رواية عشقي ال بدي مكتفي فيك عاشقك للفنى

24 - 11 - 2021, 12:25 PM

البارت 173

بهالوقت
ناصر واقف قدام باب القاعه ينتظر امه وياخذها معه
وركبت وشغل السياره
ناصر:حي الله ام ناصر
ام ناصر:ناصر
لف لها باابتسامه
ام ناصر:والله ياانا غرررت اليوم
ناصر رفع حواجبه:ههههههههه اكيد في بنات ازين منك صح
ام ناصر: لاتتسيمج
ناصر:هههههه طيب ، ليش غرتي من من
ام ناصر:متى اشوفك بمكان عبدالملك
ناصر:اوووه لهدرجه زواجه حلو
ام ناصر:ناصر اتكلم جد ليش ماتحدد زواجك
حرك ناصر سيارته:قريب
ام ناصر بفرحه؛يعني جد تحدده بالضبط
ابتسم ناصر:اي
ام ناصر باابتسامه:وتتواصل مع جمانه
ناصر:وبتواصل مع جمانه
فرحت ام ناصر وسكتت وناصر ابتسم لها وحب يريحها بكلامه والا مايحس بااي احساس تجاه جمانه
،
بسياره عبدالملك وصلو للفله وعبدالملك دخل بالسياره لداخل
وجلس يناظر للفله
عبدالملك:تمنيت تكون مفاجئه لك بهاليوم
ملك جلست تناظر له وجمعت جوائتها ومدت يدها ومسكت يده وعبدالملك لف لها مستغرب وابتسم وناظر ليديهم ولعيونها
ملك:تفاجئت فيها وحيل شكرت ربي ع نعمه وجودك معي و *همست* لي
ابتسم عبدالملك وضغط ع يدها
ملك بتضيع السالفه:يلا بردت بالسياره
عبدالملك:طيب يلا
ونزل ولف لها وفتح الباب وساعدها تنزل واشر للبواب والسواق علي اللي واقفين يطلعو وطلعو ونزلت ومسك يدها ومشو للفله
ووقفت ملك عند الباب شوي وعقدت حواجبها ولفت لعبدالملك
ملك:امي؟
عبدالملك:وش فيها
ملك:امي وين بتروح
عبدالملك:ملك عطي عمي عبدالله فرصه يصلح غلطه اليوم
ملك تنرفزت:عبدالملك قول لعلي يجيبها
عبدالملك يسايرها:طيب طيب ادخلي وبقوله
ملك ارتاااحت ودخلت وعبدالملك اتصل بمحمد ورد ع طول
محمد:سم طال عمرك
عبدالملك:محمد خالتي باامانتك زين
محمد:ابشر
وسكر ودخل للفله

24 - 11 - 2021, 12:25 PM

البارت 174

دخل عبدالملك للفله وماشافها بالصاله وطلع لفوق
وفتح باب الغرفه الكبيرهيمنع
كانت واقفه ومبتسمه
قرب عبدالملك مبتسم ومستغرب منها
ملك:حياك بغرفتك
عبدالملك:مو مفروض انا احييك بغرفتك
ملك:انقلبت الايه
عبدالملك:اعجبتك؟
ملك بهدوء؛حييييييل
عبدالملك براحه:زين
ملك ابتسمت له وهو قرب اكثر
عبدالملك:صرتي حلالي توقعت هاليوم حيل بعيد
ملك:مممم ماادري بس احس يالله وصلته انا ،، انتظرته حيل
انصدم عبدالملك وبنفس الوقت فرح حيل
ملك:ماقد قلتها لاحد ولاتوقعت بااقولها
عقد عبدالملك حواجبه
ملك همست؛ماقد حسيت براحه مع احد كثرك
عبدالملك:ولا راح تحسين بعد
ابتسمت ملك ومد عبدالملك يده ومسك يدها
ورجفت ملك وحس فيها وباس يدها وابتسمت له وناظر لعيونها وابتسم وقرب لها وباس راسها
عبدالملك:يخليك لي
ارتاحت ملك وسكرت عيونها وضمها
،
للقاعه خلود كانت محتاره وين تروح وجوالها مو معها حست انها ضايعه ونوال وبناتها بيطلعون اخر شي من القاعه قربت دلال لها
دلال:وين بتروحين خاله
خلود؛مممم بروح لبيتي
دلال:اي بيت
خلود ابتسمت؛بيتي قبل اجيكم
دلال:تعالي معنا تكفين مع ابوي احنا
خلود تغطت:لا ي قلبي ، يلا انتبهي لنفسك
وطلعت وشافت عبدالله واقف يتكلم مع محمد ومن شافها عرفها ولف محمد
محمد؛ي ام ملك لو سمحتي اركبي
خلود:لا مشكور ي محمد انا برو...
محمد غمز لها وقرب لها وهمس:اوامر عبدالملك
خلود حست براحه من سمعت اسمه:طيب
ومشت وجت بتركب
عبدالله:خلود
ماردت وركبت جاها بسرعه وفتح الباب ولفت له
عبدالله:خلود بنتكلم
خلود مسكت الباب :مابينا كلام
وسكرته ومشى محمد وعبدالله ضرب رجله بالارض بقهر
وطلعت نوال قبل تشوفهم وركبت وبناتها معها وعبدالله ركب بضيق ومشى

