رواية وش حيلتي اذا الشوق صوبك دعاني كاملة

25 - 11 - 2014, 04:17 PM

وجلس يقولها وش صار ,,
ساره:الحمدلله على سلامتك ,, وترى مو قليل الي جا حرمتك
نايف:ادري واللي قاهرني ان اهلها يحطون اللوم علي
ساره:ماعليك منهم اهم شي حرمتك
نايف:حرمتي صارت بارده مو مهتمه فيني ,, تخيلي لي يومين هنا ما اتصلت,,
حست بالقهر ساره:وقلت تبي وحده تهتم فيك ومالقيت غير ساره!!
نايف/لحظه لحظه عن التهور ترى ماكلمتك الا لأني حسيت اني ابيك لي أسابيع افكر فيك ,,عاد اليوم قلت لازم اكلمك
ساره وقفلت معها:طيب خلاص انا بسكر وراي دوام مع السلامه
نايف:ساره عن الخبال
ساره:مع السلامه نايف قفلت معي
نايف وعرف مزاجيتها وعلى خبره فيها بتسكر وبعد ساعه بتتصل:مع السلامه

صعد نايف لغرفته وكانت اخر المكالمه مضايقته بس عايش على امل انها بتتصل وتروق,,زي قبل
بس هيهات كانت ساره شابه في عمرها حريقه من العصبيه :مكلمني عشان زوجته مو معطته وجهه اناااااااااا على اخر عمري اصير سبيل وجبارة خواطر ,,استاهل ويني معطته وجه
وجلست تاكل بعمرها وتلوم على غبائها
اما نايف كان منسدح ينتظرها تتصل ,تذكر زوجته نجود اللي المفروض يسكر جواله بس لا اخاف ساره تدق,,تدري ياولد بالعنتها نجود قاهرتن خلها تدق تلقاه مفتوح عشان تتأدب وتغار علي,, ونام وهو منسدح بعد ما حفظ رقم ساره ومسح الرقم من الصادر والوارد,,ولوو ولد خالتها جنبي!!

في الرياض
فاطمه:يؤيؤيؤ حرمه..منهي؟
نجود :مدري تقول في الاستقبال وان نايف ناسي جواله عندها
فاطمه :وجع يضرب بطنها ليه ترد عليك؟
نجود:تقوله زي جهازي ,, ويمكن اتوقع ردت لقافه شافت اللي داق رقم مو مسجل عنده
اتصلت من رقم بيتنا مو جوالي كان مخلص شحنه
فاطمه:دقي شوقي بترد؟؟اخذي جوالي
نجود:قلت لها تسكره ودقيت لقيته مقفل>>>(حوله نايف لمغلق عند انشغال الخط )
فاطمه:مدري قلبي مو مستريح لهالسالفه,,
نجود:لحظه بتصل,,
دقت على رقمه من جوالها,,لقته مفتوح

صحى نايف على النغمه الهاديه فرح يحسبها ساره ,,بس طلعت نجود لا شعوريا عطاها بيزي

نجود:الحقييييير عطاني بيزي
فاطمه وهي ترمي السم عليها:شوفي وش يسوي عططاك بيزي

وطلعت فاطمه من غرفتها ,, وتركت نجود وراها مشتته بين كلام اختها وبين ثقتها بزوجها
نجود:مستحيل يسويها نايف ويخوني
ودمعت عيونها ورجعت تدق,,
دق الجوال ورجع نايف للنوم ,,وصحاه الجوال لقاها نجود
نايف:اوووف وش تبي,,الو
نجود:نايف وش تسوي
نايف:داقه بنص الليل وش اسوي يعني نايم
نجود:ليش تخانقني؟
نايف:نجود فيتس شي انتي ولا الولد
نجود:لا
نايف:طيب انا لي يومين مانمت
نجود:قبل دقيت درت علي حرمه وبعدها مقفل شلون جاك الحين
نايف:لاحول ولا قوة الا بالله ناسيه تحت وكان مقفل وفتحته
نجود: وش جاب الجهاز لك وانت نايم
نايف ووصلت معه :جتني الموظفه ببكيني ووسعنا الصدر وعطتني الجوال ,,وش هالاسئله اللي مالها داعي اها �

25 - 11 - 2014, 04:18 PM

نايف ووصلت معه :جتني الموظفه ببكيني ووسعنا الصدر وعطتني الجوال ,,وش هالاسئله اللي مالها داعي اها خليني انام ولا تدقين انتظر مكالمه من السفاره ياويلتس ان دقيتي
نجود وهي تبكي:طيب يانايف الحساب بعدين
نايف:الحساب يوم الحساب
وسكر الجوال وكان من جد حاقد عليها

