رواية يا خاطفي وين القى عزتي في زمن المذله

15 - 5 - 2014, 11:50 AM

شـــــوق

الألم والهم والخوف الدفين...

والشقى والضيم وآهات العنا...

والأسى والظلم ((والدمع الحزين))

كلها × اسماء × والمعنى .. .. ~ ( اًنا ) ~ ...!!

كلها × اسماء × والمعنى .. .. ~ ( اًنا ) ~ ...!!

كلها × اسماء × والمعنى .. .. ~ ( اًنا ) ~ ..

أول ما خلصت من كتابة هذي السطور اللي حسيتها طلعت من قلبي سكرت دفتري .. وصورته ببالي .. ماتخيلته بيوم يكون زوج لي .. كلي كره وحقد له .. انتقامي منه ماخلص لسى وهذي اول خطوات الأنتقام .. وافقت لغايه بنفسي ووافقت عشان عمي

واهلي يرتاحون من همي شوي .. اتخيله بكل ركن في زوايا غرفتي .. خوفي مالك قلبي .. احلامي احترقت ومابقى منها الا الرماد .. وقصور امالي انهدمت وهو من كان سبب الانهيار .. الانهيار اللي شل روحي

وعانيت منه كثير ولا زلت أعاني .. كيف بتكون بدايتي معه ؟!.

آآآآه ياربي ليش تهورت ووافقت .. لو تريثت وفكرت اكثر واكثر .. لكن حقدي الدفين وكرهي الاليم ثار وخلاني اجازف في ما بقى من حياتي .. هذي انا طول عمر واقفه بمحطة الانتظار .. ولا ادري متى بيأذن لي واسافر بعيد .. بـــــــعــــــــيـــــــد !!

:::
:::
:::

بـــعـــــــد اسبوع

خلصت الامتحانات .. وطلعت النتايج وكل مبسوط وفرحان .. اللي حقق جزء من نجاحاته
واللي رضى بالمقسوم ..
بقى يوم على ملكة ريم وسيف .. وكلتا العائلتين يتجهزون بأحلى التجهيزات
سيف : الحمدلله الأسترآحه جاهزة من كل شي حتى الكوشه خليتهم يركبونها
ساميه بقهر : حتى الكوشه !.. اللي اعرفه ان الكوشه البنت تسويها
سيف : انتي مالك خص .. ليش اللقافه
ساميه انقهرت زياده منه : قلعتك .. متحمل حتى الخساير
امها : هذي بتصير زوجته .. ويش فيك عليه
ساميه توقف بعصبيه : بروح اشوف فستاني يحتاج بخار والا لا
سيف شافها الى ماوصت الدرج وطلعت لغرفتها : يمه ساميه ويش فيها علي .. ماسويت لها شي أنا
امه : ماعليك يمه .. مصيرها ترضى بالامر الواقع
سيف من قلبه : يارب يعدي كل شي على خير
امه : امين يايمه نبي نفرح فيك
في بيت ابو مها

سحر: طيب المسكه متى بنجيبها
شهد : بوح المغرب اجيبها أنا ورغد
شوق : طيب بالليل بنسوي بروفه ونشغل الشريط اللي زبطه بالاب توب .. ونشوف كيف
سمر : ويش رايكم حتى احنا نلبس ملابسنا عشان نسوي بروفه كامله
رغد جالسه تزبط سلة الورد لانها تحب التصميم وتتقنه .. رفعت راسها : اقول اعطوني غراء ابي الصق اللؤلؤ ..
سحر توقف : صبر بروح الغرفه اجيب لك الغراء عندي بالدرج
هنادي تذكرت اختها وبحزن : شوق ومهــــا ..
شوق ابتسمت لها .. مشت بأتجاهها وجلست بجنبها ولفت يدها على كتفها : لاتخافين امس كلمتني وبتجي هي وزوجها
البنات بفرحه : الحمدلله
رغد بفرح : فرحتيني ياشووقه
شوق : والله صدق هي قالت لي وتقول حتى اشترت فستان وردي بتلبسه .. وعلى حد قولها بتتفاجئين باللوك الجديد
هنادي بضحك : الله يستر لا تكون فاجعه ماهي مفاجئه
الكل : ههههههههههـــآآآآي
شهد تتخيل شكل مها : اتوقع سمرت او سمن بالعربي بتصير جيكره
كانت شوق متصله على مها وتسمعها الكلام وهم مايدرون ..
شوق تمسك جوالها وتكلم : ههههههههههههههه سمعتي المحشات الطازه
مها : سبيييييييكرررر بسرعه ... وحطت سبيكر
هنادي : مين ؟!
مها : فاجعه هاه .. والثانيه جيكره .. هين انتي وهي يا ريا وسكينه
شهد : خلاص لا تِحّترين بنشوف اللوك الجديد
مها : والله بندووورتي يوم شافني خق بقووه
ريم : بندوره والا خيار
الكل : هههههههههههههههههههه
هنادي : لا سلطة ومالحه كمان
سمر : وووع بندر كيف تدلعينه احس تجوعين يوم تقولين بندورتي ههههههه
مها انقهرت : بس فالحات بالتريقه على قلة سنع ووووع عليكم يالله باي
الكل : طــــــســــــي

