فوق الجروح اللي بقلبي من سنين يكفي دخيل الله لا تجرحوني

7 - 2 - 2015, 10:12 AM

عند عهد

بعد نوبة بكا طالت لفتره حست بالدوخه وعوار ببطنها من شدة الجوع

صار لها فتره ماتاكل شي وهالشي اثر عليها حيل وجهها شاحب وحيل ضعفانه

وقفت بتروح تشرب لها ماي او اي شي يبلل ريقها ويسد جوعها

حطت على كتفها ملفع في حالة وجود احد غريب هي اصلا ماتدري اذا عمتها عندها عيال او لا
بس احتياط

7 - 2 - 2015, 10:13 AM

كانت الساعه ثنتين بالليل

طلعت تمشي بشويش لحد يشوفها ارعبها كبر البيت وحجمه الضخم كانت الغرفه الوحده فيه بكبر بيتهم كله

حاست بالدور التحتي تدور المطبخ

بعد جهد جهيد حصلته وكان مطبخ تحضيري فقط ودخلت

ادخلت بهدوء سحرها جمال المطبخ بس استغربت صغر حجمه على جحم البيت
قالت بسخريه :شكل العمه ماهي من اهل المطابخ بعدها

عهد شربت لها ماي وأكلت لها من صحن الفاكهه الموجود بس عشان يسد جوعها

بعد ماخلصت اطلعت تسحب وترجع لمكان ماكانت

اما عند سند

الي قطع عليه اندماجه بالأخبار صوت المشي
ألتفت توقع انه حمد رجع بس شافها انصدم بجمالها وانوثتها الطاغيه بس ماعبر هالشي

وظل مراقب لها مو حبا او انبهار بجمالها لا خاف انها تكون ناويه تهرب او اي شي

شافها راحت للممر صوب المطبخ ورتاح ورد بيتابع اخباره بس ماقدر
لان طلعت عهد وشوفته لها وشوشت عقله تمنى تمت تحوس ولا لقت المطبخ عشان يمتع عينه بشوفتها بس انكر هالامنيه بسرعه وكأنه مراقب من قبل ضميره الي عايش على ذكرى المرحومه

قام وطفى الجهاز وراح بينام افضل له

عند حمد بغرفته

حصه كانت تقوله عن قرارها بأنها بتحدد عرسه بالصيف يعني بعد ثلاث اشهر بس

حمد بتوتر:يمه اخاف سهام تعترض على هالشي

امه باهتمام:لا ان شالله ماهي معترضه وانا راح اكلم امها واقولها وان شالله بتوافق بس انت وافق وابدأ بتجهيزات جناحك من الحين

حمد بفرحه ماتوصف:ان شالله وقام وباس راس امه وحصه حست بسعاده كانت تبي تزوج حمد بسرعه لانها خايفه من جلسة بنت اخوها عندهم ان حمد تبدل مشاعره ويغير رايه بسهام ويلتفت لعهد كونها احلى من سهام واي رجال بيغريه جمالها الأسطوري

بعد اسبوع

الاحداث

عهد عايشه بجحيم عند عمتها حصه كل يوم تطربها بصراخ ومرات توصل فيها الجراءه وتضربها

بدون رحمه وعطف كونها بنت اخوها ويتيمه ومالها حد كان كل خوف عمتها ان احد يشوفها حتى شهد بنتها امنعتها من شوفتها

وكانت عازلتها عن اعيالها وبناتها الي عهد ماتعرف كم بنت وكم ولد بس تسمع اصواتهم وضحكهم كل شي يوصل لعندها من اكل ومشرب حتى الملابس جابت لها عمتها انواع الملابس من ثاني يوم عشان مايكون لعهد عذر انها تكلم ام فارس وتاخذ اغراضها

بس عهد مصره تجيب اغراضها لان في اشياء ماتقدر تتركهم وبتشوف لها وسيله توصل فيها لسحر

وكان قاهرها عمها فواز الي من استلمها حذفها عند حصه عمتها وطار ماتدري وين اراضيه وسألت حصه كذا مره انها ماتبي تقعد عندها بتروح عند عمها وانها لازم ترجع لدوامها او بيفصلونها بس عمتها حصه طنشتها ولا ردت عليها ابد وكأن شغل عهد مومهم بالنسبه لها هي ماتعرف وش وظيفتها ولو اعرفت اكيد بتذبحها لان هالشغله ماتليق بمستواها الاجتماعي كونها بنت اخو حصه بس عهد مصره ماترضخ لها ولرغباتها وبترجع تشتغل وتصرف على عمرها ماتبي منهم شي