وسعود جنبه يطالعه:جعلني ماني حرمتن لك ,,وش جاك عليها
نايف:اذتني وش تسوي وش تفعل توها تفرغ تدق يومين ما اتصلت
سعود:الله يعين
نايف:لايطريك تعرس
سعود:لا بالله بعرس تطلعون الشين وتخشون الزين يالرجال
نايف:اعرس محدن خسران حريته غيرك
سعود:والله ام فيصل تحتريني وخاصه ان عروستي جاهزه ولا ابيها تروح عني
نقزه قلبه نايف:من عروستك؟تقرب ك؟
سعود:بتعرف لا عزمتك اها نام ازعجتني انت وحرمتك

بس وييييين ينام نايف طار النوم مره وحده,,اما عاد لو ياخذ سعود ساره ياويل حالي ويلاه,,
جلس نايف يضرب افكار ويقسم افكار ,, يعني انا ابي ساره؟؟ يوم صار لزوجتي اللي صار اروح ادور على زوجه ثانيه؟؟ولا بخلي ساره عشيقه زي قبل؟؟ وش أبي انا؟؟ اوووووووووف

تلحف وغمض عيونه والتعب نومه,,نام الرجل تارك أنثتين يفكرون فيه
الاولى زوجته:ليش نايف يتكلم معي كذا,, وشلون جاه الجهاز,,مهما كان تعبان المفروض مايكلمني ويقول هالكلام,,نايف طيب وذرب مو همجي ,,!!

الثانيه ساره:ليش داق,,حاب يتسلى ولا بعد خويه بالدرب سعود ,,الله يستر وش بيصير,, وحنان مع اخوه معقوله نايف بيرجع لي؟؟
لالا يارب انا دعيتك من زمان بس الحين ما أبيه ما أبيه يارب خله مع مرته ,,ويارب ينساني وانساه

بعد ماكانت تدعي (يارب زي مارجعت موسى لأمه وقرت عينها فيه ترجع لي نايف وتفرحني)

بس الحين انهت نايف من حياتها ,,لكن لازالت مهدده بالخطر برجوع للحب وأيام الخوالي

اممممممممممم وش تتوقعون بترجع ساره لنايف ,؟؟؟ولا بتفتح صفحه وحياه جديده مع سعود؟؟ِ

25 - 11 - 2014, 04:19 PM

في بيت ابو ناصر

كانت ريم تكلم فهد
ريم:فهد وربي ما أقدر اجيك ,, والله قوويه
فهد:الحين قوويه مو قبل قلتي عادي بتجين بالعياده اشوفك؟
ريم:ايه كنت مندفعه
فهد:قولي ماتحبيني وخلاص
ريم:لالالا وربي احبك واعزك بس
فهد:ريم اذا تحبيني صدق تعالي وسويها مفاجئه لي ,, من متى وانا اكلمك.. ما اعرف غير اسمك وصوتك وعيونك
ريم:فهد لاتصير عصبي
فهد:انا مو عصبي بس انتي عصبتيني ,,مره تقولين بجي ومره لأ
ريم وبدت تبكي:خلاص خلاص مع السلامه انت صاير كبريت
فهد:باللي يحفظك

وسكر السماعه وهو منقهر من تصرفاتها,,مافي بنت سحبتني مثلها كل البنات حدهم يومين ان ماشفتهم ولا قطعت علاقتي فيهم,,بس هالزفته تعبتني معها,, اووووووووف

اما ريم كانت تبكي على غلطتها انها كلمته:أحسن استاهل
دق جوالها وكانت بنت خالتها نوره
ريم:هلا نوري
نوره:شفيك
ريم:مافيني شي
نوره:الا صوتك تبكين
ريم:تعالي لي نوري تكفين
نوره:بسم الله وش صاير,,اخوانك فيهم شي؟
ريم:لااااااا انا اللي فيني تكفين تعالي متضايقه
نوره:طيب امي بتجيكم بجي معها يالله بلحق عليها قبل لا تطلع
ريم:اوكي

جلست ريم تلوم نفسها ,, وكيف كانت غبيه ان ريم بنت الشيوخ اكلم شباب ولا بعد دكتور اخوي يافشيلتي مايندرى عنه اذا ماجيته اخاف يهددني ياويلي وش اسوي