؛؛؛
؛؛

واخــــيــــراً

15 - 5 - 2014, 11:51 AM

البارت السابع عشر

وين الصبــر؟؟
حتى الصبر
في ساعة ( الحاجه ) يخون!!

يوم المـــلـــكــه
شهد تغمض عينها : شوق حطي لي لون احمر واسود
شوق : اوكي بس لاتتحركين عشان مايتلخبط الشغل .. شوق هي اللي تعمل لهم المكياج لانها اخذت دوره تجميل ونجحت فيها
سمر ماسكه المشط وتكلم شوق : متى تسوين لي شعري
شوق وهي مركزة على شهد : افتحي شعرك من اللفات واتركيه اخلص من شهد وازبطه لك
سحر تدخل وتأخذ لفه : ويش رايكم فيني .. انا سويت شعري
شوق ابتسمت لها : لك مستقبل بالشعر .. بالله شوفي هنادي تلاقينها حايسه زبطيها حطيت لها آي شدو وبتروح تمسحه تقول على طبيعتي احلى
سحر : بروح اشوفها اخبره تسب ومعصبه
سمر : بروح معك اكيد بتحتاجين مساعده مع المفترسه

بعد ساعتين .. وصلت ريم وجهزوها وبعد صلاة العشاء اتجهوا مع عمهم وجلالي للاستراحه حقت ابو سيف اللي مخصصه للمناسبات والأعياد .. بعد ماوصلوا دخلوا الغرفه المخصصه لريم ..من الباب الخلفي
رغد تعبانه جلست على الكرسي : اوف تكسر ظهري بالمشغل وانا واقفه .. برتاح شوي

ريم متوتره : شوق شوق بالله اعطيني المانيكير ابي أمكر اظافيري

سحر برواقه : هدي روحك ياقلبي من الحين ترتجفين .. اقراء المعوذات وأيه الكرسي وانا بزبط اظافيرك حتى رجولك بحط لها
ريم تأخذ نفس طويل وتذكرت : اووف شهدوه بالله كلمي المصوره أكدي عليها
شهد وبحضنها مشاري تلعبه : لاتخافين كلمتها واحنا بالبيت وتقول .."تقلدها ".. حاضر حاضر دي العوسه ريم ان شاء الله من بدري حكون عندها
شوق طلعت صندوق خشبي لامع ونازل منه لولو ابيض وموف غامق وداخله ورد طبيعي وردي وابيض وموف ..وحطته على الطاوله الزجاجيه الفخمه .. ورتبت الطاوله وحطت المبخره الفضيه اللي اشترتها هديه لريم وجنبها طقم الصينيه وكاسة عصير متوسطه الحجم نفس المبخره ومصاص شفاف عليه فيونكه موف وحطت الصندوق جنبه
رغد : خليه ياشوق انا اكمل الطاوله لازم احط تحتها ورد وريش وخرابيط من تأليف سحر .. هيه انتي اتركي اللي بيدك وتعالي ساعديني
هنادي : ترى بخرب كل شي انا بطلع اشوف الامور واتطمن على كل شي واجي
سمر : خوذيني معاك

