روايه ودك تنامين نامي - الصفحة 17

29 - 3 - 2014, 05:29 PM

(( بيت ابو بندر ))( الساعة 12 )دخلت دانه تعبااانه مرررة .. ما خلت شي ما اشترته ... اشترت لها بيجامات وملابس نووم ... وبدلات لبعد العرس ..... والكثير الكثير من المكيج والصنادل والاكسسوارات ..حطت الاكياس فوووق السرير .... وانسدحت .... تذكرت رائد ... وانها بتكون زوجته الاسبوع الجاااااااااااااااااي ...دانة " يا ماما ... توني استوعب اني بكون معاه .. ما كنت افكر بهالطريقه .. بس الحين .. استوعبت ايش الموضوع .. انا بتزوج ..!!!! برتبط بواااحد ...!! بكون له لوحده .. ويكون لي لوحدي ..... "قعدت على حيلها ... وتاملت خاتم خطوبتها ... وابتسمت .." وااااااااي ,, انا ورااائد .. لوحدنا ف جزيرة .. على البحر.. قدام المووج الازرق ... يشيلني ويمشي فيني.. يبوســــــــــ "قطع تفكيرها شاشة الجوال اللي بدت تنور ويرتفع صوووت الاغنية ..انا مقدر .. اكوووون اصدق من احساسي .. ومن اشواقيتبي تعرف كبر شوووقي .. شوف عيوني وتكفيك ..اذا ما يكفي اني اصرخ باسمك داخل اعماقيواشوووف اعمر بك وحدك .. فرحي صاار ... ملك ايديـــك ..ابتسمت زياااده والضحكة جاتها ... دانه " الله يقطع ابليسك يا رائد .. كنك حاس فيني..!! "ردت وهي تضحك : هههه الو .. رائد : توقعت .. دانه : ايش اللي توقعته ..؟؟رائد : حاس انك تضحكين بدوووني ... دانه : ههههه طيب وش فيها..؟؟رائد : مافيها شي .. تسلم لي هالضحكة ..دانه : احم .. احم رائد : طيب قوووليلي انا بعد شي .. دانه : وش اقووولك..؟!؟!رائد تعدل ف القعده : يعني امدحيني .. غازليني .. دلعيني .. دانه وجهها .. احمر احمر احمر :............................رائد : خخخخ كله لاني قلت لك دلعيني .. يعني طيبي خاطري بكلمة .. دانه : حبيبي غير الموضوووع .. رائد تنهد بتعب : وهـــ ... ياربييي .. متى يجي الاسبوع الجاي..؟؟!!دانه : رؤووودي بسك حنّه ...ما بقى شي .. كلها كم يووم.. قول لي وش سويت اليوم..رائد : اسكتي الله يخليك ... للحين الوالد ف ايطاليا .. دانه : وخالتي ..؟ رائد : كان المفروض تجي اليوم ... بس جاتها دعوة لمعرض هناك .. فتاجلت رجعتها لبكرة ... دانه : يوووه ... مسكينة ريم ... اكيد لوحدها ف البيت ... رائد : هههههه لوحدها ..؟؟ ما خلت سوووق ما ودتني له .. وما خلت شي ما اشترته.. وحتى لما نرجع البيت ما تخليني اطلع .. وتقعد تصيح .. تكسر خاطري واقعد معاها ...دانه : حراآآآم .. خلاص لا تزوجنا .. كل يوم توديني لها .. والله مسكينه .. ماعندها احد ف البيت .. رائد : نعم نعم ..؟؟ حبيبتي لما نتزوج بتقعدين معاااي .. حتى انا فاقد حنان مو بس هي.... دانه برومانسية : لاتخاف .. انت بغرقك حنااان ودلع لين تقول بس .. !!!___________________________________<< كانت هذي كم صفحة من البارت الجديد لعلها ترضيكم .. لو شوي ... وادري انها قليلهولو بيدي ... انزل لكم 3 اجزاء مرة وحدة .. بس يللا.. والبارتات الباقيه .. راح تشوفون اللي يعجبكم انشالله ..