وعشان كذا قررت تطلع من هالبيت دون رجعه

7 - 2 - 2015, 10:13 AM

عند فواز

كان طالع مع زوجته وعياله لحديقه عشان يونس اعياله عقب ضغط الأمتحانات

سرح اشوي يفكر بعهد وش ممكن صار لها عند حصه اخته كذا مره يكلم حصه وبس تدخل بسالفة عهد كان يستعجلها ويسكر كأنه مايبي يسمع اي شي عنها
بعد فتره بسرعه ابعد هالتفكير وراح يلاعب بنته بالديرفه

مايبي يشغل باله في شي مايسوى

عنده شي

انتبه لندى الي ابتسمت له من بعيد وكأنها ابتسامة رضى لأهتمامه فيها وفي اعيالهم ترك بنته بعد ماتدفها ورد بيجلس مع ندى

ندى بحب بعد ماوصل لها:حبيبي ليش تركتها تقصد بنتهم

فواز وهو يجلس جنبها قال بحب:ابي اجلس معك ولا عندك اعتراض

ندى وهي تمسك يده وتضغط عليها بقوه:اعترض الله لا يقوله

تمو يسولفون بالغزل وايام حبهم الي بدت من اول زواجهم وتركوا اعيالهم يمرحون بالألعاب

إن طالت الفرقـا تـرى دمعتـي دم

بأبكي عليك ولـو ماأنتـه بـداري

وإن طالت الفرقا ترى عيشتـي سـم

بأصبر على سمي وبالجوع ضـاري

7 - 2 - 2015, 10:13 AM

عند عهد

كانت جالسه بغرفتها او بسجنها مثل ماسمتها كانت تفكر اشلون توصل لتيلفون بدون محد يحس فيها فكرت انها بتنطر لين ماالكل ينام وتنفذ رغبتها اسمعت صوت طفله وهالصوت مرات تسمعه ودها تعرف من هالطفله

لانها حيل تحب الأطفال فودها تجلس معها عشان تنسيها مر الحياة وعذابها

راحت صوب الباب وافتحته بشويش وطلت براسها تشوف

ولا شافت طفله حلوه بكل معنى الكلمه وجالسه تلعب بعروستها كانت مندمجه وتغني لعروستها

حست عهد بحبها لهالبنت ماكانت تعرف هي من بنته او وش صلتها بعمتها لان مو معقوله بتكون بنت عمتها لان صغيره حيل

افتحت الباب كله واطلعت لها ووقفت عند راسها

وشهد اول ماحست فيها ارفعت راسها حست بخوف اول مره تشوفها

بس عهد لحقت على الموقف وقالت بحنان وهي تجلس قبالها:لا تخافي ياقلبي انا حابه العب معج عشان جذي جيت

شهد براحه بس بعده الخوف مسيطرها:بس انتي من ومن متى هنيه

عهد بتنهد وهي تستريح بجلستها:انا اسمي عهد وجيت من كم يوم بس ولا مره شفتيني

شهد ببراءه:ليش وين كنتي منخشه وكملت:امي العوده تدري انج هنيه

عهد بحنان:ماكنت منخشه كنت هنيه واشرت لغرفته الضيوف الي هي فيها وكملت بضيق:وامج تدري اني هنيه

مدت يدها لشهد وقالت بحب:اقدر ألعب معاج يا وكملت ببتسامه:اي صج ماقلتي لي شنو اسمج ومن بنته

شهد بحب قالت لها عن كل المعلومات الي تخصها وتموا يلعبون مع بعض بكل سعاده وفرح من قبل الطرفين