15 - 5 - 2014, 11:56 AM

هنادي تشيك على شعرها وشكلها : تكفون حلو شكلي والا باين اني بويه
ريم طالعتها بتفحص : اخص حاطه ميك آب .. حركآآت توي أنتبهت
هنادي متحطمه مره : شكلي جيكره
ريم : اقسم لك تهبلين اول مره احسك بنت تهبلين
سمر تسحب هنادي من يدها بقوه : يالله يالله نطلع نشوف أهل سيف أفندي
سحر بتهديد : بدون مشاكل سامعات .. اعرفكم تعشقون المشاكل
هنادي تقرص سمر وبصوت واحد : أبد بنمشي جنب الحيط .. وطلعوا برى وخلوهم يكملون
اشغالهم وتجهيزاتهم ..
مشوا بالممر وكان فاضي مره .. لكن عاجبهم تصميم الاستراحه فخامه وستايل كلاسيكي يجنن
مشوا بالممر تبع غرفة ريم وشافوا مرايه وأطرافها زخرفه بالذهبي وجنبها جره ذهبيه كأنها نافوره بسيطه .. وطاوله زجاجيه عليها باقة ورد طبيعي .. كملوا طريقهم وطلعوا على صالة الاستقبال .. وكانت كبيره شوي وفيها كراسي على جنب .. ودرج جانبي وعليه ستاره وباب بالوسط قبله ثلاث درجات وهي الصاله الاساسيه
سمر بلقافه : خلينا نروح نشوف
هنادي تحمست : يالله .. وهم ماشين سمعوا صوت وراهم
...: مين أنــتـــم ؟!.
سمر وهنادي لفوا بسرعه .. وهم يشوفون بنت لابسه تنوره قصيره لنص الفخذ رمادي فيها كاروهات احمر وأبيض وحزام احمر وبدي حبل احمر وفيه خطوط خفيفه بالرمادي وسلسال طويل وجنب رقبتها ورده رمادي .. وشعرها قصير ناعم وشكله عشوائي بس لايق عليها وكانت في قمة الأناقه والنعومه
هنادي : احنا اخوات ريم
ساميه : أهـــا اخواتها .. ياهلا والله
سمر : هلا فيك .. بس انتي مين
ساميه بغرور : انا ساميه اخت سيف وأصغر العنقود
هنادي تدق سمر على جنبها وابتسمت بمجامله : ياهلا وغلا تشرفنا .. انا هنادي وهذي سمر
ساميه تقزهم من فوق لتحت وهي تشوف ملابسهم ( وي هذول اخواتها .. مبين عليهم بنات فقر حتى لبسهم مايعرفون ينسقون الالوان .. قرويات )
ساميه بنظرات استحقار : عن أذنكم .. ولفت
هنادي تمد لسانه وانقهرت منها : تفضلي .. وسحبت سمر واخذتها للمرايا
هنادي تشوف شكلها بالمرايا وتلف على الجنبين : بالله فينا شي غلط .. والا ماعجبنا الست ساميه
سمر : ماعليك فيها غيرانه هذي شفتي عيونها كيف شوي تأكلنا

هنادي كانت لابسه فستان ليموني قصير ناعم مره فيه تكسير بسيط وتحت الصدر شريطه ساتان ليموني .. وكانت مستشوره شعرها القصير ومسويه له نفخه بسيطه من فوق ومنزله خصله وحده على وجهها وحاطه شباصه على شكل فراشه ناعمه على جنب فوق اذنها
أمـــا سمر كانت لابسه بنطول برمودا جينز سماوي وفيه على الفخذ تطريز باللولو وبدي بدون حبال فيه فتحه بالظهر على شكل دمعه وكلها تطريز باللولو الابيض ..
هنادي : ماعندها سالفه امشي نكمل الجوله التفقديه
سمر : غريبه تاخروا عماتي
هنادي : على وصول .. تدرين هذي ساميه مادخلت قلبي نهائيا ولا أهل سيف كلهم ماني مرتاحه لهم .. الله ي�

15 - 5 - 2014, 11:58 AM

هنادي : على وصول .. تدرين هذي ساميه مادخلت قلبي نهائيا ولا أهل سيف كلهم ماني مرتاحه لهم .. الله يعين ريوومه شكلها بتعاني خصوصا من الحيه الرماديه << تقصد ساميه
سمر : ماعلينا منهم امشي نرجع
:::
:::

