رواية رغد وبدر كامله

30 - 8 - 2014, 08:56 PM

أيامها تمر من غير أي ذكرى اليوم بكرا نسخه منه ماكانت تحلم بأي شئ
اي شئ يغير حياتها حتى بالنت كانت تشترك بمنتديات وتكتب من باب التنفيس عن المشاعر المكبوته احيانا تكتب الحب لكن حب
نازف حب مجروح دائما تكتب الجانب السلبي لاي قصة حب ماكانت قادره تعيش الحب حتى بحروفها ..
لكن أمل الحياة قلب كل هذا الوضع عند عبير ..
عبدالله دخل لحياة عبير فجأه وغيرها بدلها بدأ يزرع الأمل بحياتها بشكل حلو والاجمل انه محترم ولاتعدى حدود الادب معها لكن كيف صار هذا..بالبدايه بعد ماقدر عبدالله انه يتكيف مع اعضاء المنتدى وكسب اعجاب الاغلبيه بأخلاقه وجمال شعره بدأ يكتب وبشكل مختلف عن اسلوبه بالمنتديات طرح موضوع بأسم" الامل بين بين رموش العين " وكان يحمل فلسفه غريبه جميله للأمل من خلال تصوير الالتقاء
والاحتضان بين رموش العين رغم ان البعد لايتجاوز الثواني تكلم عن الامل بالحياة حتى بالثقه الامل موجود فكيف بحياة نحن حكمنا عليها بأنها شبه مستحيله او حزينه ..عبير تأثرت كثير بكلام عبدالله وبدأت سلسلة الردود الرائعه بين طرفي نقيض احدهم يطلب الأمل والاخر فاقد له ..وهكذا استمر عبدالله يكتب ويكتب لكن مالذي دفع عبدالله لهذا التصرف او الرحمه او الشفه او احساس الشاعر او احساس اخر
بالبدايه عبدالله اندفع لتسجيل حتى يزرع الامل بحياة انسانه فقدته لكن بعد الاشتراك والحوار والمتابعه اعجب عبدالله بعبير كثيرا اما عبير
كانت تقاوم احساس جعلها بصراع كبير بين هذا الاحساس وبين الشئ الذي تربة عليه ..
اصبحت تنتظر لكلمات عبدالله لكل ردوده لكل حضور له لكن جعلت هذه اللهفه دفينه بقلبها لايعلمها الا الله حتى ريم ماكانت تدري عنها
لكن عبدالله توقف عن الكتابه بالمنتدى وبشكل مفاجئ وهذا التوقف غير بأموور كثير ...

30 - 8 - 2014, 08:58 PM

اما في بيت سعود ..سعود كان سرحان ويفكر بـأخوه بدر وكيف انه مصعب حياته بتقيد مشاعره
امل....سعود شفيك اليوم ماانت طبيعي
سعود...سلامتك بس بسألك رغد كيف وضعها مع بدر
امل ترددت تقول له او لا لكنها بالاخير قالت......ان شاء الله انها مرتاحه لكن يحتاجون وقت
سعود...ان شاء الله
سكتت امل لانها تعرف سعود اذا ماتكلم عن الموضوع يعني مابيقول شئ خلاص
شوي وتدخل عليهم ريم
ريم...السلام عليكم
سعود وامل.....وعليكم السلام
سعود....نور البيت والله
ريم..تسلم منور بوجودكم
ريم....وين الاخ المحترم السيد سالم لان المرسوله من الشيخه ام سعود وصلت
سعود...هههههههههههههههه خلاص ولايهمك بنخليه يجلس عندك على طول حتى ماتتعبين
ريم.....لاالله يخليك لولدك ويخليه لكم
امل....انتي حصلي واحد خفيف دم مثل سلوم حبيبي
ريم....ايه ان شاء الله ترى انتي ماخذه مقلب كبير بولدك
سعود....ريمووه ترى انتي تهينين ولدي لو سمحتي لاتجرحينه
ريم.....مع السلامه بقول لامي مارضوا يعطوني ولدهم وراحت بتطلع
امل.....ريييييييم تعالي حرام مالي خلق انااجيبه
رجعت ريم وهي تضحك ماتمشون الا كذا
اخذت سالم ورجعت للبيت وهي راجعه صادفتها رغد واخذت منها سالم ودخلت للبيت
رغد....السلام عليكم
ام سعود ....وعليكم السلام
رغد...شلونك خالتي
ام سعود..الحمد لله انتي شلونك وبدر شلونه
رغد...الحمد لله بخير هذا سالم وصل
ام سعود...ان شاء الله عقبال مايوصل سالم ولد بدر
رغد ..ان شاء الله ادعي لي ياخالتي
وهنا دخل بدر وسلم على امه واخذ سالم بحضنه
ولاكان موجود غير بدر ورغد وام سعود قالت ام سعود بتكلمهم
ام سعود.... بدر ابوي
بدر..سمي الغاليه
ام سعود...رغد بنتي اقربي عندي واسمعوا شبقول لكم
بدر..امري يمه تفضلي
ام سعود..انتم الحين لكم الحين حول التسع شهور متزوجين بس انا مااشوفكم مرتاحين
بدر..افا يمه من قال الحمد لله مرتاحين
رغد..الحمد لله خالتي مرتاحين ومبسوطين

