رواية رغد وبدر كامله - الصفحة 4

30 - 8 - 2014, 04:48 PM

وقبل الملكه بشهر صار شئ ممكن يدمر العايله بكبرها وهذا كان في استراحة ابوسلطان الكل كان موجود
دخل بدر بالمطبخ ورغد كانت مشغوله وسالها
بدر.. رغد وين المفتاح الي اعطيتك بالبيت
رغد.. بشنطتي الحين اجيبه لك
بدر.. لا وين الشنطه
علمته مكانها وراح بدر وفتح الشنطه وشاف علبه غريبه فتحها وكانت الصدمه الي هزته ولا قدر يتحكم بنفسه ولاغضبه
بدر.. وبصوت عالي ..رغد..رغد
الكل طلع من المطبخ ..
بدر.. ممكن اعرف هذي شو تعمل بشنطتك
رغد.. سكتت ولاعرفت شو ترد هي ماقالت له انها تاخذ وتقوله الله ماكتب شئ وهي تعرف انه يتمنى ولد
نوف.. بدر اذكر الله واجل الموضوع بعدين
بدر.. وبصوت عالي لا الحين تقولي شو قصدها بهالحركه رغد تكلمي
سمع سلطان وخالد الصوت وعرف سلطان ان بدر يكلم رغد ودخل ووصل عند رغد وحس انها فعلا خايفه
قرب مناه وحط ايده على كتفها
سلطان.. بدر شو الموضوع
بدر.. اسأل اختك
سلطان ...رغووده حبيبتي شو الموضوع
رغد خلاص ماعادت قادره انهارت وبدت تصيح
استغرب سلطان والتفت بالله احد يفهمني الموضوع
بدر.. اختك تاخذ حبوب منع حمل من غير مااعرف سبع شهور وكل مااسألها تقول الله ماكتب شئ ممكن تفسر لي هالشئ
سلطان.. بدر يااخوي هالموضوع مايناقش بهالشكل
بدر.. بدا يتمالك نفسه وسكت التفت سلطان على نوف
سلطان .. نوف الله لايهينك خذي رغووده داخل
طلعوا البنات ولاظل غير بدر وسلطان
سلطان ..بدر ..يااخوي هدي نفسك ولاراح يكون الا الخير رغد بعد اذنك انا بااخذها للبيت
بدر وهو معصب ..ليه
سلطان..بدر انت ماتعرف رغد الي صار اليوم راح يتعبها كثير وراح تنهار ولابتنام وهي كذا اختي واعرفها وأنت لازم ترتاح بعيد عنها
بدر ..من بيرجعها للبيت ..
عبدالله بيرجعها
بدر.. اوكي وانا طالع بعد بلغ الوالد
سلطان.. بدر انتبه لنفسك ولاراح يكون الا الخير

30 - 8 - 2014, 04:48 PM

طلع بدر والف فكره وفكره براسه ليه رغد تعمل كذا اكيد تنتظر الوقت حتى تتطلق مني او تحب غيري
او او بعدين تعوذ من الشيطان ورجع للبيت وهو حالته مو اصعب من رغد الي ماتوقعت بدر ممكن يرفع صوته عليها وقدام الكل وظلت منهاره لحد مانامت وعبدالله ماتركها ظل يحاول يهديها وقالت له
رغد.. وهي تصيح عبدالله هو مايحبني مايحبني ..
عبدالله ويمسح على رأسها ..حبيبتي رغوده نامي ولاتقولين شئ وانتي معصبه بكرا كل شئ ينحل
جلس عبدالله بالبيت مع رغد لانه يحب اخته بشكل خيالي وزياده على كذا عبدالله انسان حساس جدا اما بالاستراحه
الكل تكدر مزاجه باهالليله