بالرياض
ابو رياض وقف وعلامة الصدمه على وجهه وبدت ملامحه تميل للعصبيه : ويش تقول انت .. انهبلت ؟!
فهد ببرود قاتل : يبه ماقلت شي يستاهل الهبال
رياض بعصبيه فظيعه : انت مستوعب اللي تقوله .. تخطب لحالك ماعليه لكن البنت ... وسكت
فهد اعطاه نظره حاده سكتت رياض وقف بثقه : أنــا ماجيت أشاوركم .. أنا جاي ابلغكم الخبر عشان تجون ديكور عند اهل البنت .. مهما كان افهم بالعادات والتقاليد ومابي اخالفها
ابوه جن جنونه وصرخ بأعلى صوته اللي هز اركان قصره الكبير : فــــــهـــــــــد ... اطلع برى .. جت ندى وامها على صوت صراخ ابو رياض
فهد مشى خطوتين .. بعدها لف على ابوه : أنا جيت وقلت اللي عندي .. تبون تجيون حياكم الله .. ماتبون تجون زواجي بيتم فيكم وبلاكم
ابو رياض جلس على الكنبه بتعب فهد يطلعه من طوره : حسبي الله عليك من ولد .. جننتني بسواياك ... وصلت فيكم تخطب وانا اخر من يعلم وجاي تعزمني على الملكه بعد وياليتها بنت وبعد مخطوفه ويش بنقول للناس .. طيحت راسي
فهد : كلام الناس ماعلي منه عمرك ماكان لك تواجد بحياتي .. لو جدي الله يرحمه حي كان ماشفتني هنا قدامك واقولك تجي تحضر ملكتي .. انا عايش بوجودك وبدونه
رياض نفسه يقتل اخوه كيف يفكر ويخطط.. وكيف ينفذ ولا يهتم بابوه اللي كل اعمامه واهله يخافون منه الا فهد اللي مايهتم فيه ولا يستشيره بشي ... رياض تزوج بنت عمه لانه يحبها ولان ابوه اختارها له .. وزوج خواته عيال عمهم غصب عنهم .. لكن فهد ماله سلطه عليه ابداً
وبالعكس فهد يجبر ابوه على اشياء مستحيله لكن اذا كان فهد هو مصدرها فهي تتنفذ بالغصب قبل الطيب ..
ابوه يأشر على الباب : اطلع برآآ .. اطــلــع
فهد : طالع .. واللي عندي قلته .. أتجه للباب وطلع وسكره وراه
ام رياض : ويش السالفه يابو رياض
ابو رياض : آآه من هالولد بيموتني ناقص عمر .. هذا مو ولد هذا ابليس
ندى : يبه بيتزوج صدق ؟
ابو رياض وقف وبسكوت راح لمكتبه بدون اي كلمه ينطق فيها

:::

15 - 5 - 2014, 12:01 PM

بعد ماوصول المعازيم وامتلت صالة الاستقبال .. وبدأت حفلة الخطوبه واشتغل الدي جي
شهد : ريم انتبهي لميشو ترى نايم
ريم : اوكي بأنتبه له
شوق : انا بجلس شوي عند ريم .. انتي ورغد روحوا استقبلو مع مها وعماتي
رغد : ايه تأخرنا بالطالعه يالله شهد نروح
شهد : يالله .. لفت على ريم بتعيد وصيتها
شوق تقاطعها : قلت لك انا باجلس راح انتبه له روحي خلاص
شهد بنظرة شك : ويش تبين تقولين لها
شوق : سر بيني وبينها ممكن
رغد تسحب شهد وتبتسم : اوكي خذوا راحتكم . وطلعوا لبرى
شوق تلف على ريم وجلست جنبها على الكرسي ضمت يد ريم بين يديها : ريومه بقولك شي
ريم : ويش ؟!
شوق : بعد التصوير انا راح اطلع لاني بكون معك .. وبتجلسين مع سيف لحالكم .. لاتخلينه يقرب منك .. حتى بوسات حاولي ماتعطيه مجال اكيد فاهمتني انتي ؟!
ريم حمرت خدودها : أيه فاهمتك بس انا خايفه ياشوق بموت من الرعب
شوق : لا تخافين صح هو زوجك بس الحرص واجب ياقلبي
ريم : لا تتركوني وصحابتي اذا جوا دخليهم اوكي
شوق ابتسمت ووقفت بتروح : ان شاء الله .. انتبهي لميشوو لاتقتلنا شهد
ريم : خلي سيرنا تجي عندي عشان لو احتاج شي
شوق : بقول لعمتي تخليها تجي عندك . واي شي تبينه كلميني على جوالي
ريم ابتسمت وبداخلها ميته خوف من التجربه الجديده عليها ما مرت فيها قبل بس تحاول تتمالك نفسها وتتحكم بأعصابها : اوكي
شهد ورغد شهقوا : كوثر !!
كوثر بمثل صدمتهم : ايش جايبكم هنا
رغد : انتي ويش جايبك هنا
كوثر بقهر : هذي خطوبة ولد عمي سيف
شهد تغيرت ملامحها : اللي كنتي تحبينه ؟!
كوثر بتحطم : ايه اللي كنت .. رفعت راسها .. وانتم ويش جايبكم
رغد رفعت حاجبها : والله سيف خاطب ريم اختي ..
كوثر انصدمت وانشلت عن الكلام ما نطقت بحرف ومعالم الصدمه باينه عليها
رغد بقوه : مافي مبروك على الاقل
كوثر بدون نفس : مبروك الله يوفقهم
شهد تبي تقهرها : امين يارب .. ويكفيهم شر العواذل
كوثر : استاذن بشوف بنت عمي .. وراحت
رغد : هههههه عجبتيني يابنت
شهد : ولو انها تحزن وكانت تحبه بس كل شي قسمه ونصيب ... امشي ندخل
هديل تقلب عيونها في شلة بنات على الطاوله اللي قبالها : بالله شوفوا هذولك قاهراتني يأشرون علينا ويضحكون

