فوق الجروح اللي بقلبي من سنين يكفي دخيل الله لا تجرحوني

8 - 2 - 2015, 06:29 AM

عند سند

كان طفشان وده يطلع لشاليهه ليومين وحب يقول فواز يروح معه

دق عليه وجاه صوت فواز الي معصب
اول مارد قال
سند برواقه وبرود: دامك لقيتها وش له هالعصبيه ماتقولي

فواز بقهر:سند وش عندك ترا مو فاضي لسخافتك
سند بغضب: لا شكلك كلش مايساعد على اني اطلب منك طلب فمان الله وسكر قبل لايسمع شي من فواز

سند تندم انه دق على فواز وراح بيشوف رفيقه ابرك له

عند ام فارس

حاسه بالحزن جت لها سحر وقالت لها عن الي صار وزاد حزنها حزن بس فرحها خطبة اخو ساره لعهد ودعت الله يوفقها ويفكها من هالظلم

فارس دخل شاف امه هو حاس بالذنب انه قال لعمها وماقدر يخبي كونه خايف لايتورط بشي بسببها

فارس:سلام يالغاليه اشلونك
امه بحب مهما سوا ماتقدر تلومه هو صادق بالي سواه ردت:هلا يافيك وانا بخير بفضل الله

فارس :الحمد لله وكمل بفرح :يمه انا ودي احدد عرسي شرايك كان بيدخل السعاده بقلبها باي شي

امه بفرح :ابركها من ساعه وشوف الوقت الي يناسبك وانا اقول للجماعه

فرحتها بخطبة عهد وتحديد عرس فارس اسعدتها ونستها شوي من الي هي فيه

اليوم الي بعده
٠

من جت ادخلت الغرفه الي كانت فيها بس هالمره شددت عمتها عليها الحراسه

وصارت الخدامه ماتفارق غرفتها وحتى النوم تنام عندها

بعد مااطربتها امس بانواع الشتايم والسب ولولا الله ثم حمد كان اكفختها بس هو منعها وفواز كان متفرج بس ولا عارض بشي

كان يحاتي شنو كان يبي منه سند وليش مارد اتصل او علأقل يرد علي لايتركني كذا احاتي

بالأخير سأل عنه امه وقالت له انه بالشاليهات وقرر يروح له الليله ويبات عنده عشان بكره بيرد لأهله

وكان في باله قرار وده يوافق له سند عليه لان لو وافق بتنحل كل مشاكلهم

عند حصه

جالسه مع شهد يتناقشون في امور عرس حمد الي مابقى عليه ألا اسابيع

حصه كانت xxxxxه في تغير حمد وعدم أهتمامه في تجهيزات عرسه حتى سهام ماقام يتكلم عنها او انه ينشد اذا انذكر اسمها وهو قاعد معهم

حست انها ماتعني له شي وخاصة هالأيام

شهد الي كانت مندمجه مع فجر وتلاعبها انتبهت لسرحان امها قالت بأهتمام:يمه فيج شي

امها بحزن:وش الي مو فيني ياشهد

شهد بضيق: عشان سالفة عهد
حصه بتنهد: غير هم عهد هم حمد وسند

شهد حاسه فيج يايمه يابعد عمري فوق همها جا لها هم بنت اخوها هي فيها شده على شي اصلا

شافت فجر راحت لأمها واندمجوا مع بعض وكأن فجر نستها شوي من الي هي فيه تسندت على ظهرها وسرحت في عهد

كان ودها تجلس مع عهد حاسه بالذنب اتجاهامن انها ماتطلع ولا تجلس مع احد وكله محبوسه بين اربع جدران بس مستحيل تجرأ وتجلس معها ابد لانها خايفه من امها

8 - 2 - 2015, 08:56 PM

البارت العاشر

عند سند في الشاليهات

وصل له فواز على المغرب وبعد ماقام سند بواجبه في ضايفة خاله هو وربعه

حب انه يختلي بخاله شوي خاصة وانه حاس ان في خاطره شي وده يقوله

توقع ان فواز ماخذ بخاطره من عقب الكلام الي دار بينهم فحب انه يوسع خاطره شوي قال ببتسامه كاذبه وهو يخفي مافي نفسه: حمدالله على سلامت بنت اخوك اخير حصلتوها

حس من طريقة كلامه بالسخريه وهالشي ماطاف على
فواز الي كان جاي بيفضي وبيشكي همه لسند الي يعتبره صديق له مو ولد اخت كان مقرر يصرح لسند بكل الي بخاطره بس يختلون ويوم صار تفاجأ بكلام سند له

فواز وهو يتأمل البحر وسكون الموج بهالليله عكس اعصابه الثايره والمتوتره قال بطفش:الله يسلمك رد سكت واخذ له حجر ورماه بالبحر ماحب سكونه يبيه يكون مثله ثاير ومتضارب

حس بهم كبير اشلون يقدر يتصرف مع بنت اخوه اشلون بيفتك منها تمنى لو احد يخطبها جان على طول وافق عقب الي فهمه من طريقة سند

سند الي قلد فواز بحركة ورما هو بعد حجر بس كانت ابعد واقوى من رميت فواز لدرجة ان الماي تناثروتطشر من حذفته
قال: بتاخذها معك ولا بتجلسها هنا

فواز بنرفزه:وين اخذها انت من صجك هذا وانت تعرف طبع زوجتي وغيرتها

سند الي قاهره سلبية فواز بتعامله مع زوجته كل هذا حب معقوله لدرجه انه يترك كل شي على كيفها ومزاجها قال بقهر:وش تغار منه اتوقع ان هذي بنت اخوك ماهي حبيبه او عشيقه لك

كمل جملته الأخيره بسخريه

فواز بضيق:مايمشي مع ندى هالكلام هي حتى امك الي هي اختي تغار منها اذا كلمتها بأسلوب حلو

سند بقهر:وقفها عند حدها لاتسكت لها

فواز انا وين وانت وين تبيني بعد هالعشره وهالعمر اهدم حياتي وشرد اعيالي مستحيل هالشي يحصل
وقف وقال بخيبة امل من انه يتناقش مع سند: توصي على شي انا راجع للبيت

رد سند بتنهد: سلامتك بس ليش ماتنام
فواز مستحيل انام عقب الي سمعته حاول يقنع سند بعذر كاذب هو ان عنده اشغال لازم يخلصها قبل السفر
واستأذن من سند وراح بعد ماطفش من الجلسه معاه ولان وراه سفر حس انه مراح يجيب فايده من ورا سند فحتفظ بالقرار بنفسه ولا قاله لسند

وحيده عشت في دربٍ حزينٍ مظلم مهجور

وحيده عشتها الدنيا أقاسي لوعة سنيني

تجرعت المرار أمرار وقاسيت العنا والجور

أجامل وابتسم واضحك وحزني ساكنٍ عيني

!