ابوسعود ..لاحول ولاقوة الا بالله
ابوسلطان..لاتتضايق يااخوك بكرا نراضيهم ( يحاول يهدي اخوه وقلبه مع بنته رغودده وحيدته )
ابو خالد..من تراضي بدر عنيد ورغد اعند منه الله يهديهم
ابوسعود .. ايه والله صدقت يااخوي هو عنيد وهي عنيده
خالد وبكل صمود كالعاده ..عمي ياليت تسمحون لي اقول شئ
الكل .. تفضل
خالد .. انا بصراحه عندي رأي واتمنى تسمعوني رغد وبدر لهم سبع شهور عايشين مع بعض مها كان لابد فيها لحظات حلوه
ابوسلطان .. ياابوك مافهمت وشتقصد
خالد .. الي اقصده انه مااحد يراضيهم على بعض وملكت سلطان تتم على موعدها وهم اكيد بيقررون مصيرهم
ابوسعود .. نخليهم شهر ياابوك مايصير الناس بيقولون كلام كثير ماصار
سعود .. ايه يبه شهر ولا علينا من الناس بدر ورغد لازم يعرفون قيمة بعض ويقررون لكن بشرط نقبل قرارهم شو ماكان
ابوسلطان .. شرايك يابو خالد
ابوخالد.. خلوهم لين مايردهم الشوق لبعض
خالد .. ايوووووووووووووووه ابوي شو هالكلام الحلو
الكل ..هههههههههههههههههههههههه ه
وظلت رغد ببيت ابوها تغيرت كثير صارت منعزله ماتتكلم الا قليل سلطان وعبدالله يحاولون وامها من تشوفها ماتقدر تمسك دموعها تحس انها فعلا فقدت بنتها من يوم تزوجت رغد الابتسامه صارت شئ غريب ماتعرفه كل وقتها سرحانه وتفكر بأحلامها الي تدمرت ظلت رغد تعاتب نفسها وتقول انها غلطانه بعدين ترجع تقول لا انا مو غلطانه بدر مايحبني مايحبني وهذي حياتها ساعه تعاتب نفسها وساعه تلوم بدر ..
ولااحد يعرف انها طلعت الا عمانها وهي ساكته وبدر ساكت كانت تسأل عنه بشكل غير مباشر ...
بنات عمها واحيانا ماتتحكم بمشاعرها وتبدأ تصيح وهي تكلمهم وهم يحاولون معها لكن ومع هذا كرامتها أهم عندها وهو كان يعرف اخبارها من عند اهله .......وبيوم اتصلت امل برغد
امل.. شلونك رغد وشلون عمي والاهل كلهم
رغد .. بخير انتي شلونك وسالم وابوه كيفهم
امل .. تمام الحمد لله
امل.. رغووده
رغد.. سمي
امل.. مااشتقتي له ..؟؟
رغد .......
امل.. رغد انا اعرف انك تحبينه وتموتين عليه حرام الي تعمليه بنفسك
رغد.. ساكته ولاعادت قادره وبدت تصيح حست امل فيها
امل.. رغد دموعك دليل حبك

30 - 8 - 2014, 04:49 PM

امل.. رغد دموعك دليل حبك ليه البعد طيب
رغد.. امل بدر خلاص انتهى من حياتي
امل.. رغووده الكل يعرف ان بدر هو حياتك ( لكني انا دمار حياته ولاارضى أكون السبب بتعاسته لاني احبه تقول هالكلام بخاطرها)
رغد.. امل الله يخليك غيري الموضوع
امل.. ولايهمك لكن بقولك ان بدر عادي ولاهامه الموضوع لكن كلنا نعرف ان بدر ياكابر وبداخله يحترق
رغد وبتغير الموضوع ..شخبار عروسنا ريوف
امل... هههههه تغيرين الموضوع طيب بتشوفين مها بعد يومين
رغد .. ان شاء الله
وتموا يسولفون وبعدها قفلت وتذكرت ريوف تمنت انها معها بهالوقت وندمت لان الفرحه ماهي كامله حتى بعيون سلطان تشوفها في شئ مهزوز بالعايله كلها مهما حاولوا يدارونه سلطان وعبدالله رغد اختهم وبدر ولد عمهم بين نارين عايشين وبدر ماصار يقدر يجلس مع عمه كثير يشوف العتب بعيونه وهذا شئ مايقدر يتحمله ..ورجعت لغرفتها رغد رجعت لذكرياتها رجعت لدموعها رجعت لصندوق الي رفضت تأخذه لما تزوجت رغم انها قررت بأحلامها اول شئ ينتقل لبيتها الصندوق الغريب الي الكل يجهل شفيه بدت تشوف الي بداخله وتبكي على الي صار لها
اما بدر فكان طبيعي جدا عند اهله ولاكأنه كان عنده زوجه وطلعت لكن من يرجع للبيت يبدأ يتذكر رغد بكل مكان بالبيت لها ذكرى لها لمسه رغد عايشه بالبيت حتى لو هي بعيده صح حياتهم كانت روتينيه لكن هالروتين يحتاج نظام كان يرجع ويحصل كل شئ منظف ومرتب كان يحس انه فيه انسانه تنتظره وانه مسؤل انه يتواجد بالبيت اغلب وقته لانه حق لها وحق عليه
من طلعت رغد وبدر ماينام الا اذا شاف الصور وتأمل براءة رغد يقول بخاطره هالبراءه ليه ترفضني اكيد فيه سبب معقول؟ ..
بعدين يقول اعوذبالله من الشيطانالرجيم
وينام وينسى وسوسة الشيطان الي يصور له اشياء كثيره ..