وبعد نص ساعه وصلت نوره سلمت على خالتها بسرعه وصعدت فوق لريم

نوره:السلام
ريم رجعت تبكي:نوووره تكفين هزأيني
نوره:وجع وش صاير ,, وش مهببه انتي

25 - 11 - 2014, 04:19 PM

علمتها ريم ونوره كل شوي تشهق ووتحط يدها على راسها من جرأة بنت خالتها ,,شلون قدرت تسوي كذا
نوره:نعنبوووك وش اللي سويتيه,, لو انتس صايعتن بالبالتوك اهون ولا مع واحد يعرفك
ولا بعد يعرف اهلك ياااااااخبلك شلووووووووون قدرتي شلووون
ريم:انا ماكلمته بنية بوسع صدري معه,,كلمته لاني حسيت بعيونه مشاعر خاصه لي وانا بعد
نوره:شوفي يا ريم لو انه يكن لك مشاعر بيجي من الباب مو الجوال
ريم:انا اللي كلمته
نوره تقاطعها:هذا بلا ابوك ياعقاب حتى لو انه ناوي يخطبك بعد اللي سويتيه مستحيل يفكر فيك ببرائه وعفه بالعكس بيقول اللي تاجرأت واتصلت معناته انها عندها هالسوالف
ريم وهي تبكي بحراره:بــــــــــــــس نوره خلاص لا تعذبيني
نوره وهي تضم بنت خالتها وتهديها:انا لو ما احبك كان قلت كلميه ووسعي صدرك بس هالوضع لازم ينتهي وبأقل فضايح
ريم :طيب وش اسوي
نوره:اتصلي الحين وقولي له اللي بيننا انتهى ولاعاد تدق ,, وان اتصلت بروح لأخوي واقوله عن كل شي خليه يعرف انك مو خايفه ,,قولي له ان درى اخوي مني انا ماراح يسوي شي غير خناق بس انت اللي بتاكلها,,وانت الحين مسئول عن عايله,,خليه يحس انك قويه مو خايفه منه
ريم:ما اقدر بيعرف اني خايفه
نوره اتصلي بس

اتصلت ريم على فهد اللي اول ماشاف اسمها ابتسم عرف ان الحركه اللي سواها فيها بتخليها تتصل وتعتذر ,,ولوو يافهوود خبره بالبنات انت 10 سنين صياعه جبت راس اللي ماتطري ع البال

فهد:الو
نوره تعطي بنت خالتها دفعه قويه وتشجعها وتهمس بأذنها:تخيلي نفسك بشخصية طارق ولا ناصر
ريم بنبره اول مره يسمعها فهد من كلمها ,,نفس نبرتها لما كانت تزور اخوها:الو
فهد رقع قلبه:اهلين
ريم:وينك فيه؟
فهد:بالمستشفى,,بتجين؟؟!
ريم:مشغول؟
فهد عقد حواجبه:لا
ريم:طيب اسمع مني ,, المكالمه ذي اخر شي بيننا يافهد,,انا غلطت يوم اني كلمت,, بس ما أبي اغلط أكثر من كذا,, وأكبر غلطه اني ارخصت نفسي
فهد يقطع كلامها:ارخصتي تفسك!!
ريم تكمل ولا كأنها سمعت شي :عشان كذا لاعاد تتصل على الرقم,,والي رفع سبع سموات وطمهن ان اتصلت ماعاد يرد عليك غير واحد من اخواني كانوا اثنين وصاروا ثلاث,, ولا اقول لناصر اخوي عن اللي سويته وعن غلطتي معك,, ناصر بيقدر كلامي له وبيعرف اني ندمانه مو من خوف منه لا خوف من ربي ,,عشان كذا يا فهد اللي بيننا انتهى وان اتصلت زي ماقلت لك اخواني بيردون وبعدها بقولهم من انت وش اللي بيننا
فهد كان منصدم من قوتها:تهدديني
ريم:لا ما اهدد بس اقولك اني ماراح ارد عليك,, وانت الحين مسئول عن عايله لاتحرمهم منك مالأمك وخواتك واخوانك غيرك ,,لاتخليهم يستعرون منك ويستصغرونك ,,انا ماني كبيرة اهلي بس انت العكس ,, احترم مكانتك الاجتماعيه واحترم اللي بيننا واتمنى انه مايطلع لأحد
فهد:انتي وش تخربطين ,, من الباب والس�

25 - 11 - 2014, 04:20 PM

فهد:انتي وش تخربطين ,, من الباب والسلام نترك بعض
ريم:انا غلطت وعرفت اني غلطانه ولازم ما استمر بالغلط
فهد:ياسلااااام
ريم :فهد لاتكابر تبي تلعب في غيري مليون بنت انا مو راعية لعب
فهد:لو ابي غيرك جبته بس ابيك انتي فاهمه
ريم:وانا ماني سهله عشان تجيبني ,, ولا تفكر تستخدم اسلوب التهديد ترى علي ٌ وعلى اعدائي ,,
فهد:يعني وش؟
ريم:اذا فكرت انك تصير مراهق وتسوي حركات البزران ترى انا اراهق اكثر منك ولا راح يهمني احد ,,والله يافهد ان قربت مني انا وحده بس خواتك ثلاث والله ان يطيحون بكبدك والسبب اخوهم الصايع خاف عليهم انت رجال بس السمعه لها دور
فهد:انت داقه تهددين
ريم:دامك ماتضرني ما اضرك,,خلاص انا كرهت نفسي وكرهتك ,,ولا عاد ابي اسمع صوتك
سلام

سكرت السماعه ونوره تطالعها باندهاش:قلت لك زي ناصر ولا طارق,,اخوانك متسلطين كذا؟؟
ريم:اخواني كبار ولا احد تجرأ وغلط عليهم وانا باللي سويته اطيح من قدرهم
ورجعت لنوبة البكاء من فعلتها,,ومن مجرد تخيلها ان اخوانها يدرون

ضمتها نوره وهي تهديها خلاص سمي بالرحمن ,, ما أظن انه بيتصل هو دكتور وشكله محترم مع ان الدكاتره صيع بس ماهقيته يسوي شي

ودق جوال ريم بمسج
فتحت المسج نوره (ترى كل الكلام اللي قلتيه بسوي نفسي ماسمعته,,انتي اكيد صاير لك شي ,,اول ماتهدين كلميني>>انا عارف انك تبكين )

نوره:وجع وش عرفه؟
ريم:وش اسووووووي؟
نوره:اتركيه خلاص لاعاد تعطينه وجه,, اذا مالقى منك رد بيزهق
ريم:نوره انا خنت اهلي
نوره:اهم شي ماتخونينهم اكثر من كذا
ريم وهي تضم بنت خالتها:يابعد عمري يانوري
نوره وهي تغير السالفه:ها ماقلتي لي وش اخبار طارق وصل؟
ريم وهي تمسح دموعها لان هالموضوع يفرحها:لا لسه للحين باليخت
نوره:يوصل بالسلامه ,,من زمان ماشفت خالتي مفرفشه
ريم بابتسامه عريضه:وبتكمل فرحتنا لادخلتي هالبيت
نور:!!!! هذاني داخل
ريم:لا امي اصلن ناويه تخطبك لطارق لما يرجع من كندا,,وهذاهو رجع ولا اظن امي بتعتقه الا لمن تزوجه هههههههههههههههههه
نوره:من جدك
ريم:ايه ياحظك بتاخذين اخوي
نور:لا مابي طارق ثقيل دم ودايم جاد,,ما اتوقع يعرف شي اسمه رومانسيه >>>مادرت عن سوالفه خخخخ
ريم:الرومانسيه تطلع مع الزوجه ,, بعدين وش دراك انه ماعنده رومانسيه؟؟
نوره:شوفي اخوك نايف هين مبين انه راعي حركات ,,بس طارق جامد اخاف ما اعرف اتعامل معه
ريم:مافي اكثر من جمود اخوي ناصر وشوفي مرته عليا شلون,,,,الزواج يغير
نوره:ماأدري
ريم:لحظه بتصل بنايف ,,تصدقين من سافر ماكلمته

