رواية يا خاطفي وين القى عزتي في زمن المذله

9 - 5 - 2014, 09:26 AM

بجزء ثاني من المزرعه كانت بعالم مافيه الا هي
ابوها : شوووقه ...شوووقـــــــــــــــــــه تعالي شوفي وش جبت لك
شوق جات تجري : شــــــــــــجــــــــــــــــره
ابوها : ايه ويش رايك نروح بكره نزرعها بالمزرعه
شوق شوي وتبكي: بس هذي صغيره يبه مرره صغيره انا ابي مثل شجره جيراننا
ابوها : راح نسقيها بعدين تكبر وتصير زي ماتبين
شوق بزعل : طيب طيب .. نزرعها بس يبي لها سنه عشان تصير كبيره
ابوها : اكيد ..يالله شليها بالحوش وحطي لها مويه وبكره اخذك انتي والبنات ونروح نزرعها
اختلطت عليها ذكرياتها ولكن ما انمحى اي شي من ذكرياتها ابدا كل شي كانه مدون في كاتب ودايم تسترجع ذكرياتها فيه .. طالعة شجرتها الشامخه اللي كانت الذكرى الوحيده اللي تركها لها ابوها ...تعشق المزرعه بكل شبر فيها لانها اغلى مايملك ابوها الله يرحمه .. قربت اكثر
وبانت التواريخ المنحوته على الجذع وبعض الاسماء ... لفت يدها على الشجره وخانها دمعتها .. دمعه ذرفتها وتلتها سيول من الدموع بكت بصمت ..وبألم كل شي تحاول تخفيه وما تبينه ..لكن هيهات وهيهات .. صحت من دوامة بكاها على صوت صهيل الخيل ..وصوت ضحك خواتها وبنات عمها .

:::
:::
:::

هنادي : تحرك يالله تحرك ...اووف عنيد هالخيل
سمر: والله لو تشوفك شوق غير تدفنك هنا انزلي بسررعه
هنادي : ليش ما يتحرك الا معاها ويسمع كلامها حتى انا ابيه يسمع كلامي
سحر: ياخبله هذا مربية شووق من اول ما انولد اتركيه وروحي للغلا

9 - 5 - 2014, 10:19 AM

(( الغلا اسم فرس ابو مها ))
هنادي : عاد انا مابي الا الجموح ...يعجبني يهبل بالله بالله طالعيه شوفي كيف شكله مزيون
سمر: الله لا يبلنا ويش رايك نوديه مسابقه مزايين الخيول
هنادي اعجبتها الفكره : والله فكره ونكسب من وراه فلووس
سحر: يالخبله تتريق عليك سمر وانتي من عقلك صدقتيها
جات ريم تركض ...: يابنات وصلت شووق هنادي انزلي بسررعه
هنادي نزلت وكانت بتطيح ومسكت المشط مسويه تنظف الخيل
شوق دخلت وصفرت واتجه بسررعه لها الخيل وصار يتمسح فيها
هنادي: يا بختك ودي يسوي لي مثل ما يسوي لك
شوق تركب عليه وتضحك: حلم ابليس بالجنه ..ولا عاد اشوفك تتلقفين عليه
هنادي: من زينه ياربي لك الحمد ... القرد بعين امه غزال
الكل: هههههههههههههههههههههه
شوق : اجل ليش مقهوره .. ؟؟
هنادي تصد عنها وتمشي: ومن قال مقهوره .. امشوا نروح لابوي يورينا صقر خويه اللي جابه هنا
ريم: وع على بالي كبير طلع نتفه صغير ..
شوق راحت تتمشى بالخيل ..وطنشت البنات وهم طفشانين يستنون وصول بنات عماتهم عشان يبدون بالفله والوناسه واللعب
سمر وبصوت يخوف : بـــــــنــــــــــات بقولكم شي بس اول شي اوعدوني يكون سر بيننا
سحر وريم وهنادي تحمسوا: قولي وسرك ببير
سمر: طيب بس خلونا نجلس على الارض واقول لكم .... طبعا جلسوا بسرعه وسووا دائره
سمر: شفتوا المزرعه اللي جنبنا ؟؟
الكل: ايــــــــــــه ..علامها ؟؟!!
سمر: اخر مره جينا هنا ... (قالت بخوف منهم ).. رحت دخلتها ..............< تنتظر ردة فعلهم
الكل: طيب وبعدين .
سمر: يؤؤؤ يابنات تجنن احس اني خارج المملكه مو هنا بالصحراء القاحله تهبل وكبيررررره قد مزرعتنا مليون مررره
سحر: تتكلمين جد والا تمزحين
سمر : قسم بالله ..بس اسمعوا خطتي
الكل : ويش هي ؟؟
سمر: ويش رايكم اذا جات هديل وحنين وخلود ...نروح لها ابيكم تشوفونها بس تظل سر بيننا
البنات متحمسين : اوكي صار
ريم : خلونا نرجع يمكن وصلوا ..
سحر: ايه نروح نشرب مويه لاني عطشانه ..واكل لاني جوعانه
هنادي: عمري ما شفتك شبعانه ..مشينا هيا ...