وبيوم الملكه الكل كان مشغول بالتجهيزات والترتيب الا قلبين كانوا خايفين من اللقاء رغد وبدر بدر وبأعتبار انه اخو العروس اكيد انه بيدخل ورغد بما انها اخت المعرس اكيد بتكون موجوده وقريبه منه بدر خايف من نفسه اما رغد خايفه من دموعها الي دائما تخونها دائما

وصلوا المعازيم ومعهم لمى بنت الخاله وجلست تسولف مع ريم
لمى ..وين رغد اجل..؟؟
ريم..بتجي مع اهلها انتي ناسيه انها اخت المعرس
لمى .. ايه صح وبخاطرها تتمنى تشوفها وتذبحها وكانت مخططه لاشياء كثيره تعملها تحرق فيها قلبها ولمى ماتعرف ان رغد زعلانه وعند اهلها ..
وصلت رغد واهلها وكانت رائعه بهدوء جمالها الي استفز لمى الي ماخلت شئ ماحطته بوجهها
نوف بأبتسامه ..الله شو هالزين رغووده ( رغد لابسه فستان اسود هادي لكنه رائع وكانت رغد تتميز دائما اذا لبست الاسود لانها بيضاء والاسود لايق عليها )
رغد..عيونك حبيبتي الي تشوف الزين
لمى. وبنظرة حقد ...كيفك رغد..
رغد..تمام انتي شلونك
لمى..ع�

30 - 8 - 2014, 04:49 PM

رغد من سمعت كلام لمى سكتت وعرفت لمى انها اصابت الهدف لكن رغد حاولت تدارك الموقف وقالت
رغد ..و مايفهم بدر الا انا
لمى..وبأبتسامه خبيثه ......اتمنى وراحت وتركت رغد بتمووت من كلامها وتسأل نفسها شلون عرفت بدر شلون
قدرت توصل لتحديد مشاعره وليه هالنظره الي كلها خبث هالانسانه من اول مره شفتها حسيتها تتعمد توصل لي رساله معينه
انها تعرف بدر لكن كيف وهي علاقتها مع البنات مو لحد كذا وفجأه قالت معقوله تكون تكلم بدر بعدين طردت الفكره قبل ماتسيطر عليها
بدر مهما كان ماعنده هالحركات ومع مين بنت خالته لا لا اكيد هي انسانه مريضه .. وعلى هالحال ظلت رغد تفكر بكلام لمى