أعاهدك باللى خلقنى وسواك

وبعاهدك قلب أذا غبت صانـك

والله ما أرخصك ولا افكر انساك

ومفقود قلبى كأنه بيوم هانك

لا ضاق صدرك وأزعجك جور دنياك

بتلقانى اوفى من عرفت بزمانـك

عند سحر

دخلت على امها وهي ثايره وغاضبه كل الغضب على الي يصير لعهد من جهة اهل ابوها حاولت تدق على عهد كذا مره بس كان جهازها مغلق من راحت لهم وهو مغلق وهالشي زاد من خوفهم عليها حتى الدوام ماداومت وتعبت وهي تعتذر لها عند المدير بالاول قدر ظروفها بس الحين ماعنده صبر

سحر بغضب:يمه ليمتى بنتم جذي ماندري عن البنت وش صار لها مع هالوحوش

ام فارس بقلة حيله:ماعندي شي اسويه

سحر بنفاذ صبر:انا لازم اسأل واعرف عنوان اهلها واروح ازورها وتطمن عليها ماقدر اتم جذي

وكملت بحزن:انتم ماتدرون عهد وشهي بالنسبه لي عهد اختي الي ماجابتيها يايمه

امها بتاييد:ادري ياعمري والله العالم ان عهد بنتي مثل ماانتي بنتي

8 - 2 - 2015, 06:10 AM

البارت الخامس

فــي خـــاطري هــم" ولا ودي
أبــــوح ...
أحــاول أســلى والحــزن عــاش فـــيني ...
إلــى متــى وأنــا مــن الوقــت
مجـــروح ...
أشـــوف حلـــمي يمــوت قـــدام
عيـــني ...
أنـــا بقـــايا إنســـان عنـــا
ومذبـــوح ...
أحمـــل مآســي هــم وسنيـــني فيــــني ...
تـجمــح بــي الآهـــات في صـــدري جمــــوح ...
وأنــا أنتـــظر طيــــف" تعـــدا
يجيــــني ...

_____

عند عهد

اخذها الوقت ولا حست فيه مع لعبها مع فجر الي تعلقت عهد فيها حيل وحبتها

حبت تاخذ من فجر معلومات عن اهل البيت

عهد بنفسها والله هالبنت تهبل بس انا مادري من بنته بالضبط قالت بحب:فجوره حبيبتي انتي من بنته من عيال عمتي حصه

كانت كارهه تناديها بعمه بس عشان فجر لازم تسايرها

فجر بعدم فهم قالت براءه:انا بنتهم كلهم حصه امي العوده وشهد امي الي جابتني وسند ابوي الي احبه حيل وحمد بعد احبه حتى ابوي خالد الي بيتنا اموت فيه

كملت بنفس الأسلوب:انتي وين امج وابوج

كأنج ضغطتي على الجرح وانتي ماتدرين هذا الي دار بفكر عهد
قالت بضيق وهي تخفي احزانها وتلهي نفسها بالمسح على عروسة فجر:امي وابوي عند الله فوق

فجر براءه:عند الله يعني مثل سعاد مرت ابوي سند هم هي فوق عند الله وكملت بضيق: ياحرام وسند يموت عليها حيل

فجر قامت تسولف لعهد عن الي تعرفه عن سند وعهد كانت ماهي يمها فكرها راح بعيد حيل يم الغاليه امها

غريبة الليالي خذت مني غالي ،.، تباعد وعيني رثت منه حالي
أنا ما نسيتك ولو بإيدي جيتكـ ،.، وطيفكـ ترى ما يفارق خيالي

اه يايمه وينج تجين تشوفين بنتج وش صار لها
من بعد موتج اه يايمه هذاني عند اهل ابوي الي وصيتيهم علي وكملت بسخريه وهي تمسح شعر عروسة فجر: وهذاهم مكفين وموفين بالوصيه

فجر براءه وهي تأشرعلى امها الي جايه تدورها:هذي هي ماما شهد

عهد لفت تشوفها بس صدمها طريقتها اشلون جايه مندفعه وبكل سرعه اسحبت فجر الي جالسه وجرتها معها وهي تقول بغضب:انا كم مره بقول لج لاتجلسين مع الأغراب

فجر براءه:ماما هذي اسمها عهد مو

قاطعتهابغضب: فجررر بسس

عهد الي الصدمه اخرستها عن الكلام والمنظر الي جتها فيه شهد ارعبها خاصة وان هذي اول لقاء لها فيها

ابلعت ريقها بتكرار ووقفت بعد ماشافت شهد تبتعد عنها وهي جاره فجر الي معارضه على تركها