جفت ادموعها من كثر البجي وحست أن الصياح ماهو نافعها ابد

اه ياحضي الردي وش بينفع صياحي هذا هم من جيت وهم محد سأل عني بس هالخدامه الي حاطينها حارس لي وتشوف طلباتي وقفت وقلت بهدوء احاول امسك اعصابي :روما

الخدامه:يس مدام

قلت بنفس الاسلوب:ابي اطلع ابي اكلم مدام حصه

الخدامه دقت جرس المناداه ودخلت عليها خدامه ثانيه وارسلتها تنادي حصه

كل هذا وعهد مندمجه
قالت بنفسها بل كل هذا حرص والله لو كنت مجرم ماشددوا علي بهالشكل

بعد ربع ساعه دخلت حصه مع ان عهد ايأست من جيتها اصلا
لكن صدمها دخولها وهي معصبه قالت
حصه بغضب:خير وش عندج طالبتني

عهد بتوتر:ابي اكلم عمي فواز بموضوع مهم

حصه بقهر خاصة وان عندها ضيوف من صديقاتها جايين يهنونها بعرس حمد الي قرب قالت: عبالي عندج سالفه وبعدين فواز سافر وين اجيبه

عهد بقهر:ابي اكلمه لو بالتيلفون والحين

حصه بنرفزه :اقول انثبري بس وطلعت وعهد الحقتها بس الخدامه قدرت تقفل الباب قبل تلحق حصه

عهد ضربت الباب بقوه لدرجة ان يدها تأذت وجلست على الأرض بس ماصاحت ولا تبي تصيح خلاص زمن الصياح راح

رفعت عينها للخدامه الي قربت لها بترفعها بس هي دفتها وقامت وراحت اجلست على كنبتها او سريرها من دخلت هالقصر

8 - 2 - 2015, 08:58 PM

بعد يومين

عند سحر بالشغل

سحر بحزن:والله مادري شقول لج ياساره انتي تدرين عهد تمر بظروف صعبه مع اهل ابوها واكيد يبي لها وقت على ماتناقشهم بالموضوع

ساره بأهتمام:الله يسهل ان شالله بس انا استغربت طولت واخوي مستعجل

سحر :خلاص انا بدق عليها اليوم وقول لها
ساره بسعاده:فيج الخير والله
وجلسوا يسولفون شوي وبعدين كل وحده راحت لشغلها بس سحر قبل تروح دقت على عهد

عهد الي من جت وجهازها سايلنت واذا بغت تكلم تنخش بالحمام تخاف ياخذونه مثل الي قبل

شافت شاشت نقالها تأشر تسحبت ودخلت الحمام وقفلت الباب وفتحت الدش عشان الصوت

سحر بحب بعد ماوصلت لعهد كل الي انقال بينها وبين ساره :عهد حاولي تصرفين لاتضيع هالفرصه من يدج خاصه وان الولد زين وفارس يمدح فيه بعد

عهد هو بكيفي ياسحر لو كيفي واعوذ بالله من لو جان ماتأخرت لحظه وافقت عليه بس الخطبه الي ماجت ألا هالوقت بعد ماصار
شوري بيدهم قبل لايكون بيدي

قالت بحزن: ان شالله بس خل ألقى لي فرصه اكلم فيها عمي
ورد لج خبر

خذت وقت وهي تسولف مع سحر ماحست ألا وباب الحمام يطق
عهد بخوف:يالاه سحر اخليج مع السلامه
وسكرت وخشت النقال في صندوق المناديل وفتحت الباب بعد مااسحبت الفوطه وحطتها على شعرها تبين لهم انها متروشه

اول مافتحت كانت ترجف خوف بس ارتاحت طلع الخدامه تناديها على العشا

كان ودي اكفخها لانها خرعتني بس خفت تستلعن علي وتكرهني وانا مو ناقصه ابد

دخل القصر الساعه وحده نزل من سيارته ومشى متوجهه لباب الفيلا بس شدة شكل الظل الي طل من غرفة الضيوف توقع انها عهد مافي غيرها
بس اقهره طلتها مع الشباك كأنها حارس تشوف الداخل والطالع
طنش ودخل

اول مادخل شاف امه وحمد وشكلهم في جلسه خاصه من طريقة ارتباك حمد وتوتره
لما دخل

سند ببتسامه:سلام عليكم ودنق باس راس امه

الكل:هلا وعليكم السلام

جلس وقال بأهتمام:غريبه شعندكم سهرانين لهالوقت

امه كانت تناقش حمد في زواجه من سهام وصدمها يوم ابدأ رايه بانه مايكن لها اي مشاعر وانه بيتزوجها كونها بنت عمه ومحجوزه له فقط

هي حاسه بتغيره ودها تفهم السبب الي قلبه راسأ على عقب بعد ماكان متحمس على الزواج بس خافت يزيد صدمتها صدمه وفضلت السكوت ابرك على ان حمد اذا اخذ سهام ممكن تقدر تغير رايه ويحبها

امه بهدوء:ابد كل خير بس اسأله عن حجز الخدمه اكد عليه او لا
حمد فهم على امه وانها ماتبي سند يعرف بس هو ماهمه كل هذا الي هامه وذابحه عهد الي تمركز حبها بقلبه وقف وقال بتنهد: تصبحون على خير وطلع

امه بحب:وانت من اهله يمه
بعد ماطلع حمد مر صوب غرفة عهد شاف الليت مبطل قرب منها وده يتطمن عليها

كانت منسدحه وسرحانه شافت روما الي غطت بسبات عميق ابتسمت افضل مافي هالخدامه هذاي
انها اذا نامت ماتحس بالي حولها غلطانه عمتي يوم حطتها حارسه لي بعد فتره
عهد الي انتبهت لصوت والحركه عند الباب توقعته عمتها اوقفت
بسرعه وراحت له

قالت برجا بعد ماوصلت لباب: عمه ارجوك سمعيني عدل

حمد انصدم ماعرف شيقول او يرد ماحس بنفسه ألا وهو قايل بأرتباك:انا حمد موعمتك

عهد بخوف: حمد من

حمد بتوتر وهو يتلفت خايف احد يصيده:مو مهم حمد من المهم بشنو اقدر اساعدك

ماحس بالي يقوله هل هو صح او خطا اهم شي انه يساعدها وبس

عهد بأرتباك وهي مو مستوعبه هالشخص هل صادق او انه كاذب قالت: ابي اكلم عمي فواز ضروري ارجوك ساعدني ابي رقمه اذا كان صج مسافر برا