تمت الملكه ونزلت ريوف الي كانت ميته من الخوف لكنها رائعه بجمالها وجات اللحظه الي بيدخلون فيها
طبعا رغد تحمد ربها لانها تتغطى عن سعود حتى ماتشوف بدر ويشوفها
دخلوا ورغد دقات قلبها تتعدى العروس من خوفها شافت بدر ونزلت دمعه من عينها حست فيها نوف ..
نوف .. دمعة فرح لاخوك او دمعة حزن لفراق غالي
رغد..........
.نوف.. الله يهديكم
ريم.. رغووده روحي سلمي على اخوك
رغد.. لاماابي
لمى.. يمكن بدر يزعل ......وبصوت واطي ماسمعه الا رغد .. انا اعرفه
ريم.. لا اخوي مايزعل من هالزين
لمى وقتها ودها تذبح ريم وبعدت عنهم وقالت بروح اسلم على ريوف
الكل استغرب موقفها لكن متعودين لمى ماتهتم بكلام الناس ولاتعرف العيب رغد وقتها انقهرت منها لانها شبه متغطيه
سلمت على ريوف وباركت لسعود وبدر الي كلمته كلمتين وضحكت وهالضحكه ذبحت رغد واستفزتها وراحت تسلم على اخوها
وسعود اشرت له امل بسرعه وطلع على طول من غير مايحس فيه بدر الي كان يسولف مع سلطان
سلطان والابتسامه ماليه وجهه .. هلا والله رغوود سعود طلع افتشي
رغد ماتت ماعرفت انه طلع والا ماكنت جات اما بدر ماقدر يطلع حتى مايثير الشكوك حولهم وفتشت رغد ولمحة حزن سيطرت على وجهه بدر تذكر هالوجه البريئ
رغد وهي فرحانه لاخوها ..الف مبروك سلطان حبيبي الله يوفقك
سلطان ..ا لله يخليك ويبارك فيك
رغد .. وتحضن ريووف ...مبروك ريوف حبيبتي واخيرا صرتي زوجة اخوي صدق
ريووف وجهها احمر ..الله يبارك فيك
رغد.. سلطان ريووف غاليه علي كثير حطها بعيونك
وفجأه
بدر .. مبروك رغد
رغد من سمعت صوته حست رجولها بتخونها ... وتلتفت على بدر وهي تعرف انها اذا جات عينها بعينه راح تدمع حاولت بكل ماتقدر
رغد .. الله يبارك بعمرك
بدر .. شلونك رغد
رغد .. الحمد لله ماشئ حالي
بدر. . ان شاء الله دوم
ماقدرت رغد ولفت بتمشي ومسكها ببدر بهالحظه عيون كثيره تراقب هالحركه
بدر .. انتظري مني اتصال بالليل ضروري
رغد ..تغير لون وجهها ولمى توقعت بدر قال كلمه حلوه غيرت لونها وخلتها تخجل لكن ماتعرف ان هالاثنين حالتهم صعبه
رغد..ان شاء الله
امل وتحاول تبتسم ..كيف اللقاء من بعد الف�

30 - 8 - 2014, 04:50 PM

امل وتحاول تبتسم ..كيف اللقاء من بعد الفراق..؟؟
رغد والدموع بعينها ..يذبح ..يذبح
نوف..حبيبتي رغووده مابيصير الا الخير هونيها مانبي دموع ترى بصيح معك
ريم..والله انا اذا جلست اكثر معكم بصيح ليه هالعذاب وانتي تحبينه ليه

راحت ريم ورغد تعبت من هالتفكير وراحت تجلس بعيد

وطلع بدر وابوه وعمه وطلع سلطان وجلس مع ريووف نص ساعه وبعدها طلع لمجلس الرجال
وكانت سعادته ماتنوصف لحظتها ريوف الانسانه الرقيقه الطيبه الهاديه صارت زوجته ..
الانسانه الي ملكت قلبه ومشاعره الانسانه الي كبر حبها معه بكل ثانيه بحياته اليوم صارت زوجته واخيرا..

اما رغد فكانت بعالم بدر هايمه تسترجع حلمها من سنوات يالله توقعت زواجها من بدر بدايه مرحله
جديده من السعاده توقعت بدر بينتشلها من خوفها ويحتضن حبها له لكن بدر دمر رغد برفضه لها
ذبحها لانه تزوجها من غير قناعه رغم انها كانت تحلم بالحب معه ظلت رغد تفكر ولاحست الا
بخالتها ام سعود...رغد بنيتي والله انه لك وحشه يالغاليه
رغد وهي منزله رأسها ..تسلمين خالتي
ام سعود..رغووده بنيتي ولدي واعرفه اكثر من غيره والله انه ندمان على الي صار لو مانطق ..
رغد. ماعرفت وشترد على خالتها ...............
ام سعود..الله يجمع شملكم ويهديكم
وراحت ام سعود والحزن مالي وجهها لما شافت بدر الي مهما كابر وحاول يخبي يبان عليه
انتهت الملكه على خير بشوق ولهفه كان فيه قلبين ينتظرون انتهاء الملكه الي هم سلطان وريوف
حتى تتم او تبدأ رحلة المكالمات وقلبين بخوف وقلق كانوا ينتظرون انتهاء الملكه بدر ورغد
بدر طول الوقت يفكر برغد ويقول خلاص لازم نحط نهايه لهذي المشكله
وفي بيت بدر ..
سعود ويناظر بدر بعالم ثاني .....بدر وين وصلت ..؟؟
بدر وبصوت محبط ....وين اوصل من شهر وانا اوصل لنفس النقطه وارجع اعيد من جديد
سعود..حاول تتعدى النقطه
بدر..وهذا الي بيصير اليوم
سعود..اليوم اي اليوم خلاص اليوم
بدر..لا مااقدر اتحمل اكثر انت تعرف انه بعد عشر أيام عمتي احتمال بتوصل ولاله داعي زيادة الكلام لازم انهي الموضوع
سعود..الله يهديكم ويعينكم
بدر..الحين مابتروح بيتك انت ..؟؟
سعود..افا والله تطردني
بدر..يااخي خلينا نخلص من هالمشكله
سعود..انا بروح لبيت الوالد اخذ امل وانت يابدر مهما كان لاتطلع ولاتسوق سياره وانت معصب اوعدني
بدر.. اوعدك
سعود..فمان الله
بدر..الله معك
بدر مسك جواله وتردد كثير قبل مايتصل برغد لكنه قرر ونفذ على طول