30 - 8 - 2014, 08:58 PM

ام سعود..بدر انت ولدي ورغد ربيتها على يدي مثل بناتي اعرفكم اذا تمثلون او انكم صادقين اسمعوني لين اخلص كلامي وعقب كييفكم
انتم قبل ماتعرسون انتم عيال عم والمفروض كل الي صار بينكم مايكون بس الشيطان الله يعيذنا منه وانتم الحين متزوجين والمفروض
انكم خلاص ترضون بالمكتوب لكم وبعدين تسع شهور يكفي نبي ولد يفرحنا ويفرحكم ويخليكم على قلب واحد اما العناد الي فيكم
اتركوه عيب انتم الحين كبار ومتزوجين مابغصبكم على شئ بس الي يصير بينكم مايرضيني ولايرضي امك يارغد اذا شفتيها تضحك
ومبسوطه قلبها محروق على بنتها الي سبحان من غيرها ليه ياابوي اذا بدر مقصر عليك بشئ انا مثل امك قولي لي او قولي لامك
مايصير يارغد شوفي جسمك شلون صار الى متى بتستمرون كذا وانت يابدر السهر يابوي المفروض تخففه انت متزوج الحين
سكتت ام سعود لما حست انا رغد عيونها غورقت بالدمع اما بدر كان ساكت طوال الوقت قامت ام سعود وقالت..الله يهديكم
ولاظل غير بدر ورغد رغد كانت تحاول تحبس دموعها اما بدر كان مقتنع بكلام امه لكن كسرت خاطره رغد وقام عندها
بدر..نزل لمستوى رغد ....رغد لاتحبسي دموعك
وفعلا نزلت دموعها وحز بخاطر بدر الي يصير بهالانسانه معقوله انا عملت هالتغيير كله فيها
بدر...تعالي رغد نروح للبيت ويصير خير
قامت رغد وطلعت مع بدر لبيتهم دخلوا للبيت رغد هدت شوي وبدر قال بخاطره خليني اتكلم معها
بدر..رغد ابي اسألك ممكن
رغد ورفعت عينها ..تفضل
بدر....انتي ليه تغيرتي الكل يقول انك قبل غير عن الحين ابي اعرف السبب ..؟؟
رغد تقول بخاطرها شقول لك الحين.....لاماتغيرت لكن طبيعي ببداية زواج لازم شويه تغيرات بسيطه هم يبالغون
بدر ....لا يارغد انتي عشتي معي سبع شهور انسانه ورجعتي لي انسانه ثانيه وبصراحه الثانيه اجمل لكن الي ابي اعرفه
تغيرتي لكن رجعتي مثل ماكنتي ببداية زواجنا ليه
رغد حست انها تعبت ونزلت دموعها وقامت وقالت....اسأل نفسك وراح تحصل الاجابه عن اذنك تعبت خلاص حرام
وهي طالعه مسكها بدر.....لا يارغد فهميني شتقصدين
حاولت تتكلم ماقدرت دموعها اثرت بشكل كبير على بدر ابتسم وقال ....مافيه شئ يستاهل دموعك حتى انا اطلعي ارتاحي
ويصير خير يالله ..
طلعت رغد وظل بدر للعصر وبعدين طلع ولاشاف رغد