حمد بتنهد:ان شالله سجلي الرقم عندك

عهد برتباك:لحظه بس وراحت تجيب لها ورقه وقلم

جت وقالت:تفضل قول اسمعك وحمد نقلها الرقم وهو حاس برتباك لاحد يمر يشوفه

واول ماخلص استاذن وراح قبل لاحد يجي وهو حاس بالرضى من الشي الي سواه مع انه ماحس انه سوا لها شي

عهد حست بسعاده وضاق خاطرها انها مااشكرت هالي اسمه حمد ودها تشوف شكله ياترا هو نفسه الي قابلته قبل لما طقت باب غرفته

رجعت تنام وطفت الليت بعد ماخشت رقم عمها وقررت تكلمه باجر

آخذت عهدن علي آني ماآخليك

وآن طال الزمن هجرك مانويته

شفت طاري الزعل آنه مخاويك

ومقصد الهجرآن بعينك قريته

خذيت حزني مع ذكرى تناديك

وتركت لك دمعه مع ضحكن نسيته

8 - 2 - 2015, 08:58 PM

عند حمد

وصل لغرفته وهو حاس بسعادة الدنيا من انه سمع صوتهاماانتبه ألا وصوت سند الي قال:حمد انت بعدك مانمت واحنا الي توقعناك بسابع نومه

حمد بخجل وحمد ربه انه وصل لباب غرفته قبل لا يشوفه سند ويسأله من وين جاي قال:لا دق خويي واخذتنا السوالف ولا حسيت بالوقت

وكمل ببتسامه وهو يدخل غرفته :تصبح على خير

سند بضحكه:كم مره قلتها ولا نمت اخاف من كثر ماتقولها يطير عنك النوم

حمد بنفسه والله النوم ان طار فهو من الي في بالي اه بس اه كل ماتذكر شكلها طولها شعرها قلت ببتسامه:والله اتوقع هذا الي بيصير

وأستاذن سند وراح لجناحه وسند بعد دخل جناحه

ياهل ترى قلبآ من الآحزان لايكتفي

ياهل ترى قلبآ على صبر الزمآن يغتذي

كم من حبيبآ غادر العين والعين تذرفي

وكم من رحيلآ آسهر العين والحال يأتذي

ويلآه يا قلبن على مر الزمآن يضعفي

والعمر يفنى ومن درس الزمآن نحتذي

عند سند اول مادخل جناحه بدل ملابسه وانسدح على سريره الي يحس انه مازال محتفظ بقايا ريحة عطرها التفت للجهه الثانيه وراح بخياله وفكره معاها

مع الي ماحد قدر من جنس حواء انه يدخل قلبه عقبها

هي كانت الهواء الي يتنفسه هي كانت كل شي بحياته حتى عقب ماتت حرم نفسه من انه يرتبط باي وحده عقبها

تامل الغرفه الي جمعته فيها وياما صار لهم مواقف فيهاهو رفض انه يغير اي شي بجناحه مع ان امه لحت عليه اكثر من مره بس هو رفض هالشي حتى ولوانه حاس ان اهله يتشامؤن من دخول جناحه او المرور من عنده

بس هالشي ماشفع لهم عند سند هو كان محتفظ حتى باشياءها الخاصه من ملابس وقمصان كان مخبي هالاشياء عن اهله واهل سعاد لما جو واخذوا كل مالها يودونه لصدقات قدر سند انه يحتفظ بشي ولو انه بسيط

نام وهو في وسط افكاره الي دايم توديه لها لحبيبة قلبة وروحه سعـــــــــاد

8 - 2 - 2015, 09:00 PM

الحادي عشر

اليوم الثاني

عند حصه

كانت في حفلة استقبال عند احد صديقاتها

كان الكبر والغرور مسيطرها ولا تنظر لأحد وكأنها ملكة زمانها

خاصة مع كشختها ولبسها الي ماتسويه ألا عند اشهر المصممين

ألتفت لشهد بنتها الي جايبتها معها غصب مع ان شهد تركه هالجمعات ولاتحب تروح لهم

قالت بنرفزه وهي تشوف شهد الي ماده بوزها وكأنها بعزا مو بحفلة ملجه:ابتسمي فضحتينا عند الناس الكل عرف انج جايه غصب

شهد بخجل:هاه لا مو قصدي بس احاتي فجوره تدرين خليتها وهي تعبانه

امهابتنهد:مافيهاألا العافيه وبعدين سند عندها من عرف انها مسخنه وهو تارك شغله ومقابلها

شهد بحب:فديت عمره وعساني اشوف اعياله قولي امين
امها برجا:امين وكملت بأنفعال: عسى يجي هاليوم ونذرا علي لسوي عزيمه ماصارت ولا استوت بس اشوف ضنا سند

بعد فتره جت لهم صديقة ام سند ومعها وحده في بداية الثلاثينات ماتعرفها ام سند وأول مره تشوفها

اضغطت على اتصال وهي حاسه برجفه تسري بكل جسمها اشلون بتكلم عمها وتشرح له موضوع خطبتها حاسه بخوف وخجل في نفس الوقت بس لازم تصرف عشان تخلص من هالحبس
عهد جاها الرد بسرعه

فواز شاف الرقم دولي رد بسرعه :الو

عهد بتوتر:سلام عليكم

فواز استغرب الصوت
وخاف لاتسمعه ندى وتسوي له سالفه قام وطلع ورد عليها:هلا وعليكم السلام كمل بهدوء:من معي

عهد الي ترجف وزاد عليها اسلوب عمها الجاف قالت: معك عهد وكملت برجفه:بنت اخوك سالم

فواز بدهشه:عهد
وكمل بدون نفس:خير ياعهد وش عندك داقه

عهد ودها تسده بوجهه على هالاسلوب الزفت قالت بنفسها صج انك انت وأختك من طينه وحده والعياذ بالله

طولت ماردت وقال فواز بسخريه :لايكون منحاشه بعد وداقه تهددين

عهد بضيق:لا داقه ابيك في موضوع وياليت تسمع مني

قال بطفش:قولي وش عندك عهد بتوتر:جا لي خطاب ويبون يقابلونك ضروري

فواز صح فرح بهالشي بس مابين فرحته قال بنفس الأسلوب:يصير خير عطيهم رقمي وانا بتفاهم معهم