30 - 8 - 2014, 04:51 PM

رغد وهي جالسه مع سلطان وامها
ام سلطان ..يالله انا تعبت بروح انام
سلطان..تسلمين الغاليه الله يعطيك العافيه تعبناك اليله
ام سلطان ودموعها بعيونها ..اليوم اغلى يوم بعمري يوم ملكة ولدي الغالي سلطان
عبدالله..الغاليه دموعك غاليه مابتزوج حتى مااشوفها
رغد وهي تبتسم لرقة عبدالله اخوها
سلطان..ايووووووووووووووووو وه عبدالله
ام سلطان...يازينها من دموع اذا دموعي فرحه بعيالي
وفجأه يرن جوال رغد شافت الرقم وتغير لونها وارتبكت واستأذنت منهم
ام سلطان ..من الي متصل هالوقت ..؟؟
سلطان ..واضحه ياام سلطان من ارتباكها تعرفين..؟؟
ام سلطان وبدهشه ..بدر؟؟
سلطان..اتوقع
ام سلطان ..الله يهديهم وراحت تنام
عبدالله.. يااخي بدر انسان غريب جدا
سلطان..شلون غريب ..
عبدالله ..بدر مشاء الله عليه رجال ماعليه كلام لكن الي محيرني تصرفه مع رغد
سلطان..عبدالله لاتلومه ماهو قليل ان زوجته تعمل هالشئ من غير علمه يعني بمعنى غير مباشر رافضته صح
عبدالله..سلطان..انا معك لكن الاسلوب لازم يكون ارقى من كذا هو انسان متعلم ولابهالشكل تتعالج الامور
سلطان..عبدالله اقول لك شئ
عبدالله ..تفضل
سلطان..انا اليوم تزوجت
عبدالله..ههههههههههههههههه هههههه طيب مبروك
سلطان..الله يبارك فيك لكن خلينا من بدر ورغد خلني اعيش الحب والفرحه
عبدالله..الله يديمها عليك يارب
سلطان..عقبالك ان شاء الله
عبدالله....اذا الله اراد كل شئ بيصر يالله اخليك مع احلامك تصبح على خير
سلطان..ومن من اهل الخير ..
وطلع عبدالله وترك سلطان يبدأ اول مكالمه مع امل عمره وحياته ريووف

وصلت رغد لغرفتها وقفلت الباب وجلست على السرير وردت
رغد وقلبها يدق بقوه ....الوو...