29 - 3 - 2014, 05:29 PM

(( شقة سعود ودلع ))( الساعة 2 بعد منتصف الليل )دخل سعود الشقة زهقااان وضايق خلقه ... وشاف الصالة زي ما تركها ... التفت لغرفة النوم وشافها مفتووحة ... سعود " غريبه ما نامت هذي..؟! اكيد الحين مسويه سمفونية الصيااح والنيااح حقتها!" مشى للغرفة بهدووء بدون ما يلفت الانتباه .. دخل وسكر الباب ورااه ... وشاف دلع قاعدة على السرير وتقرا مجلة من المجلات الموجودة ... ولا عطته وجه .. سعود : مسا الخير..دلع " مسوي فيها الحين طيب ..!! " : .................سعود مشى وقعد جنبها على السرير : وش تسوين ..؟ دلع رفعت حاجب " ما تطالع يعني؟ " : .....................سعود " افففففف .. هذي انشالله تبغاني اراضيها..؟؟!! " تعدل ف جلسته .. وسحب منها المجلة شوي شوي .. ومسك يدها وابتسم : .................... زعلانه ؟؟سحبت دلع يدها على طول وحطتها بحضنها ولفت وجهها للجهة الثانية وقالت والعبرة خانقتها : عادي متعودهــــ ........!!!سعود " !!!! " : دلع .. انا آسف .. والله م ... ما قصدت اللي قلته ... مدري وش جاني.. دلع ودموعها تنزل : شلون يعني ما تقصد شلووون ..؟؟ ممكن تفهمني ...!!سعود : اهدي شوي .. ووقفي صياح .. انا من الزهق مدري وش صارلي .. قمت ارمي كلامي واتسبب بدون أي داعي .. دلع طالعته : سعود .. انا تعبت .. والله تعبت .. يوم كنت ف بيت عمي .. كان ع الاقل في احد اقدر اكلمه .. كان في احد اشاركه الفرحة والحزن .. بس الحين .. انا لوحدي هنا ... ماعندي أي احد اتكلم معاه غير الجدران .... من جد انا زهقت يا سعوود .. وانت منت تاركني بحالي ... !!سعود : طيب والحل..؟؟ قوليلي وش تبغيني اسوي وانا راح اسويه لك ..دلع نزلت راسها تفكر : ................................سعود قام ووقف : انا ما اعرف اتصرف لوحدي يا دلع .. انا ما اعرف ادبر عمري .. انا اعرف اصرف الفلوس واستانس بالحياه .. لكن اتحمل مسؤولية بيت وزوجه .. كل هذا بصراحة فوق طاقتي ... وتحملي .. دلع : ايش اللي فوق تحملك..؟!! وايش اللي يتعبك ف الموضووع ..؟؟ ليش انت تقعد تشتغل من الصباااح وتكد عشان تجيب لنا اللقمة..؟؟ ولا تقضي وتشتري اغراض البيت اللي نحتاجها ..؟؟ ولا تنظف وتغسل وترتب البيت ..؟!؟!؟ ها..؟؟ قول لي .. سعود : انا ماني مستعد اشرحلك أي شي .. انا سالتك سؤال .. انتي وش تبغين مني اسوي ..؟؟ دلع : انا ماني قاعدة اقولك سوي كذا ولا تسوي كذا .. انا ما يهمني شي .. بس الحياة اللي احنا عايشينها سخيفة .. انت قاعد بوجهي 24 ساعة وماعندك غير الصراخ والهواش والاستفزاز .. وانا قد ما اسوي ما يعجبك .. وقد ما احاول اصلح الوضع تجي انت تدمره بزياده ... شوووف لنا حل ياااخي..!!!!سعود منفعل ويحرك قميصه بقهر : وش اسويلك..؟؟ وش تبغيني اسوي ..؟؟ دلع وقفت ودموعها تنزل : شوووف لك شغل زي باقي الرجال... وروح اشتغل واصرف على نفسك بدال ما تخلينا نستنا كل شهر الفلوس من عمي .. ونخلي كرامتنا تنداس.. ما تفهم .. عمي ما يطيقك ولا يطيقني.. ما تفهم .. معتبر الفلوس اللي يصرفها علينا صدقة لا اكثر .. !!!!!!!سعود : انتي محسبة بحصل شغل .. لو الف الدنيا كلها ما بحصل شغل ... بعدين حتى لو حصلت .. وش تبغيني اشتغل ..؟؟ سباك ولا نجار ولا بياع بمحل ..؟!؟! لا يا ست دلع ... كلامك هذا ما يصلح .. انا سعود ولد عبدالله الـ( ..... ) اشتغل هالاشغال ..؟؟ انا اذا ما تعينت بمنصب يناسب مكانتي عساني ما اشتغلت ...!!!!!دلع باستهزاء : منصب يناسب مكانتك..؟؟ ممكن تفهمني انت وش مكانتك بالمجتمع..؟؟ رئيس التربية والتعليم .. ولا من اكبر التجار .. ولا هامووور ف سوق الاسهم..؟؟!! فهمني .... وش موقعك من المجتمع بالضبط ..؟؟!!سكت سعود .. ما عنده أي شي يقدر يرد فيه عليها " بالفعل.. انا وش سويت ف حياتي شي يشفعلي اكون مهم ..........؟؟؟؟ " (( بعد 3 ايام .. بيت مزنه .. يوم الخميس ))( الساعة 6 المغرب )دخلت مها معصبة ورافعة خشمها تطالع خلود باستحقار : انتي شلون تجرأتي وسويتي اللي سويتيه ....؟؟خلود استغربت : بسم الله الرحمن الرحيم .... شفيك...؟!! شسويت انا..؟مها حطت يدها على خصرها وهزت شعرها الاسود : لا والله ..؟؟ مسوية بريئة وما تدرين ......؟؟؟ انتي بلسانك اللي متبري منك ... خربتي علي كل الخطط اللي مسويتها ...... خلود عقدت حواجبها : أي خطط واي خرابيط..؟؟ انتي وش تقولين ...؟؟مها : ترى حركاتك البريئة السخيفة هذي ما بتمشي علي... تكلمي زي الناس يللي ما تربيتي ...!!خلود عصبت .. اكثر من كذا كرامتها لا يمكن تنمسح ف الارض : لو سمحتي يا مها .. انتبهي لالفاظك ... واحترمي البيت اللي احنا فيه .... مها تنرفزت : انتي ابغى افهم .. شايفة نفسك على ايش ... انا اول مرة اشوووف وحدة امها شااارده مع واحد وتاركه زوووجها ترفع خشمها ...!!! وزي ما امك سوت سواتها وشردت من بيت زوجها وهربت مع واحد ثاني .... بنتها ما بتكون غير ...!!!!انا مدري شلون خالتي ابتلت عمرها فيك وبابوووك ..... !!هنا وبس .. الا ابوووها ... قامت وعطت مها ذاك الكف اللي قام صداه يتردد ف الغرفة .. خلود معصبه حدها : شوفي يا بنت الناس .. انا تحملت منك الكثير .. وصبرت وصبرت مو عشان سواد عيووونك .. الا عشان البيت المحترم اللي انا فيه ... سكت وانا اسمعك تتكلمين على امي وما اقدر اقووول شي لانها غلطانه ... بس ابوووي .. الا ابوووي .. فهمتي ..؟؟ لسانك هذا لو يجيب طاري ابووووي والله لا اقصه لك .. وقدام كل الحريم بعد ....!!!! فاهمة ..؟!؟!؟!؟مها اللي انجرحت كرامتها من هالكف .. طلعت بسرعة تركض من الغرفة بعد ما قالت بتهديد : طيب يا خلووود ... والله لا اخليك تندمين على هالحركة طوووول حياتك...!!وطلعت بسرعة من الغرفة تجر معاها ما بقى من كرامتها .......___________________________________

