. مو فاهمه .. اي شيء ..
مو على اساس هي تكرها ..!!
مو هي تكرهم كلهم اللي كانوا السبب بعذابها ..؟!
مو ذي الانسانه كانت تتمنى لها الموت ..؟!
مو ذي الانسانه هي نفسها اللي قتلت ام وصايف ..؟!
مو المفروض تكون عند كلمتها وتكرهها ..؟!
طيــــب ليـــــــه ..؟!!
ليه مشاعرها بذي اللحضه تلخبطت ..؟!
ليش بكت ..؟!
ليش ما تتكلم وترد ..؟!
ليش مو قادره تفهم نفسها ..؟!
لكن .. لكن مع كل هذا فهي اللحين ....
فهي اللحين تجرب شعور اول مره تجربه ..
الحنان ..
هذا هو حنان الأم اللي كانت تقرأ عنه في الابتدائي ..
هذا هو حنان الام اللي كانت تردد اناشيد عنه في طفولتها ..
هذا حنان الام اللي عمرها بحياتها ما حست فيه ..
شعور دافئ .. جميل ..
ما يحس فيه إلا اللي فاقده ..
شهقت مره ثانيه من شدة الألم اللي تحس فيه بصدرها ..
بس امها قاتله .. امها كانت تتمنى موتها ..
امها مو ام ..
ألم فضيع يمزقها ..
طيب ليه ..؟! ليه امها طلعت كذا ..؟!
مو قادره تكرها ..
ولا قادره تتخلص من تشويشها ..
المفروض تكرها بس مو قادره ..
المفروض موقفها يكون قوي وتردها بس مو قادره ..
المفروض تكون عند كلمتها بس مو قادره ..
وخصوصا من بعد كلامها ..
امها ما تطلب منها تسامحها ..
امها .. كان كلامها قاسي ..
مهما كانت هذه الحرمه اللي قدامها لكن كلامها كان اكيد قاسي لها ..
معترفه بغلطها مع انها كانت مريضه نفسيا واللحين ما تطلب مسامحة احد ..
كأنها واثقه انه محد يسامحها .. وكأنها جالسه تعاقب نفسها ..
ليه تصلح كذا ..؟!
ليه ما تطلب مسامحة احد ..؟!
لا يكون متأكده ان مصيرها النار فأستسلمت ..؟!!
فتحت عيونها بصدمه من هذا الشيء اللي كانت تفكر فيه ..
امها .. إذا ظلت على حالها واستسلمت للوضع واستمرت بمعاقبة نفسها فهي بكذا راح يكون مصيرها النار ..
لا .. امها بشنو تفكر وهي كذا مستسلمه للشيطان ..?!
باب التوبه مفتوح ..
رب العباد رحيم وغفور ..
يسامح .. والبشر كمان يسامحوا ..
لا ما يحق لها انها تعاقب نفسها ..
الله وحده يعاقب البشر مو البشر هم اللي يعاقبوا نفسهم بتوصيل ارواحهم للتهلكه ..
امها كانت احد الاسباب في عذاب اسيل ومع هذا فلا ..
مو قادره تتخيل ان مصيرها يكون نار ..
لا امها لازم تتوب .. لازم تطلب رحمة الله ..
لازم تعتذر لكل اللي آذتهم وتطلب مسامحتهم ..
اللي تصلحه بنفسها غلط ..
مره غلط ..
سمعت همس امها يقول: ابغى بس اسمعها .. عارفه انج مستحيل تنطقي ذي الكلمه لوحده تخلت عنج .. بس قوليها وكأنج تقريها من كتاب .. ابغى احس بهذا الشعور .. شعور الام وهي تسمع ولدها يناديها بـ .. ماما ..
شدت اسيل على شفاتها تحاول انها ما تطلع صوت وهي تبكي لكن انينها كان يطلع غصب عنها ..
لا هذا مو صح ..
اللي يصير مو صح ..
مو ... اصلا مو عارفه شيء ..
ليش تعيش اللحين هذا الموقف ..؟!
ليه لقائها مع امها كان بذي الطريجه ..؟!
وليه امها تتكلم بذا الشكل ..؟!
اصلا ليـــــه امها عايشه ..؟!
لو ما كانت عايشه كان ما دخلت في هذا الموقف الصعب ..
المؤلم .. القاسي ..
لا .. هذا ما يعني انها تتمناها تموت ..
لحضه هي من اول كانت تتمنى ان اهلها كلهم يموتوا فليش غيرت كلامها اللحين ..
لا مو فاهمه ..
مو عارفه شيء .. ولا اي شيء ..
وقفت تفكيرها .. وبكائها للحضه ..
وقفتهم وظلت تطالع في الفراغ ..
هي تحس .. تحس بدموع امها على رقبتها ..
امها تبكي .. تبكي ..!
انتظرت منها رد ولما تأخرت بكت ..
ما سمعت لها صوت لكنها اللحين حست بدموعها ..
صح .. امها طلبت منها طلب ..
طلب بسيط .. وسهل ..
بس كيف ..؟!
كيف تقولها يا امي .. وهي كانت تتمنى موتها ..؟!
لحضه .. لكنها بالنهايه امها وراح تظل امها ..
هذا غير انها ندمت .. وكل اللي تبغاه اللحين هو سماع هذه الكلمه ..
حتى انها قالت لها تنطقها وكأنها تقرأ كتاب وكأنها واثقه ان اللي صلحته كبير ومستحيل بنتها توافق تناديها بذي الطريقه ..
الامور اللحين تمشي بعكس اتجاها ..
تمشي بعكس اللي كانت تقوله قبل ..
لأنها اللحين فتحت فمها .. راح تنطق بذي الكلمه ..
راح تنفذ رغبة امها ..
فعلا الامور تمشي بعكس الاتجاه ..
بعكس كلامها ..
وعكس توقعاتها ..
اللحين اكتشفت انها بنت ضعيفه ..
ضعيفه تنقاد ورى عاطفتها ..
ما تقدر تلتزم بكلمتها .. ولا تقدر تثبت على راي ..
رفعت ايدها المرتجفه لا ايراديا وحطتها بخفه على ظهر امها ..
تقوست شفتها وقالت بإرتجاف وضعف: امـ ـ ـي ..
انصدمت سميه لما سمعت هذا الكلمه ..
صوتها كان منخفض .. مرتجف ..
لكنها سمعتها ..
فعلا لها بنت ..
فعلا هي ام ..
توها تحس بذا الاحساس بشكل حقيقي ..
توها تحس بذي الروابط ..
امي ..!!
كلمه .. جميله .. و .. عميقه ..
دخلت لصدرها .. وحست فيها ..
تركت بنتها وبعدت عنها شوي ..
طالعت في وجه بنتها اللي كانت الدموع تغطيه وقالت بهدوء: شكرا .. لأنج .. حسستيني بشعور حلو ..
لفت على بسام اللي كان لاف وجهه للجهه الثانيه يمنع نفسه من التأثر وقالت: بسام خلاص انا راح ارجع عند امي .. لازم احسسها بأني بنتها ..
طالعت في اسيل وكملت: ومثل ما قلت فأنا راح اطلع من حياتج اللي كنت سبب بدمارها .. اعتبريني مت ..
لفت ودخلت للغرفه وقفلت الباب على نفسها ..
جلست اسيل على الارض وانفجرت بكي ..
هذا كثير ..
كل اللي صار اللحين كثير عليها ..
كثيير انها تستحمله ..
ما تقدر ..
ابدا مو قادره تستحمل ..
مو قادره ..

