رواية الحب بعد فوات الاوان

20 - 1 - 2015, 09:17 AM

عبير راحت تدق على عمران ومايرد واحيانا يصك الخط بوجهها عبير انا مالي الا ارسل له اغنيه حلوه
ارسلت له اغنية ماتروحش لشيما الشايب
عمران فتح الرساله بريد صوتي دق عليه سمع
ماتروحش لما بتمشي روحي تمشي والاحزان بتذوب رمشي ماتروحش
وصك الخط ماكمل الاغنيه وتدق عبير ولا يرد
عمران وهو يمشي بسرعه جنونيه يفكر بالصوره مين الي نشرها وهي طلعت معه ولا لا مافيه السبب غير عبيروه
بس عبير مو مسؤله عن تصرفات زينبوه

ابوحسام بعد ماعلمه ابورامي وش سوى عمران في المجلس وكيف عامل عادل واهانه قدام الي يسوى ومايسوى
رجع للبيت وهو ناسي وفاة حسام
ابوحسام:عبير عبير
عبير تنزل من فوق:نعم يبه ناديتني
ابوحسام:ايه تعالي
ام حسام تجي:وش فيك تأخرت
ابوحسام مايبي يعلمها لانه مو رايق لمحاظراتها:كنت مع اصحابي
عبير:بغيت شئ يبه
ابوحسام:طيب اجلسوا كلكم
جلسوا
ابوحسام:عبير ترا هذي مو حاله زوجك فشلنا في الاستراحه اطلبي الطلاق وانا ازوجك احسن منه
عبير تفاجئت:خير يبه هو سياره ابدله كل يوم لا هذا زوجي الى اخر لحظه بعمري وانا ابي اعيش حياه مستقره زي باقي الناس
ابوحسام:بس فشلنا قدام العالم علشان صوره في الجوال
عبير:يبه وش شعورك لو شفت صورتي منتشره
ابوحسام من غير تفكير:اذبحك هذا الناقص ايه كملي الي خلاه حسام
عبير:طيب هذي صورة اخته
ابوحسام بتمهزئ:والله يعين عايله موشريفه اقولك لاترجعين له واطلبي الطلاق
عبير:يبه انا حامل
ابوحسام:حامل باي شهر
عبير:امس قالوا لي الثاني
ابوحسام:طيب سقطيه
ام حسام:والله ماتسقط مادامها هي مرتاحه انت وش عليك
ابوحسام:احترمي نفسك لاكسر راسك
عبير:يبه انا بسافر بعد شوي
ابوحسام:بالي مايردك(ويروح فوق)
عبير تبكي:انا ناقصه اللحين اشوفها من وين من عمران ولا ابوي ولا حسام
عادل:قومي ولاتشيلين هم انا معك

عادل سبقها لسياره عشان يشغلها
عادل يكلم نفسه : ياشين ثقاله هالحريم متى تجي هالخبله عني انها تتمكيج وهي ماهي مقابله الا خشتي
عبير فتحت الباب وشافته يكلم روحه
عبير: اكيد انت بحيره مثلي والدليل انك تكلم روحك
عادل: لا والله انواع الحش فيك هههههههه
عبير :بدال ماتعطف علي وعلى مصايبي اللي من كل جهه تحش فيني
عادل : وش دعوه انا اخوك ولازم اعطف عليك
عبير: اقول والله انك تسمع بالاخوه
عادل: ههههههههههههه

ام حسام راحت لغرفتها هي وزوجها ولقت ابو حسام يفكر تفكير عمييييييييق : وش هالتفكير اللي خلاك ماتحس اني جايه
ابو حسام: انا افكر بواحد ماطقيت له خبر بس اكيد انتم راح تنجنون لو سمعتوه هالخبر
ام حسام عرفت ان في ولدها حسام فيه شي لان قلب الام مايخون: ولدي فيه شي يابو حسام
ابو حسام : مين؟ حسام!!!
ام حسام وتنزل دمعه من عيونها وصوتها بدا يرتجف: ايه حسام
ابو حسام: عطاك عمره المدمن
ام حسام:وش قلت