30 - 8 - 2014, 04:51 PM

الجزء السابع

بدر ومن سمع صوتها سكت..بعدين قال ....هلا رغد
رغد..اهلين
بدر..شلونك
رغد..تمام
لحظة صمت بينهم كانت ممكن تذبحهم لكن بدر قدر يسيطر على غضبه
بدر..رغد اعتقد شهر مده كافيه حتى نريح اعصابنا وناقش موضوعنا
رغد...................
بدر...رغد الي صار يحتاج تفسير ممكن اسمعه منك ....؟؟
رغد وتحاول تكون هاديه .....ماعندي شئ اقوله
بدر ..رغد شلون ماعندك انتي مو طفله حتى تعملين شئ من غير سبب وانا اثق ان فيه سبب
وكبير او مهم عندك الي خلاك تعملين كذا
رغد....بدر الي عندي قلته ..
بدر..وبدأ يفقد اعصابه ..وانتي قلتي شئ اصلا
رغد..بدر رجاء لاترفع صوتك انا قلت لك ماعندي شئ اقوله وأنا صادقه والي يعجبك اعمله
بدر وبصوت هادي .....تبين الطلاق
لما قال الكلمه رغد نزلت دمعتها وحطت ايدها على قلبها وبدت ترتجف من قوة الكلمه
تتطلق من بدر تعيش من غيره بعيد عنه مستحيل تموووت حتى لو مايحبها هي تموت عليه
حتى لو جرحها مازالت تنتظر الامل منه مازالت تتوقع ان بدر ممكن يتغير ويحبها
بدر وبصوت حاد جدا ....رغد طلاق مابطلق الا اذا عرفت السبب اما اذا غرضك من هذا التصرف الطلاق
انا اثق ان له دافع رغد اذا انتي مثل ماقلتي انجبرتي معناته انتي مخططه لكل هذا قبل الزواج وطالما مخططه
ليه ماحاولتي تقاومين وترفضين ..
او يمكن مخططه لشئ ثاني بعد الطلاق ..
ندم بدر على هذي الكلمه
رغد..شئ ثاني ايش تقصد؟؟؟؟
بدر..والله انتي ابخص بنفسك
رغد..بدر عن التجريح كفايه الي صار منك لحد الحين
بدر..رغد اسألك بالله انا قصرت عليك بحق من حقوقك
رغد..لا
بدر..اجل ليه هالكلام
رغد..بدر انا استأذن منك ممكن بقفل
بدر..لا مابتقفلين الا اذا قلتي لي من الشخص الي بتتزوجينه بعد الطلاق
وبدر عرف انه اذا استفز رغد بتتكلم واستخدم هالطريقه رغم انها سيئه لكنه مضطر يحس أنها الطريقه الي تخلي رغد تنطق وتتكلم
رغد..بدر انت تعرف معنى كلامك انت تهين نفسك قبلي قبل ماتكون زوجي انت ولد عمي
عيب هالكلام ياولد العم

30 - 8 - 2014, 04:52 PM

بدر وحاول يكون طبيعي رغم انه ندم على هالاسلوب....خلينا من المثاليات وقولي لي ليه ماكنتي تبين ولد مني او تخافين يربطك ويبعدك عن الي تبينه
رغد..وفقدت اعصابها وقاطعت بدر....بس خلاص اهنتني بما فيه الكفايه ايه انا ماابي ولد منك ولا ابي شئ يربطني فيك
ابي تطلقني الحين ارمي يمين الطلاق واذبح باقي الامل بداخلي دمرتني قبل زواجي بأيام واليوم جاي تكمل
بدر انا ماجبرتك ولا راح اجبرك ترتبط فيني انت حر بنفسك واذا كلام الناس يهمك وتخاف يقولون طلق بنت عمه الي
تنتظره سنين تزوج وخليني عند اهلي انا بعد هالتجربه مستحيل افكر اكررها العذاب الي عشته معك مستحيل اكرره
وقلت لنوف مستحيل اقدر اغيرك مستحيل لكن نوف هي كانت تصبرني سبع شهور وكل ثانيه ينهار جزء من حلمي
خلاص خلاص طلقني
بدر فعلا خاف على رغد لانها منهاره ولافهم معنى كلامها لكن توصل لشئ واحد ان نوف تعرف
بدر وبسرعه ..اسف رغد انتي ارتاحي وبعدين يصير خير مع السلامه وقفل الخط بسرعه
قفلت رغد وانهارت على سريرها وهي تصيح حبها الي ضاع وجرحها ودمر وحطم امل كان باقي عندها
اما بدر على طول قفل واتصل علو جوال اخته نوف لانه يعرف انها عندهم بتنام
بدر..نوف لاتنامين دقايق وانا عندك
نوف.. خير بدر شفيك
بدر.. الحين اقولك بااي
نوف.. تسكر وتقول للبنات الله يستر
ريوف .. خير شفيه بدر
نوف .. علمي علمك