عهد انا اذا بتم عايشه عند هالبشر بموت فخل اهرب لخالتي ام فارس ابرك لي من السجن هذا

واذا فيهم خير يرجعوني لهالبيت انا مو قاصر عشان يتحكمون فيني وعمي الي انا بولية مدري وين اراضيه

اوف سدت نفسي بعد ماحسيت بشوي راحه مع هالطفله فجوره ياحبي لها تسحر بدلعها وكلامها

راحت لغرفتها بعد ماتشائمت من تصرف شهد الفضيع

8 - 2 - 2015, 06:11 AM

عند شهد

بعد مااختفت عن انظار عهد قالت لفجر بغضب: ليش قاعده معها وش كانت تقولج

فجربراءه وخوف:ماقالت لي شي بس تسأل عن اسمي وقالت لي اسمها بعد

شهد بنرفزه:مره ثانيه لااشوفج قاعده معها فاهمه

فجربصياح :ليش وش فيها ان جلست معها

شهد بتنهد وهي تحضنها :مافيها شي بس انا خايفه عليج منها

فجربشهاق وهي تمسح سيل الدموع:خلاص مراح اجلس عندها ابد

باست شهد خشمها الأحمر وقالت ببتسامه:عفيه على بنتي الشاطره الي تسمع كلام امها

على هالكلمه دخل سند وضيقه شكل فجر الي باين انها تبجي
وهذا يعتبر شي عظيم عند سند ان فجر تبجي راح لهم طيران قال بغضب لشهد:اشفيها فجر وليش تبجي

فجر كلام سند زاد عندها من عيار الصياح وشهد قالت بخوف من نظرات سند:مافيها شي بس دلع بنات وكملت وهي تخز فجر بعيونها:صح فجور

سند بقهر:فجر قولي لي وش فيك ولاتخافي

شهد بقهروغضب من ابتزاز سند لها قالت: سند اشفيك وبعدين شي خاص بيني وبين بنتي انت شكو لاتقوم تكبر الموضوع

سند طالعها بنظرات خوفتها وبعده شال فجر وطلع فيها وترك لها المكان بكبره

عند عهد

بعد الموقف الي صار لها مع شهد زاد حقدها واصرارها على الهروب هي حتى ماتدري هي من تكون بس توقعت انها ام فجر

اوقفت عند الدريشه تطل علي الحديقه وتمتع بمناظر المزارع الي ايقنت انهم مايستاهلونها
ابد

ركزت على المنظر الي شدها بقوه وتمنت انها تذبح كل من في هالبيت

عهد بغضب:ماتسوى على هالمسكينه يوم قعدت معها الكل هاوشها شبح وجه

وسكرت البرده لان نفسها انسدت

اضربت بنفسها على الكنبه وهي حاسه بغصه ودها تصيح من هالعيشه الي عايشتها

8 - 2 - 2015, 06:15 AM

البارت السادس

ليه احس اني وانا اشوفك حزين

وقلبي الليله بهمي متلي

كنها الفرقى طلبتك حاجتين

لا تعلمني ولا تكذب علي

_____

في الحديقه

بعد ماابعد فجر عن امها واختلى فيها بروحه يبيها تقوله عن مافي خاطرها بس للأسف طلع شي تافهه لما قالت له عن السبب

سند وهو مجلس فجر بحضنه ويمسح راسها قال بعد ماهدت فجر شوي: الحلوه ماودها بلعبه كبيره كان يتكلم وهو يأشر بيده

فجر الي نست زعلها تعلقت برقبته وقالت :ألا بابا وين اللعلبه قول

كان واعدها يشتري لها عروسه كبيره شافتها بالتلفزيون واصرت تبي مثلها فجابها لها على طول

سند بحب وهو يوقف وفجر مازال شايلها :امشي معاي اللعبه بغرفتي امس شريتها وكنت ناطرك تجين
عشان اعطيك

راح فيها وهو حاس بسعاده ماتوصف لانه قدر يدخل الفرحه بقلب فجر وينسيها زعلها مع امها

الساعه تسع في بيت حصه

كانت قاعده تعشا هي وعيالها
حصه قالت بأهتمام :حمد شصار على المقاول كلمته عشان يبدأ بتجهيز جناحك