29 - 3 - 2014, 05:31 PM

(( المطـــار ))( الساعة 6 ونص )وقفت ريم متحمسة ومو قادر تمسك نفسها من الوناسة : ياربيييييييي وش فيه تاخر..؟؟!!رائد : هههه اصبري يا هبلة ... لازم يخلص الاجراءات داخل قبل ما يطلع وياخذ شناطه..ريم : تتوقع جاب لي هدية..؟؟ام رائد : انتي ما همك غير الهدية ...؟؟؟!! ريم : هههههه لازم اطلب منه شي .. الاخ رايح ايطاليا وما اخذني .. لازم تعويض ..رائد انتبه لها : انتي مو صرتي تتغطين ..؟!؟؟! ليش كاشفة وجهك...؟؟!؟!ريم نقزت تركض : جا بابااااااااااااااااااااااااا ......وطاحت بحضنه تبوووووسه ابو رائد : هههه هلا بريم حبيبتي .... ريم : بابا حبيبي .. وحشتني ...ابو رائد : حتى انا يا قلبي....ام رائد قربت وسلمت على زوجها وباسته على خده : الحمدلله على السلامه !!ابو رائد : الله يسلمك .... كيفك..؟؟ام رائد : بخير بشوفتك .... طولت ...!!!ابو رائد : وش اسوي .. الله يقطع هالشغل .. هلكوووني بالاجتماعات .. وكل اجتماع مدته 6 .. 7 ساعات .... ام رائد : الله يعطيك العافيه ...قرب رائد شايل الشنطه : الحمدلله على السلامة ابو الشباب ...وضرب حضنه وسلم عليه ....ابو رائد ابتسم : الله يسلمك .... شعندكم اليوم ...؟؟ غريبة جايين المطار تستقبلوووني ..... كل هذا اشتقتووولي... ريم تسندت على يده : فديتك بابا .. والله البيت مو شي بدووونك .. ام رائد : اقووول ممكن تسكرين لي فمك وتمشين مع اخوووك .. حتى زوجي ما اقدر اوقف معاه دقيقتين بروحي..!؟!؟!؟!؟!؟ريم : ههههه قولي انك تغارين ... ماني رايحة ... !!!!___________________________________(( بيت مزنة ))( الساعة 8 المسا )قاعدة ف غرفة خالها والكره والحقد عامي قلبها .... مها بتوعد : انا اوريك يا خلووود ... على آخر عمري تجي وحدة زبالة تمد يدها علي وتهزئني....؟!؟!؟!؟!؟ طيب .. ما اكووون مها لو خليتك بحالك....وفجأة طرت على بالها فكرة خطيرة .. وبسرعة قامت واخذت الجوال حقها ... ودقت على ثامر ....___________________________________(( بيت ابو سعود ))( الساعة 8 ونص المسا )دخل سالم البيت ومعاه فيصل وامل اخته ....سالم : ههههه بتستانس عليها لينا الحين .. فيصل : اخاف تتعبها امل....!!سالم : امل تتعبها ..؟؟ لينا زي الجنية ما يتعبها شي .....!!وطلعوا للصالة اللي فوووق ... وقعد فيصل على الكنب وحط امل اخته جنبه ع الكنبة .. سالم : وينها هذي..؟؟ فيصل : يمكن بغرفتها.... سالم : لحظة بروح اشوووفها .... فيصل : امك وابووك وين ..؟؟سالم : مدري .. شكلهم طالعين .. مالهم حس ولا خبر ...راح سالم لغرفة لينا .. دق الباب بس محد رد .... سالم : لينا ... لينااااااااا ... ليووووونز .... افتحي الباب انا سالم ....ويوم ما حصل أي رد ... فتح الباب .... ودخل بس يوم شاف لينا ممدة ع الارض بغى يغمى عليه : ليناااااااااا ..........راح لها وقعد جنبها وقام يضربها بالخفيف على وجهها : لينا .. لينا وش فيك..؟؟ لينا قووومي .... قووووووووووووومي .....وعلى صراخه وصل فيصل للغرفة مرعووووب : وش فيـــــــــــــــــ.......انقطع كلامه يوم شاف لينا ع الارض وسالم يحاول يقومها ....فيصل : شفيها ...؟؟؟سالم بينجن : مدري ... مدري وش فيها ... لينااا.. لينا حبيبتي قوومي ...طلع فيصل من الغرفة بسرعة .. ويوم شاف الخدامة بوجهه : وين بابا وماما...؟؟الخدامه متخرعة ومو دارية وش صاير : بابا ماما كله مافي موجود .. كله برا ...فيصل رجع شعره لورى بخوووف ورجع يركض للغرفة : سالم ... قوووم ... قوم خلينا نشيلها نركبها السيارة ونوديها المستشفى ....سالم فتح عيونه الثنتين : مستشفى ..؟؟ ليش..؟؟ شفيها..؟؟فيصل منفعل ويصارخ : وش دراني وش فيها..؟؟ ما تشوفها مرمية على الارض وجها اصفر ... قوووووووووووووم ...!!!سالم : طيب طيب ... روح شغل السيارة وانا بشيلها والحقك ....فيصل سبقه : يللا بسرعة ...دخلوها السيارة وراحوا فيها للمستشفى ....___________________________________

29 - 3 - 2014, 05:31 PM

(( بيت مزنة وقت العشا ))( الساعة 9 ونص المسا ) وقف ثامر مرتبك وخايف ...... ثامر " افففف ... الله يستر لا يطلع احد ويشوووفنا ... الله يهديها ما تسمع الكلام .. اقول لها خطر نتقابل ف بيت جدتي .... بس عنيده ....ماتفهم!!! " وقف قدام باب المطبخ ينتظر بترقب .... يلتفت كل دقيقة يمين ويسار لايكون احد موجود ويشوفه او يراقبه .... شوي الا انفتح باب .... وقف يطالع البنت الحلوة والناعمة اللي طالعه ... لابسة فستان اسود قصير للركبه ... ومسشورة شعرها بطريقة ناعمة .... وحاطة روج احمر ..... وشايلة دلة القهوة .. تعدل ف وقفته مع انه مرتبك .. بس حاول يمسك اعصااابه .. ثامر : مسا الخير.....!!وقفت منصدمه ... طالعت فيه بشك وخوف .. بعدين قالت : يووه ... بسم الله ... شفيه شكلك متغير...؟؟ ثامر رفع حاجب مسوي فيها شخصية : شلون متغير..؟؟ من أي ناحية..؟؟ردت عليه وهي تتامله شوي : ممم .. مدري بس فيك شي متغير .... ( انتبهت لشكلها وهي واقفة ) ا... وين ابوي..؟؟ ( في نفس الوقت )يوسف : وينه اخوك هذا ..؟؟ ما كمل عشاه ... بندر : والله مدري .. يمكن واحد من ربعه دق عليه او نسى شي ف السيارة ... يوسف جا بيقوووم : بقوم اشووف وينه ...بندر مسكه بسرعة مرتبك : ها ..؟؟ لا لا ... اجلس وارتاح وكمل عشاك انت .. وانا بروح اشووفه ...يوسف : معليه انا بقوم ...بندر : لا والله ما تقوووم .. حلفت عليك .. انا اصلا خلصت اكل ... بغسل يدي واروح اشوووفه ... اقعد وكمل اكلك بالعافيه .... يوسف : الله يعافيك ... طلع بندر مرتبك وخايف ... بس مرتاح بنفس الوقت انه يوسف ما طلع .... بندر " الله يهديك يا ثامر ... قلنالك ما ينفع تقابلها بالبيت هنا قدام كل خلق الله ... افففف وينه هذا الحين ..؟؟ " ( وفي نفس الوقت )ثامر وهو يعدل شماغه : ابووك..؟؟ ههه ادري انها تصريفه لانك مستحية .. بس ما قلتيلي .. متغير للاحسن ولا الاسوأ..؟؟ طالعته وهي خايفة وتدووور بعيووونهها حواليها : ا... عادي ... ممكن تناديلي ابوووي..؟ثامر : يعني حلو ..؟؟ "افففف هذا وقته الحين..؟؟" : ممم ... أي ... اخلص شفت ابوووي ولا ادخل..؟؟ابتسم ثامر وطلعت اسنانه : فديتك ... حتى انتي متغيرة ... توني ادري انك لما تستحين تغيرين الموضوع وتمثلين ببراعة ..طالعته باستغراب : امثل..؟؟ ثامر : أي ... بصراحة طلبك انه نتقابل كان جريء ... بس الحين عرفت انك تستحين.. عقدت حواجبها مستغربة ومو فاهمة شي : انا ..؟؟ متى كلمتك انا ..؟؟ بس ما لحقت تسمع الرد لانه صوووت من بعيد ناداها والتفتت هي وياه لمصدر الصوووت ....... بندر مستغرب وفاتح عيونه ع الاخير : خلووووووووووود..........؟!؟؟!؟!ثامر مستغرب : انت تعرفها ...؟؟ خلود منصدمه : بندر ...!!!! ... ا. اجل ... ( لفت على ثامر ) مين.. ه .. هذا ...!؟!؟!؟بندر بعصبية ما قد احد شافه عليها ... هجم على ثامر وعطاه بوووكس قوي على خده ... خلا ثامر يطير مترين ويطيح ع الارض : سويتها يا حيوااااااااااااااااااااااااااااان ...!!!سكرت خلود فمها عن تصارخ او يطلع صوتها وينتبه لهم احد .... ودموعها كانت تنزل من الخوف : ياربي .... انا شسويت ..؟؟!! بندر الله يخليك اتركه .... بندر .... بندر لف عليها معصب وواصله معاه : ادخلي البيت بسرعة .. ما ابغى اشوووف وجهك قدامي ... بسرعة لا اخلي اللي جاله يجيك فاهمة ..؟؟؟؟!!!!!!خلود : بـــ.....قاطعها وصوته علا : لا بس ولا شي .... ما ابغى اشوووف وجهك ولا اسمع صوتك بعد اليوم فاهمة ...؟؟!!؟!؟!؟ انقلعي من وجهي لا اسويلك فضيحة الحين .... تسمعين ولا لأ ....؟؟؟؟؟ ثامر وقف معصب : انت وش فيك..؟؟ ممكن تفهمني ..؟؟ باي حق تهجم علي كذا وتضربني قدام البنت ..؟؟!!!!!بندر مسكه من ثوبه بقوة : وتسال بعد ... انت تدري هذي مين ... تدري..؟؟ ثامر : انا قايل لك .. هذي خلود بنت خاله بدريه ........................!!!!بندر وقف منصدم : انت وش تقوووول ..؟؟ يعني اللي كنت تكلمها 24 ساعة وتتواعد معاها تتلاقون كانت خلووود ...؟؟ثامر وخر بندر عنه : والله العظيم خلوود ... هي قالت لي بنفسها ..... وقالت بطلعلك من باب المطبخ ... انتظرني هناك .... بندر عصب وعطاه بوكس ثاني : تدري انك واحد حقير وخسيس...؟؟؟ تدري ولا لأ...؟؟ واللي سويته اليوم .... ياكد هالشي .... وترك بندر ثامر اللي بدا يسيل الدم من شفايفه .... وركب سيارته وطلع من البيت ...