30 - 8 - 2014, 08:59 PM

في بيت ابو خالد .. ام خالد وابو خالد وامل عندهم وخالد توه داخل عليهم

ام خالد..ياوليدي متى بتفرح قلبي والله هالبيت يبي عيالك يكسرونه ويلعبون فيه
خالد..ههههههههههههه يكسرونه ياام خالد
ابوخالد..ايه ياوليدي فرح قلوبنا وريحنا
امل..خالد حبيبي خلاص عذبتنا بكون عمه تزوج
خالد..يقول بخاطره الظاهر انه آن الاوان اني اريح قلوب هالشياب
خالد..ان شاء الله تأمرون لو تبون اتزوج اربع بليله وحده
الكل..ههههههههههههههههه
ام خالد.. يعني اخطب لك وليدي..؟؟
خالد ويفكر.. الغاليه انا في بالي بنت الحلال لكن قولي بشوف من مفكره فيه الغاليه
امل..ليه خلاص قول لنا انت منو تبي ..؟؟
خالد..لابعرف ذوق امي اول
ام خالد..ماغيرها شيخة الحريم
امل.. عرفتها هههههههههههههههه
ام خالد.. اكيد بتعرفينها بسم الله عليها زين وعقل وخفة دم
خالد..هذي نادره منو هي ..؟؟
ام خالد.. ريم بنت عمك
خالد من المفاجأه ..هههههههههههههههههههههههه هههههههههههههههههههههااي
الكل استغرب من ضحكة خالد...
ابو خالد ..خاالد ليه الضحك امك ماقلت اسم الخادمه عشان تضحك
امل..صادق ابوي
خالد.. اسف الغالي والله مو قصدي لكن الوالده قالت الاسم للبنت الي اخترتها
ام خالد تناظر بخالد وامل قامت وقمزت عنده
امل..احلف خالد
خالد وبأبتسامه ..من غير حلف انا خالد ابي ريم بنت عمي
ابوخالد.. والله فرحتني وكفوا ولدي
ام خالد.. خلاص نروح الاربعاء نخطب لك
خالد...لا ..اقصد انا ابي امل تعرف رأي ريم أول
امل..وبصوت واطي ..موافقه
خالد سمعها ..عن اذنكم امل تعالي غرفتي شوي
دخلت امل مع خالد غرفته
خالد..ليه قلتي موافقه ليه واثقه
امل..بصراحه خالد أنا اعرف ريم احس انها مو رافضتك صدقني احساس بس
خالد..ابيك تتأكدين
امل..اذا رائي يهمك تقدم وريم مابترفض صدقني
خالد..وبأبتسامه ..واثقه الشيخه
امل..والابتسامه على وجهها ..طبعا اخوي ماهو اي احد
طلعت امل بيتها بعد مااتفقت مع اهلها انهم يخطبون ريم الاربعاء