استبشرت من رده خير وقالت بحيا:ان شالله

انهت المكالمه من عمها منيه وراحت تدق على سحر بسرعه وتقولها

منصدمه من الي سمعته وقاعده مركزه في كل حرف تقوله هالحرمه من مدح لبنت اخوها عهد حست بالغيره خاصة وان كل الي بالمجلس ركزوا معها في مدح جمال واخلاق عهد

ولاموها لانها ماعرفتهم عليها قالت بفخر:تسلمين حياتي بس ماعرفتيني انتي من بنته

ساره ببتسامه:انا ساره بنت جاسم ال

حصه بسعاده :تشرفنا
وكملت بفخر:وين عرفتي عهد

حست بسعاده خاصة وان هالعايله مستواها عالي جدا بس للأسف مايمديها تفرح ألا ونصدمت من قول ساره
ساره بسعاده: تشغل ممرضه عندنا بمستشفى عمي وتعرفنا على بعض مع اني مو بقسمها بس ونعم المعرفه والله

حصه ودها الأرض تنشق وتبلعها ولا انها درت ان عهد تشتغل ممرضه حست بالخجل عقب ماكانت مغتره بكل المدح

ساره ببتسامه: ممكن توصلين لها سلامي وتقولين لها تستعجل بالرد علينا لان اخوي مستعجل

حست بغيمه سودا اجتاحتها من شدة الصدمه مو قادره
تستوعب انهم ممكن يناسبون هالعايله عن طريق عهد

ابتسمت وقعدت تشوف ساره الي راحت عنها

سمع صوت باب جناحه يطق قال :تفضل لبس قميص بجامته وطلع من غرفته يشوف من

سند ببتسامه لما شاف انه حمد:هلا حمد حياك ياخوي

حمد ببتسامه: هلا فيك ياخي قلت اجي اشوفك من الصبح وانت مرابط عند هالفجوره ولاحد شافك

سند بحب:فديتها تو نامت وقلت اجي اخذ لي حمام خفت تنتقل لي العدوه

حمدبضحكه:انت الي جايبه لنفسك وش حادك على الشقا ومقابل البزران
سند بقهر:انت تعرف فجر وش تعني لي

حمد ببتسامه:اعرف واحس انك حتى اذا جالك اعيال وكمل وهو يرفع يده لسما:ان شالله مراح تحبهم كثر حبك لفجر

سند الي ماحب هالطاري قال: خلنا من هالطاري وقلي شعندك جاي لي
كان حاس ان حمد عنده شي ويبي يقوله

حمد بتنهد: مادري شقول لك ياسند بس ابيك اتجاوبني بكل صراحه
سند بأهتمام:تفضل وانا مستعد اجاوبك
حمد بضيق:لما تزوجت المرحومه هل كنت تحبها قبل الزواج ولا لما تزوجتها حبيتها

ليش ليش ياحمد تفتح جروحي الي ماضنتي تسكر ابد جاي تسألني عن حبي لسعاد حبي لسعاد مااقدر اوصفه بالكلام لانه صعب جدا وصفه
حمد بضيق لحال سند الي سرح بفكره ونسى يجاوبه:سند انا اسف واع

قاطعه بهدوء: لا لا ياحمد انت ماقلت شي وانا مستعد اجاوبك مثل ماوعدتك
كمل بحب: انا اخذت سعاد وماكان يربطني فيها اي حب حتى هي نفس الشي بس بعد الزواج والعشره عشقنا بعض وكمل ببتسامه:غير هالسوال عندك شي

حس ان حمد متورط انه اشلون بياخذ وحده مايكن لها اي مشاعر بقلبه وماعمره قعد معها ألا بعد الملكه بس

حمد ارتاح اشوي وتمنى ان سهام تقدر تنسيه عهد قال بخجل:ابد سلامتك ومشكور الي جاوبتني واستاذن وطلع لانه حس ان سند تعبان من وقفته مع فجر من الصبح وزاد تعبه ذكر طاري سعاد حبيبته

شهد بضيق:يمه وش فيج البنت ماسوت شي

حصه بقهر:انطرها لين تسوي ان شالله وبعدين ليش ماقالت لنا عن سالفة الخطبه لايكون كانت ناويه تنحاش وتاخذه بدون علمنا اي تسويها

شهد بيأس:يمه هدي وفكري بالموضوع عدل وزين منا عرفنا من الجماعه قبل لاترد عليهم

حصه بنرفزه:هين ياعهد خاشه عني خطبة ولد جاسم لج هين ان ماوقفت هالزواج ماكون بنت ابوي لانج ماتستاهلين تاخذين هالعايله

شهد بضيق من كلام امها:يمه
حصه بغضب:وصمه قولي امين وراحت وهي في قمة عصبيتها من خطبة عهد

اسمعت صوت اصراخ عمتها وحست بالصوت كل ماله ويقرب لين ماانتبهت لفتح الباب بقوه وكان شكل حصه يخوف من كثر ماهي معصبه

جت لها بسرعه وجرتها من شعرها بقوه وقالت بصراخ:يالي ماتستحين ولا تنتخيين متواعده مع ناس يخطبونج ومن ورانا بعد

عهد الي ماستوعبت وكانت تحاول تفك نفسها من يدين عمتها قالت:هديني شسويت لج عشان تطقيني
حصه دزتها بقوه لدرجه ان عهد تأذت من الطيحه بس عمر حصه ماحست قالت بغضب: سويتي الي ماينتسوى يابنت سالم اشلون تخشين عنا موضوع خطبتج

عهدبصياح من القهر قبل لايكون من العوار الي تحس فيه بسبب الطيحه: والله ماخشيت عنج بس انتي ماعطيتيني فرصه عشان اقولج كل ماج

قاطعتها بغضب:بس مابي اسمع اي عذر بس الي ابيه انج تدقين على رفيقتج وتقولين لها انج رافضه

عهد بصراخ:بس انا موافقه عليه ومستحيل ارفضه

حصه قربت ومسكت كتفها بقوه قالت بقهر:مو بكيفج وانا الي اقرر

عهد دزتها ووقفت مواجهه لها قالت بصراخ:لا موبكيفج وانا قلت لعمي وراح اخذه غصبا عنكم

ماحست ألا بطراق حار بوجهها قالت حصه بنرفزه:وريني اشلون تاخذينه ياعهد وطلعت

وعهد جلست على الارض تصيح كانت متفاءله خير بس الظاهر عمتها مو ناويه تعتقها لوجه الله وبتم مستعبدتها طول عمرها

شهد كانت واقفه عند الباب وسمعت كل الكلام شافت امها يوم طلعت وهي معصبه وصعدت بدون لاتلتفت لها