ورجعوا للبيت اللي بمزرعتهم

9 - 5 - 2014, 10:20 AM

(( طبعا مزرعتهم كبيره وكلها نخل لان المدينه معروفه بنخلها وفيها بيت عباره عن اربع غرف وصاله وحمامين <وانتم بكرامه < وقسم الرجال غرفتين وحمام وخارج البيت ..في بيت شعر عشان ايام البرد يجلسون الرجال فيه ..وبالمزرعه اسطبل خيل ومكان فيه طيور ..يعني مزرعتهم بسيطه على قد حالهم وهي بالاساس مزرعه ابو شوق وعمها بعد وفاة ابوها اهتم فيها اكثر وكسب من تمر نخلها )

:::
:::
:::

عبدالله: يوسف ويش فيك وجهك اصفر
يوسف : مدري شكل نوبه الربو بترجع لي احس صدري مكتوم .
عبدالله : اخذت دواك
يوسف : لا ما اخذته .. اصلا هو مخلص لازم اشتريه
عبدالله : هاته اروح اشتري لك والا تبي نرجع البيت ترتاح وبعدين نروح نشتريه
يوسف نرجع للبيت احسن مابي اكلف عليك
عبدالله: اي كلافه حنا اخوان مو اصحاب ...مابي اسمع منك هالكلام مره ثانيه وخلنا نروح للبيت احسن .
يوسف : اي والله خلنا نروح بدل الجلسه بالكوفي والكتمه
عبدالله: طيب يالله نروح للبيت ... اخذ خويه وراحوا للشقتهم حقت العزابيه اللي فيها 6 اشخاص

<< عبدالله 24 سنه يدرس بالجامعه الاسلاميه ويحضر هذي السنه ماجستير باللغه العربيه
واهله ساكنين باحدى قرى المدينه وهو يشتغل ويدرس حتى يصرف على اهله ويامن علاج ابوه المقعد وامه اللي فيها مرض السكر ..ويامن لاخوانه واخواته الصغار حياه كريمه تغنيهم عن الجمعيات الخيريه
يوسف 24 سنه صديق عبدالله وتؤام روحه معاه من كان صغير ودايم يساعده حاله ميسور وساكن مع عبدالله لان اهله بالرياض وابو متقاعد بعد ماكان بالسلك العسكري
وراح نتعرف عليهم اكثر بالاحداث
:::
:::
:::