حمد بسعاده:اي كلمة وعدني يبدأ من باجر ان شالله

حصه بنفسها الله يتمم لك ياوليدي والتفت لسند الي ملتهي يسولف مع فجر وكملت وعقبال اخوك الي شاب ولافكر يتزوج ويجيب له ولد يحمل اسمه

شهد الي ماخذه على خاطرها من سند بسبب هواشه لها قالت وهي تقوم:ياللاه يافجور بروح بيتنا

امهابرجا:ليش ماتنامين من زمان مانمتي وب

شهد قاطعتها بأسف:اعذريني يالغاليه ماقدر واسحبت يد فجر وطلعت وهي تطالع لسند بنظرات عتب

سند عرف انها زعلانه ولاحب يجادلها خاصة قدام امه وقال بنفسه مصيرها ترضى ماله داعي تكبر السالفه

استأذن وطلع هو الثاني بيروح لربعه يسهر معهم

الساعه حدعش

عند عهد بعد ماتعشت طبعا بروحها كأنها منبوذه قامت عشان تستغل الفرصه وتكلم سحر على الثابت لان نقالها اخذوه

تسحبت بشويش هي متأكده ان هالوقت مايكون في احد خاصة وان عمتها من بعد التسع ماتطلع من غرفتها والباقي ماعمرها شافتهم ابد وفجر من جت لهالبيت بعمرها ماشافتها نايمه هنيه
كانوا يروحون مبجر

ارفعت السماعه ودقت رقم سحر بيديها الي ترجف من الخوف والربكه

8 - 2 - 2015, 06:16 AM

عند سحر

انتظر موعد عيونك

مشتهي معك الكلام

منتهي قلبي بدوونك

عيشتي بعدك ظلام

في بيتها

كانت مسويه لزوجها خالد لليله رومانسيه كانت مجهزه المكان بالكامل من شموع وبالون

حتى عيالها منومتهم من وقت عشان تتفضى له

خالد الي ذايب من سحر ومفاجأتها له حتى وهم صارلهم سبع سنين متزوجين كل يوم تثبت له انه مستحيل يستغنى عنها لو بعد مية سنه هو لما تزوجها عمره خمس وعشرين وهي سبع تعش سنه فكانت صغيره ومع ذلك متفتحه ومتثقفه وماتنقص بواجباتها سوا كانت زوجه او ام او ممرضه

خالد بحب وهو يحضن سحر الي جالسه جنبه على الكنب:شرايج انكمل سهرتنا داخل اخاف ان هالخدم حاطين علينا اجهزة تجسس

سحر ببتسامه:ليش وش بيستفيدون واحد وزوجته هم شكو

خالد بهيام وهو يبوس يدها الي تمسح على وجهه:مادري بس يمكن يبون يتعلمون فن الغزل عندنا ياهل الخليج

سحر ماتت ضحك وقالت: لا عاد كلش ألا غزل اهل الخليج بديع و

ماكملت كلمتها لان خالد شالها وراح فيها للغرفه

بعد فتره بسيطه

ازعجها صوت تيلفونها الي مو راضي يوقف خاصة وان خالد ازعجه بعد وبان انه عصب

خالد بقهر: روحي شوفي من الي داق عليج ازعجني بصوته

سحر بخجل :ان شالله وقامت اخذت تيلفونها سبت نفسها الي ماحطت جهازها سايلنت

شافت الرقم وكان رقم غريب زاد قهرها وتمنت لو تلعن خير الي داق اخذت جهازها وطلعت ترد برا الغرفه

ردت بغضب:الو

كانت محضره للي داق كل انواع الشتايم والسب

عهد ارعبها ردها وحست بالعبره تخنقها وايقنت انها تصرفت خطأ هي من تكون عشان تدق على سحر وتطلب منها المساعده هي حي الله زميله لا اكثر ولا أقل زاد اشهاقها وماقدرت تكلم او تنطق اي حرف كل الي سوته سدت الخط بسرعه وهي تشهق بالصياح وتركض لغرفتها

ظلمني الوقت يا امي وانا دايم قوي ايمان

وطحت من دون لا اسمي ومات بداخلي انسان

كان داخل هالوقت وشاف المنظر وهي ماانتبهت له من الصياح بس هو تفاجأ بشكلها بجمالها بشعرها الي يجذب ويفتن حس بضربات بقلبه وانه على وشك الجنون من شافها