24 - 11 - 2021, 12:26 PM

البارت 175

وصلت خلود شقه عبدالملك القديمه
وقبل تنزل لفت لمحمد:مشكور
محمد:العفو ماسويت شي وتراني مو رايح باقي قدام البيت طوال الليل
خلود:مايحتاج يـ..
محمد:يحتاج يحتاج انتي امانه عندي ، اي شي تبينه انا موجود
ابتسمت خلود:براحتك ومشكور مره ثانيه
محمد ابتسم لها من المرايه ونزلت ودخلت الشقه لان المفاتيح معها،
ونزلت عباتها ورمت نفسها ع السرير وتنهدت ، اووووول مره بحياتها تنام ببيت وملك ببيت حست بشي غريب دام ملك مو معها وش بتسوي ووين بتروح وبتجلس عله ع عبدالملك او تسكن عندهم بالفله وتضايقهم
اخذت نفس وهي تفكر وين تروح (بيتها الصغير)؟ بس بيكون يخوف بدون ملك تعودت عليها معها سكرت عيونها وهي تفكر وناامت بدون ماتحس بفستانها ومكياجها وذهبها
،
يوم جديد
بفله ملك وعبدالملك
الساعه ظ،ظ، الصبح
فتحت ملك عيونها و سكرتها ورجعت فتحت عيونها وحطت يدها تحت راسها وقامت شافته مبتسم
عبدالملك:اخيراً قمتي عشان اقوم
ملك استوعبت انها نايمه وماسكه يده وبعدتها بسرعه
عبدالملك:هههههههههههههههه
استحت وقامت بسسرعه
وعبدالملك قام وفيه الضحكه ع شكلها وصرخ
عبدالملك:صبااااح الخير طيب
ماردت وعبدالملك ضحك
عبدالملك:طيب قولي مطوله ولا لا
ملك:رررووووح اطلع طيب
عبدالملك جلس:غرفه ابوك هذي
ملك:عبدالملك اطلع وشوي وادخل
عبدالملك ابتسم:ليه طيب
ملك:كذا
عبدالملك؛هههههههههههه
طيب خلاص خذي انا بطلع
ملك:طيب
عبدالملك طلع فتحت ملك الباب وجلست تناظر للغرفه مو فيه وطلعت بسرعه
وطق الباب
عبدالملك:بدخل
ملك اخذت نفس:ادخل
دخل وملك اعطته ظهرها وجلست قدام التسريحه
وابتسم:طيب الحين صباح الخير
ابتسمت له من المرايه:صباح النور
قرب لها ووقف وراها ونزلت راسها وعبدالملك باس راسها وناظر لها بالمرايه
عبدالملك:انتي كذا من الله؟ كل يوم تحلين زياده
ملك استحت؛الماء ساخن ادخل
عبدالملك:ههههههه طيب
وتركها وراح دخل وملك استحت وتفشلت من كلامها معه وقامت تلبس تبي تنسى
ولبست فستان سكري ناعم ورفعت وتركت شعرها مفرود وفيرت اخره كان جميل ع شعرها
وجلست تحط مكياج خفيف خلصت وجلست تناظر نفسها جميله ابتسمت وقامت ع طلعة عبدالملك من شافها صنم شوي وجلس يناظرها وابتسمت له
عبدالملك:ملك
ملك:هلا
عبدالملك ابتسم:بتذبحيني والله
ملك ضحكت بحياء:طيب
واستحت من نظراته ومشت للباب