25 - 11 - 2014, 04:21 PM

اتصلت ريم بنايف
نايف بالمغرب في مقهى الفندق:هلا ريوم
ريم:هلا اخوي شلونك:s_004:
نايف:طيب بسماع صوتك..شلون امي عساها بخير
ريم:حشى قل شلونتس انتي اول على طوول نطيت لأمي
نايف:هههههههههههههههههههههه عاد امي واحبها
ريم:وانا اختك!!
نايف:طييييييييب وشلووونتس؟؟
ريم:هههههههههههه بخير يامال الخير وامي طيبه,,قلي شخبارك انت وطارق شعلومه
نايف:انا بخير وطارق بيوصلون بكره المغرب بيجيبهم راعي اليخت المغرب
ريم باستغراب:يجيبهم,,ليه هم كم واحد؟؟
نايف بخبث:طارق ومعه بنت :s_005:
ريم وهي فاتحه عيونها :بنت؟؟***3***
نايف:ايه واخوها ينتظرها معي
ريم:سعوديه؟؟
نايف:أي نعم
ريم:كم عمرها؟؟
نايف:اتوقع كبرك يمكن او اكبر بسنه
ريم:آهاااا
نايف:احس ورى آآها ذي مصيبه
ريم وهي تلعن نفسها لانها قالت لنوره ان امي بتخطبك لطارق,,الحين طارق اكيد في علاقه مع هالبنت:نايف من وين البنت؟؟
نايف:من الخبر
ريم:وش عايلتهم؟؟
نايف:آل ....
ريم:اوووووه ماشاء الله بنت ناس معروفين
نايف:نعم
ريم:حلوه؟؟
نايف:هههههههههههههههههههه تصدقين كنت احسب نفسي الملقوف الوحيد بالعايله بعد وضيح طلعتي انتي العن مننا

ريم:ههههههههههههههههههههههههههه ايه وش اسوي انفجعت ان في معه بنت
تتوقع بيتزوجها؟؟
نايف وهو يتذكر كلام ساره :ايه لازم معه خمس شهور خير يرجع ويتركها ,,من بياخذها حتى لو مابينهم شي!!
ريم:يؤيؤ مايصلح
نايف شم ريحة خطبه:خيــــــــــــــــــر ش ناوين عليه؟؟
ريم:ههههههههههههه ياحبيلك تفهم
دق جوال نوره وراحت تكلم بعيد عن صوت ريم
ريم ترجع لنايف:امي ناويه تخطب له
نايف:لاحول خله يرجع ,,بعدين وقفوا كل شي لين يقرر هو وش تخطبون
ومنهي؟؟
ريم:نوره بنت خالتي
نايف:والنعم بس لاتتهورون انتي وامتس لين يجي طارق,,ذا طارق مو انا فقير مسكين زوجتوني على كيفكم,,والله مايحشم طويرق
ريم:لبى قلبه خله يجي هو
نايف:يالله باي جا سعود
ريم بلقافه:من سعود؟؟
نايف:اعوذ بالله ,,اخو البنت
ريم:ههههههههههههههههههه
نايف:سلام
ريم:سلامو

سكرت ريم وهي تسب وتلعن بنفسها انها علمت نوره وعشمتهاا
نوره:ههههههههههههههه خلاص الوعد باكر بايو

ريم:من تكلمين؟
نوره:مرام بنت عمي
ريم:وع ما اطيقها متصنعه
نوره:حرام تهبل
ريم :ماعلينا منها
نوره:ها شخبار اخوانك؟؟
ريم:نايف طيب وبكره يوصل طارق
نوره:طيب انا بطلع بروح المكتبه عندي تصوير مستندات وحاله
ريم:اوكي حبي
نوره وهي تسلم على ريم:اهم شي احقريه وقفلي الجوال قد ماتقدرين
ريم:ان شاء الله

25 - 11 - 2014, 04:22 PM

طلعت نوره بعد ماتأكدت ان ريم بخير,,بس ريم ماهي بخير,,فيه بنت مع طارق اكيد امي ماتدري بروح اقولها

طلعت ريم من غرفتها:يمممممممممممه
ام ناصر:صه انا هنا ماتشوفين
ريم وهي تحك راسها:هههههههههههههه تصدقين لا
ام ناصر:ها وش عندك
ريم:عندي خبر ماهوب شي
ام ناصر :الله يستر هاتيه
ريم:طارق
ام ناصر متروعه:بسم الله على وليدي جاه شي؟
ريم:لاتخرعين ترى ملينا من الخرعات
ام ناصر وهي تضرب بنتها بعلبة الكلينكس:اجل؟؟
ريم:معه بنت بالجزيره
ام ناصر سكتت:............................................. ......
ريم وهي تعلم امها مواصفات البنت والمعلومات
ام ناصر:من قالك؟
ريم:نايف
ام ناصر:على خير اهم شي يوصلون بالسلامه ولا جا اخوك يصير خير
ريم:يمه عادي يتزوجها ؟؟
ام ناصر:دام اهلها والنعم فيهم ليه؟؟اصلن لو هو رفض انا بغصبه بنت ومعها خمس شهور انا مربية ولدي ومتأكده ان مابينهم الحرام بس الاصول اصول,,البنت ان ماخذاها طارق من بياخذها؟!
ريم:ونوره؟؟
ام ناصر:ماتكلمنا فيها كانت اختيار مو خطب
ريم وهي تحك راسها ياليتني ماقلت لنوره:صح