30 - 8 - 2014, 08:59 PM

رجعت امل للبيت لكنها دخلت بيت عمها ولاحصلت احد سألت الخدامه وقالت البنات بغرفة ريوف
وام سعود راحت عند اختها طلعت امل عند البنات لكنها تفاجأت بشكل رغد
امل..سلامات رغد شفيك ..؟؟
وكانت رغد نايمه على سرير ريم وشكلها مره تعبانه
ريم..من العصر وهي على هالحال حرارتها مرتفعه وصوتها مختفي والانفلونزا شديده عليها
امل وبأ الاهتمام على وجهها ..طيب شقال الدكتور
ريوف..وبكل خيبة امل..ماوافقت تروح
امل..شوووووووو ماراحت للمستشفى وبدر ساكت لها
ريم..مايدري ماشافها لما طلع كانت ببداية التعب وهو معزوم اليوم واتوقع يتأخر
امل وفعلا عصبت عالبنات ..وتتوقعون انه بيرضى عن تصرفها او انتم
ريوف وبأستسلام ..ماوافقت
رغد وتأشر بيدها ..لا وبصوت مبحوح مافيني شئ لاتنزعجين
امل..انتم ماعندكم سالفه وطلعت
رغد وتقول لريوف ..شوفيها لاتتصل الله يخليكم شوي واقوم مافيني شئ وبخاطرها تقول انتم ماتعرفون شقلت له اليوم
وطلعت ريوف لامل وحصلتها تكلم
امل..خواتك والله ماهم صاحين البنت مرره تعبانه
نوف ..شوفي انا زوجي الحين بيطلع لدوام بقوله يحطني عندكم وبكلم على بدر اوكي
امل..اوكي باي
ريوف..امل بتزعل رغد
امل..تزعل ماتحس بنفسها الى متى تداري بدر هو زوجها ومسؤل عنها
ريوف..والله حاولت لكنها حلفت مانتصل عليه
امل ..ماعلينا خلينا ندخل ولاتقولون لها شئ
دخلوا البنات وشوي وتدخل نوف وتسلم عليهم وتجلس جنب رغد
نوف..رغد حبيبتي ليه تعملي كذا بنفسك ..بدر زوجك ومسؤول عنك ياعيوني مايصير الي تعمليه الى متى
وانتي تتنازلين عن حقوقك يارغد لاتفكرين باليوم وبس فكري ببعدين حياتك مع بدر هي كل عمرك مو كم يوم
امل..بروح اعمل لك عصير ليمون وطلعت من عندهم وهي نازله سمعت صوت بدر يكلم الخدامه وتغطت
ونزلت ..

30 - 8 - 2014, 09:00 PM

بدر..هلا ام سالم وينها رغد
امل..بغرفة ريم روح شوفها
مشى بدر بسرعه واستغربت امل خوفه هل من باب انه زوجها او فعلا رغد اصبحت تعني شئ لبدر دعت لهم بالتوفيق وراحت
للمطبخ ..بدر طق باب الغرفه وفتحت له ريم ودخل ولانطق ولاقال ولا كلمه ؟..رغد حاولت تعدل جلستها لكنه قرب عندها
وطلعوا البنات ولاظل غير نوف الي مسكت رغد يدها تمنعها حتى ماتطلع
بدر..جلس عالسرير وحط ايده على جبين رغد ..سلامات رغد
رغد..وصوتها ماينسمع ..الله يسلمك
بدر..نوف الله لايهينك هاتي عباية رغد ..
رغد..لابدر مافيني شئ
بدر..رجاء ماابي نقاش وكلامنا بعدين اذا رجعنا
مسك رغد وساعدها لحد ماركبت السياره وفعلا كانت تعبانه ولاهي حاسه بشئ وصلوا المستشفى والحمد لله
التشخيص كان انفلونزا حاده واعطوها مضادات وخافض للحراره ورجعت للبيت بعد مااخذت الابره الخافضه
وصلوا البيت وساعد بدر رغد لحد مانامت على سريرها
بدر..هارغد كيفك الحين
رغد وتحاول تبتسم ..الحمد لله اصلا قايله لكم من اول مافيني شئ
بدر..وجلس قريب منها ..رغد الي صار اليوم ماابيه يتكرر رجاء انا زوجك ومسؤل منك
رغد..ماحبيت ازعجك تعب بسيط
بدر عصب ..اي بسيط وحرارتك اربعين المهم مو هذا وقته انا بروح اقول لهم يعملوا لك شئ تاكليه عشان العلاج
رغد.لابدر ماابي شئ مو مشتهيه
بدر وهو طالع ..مو بكيفك
ابتسمت رغد وهي تقول لنفسه هذي الميزه الي فيه انه مايحب يقصر بواجباته لكنه مقصر بمشاعره
اليومين الي مرت على رغد وهي تعبانه كان بدر مايطلع من البيت ويحاول يكون قريب منها لكن باليوم الي بدت صحة
رغد تتحسن سمعت الخبر الي زادها تعب جسمي ونفسي ..