29 - 3 - 2014, 05:32 PM

(( بيت ابو غاده ))( الساعة 2 بعد منتصف الليل )تم الجوال يرن ويرن ...... لين ما قامت ام غاده ....نورة : ابراهيم ... ابراهيم .. قوم شوووف التليفووون .. شكله ضروووريقام ابراهيم بثقل : اففف .. مين بيتصل فهالوقت ...؟؟نورة عطته الجوال : مدري شوووف ... اخذ ابراهيم الجوال ورد : الو ..... مين..؟؟ آآآه هلا محمد ... شفيك..؟؟ ها..؟؟ احلف..!؟!؟ صحيح والله ...!!!! طيب طيب .. انا جاي الحين .. وين..؟؟ خلاص طيب ... ربع ساعة واكون عندك .. يللا مع السلامة .... سكر التليفووون مرعوووب وفز واقف للدولاب وطلعله ثووووب .... نورة متخرعة وقلبها ناغزها : ابراهيم ..؟؟ شصااااير..؟؟ابراهيم وهو يلبس الثوووووب : امي طاحت وودوها المستشفى .. ومحمد واحمد هناااك ... ويقولون حالتها خطرة نورة حطت يدها على قلبها من الخوووف : طيب وش فيها ..؟؟ابراهيم وهو يسكر ازرار الثوووب : مدري يا نووورة .. خليني بس اوصل هناك واتصل عليك ...قامت نورة بسرعة من على السرير وفتحت الدولاب : لا والله ما تروح بدوووني .. انا بجي معاك .... ابراهيم وهو متوتر : ما يحتاج يا بنت الحلال ... اذا صار شي .. جيت واخذتك .... خليكي هنا مع البنات .... نورة طلعت لها أي ملابس : البنات كبار ويعرفوا يتصرفوا لوحدهم .. وانا رايحة معك وهذا آخر كلام ...ابراهيم ماعنده وقت للنقاش والجدال : طيب بسرعة ....(( يوم الجمعة ... بيت ابو بندر ))( الساعة 9 الصباااح )تعبت دانة من اللف ف الغرفة رايحة جايه : اف .. الله يستر يااارب .... شفيهم طولوا...؟؟ ثامر اللي قاعد وسرحان وخايف بنفس الوقت : اصبري شوي .. اكيد للحين ما صار شي .. اذا صار شي اكيد بيتصلوا ...دانة قعدت جنب ثامر تترجاه والدموع ف عيونها : ثامر ... انت عندك سيارة .. الله يخليك .. وديني لهم ... الله خليك يا ثااامر .. ثامر ضايق صدره وباله مشغووول : يا دانه خلاص اهدي ... لو في شي طارئ صاير .. كان اتصلوا فينا ..... بس ما اتصلوا .. يعني للحين ما صار شي ... انتي اهدي وروحي نامي شوي .. من امس ما نمتي ..... دانة بعناااد : ماني نايمة .. جدتي ف المستشفى طايحة وانا نايمة بالبيت ..!؟!؟!؟!ثامر : يعني لو رحتي وش بتسوين ...؟؟؟؟؟دانة منفعلة : أي شي .. بس ما اقعد هنا كذا .. ع الاقل اككووون مطلعة ع الوضع من المستشفى ..... ثامر : اففف ... اصبري .. نستنى ساعة اذا ما جانا خبر .. انا بنفسي بوديك .. طيب..؟؟دانة بياس وخووووف : افف .... طيب ...وقف ثااامر ...دانة مستغربة : على وين...؟؟ثامر : بروح ابدل ملابسي .. من امس وانا بهالملابس ... باخذلي حمام سريع .. دانة : طيب بس لا تطول .... ثامر واصلة معااه : خلاص زين ... طلع فوووق معصب ....دانه " يوووه ... شفيه هذا بعد..؟؟ من امس وهو قالب وجهه ..؟؟ ياربي مانا ناقصين مصااايب ارفق فينا يااارب " ..... ___________________________________نهاية البارت الـ 20 ... ايش رايكم بالاحداث اللي صااارت ..؟؟بندر وثاامر ... معقولة تفرق من بينهم بنت ..؟؟وخلود وش بيصير فيها ...؟؟ومها .. تعتقدوا بنتفذ من العقاااب ..؟؟ سعود ودلع ... هل بيصير تغيير ف حياتهم ..؟؟ ولا الوضع راح يبقى زي ما هوو..؟؟