8 - 2 - 2015, 06:18 AM

[البارت السابع ]

قراءة ممتعه ان شالله >>>ابدوا بسم الله

سحر بقهر:سد الله باب رزقك صج ناس فاضيه وماتعرف لذوق

اغلقت تيلفونها وحذفته بالصاله وراحت لزوجها

خالد الي طفش من دقت تيلفون سحر وبهالوقت بالذات شافها داخله قال وهو يخفي غضبه :من الي داق

سحر ببتسامه دوخت خالد ونسته كل العصبيه قالت وهي تطفي الليت:واحد شكله غلطان لانه سد الخط بسرعه
وراحت له

دخل جناحه وهو في حالة سرحان ودوخه عقب الي شافها
حس انها اسحبت قلبه معاها وهي تركض

تنهد :معقوله هذي عهد
اكيد هي لان من فيه غيرها وبعدين انا بعمري ماشفتها لان من جت وامي حابستها وعازلتها عنا كلنا حتى عن شهد اختي

قام بيطل على غرفته عقب جهزوها العمال شافها ابتسم
برضى:ماشالله والله ان الوالده ذوق

كانت امه الي تروح معه لما بيشتري أثاث لان هو مو خبره بهالأمور

راح صوب شناطه الي نقلهم بس بعده مارتبهم فتح وحده منهم واخذ فوطته وراح بيتحمم
قبل ينام

أفآ يآجرح لآتبكي ترى كل الجروح تطيـب

ترى كل البشر يخطـون ونتحمـل خطآيآهـمـ

بكينآ واندفن فينآ حزن أصدق مـن التكذيـب

بكينـآ بكـل مآفينـآ وفيـنـآ والـعـذر منـهـمـ !!!

لقينآ نآس فيهمـ قلـب ونـآس فنونهـآ التعذيـب

ولـكـن مآنـقـول:الآهـ ولآنتـعـب مسآمعـهـمـ

وسآفرنـآ فـرآق الهـمـ لقينـآ الهـمـ فينـآعـيـب

ووآصلـنـآ مسيرتـنـآ وكـــل قلـوبـنـآ مـعـهـمـ

نخبي أجمـل الآهـآت ولآنرتـب لهـآ ترتيـب

وتآخذنـآ سنيـن العـمـر ونتحـمـل خطآيـآهـمـ

كذآ يآجرح هالدنيآ سهولتهـآ مـن التصعيـب

حلآوتهـآ فـي قسآوتهـآ ولكـن عيـب نعلمهـمـ

تآنبنـآ ضمآيرنـآ ولآ نلقـى ســوى التأنـيـب

مصيري آو مصيراللي بيخطي لو يجآملهمـ

صحيح قلوبنـآ تعبـت ولكـن أجمـل التعذيـب

عذآب أغلى البشر لآصرت تتعذب لرآحتهمـ

عند عهد

تمت تصيح بعد ماحست أن الأبواب تسكرت بوجهها وأن مصيرها محتوم في هالعالم

عدلت نفسها وقالت بشهاق وهي تمسح دموعها:لاياعهد لاتستسلمين سوي اي شي

اوقفت وكملت بأصرار:ومن هالحضه بعد

راحت وغسلت وجهها وطلعت مندفعه بكل سرعتهابعد ماقررت تواجهه عمتها

في انها تبي تسكن عند عمها

صعدت فوق وهي موعارفه اي صوب غرفة عمتها اصلا
لانها ماتعدت غرفتها ابد وقررت تطق اول باب لعله يطلع هو باب عمتها

اخذت فتره تطق بس محد رد كانت بتروح تطق لها باب ثاني بس فجأه انفتح الباب وحست كأن انكب عليها ماي بارد عقب الي شافته

حمد الي كان توه طالع من الحمام وبالفوطه سمع طق الباب اخذ سروال بجامته بسرعه ولبسه كان متوقع انه امه او سند

جايين يشوفون تجهيزاته لجناحه بس اول مافتح صابه كهرباء وحس بلخبطه في مشاعره هالبنت لخبطت اموره كلها وهو ماصارله ساعه من شافها بس