20 - 1 - 2015, 09:18 AM

ابو حسام وبكل برود مره اخرى: ماتفهمين انتي حسااااااااااام مااااااات الله يلعن هالدجاج اللي مايستوعبون من اول كلمه
ام حسام وهي تبكي:انت السبب والله انت السبب
ابوحسام:اقولك لاتتبلين على تدرين شلون مات بجرعه مخدرات زياده
ام حسام وهي تبكي ومستعجبه:لا هو تعالج طيب كيف؟
ابوحسام:المهم مات وفضحنا
ام حسام وهي تبكي مغبونه:انت السبب لو انك رضيت عليه كان ماصار له الي صار
ابوحسام:اطلعي برا وطفي الليت
ام حسام طلعت وراحت لغرفة حسام وهي تشوف صوره حسام صوره وهو مبتسم وكان شكله طبيعي قبل الادمان
صورته وسيم لابس شماغ وعيونه كبار ام حسام تاخذ الصوره المعلقه فوق وهي مهدوده من الفاجعه تمسك الصوره وهي
فوق الكرسي وتسقط الصوره منها وهي تطيح معها تتكسر الصوره وام حسام يزيد صياحها وتمسك الزجاج المتكسر تبي
تعدله لكنها نزفت يدها دم وقبل ماتنزف يدها دم نزف قلبها جروح حسام لاتخليني مو كافي عبير تزوجت وانت
ليه تخليني انت قلتلي انك تبت كيف تموت انت اخلفت وعدك لي حراااااااااااااام عليك عطيتك كل فلوسي وانت
تطلب بشراهه لكني ماسويت زي الامهات وسالتك انا مو ام انا ماستاهلك ياحسام آآآآآآآآآه اشتقت لك ياولدي اشتقت لك(تبكي
وهي طايحه وتضم صورة ولدها قصدي بقايا الصوره

عادل وهوفي السياره يسمع اغنية جبار لعبدالحليم في مقطع
يامعلمني الحب ياريتني يــاريتني ماتعلمته معاك ولا شفتواا
ليه تخدعني ليــه خليتني انسى الدنيا واعيش في حلوته

عادل:انا مادري ليه احس انه يغني علشاني بهالاغنيه
عبير تتصنع البكاء:ايه الاغنيه ذي اذا سمعتها احس اني بصييييييييييح اهئ اهئ

عادل:اقولك اسمعي ذا المقطع الي بجد بيبكيني وانا رجال اسمعي
قلبي يقول للحب ابعد عن طريـــقي
اي حب جديد ياويله ياويله من حريقي
لو حصادف قلب مخلص مش حأبلوه وأصونه
وان ضحك في عينيه حضحك واخدعه ويمكن اخونه

20 - 1 - 2015, 01:00 PM

عبير:مسكييييييييين عبدالحليم احس انه مجروح بذي الاغنيه
عادل:والله مسكين الي كاتب الاغنيه
عبير:لا يقولون ان كل اغاني عبدالحليم تحكي حكايته لان قصة حبه انتهت قبل ماتبدأ
عادل:وووووووووومين قالك ان فيه مخلوق اسمه الحب
عبير:ليه انت ماحبيت
عادل:الا حبيت بس الحب يايكون من طرف واحد زيي ولا يكون فاشل لانه يكون اصل اعجاب ولا حب من طرفين
واهل العاشقين يفرقونهم
عبير:واذا كانوا حب من طرفين والاهل مرتاحين
عادل:هههههههه يكون عمرهم قصير يايموت بحادث ياتموت زوجته في مرض
عبير:عاد تصدق ربي انقضني انا وعمران في اسبوع من الموت
عادل:ليه عسى ماشر

المسكينه زينب نايمه من الجوع ماذاقت اكل من ثلاث ايام طبعا دلع بنات(زي بنات اليوم ماياكلون الا جالكسي وببسي
ومتبعين الرجيم يااااااااااي)
فوزيه جالسه عند التلفزيون
وفجائه الا ذيك السياره توقف وينزل راعيها بسرررررررعه وعيونه حمراء من الغضب وكل جزء بجسمه يرتعش
من القهر والغبن وصل للقصيم بثلاث ساعات ابن اللذين ولا راحت عصبيته بالعكس زاددت كل ماتخف يتذكر المشهد
وصورة اخته ينشرونها شباب ينجن وينزل من السياره بسرعه