29 - 3 - 2014, 05:33 PM

الجزء الـواحد وعشرين :.(( بيت ابو بندر .. يوم الجمعة ))( الساعة 11 الصباح )طلع ثامر من الغرفة بعد ما تسبح ولبس ملابسه ... طبعا ثوووب والشماغ على كتفه .. وهو نازل الدرج .. سمع صوت الباب ينفتح .... فبدت خطواته تصير سريعة لين وصل تحت .... وشاف بندر داخل وشكله مرة مبهدل ... وتعبان ... ثامر مسك شماغه " الله يستر .. شفيه شكله كذا ..؟؟ " : ها بندر ... طمني .. عسى ما شر.... شلون حالتها ...؟؟ للحظة التفت عليه بندر باستحقاار .. بس بسرعة لانت ملامح وجهه .. بس للحين الزعل والتعب مبين عليه ..... ثامر : بندر تكلم ... قووول شي .. لا تسكت ... بندر فصخ شماغه ورماه على الكنب بقهر : امي الحين بتجي مع ابووووي ثامر مسكه من يده وضغط عليها : اسمع ... الحين مو وقت مشاكلنا انا وياك .. هدي الوضع شوي بين ما نعرف وش صاير .... وكلمني وفهمني وش السالفة ..؟؟ بندر طالع فيه وكانه هو نفسه موافق على هالحل : .........................وين اختك؟؟ ثامر : فوق تصلي ... من امس مانامت ... ومرة خايفة ... نزل بندر راسه للارض : شوف انا بقول لك ... بس لاتقول لها ... خلي امي هي اللي تقول لها .... ثامر مستغرب : شصاير...؟؟بندر : امس بالليل جاتها سكته قلبيه ..... ثامر : طيب ...؟؟بندر والالم على وجهه : وو ... ونقلوها للمستشفى ... ثامر : وبعدين..؟؟ قوووول خلصني... بندر ضغط على جبهته بتوتر : وو ... عطتنا عمرها .... ثامر فتح عيونه الثنتين ولا قال ولا كلمة .... بس ما يقدر يوقف على رجوله ... وجلس على اقرب كنبه ... منصدم ... بندر الدموع ف عيونه : انا بروح آخذلي حمام سريع ... لانه بعد شوي ابوي وامي بيوصلون ويجهزون للعزا .... ثامر : .....................................ولا كلمه .... ___________________________________(( شقة سعود ودلع ))( الساعة 12 ونص )دخل سعود الشقة متحمس ... ومعاه باقة حلوة من الورد الاحمر .... سعود : دلع .. دلع ..... طلعت دلع من الغرفة ماسكة المبخرة : نعم ..؟؟سعود : تبخرين ..؟؟دلع : اي ريحة الشقة مرة كريهة .... انتبهت للورد اللي بيده ............... سعود ابتسم : ا... دلع .. ابغى اكلمك شوي .. دلع مستغربه : غريبة ... قووول .. سعود جلس ع الكنب : تعالي اقعدي ....جات دلع وقعدت " شكله وراه شي ...!! الله يستر " : قووول يا اخ سعووود .. ايش فيك اليوم بعد ...؟؟ سعود تعدل ف القعدة : ا... اول شي هذي لك ...مد لها باقة الورد .... وهو يبتسم ...دلع ترددت ...... وقعدت تطالع ف الورد سعود حس فيها : دلع ... خذيها ... هدية صغيرة ... اخذت دلع الباقة وطالعته مستغربة : طيب والمناسبة ...؟؟سعود ابتسم : ا.. اليوم بعد ما صليت الجمعة .. شفت واحد اعرفه .. وكلمته ... وو .. قال لي انه بيشوووف لي وظيفة .....!!!دلع سكتت شوي تطالع فيه ... تشوف اذا هو صادق ولا يكذب كعادته .. بس شوي شوي بدت ابتسامة تنرسم على وجهها : انت من جدك...؟؟سعود وقف بفخر وغرور : أي من جدي ... اجل انا سعود ... اخلي احد يصرف علي وياكلني ويشربني عل حسابه ...!؟!؟!!؟ لا والله ما ارضاها .. دلع : لا والله سعود من جد ... تضحك علي ولا صدق السالفة..؟؟سعود قعد : والله العظيم ... اني ما اكذب هالمرة ...بالرغم من الفرحة اللي جاتها .. ما بغت تفرح زيادة .. لانها تعرف سعود .. يحط براسه شي كم يوم .. بعدين يرجع فيه .... او يهون ... قامت وقفت : ممم .. طيب يللا بالبركة ... جات بتمشي بس سعود مسكها ولفها وخلاها تقابله : دلع .. شفيك..؟؟ والله ما اكذب عليك هالمرة .... دلع الدموع ف عيونها : مو كذا يا سعود .. بس .. انا .. خ .. خايفة ... سعود مستغرب : خايفة من ايش..؟؟ دلع نزلت راسها : خايفة يصير شي يخليك تغير الموضوع ... وترجع زي ما كنت ... سعود ابتسم " من حقها والله تخاف .. انا نفسي ماني واثق من الموضوع " : شوفي .. انا الحين قاعد اعطيك كلمتي .. والرجال لا عطى كلمة ما يتراجع فيها ... انتي بس عطيني ثقتك هالمرة ... بس هالمرة .. ادري خنت ثقتك كم مرة وخذلتك .. بس هالمرة انشالله غير ... حاول معاي وساعديني عشان نعيش زي عالم والناس ... طلبتك .... دلع بطيبتها ابتسمت : طيب.....رن جوال سعود ........... وطلع جواله ورد ..سعود : الوو ... ( رفع حاجبه مستغرب ) نعم سالم ...؟؟ ايش..؟؟ انت من جدك ..؟؟ طيب شلونها الحين ....؟؟؟ فز قلب دلع .... خاافت مرة .... سعود : طيب طيب ... بشوووف ... خلاص قلت لك بشوووف .. يوووووووه انت ما تفهم؟؟ ها..؟؟ خلاص زين ... ساعة الا ربع ونكون هناك .... طيب ... يللا مع السلامة..سكر السماعة ....دلع بخوف : شفيهم...؟؟ شصاااار ...؟؟ سعود تنهد : هـــ.... يقول لينا ف طاحت عليهم وهو وفيصل ودوها المستشفى .. ومايدري وين امي وابوي .... دلع حطت الورد على الكنب : سعود .. الله يخليك وديني لها .. واللي يعافيك ....خليني اشوفها واتطمن عليها ... سعود : والله هالبنت دلوووعه .. ماله داعي نروح ....!!!!دلع : حرااام عليك ... الله يخليك يا سعود .... الله يخليك ... ابتسم سعود : يللا طيب البسي بسرعة .. وانا بنتظرك ... ابتسمت دلع بشكر وامتنان .... وراحت تركض للغرفة ...

