عيونك شوكة في القلب توجعني و عبرها للكاتبة ديم الراشد مكتملة

21 - 1 - 2022, 05:13 PM

..... 235 ......

اما عند فيصل اخذ اديم للمستشفى وتطمن عليها وبعدها طلعوا وهو للحين بصدمه واديم متفشله من اللي صار معهم : فيصل انا اسفه بالنيابه عن سهام وربي مصدومه ما توقعت انها تسوي كل ذا
لف فيصل: اشش ماله داعي كل هذا انتي مالك شغل بسهام ومن فتره طويله قلت لك انتي مو سهام طيب اتركيها تسوي اللي تبي في النهايه هي خسرت
اديم مسحت دموعها وهي تشهق : يعني كل ما افكر انها كانت مستغله طيحتك ومرضك وكانت تضرك انقهر والله
ابتسم فيصل وهو يبوس عيونها : ماهمتني ولا تنقهرين ولا تشيلين هم هذاني معك وبخير والباقي انتهى خلاص
سكتت اديم وهي فعلا تحمد ربي انه ما صار له شي فيصل : نروح المكان
ابتسمت اديم : نروح
غير اتجاهه فيصل واخذ طريقه وبعد شوي وصل جمدت اديم لما شافت المكان ولفت له : فيصل مو من جدك
فيصل : ليش
اديم : لا لا مقدر مقدر ي فيصل
فيصل : افاااا ما تبين تسلمين على امي
اديم جمدت : الله يخليك ي فيصل اخاف انا مقدر ادخل بالمقبره
فيصل سكت شوي واخذ بخاطره : زين انا بنزل خليك هنا
حست فيه اديم ولفت له: استنى بنزل معك
فيصل ابتسم: لا تخافين انا معك
نزلت اديم وهي خايفه من دخلتها بس عشان فيصل دخلت مسكت فيه بقوه وهي خايفه تقدم فيصل وهو عارف طريقه زين وقف عند قبر امه وهو مبتسم : يمه هذا انا جيت بعد غيبه ادري زعلانه عشان غبت عنك فتره طويله لكن والله مو بيدي اسف يمه على اللي بقوله..... ابتدا فيصل يشرح كل شي لامه وكأنها حيه وتسمعه واديم مصدومه كانت بس تبكي ماهي قادره تسوي شوي لف لها فيصل : وهاذي يمه اديم قلت لك عنها ادري زعلتي مني فؤ البدايه بس الحين احنا بخير وننتظر طفل يمه ابتسم وهو يحضن اديم : الحين يمه عرفت وش معناته كلامك لما قلتي ( خل الحب يدورك لا تدوره ) اديم سلمي على امي
شهقت اديم وهي تناظره بأستغراب ولا تدري وش تسوي ابتسم فيصل وهو يقول : عادي كلميها تسمعك واذا تبين تشكين لها مني تسمعك
ماقدرت اديم تقول شي وخافت من طريقة كلامه ابتسم فيصل: ما يحتاج خلاص هي اصلا تعرفك حكيت عنك كثير
ما ردت اديم اخذها وفيصل وطلعوا بعد ما ودع امه بطريقته
ركبت اديم السياره وهي ما زالت خايفه ومصدومه وفيصل يناظرها بهدوء :ادري انك ضقتي بس معليش انا وعدتها اجيبك لها
اديم :لا عادي بس خفت لاني اول مره اجي هالمكان
فيصل تنهد : معذوره عمرك ما عرفتي الفقد اكيد بتخافين
سكتت اديم بحزن على ضيق فيصل على امه وكمل فيصل طريقه وهو ساكت
••
•
المغرب الكل كانوا مجتمعين في بيت ابو محمد دخل فيصل بهدووء :سلاام
الكل: وعليكم السلام
الجد : فيصل وراك تأخرت
فيصل : كنت نايم
محمد : انت ماعندك الا النوم
رائد مسك فيصل وهو يهمس : عديها عشان عساف
مارد فيصل ووقفوا يستقبلون الناس ودخل عساف ومعاه عدنان اخوه وبعد السلام والسؤال عن الحال تكلم عدنان : احنا ي عم جايين طالبين يد بنتك لولدك عساف على سنة الله ورسوله
ابو محمد اعتدل وهو يقول: والله ي ولدي عساف مافيه مثله اثبت لنا انه رجال ونعم الرجال بوقفته مع فيصل ورائد ويشرفني انه يكون زوج لبنتي عشان كذا اقول عطيته والله يتمم على خير
ابتسم عساف وهو يقوم يبوس راسه: والله يقدرني اكون عند حسن ظنك
ابتداء الكل يبارك لعساف وجاء فيصل وهو يحضنه بضحك:متأكد لما حبيت راسه
عساف : ههههه غصب علي
ابتعد فيصل وهو يضحك وجلسوا والكل مبسوط وحدوو الملكه تكون الاسبوع الجاي ( طبعا محد استغرب ان ابو محمد ما اخذ رائي نسرين لان ابو محمد ما ياخذ رائي احد )
••
•
عند نسرين اللي جاء رائد يبارك وبعد ماطلع سمعت عادل ينادي لريمان عشان بيسافرون انهارت تبكي لما سمعت صوته جلست وهي تشهق بضيق اديم جات تشرب مويه وشافتها تبكي : نسرين فيك شي
لفت نسرين بسرعه وهي تمسح دموعها: لا لا
طلعت وتركتها استغربت اديم لكن قطع عليها اتصال فيصل : هلا فيصل
فيصل: ي روح فيصل والله
ابتسمت اديم : ههههه اووه ي روقان من شوي الدنيا فوق راسك
فيصل : ايه المفروض خلاص بس اسمع صوتك احس الدنيا كلها بخير
اديم: ههههه وينك
فيصل: برا بتجلسين والا اخذك للبيت
اديم: لا بطلع الوضع مره كئيب
فيصل ابتسم: زين يلا
لبست اديم وطلعت شافت فيصل وعساف ورائد برا وقفت وجاء فيصل وهو يضحك اخذها وطلعوا للجناح لف فيصل : وش فيك وش تفكرين فيه
اديم :تعال اجلس بقولك شي صار
جاء فيصل وهو مستغرب : وشو
اديم : بسالك نسرين محد اخذ رايها صح بالزواج ..