========================================

27 - 3 - 2014, 12:48 AM

في منتصف الليل ..
كان ساند دقنه على ايده اليسرى .. وبإيده اليمنى كان يلعب بالقلم على مكتبه ..
يدف القلم باصبعه ويرجع له .. يدفه ويرجع ..
تنهد ولف نظره يطالع في الساعه ..
مو قادر ينام ..
من زمان وهذا الامر يشغله ..
شكلها .. ملامحها ..
مو معقول تكون هي .. لا مو معقول ..
يتذكر لما فتح باب الجناح وشافها بوجهه ..
ملامح وجهها .. مستحيل يكون مجرد شبه ..
إلا اكيد هي ..
طالع في القلم بهدوء ..
انفتح باب الغرفه في هذا الوقت فجلس ولف ورى فشاف ابوه واقف عند الباب ..
طالع الاب فيه شوي بعدها قال بنبره هاديه: ليه ما نمت ..؟! طيارتك راح تقلع باجر الصبح .. ولا تبغى تفوتها مثل ما فوت الرحله اللي قبلها ..؟!
هز راسه بلا وهو يقول: لا ان شاء الله راح ارجع لبريطانيا .. بس ما ياني نوم ..
الاب: عيل ذاكر عشان تعوض غيابك عن دراستك .. لك عشر ايام غايب وهذا بيأثر على مستواك ..
ضحك وقال: هههههههه اطمئن راح اكون كالعاده من المراتب العاليه من حيث الدرجات .. ولدك ذيب ..
الاب ببرود: وليد .. انا ما ابغى نتائج مثل نتائج اول سنه .. كانت زفت والسبب هو لأنك كمان يلست بقطر عشر ايام بحجة انك مشتاق ..
وليد: طيب باجي على نهاية السنه اكثر من شهرين .. انا فعلا مشتاق لبعض زملائي ايام الثانوي .. للجماعه وكمان لكم .. مشتاق لك يا ابوي ..
الاب: اها .. ياللا نام عشان تصحى بدري وانت نشيط .. اخاف تنام بنص الطريج للمطار ..
وليد: ههههههههههه تخيل بس .. وقسم نكته ههههههههه ..
الاب: اضحك لكن ان يت درجاتك زفت راح اعلمك الضحك على اصوله ..
وليد: ابوي لا تكون قاسي جذي .. بأذن الله احافظ عالمستوى اللي انا فيه ..
الاب: ان شاء الله .. واللحين ياللا نام وطف الليت ..
تردد وليد بعدها قال: ابوي ..
لف ابوه عليه بعد ما كان راح يطلع وقال: نعم ..
وليد: ابسألك سؤال ..
الاب بإستغراب: إسأل ..
وليد: سجى ..
الاب: سجى منو ..؟!
وليد: سجى بنت سعد الراهي ..
ظهرت الصدمه على ملامح ابوه لثواني بعدها قال بهدوء: تصبح على خير ..
وبعدها خرج وقفل الباب وراه ..
وليد: آخخ .. كنت متوقع انو هذا اللي راح يصير ..
ظل ساكت لفتره بعدها ابتسم وهو يقول: لكن فكرة انها عايشه .. شيء جميل ..
طالع في الباب فانفتح ودخلت امه ..
قفلت الباب وراها وقالت: اووه صاحي ..
وليد: ايه .. غريبه ما نمتي ..
الام: ههههههه ما ياني نوم مثلك ..
وليد: هههههههههه عيل بشنو كنتي تفكرين حتى طار النوم ..
جلست الام عالسرير وقالت بإنزعاج: عبد الغني .. ابوك منو غيره .. تخيل انه اشترى ارض بقيمة اثنين مليون .. مكانها جدا ممتاز والكل يرغب فيه .. بس جذي فجأه الارض ما ناسبت مشروعه فقرر يبيعها .. نزلها بالسوق في نفس سعرها .. يالسه اقوله ارفع سعرها شوي .. هالارض موقعها ممتاز والكل يرغب فيها لكنه عنيد ولا رضى ..
جلس وليد جنبها وقال: هههههههههههههه انسي الامر .. ابوي ما يغير رايه ابدا ..
الام: فعلا .. ناقشته لحد ما اضطريت اخذ حبوب بنادول .. ههههه من شدة النقاش بدينا نفتح مواضيع قديمه .. يالسه اقوله ليه ما ترجع مثل ايام شبابك .. اول ايام زواجنا .. صحيح كان طايش تقريبا لكنه عالاقل كان يغير في رايه إذا اقنعته ..
وليد: هههههه بالعكس هو جذي افضل .. تعجبني هيبته مع انه دايم يضايقني ويسبني ههههههههههه ..
الام: تستاهل .. وش اللي يخليك تترك دراستك عشان سبب تافه .. المستقبل اهم وزملائك لاحق عليهم في الاجازه الكبيره ..
وليد: حاضر حاضر .. امي حتى انتي صارمه ..
ابتسمت الام وهي تقول: اعجبك .. دروس تعلمتها من ابوك ..
وليد: ههههههههههههههههه تلميذه ناجحه ..
الام: هههههه المهم حكني عن بريطانيا ودراستك فيها دامك ما تقدر تنام وانا مو جايني نوم ..
تربع وليد وهو يقول: اوككي .. اممم حصلت احداث كثيره هالسنه .. ايه رفيجي بسام ياء لبريطانيا عشان عنده شغله فيها .. فترة جيته قصيره لكنا استمتعنا ..
الام: علاقتك ببسام قويه ما شاء الله ..
وليد: يب .. ايه دخلت في احدى فعاليات الجامعه ورحنا برحلة لمتحف التكنولوجيا .. اووه يا امي .. قمممة الجمال .. انصحج إذا رحتي لبريطانيا تزوريه ..
الام: متحف تكنولوجيا ..!! بالعاده المتاحف تكون اثريه ..
تذكر وليد شيء وقال: ايه نسيت اقولج .. لفتره ياء طالب يديد قطري لكلاسي .. سامي الراهي ..
انصدمت الام من سمعت طاري الراهي بس اخفت صدمتها وهي تقول: ايه .. ولد مين ..؟!
وليد: ولد سلطان .. لفينا انا وياه بريطانيا .. ههههههه تخيلي على كثر ما سافر بريطانيا إلا ان كل الاماكن اللي رحناها ما قد شافها .. هههه بصراحه انا مدري لما كان يسافر لبريطانيا وين كان يتمشى ..
الام: ههههههههههههههههههه يمكن بالحوش ..
انفجر وليد ضحك على كلام امه وقال: هههههههههههههههههه اعجبتني ..
وكملوا سواليفهم لين الساعه اثنين تقريبا وبعدها تركته امه ينام وراحت هي كمان تنام ..