شدها صوت عهد الي تشهق وسحبوها رجولها للغرفه عشان تطمن على عهد

بس اول مادخلت فاجأها صراخ عهد بوجهها:اطلعي بررررا وكملت بشهاق وهي تدفن وجهها بين ركبها: اعتقوني حرام عليكم والله حرام

شهد الي اجرحتها هالكلمه ماقدرت تحمل وطلعت وهي تخفي دموعها الي ذرفت

صعدت لغرفتها ركض ماخطر في بالها انها بتسمع هالكلام من عهد حست بعظم الذنب الي اقترفوه بحق هاليتيمه ماحست ألا وهي صادمه سند

الي كان نازل بيسهر مع ربعه وخرعه شكل شهد قال بخوف وكل طاري يطري عليه:شهد اشفيك فجر فيها شي
شهد بأرتباك :لا اسم الله عليها قال بستفسار:زين ليش هالصياح
شهد بدون نفس بس بتصرف سند قالت وهي تدخل غرفتها:متضايقه شوي لاتحاتي وسكرت الباب وسند ماحب يتدخل خاصة وان نفسيتها الحين زفت ولاتساعد

8 - 2 - 2015, 09:01 PM

اليوم الثاني

دقت على فواز تعلمه وتفاجأة ان عنده خبر وماعنده اي مشكله وحست انه فرحان وفرح اكثر لما عرف الجماعه بس حصه لايمكن تتركهها تهنى مثل ماأمها احرمتها من اخوها جا الوقت الي بتنتقم فيه واتحرم بنتها من السعاده طول عمرها

حصه بغضب:بس انا مو موافقه
فواز بدهشه: ليش ان شالله بدال ماتفرحين لانها بتفارقك ترفضين
حصه بأرتباك وكذب:اي انا تعودت عليها ومابيها تغيب عن عيني
كملت بخداع:جيتها عندي عوضتني عن ابوها الي انحرمنا منه

فواز حس بمشاعر اخته هو عارف بمدى تعلق حصه بسالم و حب سند لفجر هالحين يذكره بحصه وحبهاسالم قال :بس البنت مصيرها تزوج وهذا هو نصيبها جا مانقدر نرده

حصه الي مخططه لك شي قالت بتنهد: نصيبها مو ولد جاسم نصيبها هو سند ولدي

فواز بصدمه:سند انتي من صجج
حصه:اي من صجي وبتشوف بس انت اذا كلمت الجماعه ارفض مفهوم
وانهت المكالمه وخلت فواز في صدمته
بهالقرار الي ناويه عليه وهو عارف اخته اذا حطت شي براسها تنفذه بدون نقاش

صحت على صوت تيلفونها الي يهتز بجيبها شافت الساعه كانت عشر الصبح هي ماتدري متى نامت من عقب معركة امس شالت تيلفونها كانت سحر

عهد بتعب:الو
سحر :هلا عهد اشلونج
عهد بضيق ودموعها تجمعت: مو بخير طول ماانا عندهم ماني بخير
سحر بخوف:عهد حبيبتي شفيج صار لج شي
عهد ماحبت تطول خافت لحد يجي ويشوف تيلفونها قالت تنهي النقاش وعشان بتروح تصلي الفجر لان راحت عليها نومه : لا مثل العاده حاسه بطفش من هالعيشه
كملت:سحر اكلمج بعدين بروح اصلي الفجر طافني
سحر :اوكي مع سلامه

سند بصراخ: يمه انتي شتقولين انا لايمكن اتزوج عقب سعاد

امه بغضب:سند ترا صبرت عليك بما فيه الكفايه وجا الوقت الي بغصبك فيه على الزواج

سند بنرفزه:والله اذا كنت بزر عندك اغصبيني
امه بغضب:سند
سند بغضب: زواج عقب سعاد انسي ياخي انا مستانس جذي انتم شعليكم

حصه بأصرار:كلمه ورد غطاها زواجك من بنت خالك بيتم
سند بغضب:لا والله وحددتي العروس بعد
حصه بغضب:وحددت العرس بعد بيكون مع حمد بعد اسبوعين

سند اكره ماعليه المعاند مايحب ينغصب على شي خاصة في حياته الخاصه طنش كلام امه وطلع وهو يسب نفسه على هالحاله

حاس بضيقه في صدره ولاهو قادر يتنفس عقب الي سمعه ان اخوه وعضيده بياخذ حبيبته الي مانبض قلبه ألا لها
قال بضيق لشهد الي بثت له الخبر:وسند وافق

شهد بتنهد: امي مصره ألا يتزوج وهو كالعاده معند

كملت بحزن:احس ان امي راح تظلم عهد ان زوجتها سند وهي عارفه رايه بسالفة الزواج

حمد ماحس بعمره ألا وهو طالع من الغرفه احتار وين يروح يبي هوا يحس انسد نفسه بالأخير قرر يطلع من القصر كله

اه ياقلبي اشلون بتحمل اشوفها عند سند اشلون بقدر اتقبل هالشي بدون ماانجرح لا لا ياحمد قو قلبك واذبح حبك قبل لاينفضح امرك بين اهلك ويوصل لسهام انسى عهد ياحمد لانها مو لك ومستحيل تكون لك وانت عندك غيرها

8 - 2 - 2015, 09:03 PM

الثاني عشر

جاها خبر خطبتها لولد عمتها مثل الصاعقه حست بحراره تسري بكل اطرافها ماقدرت تحمل وجلست على الكرسي اول ماشافت عمتها طلعت بعد مابثت لها الخبر

وهي بدون نقاش وافقت

عهد موعارفه تحدد مشاعرها هل هي فرح لخطبتها ولانها بتزوج بعد هالعمر اوانه فرح لان ولدعمتها فكر فيها وبياخذها عن الغريب

معقوله هو نفسه الي صادفته كذا مره معقوله حبني وعارض على زواجي من اخو ساره وقال انا اولى فيها

ابتسمت لأفكارها وسرحت في خيال حمد الي حتى اسمه ماتتذكره بس تذكرت مواقفه المشرفه معها اشلون عطاها رقم عمها وساعدها في انها تكلمه

همست بقلبها بحب :الله يقدرني على اني اسعدك ياولد عمتي اضحكت وكملت: نسيت اسأل عمتي عن اسمه من الفرحه انخرست وماقدرت اسألها عن شي

يووه هو قاله بس ماكنت منتبهه ذاك الوقت

ابتسمت ووقفت قالت:خل اكلم سحر وابشرها

راحت تبي تكلم سحر وهي جاهله عن كل حياتها الي بتواجهها مع سند الي ماعمرها شافته او ألتقت فيه بس حطت في بالها على طول حمد انه هو الي خطبها لانها حست من نظراته لها وطريقة كلامه انه يكن لها مشاعر