ام ناصر:قومي شوفي معي غرفة طارق زينتها ورتبتها بإيديني
ريم:يالله

توجهوا ثنتيهم متفقات بالذهاب لغرفة طارق ومتفقات في التفكير بهالبنت(حنو) وش نوع علاقتهم ياترى؟؟

25 - 11 - 2014, 04:23 PM

بعد مرور يوم

في اليخت

كان طارق متمدد بعد ما اكل وجبة فطور في نظره بعد جوز الهند دسمه وهي عباره عن توست وجبن وكوب كافي

كان ماخذ ريلاكس خاصه ان الجو حلو,, وكان جون وديفيد يغوصون في آخر موقع محددينه
وبعدها بيتوجهون لسواحل المغرب لتوصيل طارق وحنان

اما حنان كانت بغرفتها وهي حاسه انها غلطت يوم سايرت طارق
حنان:انا وش سويت,, الحين بيستسهلني وبيقول ذي هينه ,,ولاهو متقدم لي ياررربي عميت عيني بإيدي صدق انها تجربه حلوه,,بس مو هذا اللي تربيت عليه,, صدق ان قلبي خضر,,بس مو متهوره,,صدق اني احبببببه بس ما ارخص لنفسي
يوووووووووووووووووووووووه

تضايقت حنان من نفسها وخذت ايشارب وربطت فيه شعرها وطلعت لسطح اليخت ,,لقت طارق متمدد وسرعااااان ما انشرح صدرها ووهي تشوفه,,
حنان بقلبها:اتاريني حظيظه(محظوظه)يوم اني كل يوم اشوفه وه بس
مشت لعنده ولقت مغمض عيونه ولقتها فرصه تتأمل وجهه بعد الحلاقه ,,دامه نايم هاذي احلى فرصه

كان ابسط كلمه للتعبير(وسيم) بالرغم من عوامل التعريه اللي صارت لهم بالجزيره ,,5 شهور تحت الشمس,,خمس شهور تغذيه سيئه,,خمس شهور ارهاق وتعب نفسي,,بس كانوا احلى خمس شهور بحياتها
وبينما كانت سرحانه فيه فتح طارق عيونه لقاها سرحانه ومو منتبه له,,فقرر انه مايفوت هالفرصه,, واستعد لهجوم لكن هجوم شرس ,, وغافلها وهي سرحانه وجلس بسرعه وهو يصرخ :بببــــــــخ
حنان:آآآىه بسم الله ,, وجع وجع وجع
طارق وهو ميت من الضحك:ههههههههههههههههههه في بطن العدو هههههههههههههههههه وش عندك تطالعيني وسرحانه
حنان وهي لا زالت متخرعه منه وحركته خلاها تعصب:اتأمل مفاتن وجهك,, واقول وشلون كنت متحملتك كل هالخمس الشهور,, ووووووجع>>وتضربه على كتفه
طارق وهو رافع حاجب:وشلون كنتي متحمله؟؟كنتي تعانين من جمالي
حنان:أي والله مافيك شي عدل ينتطالع ,,يالشين

وقامت من عنده وهو يضحك عليها ,,يحبها وهي معصبه:على الاقل انا ما اخرع احد بكشتي
حنان وهي تحط يدها على خصرها:ماوداك لورى ولعب بك غير شعري اها بس
طارق:أيـــــــــــــــــه ياحزم الضامي ,,ما اقدر اجاكرك اكثر من كذا بعدين اتعب وانا تعبت معك اكثر من اللازم
حنان:ارقد ابرك لك بس
وراحت عنه وهي مبسوطه ,,مع انه مخرعها بس هي خبل تنبسط خخخخخ

وبهالاثناء طلع جون من البحر ومعه ديفيد وكانوا صايدين حيوانات بحريه غريبه,,

بالانجليزي
جون:نسيت اخبركم ان الصحافه والتلفزيون راح ينتظرونكم عند الميناء
طارق:اوف ليه؟؟
ديفي:ليه تضايقت ؟؟المفروض تفرح,,اكيد المحطات التلفزيونه والاذاعات راح يعملون معكم مقابله
طارق:انا عادي بس حنان
جون:حنان شفيها؟؟
طارق:نحتاج لغطا اجل ولبس ساتر من الدرجه الاولى
ديفيد:بس حنان ماتتغطى مننا راح تتغطى من الباقي
طارق:حنا بالسعوديه تفكير عندنا ف