زينب وهي قايمه من النوم تدعك عيونها وهي عند فوزيه تناظر الشباك:الحمدلله جاء عمران ابموووووت جوع
عمران وهو يفتح الباب بقوه فوزيه استقبلته بابتسامه
زينب وهي عند باب الصاله:الحمدلله جابك الله انا ميته جووووووووووع
عمران يروح لها بسررررعه وهو صاك سنونه من العصبيه ويمسك شعرها ويضربها بالجدار من غير رحمه
فوزيه طااااااااااااااار عقلها:انت وش فيك كل مره تضرب زينب ولا لأن مافيه رجال يوقفك
عمران ماوقف زاد وضرب راح بسرعه واخذ حزام لبس لعبير ثقيل وللضرب مرررررررررررعب لان كله سلاسل حديديه
وضرب ضرب وفوزيه تحاول توقف الحيوان الثائر, الرجل المجرم ,القاسي السفاح ماله شبيه ابدا قاسي بكل
معنى للقساوه زينب المسكينه صارت بركه من الدماء شعرها كل دم لان اغلب الضرب براسها ولبسها تقطع برجلها اليسرى
من قوة الضرب بالحزام الثقيل توقف عمران بعد ماشاف اخته كانها تحركت مشاعر الاخوه وفجئئه ينعاد له الشريط
(الحقود حقود قالوا ايش قال شرف طيب مادام عندك شرف راقبها اهتم فيها شف طلباتها ولازم يكون عندك رحمه معليش قطعت عنكم لكن شسوي متفاعله
(نصابه ومشت كذبتها)
توقف عمران بعد ماشاف اخته كانها تحركت مشاعر الاخوه وفجئئه ينعاد له الشريط وتنعاد ذيك الصوره ويعيد الضرب
فوزيه تقطعت شوي من لبسها من لمس الضرب لها كيف لو مقصود فوزيه بكت بقوه من شدة الم الضربه الغير موجهه لها
وراح عمران بعد ماشبع من الضرب هذا القاسي
فوزيه طاحت بجنب بركة الدماء تحرك اختها تمسكها:قومي قومي يازينب قومي ذببحك ذا المجرم قووووووووومي
تبكي بقوه وهي منهاره اودي

20 - 1 - 2015, 01:03 PM

تبكي بقوه وهي منهاره اوديها للمستشفى تروح لعمران(وش تسوي وش حدك على المران غير الأمر منه)
عمران وهو يبدل لبسه المليان دم اخته يكلم روحه لبسي لمسه دم هال***** لازم ارميه في اخس زباله ويضربه برجله
فوزيه تفتح الباب وهي منهاره:تعال شيل زينب بنوديها للمستشفى بتموت بسررررررررعه
عمران بكل برود وهو يتذكر المستشفى لازم يحققون:لا ماتروح للمستشفى
فوزيه وهي تبكي:لان مافيه رجال يدافع عنها تذبحها وكل يوم تضربها
عمران انقهر من كلمتها وراح لها مسك شعرها:اقولك اطلعي برااااا تراي مو ناقصك انتي وكلامك يالعاااااااانس
فوزيه انجرحت من هالكمه لكنها طلعت وهي محزنه اكثر على حال اختها الي كانت فرحانه بوصول اخوها توقعت انه بيجيب لها اكل مو يشبعها ضرب

ابو عبدالله تزوج وحده ثانيه بس مارزقه الله عيال لان العقم من زوجته ولا تزوج بعدها
ابوعبدالله كلم عبدالله
ابوعبدالله:الوووووو
عبدالله:هلااااااااااااااا يبه اخبارك
ابوعبدالله:الحمدلله الف مبروك ياولدي على زواجك
فرح عبدالله على كلمة ولدي:الله يبارك فيك يايبه وعقبال مافرحك بعيالي
ابوعبدالله:عاد مابيك تكبرني وتخليني جد هههه
عبدالله مستانس بالحيييييل:هههههههه بس يبه بشر بتجي لزواجي
ابوعبدالله:انشالله بجي هو بعد اربع ايام صح
عبدالله:وانت الصادق خمس ايام يبه
ابوعبدالله:المهم ابيك تجي لشركتي بكره زين ابشوف ولدي ابي اتعرف عليك
عبدالله:والله حتى انا يبه ابي اشوفك من غير الجرايد الي دايم تكون صورتك من الاوائل فيها
ابوعبدالله:انشالله بكره تشوفني
عبدالله:يبه
ابوعبدالله:هلا
عبدالله:انا افتخر فيك
ابوعبدالله:مشكوووووور ياولدي بكره اشوفك ياولدي
عبدالله اغلق الخط وهو مستااااااااااانس بالمره ان ابوه معترف فيه