انصدمت توقعتها تعارض او تصارخ وترفض بس طلع العكس انها ماعارضت وسكتت وهذا يدل على الرضا وصدمها اكثر نظرة السعاده الي حستها في عيونها وهي تبث لها الخبر

معقوله موافقه وانا الي قلت بتعذب بغصبها على الزواج من سند طلعت علي اهون من سند نفسه
اي خل ادق على سند واقوله عشان يجهز نفسه عرسه مع عرس حمد اخوه

دقت وعلى طول جاها الرد
سند برود:الو

امه بركاده:هلا سند اقول متى بتجي
سند وعينه على اوراقه :بعد ساعه ليش في شي

امه بسعاده:لا سلامتك بس ابيك تجي بدري عشان نرتب امورنا لعرسك

سند بتأفف هذا والله البلشه قال بغضب:يمه مثل ماغصبتيني على بنت اخوك تحملي كل الي يجيك انا تجهيز مراح اتجهز ومهر مراح ادفع لها فلس حمر لاني وبساطه مابي اتزوج ولاابي ارتبط بأحد بعد سعاد

امه بنفاذ صبر من سند وعناده لها قالت:شوف ياسند انا سكت عنك بما فيه الكفايه وزواج بتزوج وغصبن عليك واذا على سالفة المهر لاتحاتي انا باخذها واجهزها من فلوسي وسدته بوجهه وهو من القهر حذف السماعه بكل قوته

بعد ماسكرت من سند او بالأصح سدته بوجهه دقت على فواز وقالت له عن موافقة عهد على سند وقالت له يجي عشان الملكه الي بتكون قبل العرس بيوم
فواز استغرب هالشي وكان بيفاتحها بخطبة سامي الي حدد معهم موعد بس خبر خطبه سند وموافقة عهد لخبطت الأمور عنده وقرر يدق على سامي ويعتذر منه

كان مثل الأسد الثاير الي يرفض الحبس ويبي يرجع للبراري حس انه اذا تزوج بينسجن او ينحبس
من كثر ماهو غاضب حذف كل الأوراق والملفات حتى المهمه ماهو قادر يستوعب الي يصير معقوله ياخذ عقب سعاد حرمه معقوله يخونها لا لا مستحيل انا مستحيل ألمس وحده بعد سعاد

صرخ بأعلى صوته: حمووود

السكرتير جاله ركض قال بخوف:سم طال عمرك

سند بنرفزه:رتب الحوسه واقفل المكتب واشر بأصبعه علامة تهديد:ياويلك تضيع منك اي ورقه لمهم عدل فاهم

حمود بغصه:فاهم
وتنفس عقب طلع سند وقال بسخريه: والله حاله يعصبون ويحطون حرتهم فينا وقعد يلم الاوراق بتركيز

دخلت شهد ومعها فجر الي راحت ركض لحضن جدتها تبوسها وتحضنها
ام سند بحب:هلا بقلبي باست خدها
شهدبغيره:وانا مراح تسلمي علي ولا اشوفج انتي وعيالج بس همكم فجوره

امهابحب وهي تأشر لها تجي تسلم:حرام عليج وباست شهد وشهد باست راسها
وجلست جنبها وكملت
ام سند بحب:وبعدين ماغلى من الولد ألا ولد الولد وفجر بغلاتج عندي

فجر براءه:ماما وين بابا س
ماكملت جملتها ألا وخرعهم صوت الباب الي صفق صفقه قويه هزت كل البيب
وكان سند مر من عندهم بدون لا يسلم حتى وصعد لجناحه وهو يغلي من الغضب

فجر جت بتلحقه بس ام سند وقفتها خاصة وان سند ماانتبه لها ولا مستحيل يخلي فجر تشوف غضبه

شهدبخوف:سكنهم مساكنهم اشفيه تقول داخل على يهود حتى سلام ماسلم

امها بتنهد:خليه بكره بيحس ويعرف ان كل الي اسويه من صالحه وراح يشكرني بعد

شهد بشك:بخصوص زواجه من عهد
امهابنرفزه:اي وابشرج وافقت وكملت بفخر: وين بتحصل احسن من سند مال وجمال واخلاق اسم الله عليه

شهد برجا:وافقت من غير اي ضغوط قولي الصج يمه ارجوج
امهابتاكيد:والله ماضغط عليها هي الي رضت اناما انكر اني كنت راح اضغط عليها لي رفضت بس زين الي وافقت بدون اي مشاكل او ضغوطات ووقفت ومعها فجر الي تحن تبي سند وجدتها مانعتها
قالت بتنهد:اي ابيج تاخذي عهد لسوق وتساعديها بالتجهيز شوفي ابي تجهزها فخم وجخ والكل يتكلم عنه وراحت مع فجر وتركت شهد تصارع اهمومها هم زواج سند من عهد

8 - 2 - 2015, 09:05 PM

عند عهد

سكرت من سحر بعد مابشرتها بخطبتها كانت سحر فرحانه لانها بتزوج بس كان في شي مخوفها خاصة وان الي خاطبها ولد عمتها
بس عهد ابعدت هالخوف وقالت الشخص الي شفته مايحمل بقلبه ألا الطيبه والحنان واحس ان الله عوضني خير كل مااتذكر شكله

انتبهت لطق الباب الي تركوه مفتوح عقب مارضت تزوج ولد عمتها لان ماله داعي تخطط وتهرب و قالت :اتفضل

شهد بضيق:سلام عليكم كانت خايفه تطردها اوتصرخ عليها عقب اخر مره

عهد بحيا:وعليكم السلام حست بخجل لانها تذكرت اخر موقف صار لها مع هالبنت الي ناسيه حتى اسمها
ابعدت هالأفكار قالت:حياج تفضلي
شهد ببتسامه:مشكوره وجلست
كملت بنفس الأسلوب:ودي اشرب معاج قهوه وادردش شوي اذا ماعندج مانع
عهدبسعاده:بالعكس حياج ودقت على المطبخ تطلب قهوه

وشهد قعدت تأمل شكلها وتخزها خز ابتسمت بنفسها صاجه امي بكره بيشكرها سند على هالحوريه لانه مستحيل بيتركها خاصة وان جمالها يكسر الصخر

قطع عليها صوت عهد
عهد بأسف: اسفه على الي صار قبل صدقيني ماكان قصدي اطردج بس ا

شهد بحب:لا انا الي اسفه كان المفروض مااتدخل
عهد بضيق: لا عادي كملت ببتسامه اسحرت شهد فيها ولو كانت ولد لداخت منها:ألا انتي شنو اسمج ترا ماعرفه