30 - 8 - 2014, 09:00 PM

دخل بدر لبيت ابوه ورغد كانت عندهم وسلم والكل لاحظ سكوته
بدر وبكل قوه ..ياجماعه انتم ناس مؤمنين بالله
رغد وعورها قلبها وقامت عنده لانه من اول مادخل حست انه يناظرها بشكل مختلف
رغد ودموعها تجمعت بعيونها..بدر..اهلي فيهم شئ
ام سعود..لااله الا الله قول ياولدي يالله تسمعنا خير
بدر..عبدالله صار له حادث وهو بالعنايه
رغد خلاص انهارت ونزلت دموعها ..ليه ليه يارب
حضنها بدر..استغفري الله مايجوز هذا قضاء وقدر وان شاء الله مافيه الا الخير
لاول مره تحس رغد بالامان الحقيقي بحضن بدر وتحس انه فعلا واقف معها بكل مشاعره واحاسيسه
حاول بدر يهدي رغد لكنها اصرت انها تروح تشوف اخوها واخذها بدر للمستشفى واول ماوصلت حصلت
كل عمانها واخوها وخالد وسعود وامها وراحت بسرعه وارتمت بحض امها وظلت تصيح بعدين راح لهم سلطان
سلطان...ياجماعه اذكروا الله ان شاء الله مافيه الا كل خير
رغد من بين دموعها .....سلطان هذا عبدالله حب البيت كله
سلطان..الله يقومه بالسلامه تعالوا ارتاحوا انتم بالاستراحه واذا طلع الدكتور بطمنكم
وراحت رغد مع امها وطلع الدكتور وطمنهم وراح بدر يطمن رغد
بدر....رغد
طلعت رغد بسرعه...طمني بدر
بدر بأبتسامه .....تطمني عيوني طلع الدكتور ويقول الحمد لله بكرا الصباح اذا الله اراد بيطلع من العنايه
رغد...احلف
بدر ومقدر حالتها..والله العظيم
رغد..يعني مافيه شئ ..
بدر..كسر بسيط بيده وجبروه لكنه غايب عن الوعي يقول الدكتور بكرا يتحسن ان شاء الله
رغد..الله يطمنك يارب بروح اطمن امي
بدر..طيب وبعدها يالله وبكرا الصبح اجيبك تشوفيه
رغد..بس
يقاطعها بدر ...رغد جلستكم مالها فايده نواف بيظل معه وسلطان بيرجع مع عمي
رغد....بدر طلبتك
بدر..ـآمري
رغد..بروح بيت اهلي اليوم
بدر..يريحك هالشئ