ابوعبدالله (يحليله ولدي لهجته سعوديه واسلوبه لبناني مادري سوري هي وش جنسيتها من كثرهن نسيت المهم ان عبدالله مهجن)

20 - 1 - 2015, 01:03 PM

عمران راح ينام عقب التعب والمجهود الي بذله في الانتصار وضرب اخته علشان صوره(عاد بصراحه سؤال للكل ابي اعرف
شعوركم اذا اختكم ولا امكم او زوجاتكم شفتوا صورها بنفس الطريقه الي شافها فيه عمران وش بتسوون بس هي مظلومه
وتصويرها غدر مو بيرادتها زي زينب ابيكم اللكل يسأل نفسه هالسؤال ان كان شاب او بنت سعودي اوخليجي لان عادتتنا تقريبا وحده الكل)

عبير وصلت عادل رفض ينزل لانه مقهور من حركات عمران وعبير قدرته
نزلت عبير وودعته وراحت للمفاجئه قصدي المفاجعه بجد فاجعه يوم دخلت وشافت فوزيه جالسه تبكي بقوه عند اختها
المليانه دم وضرب راسها الي مايناشاف من اللون الاحمر الي مصبوغ بالدم جنت عبير وراحت تركض علشان تجلس عند
زينب الملقاة في الارض وتناظر فوزيه بنظرات حزينه مؤلمه
عبير:عمران صح
زينب حركت اصابعها فتحت عيونها بهدؤ وبتوسل وبكلام مقطع:انا ماسويت شئ
فوزيه فرحت ان اختها صحت وهي بابتسامه حزينه وبكلام سريع:ايه انتي ماسويتي شئ هو ظالم وبيجيه يومه الله ياخذه يارب
ويرحنا منه
زينب:آمين
عبير خافت على عمران من دعوة المظلوم وتبي تبرر موقفه:لا انتي سويتي شئ يازينب امس في الاستراحه الشباب ينشرون صورتك وهو شافها
وجن وهزئ الي في المجلس كلهم وعرفوا انها انتي وحتى فيه واحد اسمه سالم هوالي نشرها
زينب شاخصه بصرها لعبير وتناظر بحماس:سالم صوري ياليتني مت انا السبب لا مو انا انتي السبب ياعبير انتي السبب
لو ماعطيتيني الجوال كان ماصار الي صار انتي من جيتي وتجي المصايب معك
عبير قامت وحاولت تداري زينب لانها مضروبه
وفوزيه تناظر لعبير برجاء وكانها تتاسف
عبير:اروح لغرفتي احسن عمران موجود
فوزيه:ايه موجود

تجي شغالة ام حسام للدور الثاني بتروح لغرفتها وتشوف غرفة حسام مشغل النور تمشي وتطيح الشغاله لان زجاجه دخلت رجلها طلعتها بخفه وشافت المنظر
المرعب شافت ام حسام طايحه ومعها صوره
الشغاله بسرعه تروح لغرفة حسام مافيها احد وشافت البيت مافيه احد راحت تحاول تقومها
الشغاله:ماما ماما قومي وتحاول وتهز كتفها
قامت ام حسام وراسها مصدع من البكاء والحسره الشغاله ساعدتها تقوم وراحت لغرفتها نامت وشاف الحلم ينعاد مره ثانيه
تحلمت ان حسام يصارخ فوووووق ومن ورا الجبل يــمــاه والله اني مظلوم ارضي على ابي رضاك يمه
والله اني مخدوووووووووووووع الغـــــــدر يماااااااااااااااه سااااااااااامحيني

عبير فتحت غرفتها وهي ميته خوف منه عمران تحرك شوي
عمران:مين؟؟مين انتي فوزيه
عبير بهدؤ تروح له:لا حبيبي انا عبير
عمران مثل المجنون يقوم ويشغل الابجوره يتاكد:عبير كيف متى جيتي
عبير:خليت عادل يجيبني كيف تسافر وتخليني خفت عليك
عمران بهدئ:قالك وش صار بالاستراحه
عبير ماتبي تعصب فيه:لا ماقالي وش صار
عم�

20 - 1 - 2015, 01:04 PM

عمران يحقق:طيب دامه ماقالك وش دراك اني هنا
عبير:قلبي قالي هو قال ان عمران طلع زعلان من الاستراحه
دقيت عليك مارديت وتصكه بوجهي عرفت انك هنا ليييييه رجعت وتركتني
عمران مايبي يعلمها:حرام اجي لبيتي يعني
عبير:لا حرام تخلي وحده تموت على التراب الي تمشي انت عليه الحالها
عمران:كيف الحالك وانتي بين اهلك
عبير ماتبيه يعصب وهي خايفه منه:عمران انا من دونك ولاشئ
عمران تذكر مين السبب وغطى روحه في البطانيه:تصبحين على خير ابنام
عبير تمسك ظهره:عندي لك مفاجئه
عمران بصوت عالي:لاتقولينها زززززززززززززين مابي مفاجاتك خليها لك
عبير خافت وقامت غيرت لبسها وراحت تاخذ شاور وبعدهاتنام وهي فرحانه انه ماضربها بس هوش يعني مشيها ياعبير

عادل على طول على الرياض مأخذ وقت للراحه
وهو يفكر بنوره ومقهووووووووووور علشانها هو يبين للكل حتى نفسه انه مايحبها لكن هو بجد مجنون نوره

رامي:يووووووووووووووووه يابدريه بجد انتي بخيله
بدريه وعيونها كلها نوم:هاااااااااااااه وش بخيله فيه بعد
رامي:وش فيك تتكلمين بدون نفس
بدريه:لانك ازعجتني من النوم يالمزعج
رامي:افااااااااااا حسابك معي الاسبوع الجاي مثل هالوقت
بدريه وهي تتثائب:الله يعين
رامي:اقولك باي جبتيلي النوم
بدريه:ليه وش كنت ناوي تسوي قبل
رامي:ابروح مع صديقتي
بدريه هالمره صدقت:قل والله
رامي:والله
بدريه:لاتكلمني ولا اكلمك وتغلق الخط بوجهه
رامي ارسل لها مسج(لييييييه ماخليتيني اكمل كلامي كنت ناوي اقول والله اني احبك بس انتي الله يهديك مطفوووووووووووووقه)
بدريه ماتت ضحك على حركتها الغبيه وارسلت له مسج(تصبح على خير يا
يا

يا

يارامي

20 - 1 - 2015, 01:06 PM

رامي فتح بسرعه ونزل مستعجل شاف اسمه حاف وقعد يضحك عليها اموت انا في الخجوله(بس رغم هذا حاقد على البنات كلهم لأنه يشوف خيانتهم بعينه

الصباح عمران يقوم علشان يروح للعمل ويقطع اجازته وهو خايف ان عمه ابوحسام فنشه علشان حركته قدام الرجال واهانة عادل ولده

عبير كانت نايمه وغاطسه في النوم ولا قامت ولاشئ
عمران كان يبي يزعجها بس شاف برائتها وهي نايمه كانها طفله عمرها 6سنين مو عمرها22 سنه

راح ولقى فوزيه قدامه ناظرته باستحقار ودخلت تذكرت ان زينب جوعانه ورجعت له
فوزيه:ترا البيت فاضي من الاكل ولي انا وزينب يومين ماذقنا شئ
عمران:احسن انشالله تموتون كلكم

فوزيه تروح وهي تبكي مقهوووووووره ان مالها والي غيره كانت تتمنى ولي امرها الشيطان ولا هو

