رواية جنوبية برت حالي ولا دري وين ديرتها

19 - 5 - 2021, 09:31 PM

البارت 18

كيف وصلت مدري والمشكلة اني قفلت الباب على نورة اللي نزلت تعزز لي واشوف من الشباك ان الكلب فك عباية احلام وراح وهو ينبح بصوت يخوف دليل على انه يتوجع حطيت يدي على قلبي وانا اسمي بالله والمشكلة انه كلب اسود وقهوة حاره عندي اعتقاد من وانا صغيرة أنا واخواتي ان كل حيوان لونه اسود جني .!
وخرج السواق اخيرآ بعد ماشبع نوم اكيد وسمع الصراخ البنات واصوات الكلاب لانه لو كان صاحي من قبل كان سمع الأصوات اللي من قوتها احس ان صدى اصواتنا يتردد بكل مكان والمكان فاضي .
وبكل برود ياخذ له كم حجر ويحذفه على الكلب
واحلام تحاول تقوم وتنفض عبايتها اللي كلها تراب وبكل برود العالم اللي فيه ركب السيارة ولا كلف نفسه حتى يسأل احلام جاها شي
وين باقي البنات تحتاجون مستشفى او شي .
نزلت انا اساعد احلام لين ركبت وهي في حالة انهيار تبكي سميت عليها واحاول فيها تسكت واسألها تعورتي قالت لا بس مسك العباية
سألتها تبين نرجع اذا تعبانه أشرت لي براسها لا
ونورة راحت تشوف منى وجابتها معها من المسجد
السواق ذا غبي لا يعرف عادات ولا سلوم لكن مجبر اخاك لا بطل ماعندنا غيره .!
أنا مانزلت اصلي اليوم معهم ماكان عندي صلاة طلعت جوالي وانا اتصل على أمي واطمنها قبل ماتنقطع الشبكة .!
حركنا من المحطة لين وصلنا بداية الوادي وانقطع الأسفلت ومسكنا طريق ترابي وعر.!
فتحت شباك السيارة وانا اشوف الوادي الكبير اكبر وادي في المنطقة .
واسمه( ملتقى الاودية)بمعنى ان كل الأودية في المنطقة تصب فيه علشان كذا الموية تجري فيه طوال السنة بس نسبتها معقولة نقدر نجتاز الوادي لكن وقت المطر مستحيل تقدر السيارة تمشي فيه منسوب الموية يرتفع بشكل كبير
منسوب السيل يرتفع كأنه فيضان ويعزل القرية عن المنطقة مايقارب 4-6أيام لأنه اكثر من سيل يجري في الوادي .
والمشكلة مو هنا المشكلة لما يجي سيل منقول،
ومعنى سيل منقول(مطر جاء في المناطق المجاورة لازم تنزل السيول من الوادي ذا بأعتبار انه ملتقى الاودية لانه منخفض) وعدد الأودية اللي تصب فيه خمس اودية كبيرة .

شد انتباهي لوحة كتب عليها(عزيزي السائق لا تخاطر بالعبور اثناء جريان الوادي)
ضحكت احس مالها داعي ماعندنا إلا الطريق ذا احيانآ افرح لما يجي سيل منقول قبل ندوام علشان نرجع نوقع في مكتب الأشراف.
ناظرت الوادي الكبير الواسع وحوله اشجار ضخمه كثيرة ومتنوعة اشهرها اشجار السدر والعرعر واللبخ)
واشجار عطرية متنوعة كثيرة تنمو طوال العام
مثل العكبر، .والشيح.والشذاب.والوزاب.
وحشائش خضراء تكسو معظم الوادي وتحتل جزء كبير من الوادي وتحوم حوله بعض الطيور بأشكال مختلفة
وحيوانات منتشرة بشكل كبير مثل البقر والجمال والغنم بأنواعها كان شكل الوادي عبارة عن لوحة فنية سبحان الله الخالق.
ورغم الجمال هذا ولا عمري استمتعت فيه ابد.
ماكنت اصدق اننا نجتاز الوادي بسلام
اكثر من مره توقف السيارة بوسط الوادي رغم انها من النوع الدفع الرباعي إلا ان اختلاق الطين بماء الوادي يعيق حركة السيارة وتغرز السيارة ويجينا خوف وهلع من السيول المنقولة ونخاف من المجهولين المنتشرين بكثرة في المنطقة النائية البعيدة عن نقاط التفتيش .
رفعت يدي وانا اشوف الساعة وكانت 6و15دقيقة ساعة ونص تقريبآ وحنا نقطع الوادي
نتأخر كثير بسبب الأحجار لازم نمشي بشويش علشان ماتحك في السيارة وتخرب.
وصلنا مدرستنا المتهالكه اكل عليها الزمن وشرب المضحك ان المدرسة ذي كانت بيت لشيخ القرية ويمكن هو ورثها عن اجداده كابر عن كابر.!
وانتقل هو لبيت جديد وبما انه شيخ القرية وهو من طالب وسعى في إيجاد مدارس هنا كان عليه ان يوفر مدرسة وماكان عنده إلا بيته القديم قام بإجراء بعض التعديلات التي لم تفلح في تغير وضع المنزل المتهالك
دخلت المدرسة اللي عبارة من 6غرف.
اربع غرف منها فصول دراسية غير صالحه للأستخدام الأدمي !؟وكان لازم نمر غرفة المديرة زاهيه علشان نوقع وشايلة هم اني بتصبح في وجها وهي مادة البوز شبرين .
دخلنا وحنا نقول بصوت واحد السلام عليكم صباح الخير ولا اهتميت ترد او لا .
اهم شي اوقع واخرج قبل تبق بيني وبينها مااتحملها مره تستغفلنا تحسبنا مانعرف القرارت
سمعت صوتها وهي تقول كالعاده متأخرين كلكم تحت الخط الأحمر ماراح اتساهل معكم.
ناظرت فيها من فوق لين وانا اتعجب كيف ذي صارت مديرة لا اسلوب و لا اخلاق لكنه حظ هي من بنات القرية بس كانت كل حياتهم في الرياض وجاء تعيينها في قريتها وتسكن هنا بعض الأحيان نداوم قبلها ومانوقع لين تجي حتى لو تأخرت لان ببساطة دفتر التوقيع معها تاخذ كل السجلات معها علشان موية المطر اللي تنزل من سقف المدرسة .