15 - 5 - 2014, 12:06 PM

حنين : وقحات لما رحت لوحدي على المرايا اسمعهم يقولون اذا هم كذا اجل العروس تفجع
سحر بقهر : بالله مايشوفون اشكالهم الله لا يبلانا كأنهم من الحبشه استغفر الله
هنادي تضرب يديها ببعض : آآخ بس لو أمسك وحده على جنب واعطيها كم كف ابرد حرتي فيهم
لينا : ماعليكم طنشوهم هذي الاشكال الغيره شابه بقلوبهم .. شايفين كل وحده تقول الزين عندي .. ومقهورات
تهاني : صدقتي اقسم بالله ... لفت تهاني بتشوف امها وين بتروح لها .. ولمحت مها
تهاني بشهقه : مــهــا
هنادي ابتسمت : هذيك اختي الكبيره .. بس كيف تعرفينها
تهاني عقدت حواجبها : مها تصير اختك
سحر : ايه .. ليش ؟
تهاني : لانها زوجة اخوي بندر
انصدموا البنات ... عادآ لينا اللي تجهل القصه
حنين : الحين بندر اخوك متزوج مها بنت خالي
هنادي توقف وتركض لمها : هيه يا مس مها
مها : نعم ياقليله التهذيب .. وت هبنت ؟!
هنادي : بندر زوجك اخته تهاني
مها تضحك : يس افكورس ماي هازبنت توتو ستتروه
هنادي : ابوكِ ياللغه عربي على عنقليزي .. بس تدرين ان تهاني صديقتنا المصون
مها فتحت عيونها على الاخير : صدق توي ادري
هنادي : والله من دلاختك يا مس مهاوي .. اقول اقول لفي بشوف .. قسم انك صاير بطه
مها ترجع شعرها على ورى : بس ويش رايك فيني
هنادي تصفر : لالا كسرتي توقعاتي بس لو خليتي الشقار لباريس هليتون وطقتها ..
مها كشرت : يعني الاشقر ماهو لايق علي
هنادي تبتسم بخبث : شوفي تبين الصدق اول ماشفتك داخله مع الباب
مها ابتسمت وتحمست : ايه ويش كان انطباعك عني ؟!
هنادي : تذكرين فاطمه اللي كانت تشتغل عندنا اول ذكرتيني فيها
مها وجهها صار احمر من العصبيه : انقلعي ياحماره .. الشرهه علي اخذ رايك اصلا انتي ويش عرفك بالموضه حدك السعوديه سبوورت وانتي تطورتي ابو ظبي ودبي سبورت
هنادي عرفت انها قهرت مها وجلست تضحك وراحت للبنات .. وهي ميته ضحك
مها كانت لابسه فستان طويل ناعم وردي فاتح جدا .. وصابغه شعرها اشقر وطالعه كيوت مره
شهد تطالع المعازيم واشكالهم جديده عليهم : رغد احس اني تايهه مره
رغد تمسك يد شهد ويمشون بالممر متجهين لطاولة البنات
جود تصفر : ياهوووو من هذولا البنات كأنهم من كوكب ثاني
ساميه بتفحص : ما اعرفهم .. غريبات عني
كوثر بدون نفس : شهد ورغد خوات ريم يصيرون صديقاتي بالجامعه
جود فتحت عيونها على الاخير : جد ..بس مايشبهون للي على الطاوله بتاتا
كوثر : لالا شهد تشبه لاختها هذيك اللي لابسه منجاوي( تقصد سحر )
ساميه تدقق : ايه صح فيهم شبه كبير
ضحى : بس شوفوا اجسامهم كأنهم عارضات ازياء مو حنا يا حظي
خلود : شهد تعالي اجلسي اشتقت لك يادوبه
شهد تبتسم : حتى انا الاختبارات ماخلت لنا مجال
هديل : كيف ريم وينها