30 - 8 - 2014, 09:01 PM

رغد..بكون جنب امي الله يخليك
بد...ولايهمك نامي الليله عندهم
رغد..تسلم لي ياعمري وراحت لامها تطمنها
رجعت رغد بيت اهلها وظلت مع امها الي ماقدرت تنام من كثر خوفها على عبدالله حتى ابوها ماقدر
اما سلطان كان بالمجلس دخلت عليه رغد
..رغد......مو حلو البيت من غيره
سلطان...الحياة كلها مو حلوه من غيره
رغد..الله يشفيه يارب
سلطان.......تعرفين رغد عبدالله رغم هدوؤه لكن له حضور بكل مكان له هاله من الحب والتميز عند الكل
رغد.....تعرف سلطان ودي اروح الحين اشوفه
سلطان......لارغوده روحي صلي اذن الفجر وانابروح للمسجد والصبح كلنا نروح عنده
وصلت رغد ونامت والساعه سبع دق جوالها وردت من غير ماتنتبه لرقم لانها تعبانه كثير
رغد....الو
بدر..صباح الخير
رغد..ولاهي قادره تركز تحس انها بحلم .....هلا
بدر وحس بخووف على رغد ....رغد نايمه او تعبانه ....
استوعبت رغد لما احتد صوت بدر......لابدر مانمت الا بعد الفجر
بدر...زين اسمعي سلطان يقول انهم ماصحوك لانك نايمه تحبين امر الحين او تنامين
رغد..لاالحين بروح اشوف عبدالله شلونه الحين
بدر.. الحمد لله مافيه الا كل خير اوكي كم يبي لك حتى تجهزين
رغد..بدر فطرت
بدر وبأبتسامه .....لا منو يفطرني
رغد...سامحني عيوني شرايك تجي ونفطر هنا ونطلع
وبدر بدأ قلبه يرق لها ......والله مو شينه خلاص شوي وانا عندك يالله باي
رغد.....باي
قفلت رغد وضحكت وقالت انت عمري والله
قامت رغد واخذت لها دش سريع ولبست جلابيه ورفعت شعرها ونزلت تجهز الفطور وصل بدر وفطروا وبعدين راحوا للمستشفى
ولما وصلوا المستشفى صادفوا سلطان عند باب الغرفه وسلم عليهم
سلطان..رغوده اسمعي لاتحضنين عبدالله تسمعين
رغد وبخوف ..ليه شفيه

30 - 8 - 2014, 09:02 PM

سلطان..مافيه الا الخير لكن يده مكسوره ومجبره والثانيه عنده تمزق بالكتف حاسبي عليه
رغد.....طيب خلاص ابعد بروح اشوفه
دخلت رغد الغرفه ولاحصلت غير امها وعبدالله اول ماشافت عبدالله نزلت دموعها وهو ابتسم لها قربت عنده وسلمت عليه
رغد ودموعها على خدها..سلامات الغالي ماتشوف شر
عبدالله وبنفس الابتسامه الهاديه..الله يسلمك من كل شر عيوني ههههه ليه الدموع الحين مافيني شئ
رغد ولاقدرت تحكي من الصياح ودخل بدر وسلطان وسلم على عبدالله وام سلطان وانتبه لرغد انها تصيح
بدر..رغد خلاص عيوني شوفي عبدالله مافيه شئ قدامك
سلطان...لاتحاول مابتسكت الا اذا خلصت دموعها مع انها ماتخلص ابدا
ام سلطان...خلاص يابنتي تعوذي من ابليس هذا اخوك بخير
رغد وهي تمسح دموعها ...خلاص مابصيح حتى الدموع حرام
سلطان.....ههههههههههههههه لا مو حرام بس دموعك غاليه صح بدر
بدر وهو يناظر رغد..صح دمعة رغد غالييه كثير كثير
سكتت رغد وظلت تتأمل عبدالله اخوها كيف هالانسان المميز بحضوره وكلامه وحتى غضبه
عبدالله اذا عصب مايقول ولاكلمه يسكت ولايحب يتكلم مع اي شخص معصب لانه يعرف ان الانسان
معرض لانفعالات كثير ممكن تكون سبب ببعض التصرفات الغير عقلانيه
عبدالله وهو مبتسم .....بدر تعال خذ زوجتك شوفها ماهي طبيعيه اليوم الظاهر تتأملني على بالها انت
بدر.....هههههههههههههه انا من الصبح اقول مو طبيعيه
رغد وتناظر بدر من طرف عينها .....
سلطان..يمه يالله اوصلك البيت انتي ورغد لان الشباب بيجون يشوفون عبدالله
ام سلطان ...بروح بس ترجعني العصر
سلطان..من عيوني
بدر..خالتي شرأيك تجين معنا للبيت والعصر انا اوصلك
رغد وهي مبسوطه ..الله يخليك يمه تعالي عندنا
ام سلطان..خلاص بس اشوف ابوسلطان اول
بدر..ولايهمك انا بتصل فيه واقوله يجي يتغداء عندنا
ام سلطان ..خلاص ياولدي شورك وهداية الله
بدر..يالله مع السلامه واشوفكم العصر