9 - 5 - 2014, 10:21 AM

بالمزرعه ..وصلوا عمات البنات وبناتهم واولادهم
ريم : كيف حالك هدوله ياقاطعه من زمان عنك
هديل: تعرفين ثالث وربي ما افضى من الاختبارات
سحر: عاد انتي بمدرسه خاصه يعني مدلعينكم
هديل : امي هي اللي حاجره علي ويش اسوي
سمر: وانتي خلود ويش اخر اخبارك
خلود: تمااااااااام .. ما ناقصني غير اسير عليكم خخخخ
هنادي : حياك الله البيت بيتك
مها: عمه جميله ليش ماتجون وتنامون عندنا
عمتها : يؤؤؤه والبزارين راح يصجونكم
ريم: طيب خلي خلود تجينا ويش ذا ما نشوفكم ابد
عمتها: خلاص اجل كل اربعاء ابخليها تجيكم
هنادي : وانتي بعد حنين ..وهديل تعالو ويش دعوه غير نعزمكم
حنين تاشر على امها : قولي لامي هي اللي ترفض

<< ام هديل 38 سنه
هديل اكبر اخوانها 18 سنه ثالث ثانوي علمي
حنين 17 سنه ثاني ثانوي علمي
رائد 10 سنوات رابع ابتدائي
راكان 8 سنوات ثاني ابتدائي
زياد 5 سنوات
<< ام خلود 35 سنه مدرسه عربي
سامر 21 سنه يدرس حاسب ولد مثقف ومتواضع مرره لكنه غامض
خلود 19 سنه ثالث ثانوي ادبي فلاويه وشخصيتها نفس شخصيه هنادي
محمد 14 سنه بالتموسط
عزام 6 سنوات بالتمهيدي

9 - 5 - 2014, 10:22 AM

هنادي: اقول بنات خلونا نطلع نتمشى برا ونلعب ..وغمزة للبنات
وطبعا سحر وريم وسمر فهموها وطلعوا ..وهديل وحنين وخلود ما مشت عليهم يعرفون بنات
خوالهم زين وعرفوا انه في شي ..بعد ما طلعوا
حنين: ويش عندكم ...تحسبون مشت علي نتمشى ونلعب
خلود: مانتم خالين فيكم شي ..
ريم: اسكتوا والحقوني ..ونتكلم بعيد احس المكان في رادار .. مشو شوي وبدت سمر تتكلم
سمر: شوفوا انا بوديكم لمزرعه جنبنا بس لا تقولون لاحد وخلوها سر بيننا
هديل : وليه طيب نروح لها؟
سمر: ابيكم تشوفون المسبح والعز .. مو مزرعتنا على قول شهد نخلتين وفرحانين فيها
حنين : حلوووه سمووره ؟؟
سمر: انتي شوفي واحكمي ...طبعا تحمسوا البنات لانهم مايقلون لقافه عن بنات خالهم
<<< شكل اللقافه وراثه بالعايله ..خخخ
مشوا شوي وفتحت لهم سمر مكان دخلوا منه على للمزرعه
البنات : وآآآآآآآآآآآآآآآآآآآآآآآآآآآآآو ..
شافوا اطراف المزرعه كلها زرع وورد احمر واصفر وابيض ومنسق بطريقه تجنن وفي احواض دائريه فيها اشجار .. وفي زي الشلال منظره ابداع ..
سحر: يا ويل حالي بس .. جنان
سمر: توكم ما شفتوا شي تعالوا تعالوا ..ومشوا وراها وودتهم لمكان فيه جسر خشبي مرووا من فوقه واتجهوا لنص المزرعه .والفله بالوسط شامخه
ريم وهديل: البيت يخبل
هديل: انا بتزوج صاحب هالمزرعه شكله مليونير
حنين : سمر باقي شي ما ورتينا هو
سمر : يوووه باقي المسبح والملحق الارضي وقسم شكل عندهم احد رسام
حنين تدفها : يالله ورينا بسرررعه ..وراحوا لقسم المسبح شكل بيضاوي والوانه هاديه سماوي وابيض
هنادي : ودي ارمي نفسي فيه ... دفتها سحر
هنادي : هيه لاتصدقين بس منظره يغري مرره ...
كانت هديل سرحانه دخلت جوا .. والجو هادي جدا ..جات ريم من وراها ورمتها بالمسبح
غطست بالمويه وعلى طول وقفت وهي تمسح وجهها
هديل : هين يا ريموووه انا اوريك .