========================================

في ظهر اليوم الثاني ..
جالسه بالصاله وهي ضامه رجلها بإيد وبالإيد الثانيه تقلب في التلفزيون ..
ليش الاوضاع قلبت فجأه الى هذا السوء ..؟!
من يوم ما ودى ريما للمستشفى ورجعوا صار كأنه في البيت عزاء ..
ريما اربع وعشرين ساعه بغرفتها .. ومنصور ما يتكلم ابدا ..
مره من المرات حاولت تكلمه فصرخ بوجهها ..
طفشت .. ملت من هذا الوضع ..
ودها تفهم شصار بالمستشفى في ذيك الليله ..
ليش انقلبت الاوضاع ..؟!
ودها تروح تسأل ريما بس العلاقه بينهم سيئه ..
هي ما تكرهها .. بس تحب تغيظها ..
تنهدت وقالت بهدوء: ان شاء الله ما يحصل اللي ببالي .. لو فعلا شكوك منصور طلعت صح وان ريما حامل راح تصير مصيبه يمكن تنتهي بالطلاق بينهم ..
وكملت بهمس: وانا ما ابغى هذا الشيء يصير .. اتمنى لريما كل خير لأنها ....
ضاقت عيونها وظهر الألم فيها ..
دخل منصور للبيت في هذا الوقت وبإيده شنطته الجامعيه ..
قامت نوف لعنده وقالت بإبتسامه: اهلييين نصوري ..
مشي من قدامها وطلع لغرفته ولا رد عليها ..
اصلا ما كلف نفسه يلف بنظره لها ..
تنهدت ورجعت تجلس على الكنبه وضمت رجلها من جديد ..
مو قادره ترتاح في وضع من هذا الوضع ..
كل شيء هنا متوتر ..
لو انها ما جات كان احسن ..
هي تحب منصور لكن الوضع شكله ما راح ينتهي ..
تنهدت وقالت بهدوء: اصبري .. مو من اول مشكله بتهربي ..

في غرفة ريما ..
كانت منسدحه عالسرير ومتلحفه بلحافها ..
خدها عالمخده ودموعها تنزل شلال عليها ..
الى متى راح تستحمل كل هذا ..
خلاص تبغى تتطلق وتعيش بعيد عشان ترتاح ..
خلاص تعذبت بما فيه الكفايه ..
مو قادره تستحمل اكثر ..
انفتح باب الغرفه فاخترعت وقامت من مكانها فشافت منصور هو اللي عند الباب ..
لفت وجهها بعيد عنه ومسحت دموعها على شكل سريع وبعدها قالت: نعم .. شتبي ..؟!
طالع منصور فيها لفتره بعدها قال: عاجبج وضعج ..؟!
عدلت صوتها وقالت: مالك شغل ..
منصور بصدمه: ريما لا تردي علي جذي .. ليه عالاقل ما تظهري شوية مشاعر ندم ..؟! اندمي .. اطلبي السماح و .....
سكت شوي بعدها كمل: هذا اول كان من الممكن اني اسامحج .. لكن اللحين تغير كل شيء من بعد الحجي اللي سمعته بالمستشفى ..
ريما: إذا ما عندك شيء تقوله فإطلع برى ..
منصور بهدوء: راح اطلع .. ويمكن اطلع من حياتج كمان لكن بالاول ياوبيني على سؤالي ..
لفت تطالع فيه فقال: وينه ..؟! الجلب اللي انتي حامل منه وينه ..؟! ياسر ما مسكوه .. وينه ..؟!
انصدمت ريما من سؤاله ولفت للجهه الثانيه بتوتر كبير ..
شلون ..؟! شلون عرف انه ما انمسك بالسجن ..؟!
ما توقعت ابدا انه يسألها هذا السؤال ..
لا .. ما راح تجاوب عليه ..
منصور: انا انطر يوابج ..
ريما بتوتر واضح: ما ادري .. اكيد مسكوه الشرطه ..
منصور: ما مسكوا اي واحد بهذا الاسم .. اذا ياوبتي على سؤالي اوعدج اني اطلقج ..
لا .. مستحيل .. اكيد يمزح ..
لا يمكن .. ما راح تجاوب على سؤاله ابدا ..
ما عندها الجرأه عشان تجاوب ..
مستحيل توريه سواد وجهها اكثر من كذا ..
مستحيل ..
انتظرها تجاوب لكن مافي امل ..
فتح الباب وخرج وهو يقول بهدوء: انتي تدلين طريج غرفتي .. تعالي اذا كنتي تقدري تياوبي ..
وقفل الباب وراه ..
لكن الحكايه لسى ما انقفلت ..
وما انتهت لأنها راح تكون اكثر تعقيد من المتوقع ..
اكثر بكثير ..