25 - 11 - 2014, 04:24 PM

طارق:حنا بالسعوديه تفكير عندنا فيه غباء شوي اذا سافرنا مايتغطون بعض الحريم,,بس دامنا في السعوديه لا تتغطى ولا يبان غير عيونها,,وبعدين حنان بتصير زوجتي ولازم ما تصير فرجه للكل عشان كذا احتاج توفرون لي لبس يناسبها
فكر جون شوي:ماعندنا ملابس نسائيه غير اللي عطيتها,,

تضايق طارق من جد,, تضايق شلون بتطلع حنان من اليخت كذا,, والصحافه ماراح يخلونهم غير لما يصورنها اووووف
جون:نقدر نخيط لها رداء
طارق:عندكم قماش؟؟
جون:قماش للملابس لا..لكن عندنا سفر للمائده تصلح للملابس
طارق:ومن بيخطها؟
جون:هاذي مهمتكم عاد خيطوها بالشكل اللي تبونه
طارق:الادوات متوفره
جون بفخر:كل شي متوفر في يختي,, عندي علبة خياطه,, وقماش المائده راح اعطيكم واحد لونه ابيض بدون أي تطريز او نقشات اتوقع يصلح؟؟
طارق:الا يصلح ونص
جون:اوكي الحقني

عطى جون طارق قماش سفره تقريبا يجي مقاسه حوالي مترين,, وعطاه علبة الخياطه

أخذ طارق العده وتوجه لحنان كانت في مطبخ اليخت تسوي لها ساندويش

طارق:بسسسسسسسسك أكل خلصتي عزبة الرجال
حنان وهي تاكل ومو مهتمه منه:لا شكى لك قلي يعطيه ابوي بدل القرش الف
طارق:هههههههههههههه طيب فيه العافيه انا بغرفت الجلوس تعالي في عندنا شغل لازم نخلصه قبل ما نوصل ومابقى على الوصول غير 4 ساعات
حنان وهي تمشي وراه:وش عندك
طارق وهو يحط العده على الارض ويفرش المفرش:شفتي ذا
حنان وفمها فيه اكل:شفبه؟
طارق:بتفصلينه عبايه لك
حنان وهي تشرق باللقمه:كح كح كح وشووو
طارق:صحه اقوووووول عبايه كن ماودك جازت لك الفسقه
حنان:وشوله عبايه
طارق:لان في صحافه وتلفزيون ينتظرون
حنان تستبله عليه وتجننه:طيب شالمشكله؟؟
طارق وبدا عليه انه عصب من كلامها:عادي عندك تتصورين ويشوفونك؟؟
حنان ببرود وهي مستمتعه بتعابير وجهه العصبيه:هذا جون وربعه ما اتغطى منه
طارق وعصب من جد: لان مابيدنا حيله..بس الحين مو عدله اكيد في احد من اهالينا بيستقبلنا
حنان ولا زالت تتصنع البرود:طيب انا عادي شفيك
طارق وهو معصب:بس انا مو عادي يازينك مصورينك
حنان:وانت وش بيضرك؟؟
طارق وقام من مكانه :وش بيضرني؟؟بيضرني اني باخذك معي وبعرس عليك
حنان:آها قصدك يعني تغاار
طارق وعرف انها تستبله وبنفس نغمة برودها:لأ ما اغار,,بس بيقولون وش هالشيفه اللي معه ,عالاقل خل الطابق مستور !!
حنان ووجها شب احمر :انا شييييييييييييييييفه ياشييييييين
طارق:ههههههههههههههههههههههههههههههه ههههههههههههههههههههه عشان تحرمين تلعبين بأعصابي يالشينه
طارق:اها بس اجلسي خل نخلص من هالشي

25 - 11 - 2014, 04:24 PM

جلسوا اثنينهم يقصون ويخيطون لين بالأخير طلع على هيئة بالطو لف بدون اكمام وحزام من نفس القماش عشان ماينفتح,, وقطعه عباره عن حجاب,,
طارق:طيب والغطا؟؟
حنان:نعم؟؟تبي ان شاء الله اغطي وجهي بذا الثقيل اموت ؟؟ بحط ايشاربي ذا يابوزعم انه لثمه
طارق:ماعندنا حريم يتلثمون
حنان:يصير خير مدري ش تبي اسوي لك ولا من وين اجيب كل هالعده,,ماودك ببرقع؟
طارق وهو حاب يرفع ضغطها: ليه لأ انا رجل شرقي بحت ولا بعد نظااره شمسيه,,, لاتطلع العيون والجبهه ذي
حنان ولا كأنه قال شي عارفه انه ناوي يجننها