شهد بحب:شهد وعندي بنت اسمها فجوره كملت بضيق: يمكن سبق وشفتيها

عهد ببتسامه لان شهد تذكرت وقت ماهاوشت فجر ومنعتها تجلس معها ومن ذاك اليوم والبنت منفذه اوامر امها:اي الله يخليها لج
تموا فتره ساكتين ويشغلون انفسهم بالحلو والقهوه0الي وصل لهم

بعد فتره تشجعت شهد وقالت: عهد انتي موافقه على سند اخوي صح

عهد اخير عرفت اسمه طلع اسمه سند ياحلو اسمه وعساه ان شالله يكون سندلي في هالدنيا بخجل:اي موافقه

شهد براحه كانت خايفه تكون امها تكذب وان البنت مغصوبه:
اجل مبروك وجهزي حالج من باجر بنحوس بالأسواق عشان تجهيزج ياعروس

عهدبستغراب:بهالسرعه تو الناس وبعدين مامر على وفاة امي سنه مابي اتزوج واسوي طقطقه
شهد بحب :ياقلبي سند بيتزوج بنفس تحديد حمد اخوي هذا قرار الوالده تبي تفرح فيهم مع بعض

عهد شدها اسم حمد وكأنها تذكرت شي بس ماركزت وقالت بضيق:ومتى تحديد حمد

شهد وهي تأشربصابعها:بعد اسبوعين
عهدبصدمه: لا مستحيل ماقدر
وكملت بحزن :مابي اتزوج وامي مامرعليها سنه
شهد بحزن:عهد انا مقدره ضروفج وحاسه فيج بس هذا غصب عني وعنج
وكملت بضيق:وبعدين حمد شذنبه هو وزوجته تنحرمهم من الطقطقه والسعاده

عهد بأصرار:خلاص موافقه على العرس بس يكون بعلمكم
مراح ادخل صاله ولا ابي اي طقطقه انزف على طول بدون شي

شهد بنفسها يكون احسن لان من بيقنع سند يدخل الصاله خاصة عقب الأعصار الي سواه من عرف بمواقتج قالت:على راحتج

8 - 2 - 2015, 09:05 PM

قبل العرس بيوم

عهد حايسه بتجهيزها مع شهد حست بحب اتجاه هالبنت وعرفت انها ظلمتها حيل لان شهد بينت لها عكس الي متخيلته كانت متوقعه ان كل عيال عمتها نسخه منها بس الي شافته عكس

والدليل فارس احلامها الي تنتظره والي ماعارض قرارها بأنها ماتبي زفه وطقطقه بالعكس وافق بدون اي نقاش ودها تشكره اول ماتشوفه لانه قدر ظروفها

ادخلت غرفتها وحذفت الأكياس ورمت نفسها على الكنبه وقالت بتعب بعد مافصخت حجابها: مراح اطب السوق منيه لي سنه

شهد بضحكه وهي تجلس:ليش
هذا وانتي اول مره تطبي هالأماكن

عهد بضيق توقعت ان شهد تعايرها بفقرها:صح اول مره لان ماقدر اشتري من هالأماكن بس مو هذا قصدي الي اقصده ان هالملابس بتلبسني سنه مابقى شي ماشريته لي وكملت بضيق:احس ان اخوج بيسب نفسه لانه عطاج بطاقته وقال لج جهزيها

شهد مسكينه مصدقه انها بطاقه سند ماتدري انه مادفع شي و انه ماسوى شي حتى جناحه بيسكنها على اثاث المرحومه والله ظلمناج ياعهد وألا انتي ماتستاهلين سند لانه مقعد

شهد ببتسامه:مايغلى عليج ولو خلصتي هالبطاقه بشتري لج من بطاقتي وعلى حسابي ابي الكل يشوفج احلى عروس بالدنيا

عهد بدون ماتحس رمت نفسها بحضن شهد وساحت دموعها لان كلام شهد ذكرها بالغاليه امها الي اخذها الله قبل لاتفرح بزواج بنتها وحيدتها

شهد حضنتها بحنان وهي تدعي ان الله يسخرلها سند وانه مايظلمها بزواجه منها

قطع عليهم صوت فجر
فجر بدلع : ماما وين ثوبي حق العرس بوريه بابا سند مو قلتي بتروحي تطلعيه

شهد بعد مابعدت عنها عهد وشافت عهد تمسح ادموعها قالت بضحكه وهي تعطي فجر كيس ثوبها عشان تغير الجو: خذي وري بابا سند وقولي لنا شنو رايه فيه
راحت فجر بسرعه وكملت شهد ببتسامه:مرات احس بالغيره من هالسند لان بنتي تحبه اكثر مني انا وابوها حتى

عهد براحه : ماودج نشوف حنا بعد اثيابنا

شهدبخبث:ألا والله بس نبي سند يقولنا عن رايه بعد مو بس فجر
عهد غصت من الخجل ولا ردت وشهد ماتت ضحك عليها

الساعه ثمان بالليل

تمت ملكة على بنت خاله الي كارهاوكاره شوفتها كونها انفرضت عليه فرض وهو الي كان رافض فكرة الزواج بعد حبيبة سعاد
لانه حاس انه ماهب لاقي احن واطيب منها وحاس انها شي نادر مستحيل يصير منه اثنين

قطع عليه فواز الي توه واصل اليوم هو واهله عشان العرس فواز ببتسامه:مبروك ياسند منك

ماكمل لان سند قال وبسخريه:الله يبارك فيك وترك المكان وراح يوصل الشيخ برا

فواز شالسالفه هذا وجهه واحد بيعرس كمل بسخريه: اخاف امه غاصبته اختي واعرفها داهيه اذا بغت شي غصب يصير تنهد وقال:عموما مغصوب او مومغصوب اهم شي اخذ بنت سالم وريحني من همها وهذا الي ابيه صار

حمد كان داخل البيب ومعاه اغراض لجناحه صادف سند واقف برا ويدخن بشراسه

تاكد انه تمت ملكته على عهد بعد ماشاف شكل اخوه الغاضب
ماحب يكون موجود وقت الملكه اعتذر بأشغاله بس عشانه مايقدر يواجهه ملكة عهد على اخوه خاف انه يتهور ويوقف كل شي وينفضح امره فحب يبعد افضل له

حمد ببتسامه كاذبه تخفي مافي داخله من حزن قال وهو مار من عند سند:مبروك ياخوي

سند فار دمه كره هالجمله كأنها تذكره بيوم موت سعاد وقت ماعزوه قال بصراخ: مبروك مبروك بس عاد ترا لاعت جبدي وحذف سجارته وراح داخل