وصل بدر وجلس هو ونوف بالمجلس
بدر.. نوف انا كلمت رغد من شوي حاولت معها انها تبرر لي موقفها لكن ماكان عندها الا كلمه وحده ماعندي شئ اقوله
نوف وكانت منسجمه مع بدر ..ايوه وبعدين
بدر.. اضطريت اني استفزها واقول انها تحب واحد ثاني
نوف وحطت يدها على رأسها .. بدر انت صاحي
بدر..نوف انتم مو حاسين فيني انا اموت اتعذب كيف اعيش مع زوجتي سبع شهور وهي ترفضني ترفض ولد مني
انا لو انها ناقشتني كلمتني يمكن لكن انها تعمل هالشئ من دون علمي وتكذب تقول الله ماكتب شئ هذا الي يذبحني
ماقدرت حسيت اني فقدت الامل بأني اعرف السبب واضطريت استخدم هالاسلوب
نوف....
بدر.. نوف رغد قالت كلام وهي منهاره مافهمت منه الا انك تعرفين ليه هي تتصرف كذا
نوف بأستغراب ..انا
بدر.. تقول اني دمرت حلمها قبل الزواج بأايام مااعرف ايش تقصد
نوف تقول بخاطرها لازم اقول له ....بدر انت تزوجت رغد لكن مو رغد الي نعرفها رغد الي تشع حب وتهدي الحنان رغد الي الابتسامه ماتفارق وجهها رغد الي تعطي من غير حساب رغد الي تزوجتها رغد المجروحه من الانسان الي عاشت مراهقتها وهي تحلم فيه الي حلمت انه راح
يهديها السعاده ...بدر رغد تمووت عالتراب الي تمشي عليه
بدر... ومليون علامة استفهام على وجهه....... تحبني انا ..؟؟
نوف..كانت تحبك لكن مازالت هذي بعلم الغيب بدر اقرب وحده لرغد ريوف اسألها عن حلم رغد فيك كيف كانت تحكي عنك
وكيف تسأل عنك اسأ�

30 - 8 - 2014, 04:53 PM

وكيف تسأل عنك اسألها عن تخطيطها للمزرعه وكيف راح تسهر معك وكيف راح تشوفك رغد يابدر عاشت وهي ماتشوف بالدنيا حبيب غيرك لما خطبتها كانت ورده مفتحه لكن قبل الزواج تغيرت الكل لاحظ لكن توقعوا لانها عروس ولا احد كان عارف ايش فيها

يمكن انت ماقدرت تحسسها بالحب ولاحست منك الا بالصدود والجفاء كل الي قالته رغد انك ماتحبها وشلون عرفت ماقالت لكنها تقول انك حطمت ودمرت حلمها حاولت اقنعها تكسبك لكن بكل مره اشوفها احس انها متحطمه وفاقده الامل بحبك لها واحاول اقنعها وتقتنع لكن انت
تحطم هالامل بنظره خاليه من اي مشاعر بدر انت مو مقصر بشئ وهي تقوله لنا لكنك ماتعطي الا من باب الواجب مو لانك تحب رغد
بدر .. وهو منصدم من كلام نوف... نوف الحين الي يهمني انك تقولي لها اني ماقصدت الكلام الي قلته رغد بنت عمي وانا اثق فيها وبتربية عمي لكن ماقدرت اسيطر على اعصابي ..اعتذري منها
نوف.. بدر بسألك سؤال ممكن
بدر..تفضلي..
نوف..أنت باقي على رغد يعني عندك استعداد تصلح الي بينكم
بدر وبعد لحظات صمت..نوف انا تزوجت رغد وانا مازلت مقتنع انها مو الانسانه الي تمنيتها لكن هذا مايعني اني كنت او عامل حسابي اني بطلقها لا والله لكن انا الي يهمني اعرف هي ليه فعلت كذا ليه الرفض السبب بس ..
وطلع بدر ورجع لبيته الي عاش سبع شهور فيه مع انسانه هو الي جرحها هو ضيع حلمها رغم انه ماكان يقصد كان يتوقع انه مو مقصر
رغد تطلب حب هو مايقدر يعطيها هالحب لكنه بالاخير يرجع لنفس النقطه ويبحث لها عن سبب