29 - 3 - 2014, 05:36 PM

(( بيت ابو بندر ))( الساعة 1 الا ربع )دخل ثامر البيت تعبان والعرق يصب منه .. واول ما شافته دانه ركضت وحضنته وقعدت تصيح : اهئ .. ثامر وينها.....؟؟؟؟!!!حضنها بقوة وهو يتالم : خلاص ... خلاص لاتصيحين ... وبسرعة جات ام بندر ووخرتها عنه وهي تصيح : الله يهديك يا دانه .. ما تشوفين اخوك تعبان..؟؟ الله يهديك بس .. تعالي يا بنتي .... تعالي دانه حضنت امها : مممم... ممم .. ابيها .. ابيها لاتمووووت .. الله يخليكم ابيها...حضنتها امها تهديها وهي تدمع : استغفري ربك يا دانه... هذي حكمة ربك .. لازم تتصبري .. وتحتسبي الاجر ... ادعيلها .. ادعيلها يا حبيبتي ... مسح ثامر دموعه وقال بكل الم : يما ... ابوي وعمي ابراهيم وبندر دخلوا المجلس .. ويبغوا شي يبرد على قلبهم ف هالجر .... تراهم تعبانين مرة .... ام بندر : انشالله ... روح حبيبي تروش .. بين ما اسويلك القهوة وتاخذها .... ثامر : لا معليه ... مو الحين .... ام بندر : احمد وين ..؟؟ثامر : برى ... يقول شوي ويدخل ... ام بندر : شلونه ...؟؟ثامر تنهد : هــ .. الله يعينه ... منهااااااااار ام بندر مكسووور خاطرها : مسكين ... هالولد مو ناقصه هموووم ... احنا ما صدقنا طلع من حزنه على خويه .... الحين امه ..؟؟؟ الله يعينه ويصبره بس.... /\/\قعد ف السيارة قافل عليه الباب ........ رجعت دموووعه تنزل للمرة الالف بهاليوم ... تنزل بغزارة ... اعز انسانة واحن قلب عليه ف الكون ... رااااااااااااااااحت .... ضرب بقوة الدركسوون حق السيارة .... احمد بعصبية : لييييش انا ..!؟!؟!؟ لييييييييش..!؟!؟!؟! انا وش سويت عشان يصير فيني كذا ..!!؟!؟؟!!؟ لييييييييييييييييش...!؟!؟!!؟ طول عمري اراعي الناس واحبهم ... ليش الدنيا تكافئني بهالشكل..!.؟!؟!!؟ ممكن احد يفهمني..!.!؟!؟!؟!؟اول شي خذت اعز اخووو وصديق علي ... والحين امي .. اطهر قلب واحن قلب علي...!!!!! ما كفاها ..!؟؟!؟! ما كفاها تاخذ كل اللي احبهم..!؟!؟!؟!___________________________________( ( المستشفى ))( الساعة 2 الظهر )دلع : اففف .... ياخي اتصل شوف أي غرفة .. بسك تغلّي ....!!سعود بعناد : مو شغلي.. انا ماني داق عليه... الحين بيحسبني مهتم ...دلع لف عليه مستغربة : احلف انك مو خايف عليها ولا مهتم ..؟!؟!؟سعود هز كتوفه : ما بقى الا هالبزر اللي اخاف عليها.. بعدين تراها بسبع ارواح .. دلع لفت وجهها عنه وما قالت ولا كلمه " ابغى افهم من وين جايب هالقلب الحجر ..!؟"راح سعود للرسيبشن : لو سمحت .. ادور عن غرفة اختي المريضة..الموظف : طيب ايش اسمها ..؟؟ سعود : لينا عبدالله الـ(.....) ... الموظف طقطق كم حرف على الكمبيوتر .. وبعدين قال : الدور اللي فوق .. غرفة رقم 207 ... سعود : اهاا.. طيب شكرا ...رجع لدلع اللي واقف تنتظره : يقول الدور اللي فوق .. غرفة رقم 207 .. يللاوقفت دلع عند محل للهدايا : لحظة .. انشالله بتروح لها بدون هدية ..؟؟ سعود حاس فمه : اففف... بعد هدايا...؟؟ الحين بتشوفين انه ما فيها شي .. دلع تنرفزت : انت وش فهمك بالايتيكيت ...؟؟؟ سعود لحقها وهو يتحرطم : انا افهم منك والله ... قال اتيكيت قال...!!!......................................... ........................................انتبه لهم فيصل : سالم ... شوووف مين جا..!!التفت سالم وما حصل الا دلع حاضنته بكل قوتها بفرح : ساااالم .. اشتقتلكم مررة .. سالم : اشوووه انك جيتي .... وخرت عنه دلع وانتبهت لفيصل : شخبارك فيصل..؟ فيصل ابتسم : بخير الحمدلله .. وانتي شلونك..؟؟ دلع : الحمدلله انا بخير... ( التفتت لسالم ) شخبار لينا..؟؟سالم تنهد : هــــ .. يقول الدكتووور انها بخير... بس تحتاج راحة ف المستشفى يومين .. عشان تهدى اعصابها ... دلع : يعني ما بتطلع اليوم...؟؟سالم : هو قال لي نقدر نطلعها اليوم .. بس تحتاج كل سبل الراحة والعناية .... وطبعا البيت تعرفين ... ما يساعد .... دلع : شلون يعني ما يساعد..؟؟ تبقى ف المستشفى يعني احسن..؟؟!؟فيصل اتدخل : يا دلع .. ادري انه مالي حق اتدخل .. بس انا اشوووف اللي يشوفه سالم ... المستشفى احسن لها من جو البيت الكئيب الفاضي... وخصوصا انه خالتي مو موجودة ولا تدري عن اللي صار ... وعمي نفس الشي .... دلع : مم .. مدري والله ... انا بدخل اشووفها احسن .... ( التفتت على سعود ورجعت لفت على سالم واتبسمت ) ... ا.. سالم ... روح سلم على اخوك ... سالم رفع حاجب : أي اخو ..؟؟دلع بعتب : سالم لا تسوي كذا ... شووف .. انا بدخل الحين عند لينا .. وانت رو سلم على اخوك ... ولا ترى بزعل عليك ... صدقني ... سالم : يوووه .. عاد الحين صار زوجك ... ما نقدر نزعله يعني..؟؟دلع ابتسمت : لأ ما تقدرون.. يللا اشوووف .. وراحت لسعود .. اخذت منه الورد والهدية : انا بدخل ... ما بتجي..؟سعود دخل يده ف جيوبه : لأ ... ماني مستعددلع : ههههه مستعد حق ايش.. ادخل معاي .. صدقني بتفرح فيك....سعود : خليني براحتي.. لا بغيت ادخل بدخل .. دلع : طيب...وراحت عنه ودخلت الغرفة ...لينا اللي كانت تبرد اظافرها بالمبرد : دلع........!!!!!ابتسمت دلع وشالت الغطا من على وجهها : مفاجأة...!!!!ضحكت لينا فرحانه .. وعلى طول ... تحولت هالضحكة لتكشيرة تنزل معاها دموع بغزااارة ....