27 - 3 - 2014, 12:50 AM

الساعه سبعه .. لا ثمانيه ونص بالليل ..
وبإستراحه كبيره ومستواها فخم ..
كانت هادئه جدا .. واللي استأجرها فهو استأجرها لاسبوعين بس ..
بالصاله الداخليه كان جالس وقدامه احد حرسه يكلم بالتلفون ..
ابتسم الحارس وقفل التلفون وقال: اطمئن طال عمرك .. قدرت أأمن لك طريجه للخروج من قطر من دون لا تكشفك السلطات ..
طالع فيه ببرود وقال: يعني حظرت الاستاذ عبد الرحيم .. وافق على الاتفاق بعد ما اخذ اربعين بالميه من الاموال اللي معي .. طماع ولولا حاجتي له جان تخلصت منه ..
ابتسم الحارس وهو يقول: اهم شيء انك تضمن سلامتك والفلوس تقدر تنميها بالخارج .. يقول ان افضل فرصه هي بعد خمس ايام من اليوم ..
طالع فيه رئيسه إللي كان سعد بهدوء بعدها قال: اها .. خلاص اطلع وشوف للحرس ومتطلباتهم ..
قام وهو يقول: حاضر ..
وطلع من المكان ..
طالع سعد في جواله وهو يشوف عدد المكالمات التي لم يرد عليها ..
اخوه سلطان له اكثر من عشر ايام وهو يتصل لكن لا مجيب ..
ظل يطالع في الجوال لفتره وهو يفكر بشيء واحد ..
يفكر بولده إياد ..
اغلى ما يملك ..
يا ترى شقاعد يصلح اللحين ..؟!
اكيد سمع عن تجاراته .. واكيد تضايق ..
يحب ولده .. كثيير ولا يرضى له الاذى ..
فعشان كذا راح يهرب هو لوحده ويأمن اخوه سلطان على ولده إياد ..
وده يقابله ويودعه لكن من بعد اللي صلحه ما راح يقدر يواجهه ..
هو عارف ان ولده عكسه تماما .. الفارق بينهم كبير ..
فعشان كذا لازم يعيش ابنه حياته اللي يتمناها وهو يعيش حياته اللي يتمناها ..
وبكذا .. ينتهي الموضوع ..
دخل واحد من حرسه وجاء عنده وهو يقول: طال عمرك عندي لك خبر مو كويس ..
سعد: وشو ..؟!
اخذ نفس بعدها قال: قبل شوي سمعت خبر .. جوزيف اللي يشتغل بشركة نوسترادا وصل لقطر من فتره .. بس ما قدرت اعرف وين هو اللحين او ايش هدفه لأنه بالصدفه شافه احد رجالنا ..
ظهرت الصدمه على وجهه لثواني بعدها قال بهدوء: واحنا شعلينا فيه .. راح نروح وخله يدور علي على راحته .. لا تشيل هم .. ماهو قدي ابدا ..
ارتاح الحارس نسبيا بس لحد الان فيه نسبة خوف بداخله ..
جوزيف شخص مو سهل ابدا ..
سعد: اللحين اطلع برى والمره اليايه دق قبل لا تدخل ..
حس الرجال بالحرج وبعدها طلع من المكان ..