بيختلي بجناحه الي اجمعه بسعاد بيروح يدور بأغراضها على ريحتها الي محتفظ فيها للحين في جناحه

8 - 2 - 2015, 09:09 PM

الثالث عشرلكم احبائي

عند عهد

ارتسمت على شفايفها اعذب ابتسامه بعد ماسمعت يباب عمتها الي وصل لي غرفتها اعرفت
بعده ان الملكه تمت

حست بالتوتر الي خالطه قليل من الخوف اوهمت نفسها ان الخوف الي تحس فيه ما هو ألا لان حالها حال اي بنت بتزوج وبتعيش مع شخص غريب

تحت سقف واحد

شافت الباب انفتح اوقفت وهي تخفي توترها عشان تشوف من الي جاي لها و كانت عمتها

حصه الي طايره من السعاده مو لان سند بيتزوج بعد هالعمر لا لانها بتقدر تنتقم من عهد بزواجها من سند لانها عارفه وضامنه حب سند لسعاد وانه مستحيل ياخذ بعدها او يحب

حرمه ثانيه

حصه اخير ياعهد باخذ ثاري من اهلج الي احرموني من اخوي وضيعوه وشمتوا فينا الناس عقب ماكان الكل يطمع فينا صرنا علج بألسان الي يسوى والي مايسوى خاصة اهل زوجي الي ذبحوني بكثر مايعيروني بأخوي وانهم خايفين اعيالي يسوون مثله فحرموني من اهلي لين ماتبرأ ابوي من اخوي سالم وطرده بس الحين قدرت اخذ حقي منج قالت
ببتسامه ساخره :مبروك

عهد خوفتها نظرة السخريه الي شافتها وتوقعت انها رافضه هالزواج وان ولدها هو الي مصر ياخذهاقالت بأرتباك:الله يبارك فيج

تموا فتره كل وحده تنظر لثانيه وتحاول تعرف شيدور في بالها حصه كان يدور في بالها اشلون بتكون حياة عهد مع سند خاصة وان سند رافضها ابتسمت بخبث وقالت بنفسها :ودي على مااخرب فرحتها وبث لها خبر رفض سند لها واعلمها بكل شي حتى سالفة المهر
وان سند مادفع لها شي

بس احسن شي اخليه بكره قبل لا ازفها لسند ابشرها بكل شي وافهمها عشان لا تستغرب اي تصرف يتصرفه معها سند

اما عهد الي كان يدور في بالها كان عكس عمتها تماما
كانت متوقعه رفض عمتها لزواجها من ولدها خاصة بعد ماشافت نظرات السخريه والحقد عليها

ابتسمت وقالت بنفسهاوهي حاسه بنصر:بتندمين ياعمتي العزيزه على كرهج لي وعلى معاملتج الزفت معي ان ماخذت ولدج وغيرته عليج وكملت بخبث :اول شي بسويه بطلعه من هالبيت وثاني شي ماراح اسمح له يزورج ألا بالأسبوع مره وتقب عليج بعد

قطع عليهم صراخ شهد الي جت ركض بتحضن عهد وهي تقول:مبروك ياقلبي مبروك

امها انقهرت خاصة وان شهد تعلقت بعهد حيل خلال هالأسبوع الي قضوه بالتجهيزات
عهد بحب وهي حاضنه شهد:الله يبارك فيج
وكملت ببتسامه:عقبال ماتفرحين بفجوره

شهد برجا:امين عسى الله يطول بعمري وألحق ذاك اليوم

عهد بحزن لان امها ماعاشت ليوم زواجها:امين

شهد حست بالي دار بخاطر عهد وقالت بخبث بتغير الموضوع:اتوقع بينهبل سند لي شافج

عهد حمرت من الخجل وحست بسعاده من كلام شهد لها وقطع عليها فرحتها عمتها الي قالت بنرفزه: شهد
شهد بستغراب:خير يمه
امها وهي طالعه:تعالي ابيج بسالفه وطلعت

عهد الله يستر علي من هالعجوز الحسود حاسدتني على جمالي حتى بس هين ياحصيصه هين

شهد بخجل من اسلوب امها: عن أذنج عهد بشوف الوالده شتبي

وراحت
وعهد لفت وراحت اوقفت عند المنظره تأمل شكلها هي صح حلوه والكل يشهد بذلك بس كان الي حارمها من الزواج افعال ابوها
قالت بتنهد:الله يرحمك ويغفر لك
هذا الي اقدر عليه يابوي العزيز اني ادعي لك لانك بأشد الحاجه لدعاء
انترست اعيونها بالدموع وهي تذكر امها كان هذا كلامها دايما
تقول ادعي لأبوج هومحتاج لج الحين لاتدعين عليه
كاني انا مثلج اوألعن منج لان ابوي زوجني بواحد مثله بالضبط ورفض يزوجني لولد اخوه الي كلن يشهد بأخلاقه ورجولته

تنهدت عهد بضيق:الله يرحمج يالغاليه وعساج من اهل جنات النعيم على الصبر الي صبرتيه في دنيتج

تذكرت سحر لازم تدق عليها وتلزم عليها عشان تجي بكره هي وامها لانها تعتبرهم اهلها

وحضورهم واجب راحت تدق عليهم
وهي في قمة سعادتها بهالزواج الي ماتدري عن مايخفيه من معارك وصراعات

المواضيع المتشابهه لموضوع: فوق الجروح اللي بقلبي من سنين يكفي دخيل الله لا تجرحوني لموضوع: فوق الجروح اللي بقلبي من سنين يكفي دخيل الله لا تجرحوني
الموضوع	كاتب الموضوع	المنتدى	مشاركات	آخر مشاركة
الله حطك بقلبي على شكل رِضا و فرحة سنين	همسه الشوق	همس عالم حواء	5	27 - 9 - 2023 09:36 AM
ما انخلق بقلبي حب قد اللي فيني لك	حنين الأشواق	همس للاشغال اليدويه	2	1 - 8 - 2021 12:26 PM
نت السعاده اللي غمرتني من سنين	همسه الشوق	همس موبايلات الاندرويد	10	26 - 2 - 2020 04:19 AM
يكفي دخيل الله لا تجرحوني	همس الشوق	همس الشعر والقوافي	5	2 - 9 - 2012 01:19 AM
دخيل الله دخيل الحب دخيلك اكشف المستور	كــريــزمـآ	همس الشعر والقوافي	6	17 - 4 - 2012 11:56 PM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

فوق الجروح اللي بقلبي من سنين يكفي دخيل الله لا تجرحوني

همس للقصص وحكايات وروايات