عادل وصل للبيت هلكااااااااااااااااااااااان يبي يرتاح
ابوحسام وهو ناوي يطلع في الصباح
عادل داخل للبيت ويسلم على ابوه:يبه عن اذنك ابروح انام لاني تعبااااااااااااااااان
ابوحسام:طيب مانت رايح معي نستلم الجثه
عادل طار النوم وطار عقله معه:اي جثه هاه وش قلت
ابوحسام ببرود:ليه امك ماقالت لك ان حسام مات
عادل وقف جامد ويطيح يتشنج من قوة الخبر والطريقه المفجعه بطريقه ابوه
ابوحسام يهديه ويشربه مويا هو وشغالتين
عادل قام وكانه هدئ:يبه حسام بجد مات تكفى قل قل لاااااااا
ابوحسام:شفت الفضيحه مات بجرعه زايده يزيد ذنوبه انشالله
عادل كان وده يضرب ابوه من اسلوبه القذر:لهالدرجه صار الموت عندك شئ هين هاه انت قاسي ماضيعه الاانت
حرام كلمة يبه لك حرام
ابوحسام:براااااااااااااا لاشوفك
ام حسام وهي نازله من الدرج وعيونها حمراء من الصياح:اطلع ياعادل وانا ابروح معك مالي قعده بهالبيت بيت القاسي المجرم
ابوحسام:كملت حلو برا انتي ياثانيه تراي مو متحملك علشان سواد عيونك علشان سمعتي بين الناس الي شوهتيها انتي
وولدك المدمن
عادل يمسك امه وكل واحد بينهم منهاااااااااار واخذوا فندق لهم لكن النجس ابوحسام سحب كل رصيدهم وطلعوا منه بسررررعه
ام حسام بما ان مالها احد بالرياض الا ام رامي راحت لها مع ان عادل مو عاجبه الوضع الا انه راح بس كم يوم ويمشيها

عناااااااااااااااااااااااااق حامي بين الاب وابنه بين عبدالله وابوه في الشركه وسلام حار واساله عن الحال
ابوعبدالله مستانس ان ولده كبر:الحمدلله اني وصلت هاليوم الي اشوفك فيه رجال وبتتزوج قريب
عبدالله:والحمدلله الي جاء اليوم الي اشوف فيه ابوي
ابوعبدالله يطلع مفتاحين:خذ خذ ياولدي هدية زواجك
عبدالله يبي يبرر موقفه:يبه والله اني ماجيت علشان اخذ منك شئ بس بغيت انك تحضر زواجي
ابوعبدالله:ادري والله بس اذا تبيني احضر زواجك اقبل هديتي
عبدالله اخذها:بس وشو هذا يبه
ابوعبدالله:هذا مفتاح فله والثاني سياره اس

20 - 1 - 2015, 01:06 PM

ابوعبدالله:هذا مفتاح فله والثاني سياره اسكن فيها انت وزوجتك واذا تبي امك سكنها معكم
عبدالله يبوس راس ابوه:الله يعطيك العافيه يبه بس هذا كثيرر
ابوعبدالله:كل حلالي لك وانا مقصر بحقك كثيررررررررررررر

العصر
فوزيه سوت قهوه وكانت منسدحه زينب من التعب والضرب وفوزيه تصب القهوه لعبير وعمران
عبير:لاشكرا مابي انا ممنوعه عنها
فوزيه:ومين الي مانعك
عبير تبيي تسمع عمران:الي مانعني الدكتور علشان مايضر الجنين لاني حامل
فوزيه:والله مبروووووووووووووك
عمران وقف وباعلى صوت من العصبيه:وليه انا اخر من يعلم ولا انا مو ابوه

كيف بتكون ردة فعل عبير علشان تبرر الموقف؟؟؟

وكيف بتكون حياتهم مستقره ولا غير مستقره؟؟؟ بذات وانه ماعلمها؟؟

زينب وش بيصر لها عقب الضرب يمكن تنجن لان اغلب الضرب براسهها؟؟

وهل نوره وعادل يتقابلون مره ثانيه ويتكلمون بما انهم ببيت واحد؟؟؟

ابوحسام تتوقعون يصبر يعيش بروحه ولا يتزوج ولايرجع ام حسام؟؟

كيف بتتلقى عبير وعمران نباء وفات حسام يمكن عبير تسقط من الهبله والمصايب المتكرره والمنوعه؟؟