9 - 5 - 2014, 10:24 AM

طلعت من المسبح وهي تعصر عبايتها وتمسح وجهها من المويه .. حاولت تجي ريم غدر لكن ريم هربت بسررعه .... ركضت وراها
ريم تضحك: ماراح تمسكيني
هديل تصرخ عليها : والله لا اوريك واغطسك زي ما غطستيني .. نزلت عبايتها ريم ورمتها على الكراسي اللي مقابله للمسبح وبقت ببنطلونها الجنيز والبدي الابيض الحفر ..والبنات يضحكون على شكلها لانها متحمسه مرره
هديل : تحسبين راح تمر هالمره سالمه ...والله لا اخليك تترجيني .. وصارت تركض وراها ولفوا من ورى البيت ..اخذت هنادي عباية ريم وراحوا البنات وراهم ..
سمر: غبيات كنت بوديكم لمكان ثاني احلى
حنين : خلونا نروح نقول لهم يرجعون ..ولحقوهم ..
ريم تطلع لسانها لهديل : ياحرام ماتوقعت ماعندك لياقه بالركض ..
هديل : الوزن له دور ب الحمدلله مافقدت لياقتي للحين
ريم : شوفي انا وين وانتي وين ... كانت هديل واقفه تستريح .. وفجأه ركضت .. وريم ركضت بسرررعه ماتدرين وين تروح .. وراحت باتجاه البيت اللي تشوفه اللي هو الملحق

:::
:::
:::

وصل للمطار ... وبعد مانزل من طيارته الخاصه ..
فهد: السلام عليكم
الكل: وعليكم السلام
سالم: حياك الله يا استاذ فهد
فهد: الله يحيك .. وين الولد
سالم : في البيت ينتظر وصولك ..
فهد : طيب قول للسواق يتجه للقصر ..
سالم: ابشر .. روح لقصرالعم ابو رياض
فهد (( ياترى ويش يبي ابوي فيني معقوله عرف عني شي ...لالا ما اتوقع بسس ابوي له معارف كثير.. يالله ياخبر اليوم بلفوس بكره ببلاش .. الله يكون بعوني على الغثاء اللي راح اشوفه هنا .. ))

9 - 5 - 2014, 10:25 AM

بعد ربع ساعه وصل لقصر ابوه بارقى احياء الرياض
الـــــفـــيــصـــلـــيـــه ..

ابو رياض: هلا وغلا بولدي فهد .. تو مانورت الرياض
فهد يبوس راس ابوه ويده : بوجودك يبه .. كيف حالك عساك بخير
ابوه: الحمدلله يا ولدي بخير ولله الحمد بشرني ويش مسوي بجده
فهد : زين احوالي ماشيه ومانقصي شي
رياض : اقول فهد ليش ماتجي تعيش معنا بالرياض .. توقع فهد هالكلام منهم
فهد: لالا انا الحين كبير ومعتمد على نفسي وطول حياتي عشتها بجده ..مقدر اجي واعيش هنا فجاءه
رياض: على راحتك بس حنا ماودنا تكون بعيد عنا
ابو رياض : كلام اخوك هو عين الصواب وانا ابوك عيش عندنا يمكن تحتاجنا بشي
فهد: ودي يا يبه بس مابي خلني على راحتي
جات اخته نائله ومعاها بنتها
نائله بعد ماسلمت عليه : شخبارك يافهد من زمان عنك
فهد: بخير دامك بخير .. كيف العيال وابوهم
نائله : بخير الحمدلله
فهد: مشاء الله كبرتي يا ليان
ليان حمر وجهها من خالها لانها ماهي متعوده عليه : ايه متى اخر مره شفتني فيها
فهد: هههههههه مذكر حقك علي .. وين ندوش
ليان : الحين تنزل .. ما يمديها سكتت الا جات ندى
ندى : هلا وغلا باخوي فهد .. بعد ما سلمت عليه وباستها
ندى : مالت على ذا الوجه ماتقول عندي اخوان وخوات اجي ازورهم
فهد: ويش اسوي الدنيا مشاغل
ندى : اخص يالمهم .. بتفهمني انك مانت فاضي يا عم
فهد: ماتتركين حركاتك ..
ندى : ياخي بتوحشنا شو بنعمل
ليان: اقول خالي منت ناوي تتزوج .. والا مطول عزابي
فهد: لسى بدري ابي اكون نفسي
ابوه: ويش بدري الله يصلحك ياولدي انت خلاص دخلت الــــ30
ليان وندى مصدومات ..وتغيرت ملامحهن
ندى : يبه افا عليك بس ..ويش حلاة اخوي علامك كبرته بيصك الــ30 اسم الله عليه يهبل
ليان: شكلك مخبط جدي اتوقع عمرك ياخالي 25 سنه كحد اقصى
فهد ابتسم : سمعت يبه لسى بدري علي عمري 25 وجلس يضحك