19 - 5 - 2021, 09:31 PM

البارت 19

قمة الظلم وذا سبب الحرب اللي بيني وبينها وطبعآ ماعندها مساعدات ومقسمه كل الشغل بيننا مكتب الأشراف اول سنة تعينت هنا ماشفنا احد شرفنا وجاء سنة كاملة
السنه الثانية جتنا وحده ماغير تنافخ وهابد بعمرها والمديرة ماقصرت ماغير تحرش علينا.
مع بداية السنة جتنا موجهه وحده وحضرت لي حصة اول متوسط وعجبها الدرس وتطبيق استراتيجيات مادة الرياضيات رغم ان تخصصي اقتصاد واستخدام وسائل تعليمية رغم ان بيئة المدرسة ماتساعد .
وصارت تمدح فيني والمديرة ماغير تشمق ولا علقت ابد ولا عجبها.!
وقدام المديرة طلبتني اقدم على مكتب التوجيه قالت نحتاج مشرفات معنا المديرة كأنه ماس مسكها قالت مااقدر اعطيها اخلاء طرف عندي عجز معلمات.!
طبعآ انا رافضة فكرة التوجيه مره لأنها متعبة كل يوم في قرية ولا إجازات مع الناس ولا شي.!
طنشتها وخرجت من غرفتها وانا اسمع المعلمات يناقشونها علشان التأخير .
نزلت اغراضي في غرفتنا الصغيرة اللي يادوب تكفي اغراضنا وبدون مكاتب ماغير كراسي بلاستك وطاولة واحده بلاستك.
شرينا قبل مكاتب فخمه وفرشنا الغرفة ودهنا الجدران بعد تنظيفها من دودة الأرض اللي مسوية احتلال لكل جزء من المدرسة كأنها تقول هذا مكاني انتوا ايش جابكم عندي، والمشكلة كانت في سقف المدرسة المتهالك.
اذا جاء مطر غرق كل شي راحت المكاتب وانعدم الفرش وانعدم الفرش غير الحشرات والزواحف اللي ماعمري شفت مثلها حتى في قناة ناشيونال غرافيك
وماعندنا حوش ابد صدق او لا تصدق ماغير سور صغير مايكفي علشان كذا مافي طابور اخذت اغراضي وانا اروح اشوف حصصي.! وكل يوم على نفس الروتين البائس .!

:
خزامى المشهورة
اليوم كان متعب لها بشكل غير طبيعي من العصر وهي تسوي اعلانات وكالعادة أمي فديتها معي مستحيل اطلع أنا وندى مع السواق لوحدنا وندى بحكم انها عاطلة صارت المرافق معي بمعظم الأعلانات لأنها أقرب وحده من اخواتي لي واحبها واليومين ذي صارت نذلة لازم كل اعلان يكون لها نسبة منه وإلا ماتروح معي وانا ماستغني عنها مره .
ويارب لك الحمد كل يوم تزيد عدد الأعلانات عندي بدايتي كانت قبل سنه ونص تقريبآ أمي أنا دلوعتها واخر العنقود اللي مستحيل ترفض لي طلب كنت مغرمة بالتصوير والتصاميم كنت اصور بالجوال كل شي كان تصوير احترافي رغم انه بكاميرا الجوال اول صورة كانت لسد أبها وكانت قبل الغروب ونزلتها انستقرام جاتني لايكات كثيرة وتعليقات وزاد عدد المتابعين عندي كثير وفرحت فرحه ماتوصف استمريت اصور كل شي وساعدتني اجواء أبها الفاتنة والمطر والضباب المستمر خاصة مكان بيتنا المرتفع في السودة ماكنت احتاج اضيف لها فلاتر ..
امي معروف عنها انها طبيبة شعبية معروفة ومشهورة من زمان يقصدها كل الناس لطلب العلاج لكن قبل سنتين جاها أمر بالتوقف عن علاج الناس وإلا مصيرها راح يكون السجن .
كنت اصور يوميات كاملة مع أمي اصورها وهي تطحن اوراق السدر بعد تجفيفها ..
كنت اصورها وهي عند منحل العسل تقوم بأستخراج العسل من الشمع ووضعه في علب من اجل بيعة كنت اصورها وهي مع غنمها كل صباح ايام الويكند
كنت اصورها وهي تعجن وهي تخبز بمهارة في الميفا (التنور)
كنت اصورها وهي تسوي زبدة من لبن الغنم.كنت اصور يوميااتنا كااملة وسوالفنا وخرجاتنا مع بعض كنت يوم الثلاثاء اغيب عن المدرسة علشان اروح مع أمي سوق الثلاثاء المشهور تبيع فيه السمن والعسل وبعض الأعشاب العطرية وانا اوثق كل تفاصيل يوم الثلاثاء من وقت مانخرج الى وقت رجوعنا البيت وانزلها وكان عدد المتابعة كل يوم
يزيد عندي واللايكات .
وفي فترة بسيطه كان عندي في الانستقرام200 الف متابع،؟!
اخواتي كانوا رافضين الفكرة نهائيآ حتى مستحيل اقدر اسجل سوالفي معهم وانزلها .
بس أمي وقفت معي وقالت محد له شغل فيها .ومره كنت اصور أمي وهي تحمس القشر وتطحنه وتطبخه وتضيف عليه الزنجبيل والقرفة والسنوت أمي ماتحب تشرب إلا قهوة القشر ونزلت المقطع والكل سألني عن الطريقة وكنت اسجل أمي وهي تجاوب عن الأسئلة فكرت وقلت ليش مااخلي أمي تسوي القشر كامنتج خاص لها واسوي له اعلان لأن شفت كثرة الأسئلة عنه في البداية سوينا كمية قليلة يمكن حدود 50 علبة صغير حتى بدون علامة تجارية ولا شي نزلت الأعلان عنه (قهوتنا غير) وحصل شي ماتوقعته جاء عليه طلب كبير ومن وقتها صارت أمي تشتري كميات كبيرة من قشر القهوة الخولاني افضل نوع من اليمن يوفره لها واحد تعرفه في سوق الثلاثاء وتحمسه بطريقتها الخاصه على نار هادئة وبعد مايبرد تطحنه وتضيف له القرفة والسنوت والزنجبيل الجاف وضرب في السوق بشكل كبير وجانا منه دخل مادي كبير وكنت ابيع لأمي العسل ولقاح النحل والسمن عن طريق حسابي في الأنستقرام .