29 - 3 - 2014, 05:36 PM

قربت منها دلع مستغربة وحضنتها : حبيبتي لينا ... شفيك حبيبتي ...؟؟ ليش تصيحين..؟؟؟ لينا تصيح من قلب : وينك من اول..؟؟ ليش ما جيتي وزرتينا..؟؟ ليش..؟؟ ليش تركتيني لوحدي ف البيت... مالي احد غير الجدران ...!؟!؟!؟ دلع باست راسها تهديها : حبيبتي والله الظروف ما سمحتلي.... انتي تعرفين وضعي زين ...... رفع لينا راسها بحزن : كريهة الحياة معاه صح ..؟؟ دلع بتفاؤل ابتسمت : الحمدلله الحين احسن من اول .... لينا لفت وجهها باستنكار : الله يعينك ... انا اعيش لوحدي طول العمر ولا اعيش معاه .. دلع مسكت يد لينا بحنان ورصت عليها : صدقيني بيتغير .. اا واثقة من هالشي .. بس يبغاله الواحد يصبر عليه ويدفه شوي ... لينا : يقولون رحتوا اوروبا ...؟؟؟ شصار هناك..؟؟!؟!دلع ابتسمت بااستهزاء .....لينا ضحكت معاها : هههههه توقعت هالشي ... انتي وياه ف اوروبا ..!؟!؟ مستحيييييل..دلع : وداني أحلى شهر عسل ... ف اوروبا الخليج ....!!!!! لينا : ههههههه وين هذي..؟؟دلع : رحنا الكويت اسبوعين ... الحمدلله انبسطنا ... لينا رجعت لها طبيعتها شوي : طيب... وش جبتيلي...؟؟؟ دلع منحرجة : وربي حتى الجالكسي ما اشتريته هناك ... لينا : اوووه..!!! توني ادري اخوي كريم لهالدرجة .... حتى ورد ما جاب لي ....!!دلع مدت لها الورد اللي بيدها : حرام عليك ... هذي منه ...لينا ابتسمت : حاولي غيرها .. دارية انها منك .. ولا هو ما بيفكر فيها طبعا ...دلع : لاتظلمينه ... صدقيني قاعد يتغير ... عطيه فرصة .... لينا مستغربة : شلون اعطيه فرصة ..؟؟ حتى ما جا قال لي الحمدلله على السلامة .. دلع مترددة : ب .. بصراحة ... هو كان يبغى يدخل .. بس انا خفت انك ف وضعك هذا ما تتحملين تشوفينه ... عشان كذا خليته يوقف برى ينتظرني .. ولا هو كان يبغى يدخل.. لينا مستغربة : صدق...؟؟؟ دلع ابتسمت : أي صدق ... انا صارلي معاه شهر .. واقدر اقولك اني اعرف تصرفاته .. طبعا مو كلها ... بس طبعه بشكل عام صرت اعرفه ... هو بس يبغاله احد يفهمه وياخذه على قد عقله .... لينا : ههههه والله وعرفتيله يا دلع ....!! ممكن اطلب منك طلب..؟؟دلع : اكيد حبيبتي ... قولي... آمري... لينا : الله يخليك كل يوم تعالي... ما احب اقعد لوحدي ...دلع فكرت : ممممم .... موافقة ....بس بشرط ...لينا : موافقة عليهم ... دلع : تعطين سعود فرصة ثانية ......!!!!!لينا لفت وجهها بسرعة : لأ...دلع كشرت بعتب : وش قلنا ...؟؟ ما تبغيني اجيك كل يوم ...؟؟ لينا : بس يا دلع .. والله ما اقدر .. ما احبه ... لما اشوووفه احس ودي اخنقه بيديني الثنتين .....دلع : لينا .. ما يصير هذا اخوك الكبير .... زي ما سالم اخوك وتعزينه ... سعود بعد نفس الشي.... لينا : سعود غير ... مو زي سالم ... سالم حنووون وياراعي اللي حوله .. سعود اناني وما يفكر الا بنفسه ...دلع رجعت شعر لينا لورى اذنها : هذا اول ... الحين تغير ... عطيه فرصة ثانية .. انا كنت زيك اقووول كذا .. بعدين قررت اعطيه فرصة واشوووف شلون بيصير .. وفعلا ... تغير 180 درحة .... لينا : قولك كذا ...؟؟دلع : انا متاكدة انه بتصيرون احسن اخوان .. انتي بس عطيه فرصة ثانية .. فرصة وحدة.. مو اكثر .... لينا ابتسمت : لعيووونك بس .... حضنتها دلع بشكر : حبيبتي انتي ... تسلم عيووونك ...وخرت عنها لينا منصدمه : دلع ...!!!! ليش وجهك كذا ...؟؟!!!دلع شكت بنفسها وقامت تلمس وجهها : ليش..؟؟ شفيه ..؟؟لينا : لا كحل .. ولا مسكرا .. ولا آي شادوو ... ولا بلشر .. ولا قلوووس ولا شي.... وين الكشخة اللي كنتي ما تتركينها ...؟؟؟دلع انحرجت : ا..... ا.... لينا : اشوف افتحي عبايتك .... فتحت دلع عبايتها كاتمة الضحكة " بتستخف الحين خخخ " ....لينا حطت يدينها على راسها منصدمه : ياويلي ....جينز وبلوزة البيجاما...!؟!؟!؟؟!! ايش هذااااا...؟!؟!؟!؟دلع سكرت عبايتها : خلاااص عاد ... من خوفي عليك ما لحقت اتكشخ ... لينا : احلفي انه بس اليوم انتي كذا شكلك مو كل يووم ....؟؟؟دلع : ههههه ما بحلف ... لينا : انا اوريك ... يبغالك ميك اووووفر من فوووق لتحت .. حتى شعرك متقصف ونااشف.. وتحت عيونك سواد مو طبيعي ....!!!!! بكرة لا جيتي ... جيبي شنطة المكياج حقتك .. او خلي سالم يجيبلي الشنطة حقتي ... فيها اشياء اكثر ..... !!دلع : هههههه طيب زين .... ___________________________________(( بيت ابو رائد ))( الساعة 4 العصر )دخل رائد منصدم لمكتب ابوووه بدون ما يدق الباب .... ابو رائد مستغرب : رائد...؟؟ شفيك داخل كذا ...؟؟رائد جلس على المكتب : دريت بللي صار...؟؟ابو رائد : وايش اللي صار...؟؟؟ رائد : دانه .. توها اتصلت فيني .... تقول جدتها ام ابوها ماااتت .... ابو رائد بحزن : لا حول ولا قوة الا بالله ... الله يرحمها ... شلون مااتت رائد زعلان : تقول جاتها سكتة قلبية فجأة ... ابو رائد : انا لله وانا اليه راجعووون ... الا تعال .. الحين هذي مو ام احمد ...؟؟ رائد : الا .. وهذا اللي كاسر خاطري... ابو رائد هز راسه باسف : مسكين هالولد .. الله يعينه ... ما يطلع من مشكلة .. الا ويدخل ف الثانية ... وكان المصايب متفقة عليه ....رائد : أي والله ما يستاهل ...!!!! الشقا وراه وراااه .... ابو رائد : يا رائد ما يجوز هالكلام ... هذي حكمة ربك ... مو على كيفك تقرر يستاهل ولا لأ.... ادعيله بالصبر والاجر انشالله ... رائد وقف : آمين ... يبا احنا لازم نروح نعزيهم ....ابو رائد : مافي شك ... بكرة انا وموظفين الشركة بنروح بعد صلاة الظهر ... رائد : وانا بروح مع امي ورين بعد صلاة العصر .... ابو رائد : أي لازم .. رائد جا بيروح : استاذن انا ....ابو رائد : يا رائد ...رائد التفت : سم يبا .... ابو رائد : شوووف ... دام كذا السالفة ... العرس شكله بيتاجل... !!!!رائد مستغرب : ليش..؟؟؟ابو رائد : البنت جدتها ميتة شلووون لي يعني..؟؟ انسى موضوع العرس شهرين زيادة ... خلي الاوضاع تهدى شوي ....رائد بتفكير : انشالله بنشووف ........ ............................طلع من المكتب وشاف ريم بوجهه .. ريم : رائد .. بتطلع ..؟؟رائد : أي طالع شوي .. بمر على بيت عمي بو بندر وبرجع ... ليش بغيتي شي..؟؟ريم : بتروح الدوام ..؟؟ ليش مو عندك اجازة ...؟؟ رائد : الا.... بس بو بندر توفت امه امس بالليل ... وبروح بشوف يحتاج اساعده بشي للعزا.. ريم حطت يدها على فمها : يووووه .... الله يرحمها .. بروح معاااااك .. رائد : مو اليوم ... بكرة بوديك انتي وامي عشان تعزون بعد صلاة العصر .. ريم : طيب اوووكي ... مو تنسى .....رائد : انشالله ... سي يووو ريم : بااااي .. رجعت ريم للصالة وقعدت على الكنب تفكر " مسكين يا احمد ... يا ترى شلون حالتك الحين ؟؟؟ الله يعينك يااارب ... " نقزت فجأة وهي خاقة " وااااااااااي .. الحين دموووعه تنزل على خدووده ... ويكون مكشر...!!! .... استغفر الله وش قاعدة اقوووول انا ..؟!؟!؟ الرجال امه ميته وانا قاعدة اتغزل فيه واتخيل شكله...!؟!!؟؟!!؟ استغفر الله استغفر الله .. ياربي سامحني .... "___________________________________