فشلت محاولة بدر في انه يتوصل لسبب الي من اجله رفضته رغد ورفضت انها تحمل ابنه بالوقت هذا ماعاد يشوف حس ان الدنيا سوداء قدام عيونه مو لانه يحب رغد وفقدها لا لانه اهتزت صورته قدام نفسه وقدام اخوانه وعيال عمه ماهي سهله عنده انه ينرفض من زوجته الا عاش سبع شهور معها وبالاخير لام نفسه قال ماكان المفروض اني اعصب بالمزرعه قدام الكل المفروض ملكت اعصابي لكنه رجع يعطي نفسع مبررات لتصرفه وانه اضطر لانه في بداية تكيفه مع رغد او بمعنى اقرب للواقع هو ببداية المحاوله لتكيف لكنها هدمت كل شئ
تم بدر يلوم نفسه ويرجع يدافع لحد ماحس انه خلاص مو عارف يتوصل لحل ولاصار شايف الا حل واحد هو الطلاق وقرر انه الصباح يعلن هالخبر ..

يوم الجمعه الصباح متعودين يلتقون الرجال بعد الصلاة في بيت اخوهم العود ابو سالم يجلسون ساعه واحيانا يتغدون مع بعض الا هالاسبوع بدر فضل انه مايجتمع لانه مستحي من عمه ولانه تعبان والتعب واضح على وجهه ولاحب انه يحرج ابوه بقراره قدام الكل اعتذر من ابوه وقال انه معزوم على الغداء عند واحد من ربعه ..
وفي مجلس بو سالم
ابو سالم .. ابو سلطان
ابو سلطان .. لبيه يااخوي

30 - 8 - 2014, 04:54 PM

ابو سعود .. يااخوي هونها وتهون وهالموضوع بينحل قريب
ابو سلطان ..ان شاء الله لكن جلست البنت عندي والله ماهي عاجبتني فاامساك بمعروف او تسريح بااحسان
ابوسعود .. لاتقول هالكلام يااخوي هذا طيش شباب وبينحل
ابو خالد.. يااخواني لازم تتدخلون انتم تعرفون بدر عنيد ورغد اعند منه واذا تركناهم بيكابرون ويعاندون بعض
ابو سلطان.. صدقت يااخوي
سعود. . يبه
ابوسعود .. نعم ياابوك
سعود..إنا توقعنا ان حل خالد بينفع لكن للاسف ماناسب الحل مع بدر ورغد لان الكرامه اهم عندهم من اي حب او شوق
لكن قدامنا حل واحد الي هو انك انت وعمي تضغطون عليهم لحد مايرجعون ونعتبرها محاوله اخيره لكن بشرط اننا نرضى بقرارهم بعد كذا ولانضغط عليهم شرايكم ..
الكل ساكت وخالد وسلطان وعبدالله متفقين على هالحل مع سعود من قبل
ابو سلطان.. شرايك يااخوي
ابوسعود.. والله مااعرف شقول لكن بنجرب هالحل ونجبرهم ونشوف بعدها
ابو خالد. . الله يهديهم
الكل ...امين ..
ابو خالد.. ان شاء الله بكرا الفجر نمشي للمزرعه
الكل .. ان شاء الله
وطلعوا الكل بعد مااتفقوا انهم يجبرون رغد وبدر انهم يرجعون لبعض وكل شئ بيتم بالمزرعه الي بيجلسون فيها يومين

انتهى الجزء السابع..

المواضيع المتشابهه لموضوع: رواية رغد وبدر كامله لموضوع: رواية رغد وبدر كامله
الموضوع	كاتب الموضوع	المنتدى	مشاركات	آخر مشاركة
رواية اولاد الافاعي كامله	البارونة	همس للقصص وحكايات وروايات	49	27 - 10 - 2024 08:34 AM
رواية طلبتك لا تحاكيني كامله	سجات التهاويل	همس للقصص وحكايات وروايات	331	8 - 6 - 2018 01:05 PM
رواية الا ليت القدر كامله	نَقاء أنامِل	همس للقصص وحكايات وروايات	71	7 - 9 - 2014 02:20 AM
رواية شغب بنوته كامله	نَبض♡~	همس للقصص وحكايات وروايات	16	16 - 2 - 2014 05:50 PM
رواية ارادة رجل كامله	ادمنت تعذيبك	همس للقصص وحكايات وروايات	35	22 - 4 - 2012 01:48 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع