رواية حلام مجتمع

البارت 26


الصباح في المدرسه وقت الفسحه
هيول: اسمعي يا سويره ياويلك اذا انكشفتي تجيبن اسمي والله اذبحك
ساره : لا ان شاء الله ماراح انكشف لا تفاولين
هيول: المهم اذا انكشفتي لا تجيبين طاري اسمي
ساره: طيب .. المهم متى بتصفرر؟؟
هيله وهي تناظر ساعتها: امممممم بقى عشر دقايق
ساره: حلو بقوم الحين
هيله: انتهبي احد يشوفك
ساره وهي تغمز لها: لا توصين حريص.. يلا تشاااو وادعي لي
هيول وهي ترفع يدينها لفوق: الله ينصرك يا ساره بنت ناصر
طلعت ساره فوق وبعد ما تأكدت ان الفصول فاضيه ومافيها بنات دخلت فصل بيان ووقفت قدام درجها وحطت السجاير بشنطتها واخذت ورقه بسرعه وقلم وكتبت عليها :
(ضروري وهام جدا التفتيش اليوووم في فصول ثاني ثانوي )... واستنت تصفر عشان المراقبه تنزل ترقي البنات وتحط الورقه على مكتبها
*
*
*
صفرت الفسحه وطلعوا البنات فوق ومن بينهم بيان اللي كانت تضحك وتستهبل مع الكل وصارت تعرف نص بنات المدرسة على الرغم من انها مازالت رافضه فكرة الدراسة فيها بس تأقلمت بعد ماكيفت نفسها..
مريم بينها وبين نفسها وهي تناظر بيان : ياحياتي يا بيان ما تدرين الحين وش بيجيك حسبي الله عليك يا سويره انتي وهيله صدق ان عقليتهم صغييييرة
بيان وهي تأشر لمريم: يا ام الشبااااب شفيـــــك متنحه كذا ما تضحكين .. اضحك لبيان تضحك لك
ضحكت مريم وفي داخلها متعاطفه معها..
*
*
بدت الحصه الرابعه وساره كل شوي تناظر هيله تستنى التفتيش
اخذت المراقبه الورقه وودتها عند المديره وقرروا التفتيش على كل الفصول
دخلت المراقبه على فصل بيان ومريم
المراقبه: يلا ارفعوا شنطكم على الدرج تفتيش
البنات : يوووووووووه............ يووووووووووووووووه وجلسوا يتساسرون... انا جبت صورتي ياويلي والله بياخذونها ... امسكي امسكي بسرعه حطي الشريط بالشباك بسرعه ......حرام توني شاريه القلوس بياخذونه ياسخفهم..... يوووو ياللله
المراقبه تضرب يدها بالدرج: بـــــــــــــــــــــــــس انا وش قلت لكم ... ارفعوا الشنط وانتم ساكتين
رفعوا البنات شنطهم وبدا التفتيش واخذ الممنوعات ..وصلت المراقبه درج بيان
المراقبه بذهول: وصلت معكم لهالدرجة.. وش هذا يانهى؟؟؟انتي!!!!!!
نهى انصدمت والبنات سكتوا وصارت علامات الاستفهام على وجوههم _ نهى جنب بيان بالكرسي_
المراقبه: قدامي يلا انتي تفاهمك مع المديرة
نهى حاولت تتكلم بس الكلمات ما طلعت من الصدمه وبيان مذهولة مو مستوعبه اللى صار
انصدمت مريم من اللى تشوفها طلعت من الفصل ..بخاطرهاا: معقوله سوير حاطه السجاير بشنطة نهى!!! اكيد غلطت حراااااااااااااام مالت عليها مرة حاسه نفسها ذكيه وداهيه ....
بيان بينها وبين نفسها: مستحيل نهى اللي جايبه السجاير مستحيييييل اكيد وحده متبليه عليها..استغفر الله ماعفت هالمدرسة من فراغ.... _اثناء تفكير بيان جت ساره ببالها وقت ماقالت:والله لاردها وتشوفين.._ معقوله سوير قريح بتحطها بدرجي حطته بدرج نهى..والله لو هي بشهر فيها صدق انها بزر..بس لازم قبل اتأكد من مريم اكيد بيعلمونها..
بين الحصتين قامت بيان بسرعه جنب مريم
بيان:مريم
مريم بتردد:هلا
بيان: بسألك بس الله لايحللك ولايبيحك اذا كذبتي علي
مريم: اف اف وش السؤال؟!!
بيان:مو سوير هي اللي حطت السجاير في شنطة نهى على اساس انها شنطتي؟؟
مريم: مدري..ترى ماتعلمني كل شي ..وعلاقتي فيها مو مرة قويه
بيان: اهااا يعني هي_ وقامت_
مريم: تعالي بيان
بيان التفتت على مريم: نعم
مريم: حلليني
بيان: الله يحللك ويبيحك دنيا واخرة .. ترى يامريم انا عقليتي ارقى من صاحباتك ونصيحة دام علاقتك فيهم مو قوية خليك منهم..هذي نصيحة وانتي ابخص
بعد ما خلص الدوام وصفرت الحصه الاخيره وطلعوا البنات من الفصول
هيول: يلا يا ساره ساعه تجمعين اغراضك خليها بالدرج عادي ماتضيع ماتشوفين شنطتي خفيفه كل اغراضي بالمدرسه هههههههههه
ساره: طيب طيب خلاص يلا بس وين مريم غريبه ماجت بالعاده تمر فصلنا؟؟
هيول: شكلها زعلانه
ساره: يووووووووووووه مسوية لي مبادئ وقيم..اسفهيها متى ماطاح اللي براسها ترضى
هيول: ايه اللي يزعل من نفسه يرضى من نفسه
طلعوا البنات من الفصل وهم نازلين من الدرج
ساره وقفت بمكانها وجلست تناظر قدامها : هيول هيول شوفي مين موقف عند نهايه الدرج
هيول شهقت : يمه شعندها بيان الشر؟؟!
ساره : تتوقعين عرفت انه انا اللي حطيت السجاير بشنطتها؟؟
هيول: مدري عنها جنية مايفوتها شي..امشي بس امشي لاتحس اننا نتكلم عنها
مشوا البنات ولا عبروا بيان
بيان وهي تضرب ساره على كتفها : شوفي يا ماما حركاتك المبزرجيه ماتسوينها علي وبعدين شغل التدسيس اتركيه هاه.. وعيب عليك استحي على وجهك جايبه دخان تبين تحطينه بشنطتي وهذا وحنا نصير لبعض اجل لو مانقرب لبعض وش بتجيبين مخدرات ؟؟؟ بس اعتبري هالحركه ذله بمسكها عليك
ومشت وخلتها... وساره واقفه بمكانه ولا نطقت بكلمه
بيان وقفت بنص طريقها: اوه نسيت اقولك _وتلتفت على ساره_ انا شنطتي سوداء هاه سووووداء مو بيج والمره الجايه فتحي عيونك زين
وتركتها وراحت
ساره التفتت على هيله ومو مستوعبه اللى صار
هيول عيونها طالعه لبرا: تتوقيعن تعلم الاداره؟؟؟
ساره: مدري عنها..حتى لو علمت بقول مو انا...بس تعالي طلعت منها مااقولك جنيه صارت بالبنت اللي جنبها
هيول : اسمعي انا قلت لك اسمي ما تجيبينه اذا انكشفتي
ساره: .........
هيول: فهمتي؟؟؟؟؟؟؟؟؟؟؟؟؟
ساره: ايه ايه... بس والله خوفتيني ...
هيول: يلا سواقنا جا اسمعه يناديني يلا _ وسحبتها وراحوا_
****************************
الظهر في بيت ابو فهد
وجدان اللي توها جايه من الجامعه:نجود وش مغيبك ؟ مارحتي اليوم للمدرسه؟
نجود:لا مالي نفس بس أنبني ضميري اني غبت وجلست اذاكر.
ام فهد وهي مارة من الصاله: وجدان متى جيتي؟!!
وجدان: من شوي.. اخر محاظرة كنسلتها الدكتورة الله يجزاها خير
ام فهد: هههههه الحين الله يجزاها خير هاه؟؟... المهم ماعلينا هاه ماقلتيلي وش ارد لاختي؟؟ استخرتي؟؟
نجود : لحظه لحظه..لحظه وش السالفة؟!!!
ام فهد وهي تناظر وجدان: يووو ماعلمتيها؟
نجود: لا وشو
وجدان: اصلا موضوع مايخصك ياشاطرة
نجود: لا والله!!!
وجدان: طيب طيب اصلا هذي السالفة اللي كنت بقولها لك امس ..
نجود: وشو احد خاطبك؟
ام فهد: ايه طارق ولد اختي يبيها
وجدان هنا حست بأهميتها عند طارق وماعلقت اكتفت بابتسامه
نجود: صــــدق؟!! .... ياحليله والله مااتخيلكم متزوجين
ام فهد: انا اللي مستغربته ان شيخه اختي ماعمرها طرت انها بتزوج طارق..
نجود:وجدان هاه نقول مبروك؟
وجدان: مدري باستخير بعد
ام فهد وهي طالعه: المهم لاتطولين السالفه ..اذا على طارق فهو رجال ونعم فيه..والله يقدم اللي فيه الخير
وجدان: ان شاء الله يما بس استخير بعد وارد لك ...وادور لي كم شرط منا منا
نجود: اوووه شي شروط بعد شفتي الرجال شاريك قعدتي تتدلعين...بس صدق يا حليله ما توقعت يجي ويخطبك ... الله يوفقك
وجدان: امين .. عقبالك
نجود جا ببالها عبدالله على طول _ وسرحت_
وجدان: اقول اروح عند يماعاشه ابرك .. فاتك يا نجود مو يماعاشه انخطفت عينها صارت تحس انها عميا.. امس تقول لملوكه من ذي نجود ههههههههههه يا حبي لها
نجود ضحكت من غير نفس
وجدان : طيب انا بروح لان شكلي ثقيله على بعض الناس_ وتغمز لنجود_
نجود: هههههههههه لا والله بس والله متضايقه بفقده يا وجدان مره مره احس بيصير فراغ بحياتي
وجدان: والله يانجود اذكرك بعديـــــن بيصير سالوفه من سالوفاتنا .. عاد اذا كبرنا تقولين يا حليلي كلمت واحد اطخم ههههههههههههه
نجود: ههههههههههههههه ياحبيلك
وجدان انبسطت انها قدرت تقنع وتضحك نجود لو بالشي البسيط: طيب تعالي نجلس مع العائله الكريمه
نجود: لاااااااااا مالي خلق
وجدان: اقول قومي .. شكلك اليوم غايبه تعيشين جو الحزن والوحده على كم دمعه_ وتقومها_ بس قبل يا حبيبتي روحي غسلي وجهك نكته هههههههههههههههههه
راحوا عند المغاسل مع بعض ووقفوا قدام المراية
نجود: ههههههههههههههههههه يمه يمه مو هذا وجهي
وجدان:ماقلتلك نكته..منفففففخ ههههههههه
نجود ضربت وجدان على كتفها: يا الشينه انطمي
غسلت وجهها وراحوا جلسوا عند العائله الكريمه ووجدان انبسطت مررره انها قدرت تغير نفسية اختها

البارت 27


في بيت ابو نواف الساعه 6 المغرب
ام نواف : يلا ساره قومي من النوم .. بعد شوي بتجي اماني
ساره: يمااااااااااا شوي شوي
ام نواف: يلا بس بلا دلع قومي
ساره وهي تتأفف: قمت قمت _ تعدل جلستها_ياربيه مالي خلقها وع احسها ثقيله دم
ام نواف: وش تسوين عاد .. ماعلينا لاتطولين تراهم في الطريق
ساره: طيب
*
*
*
رن الجرس وفتح الباب فواز دخل نواف الخيمه واستقبلت ام نواف اماني
ام نواف: هلا ومرحبا تفضلي
اماني بخجل: هلا خالتي.... شلونك؟؟
ام نواف من دون نفس واضح: الحمد الله ... انتي شلونك مع الحمل ان شاء الله ما تعبتي
اماني: لا الحمد الله
دخلت ساره عليهم
ساره: السلام عليكم
الكل : وعليكم السلام
ساره وهي تبوس اماني: كيفك؟؟
اماني: بخير الحمد الله انتي شلونك و كيف الدراسه معاك؟
ساره بغرور: كويسه
وجلسوا يسولفون وما خفى على اماني انهم ما تقبلوها
ام نواف: الا يا .. يااا شسمك معليش نسيت
اماني طلعت عيونها: ..... اماني
ام نواف:ايه اماني تعرفين تطبخين؟؟
اماني: يعني مو مره مره
ام نواف: شلون مو مرة ؟!!
اماني:يعني مو مرة
ساره: معليش امونه يمكن امي تحسبك زي هيا لان هيا مشاء الله شاطرة في الطبخ
ام نواف: هو في الطبخ بس.. الا في كل شي مشاء الله عليها..
اماني: لو فيه خير ماعافه الطير
ام نواف: لالالا مب عشانها تطلقت ترى نواف هو الخسران مو هي...ولو انه ولدي..انا اتكلم في الحق والحق ماينزعل منه
اماني: اي بس ترى نواف عافها وطلقها من نفسه انا ماقلتله شي هو رجال ويعرف وش يسوي
ام نواف: والله اني ادعيلها ان ربي يوفقها ويرزقها ...تستاهل التوفيق
وقطع كلامهم رنة جوال اماني
اماني: معليش لحظه
ساره: ايه خذي راحتك
اماني: الو
....:..........
اماني: وعليكم السلام
........:........
اماني: طيب ان شاء الله بطلع الحين
:.........
اماني : مع السلامه
وهي تحط جوالها بشنطتها وتوقف : يلا فمان الله نواف ينتظرني برا
ام نواف: فمان الله
ساره: مع السلامه
*
*
بالسياره
نواف: هاه كيف شفتي اهلي ان شاء الله انبسطتي معاهم؟؟
اماني:............
نواف: شفيك ما تردين؟؟
اماني : مافيني شي... بس واضح ان اهلك يحبون هيا
نواف: هيا؟!!!
اماني: كل شوي يجيبون طاريها .. وزياده على كذا يغلطون باسمي ويقولون هيا ولا يقولون معليش نسينا وش اسمك.. حوموا كبدي
نواف: يمكن عشانك جديدة عليهم
اماني: لا مو عشان جديده
نواف: اجل وش عشانه .. ؟؟
اماني: اهلك ما تقبلوني اصلا..عشانك تزوجتني مسيار ومو هم اللي خطبوني لك ترا انا ما لحقتك وقلت تعال تزوجني انت جيتني وانا وافقت
نواف: لالا يا قلبي اكيد متقبلينك بس انتي يتهأ لك
اماني وهي تأشر على نفسها: وش شايف قدامك ؟؟ بقره ماتفهم؟؟ الحين تقولي امك _ وتقلد صوتها بستهزاء_ ياااا ... ياااا معليش نسيت اسمك ... خير وش شايفتني ؟؟ ترا عشانها اكبر مني سكت واحترمتها بس لو وحده ثانيه والله مااسكت
نواف: ياعمري روقي والله هالوجه ما ينفع له الا الابتسامه ... واذا على امي اكلمها بس لا تزعلين انتي...
اكتفت اماني بالابتسامه
نواف: طيب وين تبين نتعشى فيه؟؟
اماني:مدري اللى يريحك
نواف: بوديك مطعم تاكلين اصابعك وصحونهم وراه
اماني: ههههههههههههه
*******************
في مدرسه بيان وساره
بيان بحماس: لايكون موقفك سلبي ..
نهى والعبرة متملكتها: يعني وش اسوي؟؟ الحمد الله بس ان ابوي غير رقم جواله ..والا والله مايتركني
بيان: غريبة مادقوا عالثابت؟
نهى:الا اكيد.. بس من يرد؟ الصباح مرت ابوي في الدوام
بيان:وعادي عندك نظرة البنات لك وانطباعهم عنك اللي تخليهم يبعدون عنك
نهى بكت بقهر وبحسرة
بيان: لاتكونين سلبية ... لاتقهريني زي ماقلت لك روحي للمراقبه وقوليلها ..واذا تبين جيت معاك..احنا مو رايحين نتبلى احنا نقول الحق
نهى: بس اكيد بتقول المراقبه اني ابرر موقفي خصوصا ان ماعندي دليل عليها

في نفس الوقت كانت مريم عند المراقبه ...تحكيلها اللي صار بالتفصيل
*
*
الحصة اللي بعدها..
دخلت المراقبه لفصل نهى ومعها سارة
المراقبه: بعد اذنك ياأستاذه معليش باخذ من حصتك 5 دقايق بس لتوضيح لخبطه صارت
الاستاذه: تفضلي
المراقبه: انا كلامي موجه للكل ..اذا قلنالكم هذا ممنوع يعني ممنوووع يعني ماتجيبونه بلاويكم تخلونها في بيوتكم ..احنا مو في مدرسة ابتدائي عشان نعلمكم ..المهم انا ماابي اعطل الدرس بس زي ماانظلمت نهى عند الكل...انا جايه ابرر موقفها عند الكل .. وسارة بعد جايه تعتذر لنهى على اساس لها يد بالموضوع كرد اعتبار
ساره اللي كانت تحاول تكابر بس طغى عليها التوتر والهزيمة وبصوت واطي: انا اسفه
بيان:هاه وش قلتي؟!! وين راح صوتك؟ والا مستحي ههههههههههههههه
البنات:هههههههههههه
المراقبه: بيان تعالي مكاني احسن..بلا فوضى.._وتلتفت لسارة_وانتي اعتذري زي العالم والناس خلصينا
سارة اللي حست انها صغيييرة عند البنات: ااااااسفه
المراقبة : يلا الحين نستأذن .. ومعليش قطعنا درسك استاذه
بيان: عادي استاذه كله فدى الحق
الاستاذه ماقدرت تتحكم في ضحكتها:ههههههههههههه
*
*
وهم طالعين من الفصل
ساره: الله يخليك الله يخليك استاذه لاتكلمين امي ..خلاص اعتذار واعتذرت وش بعد؟؟
المراقبه: بقى بس نبلغ اهلك..احنا مسؤولين عنك هنا وهم مسؤولين عنك هناك
سارة: لالا تكفين خلاص اخر مرة
المراقبه:احمدي ربك ان اهل نهى ماردوا والا ماكان انتهى الموضوع كذا
ساره:اففففففففففففففففففف
المراقبه: يلا على فصلك بس تأخرتي
*
*
بعد ماضرب جرس اخر حصه طلعت سارة على طول على فصل مريم
ساره: انسي اني صديقتك
مريم: اصلا انا ناسية انك صديقتي من عرفت مستوى تفكيرك
بيان:عسى ماشر يام الشباب ..انتي للحين ماتستحين ..شين وقوي عين ..فيك حيل افردي عضلاتك وريني
سارة :سوري انا اتعامل مع بنات بس
بيان: قال انفخ ياشريم قال مامن برطم هههههههههه
ساره ماحبت تجاكر بيان وطلعت بعد ماانهت علاقتها بمريم

البارت 28


بعد مرور 5 شهور
في بيت ابو فهد ..في المجلس
طارق: يلا ياملاك استعجلي وجدان تأخرنا
مشعل: طيب اشرب بيالتك
طارق: والله مستعجلين ..بنمر كذا محل للاثاث ..
مشعل: الله يعينكم من تملكتوا وانتم تأثثون هالبيت صارلكم4شهور.. زواجكم الخميس الجاي وانتم رايحين محل اثاث!!!
طارق:لا خلاص مابقى الا شي بسيط نخلصه اليوم ان شاء الله...هه هذي وجدان جت
وجدان وكانت عبايتها بيدها:يلا طارق؟
طارق وهو قايم: يلا يلا
ملاك: صدق انكم ماتستحون.. الحين كل يوم رايحين جايين وماتقولون ناخذ معنا ملوكة تغير جو
وجدان: روحي مع مشعل او نجود او امي ...او يما عاشه هي اللي بتغير جوك صدق
طارق: واذا ماودك تطلعين معهم اصبري بعدييييييين يطلعك زوجك ان شاء الله
ملاك: يووووووو
وجدان: اصلا انتي طول عمرك معترضه..باي ياحلوة
********************

الاحد في بيت ابو نواف

سارة وهي داخله على امها بالمطبخ: يما متى بترجعون لي جوالي؟؟؟
ام نواف: انسيـــــــــــــــه انتي مو كفو ثقة..
سارة:طيب مو كفو بس رجعوا جوالي...مابعد طاح اللي بروسكم؟؟
ام نواف بعصبية وصوت اعلى: اصلا عقب الدخان ماصرت استبعد عليك شي ..سودتي وجهي الله يسود وجهك

هنا يدخل فواز اللي سمع ارتفاع اصواتهم
فواز: شفيكم؟؟
سارة اللي تبي تستعطف اخوها:فوااااااز ابي جوالي
فواز: اهاااااااا كذا السالفه...شوفي ياسارة هذا موضوع منتهين منه..وانا مستعجب قوة عينك عشان تطلبين الجوال مرة ثانية..انتي تحبين يدك مقلوبة ان الموضوع ماوصل لابوي وللمعلومية احنا ماغبينا عنه عشانك لأ..احنا غبينا عشان ماينجلط علينا
سارة اللي حست انها شخص غيرمهم حتى عند اهلها: اف لهالدرجة انا حثالة؟
فواز: لا مو حثالة بس انتي انسانه سطحية كل شي تسيئين التصرف فيه .. كنت احس ابوي ونواف ظالمينك بس فعلا انتي طلعتي زي الاطفال اللي ماتأمنين على شي معهم..
سارة بعصبية: اصلا انا صرت كل شي متشفقة عليه من طلعت عالدنيا وكل شي عيب..كل شي ممنوع..صار حلمي في الحياة اصير زيي زي باقي البنات..صار اكبر اهتماماتي جوال..ليش البنات اذا طلعوا اتفه مشوار ينبسطون فيه وانا لا؟؟ ليش يتحمسون يسافرون وانا لا ؟!! _هنا غلبتها دموعها وشهقاتها كانت تقطع كلامها_ لان الطلعة معكم تطفففش والسفر معكم يطفففش...صرت اقنع نفسي ان البيت اونس ..بس حتى بالبيت نص القنوات مشفرة ..والنت ممنوع ..والجوال ممنوع.. حتى لبسي تتحكمون فيه..انتم اللي نيتكم فيني شينه عندكم سوء ظن..انتم السطحيين اللي خليتوني سطحية وتافهه صارت المدرسة هي المتنفس الوحيد لي...بس تدرون ماااااابي جوال اصلا طابت نفسي منه _وهي طالعة غرفتها_اف من عيشتكم تنقص العمر
فواز اللي فهم نتيجة تصرفات اخته: طيب تعالي حنا قاعدين نتناقش
ساره طنشت فواز وراحت غرفتها...

ام نواف: الله يهديها بس
فواز: يما الله يهديكم ترا صدق كل شي مانعينها منه .. وهي مو متقبله ومو منسجمه مع ممنوعاتكم
ام نواف: وش نسوي يافواز نخاف عليها والله...انت ماتسمع عن البنات الحين؟؟ البنات انهبلوا مايسوون حساب لاهلهم ولا للناس .. الله يستر على بناتنا وبنات المسلمين
فواز: لاتعممين يما..اللي براسها شر بيطلع سواء اهلها منعوها والا مامنعوها...._وهو ماشي_انا بروح احاكيها
ام نواف: الله يصلح حالها
*
*
بغرفة سارة

فواز:سارة
سارة: نعم
فواز:أدخل؟
سارة من غير نفس:........ادخل
فواز وهو يجلس:زعلانة؟
سارة: شدعوى ازعل شوي وارضى..على فكرة مو اول مرة ابكي..اذا فضيت وصرت ماادري وش اسوي جلست ابكي لحد ماانام
فواز: يوووو لهالدرجة انتي متشائمة؟؟
ساره اللي رجعت تبكي: تعبت يافواز مررة .. تعبت وانا اكابر عند الناس وعند نفسي... احس اني بموت ناقصة عمر
فواز: بسم الله عليك ...وش هالكلام ياسارة؟؟
ساره:............
فواز:بسألك بس ردي علي بصراحة
سارة باهتمام: اسأل
فواز: من وين جبتي السجاير؟
سارة اللي ماقدرت تحط عينها بعين اخوها:من وحدة من البنات بس لاتسألني من
فواز:مو لازم اعرفها ..بس بقولك تراها ماتحبك..لانك لو تهمينها وتحبك ماعرضتك للمشاكل ..انا مو قاعد اقولك اتركيها لانك كبيرة وعاقلة وواثق باختيارك لصديقاتك بس انتبهي منها...عموما بما اني باشتري لاب توب جديد باعطيك لاب توبي السابق
سارة بتفاؤل: والله؟
فواز: والله ليش مستغربة؟؟...وبسوي لك ايميل بعد
سارة : ياحبيلك بس علمني عليه
فواز: اكيد بعلمك اللي تبين ..بس شوفي اول واحد بتضيفينه بماسنجرك انا...وضيفي صاحباتك وبنات عمي وبنات خالاتي واللي يخطر ببالك..وفي منتديات تفيدك وتسليك سجلي فيها..يضيع وقتك كذا ...انتي من الفراغ صار ميولك عدواني الله يستر
سارة: هههههههههههههههه ياحبيلك يافواز...طيب معليش تدري اني ماانعطى وجه ابي جوالي
فواز: طيب ياسارة بعطيك جوالك بس اتمنى مااسمع أي تصرف يزعلني
سارة:وعد ماازعلك عشانك بس...تدري يوم دقوا المدرسة على اهلي ماتعاطفت مع اهلي كنت اقول بخاطري احسن زي ماحرموني من ابسط الاشياء باحرمهم من راحة البال
فواز: سارة باختصر عليك كلااام وبقولك شي حطيه ببالك... دايما ارتقي بتفكيرك وتعاملك عشان يحترمونك الناس وتحترمين نفسك ..يعنــــــي ترررفعي عن تصرفات كثيرة خليك دايما ارقى ...طيب؟؟
سارة اللي اقتنعت ان تصرفها صغييير:طيب
فواز: يلا امشي اعطيك جوالك ..واللاب توب
سارة بحماس : يلا يلا

البارت 29


ام بدر: مبروووك ياولدي .. تستاهل
عبدالله: وافقوا؟
ام بدر: اكيد وافقوا ..هم بيلقون احسن منك
عبدالله بينه وبين نفسه:معقولة يانجود اجي ببالك للحين او خلاص لهيتي...معقولة لو يتقدم لك احد الحين عندك استعداد ترتبطين فيه او انا ببالك للحين اعيقك...ااااااااااه نفسي اكلمك جد واسألك جد وأناقشك جد بس وش الفايدة اشفق نفسي عليك وبس واحنا مالنا امل ببعض ..يلا كل شي خيرة ..................
ام بدر:..عبدالله
عبدالله: سمي يما
ام بدر: اكلم نفسي انا؟!!
عبدالله: وش قلتي يما؟
ام بدر: قاعده اقولك كلم ابوها وحددوا الملكة
عبدالله: مو كأننا استعجلنا يما؟؟
ام بدر: من العام وانا ابي ازوجك وانت تقول استعجلنا .. وش يعيقك ماتتزوج؟ مشاء الله مو ناقصك شي
عبدالله:الله يكتب اللي فيه الخير
ام بدر: اااامين ويوفقك
*************************
الساعه 5ونص عصر الاثنين في بيت ابونواف
وبعد ماسكر فواز سماعة الثابت_بــ ربكة_:يما وين ابوي؟؟؟
ام نواف: بسم الله عليك فواز شفيك؟؟
فواز: مافيني شي بس وين ابوي؟
ام نواف: اول شي اجلس وعلمني من اللي داق؟
فواز:واحد نعرفه سوا حادث وبروح اشوفه انا وابوي
ام نواف: من هو؟؟؟
فواز: يما واحد ماتعرفينه..ابوي وينه؟
ام نواف: بغرفته اكيد
*
*
بعد ماطلع فواز عند ابوه
فواز:يبا بسرعة البس ثوبك وتعال معي
ابو نواف: وين؟
فواز:يــ بااا نواف اخوي سوا حادث وبنروح نشوفه ... وترى امي ماتدري
ابو نواف: عسى ماصار له شي؟؟شلونه؟؟
فواز: لالا ان شاء الله طيب
ابو نواف وهو قايم يلبس ثوبه:يااااااالله الطف بنا..لاحول ولا قوة الا بالله
فواز: يلا يبا يلا
****************************
ابو خالد و ابو عبد الكريم ( إمام المسجد) من بين سواليفهم وهم طالعين من المسجد بعد المغرب
ابو عبد الكريم يأشرعلى بيته القريب من المسجد: اقلط

ابو خالد:الله يسلمك بس انا بتقهوى في بيتي.. حياك
ابو عبد الكريم: والله يا ابو خالد انا عندي موضوع وبسألك فيه
ابو خالد: يارجال تعال البيت ونتفاهم
ابو عبد الكريم : مشينا
*
*
في المجلس
ابو خالد وهو يمد الفنجال : سم
ابو عبد الكريم: سم الله عدوك
ابو خالد: امر وش موضوعك؟
ابو عبد الكريم: مايامر عليك عدوو...انا ياابو خالد مذكور لي بنتكم ...وبعد السؤال عني ردولي اذا ماعندكم مانع
ابو خالد باستعجاب: اكيد قصدك هيا
ابو عبدالكريم: اي والله ..قلت انتظر لين تخلص عدتها
ابو خالد:والله هذي الساعه المباركة
ابو عبد الكريم: تسلم.. ومثل ماانت عارف ماعندي غير عبد الكريم وسعود وتوهم صغار تعتبر نفسها ام لهم..وبناتك على راي اهلي اجاويد ونسبكم ينشرى يابو خالد
ابو خالد: والله من ناحيتي انا ماعندي مانع بس تدري لازم اشوف راي البنت
ابو عبد الكريم: خير ان شاء الله..لاتطول علينا يابو خالد.._ وهو واقف_ استأذن انا الحين
ابو خالد: تو الناس
ابو عبد الكريم: عندي اشغال والله
ابو خالد: خير ان شاء الله... ما تشوف شر فمان الله
ابوعبد الكريم : فمان الكريم
*
*
بعد ما طلع ابو عبد الكريم من البيت راح ابو خالد لــ هيا بغرفتها
ابو خالد: السلام عليكم
هيا: وعليكم السلام..هلا ابوي
ابو خالد: شلون بنتي اليوم؟؟
هيا: الحمد الله بخير..كأن دخلتك غرفتي وراها سالفه
ابو خالد:اي والله ياهيا
هيا: سم يبا
ابو خالد: تو كان عندي ابو عبدالكريم جارنا امام المسجد عرفتيه؟
هيا: ايه
ابو خالد: ابو عبدالكريم:يقولي انه يبيك زوجة له وام لعياله
هيا اللي كان مبين على وجهها الاستنكار:...............
ابو خالد: وهو والله رجال اجودي وماعليه خلاف ويخاف ربه... وعياله انتي تعرفينهم صغار ويتامى فاقدين امهم ...واعتبريهم عيالك وهذا كلامه مب كلامي ..وانا من ناحيتي اشهد له باخلاقه والتزامه بدينه... وربي منعم عليه بعد ...
هيا:..والله مدري يبا..ماجا ببالي ابد اني اتزوج..
ابو خالد: وليش ماتتزوجين ..ترا وانا ابوك المطلقه حياتها ماتوقف .. بالعكس يمكن ماتبدا حياتها الا عقب طلاقها..
هيا: ادري يبا..ان شاء الله باستخير وارد لك
ابو خالد: زين .. بس لا تطولين على الرجال
هيا: ان شاء الله
بعد ما طلع ابوها انسدحت على السرير وبينها وبين نفسها: معقولة !! من فترة قصيرة طلعت من عدتي ..انخطب واتزوج مرة ثانية وانا عارفه زواجي مامنه عيال ...معقولة اكون بمكان الام لـ عبدالكريم وسعود؟!!... سبحان الله يمكن خيره اني كرهت نواف قبل مايطلقني عشان اقدر اعيش حياتي وافكر بغيره....
**************************
في المستشفى..

فواز اللي راح لابوه في الانتظار بعد ماسأل الدكتور عن نواف:يبا عظم الله اجرك في اماني وولدها
ابو نواف : لااااااااحول ولا قوة الا بالله انا لله وانا اليه راجعون..بلغوا اهلها؟؟
فواز: ايه المستشفى بلغوا اهلها عشان يجون يستلمون الجثه..
ابو نواف: الله يرحمها ويغفر لها ويقوم نواف بالسلامة ويعوضه بزوجة وولد
فواز:امين
ابونواف: نواف وينه ؟؟
فواز: في العناية المشددة يبا .. ادع له
ابو نواف: الله يقومه بالعافيه ويرفع عنه وجميع مرضى المسلمين
فواز:ادخل انت يبا شفه يقول الدكتور واحد بس يدخل
ابو نواف:يلا .. وين غرفته ياولدي؟؟
فواز: اخر غرفه بالممر على يمينك..بس يبا لاتقوله عن اماني
ابو نواف: خير ان شاء الله ...
*
*
في الوقت اللي كان فيه فواز ينتظر ابوه يطلع عشان يشوف نواف.. اتصل فواز على امه يقولها الخبر بتمهيد...
***********************

العشاء في بيت ابو فهد

ندى: اهلين جوجو كيفك؟
نجود: تمام انتي اخبارك
ندى: بخير الحمد الله
نجود:ووش اخبار احمد؟؟
ندى: يووو انتي قديمة..خلاص تركته
نجود:ليش؟!!!!!
ندى: اهاااااا .. هنا يجي الخبر اللي داقه عشانه
نجود بجماس: ايش؟
ندى: تركته لاني ببساطة سأتزوج عن قريب
نجود: جد!!! مبروووووك تستاهلين ياحلوة
ندى: الله يبارك فيك ..عقبالك
نجود: بس غريبه مو انتي تحبينه مرة؟
ندى: الا والله احبه .. بس ماافكر فيه كزوج
نجود: لا لو انتي تحبينه جد تتمنينه معاك طول عمرك
ندى: صح هو يجنن ووسيع صدر واخلاق بس ماحطيته ببالي..لانه اكبر مني بسنه بس يعني عمره تقريبا 20 ومستحيل يتزوج الحين ...ثاني شي وهو الاهم ان الدراسات اثبتت ان زواج العلاقه فاااشل هههههه
نجود:هههههههه على كيفك فاشل .. انتي اللي تفكيرك فاشل ...بس مافقدتيه؟!!
ندى: انا توقعتك بتسأليني عن زوج المستقبل مو احمد
نجود: ههههههههه تدرين فيني رومانسيه...ماعلينا انتي تملكتي او بس خطبه؟
ندى:لا هو شافني وشفته وسألنا عنه وكل شي واعطيناهم الموافقه بس مابعد تملكت
نجود:شرايك فيه عجبك؟
ندى: انا ماتحمست الا بعدماشفته.. يجنن احلى مني
نجود:هههههههههههههههه لا انتي بعد تجننين...طيب شسمه؟
ندى: عبدالله ماجد الـ***
نجود اللي تغيرت نبرة صوتها:..... اهااا
ندى: شفيك مشغولة؟
نجود: اي ..يما عاشه تناديني بروح اشوف وش تبي
ندى: طيب وسلمي عليها
نجود: ان شاء الله
ندى: ولاتقطعين ..ترى لازم تحظرين شبكتي
نجود: طيب طيب ..يلا اكلمك بعدين
ندى: اوكى باي
نجود اللي جمدت بمكانها بعد ماقفلت الخط ومو قادرة تستوعب ...وكانت بس تبي تحكي لوجدان عشان تفهمها وتخفف عنها
ام فهد وهي مارة من الصالة: شفيك متنحه؟
نجود: مافيني شي
ام فهد : الا فيك شوفي وجهك منقققلب ...من كنتي تكلمين؟
نجود: ندى...يما متى بترجع وجدان من السوق؟
ام فهد: مدري يمكن بعد شوي عشان طارق اليوم بيتعشى عندنا
نجود: يووووووو كل يوم طارق كل يوم طارق ..واليوم اللي مايجي فيه تروح السوق تتقضى
ام فهد: اكيد عروس ...ياحبي لها والله بافقدها
نجود طلعت لغرفتها وكانت بقمة نرفزتها ..وماقدرت تتجمل عند امها اكثر من كذا
*
*
طلعت غرفتها وانسدحت على سريرها ومعها جوالها تقلب فيه وبينها وبين نفسها:ادق على مين؟!! افضفض لمين؟؟ _وصارت دموعها تنزل لاارادي_ وجدان الحين مو فاضية لنفسها عشان تفضى لي .....اشكي لــ عبدالله اللي قطعت قلبي عشانه ..اللي اول ماتركني على طول فكر يتزوج وحده تكون كل شي بحياته.. لميـــــــــــن ؟؟ لوجدان اللي ماتفكر الا بطارق..او لندى صديقة عمري اللي اساسا بتكون كل شي بحياة عبدالله ........اااااه والله مو عارفة اشكي ندى لعبدالله او اشكي عبدالله لندى...حتى مو عارفة اتمنى لهم التوفيق مع بعض او لااا...._واستمر يوم نجود وهي تفكر وتحاول تستوعب ..رغم تشتت افكارها_
**************************
صباح الثلاثاء في بيت ابو خالد
ام خالد:ها ياهيا يقول ابوك وش نرد على الرجال؟
هيا: موافقه يما .. ماعندي مانع
ام خالد: لاتتسرعين يابنتي..الحرمة مب كل يوم لها رجال
هيا:يما انا استخرت ربي في هالزواج...ويمكن ربي كاتب لي الخيره فيه وفي عياله
ام خالد:الله يوفقك يابنتي ويسخر لك

البارت 30 والأخير


الظهر في بيت ابوفهد
ملاك بصوت عااالي : يماااا عااااشه
يما عاشه: نعـــــــم
ملاك:تعالي كلمي عمي ناصر يبيك عالتلفون
*
*
بعد ماسكرت يما عاشه السماعه من ولدها اللي كان متصل يقولها على حادث نواف..:ملاك روحي نادي امك وخواتك
*
*
بعد مااجتمعوا بالصاله..
ام فهد: خير ياخالتي ؟.. شفيه؟
يما عاشه:نواف ولد ناصر ولدي صار له حادث
ام فهد: عسى مو كايد؟؟
وجدان: طيب كان معه احد بالسيارة؟
يما عاشه: معه زوجته ...جاها نزيف داخلي وتوفت وتوفى اللي ببطنها..ونواف بالعناية الله يقومه بالعافيه
ام فهد شهقت : ومتى صار الحادث؟
يما عاشه: امس
ام فهد: الله يرحمها ويغفر لها ويقوم نواف بالسلامة ويعوضه خير..والله يصبر امه
_فترة صمت واستيعاب_
يما عاشه:انا اليوم العصر بروح المستشفى مع ام نواف اشوف نواف..وعقب بنروح نعزي اهل مرته ..بتجون معي؟
ام فهد:لا انا بروح انا والبنات نعزي بكرا او بعده
وجدان:لا يما بعد بكرا الخميس زواجي
يما عاشه:زواجك أجليه
وجدان: يما الله يهديك وش أأجله بكرا ان شاء الله نروح نعزي
يما عاشه:مب عشان العزا اجليه عشان بيت عمك مب حاضر ..ولدهم بين الحيا والموت وتبينهم يجون؟
وجدان: يعني مو ضروري يجون عاذرينهم
ام فهد: لا ياوجدان عيب عند عمك وزوجته مانعمل حسابهم
وجدان: انتم مو فاهميني..اهل طارق جوا من الكويت عشان الزواج ..ووزعت البطاقات على العالم من اسبوعين ..بعدين خلاص حجزت كل شي اروح الغيه عشان مرت ولد عمي توفت ؟!!
يما عاشه: انتي أجليه عشان ولد عمك طايح في المستشفى مب عشان مرته..
وجدان:..........
ام فهد: الله يقومه بالسلامه
يما عاشه: امييين...وانتي ياوجدان تراني علمتك اذا ماأجلتي زواجك لاتحترين فيه لا عمك ولا اهله وانتي حره
وجدان: والله عاد زواجي الخميس اللي بيحضر الله يحييه واللي مو جاي بسلامته عذره معه..بعد مو منطق اكنسل كل شي عشان مرت ولد عمي ...يعني الله يرحمها ويغفر لها وان شاء الله بكرا اروح مع امي اعزي اهلها وبروح بعد تقدير لمرت عمي..ونواف الله يشفيه ويقومه بالسلامه...
ام فهد:خلني بس ادق على ام نواف اتحمدلها على سلامة ولدها وادعي له...ملاااااك جيبي جوالي تلقينه بالشاحن
ملااك بينها وبين نفسها وهي رايحة:يوو ماعندهم الا ملاك سيلانيتهم مو بنتهم
يما عاشه: ياحيل الله ماعلموا نواف عن مرته ..الحين كلن يعزي وزوجها مادرى عنها
ام فهد:الله لايفجعنا ياخالتي ..الموت حار
*
*
طلعت وجدان غرفة نجود على طول
وجدان: نجود عندي خبر شين
نجود: حتى انا عندي سالفة شينه..شعندك هاتي
_وجدان حكت اللي صار بالتفصيل لنجود_
نجود: ياقلبي تلاقين الحين بيت عمي مأساة
وجدان:اي ياعمري والله انا ضايق صدري على مرت عمي وسارة وعمي وفواز حاسه فيهم والله بس بعد بنفس الوقت صعبة اكنسل وانا خلاص حجزت كل شي واهل طارق جوا امس الرياض ..فاهمه علي؟
نجود: والله احمدي ربك ياوجدان عالاقل طارق بالاخير لك ..شوفيني حبيت عبدالله من قلبي واضطريت اتركه
وجدان:يووو انتي للحين تفكرين فيه؟! الرجال عاش حياته وانتي للحين عايشه دور المتيمة ؟؟
نجود: والله انا خلاص استوعبت انه مو لي .. اصلا انا عارفه انه عاش حياته شوفيه خطب وملكته بعد كم يوم وزواجه نهاية الاجازة
وجدان:وانتي شدراك؟؟ لايكون كلمتيه؟
نجود:لاااا طلعت اعرف اللي خاطبها
وجدان: مين؟؟؟
نجود:ندى صديقتي ماغيرها
وجدان: من جدك؟!! لحظه بس خليني استوعب ..
نجود: اذا انتي مااستوعبتي انا وش اقول؟؟ اصلا خلاص انا ماصرت استبعد شي على اقرب المقربين مني
وجدان: يووو واحنا مانخلص ...خلاص يانجود صرتي سلبيه ونظرتك للناس تغيرت من عرفتي عبدالله هذا .. وهو مشاء الله بيتزوج وعايش حياته..خلاص ياقلبي الحين مافيه احد يقطع قلبه عشان احد
نجود: بس شلون احضر زواجها لو ماحضرت بتزعل وان حضرت والله بيضيق صدري غصب
وجدان: خلاص لاتحضرينه قولي مسافره قولي أي شي...المهم وش تبين نطلب غدا؟
نجود: ليش ماسويتوا؟
وجدان: لا ابوي وامي عاشه الحين بيروحون بيت عمي ..وامي ماتقول ماابي ..هاه شتبين نطلب؟
نجود: مدري كيفكم أي شي ...استغفر الله الاجواء كئيبه ماتشجع احد ياكل..مشاء الله عليك ياوجدان صدق ان قلبك ميت ..زواجك بعد بكرا وتونا متلقين خبر مؤلم وتفكرين وش تاكلين؟
وجدان: والله ياقلبي حزني وهمي ماراح يغير في الموضوع شي
****************
بعد العشاء وبعد مارجعت يما عاشه بيت ابو فهد
ام فهد:هلا خالتي ها وشلون اللي جيتي منهم؟
يما عاشه:نواف راح في غيبوبة ماصار يدري باللي حوله..الله يعظم اجر اميمته طول يومها تدعي له..واهل مرته والله منفجعين على بنتهم الله يصبرهم
ام فهد: اميين ويقوم نواف بالسلامة
يما عاشه: ها ياوجدان ماراح تأجلين عرسك؟
وجدان: لا يما كلمت طارق وقال مايستدعي
يما عاشه :والله عاد مااقول الا الله يوفقك ويسعدك ويتمم زواجك على خير
وجدان قامت تبوس راس جدتها: امين يما ادعي لي .. والله كل ماقرب كل ماارتبكت زيادة
ام فهد: طبيعي ترتبكين كل البنات كذا_وتناظر نجود_عقبال نجود ان شاء الله
نجود:لا يما الله يهديك وش عقبالي .. ماابي اتزوج الحين
يما عاشه:الله يصلحكن ويستر عليكن
*************************
صباح الاربعاء في بيت ابو نواف

ام نواف:ساره نادي فواز يجي يفطر قبل مانروح نشوف نواف
سارة وهي قايمة: طيب
ام نواف:ابو نواف امس وانا قاعدة مع خالتي وش قالك الدكتور؟
ابو نواف: هالدكتور ماعنده سالفه ..اقوله بنقل نواف لمستشفى الــ*** ويقول مو من مصلحته تنقلونه فيه خطر عليه
ام نواف: لا الله يهديك هو ابخص اخاف اذا نقلناه وجاه شي نتحسف طول عمرنا.. اللي كاتبه ربك بيصير_وهي تناظر فواز اللي توه داخل لهم_تعال فواز افطر يلا قبل مانمشي للمستشفى
فواز اتجه لامه وباس راسها:عظم الله اجرك يما في نواف
ساره:مــــــــااات؟!!!
فواز :احسن الله عزاك يبا
ام نواف اللي كانت تحاول تستوعب الصدمة اللي شلت لسانها بهالوقت
ساره:طيب متى احنا امس عنده
فواز اللي غلبته دموعه قبل مايحكي:.....امس الفجر الساعه2 اتصلوا علي بلغوني
ابو نواف اللي كان يمسح دموعه بشماغه:انا لله وانا اليه راجعوون
ساره وهي تحاول تستوعب: يعني خلاص نقول عن نواف الله يرحمه؟!
ام نواف هنا نزلت دموعها بحراره من غير تعليـــق
********************
بنفس الوقت في بيت ابو فهد

ابوفهد وهو نازل للصالة: اوووه فهد؟!!!
فهد:هلااااا يبا _ويبوس راس ويد ابوه_
ابو فهد:عاش من شافك
فهد:عاشت ايامك
وجدان:كويس اني بتزوج عشان يجي
نجود:اختشي يابت
فهد:اكيد اذا ماجيت عشان زواج وجدان اجي عشان مين؟؟
وجدان: ايه عاد ماعندكم الا وجدان وحده
ام فهد:تعال عشان امك اللي كل ماكلمتك تلزم عليك بالرجعه
ابو فهد: الله يهديك ياام فهد وهو رايح يلعب؟؟ رايح شغل
ام فهد:يجي عالاقل يومين يسلم ويرجع...المهم الحمدالله على سلامتك
فهد:الله يسلمك يما..._وهويناظر ابوه_الا يبا سلامات امي عاشه تو تقولي نواف ولد عمي صاير له حادث
ابوفهد: ايه والله الله يقومه بالعافيه ..اليوم العصر بمرهم بالمستشفى تعال معي سلم على عمك
فهد:ان شاءالله..._وهو يطالع وجدان_شخبار طارق؟
وجدان:الحمدالله
فهد:الله يوفقكم ويتمم عليكم على خير
وجدان: امين ..بس لاتذكرني كل شوي ترا تطقني النفاضه..مو مستوعبة ان زواجي بكرا
فهد: لالاتخافين ولا شي ...وانتي يانجود ماقلتيلي كم نسبتك؟
نجود:94%
فهد:مشاءالله الله يوفقك..طيب وين سجلتي؟
ابو فهد وهو يناظر جواله اللي بيده: افا.. الله يرحمه ويغفرله
الكل: مين؟؟؟
ابوفهد: انا لله وانا اليه راجعون..هذا فواز مرسل لي نواف يطلبك الحل
الكل: مااات؟
ابوفهد:الله يرحمه.. خلني اكلم ناصر اخوي اعزيه واشوف متى بيصلون عليه

_ابوفهد:السلام عليكم
_ابونواف:وعليكم السلام
_ابوفهد:عظم الله اجرك
_ابونواف وبصوت مبحوح:الله يجزاك خير..راح ياخوي في يومين من هالحادث رااح
_ابوفهد:اذكر الله ..يومه.. وكل شي مكتوب..
_ابونواف:الله يرحمه
_ابوفهد:الا ياخوي متى بنصلي عليه ؟
_ابونواف:بعد العصر ان الله اعطانا عمر
_ابوفهد:على خير ..ان شاء الله الظهر حنا عندك انا والوالدة والاهل
_ابونواف:الله يجزاك خير ..فمان الله

بعد ماقفل ابو فهد:انا لله وانا اليه راجعون .. الله يصبرهم على مصيبتهم
الكل: الله يرحمه
ابو فهد:وجدان ترى العرس بكرا ملغي ..كنسلي كل شي..وكلمي طارق وبلغيه الحين
وجدان:ان شاء الله
*
*
طلعت وجدان لغرفتها واتصلت على طارق
_وجدان:هلا طارق
_طارق:هلا وغلا..وحشتيني
_وجدان:طارق اعتذر منك زواجنا لازم يتأجل
_طارق بذهول:ليـــــش؟ عسى ماشر
_وجدان: نواف ولد عمي توفى
_طارق:اهاااا عظم الله اجرك
_وجدان:اجرنا واجرك
_طارق:ضروري ياوجدان يتأجل؟ يعني ليش مانخليه عائلي
_وجدان: لاياطارق انا حاطه ببالي زواج كبير وزفة ..انا مابي اكنسل كل شي بس مجرد تأجيل
_طارق: يلا سبحان الله ربي ماكتب يكون زواجنا بكرا
_وجدان:لاتزعل نفسك قلبي كل شي خيره..والله الواحد مايدري يصحى على ايش.. اليوم مثلا كنت ناويه اروح مع امي نعزي اهل زوجة نواف ..بس تحول العزاء لبيت عمي ..فهد اخوي مثلا رجع عشان يحضر زواجي صارت رجعته عشان يعزي..والله ياطارق هذي اشياء مفروضه علينا احنا مانتحكم فيها
_طارق:ادري والله..عموما اذا خالي عندك عطيني اياه اعزيه..
_وجدان:طيب
***********************
المغرب في بيت ابو نواف

يما عاشه اللي كانت تواسي ام نواف:خلاص يابنتي ترا الصياح مايرجع غالي .. ادعيله الله يثبته عند السؤال
ام نواف اللي كانت تبكي بحسرة: يااارب ...ادعي له ياخاله
يما عاشه: والله من قالولي وانا ادعي له .. الله يرحم موتانا وموتى المسلمين
ام نواف:امييين
ام نواف..التفتت لنجود اللي كانت على يمينها: نجود هذا جوالي عالطاولة اكتبي رسالة لــ هيا بلغيها عن وفاة نواف ..
نجود بينها وبين نفسها:هيا!!! : ان شاء الله خالتي
*********************
الخميس ثاني ايام العزاء في بيت ابو نواف

ام طارق وهي تسلم على ام نواف:احسن الله عزاكم
ام نواف:الله يجزاك خير
جيان+بيان:عظم الله اجرك خاله
ام نواف:اجرنا واجركم
_بهالوقت ساره جلست عند نجود_:نجود روحي عند بيان وقوليلها تحللني
نجود:شدعوى سارة قوليلها انتي طيب
ساره اللي كانت دموعها تنساب من نفسها:والله يانجود فيني ضيقه حسيت الدنيا تااااااافهه .. ممكن نروح منها بين يوم وليله ...ماتسوى علي اروح منها وفي قلبي شي على احد او احد في قلبه شي علي..قوليلها تكفين انا مستحيه منها وبصراحة ماتوقعتها تجي تعزي .. خلاص يانجود الله يخليك
نجود:طيب خلاص ليش حاسه ان بيان في قلبها شي عليك والله بيان قلبها ابيض ماعليك من لسانها ..اصلا لو في قلبها شي ماجت تعزي
ساره وعيونها عالباب : هيا يانجود هيا مرت نواف الله يرحمه
هيا اللي اول مادخلت كسر قلبها حال ام نواف وتذكرت يوم كانت تزور هالبيت مع نواف اللي فقدته قبلهم بطيب خاطر منها ومنه...
*
وعدت ايام العزاء..وعدت الاجازة اللي بنهايتها كان زواج وجدان على طارق

وبعد كان بنهايتها زواج عبدالله وندى ..اللي ماحضرته نجود بزعم انها كانت مسافرة...عبدالله اعجب بشخصية ندى القوية المتفائله ..وحبها من محبتها له..طبعا عرف من تكون نجود صديقة زوجته بعد ماقالتله ندى بزورها وسأل من تكون .. عبدالله ندم على علاقته بنجود بعد ماحس انه كسر قلبها...
نجود.. كانت تتحاشى ندى.. اضطرت تخسر صداقتها ..كانت تحاول تقطع علاقتها فيها بالتدريج بزعم انها انشغلت في الجامعة وفي قسمها..نجود ماصارت تشوف ندى على انها صديقة صارت تحسدها على عبدالله اللي مازالت تحبه ...

هيا.. نست كل ايامها مع نواف من بعد انتهاء العزاء..وبالتحديد من بعد زواجها بابوعبدالكريم اللي كان مقدرها كزوجة ومحسسها بأهميتها بالنسبه له ولاولاده...

جيان.. خطبتها ام نواف لـــ فواز لكن جيان رفضت لانها وافقت على ولد عمتها اللي راحت معاه للكويت ...

بيان..لازالت على قناعاتها ..وتمسكت فيها زيادة بعد دخولها الجامعه...