9 - 5 - 2014, 10:27 AM

..الـــبــــــــــآرت الـــــثـــــآنـــــــي ...

؛؛
؛

مدري لـ شنهو ( موعدي ) ( وانتظاري )
مادامت أيامي قليلة \\ محاصيل
في داخلي نزعة خفـوق انتحاري
حلم ٍ تكسر في ثنايا // التفاصيل
واثر × إنكسآر× الحلم يعني ×إنكسآري×
بغيت آكمل وإنكسر فيني / آلحيل !!

بالمزرعه ...
هديل : هين انا اوريك بس لاتشردين
ريم: اذا لحقتيني ومسكتيني سوي الي تبين .. وركضت ..وهديل لازالت وراها تحاول تمسكها

حنين ترفع صوتها عشان يسمعونها : خلونا نرجع اكيد يدورون علينا
هنادي : ارجعو بعدين تكملون
هديل : وراك وراك والزمن طويل
سمر: ما تعرفونهم عنيدات .. مافي فايده ابد ابد ابد <<فاقده الامل
سحر: كأن الجو صار غيوم ...رفعوا عيونهم للسماء وشافوا الغيوم
خلود: ياسلام شكل بينزل مطر
هنادي : يارب ياكريم ينزل مطر
البنات يارب
حنين : شكلهم مطولين امشوا نروح وهم يخافون ويرجعون
سمر: ايه يالله بيلحقوننا ..
.لفوا بيمشون عشان يلحقونهم ..لكن سمعو شهقت هديل ولفوا يشوفون ويش فيها

:::
:::
:::