15 - 5 - 2014, 12:08 PM

البنات : بالغرفه
هنادي توقف : ايش رايكم نروح لها الحين نسولف تلاقونها طفشانه
لينا وتهاني : ايه يالله ..
واتجهوا كلهم عند ريم عدآ شهد ورغد اللي جلسوا يسولفون مع بعض ويعلقون
بالغرفه
شوق : حياكم تفضلوا
لينا وتهاني وسحر : الف الصلاة والسلام عليك ياحبيب الله محمد .. كلووووووش
هنادي ترقص بخبال : ومباركين عرس الاثنين ليله ربيع عين وقمره .. ياسيف اذبح دجاجتين
الكل : هههههههه
شوق : استغفر الله دجاج .. الله يخلف عليك
ريم تكشر وتلف على الجهه الثانيه : تتريقين علي بيجيك يوم
لينا تبوس ريم وتبارك لها : ماعليك هذي دفشه .. وتغمز لهنادي
تهاني : مبروك يا ريومه الف مبروك
ريم بحياء نزلت راسها : الله يبارك فيك .. عقبالكم
هديل : امين يارب
شوق : انا طالعه خذوا راحتكم مع ريم ...
سحر : اوكي دربك خضر ..
وجلسوا كلهم حولها اللي على الطاوله واللي على الارض يسولفون ويضحكون على شكلها الخايف ويعطونها نصايح ..
شوق وقفت قبال المرايا وتشوف شعرها ولبسها .. سمت بالله بعد ماقالت الاذكار ومشت لجهة الصاله الكبيره
ام سامر : هلا شوق .. خلصتي من ريم
شوق : ايه خلاص كل شي تمام
مها : شوق ويش رايك نروح نرقص
شوق تبعد عن مها لانها عارفه بتسحبها غصب عنها : لالا مابي ارقص استحي
مها : اقول امشي حتى رغد وشهد بيرقصون .. يالله تكفين خلينا نروح نرقص
شوق باصرار : لالا روحي ارقصي وانا اصفق لك .. ماكملت كلمتها الا شلة البنات وراها
حنين : شوق بلا دلع يالله خلينا نروح نرقص
هديل وهنادي : يالله شوق
شوق : لا يعني لا
سحر : ماهو بكيفك يالله غصب عنك .. سحبوها للكوشه وطلبت المشرفه على الدي جي تشغل اغنيه ياغداره ..
شوق : يالله انتم ارقصوا وانا الحين ارقص بس اكلم شهد .. راحت وهي تشوف البنات يرقصون ويضحكون حتى اهل سيف .. والكل يشجع ومبسوط وفرحان
رغد تجرها : تعالي يابكاشه غصب بترقصين على مين الحركات ذي ... وخلتها ترقص معها
شوق وجهها احمر : لحد هنا وبس ما اقدر ارقص اكثر استحي ..
جلست بالكوشه تصفق جنب هنادي اللي تصفر وتشجع بحماس لاخواتها وبنات عمها وتشاركها تهاني وهديل وخلود
حنين تلعب بشعرها وترقص بجهتهم : ويش رايكم
كلهم بصوت واحد : عــلـــيـــهـــــم .. عـــــآشوآ
شوق تضحك من قلب على خواتها اللي متحمسين مره وهي تشوف االسعاده والابتسامه على وجيههم همست لهنادي : عسى دوم الفرحه .. وربي احس بموت من الفرح
هنادي تضحك : امين يارب .. بس شوفي كيف يطالعون الحونشيات ذولك
شوق كشرت : بنت عيب استحي
هنادي تتصنع الخوف : خلاص سكتنا بس احسهم يكرهوننا
شوق : واذا يكرهونا احنا همنا الوحيد ريم وسعادتها صح
هنادي باقتناع : والله صدقتي اهم شي ريم
شوق توقف : بروح اشوف عمتي اشوفها تأشر لي