20 - 1 - 2015, 01:07 PM

الجزء الخامس العشرون
عمران وقف وباعلى صوت من العصبيه:وليه انا اخر من يعلم ولا انا مو ابوه(عمران صار يشك بالكل عقب اخته)
عبيربحسره ودهشه:لا مو معقول انا مو مصدقه الي اشوفه بدال ماتفرح تتهمني بالخيانه
عمران وهو مستسلم:طيب ليش ماقلتي لي انا اسمع الخبر حالي حال فوزيه
عبير:انا امس قلت لك ان عندي مفاجئه وانت قلت مابيك انتي ولا مفجائتك واللحين سويتها بهالطريقه توقعتك بتفرح مو تقلب على
فوزيه:شفيكم هدوا شوي اعصابكم
عمران يناظرها بحقد:انتي مالك خص هذي خلافات بين زوجين ولا نسييييت ويلمس راسه انتي وش دراك لانك مو متزوجه ولا راح تتزوجين
فوزيه تاثرت من هالكلمه وطلعت بسرعه وراحت تبكي مهما كانت بنت وتتاثر بهالكلام
عبير:حرام عليك وش فيك عليها هذي مهما كانت اختك ولازم تحترمها
عمران معصب:مب انتي الي تعلميني الاحترام متى كشفتي ووين؟
عبير:كشفت اول ماجينا للرياض امي غصبتني بعد ماشافتني تعبانه
عمران يكتف يدينه وكانه محقق:طيب ليه ماخذتي موافقتي تروحين من غير استئذان اصحي انتي متزوجه ولازم تاخذين موافقتي
عبير:انت ماكنت فيه
عمران:والجوال وين راح
عبير:انا كنت شاكه اني حامل ولاأستخدمت الجوال خايفه على(وهي تلمس بطنها)الجنين
عمران:طيب ليه ماقلتيلي بعد ماجيتي
عبير:لاني ابي اخليها مفاجئه وقلت لك عندي مفاجئه قلت مابيك انتي ولا مفاجئاتك
زينب تترقب وتناظر وهي تهز راسها بأسف وتتكلم بصوت مسموع هادئ:الله يعينك عليه ياعبير بيعذبك ويعذب الي في بطنك
عمران اول ماسمع صار مثل الثعبان الي شايف له فريسه ويبي ينقض عليه بسرررررعه راح لها بسرعه يبي يطلع
حرة عبير فيها عبير بسرعه راحت له ووقفت قدامه وتناظره نظرة رجاء:الله يخليك لاتسوي لها شئ الي فيها كافيها
عمران ويحاول يبعد عبير طاحت عبير وتصارخ وهي تبكي:لاتلمسها الله يخليك لاتضربها
عمران استغرب من دفاع عبير لاخته القاسيه معها:علشانك بس هالمره
ويمسك يد عبير ويحاول يقومها تقوم عبير وتبتسم له وعيونها كلها دموع:مشكور حبيبي ويروحون لغرفتهم
زينب مستلقيه على الارض من التعب والضرب الي جاها من عمران وصارت تتكلم بتثاقل واثار الضرب زادت في كل مكان بجسدها

فوزيه تطق الباب
عمران:اكيد هالفوزيه المزعجه
عبير تحاول تسكته وبصوت خفيف:خلاص انا بروح اشوفها
فوزيه بصوت خفيف ونظرات رجاء:عبير ممكن تجين شوي
عبير راحت لها:هلا فوز بغيتي شئ
فوزيه تاخذها وتروح ورا البيت المجود في البر او صحراء :عبير عندي طلب الله يخليك سويه وساعديني فيه
عبير خافت تكون داهيه جديده او مصيببه:وشو وانشالله اساعدك فيه اذا كنت اقدر
فوزيه:خلي عمران يجيب اكل نواشف جبن وقشطه وفول ومن هالاغراض
عبير انفجرت بالضحك:ههههههههههههههههههههه والله انك داهيه يافوز جايبتني ورا ال