========================================

27 - 3 - 2014, 12:52 AM

الساعه عشره الليل ..
كان إياد جالس يتعشى وهو كل شوي يرفع نظره يطالع فيها ..
كان الانزعاج واضح على وجهها ..
ابتسم ببلاهه وهو يقول: اعرف يا خاله انج تكرهيني .. كنت راح اتعشى ببيتي بس بدر عزمني غصب عني على العشاء ..
لفت ام بدر نظرها عليه وقالت: جب .. اطفح وبعدها تقلع على بيتك ..
إياد: حااااضر ..
تنرفزت ام بدر اكثر من كلامه ..
حتى لو سمع كلامها تحسه ينرفزها ما تدري ليه ..
بدر: ابوي .. نسيت اقولك شيء .. باجر فيه ميلس للآباء .. إذا تبي تيي تعال لكن ما انصحك ..
بشاير بإستهزاء: ليه .. خايف من سواد ويهك ..؟!
بدر: ما بأرد عليك .. ابوي افضلك انك ما تيي .. لأن الميالس ذي محد ييها غير آباء الدوافير .. طنش السالفه ..
إياد: هههههه محشش .. دامك ما تبيه يي عيل ليه تقوله من اول ..؟!
بدر: حزني الاستاذ عبد الكريم وهو يترجانا نقول لآبائنا .. فقلت لأبوي ..
الام: اسمع يا ابو مساعد .. ابيك باجر لا هنت توديني السوق لأنه ابي احظر زواج بنت ييراننا وماكو فستان عندي .. كلها قد لبستها كثير ..
الاب: طيب .. عيل زهبي حالج من الظهر عشان اول ما ارجع من الشغل راح اوديج ..
الام: ترى عازمينك عالزواج ..
الاب: ايه اعطاني ابو البنت كرت الدعوه لكن اليوم اللي بيصير فيه الزواج راح انشغل شوي .. ويمكن ارجع البيت عالساعه 11 الليل .. راح امرج بطريجي واخذج ..
الام: من صجك انت .. اطلع من الزواج 11 ..!! لا فعلا مو صاحي ..
الاب: ليه ..؟!
بشاير: ههههههههه بابا الزواجات ما تبدأ إلا الساعه 11 .. لا تشيل هم انا بروح مع امي راح نرجع مع بعض .. انت لما ترجع ريح بالبيت ..
رفعت لبنى راسها وهي تطالع فيهم وكلام فارس يدور بمخها ..
"استغلي اقرب فرصه تكون زوجة ابوج مب مويوده" ..
إذا .. هذه هي افضل فرصه ..
ابتسمت .. واخيرا راح تفهم كل شيء من ابوها ..
واخيرا ..
بشاير بإستهزاء: الضحك من دون سبب من قلة الادب ..
لفت لبنى عليها وعرفت انها تقصدها ..
اختفت ابتسامتها وكملت اكلها بهدوء ..
إياد: بشاير .. حتى امج تبتسم مثل اختج .. قولي لها الضحك من دون سبب من قلة الادب ..
لفت بشاير على امها وشافتها سرحانه والابتسامه على وجهها ..
لفت على إياد وقالت: جب ..
إياد: هههههههههههههههههههه موقفج مضحك وقسم ههههههههه ..
ابتسمت لبنى وهي تطالع بإياد ..
هالانسان مستحيل تنساله كل المساعدات اللي قدمها لها ..
واللي كان اهمها هو رقم امها نورهان ..
لف إياد على بدر وقال بحماس: بدر بدر وقسم فاتك ربع عمرك ..
بدر بإستنكار: ربع ..!! اللي اعرفه انهم يقولوا نص عمرك ..
إياد: انا بكيفي .. ابي اطلع كلمه يديده مميزه ويصيروا الناس يقولوها مثلي .. ياخي وناسه ..
تنهد بدر وهو يقول: كمل كمل ..
إياد: فعلا شيء حماس .. ياخي من يد قاتك ثلث عمرك لأنه ...
قاطعه بدر يسأل: مو كأنها قبل شوي كانت ربع عمرك ..!!
إياد: عادي ابي اطلع كلمتين .. المهم اليوم وانا نازل من وحده من العمارات شفت شيء هههههههه مضحك وقسم ههههههههههه ..
تحمس بدر وقال: شنو ..؟!
وقلبوها سواليف لدرجة ان الكل قام من على الطاوله بعد ما شبعوا ولبنى رفعت الاكل وصار المكان فاضي ..
ماكو احد غيرهم ..
بدر: شوف .. حكاية انك تعرف اسمها انساها .. السالفه مستحيله ..
اوووه .. وصلوا لسواليفهم إلى لينو واسمها المجهول ..