15 - 5 - 2014, 12:09 PM

مشت والعيون كلها تعلقت فيها جمالها ساحر وملامحها حاده وتأسر الكل
كانت لابسه فستان طويل لونه نيلي وفيه بروش فضي على شكل فيونكه بالوسط تحت الصدر والظهر مفتوح للنص وشعرها ناعم على طوله ومنزله خصل على وجهها .. سمعت همسات
..: مـــيـــن تــكون هذي . بســم الله عليــه تهبل
..: حرام عليك كل هالزين وماتشوفينه .. محد يعجبك ابداً
..: شوفي الجسم والا الشعر .. والا بياضها ويديها .. اللي كأنها قطنه
..: عيونها تجنن والا ضحكتها .. كلها نعومه ..مشاء الله تبارك الخالق
..: والله حرام كل الجمال هذا ومخطوفه وكمان مغتصبه .. صدق الزين مايكمل
بعد هذي الكلمه وقف قلبها .. وارتجفت كل خليه بجسمها الكلمه هزتها من الأعماق .. ليش كل ماتروح مكان يلاحقها الماضي الاسود .. ليش ما يتركها تشوف حياتها وتعيشها بدون منغصات ليش هي تدفع ثمن ماكان الخيار بأردتها كان ظلم وتجبر على ضعفها وهوانها .. كل ماتبي تضحك للحياه تقفل أبوآبها بوجهها .. كل يوم تكره من كان السبب باللي صار
كل يوم يزيد حقدها وبغضها له .. صارت الدنيا بعينها سوداويه مستحيل تكون بيضاء نقيه
تشوهت صورة الحياه بعينها .. جروحها تــألمــها والى هذي اللحظة ما ألتأمت ..
ألم . بيني وبين نفسي .!!
يقول لي .. عطــــــني آمــالک وخـــذ يـآسـي
وســـــوي من بقايا الحزن في ليـلـک
قصايد / تصبح وتمسي ..!!
وودعهم بعدــه الناس .. تراهم / ما يحبونک .!!
ترى / ماعاد يبـونــک
لأنــــک .. تختـــلف عــــنهـم
وتلبس ثوبــک الأسود ..!!
مطرَّز بــ الحزن .. والخوف
لأنك تنظر لــ أبعد .. من حدود الـــنظر .. والشـــــوف
وأقـــــــول أحسـن ..!!
أودِّع ناس }
وتبــــکِ نــآس
لأن عيون .. بعـــض الناس
ماتبــــکِ ..!
حست بمعنى هذي الابيات .. لازم ترحل لعالم ثاني حتى ترتاح من ملاحقة الماضي الأليم لها

15 - 5 - 2014, 12:11 PM

بجهه ثانيه من الصاله ..
قرت المسج والحزن بدأ يكتسيها .. هدوء طغى عليها رحلت البسمه وحل مكانها الضيق
شهد انتبهت لتغيرها المفاجئ وسكوتها الغريب : رغد .. علام وجهك كذا
رغد : مافي شي ..
شهد بنظرة تفحص حست ان فيها شي وباين التوتر عليها من طريقة مسكتها لجوالها اللي تلعب فيها وتهز رجلها بأرتباك : كيف مافيكِ شي .. قولي الصدق
رغد حطت عينها اللي لمعة الدمع واضحه فيها بعين شهد .. وعقدت حواجبها
شهد همست لها : عبدالله السبب ؟!
هزت راسها بالأيجاب بعد سكوت ثواني : راسل رساله .. ونزلت راسها حتى تداري دمعتها اللي تحاربها عشان ما تنزل زاد ضغطها على جوالها حتى تتمالك نفسها
شهد : انسي شوي لاتخربي فرحتنا .. أجلي كل شي للبيت .. تعالي نرقص ونغير جو
رغد توقف : امشي يالله ..وقفوا يرقصون وكانوا اهل سيف يرقصون
ساميه تأشر بعينها عليهم : جود شوفي المغرورات جوا يرقصون
ضحى بضحكه شيطانيه : شوفي ويش بسوي .. وصارت ترقص مع ساميه وتتكلم وبحركه مقصوده دفت شهد اللي كانت بتطيح لو ما مسكتها هنادي زين
هنادي بنظرات شر .. طالعتها من فوق لتحت وقالت بصوت يخوف : انتبهي المره الثانيه لا اطلع عيونك من راسك
ضحى بلا مبالاه : اسفه ما شفتها
خلود تحاول تهدي الوضع : اوكي حصل خير .. هنوو شهوده تعالوا اجلسوا
شهد ترجع شعرها اللي مجعدته مثل ميريام فارس وبنظره ناريه : غبيه .. مسكت هنادي وجلسوا
لينا مقهوره : أخ بس قسم بالله يرفعن الضغط
بعد ساعه
شوق تشيك على ريم وتعطي مشاري لسيرنا عشان تطلع فيه برآ وتزبط كل شي قبل دخول سيف للتصوير
ريم بخوف أسر كيانها : شوق خايفه مره .. مرتبكه
المصوره تخفف عنها : ماتخفيش ياحبيبتي .. كل البنات كذا بس حتكون تجربه حلوه في حياته ماتضيعي احلى لحظات عمرك بالخوف والرعب .. دآ جوزك
شوق تضحك : مايحتاج اقول اكثر من اللي قالته .. لاتتوتري واذكر الله .. والخوف ماله داعي
ريم : ان شاء الله بحاول
المصوره : يالله ريومه بأخذ لك كم صوره لوحدك ... واخذت لها كم لقطه لو حده وبحركات حلوه وكلاسيكيه
ريم بحياء : لو سمحتي بقولك طلبي
المصوره : تفضلي ياحبة عيني اؤؤلي
ريم : لا تحرجيني بحركه جريئه خليها حركات عاديه اوكي
المصوره وشوق يضحكون عليها وعلى تفكيرها البريء..
المصوره : ماتشيلي هم يا حبيبتي ..
دق جوال شوق وكان عمها بيقول لها ان سيف بيدخل بعد عشر دقائق
شوق : يالله تجهزي بيدخل سيف ..
ريم بانت عليها علامات الخوف والرعب : ياويلي ... ويش اسوي ...
وقفت ومشت للجهه الثانيه بعدها رجعت وجلستها شوق على الكرسي .. لبست شوق عبايتها وتغطت زين ووقفت على جنب وأندق الباب .. وفتحت شوق كانت اخت سيف الكبيره ام محمد
سيف كان ورى الباب : احم احم .. ياولد
ام محمد تبتسم لشوق : اقوله يدخل
شوق : ايه ايه خليه يتفضل .. انا تغطيت
ام محمد : تفضل ياس�

15 - 5 - 2014, 12:12 PM

احد الا عروستك بسم الله عليها .. وطالعت ريم بنظرات أعجاب وحب وهي تتفحصها وميته عليها وعلى نعومتها وجماله الرباني
سيف اول ما دخل كان مستحي ومنزل راسه للأرض : السلام عليكم
الكل : وعليكم السلام
ام محمد : تفضل تفضل ياخوي سلم على زوجتك ...
رفع راسه وهو يشوف ملكه جالسه على الكرسي اللي لازق بكرسيه .. وقف بمكانه وهو يتأمل خجلها وراسها اللي مارفعته من أول مادخل .. كلهم استغربوا وقوفه المفاجئ
المصوره : ياباشا لو سمحت سلم على العروسه والا حتفضل كدآ وقت طويل
سيف صحى من سرحانه اللي قاطعه صوت المصوره .. وده يكفخها ويشوتها بعيد خربت عليه احلى لحظة لحظة طاحت عيونه على وجهها الملائكي ..
سيف كشر وبصوت عالي : طيب لا تنفخين ..
قرب من ريم اللي نبضاتها تزداد بكل خطوه يخطيها تقرب بينهم المسافه .. قلبها شوي ويطلع من صدرها من الخوف والحياء اللي مقطعها ..
سيف مد يده : السلام عليكم .. وقفت بسرعه وردت السلام وهي تفكر تمد يدها والا لا .. سحب يدها بقوه وباسها على راسها وارتبكوا الاثنين
ام محمد وشوق :ههههههههههه
ام محمد بشويش على البنيه ما بتطير
سيف جلس على الكرسي من الارتباك مايدري ويش يقول .. وجلست ريم على كرسيها ونفسها تضحك او تبكي من الاحراج .. وخدودها اعلنت حاله الانفجار وتحولت للون الاحمر
المصوره : نبدا التصوير دلوقتي حت تاخذوا راحتكم
ريم تطالعها شوي وتبكي ( يرحم اهلك لا تقولينها اجلسوا على قلوبنا )
سيف ابتسم هو يفكر كيف يبدأ معها الكلام هو غريب عنها وهي غريبه عنه ( بسرعه خلصينا ياغثك ياختي .. وبعد تشاورنا .. اووف بس الله يصبر

المواضيع المتشابهه لموضوع: رواية يا خاطفي وين القى عزتي في زمن المذله لموضوع: رواية يا خاطفي وين القى عزتي في زمن المذله
الموضوع	كاتب الموضوع	المنتدى	مشاركات	آخر مشاركة
اذا القي	احمد البيشي	همس الشعر والقوافي	2	7 - 7 - 2021 02:42 PM
رواية وانتبه لك ترى روحي معك رواية سعوديه للكاتبه	الحب ياسمين	همس للقصص وحكايات وروايات	9	4 - 4 - 2019 10:13 AM
رواية فهد و نوره رواية رومنسية سعودية كاملة	سجات التهاويل	همس للقصص وحكايات وروايات	23	8 - 6 - 2018 01:07 PM
شرطة رنية تلقي القبض على خاطفي المراهق	عـازفة الليل	همس للاخبار العالمية و العربيه والمحليه	1	29 - 10 - 2013 03:58 AM
من لا يحطك تاج راسه وهو حي عساه لفراش المذله وساده	●∫قْلبهآإ مغ‘َـرِورْ !	همس مطبخ حواء	8	10 - 12 - 2010 11:33 AM

الذين يشاهدون محتوى الموضوع الآن : 8 ( الأعضاء 0 والزوار 8)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

رواية يا خاطفي وين القى عزتي في زمن المذله

همس للقصص وحكايات وروايات