24 - 11 - 2021, 12:27 PM

البارت 176

عبدالملك:وين وين
ملك:البس يلا وانا انتظرك
عبدالملك:بلبس وياويلك ان نزلتي بدوني
ملك كاتمه ضحكتها:طيب
ورفع لها حاجب ودخل يلبس ثوبه وشماغه وطلع ولا شافها وابتسم لعنادها واتجه للمرايه اخذ عطره تعطر وطلع من الغرفه ونزل مع الدرج
شافها قدام الخدامه تتكلم معها
ملك:وين امي للحين ماقامت؟
عبدالملك ضغط ع سنونه:ملك
لفت له
عبدالملك باابتسامه:خالتي امس راحت مع محمد لشقتي
ملك انصدمت؛متى وليش ماقلتو لي
عبدالملك:امس اكيد ماراح تجي معنا بنفس الفله امس وراحت للشقه
ملك تنهدت:طيب بكلمها
ومسك عبدالملك يدها:ووين ي بنت تلاقينها نايمه
ملك؛امي ماتنام هالوقت
عبدالملك ضغط شفايفه:طيب براحتك
تركته وراحت لتلفون تكلمها وعبدالملك اشر للخدامه تحط لهم اكل
،
بهالوقت بسياره ناصر
اخذ نفس ونزل وهو يناظر للبيت بيت عمه ابوراشد واليوم موعد النظره الشرعيه متفقين
وتقدم وطق الباب وفتح له ابوراشد وابتسم
ابو راشد:هلا والله وغلا
ناصر:هلابك
وسلم عليه ابوراشد:نورتنا
ناصر:نورك ي الغالي
ابوراشد:ادخل ادخل
ودخله معه للمجلس
ابوراشد:بجيب القهوه واجيك
ناصر:مايحتاج
ابو راشد:يحتاج يلا جايك
وطلع وناصر اخذ نفس يجهز كلامه
اما ابوراشد دخل لداخل شاف جمانه وامها جالسين
ابوراشد:جهزو القهوه بسرعه
ام راشد:سم
وقامت
جمانه:الحين هاللي جاي شايفه الساعه كم؟
ابو راشد ابتسم؛اذا تزوجتو اسأليه
جمانه انصدمت وبنفس الوقت استحت
ابوراشد؛ههههههههههه هاه انقديه بعد
ابتسمتيمنع
ابوراشد:المهم اذا جاي لزواج ترا بنوافق ع الوقت اللي يقوله
جمانه:طيب بس لايخليه قريب
ابوراشد:ان شاءالله
شوي وطلعت ام راشد:خلاص شوي وتجهز القهوه واناديك
هز راسه بااي وطلع

24 - 11 - 2021, 12:27 PM

البارت 177

ودخل ع ناصر بالمجلس
ابوراشد:زارتنا البركه
ابتسم له ناصر
ابوراشد؛اي تقولي شلون امك واختك
ناصر:بخير وان شاءالله بيجونكم قريب
ابوراشد:حياهم الله
ناصر؛ايه ي عمي جايكم بحدد الزواج
ابوراشد:ابد حدد اللي يعجبك
ناصر:شاور البنت وشوف متى تبي
ابوراشد:البنت تقول براحتكم بس مو قريب حيل
ناصر:نقول شهر ونص؟
ابوراشد؛اي زين
ناصر:زين الله يوفق
ابوراشد؛امين
ناصر:اجل بعد شهر ونص والتجيهزات علي والمهر بياصلكم اليوم العصر
ابوراشد:ماتقصر
قام ناصر وباس راسه:تسلم والله
بالهوقت ام راشد قدام جمانه
ام راشد:يلااااا
جمانه:ماابي ماابي اطلع له
ام راشد:جمممممانه يلاااا القهوه بردت وديها
جمانه:يمه استحي
ام راشد:قلت قومي
جمانه بتوتر اخذت جلال ولفت نفسها فيه ووجها طال بس
جمانه:واذا طاحت الصينيه مني
ام راشد:اضبطي نفسك ولاتتوترين سلمي ونزلي القهوه واطلعي
جمانه اخذت نفس واخذت الصينيه برجفه
ومشت وامها وراها لباب مجلس الرجال ولفت لامها وهمست
جمانه:لازم
ام راشد:ادخلي لااذبحك
جمانه عفست وجهها واخذت نفس ودخلت
وتورطت ماتدري كيف تطق الباب هي داخله يشفونها
جمانه بتورط طقت الباب بالصينيه وناصر ابتسم لها
وتوترت اكثر
ابوراشد؛هههههه تعالي
جمانه بلعت ريقها:السلام عليكم
ناصر:وعليكم السلام
ماناظرت له ونزلت الصينيه وصوت الفناجين ضربت ببعض
جمانه:ااا اسفه
وجت بتطلع
ابوراشد:هذي جمانه
ناصر؛ههههههه ماتغيرت ابد
هنا جمانه تفشلت وطلعت
ناصر؛الله يحفظها لك
ابوراشد:تسلم والله
وقام يقهويه
.
وجمانه من دخلت رمت الجلال وتهز رجلها بتوتر
ام واشد:ووش فيكي
جمانه؛تفشلت
ام راشد:ليش وش قال
جمانه؛انا غبيه ولا فيه وحده عاقله تطق الباب بصينيه وهي داخله لرجال ولا فيه وحده ترمي الصينيه رمي ،، ولا تعالي يمه هو عنده صوري يوم انا صغيره
ام راشد:اوووه كل صورك عندهم
ومسكت راسها جمانه:وافشلتي مع كشتي حاطته عندهم من زيني يوم تنزلين صورتي عندهم
ام راشد؛هههههههههههه
وجمانه متفشله

24 - 11 - 2021, 12:28 PM

البارت 178

ببيت عبدالله
كانو بالصاله
تالا بقهر:مفروض نروح لهم نسلم عليهم
دلال:اي والله بنروح لعبدالملك وملك بنشوفهم
ماحد رد عليهم
تالا:يممممه لو اعرف وين هم ماجلست
دلال:يبه يمه تكلمو ترا عبدالملك المتزوج خلونا نزوره
نوال ناظرت لهم بعصبيه؛عبدالملك تزوج مو برضاي وهالشي بخليه يندم عليه لاعرفه حقيقه اللي خذاها
عبدالله تضايق وقام
دلال:يبببه تكفى خذنا معك لهم
عبدالله وهو يمشي:مااعرف مكانهم
وطلع
جنى لفت لهم بحقد:اي انتي وياها ي بزرااان اعقلو وخلونا نزعل عليه ونعلمه ان ملك مو كفو
تالا:ع تبن الا ملك
جنى عصبت:قسم ان تكلمتي ضربتك
دلال:جنى هي انتي اعقلي واعرفي من تتكلمين عنه ترا ملك اختك ي خبله
جنى؛تخسى تكون اختي الرسخه اللي تكلم رجال
دلال قامت ورفعت حاجب:ليش ع بالك مااعرف من دبر هالسالفه
انصدمت جنى ونوال اكثر
دلال:ادري انها انتي اللي سويتي كل هذا عشان لمياء وادري ان لمياء تحب عبدالملك لاني كل يوم اسمعك تكلمينها عنه وادري ان امي ساعدتك بس ماراح اسكت
صرخت نوال:دلااااااااااال
سكتت دلال وخافت
نوال:كلمه وحده تطلع قسم بالله لاانتي بنتي ولا اعرفك سامعه
دلال بقهر:انتم ظلمتوها
جنى:عمى احنا ماظلمنا احنا بينا
دلال انقهرت ومشت وخلتهم
جنى لفت لامها:وش نسوي
نوال؛انتي حسابك عندي تدرين ان لمياء تحبه وماتقولين لي ليش
جنى بتوتر؛خفت يصير شي منك ، المهم وش تسوي
نوال:مانسوي شي خلك هاديه
جنى سكتت وصدت وتالا اخذت ايبادها وطلعت لدرج بدون ماحد يحس عليها
،
بشقه خلود كانت قايمه من الصبح وطفشانه وبعد مكالمه ملك ارتاحت وماتدري وش تسوي فكرت تروح لعبدالملك وملك بس خافت تزعجهم وقررت تجلس بالشقه احسن وتشغل نفسها بااي شي،
،
بفله عبدالملك بعد ماخلصو اكل لف عبدالملك لها
عبدالملك:تقولين وين تبينا نسافر
ملك جلست تناظر له شوي
ملك؛نسافر؟
عبدالملك؛اي اكيد
ملك؛لا
عقد عبدالملك حواجبه:ليش
ملك:وامي؟
عبدالملك اخذ نفس وقرب لها وحط يده وراها
عبدالملك:حبيبتي امك عندها عمي واذا ماتبي عندها الفله لها تجلس وقت ماتبي
ملك؛لالا ماابي اتركها
عبدالملك مسح ع شعرها:براحتك طيب يلا نروح لامك
ملك بفرحه:يلاا
وقامت بسرعه تلبس اما عبدالملك ناظر لها لين اختفت وتنهد يفكر

24 - 11 - 2021, 12:29 PM

البارت 179

الساعه ظ¢pm
جالسه بملل حست انها خلاص صارت وحيده وبينسونها الناس كلهم وبترجع مثل ماكانت مالها احد تنهدت وسمعت صوت الفرن الكهربائي وقامت له تشوف طبختها اللي تشغل نفسها فيها
وفتحت الفرن وجت بتطلع الطبخه رن الجرس
واستغربت وطلعت الصينيه وراحت بسرعه للباب
خلود:مين؟
عبدالله:انا
وانصدمت:خير وش تبي
عبدالله:خلود بسرعه افتحي بقولك شي بسرعه
توترت وفتحت خلود وصدت عنه ودخلت فرح انها ماتغطت ودخل وسكر الباب وتكتفت
خلود:نعم؟
عبدالله:مافيه تفضل
خلود:اخلص تكلم وش عندك
عبدالله؛زعلانه
خلود جلست تناظر له شوي وبعدها
خلود؛ههههههههههه لا ابد اللي انت سويته شي يفرح وليش ازعل
عبدالله تنهد:ي بنت الناس وربي ندمت من اللي شفته وتخيلي للحين ماعرفت اذا صدق ولا لا
خلود انصدمت اكثر:احلف ي ولد خالد ترا ملك حافظتها مثل اسمي فااااهم مااسمح لك ولا لعشره من امثالك يشك فيها بعد حتى لو كنت ابوها فاااهم
عبدالله يناظر لها شوي وجلس
عبدالله:لاتلوميني انا بنتي وماعرفتها الا تو ولازم انتبه لها
خلود؛وممن جابرك تنتبه لها ،، لا ي عبدالله البنت بنتي انا وانا انتبه لها ماحد جابرك ع شي
عبدالله بضيق:طيب اسمعي
خلود تكتفت وصدت
عبدالله:عبدالملك كلمني قبل شوي
خلود لفت له بسرعه:ملك فيها شي
عبدالله:لا استعيذي بالله، بس يقول ملك مافي ع لسانها الا انتي ويبي يسافر معها بس ملك رافضه عشانك
خلود بصدمه:عشاني؟
عبدالله هز راسه بااي
خلود؛ليش
عبدالله؛تقول ماتدري وين تجلسين
خلود: ي قلبي هي
عبدالله:عشان كذا انا بعتذر لك وارجعي معي عشان ترتاح وتسافر مع عبدالملك وتراهم بالطريق
خلود؛ارجع معك؟؟
عبدالله ميل راسه؛لازم عشان ترتاح
خلود جلست تفكر شوي وتناظر له وتصد واخذت نفس
خلود؛طيب عشان ملك بس اسمع
عبدالله عقد حواجبه
خلود؛ايامي اتنازل فيهم لنوال لاابيك تدخل علي ولا اشوفك
عبدالله انصدم
خلود؛ هذا شرطي ولا ماراح اطلع من هالشقه
عبدالله جلس يناظر لها منصدم
خلود لفت؛بلبس قبل يجون وانت فكر
ومشت لغرفتها وسكرت الباب وقفلته
وعبدالله تضايق منها حيل ولام نفسه اول
،
بالسياره
عبدالملك؛ملوك
ملك:هلا ملوك
عبدالملك لف لها وضحك
ملك:هههههه وش فيك ادلعك وتدلعني
عبدالملك؛طيب انتي ملوكتي وانا ملوكك
ملك:ايوه هههههههههه
عبدالملك؛المهم بعد خالتي خلود لازم نروح لامي واسلم عليها
ملك ابتسمت؛اكيد
ارتاح عبدالملك من ردها ومسك يدها باليمين ويسوق باليسار وملك ابتسمت له

24 - 11 - 2021, 12:29 PM

البارت 180

وصلو الشقه اللي فيها خلود كانت سياره محمد قدام الباب وسياره عبدالله ملك انصدمت
ملك:هذي مو سياره ابوي؟
عبدالملك؛الا
ملك:وش جايبه لاامي
عبدالملك:ملك اهدي وخليهم يحلون مشاكلهم مع بعض
ملك؛المشكله للحين فيه ماراح اسكت
ونزلت وعبدالملك مسك يدها قبل تنزل ولفت له
عبدالملك:وبعدين يعني الى متى هالعناد
ملك؛مو عناد عبدالملك انت صاحي وش اتهمني فيه ابوي
عبدالملك:وانتي صاحيه انك بتخلين امك وابوك يتطلقون بسبتك
ملك جلست تشوفه
عبدالملك:اللي سواه عمي مو قليل بس بعد اذا احنا كبرنا السالفه ماراح تنطفي وعارف انك مو عارفه باللي بالجوال
ملك اخذت نفس وعبدالملك ضغط ع يدها: وراح اطلع اللي وراء السالفه بس اصبري علي
حست ملك براحه وضغطت ع يده ورفعها عبدالملك وباسها
عبدالملك:اهدي زين؟
هزت ملك راسها بااي وابتسم عبدالملك:يلا
ملك:يلا
ونزلو
وقبل يدخلون لف عبدالملك لسياره محمد شافه نايم وشكله يكسر الخاطر
عبدالملك:ملك
لفت له
عبدالملك اشر لمحمد ومن شافته ملك واستوعبت انفجرت ضحك
عبدالملك؛متعب نفسه
ملك:ههههه وربي انك محسود عليه ، روح صحه خله ينام ببيته
عبدالملك:طيب وانتي لاتدخلين دقايق
وتركها وراح لسياره وطق النافذه وقام بخرعه
عبدالملك؛ههههههههه قوم
فتح محمد الباب ومسح وجهه:اسف وربي ماادري كيف نمت
عبدالملك ضغط ع كتفه:يلا ع بيتك نام
محمد:وام ملك؟
عبدالملك؛خلاص خلها علي
ابتسم محمد:طيب
وجاء بيركب بس انتبه لشي
محمد:طال عمرك وين اللي ع يدك ليش تحركها
عبدالملك ناظر ليده:ماتحتاج خلاص ماقمت احس بشي
محمد:لالا لازم تواصل عليها ع الاقل شهر
عبدالملك ابتسم؛تامرني
محمد بسرعه:لالالالا
عبدالملك ضغط ع كتفه:يلا يلا تركت البنت هناك، سلام
وتركه ومشى ومحمد ابتسم وركب سيارته ومشى
وصل عبدالملك لملك:تاخرت
ملك؛لا يلا ندخل
عبدالملك:يلا
ومسك يدها ودخلو
،
طقو الباب ع طلعه خلود من الغرفه عليها فستان كحلي ورافعه شعرها كانت جميله وعبدالله من شافها صنم
خلود:وش تسوي قاعد افتح الباب
عبدالله بسرعه:طيب طيب
وقام للباب وخلود تسوي نفسها مبتسمه
وفتح وابتسم وملك انصدمت من شافته مبتسم وامها مبتسمه
عبدالله:هلا والله هلا بمعاريسنا
عبدالملك:هلابك
ودخلو وملك شطفت ابوها وراحت بسرعه وضمت امها وعبدالله يناظرهم وعبدالملك دخل وسكر الباب

26 - 11 - 2021, 09:14 AM

البارت 181

ملك وهي ضامه امها:شششلونك يمه
خلود:قلبي انتي بخير انتي شلونك
ملك بعدت وجلست تناظرلها وعيونهم ببعض؛مشتاقه لك وهو يوم اللي غبتي بس كانه سنه
خلود:وانا بعد
ورجعت ملك ضمتها وعبدالله وعبدالملك يناظرون لهم
خلود:حبيبتي نسيناهم
بعدت ملك:ههههههه من شفتك نسيت انه عبدالملك فيه
عبدالله ضاق صدره انها شاطفته
عبدالملك:شلونك ي خاله
خلود:بخير الله يسلمك ومبروووووك مره ثانيه
عبدالملك باابتسامه:الله يبارك فيك
عبدالله باابتسامه:ملك شلونك
ملك صدت عنه:امممم شم ريحه صينه دجاج
هزت خلود راسها بااي:سويتها تو
ملك بفرحه:ونااااسسسه
عبدالله تنهد وجلس بضيق وعبدالملك حس عليه وحب يلطف جوهم
عبدالملك:مللللك
لفت له ملك
عبدالملك:ي هو ترا مااحب السمينه توك اكله وبتاكلين بعد
ملك تفشلت
خلود:ههههههههههههه طلعتي اكله بعد وجايتني
ملك بحياء:مااكلت كثير
عبدالملك قرب لها ومسك يدها:اعترفي
ملك:بس شوي
عبدالملك قولي بغيتي تاكليني لولا ستر الله
ضربت ملك كتفه:لااا عاد لاتكذب
خلود وعبدالملك:هههههههههههه
اما عبدالله ابتسم بس
،
بالشركه هالوقت
ناصر تنهد:شغل شغل شغل شغل
سامر:اوووه بدينا نتحلطم بعد الخطبه
ناصر:هههههههه لا بس طفشت عبدالملك بااجازه ومحمد مأجز معه وعمي اللي هو ابوك صاير من فتره لفتره يجي والشغل ع راس ناصر وسامر بس
سامر:القراده وانا اخوك
ناصر؛انا اشهد
وطق الباب
ناصر:ادخل
ونزل راسه للاوراق وسامر انصدم
سامر:انت وش تسوي هنا
ابومتعب باابتسامه:جاي لشغلي
ناصر رفع راسه من سمع صوته وعصب
ناصر:مالك شغل عندنا برررا
ابومتعب:مو انت تطردني ،واصلا ماشوف اني انطردت ولا ممكن لابوسامر يطرد صديقه
سامر:اذا كان صديقه خاين للعشره ويداري اشخاص علينا فماراح يسكت
ابومتعب:اسمي موجود بالشركه كشريك للحين ولا راح ينشال، سلام
وطلع وضرب الباب وناصر وسامر تنرفززززززوا حيل منه

26 - 11 - 2021, 09:15 AM

البارت 182

ببيت ناصر
بالحديقه كانت ارجوان ع كرسيها لابسه نظراتها الشمسيه وتقرا مجله ونور تلعب قدامها وام ناصر كانت طالعه
وانفتح الباب ودخل ناصر متنزفز
وشافت له ارجوان:وش فيك بعد
ناصر مارد وقرب لهم ونور مندمجه تلعب
ناصر:وين امي
ارجوان:طلعت
ناصر:طيب انا طالع اريح شوي وبرجع لشغل
ارجوان:طيب
وقرب ناصر لنور وباس خدها ومشى لداخل
وهو طالع من الدرج رن جواله واستغرب من الاسم (ام ضاري) مربيه نور اول استغرب حيل ورد
ناصر؛هلا
ام ضاري:هلابك شلونك ي ولدي
ناصر:الحمدلله انصدمت لما اتصلتي
ام ضاري:صراحه من حقك بس انا عندي لك شرهه وخبر
ناصر عقد حواجبه:قولي
ام ضاري:شرهتي ليش ماتجيب نور لي حيل فقدتها
ناصر ابتسم:وربي مافضيت ي ام ضاري بس ان شاءالله تشوفينها قريب
ام ضاري؛ان شاءالله، والخبر صراحه ماادري كيف اقول لك
ناصر:قولي
ام ضاري:قبل فتره كنت بالبيت الصغير اللي كنت فيه مع نور
ناصر:ايوه؟
ام ضاري:وجتني حرمه كانت تبكي
ناصر باستغراب:وش تبي
ام ضاري؛بنتها
ناصر سكت
ام ضاري:شيخه ي ناصر جت تبي نور وتبكي
ناصر بصدمه؛نعم؟؟
ام ضاري:مثل ماقلت لك
ناصر بعصبيه:تخخخخخسى وتبطي والله مااخذتها الحيوانه
ام ضاري:قلت لها ليش تركتيها من البدايه بس الحرمه ماجاوبت وصارت تبكي وتصرخ بالشارع بااسم نور
ناصر:وعمى يعميها لاتقولين قلتي لها وين نور
ام ضاري:لا ماقلت
ناصر:زين اشوا ، واذا جتك لاتعطينها وجه
ام ضاري:ان شاءالله
ناصر:يلا سلام
وسكر وهو منقهر وراسه يوجهه من العصبيه
وكمل طلع لغرفته
،
بشقه خلود
كانو جالسين بالصاله ويتغدون
ملك جنب عبدالملك وخلود جنب عبدالله
عبدالله:وشلون يدك عبدالملك
عبدالملك حرك يده:ازين
ملك جلست تناظر ليده:تصدق نسيت اللي عليها ذاك
عبدالملك:الازرق؟
ملك:هههههههه اي
عبدالملك:لا خلاص مليت منه ماابيه
خلود:مايصير جرحك للحين ماتعافى
عبدالملك:مااحس فيه صراحه
سكتو شوي
عبدالله:المهم انا باخذ خلود ونرجع للفله الكبيره
ملك انصدمت وناظرت لامها
خلود:اي برجع معه
ملك همست؛ شلون وليش
عبدالله:اللي صار شي ممكن يصير وكلامي ندمت عليه
ملك رفعت حاجب:ويوم ندمت انا وش استفيد
عبدالله انصدم منها
ملك:امي ماترجع معك بعد كلامك
عبدالملك ضغط ع يدها:ملك
ملك لفت له:عبدالملك:خليهم براحتهم
خلود:ملك حبيبتي انا ابي ارجع
ملك بصدمه حستهم كلهم ضدها وقامت
واخذ عبدالملك نفس بضيق وهز كتوفه لهم
خلود:زعلت ، عبدالملك قوم خذها وروحو وتكلم معها
عبدالملك:ان شاءالله
وقام لها

المواضيع المتشابهه لموضوع: رواية عشقي ال بدي مكتفي فيك عاشقك للفنى لموضوع: رواية عشقي ال بدي مكتفي فيك عاشقك للفنى
الموضوع	كاتب الموضوع	المنتدى	مشاركات	آخر مشاركة
مكتفي بك 2022	حنين الأشواق	همس الشعر و الشيلات الصوتيه	2	22 - 1 - 2022 11:22 AM
تعب عاشقك بدر العزي 2021	حنين الأشواق	همس الشعر و الشيلات الصوتيه	4	18 - 3 - 2021 03:10 AM
لاتبعثرني تراني مكتفي	جروح الم	همس الشعر والقوافي	2	27 - 12 - 2014 11:28 PM
قال نا عاشقك	استثنائيه	همس عذب الكلام والخواطر المنقوله	10	1 - 5 - 2013 01:53 AM
رواية عشقي	مــلآمـح خ ــجل	همس الشعر والقوافي	12	12 - 6 - 2012 12:46 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

رواية عشقي ال بدي مكتفي فيك عاشقك للفنى

همس للقصص وحكايات وروايات