إياد: لا مو مستحيل .. راح احاول واكيد بأطلعه .. انا هالايام بديت احس ان ذكائي بدأ ينام .. لازم اطلع اسم لينو اليوم قبل باجر ..
تنهد بدر بإستسلام وقال: اوكي دامك مصر فقولي كيف راح تطلعوا ..؟!
إياد: امممم هي قالت لي تلميح .. قالت لو تزيد نقطه وحده بس راح تقدر بعدها توصل للأسم .. يعني تقريبا قالت جذي بس ركز .. هي قالت لو تزيدوا نقطه راح تقدروا بعدها توصلوا للأسم .. ما قالت راح تعرفوا الاسم .. يعني النقطه إذا زدناها فراح يطلع لنا اسم قريب جدا من اسمها .. ومن هنا راح نحتاج شوية تفكير وبعدها نطلع الاسم ..
بدر: اها .. والنقطه ذي فين بتزيدها ..؟!
إياد: على اخر لستة اسماء قلتها لها .. مثلا اسم لين .. لو زودنا نقطه فوق النون راح تصير ليت .. والليت هو نور .. يعني اسمها ممكن يكون نور .. فهمت علي ..؟!
بدر: إيه طبعا فهمت .. طيب ياللا ورنا ابداعك ..
إياد بإحباط: ياخي من الظهر وانا احاول بس ماكو فايده ..
بدر: هههههههههههههه اهممم شيء ..
إياد: تخيل اليوم بغيت ازور عمي بس ما لقيته في البيت فقررت ازوره الليله .. المهم لما ما لقيته فكرت اني اروح السجن ازور ضاري ويزن وجراح اتشمت فيهم شوي ههههههه ..
بدر: هههههههه ما تتوب .. لازم تقول لهم الكلام اللي كنت مجهزه لهم لكن للأسف ما حصلت فرصه تقولها لهم ..
إياد: ياخي فعلا انقهرت ..
بدر: على طاري ذيج الليله .. لما كنت متجه لناحية الاستراحه اتصلت بالشرطه عشان نتقابل هناك مثل الخطه .. بالطريج مريت من ينب سيارات متجمعه حول سياره ولاحظت انهم جماعات سوداء يهجموا على شاب .. السالفه اثارت فضولي بس ما كنت وقتها افكر إلا فيك فطنشتهم وكملت طريجي ومنها كمان اتصلت بالشرطه تروح تشوف السالفه لأنه واضح ان الشاب متورط معهم ..
إياد: وناسه .. لو انا بدالك جان قطيت مع الشاب اساعده ههههههه ..
بدر: ههههههههههه سلامات يا الاخو ..
إياد: ههههههههههههههههههههههههههههههه ..
طالع بدر بساعته وقال: طيب خلاص مو انت ناوي تزور عمك .. انصحك تروح اللحين قبل لا ينام وتنكب ..
إياد: ايه صح معك حق .. ياللا مع السلامه ..
بدر: مع السلامه ..
وبعدها طلع من البيت وهو ناوي يزور عمه سلطان ..
اليوم لما زاره قالوا انه مو موجود وراح يرجع الليل ..
لازم يسأله عن سامي ..
بس اللي محيره اكثر هو ذيج اللي اسمها ريندا ..
اللي هي نفسها فتحت له الباب ..
لما سألها عن سامي تغيرت ملامح وجهها ميه وثمانين درجه وبعدها قالت انه مسافر ..
مسافر ..!!
ليه وين مسافر ..؟!
صحيح انهم دووم يتناجرون مع بعض إلا انه بصراحه مشتاق له كثييير ..
لو سافر فراح يفتقده كثير ..
وقف له سيارة تاكسي وركب معه ..
السايق: وين انت يبغا يروح ..؟!
إياد: وصلني لشارع ******* ..
السايق: حادر .. بس هساب اولا ..
تنهد إياد وقال: طيب .. جم حسابك ..؟!
السايق: ستين ريال ..
إياد بدهشه: لا وييين يا ريال .. انا ما معي اللحين إلا ثلاثين .. ما تقدر تعمل خصم خمسين بالميه ..؟!
السايق بعصبيه: خسم ..!!! انتا تهسب اني بقاله اسوي خسم .. ادفع ستين ةلا انتا روه سياراه تاني .. الشارع هدا مرا بعيد ..
تنهد إياد .. فعلا بيت عمه مره بعيد ..
خلاص راح يروح لبيت خالته ومن هناك راح يطلب من خالته سياره ..
إياد: اوكي وصلني لشارع ***** ..
السايق: طيب ادفع اربعين ريال ..
إياد: ياخي ما عندي إلا ثلاثين .. لما توصلني هناك راح ادفع لك ميه لو بغيت ..
السايق: لا لا .. هدا حركه واجد قديمه .. سواها ناس مرا كثييير .. انا راه اوصلك لشارع ***** وبس ..