29 - 3 - 2014, 05:37 PM

(( شقة سعود ودلع ... ))( الساعة 8 بالليل )سعود : دلع وين وديتي الكيس...؟؟ دلع طلعت من الغرفة شايلة كيس ماكدونالدز اللي اشتروه وهم راجعين .. وكانت توها حاطة كحل وآي شادووو .. وقلووووس فووووشي فاقع ... ولابسة الجينز اللي كانت لابسته مع تيشيرت ابيض عليه صورة بنت وخرابيش ..... سعود رافع حواجبه : اوووخص ... دلع طلعت الاكل اللي ف الكيس وقعدت جنبه وطالتعه مستغربة لانه يطالعها : بسم الله شفيك ...؟؟؟ سعود وهو يتاملها : وش هالكشخة ...؟؟ دلع ابتسمت : هههه اليوم لينا يوم شافتني بدون مكياج بغت تجن.... عطتني محاضرة طويلة عريضة عن الكشخة .....سعود ابتسم : دلع ... ممكن سوي شي بس .. ما تزعلين .. دلع طالعته مستغربة .... وسعود قرب وباسها على خدها بوسة سريعة ..... استحت دلع ... مهما كان .. تبقى بنت و اي حركة تخليها تموووت من الحيا ... سعود : ا..ا..آسف ... دلع هزت رايها بالنفي : لالا لا ... سعود عادي .. انت زوجي وانا زوجتك ... ما يحتاج تستاذن عشان تسوي أي شي .... فاهم ..؟؟وعشان تكسر الربكة اللي بينهم قربت منه : وهذي بووووسه ... وباسته على خده بسرعة ..... سعود منبهر منها .. اول مرة تتعامل معاه بهالطريقة ... كانه واحد ماعمره سوى لها شي او قصر معاها بشي ... سعود اخذ الفرينش فرايس ياكله : طيب ما قلتيلي وش منابة هالكشخة ... دلع اخذت اكلها وقامت تاكل : مممم .. ولا شي ... بس كذا ...سعود : لا صدق .. لكل شي سبب ... دلع : مدري... عشان التغيير اللي بيصير ف حياتنا .... سكت سعود شوي : ....................... مرة متحمسة للتغيير ... دلع ابتسمت بوناسة : انا كنت انتظر هاللحظة بكل صبر الدنيا ... كنت بس ابغاك تعترف انك على غلط ... وتبغى التصحيح ... هذا كل اللي كنت انتظره .. عشان اعطيك كل الثقة واساندك .... واسوي شي يعدل حياتنا .... ( تذكرت ) يووووه ... تعال هنا انت ما غسلت يدك ......!!!!!!!!!!سعود : ههههه وليش اغسلها انشالله ..؟؟دلع اخذت منه الاكل : ما يصير .. يدك كلها غبار ووصخ ... وسيارتك ما شالله مو من نظافتها يعني.....!!سعود : جيبي اكلي.... دلع بعناد : مافي قووووم غسل يدك ... سعود تسند براحة : طيب ما قلتيلي .... تحبيني..؟؟؟!!دلع : اذا قمت غسلت يدك بحبك ... اذا ما قمت ما راح احبك .... !!!

29 - 3 - 2014, 05:37 PM

(( بيت ابو راكان )) ( الساعة 10 الصباح ) دافنة نفسها من اول امس ف غرفتها .. لا تطلع ولا تدخل ... ما ذاقت النوووم ... ودموعها ما وقفت .... ندمانة على اللي سوته .. ما توقعت انها بهالشي بتخسر كل شي .. مو بس بتنتقم ... الا بتخسر القلب اللي بدت تتعلق فيه ... مها وعيونها متفخة والتعب هاااد حيلها : ثاااااااااااامر ... ثااااامر .. ثااامر ابيييييييييك ... اهئ اهئ ..... صاحت للمرة المليون ... مها : ليتني ما سويت كذا ... ليتني كبرت عقلي شوي .... وش استفدت ..؟؟ خسرته... خسرته للابد ... ماعدت اقدر اكلمه ... وماعاد يبغى يكلمني ... ولا يشوفني .. خلاااص كل شي انتهى .... آآآآآآآخ ياربيييييي انا وش سويت .... ؟؟؟؟؟ اندق عليها الباب للمرة المليووون ... بس هي على طول انسدحت وتغطت ف السرير ولا ردت ..... بس هالمرة دخلت امها الغرفة مستغربة : مها...؟؟ للحين نايمة ..؟؟ جات وهزتها بالخفيف : حبيبتي قووومي ... قووومي مها ماما ...قامت مها بزهق وبدون نفس قالت : شفيكم ..؟؟ام راكان : يا مها وينك ..؟؟ ما شفناك امس .. فيك شي حبيبتي..؟؟مها : ولا شي ... ابغى انام ...ام راكان : طيب بس ...مو الحين قومي تروشي وغيري ملابسك بنروح بيت خالتك نورة .. عندهم عزا هناك اليوم ..مها قامت بسرعة خايفة : عزا مين ..؟؟ عسى ما شر ....ام راكان بحزن : عزا ام محمد .. يعني ام زوجها .... مها ارتاحت بس ما بينت هالشي : طيب طيب ... شوي وانزل ... ام راكان وهي طالعة : لا تتاخرين ....اول ما سكرت الباب ام راكان .. انسدحت مها من جديد على السرير : الحمدلله ما صارله شي ... بسم الله عليه انشالله .... بس ... مالي وجه اروح هناك من جديد ... بس ... هو اصلا ما يدري اني انا.... ما يعرف شكلي ولاشي ... شلون بيعرفني..؟؟ اصلا ما بيعرفني لو ايش... هو متوقع اني انا خلوود ... مو مها .... اففففف .. ليته يدري بس ليته ....

المواضيع المتشابهه لموضوع: روايه ودك تنامين نامي لموضوع: روايه ودك تنامين نامي
الموضوع	كاتب الموضوع	المنتدى	مشاركات	آخر مشاركة
يمد لي يده وامد له روحي	حنين الأشواق	همس عالم حواء	5	8 - 11 - 2023 03:30 PM
نامي بصدري	نجمة الليل	همس الشعر والقوافي	6	25 - 3 - 2023 05:41 AM
والي خلق دم بعالي السموات	النورسيه	همس الشعر والقوافي	4	28 - 11 - 2020 04:08 PM
والد المعاصي	شيخة الزين	نفحات اسلاميه	6	10 - 5 - 2019 09:10 PM
روايه روحي لك وحدك للكاتبه ريم الحجر روايه رائعه لا تفوتكم	جروح الم	همس للقصص وحكايات وروايات	81	8 - 6 - 2018 01:02 PM

الذين يشاهدون محتوى الموضوع الآن : 14 ( الأعضاء 0 والزوار 14)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع