عيونك شوكة في القلب توجعني و عبرها للكاتبة ديم الراشد مكتملة

21 - 1 - 2022, 12:32 AM

.... 225 ......

وقف وهو يتنهد :لمي كل اغراضك بتطسين معي امريكا واقسم باللي خلق النفس من النفس لو اسمع صوتك لادفنك حيه وتأكدي ان عيشتك هناك مثل الاصم الابكم مالك دخل بالناس سامعتني ساعتين ورايحين المطار
ماقدرت وسن ترد وهي متكسره من الضرب ووقفت بصعوبه وراحت تلم اغراضها وهي تبكي
اما رامي اللي جلس وهو حاط يده على راسه ومايدري وش يسوي عشان يداري عالمصيبه
••
•
ااما عند اديم اللي كانت تمشي لحالها بجناح المستشفى وهي تتحس بطنها بحب غمضت عيونها وهي تفكر لو كل شي صار بحب وليت فيصل حبها من قبل وليت كل شي صار بينهم صار بدون مشاكل وقلق وتنهدت بضيق وهي تقول : الله لو كل شي كان حلو
تزلزل جسمها لما سمعت صوت تعرفه زين بس فيه بحه حزينه : الله لو يصير كل شي حلو
لفت وهي تشهق وحطت يدها على فمها اول ماشفته وهمست بخوف وشوق:فيصل
غمض فيصل بقوه لما صوتها اقتحم كل نقطه داخله وفجر كمية الشوق والحنين داخله اوجعه قلبه من كثر ما حن لها بهالحظه عرف انه مو بس يحب اديم الا يعشق ترابها
اما اديم اللي جلست وهي مو قادره حتى تبكي كانت تناظر كل تفصيل في فيصل وهي مو قادره تستوعب كيف تغير شكله وواضح عليه الحزن والتعب سكرت عيونها بيدها وهي تبكي بصوت عالي :ليش صار فيك كذا ليش
قرب فيصل بخطوات سريعه جلس قبالها وهو مو قادر حتى يناظرها من كثر ماهو خجلان من نفسه تكلم بصوت مهدود حيله : بعدك ي اديم هد حيلي مو قادر حتى ابتسم لو بالكذب قلبي يوجعني كل ما اشوف شي يذكرني فيك ادري ما معي حق حتى اجلس وابرر وادري اني ممكن اكون احقر انسان شفتيه لكن اذا قسمي بيشفع لو شي بسيط اقسم لك باللي زرع حبك بقلبي اني ندمان قد شعر راسي واقسم بالله العلي العظيم اني حبيتك اكثر من اي شي بحياتي ادري ما يهمك تعرفين لكن يهمني اقول ممكن ما تصدقيني لو قلت ان كل شي كنت اسويه كنت احاول اهرب من حبك مابي اشوف طيبة قلبك واحس بذنبي كنت ابيك تسوين اي شي شين عشان تردين على افعالي فيه لكن مع الاسف كل يوم كان يكبر في قلبي شي يخليني اخضع لك بكل مافيني ولما ابتديت اخاف واتخبط واكتشفت اني فعلا احبك خفت لاني مابي احب احد مابي اتعلق بأحد لاني ادري اذا حبيت احد بيروح ويتركني مثل ماحبيت امي وراحت كنت خايف بعدك ما احبك افقدك لكن غبائي في كل مره ينتصر واخطيت انا اسف ي اديم اسف ادري ما تسوي شي بس لو فيه كلمه اكبر قلتها انا مستعد اسوي اي شي يريحك ولو بعدي يريحك اوعدك اطلع من الرياض بكبرها المهم تسامحيني ... ابتداء صوته يختفي ويتحشرج ..اديم اذا تحبين لا تسامحيني انا كشخصي سامحي فيصل اللي انتي تعرفينه
بعدت اديم يدها وهي تبكي لدرجة انها مو قادره تشوفه من دموعها :وش ذبني وش ذبني من كل شي كنت تسويه وش اذيتك فيك ابي اعرف
فيصل نزل راسه ومارد فقدت اديم صبرها وقربت وهي تهزه وتضربه بشويش :ماخفت ربك فيني كسرتني وحطمتني جيتك وانا كلي فرح وتفاؤل بنت ما تعرف الا تضحك وتحب وطلعت من عندك جثه محطمه ولافيه شي اذكرك فيه واقول ينغفر له طول عمرك كذاب ومخادع قولي وش اغفر لك فيه
مسك فيصل يدها لما حسها بتنهار: اغفري لانك تحبيني
صرخت اديم بقهر : ااااااه منك ومن حبك ومن سنيني ااااه
قرب فيصل وهو يحضنها بقوه وحاولت اديم تبعده لكن استسلمت لما سمعت صوته يبكي بطريقة تكسر القلب هنا بالظبط انهارت قوى فيصل وابتدى يتكلم بدون شعور : سامحيني ي اديم والله ماني قادر اتحمل كل اللي يصير فيني والله كثير كل شي حولي طاح وتهدم من كل مكان انطعن وانهار تكفين لا تقسين علي والله ما اتحمل بعدك والله الدنيا كلها ضاقت بي والله وحيد والله مالي غيرك بهالدنيا
رفعت اديم يدها بخوف وهي تحضنه حست بعظامه اللي ترجف وكيف صار ضعيف :ليش صرت كذا ليش مهزوز وضعيف
فيصل:اديم لا تتركيني دخيلك
حضنته بقوه وهي خلاص مو قادره تتحمل ضيقه وتعبه ابعدته وهي تناظر بوجهه : وش اللي سوا فيك كذا وش المرض اللي اتعبك ومحد يبي يقولي عليه
كان فيصل يتكلم وهو يناظر الارض : تخيلي ي اديم خالتي اللي كنت اعدها مثل امي اللي حافظت عليها رغم كل شي حاربت الدنيا عشانها ..سحرتني دمرتني وضعيت كل شي مني
شهقت اديم وهي تناظره بصدمه :ايش
غمض فيصل : كل الدنيا انحاست حولي محتاجك تكونين جنبي ي اديم محتاجك بكل شي حولي
كانت اديم تناظره بصدمه وحنت عليه وعلى شكله وضيقه همست: ناظرني فيصل
صد فيصل بضيق : مالي وجهه اناظرك دخيلك سامحيني
اديم:ناظرني ي فيصل
غمضت وهو فعلا مو قادر رفعت راسه اديم وهي تناظر عيونه الذبلانه ابتسمت بهدوء : عشان فيصل اللي احبه مسامحتك
بكى فيصل وهو يحضنها بقوه وبكت اديم بعد اللي عمرها ما توقعت ان فيصل يجيها بهالضعف كان يردد انا اسف وانا احبببك )
••
•
برا كان واقف رائد جاء ابو مشاري ومشاري ومعاهم روان ومروى ومستغربين وجود رائد لف رائد وتعلقت عيونه في روان اعتدل لما انتبه لمشاري وابوه
ابو مشاري سلم عليه: رائد وش فيك
رائد ارتبك وتلعثم : مافيني شي بس فيصل جوا وانتظره
الكل: ايش
رائد: ادري كان المفروض نقول بس فيصل اصر يدخل
مشاري تقدم بيدخل بس مسكه ابوه : مشاري انتظر
مشاري : يبه اديم ما تتحمل
ابو مشاري:انتظر فيصل بيحل الموضوع
رجع مشاري بقهر وجلس وهو مقصده انه خايف على اديم مو مانع وجود فيصل اما رائد اللي نسى كل شي وتعلق قلبه في روان وكان يسأل نفسه ( وش جابها معاهم ماعمره شافها معهم )
اما روان اللي كانت تتحلطم على مروى بسبب وجود رائد :ياخي هذا وش جابه
مروى: وش تبين جاي مع ولد عمه
روان :يا اختي ما ارتحت له
مروى: ومن طلب منك ترتاحين شوي ويروح روقي
تأففت روان وهي تلف شافته صاد وشكله مرتبك استغربت وهي تناظره لكن ابتسمت اول ما دققت بشكله( ما يتساهل هالوسامه هههههه استغفرلله وش فيني انا )
لف رائد وشافها تناظر ووارتبكت روان ولفت رائد:ااا انا بروح شوي اذا طلع فيصل لاهنت قلي
مشاري : اوك
راح رائد بخطوات سريعه وزفرت روان بضيق وجلست وبعد شوي حست انها مكتومه وانسحبت اتجهت للكفتيريا وطلبت مويه وراحت جلست بالاستراحه وتوها تفك المويه سمعت صوت تذكرته على طول
رائد اللي جلس بالاستراحه واخذ جواله وهو يتصل على عساف : عساف
عساف اللي كان توه صاحي :هلا رائد
رائد : عساف لما قلبك يدق بقوه اذا شفت بنت وش معناته يعني اكثر من مره شفتها واكثر من مره دق قلبك
انفجر عساف يضحك: خير وش الطاري
رائد : بلا سماجه وتكلم
عساف ضحك : يعني انك غارق في شبر مويه ومنتهي
رائد بهدوء :يعني !
عساف : يعني حبيت ي غبي
رائد ابتسم بهدوء: اي والله حبيت ي عساف
ضحك عساف بقوه: ومن هي هاللي حرولتك وجابت راسك
ضحك رائد : تتذكر البنت اللي جاات بعشاء اديم وفيصل هاذيك الغريبه
عساف : اييييييه اييييه كنت حاس وربي كنت حااااس
رائد: والله ي عساف يوجعني قلبي اذا شفتها بس تدري والغريب
عساف :وشو
رائد:جات من شوي مع ابو مشاري تتوقع بنته
عساف : اذا بنته ليش ماجات معاه في الحفله وبعدين تعال شوداك هناك
رائد: رحت مع فيصل اليوم عرف ان اديم حامل وقال بيشوفها
فرح عساف: الحمدلله دخيلك خلك جنبه والله يجمع شملهم
رائد: زين زين انت بروح الحين بس قلت اتأكد من شعوري
عساف ضحك: اجل سلم على الراحه من يوم حبيت
سكر رائد وهو مبتسم تنهد وهو يقول : يالله شلون الانسان يحب كذا يالله قد ايش تعلقت فيها وانا حتى ما اعرف اسمها
لف لما حس بشي طاح وراه وانصدم لما شاف روان واقفه والمويه طاحت وعيونه متسعه بصدمه وابتعدت وهي تركض
تجمد رائد وفهم انها سمعته خاااف كثير لا تاخذ منه موقف ووقتها بينجن ارتبك ولا عرف وش يسوي جلس مكانه وهو مرتبك ومايدري وش يسوي
••
•
نرجع لفيصل واديم اللي بعد مده من البكى اللي غسل كل شي في قلوبهم ولا ظل فيها الا الحب رفع راسه فيصل وهو يرجف بفرح:اديم مابتخليني صح
ابتسمت اديم : اذا وعدتني ما تخليني
فيصل: والله مااخليك لين تخليني روحي
اديم: تأكد انا ما قطعت كل هالمسافه عشان اخليك
وقف فيصل وحملها عن الارض وهو يحس انه من فرحته وده يطير فيها بعيد ولا يبي يشوف احد نزلها على السرير وهو يلحفها : بردتي من الارض
اديم شبكت يدها بيده بفرح : ماهمني طالما انك معي
قرب فيصل وهو يبوس راسها: والله مدري وش اقول والله
اديم: قالوا لك عن حملي
ابتسم فيصل وعيونه تلمع : قالوا لي لكن اديم من جد انا اسف مابي اي شي ينفرض عليك حتى حملك بالغصب
اديم مدت يدها وهي تسكته: لا تقول كذا هذا ربي كاتبه يمكن هو سبب وصاب بينا ورجعنا لبعض
نزل فيصل يبوس يدها وبطنها ورجع يحضنها: والله ماني مصدق كل هذا والله
تنهدت اديم: تصدقني لو قلت اني توني احس اني حييت
فيصل : بصدقك لاني كنت مثلك
انتبهوا لدق الباب ووقف فيصل وهو يحس انه مرتبك ناظرته اديم وهمست :فيصل لا تخاف سرنا بينا محد درا به خلنا نمشي الامر كأنه سحر ..

#يـــــتـــــــبــــــــــع...

21 - 1 - 2022, 12:33 AM

.... 226 .....

ابتسم فيصل بحب وهو يغمز لها : والله لو انجن بحبك محد يلومني
دخل ابو مشاري وما تكلم لما شاف الابتسامه على وجيههم غمضت وهو يسحب طرف شماغه ويمسح دموعه شاف الفرحه اللي بعيون اديم وفيصل والحياه قرب فيصل بهدوء وهو يبوس راسه: اسف ياعمي على كل شي
حضنه ابو مشاري:ماله داعي الاسف ي ولدي المهم انه طاح الحطب
ابتسم فيصل وهو يبوس يده : ابشرك طاح
تركه ابو مشاري واتجه لاديم وحضنها وهو يبوس راسها:الحمدلله ي بنتي اللي جمع شملكم
ابتسمت اديم وهي تحضن ابوها: مشكور يبه على كل شي
دخل مشاري وانصدم لما شافهم كلهم فرحانين رغم الدموع وقف وهو يقول :خلوني احزر
فيصل ابتسم وركض مشاري اول مافهم ان العُقد انحلت وحضن فيصل وهو يضربه : مبروك ي حمار
ضحك فيصل وهو يحضنه: مقبوله ي خال ولدي
ضحك مشاري وهو يناظر وجهه: ايوه كذا الحياه
ترك فيصل واسرع لاديم:حبيبتي اديم ربي يوفقك ويسهلك والحمدلله اللي فككم من هالشر
اديم حضنته: مشكور مشاري على كل شي
ضربها مشاري بخفه: مالها داعي
قرب فيصل وهو يلوي ذراع مشاري : يدك يدك ي بطل
مشاري لف : هوووووب هووووب ي عم تونا قلنا بسم لله
فيصل : اسف قلنا بسم الله لكل شي يعني انت نقولك مع السلامه
دفه بمزح برا وضحك مشاري :هين هين الشرهه على اللي جالس 3 شهور يداري زوجتك ويداريك وجع
رفع يده ابو مشاري بضحك:اجل انا بطلع بكرامتي واخذ رائد اللي تجمد برا
ضحك فيصل واديم اللي كانوا مايبون شي الا انهم يظلون فرحانين
فيصل:استاذنك ي عمي باخذ اديم لبيتها
ابو مشاري : بس ي فيصل مانقدر نطلعها قبل الدكتور يقول
مشاري:فيصلوه اعقل اعنبوك شهالطاقه توك تشافيت
نزل فيصل جزمته ورماها على مشاري اللي نحاش قبل تصيبه ورجع طل : اقول اختي حملها ضعيف لازم تظل هنا
فيصل : مو شغلك وانقلع
ضحك مشاري وطلع فيصل: ماعليك ي عمي بكلمهم انا وباخذها ولا تخاف اديم بعيوني
ابتسم ابو مشاري: انا ماعندي مشكله يلا فمان الله بس مروى وروان برا يبونها
فيصل : زين انا اروح اكلمهم وهم يدخلون يساعدونها
ابو مشاري: كويس
طلع فيصل وشاف مشاري يحاكي بنات اثنين واقفين وماشاف رائد بس شاف نفس البنت موجوده ابتسم وتوجه لمكتب الدكتور وقابله رائد ضحك فيصل وهو بقول :اششششش احساسك وصل
رائد تنح : وشو
فيصل اشر لقلب رائد : حب العمر ياالغالي
ضحك رائد: شلون عرفت
فيصل: واضح
رائد:وش صار معك
فيصل: بارك لي
ضحك رائد بفرحه وحضنه :الحمدلله
فيصل: رايح اخرجها تركتهم عندها انت روح لا تتعب نفسك معي
رائد: لا وين بوصلك مامعك سياره
ضحك فيصل وهو ياخذ مفتاح السياره :انت اللي مامعك سياره دبر عمرك
رائد: لا خاين ي غدار
فيصل راح وهو يضحك: بالمناسبه اسمها روان ( فيصل كان يعرف مروى وعرف روان لانها الوحيده اللي ما عرفها)
تنح رائد على الاسم وطلع من المستشفى وهو فرحان بس خايف انها ما تاخذ منه موقف بشع
••
ظيمنع
عند روان اللي كانت متنحه وكلام رائد يتردد بأذنها انتبهت لابو مشاري : روان يلا تعالي سلمي على اديم وباركي لها تصالحت مغ فيصل
ركضت بحماس وفرح دخلت وهي تركض لاديم حضنتها :مبروك ي روحي
مروى: اديم روحي مبروك
بكت اديم بفرح: الحمدلله الحمدلله
روان: الحمدلله ربي ما ضيع تعبك
ابتسمت اديم : عقبالك ي روان تفرحين بزوج يسر قلبك
اختبصت روان : اا بتروحين مع فيصل
اديم:ايوه اكيد بس قبل بروح البيت اخذ اغراضي واسلم على امي
مروى: زين اسبقك اجهز اغراضك
روان :وانا بعد روحي انتبهي على نفسك طيب
اديم : اوك
طلعو كلهم وهم فرحانين وتركوا اديم اللي صرخت بفرح وهي تقول:الحمدلله ي ربي
سمعت دق الباب وكانت الممرضه: الحمدلله على السلامه بتخرجين
اديم :ايوه
ابتسمت الممرضه:زوجك يحبك كثير وعد الدكتور وعود كثيره عشان يقدر يطلعك حتى انه طلب ممرضه تجي كل يوم بيتك
ابتسمت اديم بفرح: روحي والله
دخل فيصل وهو مبتسم : خلصتي
اديم : بس البس عبايتي واجمع الاغراض
فيصل : خليك مكانك اجيبها لك
ابتسمت الممرضه لاديم وهي تعطيها ادويتها: انتظمي عليها
ضحكت اديم واشرت لفيصل قبل تكمل الممرضه الشرح: كلميه هو ممرضي
ضحك فيصل اللي جاء وبيده عبايتها : اي نعم ي روحي عندك اعتراض
اديم ضحكت بحركه طفوليه: وانا اقدر
اخذ فيصل الادويه وهو مبتسم وفهم شرحها ورجع لاديم وهو يساعدها تلبس نزلها عشان تركب العربيه بس وقفت اديم وهي مقطبه: وشو ذا فيصل
فيصل : بعير وش تشوفين قلبي عربيه ..

21 - 1 - 2022, 12:33 AM

..... 227 .....

اديم بطرف عين: ادري بس مابي اركب عليها اقدر امشي انا
فيصل :تدرين ما بتمشين فلا تعاندين
اديم لفت وهي تعدل نقابها وطلعت وتركت فيصل واقف بصدمه اخذ اغراضها وطلع ركض وراها: انجنيتي انتي صح
اديم : لا تنسى اللي سويت فيني المفروض تنفذ كل شي ابيه بدون اعتراض
زفر فيصل ومشى وهو ساكت: افحمتيني صراحه
ضحكت اديم بأستهبال وكملت طريقها وقفت عند الكفتيريا وشافت ايسكريم اشتهت ولفت: ابي ايسكريم
فيصل طارت عيونه: لا بالله انهبلتي برد برد شايفه مم درجة الحراره ودك تموتين انتي مافيه بعدين خطر عليك وانت ضعيفه كذا
اديم تكتفت : يعني بترجع تكسر بخاطري
لف فيصل بصدمه: وش فيك ي مجنونه ماكسرت خاطرك بس خطر
اديم : الدكتور قال لا تبكي ترا خطر اكثر
زفر فيصل ولف وهو يتحلطم :انتي بقى عندك دموع
اديم : اذا تبي تتاكد مستعده ابكي
فيصل :لا لاا تبكين بنشتري ايسكريم الله يسامحني بس
ضحكت اديم وهي تقرص اذنه ابتسم فيصل وهو ياخذ اثنين
اديم: لمين الثاني
فيصل: لي !
ااديم :على كيفك
فيصل: اجل؟!
اديم: مافيه تاكل تمرض وانا اخاف عليك
فيصل تنح: وشو
اديم سحبت الايسكريم تبعه ورجعته ومشت كمل فيصل الطريق وهو يضحك مع انه ما يحب احد يستفزه لكنه مستعد يتحمل كل شي منها ساعدها تركب السياره وجلس وهو يقول : وش تحبين تسمعين
اديم لفت بهدوء : نسمع نوال!؟ فيصل ابتسم بهدوء : نسمع
ابتسمت اديم وعلى فيصل صوت نوال وصدح وهو تقول ( انت طيب )
وهالمره كانت مشاعرهم فرح عكس الالم السابق
••
•
في بيت ابو عادل كانوا الكل مجتمعين بمناسبة سلامة فيصل دخل عادل :سلاام عليكم
الكل : وعليكم السلام
الجد : وش فيك
عادل جلس وهو وهو يمسح وجهه : ولا شي
ابو عادل : وش صار مع خالتك
عادل تنهد وهو يفرك يده : جاء رامي اخذ وسن ورجع لامريكا وخالتي انحكم عليها سجن والمده طويله بس ماحددوها
منى: لا يجعلها من هالحال واردو تستاهل حسبي الله عليها
ابو عادل : لا حول ولا قوة الا بالله
الجد:استغفري ي منى الشماته ماهي زينه
منى: استغفرالله الله لا يسامحها بس
دخل فيصل وسكتوا الكل لكن فيصل كان مبتسم : سلااام ي مزز
الكل ابتسم: عليكم السلام
وقف
فيصل اللي كان شكله يحزن بس باين فرحه : ابشركم الفرحه رجعت لحياتي
وقفوا كلهم وهو يضحكون واللي ركض يحضنه ومنى ابتدت تزغرط والكل فرحان ابتعد فيصل ووقف فوق الطاوله وهو مبتسم : هيييه لو سمتحوا وصلت مشاعركم ي لبى هههههه المهم اخلو الطريق خلوني ادخل عروستي ولو سمحتوا خيول جامحه مانبي ( وهو يغمز لمنى)
اخذت منى الشبشب بضحك وهي تطرده وانحاش فيصل وهو يقول : هيا وخروا جد
جلسوا كلهم وهم يضحكون ودخل فيصل بعد ماطلع وبيده اديم اللي فعلا انحرجت بس ما اهتمت الا لوجود فيصل اخذها فيصل تجلس ووقف وهو ياخذ صفيرة نواف : لو سمحتوا محد يجي يسلم الا اذا صفرت له
عادل تكتف:مع نفسك شايفنا بهايم
فيصل رفع يده وهو يضحك: انا ماقلت شي
جات منى وهي تسحب فيصل وتدفه: اذا فيه خطر بالحياه هو انت ابعد من هنا
ضحك فيصل وراح يجلس بجنب ابوه وراحوا الكل يسلمون على اديم دخل رائد اللي توه يوصل : حسبي الله عليك ي فيصل
لف فيصل بصدمه: خير وش سويت لك
جلس رائد وهو يقول :نواف اسعفني بمويه
ركض نواف يجيب مويه والكل مستغربين شكل رائد
الجد :رائد وش فيك
عاددل : وش صاير معك
رائد شرب المويه ولف : يعني ما عمري شفت احقر من ولدكم هذا جزاي موديه للمستشفى ومخليه يراضي زوجته ياخذ سيارتي ويتركني اطقها كعابي
عادل:هههههه وش الله حادك في اختراع سموه تاكسي اذا عمرك سمعت به
رائد:المشكله ان بوكي بالسياره
فيصل انفجر يضحك بعد الصدمه:ههههه هاذي مشكلتك الله وحده يعلم وش اللي اخذ عقلك
ارتبك رائد: ياخي الانسان يخلي عنده احساس وضمير
فيصل:ههههه مره ثانيه ان شاء لله
ابو عادل :عاد سامحه توه متشافي
منى:هههههه بدينا بالشطانه بدينا الله يستر على ولدك لا يصير مثلك
فيصل: هههههه وش فيني ي حافظ وش ملحي وش زيني
عادل : اااخ ي ربي كمية الثقه اللي فيك صراحه مدري وش تبي بالحياه
فيصل : عادلوه لا تسوي نفسك مجنون صح ملقوف وصح خبل لكن هااااه اعترفوا كلكم تحبوني صح او لا
نط نواف وهو يحضن اديم: انا ما احبك احب اديم
لف فيصل بسرعه : اقول احفظ دمك وقوم من هنا اصلا خلاص اديم بتتغطى منك خلاص
ابو عادل: هههههههه وش دعوه توه صغير
عادل: قايل لك ولدك خبل

21 - 1 - 2022, 12:34 AM

.... 228......

فيصل : خبل ولا مهبول هذا الكلام اصلا حتى عميمه بتتغطى منها اديم
منى شهقت :حسبي للله عليك ي فيصلوه وش شايفني
انحاش فيصل وهو يجلس بجنب اديم: والله صراحه للحين مدري هههههه
الكل :ههههههه
اجتمعوا كلهم ع القهوه والوناسه ومع ذا كله كان فيصل ناسي سهام اما سهام اللي كانت حاقده ولا تبي اديم ترجع ابدا كانت جالسه وهي تهز رجلها بغضب رفع راسه فيصل وشافها جالسه غمض عيونه ( وهاذي ما قضينا منها لكن هين ي سهام اذا ما طلعت كل شي صار معنا من عيونك طيب )
اديم كانت عارفه ان سهام ماتبيها ترجع و واضح عليها تنهدت بضيق ( واضح انها ما بنخلص من هالدوامه )
كملو اليوم بشكل جميل بدون ما احد يضايق احد والكل مبسوط وانتهى يومهم وابتدوا يفترقون
••
•
في جناح عادل اللي دخل بحماس الدنيا واول ماشاف ريمان اسرع خطوته وهو يحضنها وابتسم بهدوء: الحمدلله ايامنا السود انتهت ومشكوره فعلا على وقفتك معي ي اجمل شي صار لي بهالحياة
ابتسمت ريمان: مهما سويت ادري مستحيل يجي نص اللي سويته معي
ابتسم عادل بهدوء : زين بما ان خلاص انتهينا من الحزن بقولك جهزي شنطتك بكره بنسافر نقضي عطله حلوه مع بعض
ضحكت ريمان بفرح: من جد
عادل : ايه وما اتوقع فيه شي يغلا عليك
حضنته ريمان بفرح وهي مبسوطه جدا من حياتها وحمدت ربها انها ما تهورت وطفشت عادل بادلها عادل الحضن بحماسه لبدايه جديده وحلوه
••
ظيمنع
اما عند رائد اللي كان يحوس ويحوس ومايدري وشلون يعرف شي عن روان او يفسر لها الموضوع سحب جواله واتصل على فيصل لكن ما رد فيصل زفر بضيق وطلع شاف نسرين جالسه بالصالون تتابع فيلم بس الواضح انها مو معه قرب بهدوء:نسرين
نسرين لفت بفجعه:وش فيك
رائد : فجعتك
نسرين : شوي
رائد : معليش
بعد سكوت شوي قال رائد : نسرين تعرفين احد من عائله ابو مشاري اسمها روان
نسرين استغربت: ليش!
رائد: لا بس لما كنا نروح لاديم كنا نحصلها هناك وواضح انها مو من العائله
نسرين : ايه هاذي تصير صديقة اديم من زمان يتيمة ابو وامها مدري وينها اتذكر لما سألنها مره قالت مو موجوده وعشان كذا دايم معهم
رائد : اها .... زين انا بروح انام وانتي لا تطولين
نسرين : طيب
راح رائد وهو مستغرب من كل اللي قالته وماهو فاهم ليش شافها بذاك المكان طالما ان ابوها متوفي اما نسرين اللي تنهدت وهي ماتدري وش تسوي بمصيبتها هي
••
•
عند عساف اللي كان بغرفته ويحوس بأجهزته دخلت امه وهي تقول : عساف صاحي يمه
عساف : ايه يمه تعالي
جات وجلست : ليش ما نمت انت تعبت طول الايام اللي راحت
عساف لف وهو مبتسم : شوي وبنام يالغاليه بس اخلص كم شغله
ام عساف: زين ... الا ما قلت متى بنروح بيت البنت ونخطبها
ترك عساف اللي بيده وزفر: الحين ادق على رائد واقوله بكره جايين
ابتسمت: ايه يمه عسى ربي يفرحني فيك واشوفك ابو وعيالك حولك
ابتسم عساف وهو يبوس راسها: ان شاء الله يمه
طلعت امه وسحب جواله وهو يدق على رائد: سلاام
رائد : دايم بوقتك
عساف: يوه حب وابلشنا
رائد: هههههه لا تخاف دايخ وبنام بس بقولك بكره لازم نفطر مع بعض
عساف:ههههه حلو كنت بقولك بعد
رائد : زين يلا مع السلامه
عساف: اصبر دقيقه بلغ ابوك بكره جايين بيتكم
ابتسم رائد: زين
سكر عساف وارتمى على سريره وهو يتنهد : مدري وش بسوي بنفسي بس ان شاء لله خير
••

عند اديم اللي كانت جالسه وهي تناظر كل مكان بالجناح ابتسمت لما سمعت فيصل يهمس من وراها : اسف على كل شي سيء مريتي فيه
اديم لفت وهي تبتسم : تصدقني لو قلت لك ما مريت بشي سيء
فيصل: تضحكين على مين
اديم :ههههه والله من جد يمكن تقول خبله بس والله كل شي عشته كان بالنسبه لي فرح حتى لو اني ابكي كان يفرق عشانه معك
نزل فيصل راسه بضيق : مدري وش سويت عشان استاهل كل هالحب
ضحكت اديم وهي تأشر على قلبه: عشان هنا نظيف
باس يدها وهو يقول : ابي اعرف كل شي ابتدينا فيه وانا مو حاس ابي اعرف من متى جاء لي الحظ اكون في قلبك
وقفت اديم وهي تسحبه معها: قوم جيب مفتاحك وتعال
فيصل: وين !
اديم : قوم وبتعرف
فيصل: اديم اخر الليل وين رايحه وبعدين انتي تعبانه
اديم: الحين انت صرت تفكر بأول الليل واخره قوم يلا
فيصل وقف وهو منصدم: الحين كل هالعناد ليه ما كنت اشوفه
اديم ضحكت وهي ترفع نفسها وتبوس عيونه : عشانك مسكر عيونك
رمى فيصل نفسه وهو يضحك : طيب قولي وين بنروح ولا بسكر عيوني بعد
اديم ماردت وهي تلبس عبايتها: يلاااا عاااد

21 - 1 - 2022, 12:35 AM

..... 229 .....

اخذ فيصل مفتاحه ولبس جاكيته : طيب قولي وين رايحين
قربت اديم وهي تشبك يدها بيده : يالله قد ايش انت فضولي انتظر وبتشوف
نزل فيصل معها وهو مبتسم لكن وقفهم صوت سهام: اديم وين رايحه
وقف فيصل وهو يعض شفايفه بقهر: وانتي وش دخلك من عينك حارس علينا
سهام: ما اكلمك اكلم اديم
فيصل لف : اسمعيني عاد اقصري الشر وفارقي ولا تخليني ابتلي فيك
اديم شدت على يد فيصل: فيصل يلا ماله داعي اللي يصير
سهام: تسفهيني عشانه
اديم غمضت بضيق : فيصل يلا
اخذها فيصل اللي استانس على اللي صار وطلع وقال : معليش ي اديم كل شي بتحمله الا هالشي
اديم : مالي شغل في شي انا ما يهمني الا حياتي
ابتسم فيصل وهو يفتح لها باب السياره واول ماجلست نزل وهو يبوس يدها: اقدر اوعدك بحياتك الجايه مابتشوفين شي يزعلك
سحبت اديم وهي تبوسها: لاتوعدني انا متاكده من ذا الشي
ابتسم فيصل وابتعد وهو يحس انه الحين صار لحياته معنى ركب السياره : ماقلتي وين الوجهه
اديم: لاول اشاره تواجهك
استغرب فيصل:اشاره
اديم ضحكت وهي تستند لكتفه: شوف مع كل اشاره ببداء لك موقف جديد معك وانت بس سوق
ابتسم فيصل وحرك وابتدت اديم تحكي له وكل اشاره تبدأ موقف جديد وفيصل ماهو مستوعب ان كل هالقصه له وهو مو حاس وعلى اخر اشاره قبال البيت انتهت اديم وهي تقول : اخر شي مستعده اكمل دروبي وراك رغم اني مدري وين بروح لكن مدري ليش دايم احس طالما انت فيه ينتهي كل التعب
غمض فيصل وهو يتنهد :والله مو طالع بيدي شي اسويه ليتني يوم حصلت محفظتك حبيتك وعشت معك بالراحه ولا تطرقنا لكل هالمشاكل
ابتسمت اديم وهي تناظر الاشاره الحمرا: لا تقول كذا مافيه حاجه حلوه الا بعد تعب والحمدلله هذا حنا مع بعض
فتحت الاشاره ولف فيصل : من بعد هالاشاره بننسى كل شي نبداء من جديد لكن بتظل معنا هالذكريات
ابتسمت اديم : ههههه كل الذكريات تبقى تحت مسمى( حب الاشارات)
ضحك فيصل وهو فعلا ماهو مستوعب كيف جمعتهم الصدف كثير وهو مو حاس رجعوا للبيت بعد اذان الفجر قابلهم الجد اللي راجع من المسجد: فيصل وش فيكم اديم بها شي
ابتسم فيصل وهو يبوس راسه وهمس بأذنه: مافينا شي بس بنعيش ليل العشاق
ضحك الجد وقال: اجل الله يهنيكم
اخذ فيصل اديم وطلع وهو مبسوط بوجودها صلى الفجر ولف وشافها واقفه ترتب السجاده بعد ما خلصت صلاتها جلس يناظرها وهو مبتسم : تدرين عاد عمري ما فكرت انه بيجي يوم اتزوج ولا حتى اصير صاحب مسؤليه والاعظم انه عمري ما توقعت اني بيوم انتظر طفل واكون ابو
ضحكت اديم : تصدق ولا انا مدري شلون تطورت فينا الاحداث بسرعه انا شايله هم الطفل وش بيصير فيه بينا
تقدم فيصل وهو يضحك : ههههههههههههههههه انا ما اقول الله يعينا عليه اقول الله يعينه علينا
اديم: من جد
قرب فيصل وجلس بجنب اديم وهو يهمس لها : اقولك سر !
لفت اديم بحماس: وشو قال فيصل وهو يناظر السقف : اذكر مره بعد زواجنا اتوقع بأسبوع صحيت وكنت نايم بحضنك هههههه صراحه صار الموضوع هذا بالنسبه لي حلم وجاي على بالي احققه
اديم :هههههه مو من جدك هذا سرك
ضحك فيصل : يعني صراحه كنت احاول كل ليله اعتذر بنواف واحتك لكن لم تزبط معنا
اديم : وشلون !؟
فيصل : يعني الشي اللي ما تعرفينه اني كنت اتعمد كل يوم انادي نواف رغم انه عادي ينام لحاله بس اني حطيته حجه
اديم : وليش كنت تتصرف كل هالتصرفات الهمجيه
فيصل : يعني انا اذا كنت معك لحالي اكيد ما ببين لك ضعفي فكنت اجيب نواف عشان اتصرف بهدوء غصب عني وتفكرينه تمثيل
اديم :هههههه حسبي الله ي فيصل
فيصل: مدري ليش كنت اسوي كذا بس اتوقع انها كانت بداية استسلامي
انفجرت اديم تضحك وهي تحاول تتذكر حركاته وماهي مستوعبه انه كان خاق معها لفت وهي مبتسمه: نقدر نحقق لك حلمك ومو بس بحضني بحضن طفلك
ضحك فيصل بحب وهو يحضنها وكان يدور على هالحضن من بعد وفاة امه واليوم حصله : اديم بكره بنروح مكان لازم نروح له من فتره
اديم : وين!!
فيصل :بكره تشوفين
اديم : بدينا
فيصل: استني ما بيطير المكان
اديم : ليتك ساكت الحين اقعد افكر فيه
فيصل رفع راسه وهو يبوسها: لا تفكرين بشيء فكري فيني بس ••

21 - 1 - 2022, 12:36 AM

..... 230 ......

من بكره في بيت ابو عادل صحى وهو يحمد ربي اللي رجع له عياله كلهم استغرب مكان سهام فاضي قام يدورها طلع للمطبخ وسمعها تكلم احد : ايه قام الزفت حسبي الله عليه لو ربي اخذ عمره وريحنا كان احسن .. ايه اديم رجعت معاه اااخ مقهوره مقهوره المشكله انه صحى وصحى معه شره لكن هين اذا ما طيرته من هالبيت ما اكون سهام
ابو عادل : سهااااااااااام
لفت سهام وطاح الجوال برعب : طلال
قرب ابو عادل بغضب الدنيا وهو يضربها كف : لا ي قليلة الخاتمه
سحبها من شعرها وهو يرميها برا المطبخ اخذ العقال اللي معلق ع العلاقه وجاء وهو الغضب ومعميه وطاح فيها ضرب : وانا اللي كنت ظالم فيصل طلع كل الكيد منك و تفاولين عليه ي اللي ما تخافين ربك
كانت سهام تصارخ ونزلوا الكل على صراخها وقف عادل بصدمه : يبه و ش صاير
فيصل اللي صحى لما صحته اديم ونزل بسرعه وهو منفجع من الصراخ تسمر مكانه اول ما شاف المنظر
نزل عادل يركض وهو يبعد ابوه عن سهام: يبه ليش تسوي كذا وش صاير
بعده ابوه وهو يصرخ : اسمعيني تقشين قشك وتنقلعين برا بيتي وانتي طالق
شهقوا الكل بفجعه نزلت اديم بسرعه وفيصل وراها
عادل : يبه تعوذ من ابليس فهمنا وش اللي صاير
دفه ابوه : تاخذها وتوديها لبيت ابو مشاري الحين
راح وتركهم والكل مصدوم اديم ركضت وهي تحضن سهام: سهام وش صار ؟
دفتها سهام بقوه وهي تصرخ: كله من سببك وسبب الزفت اللي وراك حسبي الله عليكم
مسك فيصل اديم قبل تطيح وهو من قوة الصدمه ماقدر يستوعب ولا حتى يدافع عن دايم يحاول يستوعب اللي صار ( اخيرا تطلقت سهام اخيرا )
اديم : فيصل تركني بشوفها
فيصل استوعب : لا مافيه تروحين لها اتركيها
اديم : فيصل هاذي عمتي
فيصل : عمتك من شوي حطت كل شي عليك اديم تعالي مافيه روحه
اخذها فيصل وهي تترجاه تروح لكن ما سمح لها ابد اما عادل اللي جلس وهو مذهول من اللي صار صح ما يطيق سهام بس ما توصل لطلاق صحى عليها وهي تقول : قوم اخذني لاهلي حسبي الله عليكم كلكم
عادل : نعم تكلمي زين احسن لك ماني سواق عندك
سهام بصراخ: سواق وابن سواق وكلكم سواقين
رد عادل بصراخ: اسمعيني زين احترمي نفسك وانقلعي برا
طلعت سهام وهي تصراخ وكان بطريقها نواف اللي جاي من عند منى ودفته وركض عادل وهو يرفعه: تأذيت
نواف: لا وش فيها هاذي
ابتسم عادل وهمس : ابشرك ولت
ضحك نواف : جد
عادل :ايه
وقف نواف بحماس وهو يضحك ويرقص بأستهبال : بروح اقول لفيصل
عادل مسكه: هوب هووب اديم فيه لا تنسى عمتها
نواف : بخافت فيصل
عادل :ههههه مايمدي
ريمان من وراهم : تعالوا نفرح مع بعض
ضحكوا كلهم واتجهوا لها بحماس وهم مستانسين وخصوصا ان ريمان ماتطيق سهام
••
•
اما عند فيصل اللي كان نفسه يصرخ من الفرح بس ماسك نفسه عشان اديم اللي كانت ضايقه على اللي صار بسهام وتبكي : ليش ماخليتني اروح لها ليش حرام عليك
فيصل: اديم انتي شفتي شلون دفتك ولا حسبت حساب انك حامل
اديم وهي تشهق : فيصل حرام هاذي عمتي ترضى انت على منى
فيصل : اذا كانت عمتي كذا اكيد برضى وبعدين سهام تركت كل الناس وحطت كل شي على راسك
اديم ماردت وهي تبكي نزل فيصل وهو يحضنها : ماعليه لا تضيقين كلنا بنعيش لحظه مره كذا
اديم رفعت راسها: الله يخليك خلني اروح
فيصل ضاق عليها كيف تبكي وقف وهو يتكتف : زين روحي
وقفت اديم ومسكها فيصل : ممنوع الركض
اديم وهي تمسح دموعها : طيب
نزلت وهي تدور على سهام بس ما حصلتها شافت نواف مبسوط : وين سهام
نواف بيتسامه غبيه: ولت
صدت اديم بحزن وطلعت للجناح قابلها فيصل وما تكلم لانه عرف انها راحت حضنها وهو يقول : لا تضيقين هي مكانها مو هنا اصلا
اديم :توديني لبيت اهلي
فيصل غمض : مو قلنا بنروح لمكان
اديم : بس ي فيصل
فيصل : انا ما امنعك تروحين لكن الحين انتظري السالفه حاميه والوضع متوتر وهي منهاره كل شي بيجي خصوصا انك زوجتي
اديم : شلون يعني
فيصل : خليها بكره او اي وقت يهدا الموضوع
اديم رجعت تحضن فيصل وهي ضايقه على اللي صار اما فيصل كان نفسه ينزل يحتفل مع اخوانه بس ماهو قادر
همس لها: نروح
اديم جلست بتعب : الله يخيلك اجلها مالي خلق
فيصل حسها تعبت: فيك شي
اديم : ولا شي بس اوجعني ظهري شوي
فيصل برعب : اوديك المستشفى
اديم :لا بنسدح شوي
فيصل حملها وهو يوديها لسرير اعطاها المسكن وجلس شوي لما نامت وهي ضايقه وقف وطلع شاف عادل ونواف وريمان مبسوطين طلع فوق الطاوله وهو يضحك: العتق ي جماعه هههههه
ركض له عادل ونواف وهم يحضنون بعض وينطون بحماس
فيصل : الحمدلله اول مره تزبط معنا بدون تخطيط
عادل: الحم... انقطع كلامه لما دخل ابوه وهو معصب : وديتها او لا
عادل :لا
ابو عادل بصراخ: ليش
عادل: مالي شغل مع امثالها
ابو عادل :انا وش قلت لك ؟

21 - 1 - 2022, 05:10 PM

..... 231 .....

عادل : يبه الله يخليك ماله داعي ذا اللي يصير سهام ما تستاهل احد حتى يقدر انها انسانه
جلس ابو عادل وهو يزفر بضيق دخلت منى تركض : طلال وش صار وش سويت حرام عليك حرام وش سوت عشان تسوي فيها كذا
وقف ابو عادل وهو يصرخ: بس بس قولي وش ما سوت سكت وصبرت عليها حيل وكل يوم اقول بتتعدل لكن بدون فايده
منى: وش سوت قولي
حكى ابو عادل كل شي لمنى وما اكتفى باللي صار اليوم وقال: وش بيكون ردك لو اقولك انها كانت تبي تطلع العيال من البيت وش بيكون ردك لو قلت انها تبي تعيش نواف معك او مع اخوانه وش بيكون ردك اذا قلت لك انها ماتبيك انتي تدخلين البيت أيش رائيك انها ما كانت تبي أديم ترجع علشان تصير لحالها ..
منى: ايش
ابو عادل : كنت ساكت طول هالفتره واحذرها ما حكيت لاحد عشان مابي اظلمها بس لين هنا وخلاص
فيصل تنح من اللي سمعه فعلا طلعت سهام حيه عادل ما توقع اي شي من ذا كله ولا منى
ابو عادل اللي كانت سهام تسوي كل شي وهو ساكت عشان ابو مشاري واديم وفيصل لكنها ما استوعبت وكانت فعلا حيه
جلست منى بصدمه: ي ربي وش صاير لهم الناس وش جاها منا عشان تسوي كذا
فيصل بهدوء: عشان بس تدرون ان عمر زوجة الاب ما تجمع الشمل
طلع فيصل اللي كان منصدم بس حمد ربه انه معاه حق لما حاربها عادل اللي كانت له صدمه قويه بعد اخذ ريمان وانسحب هو بعد دخل الجناح بصدمه
ريمان: ما اوصخها كل هذا تسويه ومحد حاس
عادل: لو قلنا تكره فيصل عادي فيصل اصلا مأذيها بس نواف وعميمه وش سووا لها
ريمان: كنت حاسه انها حيه من اول ما شفتها بس من فتره تأكدت
عادل لف بهدوء: اي فتره
ريمان بهدوء وهي خايفه يعصب: اوعدني ما تعصب
عادل : وش صار
ريمان: اوعدني
عادل : ريمان قولي
ريمان: يوم من الايام لما كان فيصل تعبان طلعت ابي ادور لنواف لكن شفت جناح فيصل مفتوح ورحت شفتها هناك مدري وش كانت ناويه تسوي لفيصل بس الاكيد شي يضره واول ما شافتني طلعت ركض ولا ردت علي
عادل بشك : متى ذا اليوم !!
ريمان: قبل شهر تقريبا
عادل : بعد ما جبنا جهاز الاكسجين ؟! ريمان: ايه
وقف عادل بغضب لانه عرف وش سوت ( لما فيصل كان تعبان كان كثير يتسبب ضيق تنفس فكانوا جايبين اكسجين وبيوم كان كل ماعادل شبك الجهاز يحصله مفصول عن فيصل ويرجع يضيق تنفسه ويغمى عليه احيان يحصل مفتوح في الهوا )
ريمان: تعرف وش صار
عادل طلع وتركها نزل عند ابوه ومنى: يبه
ابو عادل : نعم
عادل: فيه شي لازم تعرفه
ابو عادل : وشو
عادل: تتذكر لما نحصل جهاز الاكسجين مفصول عن فيصل او فالهواء مفتوح وبذلك يتسبب في اغماء فيصل
ابو عادل: ايه الله لا يعيدها ليش!
عادل: سهام كانت السبب
ابو عادل : ايش
منى: من قال كذاا •
عادل: ريمان شافتها مره هناك ومن بعد ماشافتها ماعاد صارت هالحركه معنا
منى: وليش ما تكلمت
عادل :هي ماشافت وش تسوي بالضبط بس اكثر من مره يصير اغماء لفيصل وتكون هي في الغرفه قبل
ابو عادل داخ من الصدمه مو معقوله انها كانت سبب اغماءات فيصل
منى: لا لا اا مو لذا الدرجه
عادل :مع الاسف !! كنت شاك بس اليوم تأكدت
منى وقفت وهي تحوم : يمه لا لا ي ربي وش ذا اللي يصير فينا
ابو عادل : اسكت اسكت لا يسمعك فيصل والا والله يسوي سالفه
عادل: ضروري نسوي سالفه اصلا يبه
منى: لا دخيلك ي عادل لا اخاف يخترب بيت فيصل من وراء القصه خلوها بينا تكفون والطلاق كفايه
ابو عادل وقف وهو بينجن خلاص : منى لمي باقي اغراضها وارسليها مستحيل يبقى لها شي عندي
منى : طيب طيب
طلع ابو عادل وهو مصدوم وماتوقع ان كل ذا بيصير من سهام اللي كانت لطيفة الشكل لكن داخلها خبيث
••
ظيمنع
اما في بيت ابو مشاري دخلت سهام وهي تبكي وتصارخ وقف الكل بصدمه الا مشاري كان متوقع مثل هاليوم
ابو مشاري: سهاام سهاام وش فيك
سهام: طلقني النذل الخسيس هو وعياله حسبي للله عليه وعليك اللي زوجتني اياه

مشاري: وش دخل ابوي انتي اللي وافقتي
سهام: انت اسكت كله من سبتك انت واختك اللي طاحت في الخبيث فيصل ونست كل شي
مشاري: انتي هيه انجنيتي وش دخلنا فيك اذا انتي متخلفه ومحد متحملك حتى اهلك
ابو مشاري بصراخ: مشاااااااري وجع اسكت واطلع
مشاري : سكت اختك يبه مو كل ما طاحت من مصايبها قالت انتم السبب
ابو مشاري : قلت لك اطلع
مشاري انسحب وهو يسب ويهاوش ومروى اللي تعودت على وضع سهام المزري انسحبت

21 - 1 - 2022, 05:10 PM

..... 232 ......

ابو مشاري : ابي افهم وش صار وبدون كذب وتزوير
سهام : طلقني عشان عياله اللي صايع واللي بزر
ابو مشاري : وش سويتي
سهام: ما سويت شي كله من تحت الزفت اللي اسمه فيييصل
ابو مشاري : وش سوى فيصل
سهام: يحرض ابوه عشان يطلقني
ابو مشاري : وبتقنعيني ان طلال صدقه وطلقك
سهام: ايه افترى علي عنده
ابو مشاري مسح وجهه وهو يقول : سهام انا تعبت منك وادري انك بتطلعين نفسك الصح كالعاده عشان كذا ادخلي غرفتك وانا اكلم طلال واشوفه
سهام : طلال كذاب وبيفتري علي
ابو مشاري بضجر: ببببس بسسس قلت لك روحي وانا اتصرف واتركي التصرفات الهمجيه هاااذي لين متى واحنا نغفر ذنوبك لين متى ونتحمل الدلع حقك على غير فايده انا متاكد ان سبب الطلاق سبب تافه من اسبابك
سهام : هذا الكلام لي ي اخوي
ابو مشاري : ايه لك حذرتك من فتره ما تسمعين كثر خيره طلال تحملك 7 اشهر الدلع حقك ماعاد ينفع وادخلي الغرفه احسن
دخلت سهام وهي تبكي وتتحلطم وجلس ابو مشاري وهو يرجف من عصبيته ام مشاري : الله يهديك ي ابو مشاري تعوذ من ابليس ليتك ماقلت لها كذا هاذي اختك الوحيده
ابو مشاري بصراخ: اختي الوحيده ما تركت لي وجه كل ما تتزوج رجال تجي متطلقه لسبب تافه اتركي طلال لاني متاكد انه ما طلق الا لشي قوي لكن الاثنين اللي قبله وش عذرها وش عذرها رجعت مره مطلقه عشانه ماهو فاضي يسفرها والمره الثانيه عشانه بيعيش امه معها وتقولين اختك الله العالم وش السبب اللي بتتطلق فيه الحين
سكتت ام مشاري وهي ماتدري وش تقول لان سهام ما تركت شي ينقال
••
•
عند رائد اللي كان بالمقهى وسارح يفكر بروان صحى على احد يبوس كتفه ضحك : غريبه مبكر
عساف : اول شي يسعد صباح العشاق الحلوين
رائد : يسعد صباح المستشارين في الحب
ضحك عساف : مو مشكله كم رائد يحب عندنا
رائد : شفيها عيونك حمرا
عساف: مواصل
رائد: مو من جدك عساف ارحم نفسك خلااص
عساف نزل راسه : لا تهتم بيمر
جاء فيصل من وراهم: وش اللي بيمر
رائد: فيصل اخيرا شفناك
فيصل ابتسم: ليه لهدرجة قطعتكم
رائد: ادق عليك من امس ماترد
فيصل سحب زقارة عساف: اوه انا من امس في دوامة احداث وش احداث الا قنابل
عساف: عوداً حميداً ي فيصلوه رجعت ورجعت معك الاحداث والمصايب قول قول اطربنا
فيصل تربع : اول بنسمع القنبله اللي بتمر عندكم وبعدها قنابلي
عساف : مافيه شي قول بس
رائد : لا فيه احب اقولك ان صاحبك الموقر له تقريبا شهور وهو ما ينام الليل وباقي زارع في راسه انه الذنب في وفاة هذاك الشخص
فيصل تنهد وهو يناظر السقف : وبعدين يعني !! عساف تكلمنا مليون مره انت مالك شغل ربي كاتب له يموت اوك انت ما انتبهت لمهنتك كويس بس في النهايه هذا مقدر ومكتوب شيل هالفكره من راسك
نزل راسه عساف: صوت الاجهزه باقي براسي مو قادر انام خياله يقتلني ي دوب انام شوي بالنهار وبعد مو تاركني
فيصل طفى زقارته بغضب : عسااف احذرك للمره الاخيره انت مالك شغل استوعب استوعب خلاص شيلها من بالك فكر انك بتصير احسن بالايام اللي جايه
رائد : اول شي بتسويه ترجع لوظيفتك تنشب بالاطباء الماهرين لما تتعلم وبعدها تقدر تكفر عن هذا لما تساعد ناس كثير
عساف : لا تدوخوني موضوعي منتهي
فيصل ضرب على الطاوله : ما انتهى وبعد ما نطلع من هنا بتاخذ اوراقك وترجع للمستشفى انتهى
زفر عساف بضيق لف فيصل لرائد : غيره
رائد : اليوم بيجي يخطب نسرين رسمي
ابتسم فيصل وهو يدق عساف : هذا دافع بعد ركز
عساف كان ساكت ورائد يشرح لفيصل تفاصيل الخطبه : كويس زين اليوم نجتمع ببيت عمي وربي يتمم
عساف: حلو خلصنا مني وجاء دور رائد
رائد تنهد : بحكي كل شي بس لا تطقطقون
فيصل ضحك : يلا يلا
ابتداء رائد يحكي سالفته مع روان وعن اللي عرفه عنها وهنا انفجروا فيصل وعساف يضحكون : الحين بتقولي حبيتها لما شفتها بالسوق مع جدي ههههههه
رائد : وش فيها
عساف : ههههه فيها راجع حساباتك اخاف الادميه بويه
رائد ضرب جبينه: ابتدت السماجه
وبعد طقطقه وضحك قرروا يصيرون جدين
رائد :فيصل من جد اتكلم انا فكرت فيها بشكل جدي ابي تكلم اديم تشوف وش وضع البنت
فيصل وهو يشرب كوب الشاهي : بسأل بس ابيك تنتظر يومين كذا
رائد :ليش
فيصل: اتوقع هاليومين الاوضاع متوتره ما تتحمل نقاشات
عساف: لا تقول رجعتوا للمشاكل
فيصل : لا ي رجل بس .....ههههه ابوي ط ل ق سهام هههههه
عم السكوت بصدمه ولا فيه الا صوت ضحكته اللي عبت المكان
رائد : يعني انت مره مستانس ؟!

21 - 1 - 2022, 05:11 PM

.... 233 .....

فيصل: وليش ما استانس عمري راح وانا اطارد وراء ابوي وقرار زواجه ضيعت كل شي حتى نفسي عشان ابعدها وما تبيني استانس اقل شي اسويه اني استانس الحين بس اقدر اروح لامي واقول هذا انا
عساف بهدوء : وهاذي مو خطوه خطيره على حياتك
فيصل: لا اصلا هي ما خلت اي خطوره انهت كل و طلعت يعني تقدر تقول اني بهاذي ما تعبت نفسي
رائد : انت ما تخاف من ذنبها ًضحك فيصل : اي ذنب الله يخليك الادميه الشر اللي فيها يغطيني عشرين مره اتوقع لو فكرت فيني بأمر جدي وحصلت فرصه ما استبعد تذبحني
عساف : كيف ؟!!
فيصل ابتداء يحكي اللي قال ابوه لكن ما كان يدري انها فعلا كانت بتذبحه عساف ورائد كانت الصدمه ماهي سهله عليهم
عساف : متاكد انها هي !! الادميه كانت هاجده
فيصل : الحمدلله اني كنت صح ولا احتاج ضميري يأنبني
رائد : اقولك شي !؟ هالاايام بديت استسلم لافكارك
ضحك فيصل وهو يوقف : هههههه قد قلت لك ما وصلت لهالمرحله من عبث
عساف : وين !؟
فيصل: بروح لاديم ما اقدر اخليها لوحدها كفايه منهاره عشان هالزفت
عساف: انت ارفق بعد في النهايه عمتها
فيصل : زين يلا فمان لله
طلع فيصل وهو بداخله مايدري هو مع مين لازم يكون يزعل عشانه اذى سهام كثير او يفرح لانها طلعت من هالحياه
••
•
اما عند ابو عادل اللي طلع واتجه لابو مشاري في مكتبه وهو ماهو حزين الا على ابو مشاري دخل وشافه جالس وعنده جهاز الضغط وقف اول ماشافه وهو مبتسم بضيق :اجلس حياك ي طلال
جلس ابو عادل وهو ضايق : مدري وش اقولك بس انا متاكد انك بتنصفني ي ابو مشااري ويعلم الله اني تحملت عشانك كثير
ابو مشاري نزل راسه بضيق : يمكن اني بعذرك قبل اسمع عذرك لكن ابي اسمع يمكن في يوم اطلع غلطان بحق سهام
ابو عادل ما عرف من وين يبدا لكنه بدا بكل شي وسط ذهول ابو مشاري من كل اللي سمعه ابو عادل : يعز علي انقلك مثل هالشي لكن انا اسف فعلا وبكره بتوصل ورقتها
طلع ابو عادل وترك وراه ابو مشاري اللي ضاع وجهه بسبب افعال سهام سحب جواله بتعب وهو يدق على مشاري : مشاري خذ سهام وسلمها عمك وقوله ابوي يقول وكلتك وتصرف انا تعبت وانا ادافع
سكر جواله وهو يستند للمكتب وهو ياخذ حبوب الضغط جلس وهو خلاص زهقان من سهام وافعال سهام
اما مشاري اللي رجع للبيت واتجه لغرفة سهام شافها جالسه بكل ثقه : البسي عبايتك وجيبي شنطتك يلا
سهام : قوله ما راح ارجع له
ضحك مشاري بسخريه: للاسف احب اقولك انه ماسأل حتى عنك واتمنى تستعجلين
سهام اعتدلت بخوف : وين بتوديني!
مشاري اخذ الشنطه ورمى عليها العبايه : اتمنى انك ما تعقدين الموضوع وخلصيني
رفضت سهام تلبس وابتدت تطرده طلع مشاري ورفع جواله ودق على ابو نوره وهو يقوله اللي صار وان سهام تطلقت للمره الثالثه ولازم يجي ياخذها وطبعا هاذي فرصه ينتظرها ابو نوره اللي جاء ركض واخذها وسط صراخها وبكاها
ام مشاري : مشاري ليش سويتوا كذا
مشاري :ليش تبيني انتظر لما تخرب بيت الكل سهام خرابة بيوت يمه خرابة و قلت لكم من اول يوم جت فيه
طلع مشاري وهو مرتاح للي صار واتجه لمكتب ابووه
••
•
اما عند اديم اللي صحت وهي تدور لفيصل بس ما حصلته وقفت وهي تلبس عبايتها بضيق ودخل فيصل :اديم فيك شي
اديم : وين كنت
فيصل : قريب فيك شي
اديم : وديني لبيت ابوي
فيصل انفجع : ليش!!
اديم :لا تخاف مابروح بس اتطمن على سهام
فيصل : ماله داعي تتعبين اتصلي على امك وهي تطمنك
اديم : بس بكلمها انا اكيد شايله علي
فيصل : بالناقص منها
اديم لفت بضيق : بتوديني او لا
فيصل : زين عشانك بس
وقفت اديم وهي تلف طرحتها بضيق همس فيصل بجنبها: يعني مع انك شينه وانتي مكشره
اديم لفت له : مره مو وقتك
فيصل تكتف ببتسامه : وش رايك لو اقول بتروحين بس اذا ضحكتي ومو اي ضحكه لا هاذيك الضحكه اللي ماعاد اشوف عيونك
اديم ابتسمت بضيق : يوه ي فيصل والله مو وقته
فيصل جلس : مره خلاص لا تحاولين
اديم :اوف ي فيصل مو وقت الضحك
فيصل : بكيفك بتروحين اضحكي
لفت اديم لما حسته معند وهي تبتسم ابتسامه غبيه بس انه ماعاد شاف عيونها
انفحر فيصل يضحك : يالله لا تقولين بيجي ولدي غبي كذا
ضربته اديم وهي تضحك: والله له منك نصيب
وقف فيصل ونزلوا واتجه لبيت ابو مشاري وبعد ما وصلو لف فيصل: اول شي انتبهي لنفسك ولا تقربين عشان ما تسوي زي حركتها اليوم وتأذيك طيب ولا تطولين اوك انا بنتظر هنا
اديم : طيب