دخل عليهم جون:بعد ساعه بنوصل للمغرب تجهزوا وجاني خبر ان الاعلامين في الميناء,,
حنان&طارق رقعت قلوبهم يعني بنوصل لأهلنا ,, بيستقبلونا اللي نحبهم
طالعت حنو طارق وعيونها تلمع من الفرحه وبادلها طارق نفس الفرحه
حنو:بقوم اتجهز
طارق:وانا بعد
دخلت حنان غرفتها وكانت لابسه بنطلون جينز وتيشيرت كم طويل >>من تيشيرتات ديفيد

لبست البالطو وتحجبت وربطت الايشار وكأنه نقاب سير ,, حاولت انه مايطلع منها غير عيونها ,,كان حجابها فوق حواجبها بالضبط,, وعشان ماينفتح عليها خيطت نهايته بغرزتين عشان يثبت ,,
طق طارق عليها الباب
حنو:تعال
دخل طارق,, وتفاجأ بحنو لكن بشكل ثاني ,,اول ماشافها اشتاق لها ,,اشتاق لوجهها ,لشعرها,لملامحها لكل شي فيها,,مع انها واقفه قدامه لكن بحجاب اسلامي متكامل

طارق:ليه من الحين؟
حنان :خلاص مابقى شي
طارق بصوت حنون:تصدقين اشتقت لك
حنان وعيونها دمعت:قل والله ماتخليني؟
طارق بلع ريقه وقاوم دمعته:والله ما أخليك
وفتح يده لأخر حضن بينهم ,, ولبت النداء بحب
طارق:أحبك يالغلا
حنو:أحبك موت
مسك راسها بيدينه ومسح دموعها بأبهامه وابتسم لها:نروح
حنو وهي ترد الابتسامه اللي بانت في عيونها :نروح
طلعوا من الغرفه وكان جون وديفيد وطاقم اليخت واقفين ينتظرونهم
طارق:ابسط وأبلغ كلمه هي شكرا
جون:أي احد غيرنا بيسوي نفس اللي سويناه واكثر
ديفيد:اوه حنان ليه تبكين ؟
حنان:ماني مصدقه
جون:ابنتي الصغيره ماآن لكي ترتاحي؟؟ انها بضع دقائق وتلتقي ببإخيك اللذي يتقطع من اللهفه لرؤياكي
حنان بفرح:من؟؟
جون:ما ادري لكن اخوك واخوه
ديفيد:جاهزين نبدا نحرك اليخت ,,حنا وقفناه عشانكم
طارق يشد على يد حنان:ايه جاهزين

توجهوا عند مقدمة اليخت,, مقابل الميناء ,, وكانت الزحمه باينه ونور سيارات الشرطه
طارق:اتوقع نايف
حنان:سعود

المواضيع المتشابهه لموضوع: رواية وش حيلتي اذا الشوق صوبك دعاني كاملة لموضوع: رواية وش حيلتي اذا الشوق صوبك دعاني كاملة
الموضوع	كاتب الموضوع	المنتدى	مشاركات	آخر مشاركة
رواية قصة حب كاملة جميع الفصول بقلم فاتن محمد شاكر	مشاعر	همس للقصص وحكايات وروايات	11	2 - 11 - 2023 11:23 PM
وش حيلتي	النورسيه	همس كتابات الاعضاء الحصريه	6	19 - 7 - 2021 04:13 AM
رواية فهد و نوره رواية رومنسية سعودية كاملة	سجات التهاويل	همس للقصص وحكايات وروايات	23	8 - 6 - 2018 01:07 PM
رواية حسبي عليك حتى شبيه سمك فز له كاملة	جروح الم	همس للقصص وحكايات وروايات	42	8 - 6 - 2018 01:06 PM
رواية س كون فارسك يا مهرجتي كاملة	نَبض♡~	همس للقصص وحكايات وروايات	22	15 - 6 - 2012 03:59 PM

الذين يشاهدون محتوى الموضوع الآن : 2 ( الأعضاء 0 والزوار 2)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

رواية وش حيلتي اذا الشوق صوبك دعاني كاملة

همس للقصص وحكايات وروايات