تأفف إياد من ذا الهندي ..
ما يعرف يراعي احد ..
عالعموم مافي مشكله .. هالشارع مو بعيد عن بيت رؤى .. يقدر يكمل الطريج مشي ..
إياد: خلاص روح يا نشبه ..
حرك السايق السياره واتجه للشارع اللي مو بعيد عن بيت رؤى ..
وطول الطريق إياد يفكر ..
تفكيره مشتت بين ثلاث اشخاص ..
سامي .. اخته .. اسم لينو ..
هالاشياء فرت راسه فر ..
صدمته من سالفة اخته ..
تحليله لأسم لينو ..
استغرابه من سفر سامي المفاجئ ..
لحضه .. ريندا لما قالت انه مسافر كانت بعيونها نظرت ألم ..
ليش ..؟!
هو يعرف انها تقريبا هي اللي اعتنت بسامي من طفولته ..
شكل سفر سامي اثر عليها ..
طيب ليش ما انتبه ان سهى ذيج تكون اخته ..؟!
فعلا كانت تصرفاتها مريبه لكن ما شك بأنها ممكن تكون اخته ابدا ..
السالفه ما خطرت بباله ابدا ..
بس المشكله اللحين هي انه نسي لستة الاسماء الاخيره اللي قالها للينو فشلون راح يجرب طريقته ..
شكله راح يطلب منها تذكره باخر اسماء قالها لها ..
هو لازم يطلع اسمها .. الفضول يوم عن يوم يذبحه ..
فعلا .. تفكيره مشتت .. وكل شوي ينتقل من موضوع الى موضوع ..
السايق: يا صديق ..
إياد: نعم يا قلق ..
السايق: خلاس انزل ..
إياد: طيب خلك حنون وطيوب وامش خطوتين جدام ..
السايق بعصبيه: انت ما يفهم .. انت مخك مافي .. انزل انت واجد مزعج ..
إياد: والله مدري من فينا مزعج .. ياللا تقدم ثلاث خطوات قبل لا اخليها اربع خطوات .. ياخي خل بقلبك رحمه لأني والله احزن ..
السايق: انت قرقر واجد .. انزل ترى انا يتصل بشرطه عشان ينزلوك ..
إياد: تهددني بالشرطه ها ..!! طيب راح انزل بس عالاقل امش كيلو واحد .. ياخي ما بتخسر شيء .. ياللا يا حبيبي امش شوي عشان انا يروح يمدحك عند ناس واجد عشان تكسب فلوس ..
طلع السايق جواله وهو يقول: انت ما يفهم .. عقلك مافي ..
إياد بسرعه: خلاص خلاص مو لازم شرطه ..
قفل الهندي جواله وقال: ياللا انزل بسرعه .. انزل ..
تأفف إياد ونزل وهو يقول: اخلاقك زفت .. مدري شلون تكسب من وضيفتك ..
فحطت السياره وكانت بتصدمه بس بعد إياد في اخر لحضه ..
إياد بدهشه: اخسس .. وقسم انه حاقد .. ياخي انا المفروض احقد ..
حط إيده بجيبه ومشي عالرصيف متجه لبيت رؤى ..
كان وده يتصل برؤى عشان تجي تاخذه لكن رصيده خلص ..
وحكاية كول مي والاتصال على الحساب ما يعرف لها لأنه ما قد جربها ابدا ..
الصبح طلع ومعاه فوق الثلاث مئه ورصيد فوق الخمسين ..
واللحين الليل خلص كل هذا ..
متعود على الاسراف وما قدر يمسك حاله ..
سمع صوت سياره تمر عالشارع اللي جنبه ..
بعد فتره سمع صوت سياره ثانيه كانت مسرعه ولما قربت منه بدأ تهدي سرعتها ..
بالنهايه وقفت جنب إياد فلف يطالع فيها بإستغراب ..
وبسرعه نزل من هذه السياره السوداء ثلاث رجال واتجه لإياد ..
اندهش إياد من تصرفهم ورجع خطوه ورى وهو مو فاهم شسالفه ..
لكن في اقل من ثلاث ثواني وصلوا لعنده ..
الاول وبسرعه جاء من وراه وكتم نفسه بمنديل معاه ..
مسك إياد إيد الاول عشان يبعده عنه بس الاثنين الباقين ثبته حركته ..
حاول إياد يفلت منهم فسمع الاول يقول: shut up ..
اندهش وقال في نفسه: "اجانب .. ماهم عرب ..!! عيل منو هم وشنو يبون مني" ..
حاول يفلت لكن ريحة المخدر كانت قويه ففقد وعيه ..
شالوه الاثنين فطاح الكاب عالارض ودخلوه في المقعد الخلفي للسياره ..
ركبوا جنبه وركب الثالث قدام وقال للشخص الرابع اللي يسوق: Go ..
فأنطلقوا إلى وجهه مجهوله تماما ..