9 - 5 - 2014, 10:28 AM

بـــــشـــــقـــة الــــعزآبـــيــــه

بعد ما ارتاح يوسف واجتمعوا الشباب وسولفوا ...الكل راح يخلص اشغاله بعد المغرب ما بقى الا هو وخويه اللي مثل ظله عبدالله
يوسف: عبوود ويش بك سرحان فيك شي انا متاكد
عبدالله: الحمدلله مافيني شي
يوسف : انت من جيت امس بالليل وانت فيك شي امس سكت عنك قلت يمكن متضايق ماتبي تتكلم لكن الحين ماراح اتركك لين تقول لي ويش فيك
عبدالله: بقول بس لاتضحك علي ... اوكي
يوسف : افا انا اضحك عليك ... قوول
عبدالله : امس شفت لك بنت عيونها حرمتني النوم
يوسف اعتدل بجلسته : طيب ليش مارقمتها ياخي وريحت راسك
عبدالله : مدري ويش صار لي يوم شفت عيونها تلخبطت احس الدنيا مافيها الا انا وهي قدامي .. وماقدرت اقول كلمه وحده
يوسف : يووووه حالتك متاخره مرره ..
عبدالله: والله يايوسف ماراحت عن بالي ..انا اللي عمري مافكرت بالبنات والحمدلله من المسجد للبيت ومن البيت للجامعه والشغل واتحاشى البنات ..بس هذي غير غير عنهم دخلت قلبي من مره ...
يوسف: هذا ياطويل العمر يسمونه الدكاتره النفسيين ..حب من اول نظره ياعزيزي
عبدالله: اقول يوسفوه ويش السوات الحين ابي اوصل لها
يوسف يفكر : طيب اعطني فرصه افكر واعطيك حل يعجبك ..بس اصبر علي
عبدالله: خذ وقتك بس تكفى مابيها تضيع مني
يوسف : طيب افرض لو تكون مخطوبه ..او متزوجه
عبدالله تحطم : مخطوبه !! .. ومتزوجه !! .. انت ما تعرف غير تحطم على ويش يحبونك البنات هاه من جد ماعندك سالفه
يوسف: هههههههه خلاص ياخي حقك علي بس انا اعطيك احتمالات عشان ما تنصدم بالواقع المرير ..
عبدالله يوقف : تاخرت على شغلي لاجيت بالليل نكمل الكلام
يوسف : متى مابغيت تتكلم انا جالس على قلبك
عبدالله : يالله تامر بشي اجيبه لك
يوسف يرفع يده : روح الله يوفقك ياوليدي ياعساني ما ابكيك
عبدالله مات ضحك على خويه وهو يقلد الامهات : من جد مهستر ..سلام
يوسف : مع السلامه ياوليدي انتبه لنفسك ولا تسرع
عبدالله: على خشمي ..وطلع لشغله

:::
:::
:::

9 - 5 - 2014, 10:47 AM

بالــــريــاض في هذا الوقت كان صلاة المغرب

ابو رياض : رياض ياولدي
رياض : سم يبه ...امرني
ابو رياض : سم الله عدوك .. اذن المغرب واخوانك نايمين روح صحهم ابيهم يصلون معي
رياض : ابشر يبه ماطلبت شي ... راح يصحي اخوانه
جات ام رياض
امه: اقول يابو رياض
ابوه : هــــــــــلا
ام رياض : متى تبي العشاء يكون جاهز
ابو رياض : اسئلي ولدي فهد
فهد : والله مالي كلام بعد كلامك يبه
ام رياض : اجل على 10 يكون العشاء جاهز
ابو رياض : ايه الوقت زين بس دقي على البنات والعيال ابي الكل على العشاء
ام رياض : قلت لهم وان شاء الله الساعه 8 الكل مجتمعين حولك
فهد : الله يخليك لنا يارب ولا ننحرم منك
ابو رياض : ويخليكم لي بعد
ام رياض : امين يارب

المواضيع المتشابهه لموضوع: رواية يا خاطفي وين القى عزتي في زمن المذله لموضوع: رواية يا خاطفي وين القى عزتي في زمن المذله
الموضوع	كاتب الموضوع	المنتدى	مشاركات	آخر مشاركة
اذا القي	احمد البيشي	همس الشعر والقوافي	2	7 - 7 - 2021 02:42 PM
رواية وانتبه لك ترى روحي معك رواية سعوديه للكاتبه	الحب ياسمين	همس للقصص وحكايات وروايات	9	4 - 4 - 2019 10:13 AM
رواية فهد و نوره رواية رومنسية سعودية كاملة	سجات التهاويل	همس للقصص وحكايات وروايات	23	8 - 6 - 2018 01:07 PM
شرطة رنية تلقي القبض على خاطفي المراهق	عـازفة الليل	همس للاخبار العالمية و العربيه والمحليه	1	29 - 10 - 2013 03:58 AM
من لا يحطك تاج راسه وهو حي عساه لفراش المذله وساده	●∫قْلبهآإ مغ‘َـرِورْ !	همس مطبخ حواء	8	10 - 12 - 2010 11:33 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

رواية يا خاطفي وين القى عزتي في زمن المذله

همس للقصص وحكايات وروايات