حس بحرج من شكله وهي بعد كانت محرجه اكثر منه قال بهدوء وهو يخفي توتره:خير اختي بغيتي شي

عهد ياويلي وش هالأحراج ومن هذا ياقردي وش بيقول عني الي داقه عليه بهالوقت

يوووووه

حطت يدها على راسها ماكانت مغطيته

حمد بتنهد:يابنت تكلمي وش تبين

عهد بخوف:ع مت ي
وين

حمد الي فهم الموضوع ولو ان سكوتها شككه في الموضوع شوي اشر لها على غرفة امه ودخل وسكر الباب مايبي يحرجها اكثر من كذا

ولا يبي امه تعرف بوقفة معها خاصة بهالوقت وبهالشكل

عهد الي اربكها هالشخص بنظراته وبوسامة خاصة وهو طالع بعد حمام وتفوح منه ريحة الشامبو

راحت للغرفه الي اشر لها عليها وطقت الباب بعد ماهدت شوي من توترها

انتظر موعد عيونك

مشتهي معك الكلام

منتهي قلبي بدوونك

عيشتي بعدك ظلام

8 - 2 - 2015, 06:18 AM

عند حمد

يالله وش جاك ياحمد تعوذ من الشيطان وواذبح مشاعرك الي حركتها هالبنت ولاتنسى سهام زوجتك الي كلها شهر وتجي تعيش عندك

ضرب بنفسه على السرير وهو يسرح بشكلها بعيونها الي ذابله من الصياح وخشمها الأحمر على صغر حجمه
وشفايفها يوووه شفايفها قصه ثانيه ولا شفايف هيفاء
اه

وش الي قردني وخلاني احب هالبنت بعد ماارتبطت بغيرها

ياليتني شايفك قبل لااخطب سهام والله ماتركتك ياعهد

قعد يهوجس ويحاول ينام بس النوم بعيد عنه هالليله

عند حصه

وقفت مصدومه وش جابها وش عندها جايه هالوقت قالت بنرفزه:خير وش عندج

عهد بربكه: ابي اتكلم معك بموضوع وابيج تسمعيني

حصه بغرور: وش هالموضوع عهد: عمي فواز وينه انا ابي اروح اسكن عنده

حصه بقهر:عمت عينك ان شالله ومالك طلعه من هالبيت ألا على قبرج

عهد بغضب:احترمي نفسج وقولي لي وين هالفواز هو المسؤل عني ماهو انتي

مدري رداة الحظ ولا المقاسيم

بس الاكيد ان طعون قلبي عظيمه

بعد الجمله الي قالتهاماحست ألابطراق حار على خدها
حصه وهي تدزها وبتسكر الباب بوجههاقالت:كم مره بقول لج لاترفعين صوتج علي يابنت سويلم

عهد صدت وراحت قبل لاتسكر الباب كانت حاطه يدها على خدها الي ولع جمر
مرت من باب غرفة الشخص الي صادفته مشت بسرعه قبل يطلع ويحس فيها

المواضيع المتشابهه لموضوع: فوق الجروح اللي بقلبي من سنين يكفي دخيل الله لا تجرحوني لموضوع: فوق الجروح اللي بقلبي من سنين يكفي دخيل الله لا تجرحوني
الموضوع	كاتب الموضوع	المنتدى	مشاركات	آخر مشاركة
الله حطك بقلبي على شكل رِضا و فرحة سنين	همسه الشوق	همس عالم حواء	5	27 - 9 - 2023 09:36 AM
ما انخلق بقلبي حب قد اللي فيني لك	حنين الأشواق	همس للاشغال اليدويه	2	1 - 8 - 2021 12:26 PM
نت السعاده اللي غمرتني من سنين	همسه الشوق	همس موبايلات الاندرويد	10	26 - 2 - 2020 04:19 AM
يكفي دخيل الله لا تجرحوني	همس الشوق	همس الشعر والقوافي	5	2 - 9 - 2012 01:19 AM
دخيل الله دخيل الحب دخيلك اكشف المستور	كــريــزمـآ	همس الشعر والقوافي	6	17 - 4 - 2012 11:56 PM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

فوق الجروح اللي بقلبي من سنين يكفي دخيل الله لا تجرحوني

همس للقصص وحكايات وروايات