21 - 1 - 2022, 05:12 PM

.... 234 .....

نزلت اديم ودخلت شافت امها جالسه بضيق واول ماشافتها وقفت: اديم وش فيك يمه
اديم راحت لها وهي تحضنها : يمه وينها سهام
ام مشاري : وش تبين فيها يمه ليش جيتي وانتي تعبانه
اديم : اكيد سهام زعلانه مني مفكره اني دبرت هذا كله لها انا وفيصل
ام مشاري : ي يمه انتي تعرفين سهام لك ذنب والا مالك ذنب بتحط السالفه على راسك وبعدين يمه هي اللي جنت على نفسها
اديم : طيب وش السبب
ام مشاري : ما ادري ابوك طلع لابو عادل ومشاري من شوي جاء هو وعمك ابو نوره واخذها
اديم شهقت: عمي اخذها ي ويلي عليها وش بيصير فيها
مروى: يصير فيها اللي لازم انه صار من زمان وقد قلت لك لا تعطينها اكبر من حجمها شوفي كيف قلبت عليك
اديم بضيق : يالله وش بيصير !
ام مشاري : اديم اهم شي فيصل كويس
تنهدت اديم : فيصل ماله شغل بمشاكل ابوه هذا شي من زمان اعرفه بس حبيت اتطمن عليها
انفجعوا على صوت الهواش اللي برا طلعت اديم وهي تركض شافت ابو نوره وفيصل متناشبين وركضت :فيصل وش صار فيصل
محد رد عليها والهوشه قايمه اتصلت ام مشاري بمشاري اللي رجع فورا للبيت ركض وهو يفككهم : خير وش صاير خير
فيصل بصراخ: اسمعني خذ هالمجنون من قبالي ولا يبتليني بدمه
ابو نوره : اذا فيه احد بيبتلى فهو انا
مشاري:اووه خير وش اللي صاير
قطع عليهم سيارة ابو مشاري اللي نزل وهو باين على وجهه تعبان: خير وش اللي يصير هنا
مشاري : مدري يبه
ابو نوره اتجه لابو مشاري : انت كيف تسمح لواحد مثله يرجع بنتك ويدخل بيتك
ابو مشاري : وش صاير تكلم جمدت قلبي
ابو نوره : يطلق اديم ويذلف من هنا ولا نبيهم ولا نبي عايلتهم
فيصل : يمه كأني مره ميت عليك
مشاري : قصروا اصواتكم فضحتونا
ابو مشاري : ادخلوا جوا ادخلو
دخلوا المجلس واديم بجنب فيصل صرخ ابو نوره: انتي كيف تجلسين معه قومي من هنا
فيصل : مشاري سكت هالزفت لا وربي مايفكه مني الا الموت
ابو مشاري : اششش فيصل وش صاير
فيصل بأنفعال: وش دراني عن هالمختل انفلت علي يصارخ مدري وش علته
ابو مشاري : ابو نوره وش صاير من دون غلط
ابو نوره : وش اللي ماهو صاااااير هالخبيث ما يجلس هنا
مشاري : اول نفهم وش صاير
ابو نوره : هو ورا كل شي صاير مع سهام وهو مسبب لها كل المشاكل
فيصل : واو مره اكشن صراحه بستين داهيه انت واختك ومشاكل اختك
مشاري : وش اللي تسبب فيه ابي افهم مشكلتها مع زوجها فيصل وش دخله
ابو نوره : هالحقير اللي تدافعون عنه كان يتحرش فيها ولما ماعطته وجه وهددته راح يعبي راس ابوه عليها لما طلقها
عم المجلس بالسكوت ولا فيه الا شهقة اديم وبعدها وقف فيصل وهو يضحك ضحك هستيري وبعدها صرخ وانقض على ابو نوره وكفخه تكفيخ ولا احد قدر يبعده الا بعد ما صرخت اديم وهي تبكي : خلاص ي فيصل ابعد عنه ابعد
فيصل ابتعد وهو ماسك راسه : يالله وش ذا الخبل يالله انت صاااحي بعقلك تسمع اللي ينطقه فمك تسمع انا اتحرش بسهام والله عجب سهام ومالت عليك وعلى سهام وعلى هالحجه الفاجره انا اتحرش بزوجة ابوي وعمة زوجتي هههههه يالله يالله
ابو مشاري لف لابو نوره وهو يصرخ: وانت جاي هنا مصدق هاذي الحجه الغبيه وتصارخ بها .... سكت وهو يحط يده على راسه : اطلع من هالباب ولا تفكر ترجع منه لا انت ولا سهام
ابو نوره: تطردني عشاانه
وقف ابو مشاري وصرخ وهو يقول :ايه اطردك وبقولك اختك اللي انت تدافع عنها هاذي افعالها ...ابتداء يعدد كل شي سوته سهام
فيصل كان منجلط من افعالها وخصوصا انها سبب عذابه لما كان تعبان
اما اديم اللي جلست وهي تبكي
طلع ابو نوره من صدمته ووقف فيصل واتجه لاديم جلس جنبها: اديم حبيبي قومي قومي معي نروح المستشفى احسن
اديم :مابي اروح مستشفى
ابو مشاري راح لها وهو تعبان: اديم معليش يبه اسمعي كلام فيصل وسهام شيليها من بالك ويبدو ان كل شي سويته عشان اعدلها ما نفع معها
اخذ فيصل اديم وطلع فيها وجلس مشاري : يبه سهام سوت كل ذا معقوله
ابو مشاري: ايه ايه ي مشاري مع الاسف ضاع وجهي بين الرجال بسببها
مشاري : قلت يبه من اول يوم قلت لك ما سمعتني
ابو مشاري : وش كان بيدي اسوي هاذي اختي
قرب مشاري وهو يبوس راسه : لا تضيق يبه ربي بيجازيك خير ان شاء لله
تنهد ابو مشاري وطلع وترك مشاري اللي حاقد على سهام •••

المواضيع المتشابهه لموضوع: عيونك شوكة في القلب توجعني و عبرها للكاتبة ديم الراشد مكتملة لموضوع: عيونك شوكة في القلب توجعني و عبرها للكاتبة ديم الراشد مكتملة
الموضوع	كاتب الموضوع	المنتدى	مشاركات	آخر مشاركة
حروفك سرقتني من بين الحضور اهيم بك دهرا ولا اكتفي للكاتبة ثرثره صامته مكتملة	همسه الشوق	همس للقصص وحكايات وروايات	42	11 - 7 - 2024 07:31 AM
عزاي إنك رجاي العذب لو كل الدروب عثور للكاتبة اديم الراشد	همسه الشوق	همس للقصص وحكايات وروايات	85	19 - 2 - 2022 08:50 PM
وظائف بشركة الراشد عبد الرحمن الراشد إدارية لحملة الدبلوم و فوق بعسير	همسه الشوق	همس للوظائف في جميع القطاعات	2	20 - 10 - 2021 05:06 PM
ياشجون القلب لو تدري بإن قلبي يعشق عيونك	حنين الأشواق	همس الشعر والقوافي	4	30 - 9 - 2021 03:25 AM
روايه خاني وذليته للكاتبة مشاعل الراشد	جروح الم	همس للقصص وحكايات وروايات	65	8 - 6 - 2018 01:24 PM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

عيونك شوكة في القلب توجعني و عبرها للكاتبة ديم الراشد مكتملة

همس للقصص وحكايات وروايات