انتهـــــــى ..
انتظروني بالبارت الجاي اللي بيكون ما قبل الاخير مباشرتا ..
دخلنا في صلب الاحداث الختاميه للروايه ..
مرتين بس راح يكون لنا لقاء وبعدها كل شيء بينتهي ..
الروايه .. والردود .. والتوقعات ..
ولهذا اتمنى ان الكل يساعدني بردوده وتوقعاته للاحداث الاخيره ..
اتمنى ما تبخلوا علي بأي شيء ..
لأني حاليا امر بمرحله صعبه ..
روايتي صارت بنهايتها .. راح افارق ابطال روايتي وهذا شيء وقسم اثر فيني ..
لنا سنوات مع بعض فصعب علي اكتب الاحداث ولهذا اكتبوا اي شيء في بالكم لعل استفيد منكم واتحمس للكتابه اكثر ..
محبتككم/ صرخةة الممشتإآقه ..

|$[ نهاية البارت ]$|

المواضيع المتشابهه لموضوع: رواية واكتشفت اني لقيطه كامله لموضوع: رواية واكتشفت اني لقيطه كامله
الموضوع	كاتب الموضوع	المنتدى	مشاركات	آخر مشاركة
رواية طلبتك لا تحاكيني كامله	سجات التهاويل	همس للقصص وحكايات وروايات	331	8 - 6 - 2018 01:05 PM
رواية الا ليت القدر كامله	نَقاء أنامِل	همس للقصص وحكايات وروايات	71	7 - 9 - 2014 02:20 AM
رواية رغد وبدر كامله	سجات التهاويل	همس للقصص وحكايات وروايات	133	7 - 9 - 2014 02:14 AM
رواية شغب بنوته كامله	نَبض♡~	همس للقصص وحكايات وروايات	16	16 - 2 - 2014 05:50 PM
رواية ارادة رجل كامله	ادمنت تعذيبك	همس للقصص وحكايات وروايات	35	22 - 4 - 2012 01:48 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

رواية واكتشفت اني لقيطه كامله

همس للقصص وحكايات وروايات