20 - 1 - 2015, 01:08 PM

عبير انفجرت بالضحك:ههههههههههههههههههههه والله انك داهيه يافوز جايبتني ورا البيت علشان تقولين لي اشياء العاديه
فوزيه جاده وبترجي:صدقيني زينب بتموت لها ثلاث ايام ماكلت
عبير:وشو ثلاث ايام حنا وين بافريقيا بجد والله كيف
فوزيه:البيت ناقصه اغراض واجد وماجابها ويوم قلت لعمران عاندني وحلف مايجيب
عبير:خلااااااااااص ولا يهمك اخليه يجيب اللحين بس اسمعي مو معناته انه يطيعني بسرعه تراه يالله ويالله يروح
فوزيه:مشكوووووووووووره حياتي انا مادري وين اروح عن جمايلك
عبير:يالله تعالي بنشيل زينب نوديها لغرفتها علشان اذا سالني اقوله نشيل زينب
فوزيه:عليك نور
راحوا لزينب لقوا ينزف انفها دم من جديد ارتاعوا انهبلو راحت عبير بسرررررررررعه للفريزر تجيب ثلج واخذت كلينيكس
وحطوه عليها
عبير تعرف بالاسعافات الاوليه احسن من فوزيه:ارفعي راسك يازوزو ارفعيه
زينب تحاول ترفع راسها بتثااااااااااقل وتساعدها فوزيه: وحطوا الثلج عليها الى خف النزيف وشالوها عبير تحاول تشيلها
بس ماتبي تأذي الي في بطنها
وفوزيه شالت بكل حماس وبكل قوه عندها وحطوها في السرير وكان عمران يترقب كل شئ من اول مانزفت زينب
صحيح تعاطف معها وتقطع قلبه على اخته لانها بجد تكسر الخاطر لكن عبير سوت الي هو يتمنى انه يسويه
طلع عمران ونزلت من عينه دمعه متمرده تهز رجولته ومسحها على طول علشان ماحد يشوفها لكن شافته وحده تحس في كل نبضه ينبضها وكل الآم جارح يحس فيه
عبير تمسك يده وهي مبتسمه: لاتمسح دموعك خلها شوي تلين قلبك حرام عليك رح لها راضها بكلمه وحده مسكينه الي شافت مو قليل
عمران:مو انا الي اراضي احد
عبير:مو الغلط انك تراضي!! الغلط هو انك ماتسامح الكل يخطي وربي يسامحه اذا تاب كيف انسان حنا بشر لنا احاسيس ولنا مشاعر روح سامحها حرام عليك خلها تحس
ان فيه احد يهتم فيها هي ماكلمت واحد الا لانها فاقده التعامل الزين معها اقولك( توقف عبير لانها تحس بغثيان وراحت على طول للمغسله
عمران لحقها:وش فيك سلامات تحسين في تعب
عبير:لا تعرف الوحام
عمران ابتسم وهو مكتف يدينه:يعني بتجيبن لي ولد بعد كم شهر
عبير:اها ويمكن تكون بنت
عمران:الله يعينك ياعبير على وعلى مصايبنا الي كلما تزيد ماتنقص
عبير:انا كلي فداء لك انت ومصايبك
عمران ابتسم وهو يناظر لها بحنان لكن عبير ماتحب هذي النظره لانها تشوف ان ذي النظره نظرة شفقه مو حب
عبير:جوعانه ياعمران
عمران:امري تدللي وش تبين
عبير:اممممممممممم ابي نواشف جبن وقشطه وفول وعسل وكل شئ احس اني مشتهيتها لو ماتجيبه خلال نص ساعه بتنسد نفسي
عمران:لهالدرجه وبذا الوقت اللحين الساعه 1 الصبح
عبير:ايه انا اول اكذب الي يتوحمون واقول انه وهم لكن اللحين ابي بسرعه جيب بليزززززززز
عمران يأشر على عيونه:من ع

المواضيع المتشابهه لموضوع: رواية الحب بعد فوات الاوان لموضوع: رواية الحب بعد فوات الاوان
الموضوع	كاتب الموضوع	المنتدى	مشاركات	آخر مشاركة
سارع بتقبيل حبيبتك قبل فوات الاوان	ناطق العبيدي	همس المواضيع العامة	4	25 - 4 - 2024 12:13 AM
رواية باع الحب وتركني	سجات التهاويل	همس للقصص وحكايات وروايات	22	8 - 6 - 2018 12:58 PM
فورد فيجو 2016 الجديدة بثلاث فئات بثلاث فئات	همسه الشوق	همس للسيارات والدراجات الناريه	6	10 - 12 - 2015 02:43 PM
متى ستعرف حبيبى كم اهواك بعد رحيلى ام بعد فوات الاوان	جوهرة بغداد	همس عذب الكلام والخواطر المنقوله	12	16 - 1 - 2015 01:05 AM
تحذير عاجل لكل من يملك بريد على الياهو و الهوتميل ادخل بسرعة قبل فوات الاوان	الحب ياسمين	همس البرامج المشروحه هنا	14	20 - 2 - 2014 05:53 PM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

رواية الحب بعد فوات الاوان

همس للقصص وحكايات وروايات