30 - 8 - 2014, 09:08 PM

طلع بدر مع رغد وخالته ووصل لبيت ابوه ونزلت ام سلطان لبيت ابو سعود ورغد راحت لبيتها تبدل ملابسها

دخلت ام سلطان وسلمت على ام سعود والبنات
ام سعود ....بشرينا عن عبدالله
ام سلطان..والله انه تعبان شوي والدكتور مابيطلعه قبل اسبوع
ام سعود..ان شاء الله بيطلع بالسلامه
ام سلطان ..ان شاء الله
رغد..السلام عليكم وسلمت على خالتها وجلست عند البنات
ريم....رغد الحمد الله على سلامة عبدالله
رغد..الله يسلمك
رغد وتأشر على ريووف .....ليه ساكته
ريم وبصوت واطي..ماادري من الصبح وهي كذا ساكته
رغد......ريوف ..ريوف
ريوف ومن غير نفس......نعم
رغد..افا شفيك عيوني
ريووف..مافيني شئ
رغد..مو علي هالكلام
ريم..انا بروح اشوف امل واجيب سالم وطلعت وتركت رغد وريوف لحالهم
دخلت بيت سعود ولاحصلت احد وسألت الخدامه قالت لها روحي هاتي لي سالم من عند المدام
وجلست بالصاله تنتظر سالم الصغير وفجأه رن التليفون شافت الرقم وعرفته هذا رقم الخيمه اكيد سعود.
ريم...هلا والله بأخوي حبيبي والله
المتصل............
ريم...افا والله ماعجبك صوتي
خالد......هلا ريم
ريم من الروعه وقفت بمكانها وتحس بتصيح خلاص
خالد.....الوووووووو
ريم..احم الوو مين ..؟؟( على بالها ماعرفته)
خالد وبأبتسامه .......خالد
ريم..هلا خالد شلونك وشلون عمي
خالد ومبسوط ......الحمد لله انتم شلونك
ريم..بخير لحظه بنادي لك امل
خالد......لا ريم خلاص ماله داعي احساس ينهي احساس
ريم مافهمت قصده وسكتت
خالد.....ههه بااي ريم
ريم وهي ماسكه السماعه بيدها وبنفس مكانها
امل..بسم الله الرحمن الرحيم شفيك
ريم..تناظر امل وودها تقول اخوك مو طبيعي اليوم.......مافيني شئ اتصل خالد اخوك
امل وبخاطرها تقول اكيد خالد قال لها شئ البنت مو طبيعيه........طيب قفل الحين..؟؟
ريم..ايه قفل انا بروح بيتنا تعالي رغد ومرت عمي عندنا وطلعت وضحكت امل وراحت تتصل بخالد

المواضيع المتشابهه لموضوع: رواية رغد وبدر كامله لموضوع: رواية رغد وبدر كامله
الموضوع	كاتب الموضوع	المنتدى	مشاركات	آخر مشاركة
رواية احبها ولكن كامله	سجات التهاويل	همس للقصص وحكايات وروايات	49	8 - 6 - 2018 01:16 PM
رواية طلبتك لا تحاكيني كامله	سجات التهاويل	همس للقصص وحكايات وروايات	331	8 - 6 - 2018 01:05 PM
رواية الا ليت القدر كامله	نَقاء أنامِل	همس للقصص وحكايات وروايات	71	7 - 9 - 2014 02:20 AM
رواية شغب بنوته كامله	نَبض♡~	همس للقصص وحكايات وروايات	16	16 - 2 - 2014 05:50 PM
رواية ارادة رجل كامله	ادمنت تعذيبك	همس للقصص وحكايات وروايات	35	22 - 4 - 2012 01:48 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

رواية رغد وبدر كامله

همس للقصص وحكايات وروايات