19 - 5 - 2021, 09:32 PM

البارت 20

وبعدها نزلت السناب ومن وقتها بدية اعلانات كبيرة مطاعم ومشاغل اعلانات اسر منتجة
وزاد عدد المتابعين في السناب الى 380 الف متابع
وزاد عدد الأعلانات وصرت اغطي اعلانات في معظم الجنوب ،
واروح الرياض بالوقت اللي يكون عند اشواق دوام هناك كل شهر ثلاث ايام وكنت أحاول اخذ اكبر عدد من الأعلانات وأمي كانت تروح معي .
المدرسة كان صعب علي اني اوفق بين الدوام والأعلانات خاصة ان كل وقتي اكون على السناب والأنستقرام كلمت أمي أني ادرس منازل افضل من الغياب وكل يوم اغيب فيه اخذ عذر من مستشفى خاص لأن اشواق رفضت تعطيني اجازات مرضية ورغم انها تقدر تجيبها من المستشفى من عندها تقول والله مااغضب ربي علشان تسوي اعلانات وكلام فاضي
أمي رفضت فكرة اني احول منازل رفض قاطع، وكالعادة ضربت على الوتر الحساس بكيت وماعاد كلمتها ولا اكلت يوم كامل وهي تخاف علي وتحبني بشكل مايوصف دخلت علي وانا ابكي جلست جنبي وانا اصد عنها وهي تعاتبني ليش ماكلمتها يوم كامل ولا جلست معها اخذتها فرصة بكيت وقلت لها لو أبوي كان حي ماكان رفض لي طلب وقتها فاضت عيونها وهي تحضني وتقول أنا أمش وأبوش وكل شي أنا خايفة عليش وابغى مصلحتش ..حضنتها بقوة قلت لها دام انتي معي ماعلي خوف ووافقت غصب عنها واخواتي كلهم معارضين ويمكن حدود شهر محد فيهم يكلمني بس عادي ماهمني اهم شي أمي يمكن في حدود ست شهور صار عندي راس مال كبير كله من الأعلانات ولا ادري ايش اسوي وماعندي اي خلفية عن الأستثمار بس كان عندي حلم اني املك مطعم نسائي متكامل اكلات شعبية مسكت معي الفكرة ذي وحبيتها يمكن علشان وأنا صغيرة كنت اروح مع أمي وتبيع أكل على الطريق خاصة وقت الإجازات الصيفية حبيت الفكرة وقلت لازم اطورها بشكل افضل بس كنت احتاج مبلغ مالي كبير كنت ابغى مطعم فخم من كل النواحي
مره سويت اعلان لمهرجان في جازان وكان قيمة الأعلان كبير لأني بظل يومين في جازان والمهرجان كبير لفت انتباهي الأسر المنتجة هناك وطبخهم اللذيذ المميز قلت ليش ماافتح المطعم هنا فعلآ استأجرت ارض من شخص سبق وسويت له اعلان لمخطط
فكرة ديكور المطعم كان بطابع جيزاني شعبي اهتميت في ادق تفاصيل المطعم بمساعدة وحده من متابعيني جيزانية مهتمة في الديكور وسلمت الفكرة لشركة وخلصت المطعم في الوقت المحدد في العقد معهم .
كان عندي مشكلة كيف اوفر عاملات يتقنون الأكلات الشعبية بشكل احترافي .
وشهرين وانا افكر لين الهمني الله قلت اسوي اعلان
خاص لأهل جازان (طلب طبخات للمأكولات الشعبية)
وجاني فوق 300طلب حددت لهم وقت زيارتي لجازان وطلبت منهم طبخات جيزانية شعبية .
واخذت معي ندى وريم بحكم انهم كانوا في جازان ولهم علاقات و صدقات هناك .
اخذتهم معي كمساعدة في التذوق والتقييم وكانت كل طباخة افضل من الثانية وترتيب ونظافة واخترت منهم عن طريق السحب في الانستقرام وكل شي كان جاهز مثل ما كان مخطط له .
ووقعت عقود معهم.!
وفتحت المطعم وكان الأقبال عليه فوق المتوقع وبعد شهر اضفت ركن قهوة وحلويات .
وربي بارك لي في رزقي وبعدها صرت اسوي اعلانات اسر منتجة ببلاش دعم مني لهم .!
وخصصت جزء من الأرباح لدعم مرضى السرطان ومرضى الكلى والسكر.
طلبتني اكثر من قناة علشان تسوي معي لقاء رفضت أمي وأشواق كذا حالة إنسانية ساعدتها بعد الله في العلاج.
من خلال نشر تقرير عن حالتها في حسابي بدون مقابل .
طلبتني شركة سياحية اسوي لها اعلان في ماليزيا وكان المبلغ كبير كنت شايلة هم أمي كيف اقنعها اهم شي هي توافق لأنها لو وافقت اخواتي بيرحون غصب .كلمتها في البداية رفضت ولما قلت لها سعر الأعلان وافقت خاصة ان الشركة متكفلة بكل شي وأمي مخططه اشتري لي فله تقول ماراح ارتاح إلا اذا كل وحده فيكم عندها بيت لها ملك .!
ومازلت مستمره في الأعلانات حتى احقق كل شي خطط له والشي اللي كسبته غير الربح المادي حب الناس والدعاء لي !

19 - 5 - 2021, 11:42 PM

طرح قمه الروعه في والجمال
سلمت اناملك ويعطيك العافيه علي مجهودك
في أنتظار المزيد
من عطائك والمزيد ومواضيعك الرائعة والجميله
ودائما في إبداع مستمر

21 - 5 - 2021, 06:27 PM

البارت 21

فارس دخل هو يشوف أبوه وأمه وجده وجدته واخوانه مجتمعين.،!ولأول مره يكون جدي في كلامه جلس جنب عبدالله وجه كلامه لأبوه : يبه ولا يهون جدي ومن حظر أنا رجال صراحة ابغى اتزوج .
علي بطبعة الهادي يسمع كلام ولده ويشوف الجدية في ملامح فارس اول مره يتكلم كذا وبأتزان له حدود
أسبوع وفارس كل يوم يقول له نفس الكلام : طيب والمطلوب مني يافارس .!
فارس /تخطب لي
علي/ومن هي اللي بترضى فيك وانت حتى ثالث ثانوي ماخلصتها ولا وظيفة ولا شي .!
فارس/مااحتاج وظيفة انت بتكفي وتوفي ماشاء الله تملك اكبر سلسلة xxxx في الجنوب وهنا او اتوظف في شركة . والبيت اتوقع مايحتاج ندور هذا بيتنا ايش كبره
علي/تتوقع لو اتقدم لك عند ناس راح يقبلون فيك.
فارس /اكيد بيوافقون لما تقول لهم كل شي عليك وانت مستعد.
علي/فارس لاتحسب ان الزواج لعبه قوم توكل بلا حركات صغار خلص الثانوي وتوظف وابشر بالزواج.
الجد محمد/كيف تتزوج واخوانك اكبر منك وموظفين ومحد منهم تزوج.
فارس وهو يقوم بعصبية/اتوقع ياجد حنا مو بنات لازم نتزوج بالدور..
رفع عيونه لأخونه وبعدين في ابوه وقبل يخرج : انا بروح واذا كبرت عن حركات الصغار على قولتك راح ارجع لك وخرج .!
جميلة/بخوف أحمد انت وعبدالله الحقوا اخوكم خرج زعلان وانت تقصد علي انت ماتقدر تطيب خاطره بكلمة ايش بينقص منك لو قلت له طيب حتى لو كلام.
الجده هيلة /قوم ياعلي الحق ولدك وين بيروح .!
محمد/جده جعلني فداش ارتاحي شوي وبيرجع ماراح يهاجر وبيرجع يعني ماتعرفون فارس.!
أحمد/ وقلبه ناغزه وهو ياخذ جواله ويخرج لا والله انه جاد في كلامه.
الجده هيلة/لاحول ولاقوة ياخوفي يخرج مثل ماخرج عمه احمد ولا يعود.
جميلة بجزع/لا ياعمه الله لا يقولها وهي تقوم.
عبدالله/يمه وين انتي رايحه احمد خرج وماراح يرجع إلا هو معه .؟!
الجد وهو ساكت ويناظر في زوجته هيلة اللي من جاء وهي ساكته ماكأنه موجود حتى ماتناظر فيه شاف ولده وزوجته وعياله يخرجون رفع عيونه لها وهي تقول : طمني عن فارس يامحمد ودخلت غرفتها بدون ماتناظر فيه.
قام وقفل باب الصالة ولحقها دخل عليها وهي تشيل طرحتها وتمسح عيونها علشان فارس .
رفعت عيونها لما حست بوجود أحد معها في الغرفة وقفت بسرعة وهي تلبس شيلتها على شعرها بربكه من وجوده : محمد اخرج عني خلاص تعشيت الله يستر عليك ولا تحسب اني ساكته على وجودك عندي أني راضية لا والله ماسكت إلا حشمة لك لأنك ولد عمي وحشمة لولدي وعياله لاتزيد علي يكفي فارس اللي ماندري وين غدا.
محمد وهو يناظر فيها بدون مايتكلم رغم تقدمها في السن إلا انها مازلت جميلة جمال رباني بياض بشرتها المختلط بحمره عيونها الواسعة اهدابها المصفوفة الكثيفة قرب منها ومسك يدها وبأمر اجلسي ياهيلة .
جلست معه مجبره لا مخيره علشان تشوف ايش عنده ومهما اظهرت قوتها امامه إلا انها تضعف بسرعة
مسك يدها البيضاء بين يديه السمراء وهو يناظر في حدود الحناء على اصابع يدها المزينة بخواتم ذهب
هيلة نفس الجمال اللي فتن به منذ عرفها واصر على الزواج بها رغم صغر سنها.
: هيلة لي حدود ست شهور وأنا احلم في أحمد الله يرحمه احلم فيه يتكلم معي كلام ولا ادري ايش يقول لابس احرام ابيض وبيده اغراض ولا ادري ايش هي.!
حس في يدينها ترتجف بين يديه اول مره من بعد موت ولدهم يدور حديث بينهم وخاصة عن أحمد مايدري ليش جاء وقال لها .!
هيلة والعبرة تخنقها وتبكي : أحمد زعلان من أمه ولا يجيها حلم كلكم تحلمون فيه إلا انا زعلان باقي مني مارحت معه يوم طلبني زعلان لأني مادافعت عنه منك.
فك يدها وهو يحضنها وهي تنهار تبكي وتضربه بضربات ضعيفة مايحس فيها ليه ذبحت ولدك وذبحتني معه الله لا يسامحك الله يجعل ذنبي أنا وولدي في رقبتك ليوم الدين.!
الجدمحمد وهو شاد عليها بقوة اول مره تكون بالقرب ذا منه من مات ولدها وهي محرمته على نفسها وبصراحة مستغربة منه ماعمره تكلم بشي يحس به طبعه كتوم وبنبرة كلها ندم : هيلة والله أن موت أحمد كسرني كسر مايجبر وندمان كثر مابكيتي وبتبكين لايغرش اني ساكت والله ياحسرته في قلبي انها كل يوم تصبح وتمسي نار في صدري.
هيلة وهي تدفه /قم اخرج عني يامحمد أسألك بالله تحشم شيب راسي وشيبك واخرج ماعاد لي حياه معك حياتي وحياتك راحت مع أحمد.
فكها وهو يقوم يخرج وكل ندم الكون يسكن قلبه الندم ماعاد يفيد بشي.
وصل الحوش وهو يشوف عيال ولده واقفين وفارس ماهو معهم : اخوكم وينه اتصلتوا عليه .
أحمد بخوف على اخوه بس ما وضحه : جواله مقفل ياجد وسيارته واقفه برا .

21 - 5 - 2021, 06:28 PM

البارت 22

الجد(محمد)يحس كأنها سكينة انغرزت في صدره ماعاد يقدر يتحمل يفقد احد رفع عيونه في عبدالله ومحمد : ابوكم وينه.!
محمد/طلع ينام .!
الجد (محمد)/تعالوا ندور اخوكم والله يافارس انه فيه بلا ماهو طبيعي الولد ولاعمره يخرج ويروح ويخلي سيارته ويقفل جواله.
محمد/بطفش جد وين ندوره ذا الليل فارس بيرجع لا تخاف.!
محمد(الجد)بغضب : اص ولا كلمه قلت ندور يعني ندور انت وعبدالله روحوا اسألوا اصحابه وانا وأحمد
بندور وبينا اتصال وخرج وهو يرجف يارب لا تفجعني في فارس يارب .!
ظيمنع
ظيمنع
صلاة الفجر

علي نزل علشان يصلي الفجر دخل قسم أمه علشان يقوم اولاده لصلاة الفجر لأنهم ينامون عندها من زمان دخل غرفتهم حصلها فاضية انقبض قلبه تعوذ من الشيطان وهو يخرج ويفتح باب الشارع وماحصل سياراتهم موجودة ماغير سيارة فارس وسيارة ابوه غريبة وين عياله مستحيل اولاده يسهرون الى الفجر
خاصة محمد وأحمد وسيارة ابوه موجوده غريبة تعوذ من الشيطان وهو يروح المسجد صلى الفجر وهو يهوجس في عياله خلص الصلاة يخرج أول واحد من المسجد اخرج جواله واتصل على محمد ولده واكثر من اتصال مايرد وعلى احمد رد على طول : هلا يبه
علي/وينكم يااحمد
احمد وهو يتنهد : قريب يبه كنا ندور فارس ولا حصلناه
علي بخوف: انت صادق من البارح واخوك ماجاء.
احمد /هذا حنا ندور انا وجدي ومحمد وعبدالله وماخلينا مستشفى ولا شرطة وماحصلنا له خبر خذ جدي يبغااك.!
زفر بقوة وهو يسمع صوت ابوه الغاضب : علي ولدك ماله آثر والله لو صار لفارس شي ياذبحك انه على يدي تصرف لايجي الظهر إلا فارس عندي
وقفل الخط في وجهه.
علي وهو مو قادر يوقف يعني نايم من البارح وولده ماله آثر لا يافارس لاتفجع ابوك .
غمض عيونه وهو ياخذ نفس عميق استودعتك فارس يارب ماهي من عوايده يخرج مره ولا يتأخر تعوذ من الشيطان اكثر من مره وهو يطرد من عقله احمد اخوه وهو يخرج من البيت زعلان.
رفع جواله وهو يفتح الواتس حصل رسالة من فارس قبض على الجوال بقوة علشان مايطيح من يده
رسالة حس روح بتطلع لما شافها حاول انه يكذب عيونه رجع يتأكد انها من فارس .

(يبه سامحني تمنيت اني مااحطك في الموقف هذا بس مجبر جيتك على اساس تحتويني وتسمع لي يبه انا اعاني وابغى احصن نفسي بالحلال فتن اشوفها وتُعرض علي واصد عنها بس انت ماساعدتني وصديت عني يبه بخلت علي بفلوسك تزوجني واكمل نص ديني لكن حصلت مين سمع لي وفتح لي قلبه قبل جيبه واعطاني اللي انت بخلت به علي اعطوني يبه ..لكن المقابل ثمنه كبير يمكن حياتي سامحني وإن شاء نلتقي في الجنة )

حاول يمشي ويتماسك لين وصل باب بيته وجلس ماعاد قدر يكمل ويدخل لا يافارس لا تكسر ظهري فيك تعال واعطيك عيوني ..
رجع واتصل على جواله مقفل.!
رفع عيونه وهو يشوف سيارة احمد توقف وينزل منها ابوه وهو معصب وصل لعنده وبغضب : عاجبك ذحين ولدك ماندري وينه .!
أحمد وهو يشوف انهيار ابوه : جد صلي على النبي فارس ماهو صغير وراح نحصله ان شاء الله
علي والشيطان لعب في عقله وهو يتخيل ولده راح في طريق ضيااع والله انه يتمنى يشوفه ميت بحادث وقدامه يهون احسن من يشوف ولده راح مع ناس تغسل مخه ويجي يحارب اهله ووطنه ويفجر .!
رفع الجوال بدون كلام وهو يشوف ولده محمد وعبدالله جايين لهم اعطى أحمد الجوال وقال شوف اخوك ايش مرسل لي فارس كسر ظهري .!
أحمد مسك الجوال وهو يشوف ايش كاتب اخوه وبجزع : الله ياخذ فارس الكلب الله ياخذه !
عبدالله كان قريب منه سحب الجوال من يده وهو يشوف المكتوب: اص ولا كلمة تعالوا ندخل تعالوا .!
في المجلس الجد بعصبية : والحل ذحين كلها منك انت وهو يأشر على ولده المصدوم .!
محمد/الكلب فارس الله ياخذه احسن ونرتاح منه كنت ملاحظ عليه صار منطوي وعلى اللاب توب كل وقته وفجأه صار مايخلي المسجد بكل الفروض .!
عبدالله/صلوا على النبي لازم نتصرف بحكمة الموضوع ماهو بسيط ماراح نبلغ ابد إلا بعد مرور 24ساعة افضل .!
.
.
الجد محمد/
وهو نازل من السيارة مايدري كيف وصل المزرعة وهو يفكر ويهوجس في فارس وين راح بيكمل يوم مختفي ماخلوا مستشفى ولا قسم شرطة في الرياض إلا سألوا عنه ولا حصلوا عنه خبر معقولة ماعاد بيرجع وتصير نفس خرجت عمه أحمد رفع عيونه لفوق يارب لا تكسرني بفارس واخوانه وفارس غير عن كل أخوانه يحبه ويغليه
مستحيل يمر يوم كامل ولا يجيه فارس يطمئن عليه حتى اذا جدته مسويه أكل يعرف اني احبه ياخذ منه ويجيبه لي بدون ماتدري جدته انه لي واحيانآ يجي ياخذني من المزرعة ويقول والله لتجي ومانجتمع بدونك وجدتي عندي ماعليك منها.!

21 - 5 - 2021, 06:29 PM

البا ت23

اول مره في حياته ينهار كذا يحس بثقل في راسه خاصة لما وصلت علي رسالة من فارس وسمع ايش كاتب حس كأن الأرض انخسفت به فكرة ان فارس يموت ذبحته كيف لو انه مع الفئه الظالة يارب سترك لا يغررون به ويجي يذبح لي اخوانه عساكر وعيال اخواله كلهم عسكر ياارب لطفك لما حس انه عاجز ضاق به المكان قبل يخرج مسك علي ولده
وقال انا بروح المزرعه ووالله ان حصل لفارس شي ان ذبحك على يدي طلعه لو من تحت الأرض وهو ساكت ماغير يناظر في الأرض
اعرف اني قسيت عليه واول مره من فقدت احمد وانا احاول اني اعوض علي لكن اليوم ماعاد قدرت اتحمل طفى السيارة
ونزل ويشوف الراعي السوداني الفاتح جاي عنده : سلامات ياعم محمد ماجيت البارح ولاترد على الجوال .!
محمد/خلها على الله يالفاتح صارت مشكلة عند الأهل وجلست لين ذحين وضاق بي الكون هناك ورجعت هنا.!
الفاتح /لا والله سلامات عسى خيرر،
محمد وهو يحاول يتماسك :فارس يالفاتح اختفى من البارح الساعة 11في الليل ولاندري وينه سيارته واقفة وجواله مقفل خرج زعلان.
الفاتح وهو يناظر في عمه محمد كيف باين عليه التعب فارس ولد عمي علي ماغيره!
محمد/ايه بلله هو .
الفاتح وهو يلتفت لديوانية اللي داخل المزرعة قال: فارس هنا يا عم محمد من الساعة 12في الليل جاء مع كريم وسألته عنك قال مدري وينه.!
محمد وهو مو مصدق مسك الفاتح وهو يرفعه من ملابسه: انت صادق ذحين .
الفاتح وهو مفجوع : ايه بالله هذا هو هناك
ويأشر على الدوانية دفه محمد من قدامه وهو يمشي بسرعه لين دخل الديوانية وهو يشوف فارس قاعد مقابل شاشة البلازما ومشبك البلايستيشن ومركب السماعات في أذنه ومندمج يلعب وحوله علب عصير ووجبات وموية وشبساات ومعطي الباب ظهره
محمد يحس انه مو مصدق انه قدامه مشى لين جثى على ركبه ورا فارس وهو يحضنه بقوة فارس من الخرعه بغى يطير وجده يحضنه بقوة ولا تكلم وفارس يحاول يفك نفسه ماقدر نزل السماعات وهو يسمع صوت جده يعاتبه.!
فارس/جد تعوذ من الشيطان ايش فيك.!
الجد يهز فارس وحاضنه بقوة كأنه يخاف ينحاش منه : ليش يافارس ليش او جعتنا من البارح وانت هنا مبسوط وحنا في حال مايعلمه إلا الله ابوك منهار هناك واخوانك يدورون لك .!
فارس مسك يدين جده وهو يبوسها ويشوف وجه جده وعيونه اللي كلها دموع حس انه غلط كان يبغى يخوفهم بس ماتوقع انهم يصدقون كذا ندم كثير خاصة لما تذكر الرسالة اللي ارسلها قبل الفجر على جوال ابوه .
سحبه جده لين وقف وهو يستوعب ان فارس لعب عليهم وبعصبية : والله لو ما الخوف من الله لهبدك هبد على راسك ذه اللي مليان خبال وتغدي رجال نعلبوا غيرك انت صاحي وإلا خبل كيف لو اننا بلغنا عنك وانت متبطح هنا مثل الحمار
فارس بندم بس ماوضحه : تستاهلون مو انتوا تقولون اني بزر خلاص هذي حركات البزران
محمد الجد فكه قبل يعصب اكثر ويروح صدق منهم ولحد ذحين مو مصدق انه قدامه من كثر فرحته بشوفته نسي يدق على ولده يطمنه لكن يبغى يتفاهم مع فارس اول قال له تعال انت صادق تبغى العرس
فارس /ايه بلله اني صادق
الجد /اتوقع انك تعرفني وكلمتي تمشي على ابوك وعليكم زواجك علي كامل لكن بشرط افتح مشروع صغير على قدك ان بغيت انت تجلس فيه خير وبركة وان بغيت عامل ابشر به .اهم شي يكون عندك مصدر دخل اذا سألني ابو العروس اقول له ايه عنده المحل الفلاني وهذي الصرافة ( وهو يخرجها ويمدها له ) خذ المبلغ اللي يفتح لك مشروع وكون نفسك معك مهلة من 3-6شهور ووعد مني وانا أبو احمد ماتكمل السنة إلا متزوج وزواجك ومصروفك كامل علي وذحين قوم قدامي علشان اطمن ابوك واخوانك لا بارك الله في عدوك هيا ايش يخارجنا من اخوك محمد اللي شياطين الدنيا كلها في راسه منك .
فارس بخوف وهو يمسك يد جده : انا في وجه الله من سميك ياجد امنعني منه مجنون والله ان يهبدني هبده تجيني منها جلطة ثلاثية الأبعاد .!
الجد(محمد) وهو يفك يده: والله انك تستاهل ذحين تعال سوق ماعاد قدرت حتى افتح عيوني
ركب وهو يخرج جواله ويتصل على ولده ومن اول رنه فتح الخط خايف ان ابوه بيجيب له خبر شين عن ولده
: يبه لاتقول ان فارس فيه شي تكفى.!
نبرة الخوف في صوت ولده عورا قلبه محد يلومه ولده وهو جرب نفس الشعور لما فقد أحمد
قال له : علي صل على النبي ولدك طيب وهذا انا وياه جايين عندكم وولدك محمد اذا مايقدر يمسك نفسه لا اشوفه يخرج قبل اجي لان فارس في وجهي محد يقول له كلمة
وقفل بدون مايسمع رد ولده دخل الجوال في جيبه وهو يلتفت يشوف فارس اللي يسوق ساكت الله زرع له حب وغلا غير عن اخوانه صح انه يحب محمد اخوهم بس فارس غير محد يوسع صدره ويسأل ويهتم له إلا فارس ولا ينسااه حتى ملابسه هو يفصلها له ويشتري له اغراضه الشخصية بدون مااقول له .!

21 - 5 - 2021, 06:30 PM

البارت 24

وصلوا وهو يشوف ولده علي واقف عند الباب ومعه احمد نزل وهو يشوف علي يجي لهم حتى قبل ماينزل فارس فتح بابه وهو يحضنه بقوة : ليه يافارس ليه تسوي في ابوك كذا ليه ذبحتني
ابعده من حضنه وبعتاب ليه يافارس ماعمري رفضت لك طلب ارسلت لي صورة سيارة وقلت يبه خاطري فيها وبعد ثلاث أيام شريتها لك جديدة وكالة وامس بس علشان قلت لك لا تسوي فيني كذا.
فارس بندم وهو يشوف حال ابوه مسك راسه وهو يبوسه : اسف يبه والله ماحسبت انه بيصير كذا
محمد(الجد) ىخلاص انزلوا ونتفاهم داخل .!
نزل فارس وهو ماسك يد ابوه وجده دخل قدامهم
شاف أحمد اخوه واقف عند الباب ناظر فيه بدون اي كلمة ونظراته تكفي عن الف كلمة وعتاب .!
وصلوا المجلس وهو يشوف محمد جالس وشياطين الدنيا كلها فوق راسه ومن شافه دخل وقف وبصراخ : انت ماتفهم حمار انت والله منت رجال وهذي حركاتك وباقي تبغى تتزوج ،!
الجد (محمد)وبعصبية : اص ولا كلمة ويله قدامي اخرج قبل اقوم اهبدك انت الثاني بالعصا ذي مالنا احترام عندك قلت فارس في وجهي مالك دخل وعلى الأقل فارس فكر في الزواج احسن منك اللي تتهرب من الزواج يله انقلع اخرج.
.
.
بعد مرور شهر

علي/
في مكتبه جالس ينتظر أميرة بنته تجي ومعها وحدة مشهورة تسوي اعلانات تقول يبه ماتسوي إلاعلان إلا يكون ناجح،
كلمتها أميرة من شهر وقالت أنا خارج الرياض و ماعندي إمكانية اجي إلا نهاية الشهر واتفقت معها وحولت لها قيمة الأعلان قبل أمس.
عنده مخطط عبارة عن 20 قطعة ارض دفع فيها مبلغ كبير وسماه مخطط الأميرة على اسم أميرة بنته حبيبة قلبه وبنته الوحيدة بين اربع ذكور
وهو شغال في المخططات من حدود 7سنوات وكل مخطط يعرضه للبيع مايجلس اقل من شهر وينباع إلا المخطط ذا خمس شهور محد اتصل او استفسر عنه.
حط لوحات عنه بكل شارع وماتيسر له بيع مره.
دخلت أميرة ومعها فارس اللي معصب على غير العادة أميرة وهي تسلم على ابوها : يبه شوف فارس من خرجنا من البيت وهو ماغير ينافخ وجنني وهو يسوق.
فارس /اقول لا يكثر واحمدي ربي اني جبتش علشان تقابلين المشهورة ياسخف عقلش يعني المشهورة مو إنسانة مثلش ايش الشفحة اللي فيش من يومين علشان بس بتشوفينها وعلى بالش اذا جلستي معها بتصيرين مشهورة خلاص.!
علي بكل هدوء: فارس حبيبي هون على اختك، وبعدين هي جايبتها علشاني انا طلبتها .
فارس /انت ماكنت تعرفها لين ذي قالت لك والله يبه اخاف انها تسحب عليك وانت محول لها مبلغ كبير علشان اعلان ابو خمس سنابات،
أميرة بأندفاع : لا والله مستحيل خزامى تسحب او تخلف وعدها ذحين كلمتني تقول صارت قريب وانت بعينك شفت الزحمه كيف،!
علي/فارس الله يصلحك ليش معصب ذحين ماصار شي جبتها وكثر الله خيرك،
فارس/ لا والله إلا صار اني خليت شغلي ماعنده إلا العامل وانت تعرف الويكند يكثرون الزبائن
أميرة وهي تناظر فيه : ماعرفتك يالتاجر الكبير ترى حدك عربه مدري كرتون وابريق شاي وحزمتين نعناع وصكيت راسي شغلي شغلي،
وقبل يرد عليها فارس دق جوالها وهي تشوف اتصال خزامى قالت: يبه البنت وصلت ، وانت تقصد فارس توكل علشان البنت تاخذ راحتها.
فارس اللي يناظر في أميرة يبغى يقوم ينتف شعرها بس ابوه موجود وعلشان يعاند لها : والله مااتحرك من هنا عناد
أميرة/يبه شوف فارس كيف البنت تاخذ راحتها وهو متكي هنا.
فارس /الله اكبر اللي يسمعك يقول البنت ماعمرها وقفت مع رجال اقول انثبري احسن قبل اسحبش ذحين وعلى البيت.!
علي وهو يمسك يد أميرة :خليه يجلس عادي
فارس وهو يناظر فيها بنظرات انتصاار
طنشته وهي ترتب ضيافة على الطاولة وعلشان يقهرها اكثر قام عند الضيافة وهو ياخذ حبه حلا أوريو وحبه حلا لوتس وحبه حلا روشيه
وصب له قهوة ورجع جلس وهو يحط رجل على رجل.
أميرة بعصبية تضرب رجولها بالأرض: يبه شوف فارس
فارش طنشها وهي ياكل الحلا بأستمتاع ويشرب القهوة وهو يطلع صوت وهو يشرب ولما خلص قال: يبه نسيت اضيفك وإلا انت راعي مكان مايحتاج اضيفك
وهو يناظر في أميرة اللي منقهرة ويضحك
أميرة شافت ابوها يضحك على فارس عرفت انه ماراح يقول له شي .
تحركت للباب وهي تشوف خزامى تنزل من السيارة سحبت الستاير على الباب علشان محد يشوفهم من الشارع فرحانة وهي بتشوف خزامى حبتها بدون ماتعرفها معرفة شخصية بس تراسلها وخزامى اخلاقها عالية تنحب بسرعة من تواضعها .!
خزامى وهي داخلة المكتب اول مره تغطي اعلان في الرياض ومحد معها أمها تعبانة وندى بتجلس معها وريم عندها دوام وأشواق جت معي الرياض بس عندها دوام وماتقدر تطلع.

21 - 5 - 2021, 06:30 PM

البارت 25

واول مره في حياتها تركب مع سواق لوحدها
الشركة سوت لهم أعلان ووفروا لها سيارة مع السواق
دخلت خايفة ومرتبكه ارتاحت وهي تشوف بنت منقبه واقفه عند الباب اكيد انها أميرة اللي تواصلت معها علشان الأعلان سلمت على أميرة ودخلت معها المكتب اللي كلمة فخم قليلة فيه و ريحة العود الفاخرة
سلمت برسمية وهي تسمع أميرة تأشر لها على الكرسي تفضلي هنا
جلست ولا حتى رفعت عيونها لشخص اللي على المكتب ولا الثاني اللي كان واقف
اخذت القهوة من يد خزامى وهي تشوفها تروح تقهوي أبوها سمعت صوته يقول : حبيبتي متقهوي جعلني فداش
وبعدها جلست أميرة على الكرسي اللي مقابل لها.
خزامى وهي تنزل الفنجال من يدها موجهه كلامها لأميرة : لو سمحتي خلينا نبدأ في الأعلان لاني مشغولة.
أميرة/ ابشري يبه تفضل قول لها عن المخطط.
علي مندهش من دخلت البنت ذي عليه يحسبها كبيرة في عمرها من صوتها قدر يميز انها صغيره كيف اهلها يسمحون لها تجي لمكان وحدها وبين رجال حتى ماقدر يرفع عيونه لها حس بقهر مايدري ليش.!
أميرة ماقالت له انها صغيرة كذا والله لو عرف انها صغيرة كذا مايسمح لها تجي عنده الله غني من الأعلان.! هو مايرضى ان أميرة يلمح احد طرفها كيف تجلس مع رجال ماتعرفهم حاول قد مايقدر يكون طبيعي
فتح الملف اللي بيده شرح لها بسرعة وحاول يختصر علشان تخرج من عنده وهو يشوف نظرات فارس لها من دخلت عندهم.
سمع صوتها وهي تقول : لو سمحت ياعم اعطني الملف علشان اشوف الأعلان
اعطاها الملف وهو يشوف بياض يدها والمناكير اللي مزينه اظافرها بها والخواتم والساعة واضحة بسبب اكمام العباية الواسعة .!
اعطاها الملف وهو يقوم اخذ جواله وجه كلامه لأميرة : بطلع أنا وفارس علشان تاخذون راحتكم
يحس بغيرة وقهر وين ابوها ذي واخوانها الله لا يبارك فيهم.!
خزامى رفعت عيونها له وهو يتكلم شافت وجهه وارتاحت له ماتدري ليش التوتر والخوف اللي فيها ماعاد تحس فيه.
شافته بيخرج قالت عم عادي اجلس اكيد بحتاجك.
رجع مكانه وهي تقرأ الملف كامل
وقفت وقالت له عم عندك صور للمخطط اوضح من ذي.
قال لها موجوده بدون مايرفع عيونه لها طلع ورقة كبيرة اخذتها وهي تقول ملعيش عم بحتاج مكتبك شوي
أميرة شيلي الأغراض
فتحت ورقة المخطط الكبيرة على المكتب وفتحت جوالها،
مساء الخير متابعيني واخص أهل الرياض مثل وعدتكم اليوم انا جايبه لكم مخطط اراضي سكنية لا يفوتكم.،!
اخذت تصور المخطط بطريقة احترافية كل صورة من زواية لين خلصت وارسلتها .
وبعدها فتحت سنابها وقالت متابعيني مثل ماشفتوا الصور اللي قبل شوي هي لمخطط الأميرة
عبارة عن اراضي مساحة كل ارض تختلف عن الثانية
المساحات في المخطط مابين 500_600_700
واجمل مافي مخطط الأميرة انه معتمد بصك سكني مستقل متوفر فيه اسفلت وكهرباء وإنارة والمخطط بعيد عن مجرى السيول وبنفس المكان مدرسة حكومية قيد الإنشاء انا اقول اللي بيشتري المخطط ذا محظوظ يقدر يسوي منه محطة وشقق ومحلات ، خاصة انها على شارع عام رئيسي .!

في السنابه الجايه راح احط رقم جوال العم ابو محمد واكيد ماراح يقصر مع متابعيني.!
علي وعيونه على مكتبة ويسمع صوتها وهي تتكلم بسرعة وثقة ماكأن حولها احد .
كأنها دارسة المخطط رغم انها اخذت لمحه بسيطه عليه إلا انها ذكرت كل ميزة في المخطط؟
سمعها وهي تقول عم علي لاتقصر مع متابعيني
رد بدون مايرفع عيونه لها ابشري انتي وهم وسكت.!
فارس اللي ناشب لأميرة : قولي لها تجي تسوي لي اعلان ب 200 ولا راح ازيد هلله وحده.
أميرة /انت من جدك تبغاها تسوي اعلان لشاي ونعناع وخرابيطك توكل بس.!
فارس انقهر من أميرة طنشها وهو يقرب من خزامى : لو سمحتي عادي تسوي لي اعلان عندي مشروع عربة متنقلة وبكم سعر الأعلان عاد راعينا في السعر انا حافي منتف مو مثل أبوي .!
خزامى وهي تناظر فيه يالبيه ايش الزين ذا الأب و ولده حلوين .!
قالت : ابشر وين المشروع وايش فكرته رغم اني مااسوي اعلان إلا بعد ماتعطيني خبر قبلها لاني مرتبطه والله بس ابشر علشان العم علي واميرة .!
فارس وهو بيطير من الفرح : مو بعيد من هنا ولما نوصل هناك اشرح لك بس تعالي معي ذحين.!
خزامى ناظرت فيه :وين اجي معه ذا. لا السواق ينتظري أميرة راح ترسل لي لوكيشن الموقع ونتقابل هناك .!
فارس لما حس انه جاب العيد معها ضحك وقال : طيب
وهو يشوفها تسلم على اميرة وتخرج
فارس وهو يرقص حواجبه ويغيض أميرة : مفكرة نفسك الوحيدة اللي تتواصلي مع مشاهير يبه خذ بنتك النشبة ذي معك رجعها البيت انا مشغول المشهورة خزامى بتسوي اعلان لي ..

21 - 5 - 2021, 06:31 PM

البارت 26

علي/فارس خذ أميرة معك مايصير تكون مع البنت لوحدكم وخفف من نظراتك لها خاف الله شوي وتاكلها بعيونك.
فارس : ابشر يبه على ذا الخشم ماراح اناظر فيها مره
وهو يضحك يبه كيف مااناظر فيه ماتحس انها صعبه، وهي بنفسها جايه لوحدها ومسويه كم اعلان لواحد غيري وقفت على فارس الضعيف؟وأميرة ماراح تروح معي عناد فيها لانها رفضت تكلمها
علي ماقدر يخلي البنت تجلس مع فارس لوحدها مايدري ليش حس انه مسؤول عنها قال : كلنا بنروح اجل يله ياأميرة .!
وصلوا مع بعض بعد ماارسلت أميرة ا اللوكيشن لخزامى ووصلت هي بعدهم نزلت وهي تشوف فارس واقف مع أبوه ومعهم واحد ثاني وصلت لهم وهي تدور وين أميرة
شافت فارس يقول لها : تفضلي ذي عربة متنقلة وجبات سريعة مشروع صغير على قدي
خزامى تناظر في فارس اللي قريب منها وسامة وجمال تبارك الرحمن بياض بشرته خشمه الطويل عيونه الواسعه كأنه حاط كحل بعيونه طول وتناسق جسم لابس بلوزة تركواز على بنطلون جنز وشعره الطويل الوضح اطرافه من تحت الكاب الأسود ماركة نايك
كان يشرح لها المشروع وهي تتأمل فيه في ذمتي انه اجمل من الأتراك كلهم انتبهت له وهو يقول مااتفقنا على سعر الأعلان
حاولت تشتت نظراتها عنه قالت الأعلان ببلاش
أبوه اللي كان قريب : لا يابنتي ذا تعبك اطلبي السعر اللي تبغين وابشري .
رفعت عيونها له وهو لابس نظارات لما قال يابنتي حست بشعور غريب اول مره في حياتها تسمع الكلمة ذي ومن رجل : تسلم ياعم بس انا اسوي اعلانات ودعم المشاريع الصغيرة ببلاش خاصة مشروع الأخ فارس مره عجبتني فكرة المشروع إنسان طموح وفي العمر ذا ولا قال ماراح اشتغل واوقف في الشارع انا كثير معجبة بطموح اخوي فارس وإذا حنا مادعمنا مثل المشاريع الصغيرة ذي من يدعمها
فارس تشقق من الفرح اول مره في حياته ناس تمدحه ناظر ابوه وضحك: اسمع المدح كيف
خزامى سمعته وضحكت بشويش على كلامه قالت له : لو سمحت اخ فارس كم عمر المشروع واعطني المنيو علشان اصورة
فارس وهو خاق معها وبقلبه الله يجلعني منيو ياشيخة
اخذت المنيو من يده وهي تقول له : ادخل لو سمحت العربة علشان اسألك وانا اصور
تحركت بعد ماشافته يدخل العربه وهي وقفت مقابل له فتحت السناب وهي تصور وتشرح فكرة المشروع وكل شي عنه.
اهل الرياض جيت لكم الليلة بأعلان جميل هو عبارة عن مشروع صغير لشاب سعودي طموح المشروع عبارة عن مطعم صغير متنقل اسمه عربة الفارس
تعالوا معي خلونا نشوف ايش داخل العربه الجميلة .
•ذي ألة صنع البرقر ؟!
•وهنا آلة صنع الوافل؟!
•وهنا آلة القهوة بكل انواعها،
وهنا شاورما الفارس ؟
وعصائر طبيعة !
ومشروبات غازية!'
يعني العربة ذي او السيارة مطعم متكامل شد انتباهي النظافة داخل العربه ماشاء الله ،السنابه الجاي هي للمنيو كامل وفيه ارقام التواصل وحساباته تقدرون تضيفونه وتتواصلون مع فارس وعنده استعداد يتواجد في المهرجانات والحفلات الصغيرة اهل الرياض ادعموا ولدكم فارس يستاهل الدعم خاصة انه باقي طالب وقدر يوفق بين الدراسة والشغل
خلصت وفارس يحس انه اسعد إنسان كلامها اعطاه طاقة إيجابية كبيرة.!
خزامى وهي موجهه كلامها لعلي الواقف معهم طوال الوقت ويكلم واحد واقف معه شكله ولده .!
قالت : عم علي انا خلصت وينها أميرة مااشوفها معكم
رد ولده الواقف معه وهو يناظر فيني بأحتقار وبنبره كلها قرف : بنات الشيخ والحمايل مايوقفون في الشوارع.!
يالله حسيت كلمته ذي ذبحتني كأنها غشواه على عيوني اشوف ابوه يكلمه وفارس بس مو قادرة اسمع شي من كلامهم له الشي اللي اذكره اني ناظرت في ابوه نظرات كأني اشكي له بدون مااتكلم وبعدها في فارس كانوا يتكلمون معي ولا ادري ايش قالوا لي وبعدها ركبت السيارة بدون ماارد عليهم مو اول مرة اسمع كلام مثل كذا بس ليش كلامه أثر فيني كذا ..
ظيمنع
ظيمنع
محمد

يناظر في ساعته تأخر على جدته وبخطوات سريعة دخل المستشفى الخاص جدته من يومين تعبت وتعبوا كلهم معها كان في الجنوب عند أمه واتصل يطمئن عليها وقال له ابوه انها تعبانة حاول يكلمها ماقدر ماغير يسمع صوتها تستفرغ وهو على الخط احس روحي بتطلع وانا اسمع صوتها وهي تتوجع جدته اللي تحبه وتحب اخوانه اكثر حتى من ابوهم يمكن
وهو بالذات تحبه مثل روحها تعاملة كأنه ولدها من كبر وعرف الدنيا وهو في حضنها .
رفضت تروح المستشفى تقول مااحبه وماراح أموت قبل يومي وإن مت ماعاد انا بأغلى من أحمد اللي مات وهو بعز شبابه وانا عارف انها رافضه المستشفى علشان مايكشف عليها دكتور.

المواضيع المتشابهه لموضوع: رواية جنوبية برت حالي ولا دري وين ديرتها لموضوع: رواية جنوبية برت حالي ولا دري وين ديرتها
الموضوع	كاتب الموضوع	المنتدى	مشاركات	آخر مشاركة
تحميل رواية خالي العزيز نابليون pdf	همسه الشوق	قسـم البحوث والكتب العلميه او التعليميه	13	11 - 2 - 2021 07:28 PM
رواية فهد و نوره رواية رومنسية سعودية كاملة	سجات التهاويل	همس للقصص وحكايات وروايات	23	8 - 6 - 2018 01:07 PM
حمود السمي يخربها مع حبيب محاورة حفل تكريم الشاعر حامد محمد	جروح الم	همس للعرضات و المحاورات الشعريه القلطات	5	9 - 10 - 2015 05:45 PM
مشاعر لم يجربها الرجل هع	إنكسآر ♪`	همس للألغاز والنكت والضحك	6	28 - 10 - 2012 11:04 AM
رواية قمر خالد من اروع الروايات	الحب ياسمين	همس للقصص وحكايات وروايات	2	5 - 6 - 2012 04:13 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

رواية جنوبية برت حالي ولا دري وين ديرتها

همس للقصص وحكايات وروايات