21 - 1 - 2022, 05:13 PM

...... 236 ......

فيصل : الا رائد قبل كل شي كلمها ليش
اديم : من شوي دخلت المطبخ وحصلتها منهاره تبكي وخفت عليها صراحه حتى ما ودعت ريمان
تنهد فيصل : ماعليها تتعود
اديم: فيه شي صح !!
فيصل : مو شي مهم
اديم : اها بكيفك ... اقدر اطلب شي
فيصل : انتي تامرين ي اديم قلبي
ضحكت اديم : عادي ننزل تحت غرفتك
فيصل : عادي بس ليش!!
اديم : يعني قلت تحكي لي اشياء كثيره عنك وعن ذكرياتك فيها دخلتها قبل بس صراحه خفت حسيتها مليانه اشياء وذكريات
ضحك فيصل :من ناحية مليانه فهي مليانه وابشري ننزل ليش لا
نزلوا تحت واول ما دخلوا اجتاحتهم ريحة عطر الغرفه اللي كان مميز بس واضح انه نسائي بحت ابتسم فيصل وهو يشم العطر: هذا عطر امي
دق قلب اديم: محتفظ فيه للحين
فيصل : مو هو نفسه يعني كل ما انتهى اجيبه مجرد ما اشمه احس براحه
ابتسمت اديم وهي تناظر الغرفه اللي كانت كبيره بس مزحومه وكانت كل ما تمر من عند شي تسأل ويحكي فيصل لما وصلت عند سناره خياطة وشغل ما اكتمل باقي لفت له : وهاذي !!
ترك فيصل اللي بيده واتجهه لها بخطوات ثقيله اخذها من يدها : هاذي .. هاذي اخر ما تركت امي كانت تحب تشتغل كثير تحب الخياطه .. لما توفت كان هذا الشغل ما اكتمل كانت كاب لي بس ... صد وهو يشتت نظره بالغرفه : اعرف اكلمها لكن تركتها كذا ناقصه مثلي تماما
ندمت اديم انها سألت حضنته وهي تقول : اذا تحب اكملها انا
ابتعد فيصل :تعرفين !!
ابتسمت اديم : شوي وانت تكمل بما إنا صرنا واحد
بدون اي سابق انذار طاحت دمعه من عين فيصل اللي غمض وصد وهو يكافح باقي دموعه لف وهو يتكلم بصوت مخنوق : ماهي مشكله نكملها
جلس وهو يتنفس بسرعه وحست اديم انه صعب عليه الذكريات: خلاص نطلع
فيصل رفع يده : لا كملي انا بخير
حاولت اديم تطلع بس رفض فيصل وكملت وهي نفسها مسدوده شافت دولاب فيه ادويه كثيره وحست انها لامه وانسحبت بهدوء وهي تدور بين الاغراض
شافت اشياء كثيره واشياء غريبه لكن اللي استغربته اكثر وماقدرت تسكت ما تسأل : فيصل هذا ايش
وقف فيصل واتجه لها وضحك من بين دموعه اللي ماقدر ابد يمسكها : هذا كان قرية طين تعبت امي وهي تعلمني ابنيها بثبات ولا تطيح وتخترب لاني مع كل مره تخترب احوس الدنيا وازعل واعصب وازعج الكل كل يوم كنت اتعلمها لكن ما زبطت معي الا قبل وفاة امي بيومين اذكر اني من فرحتي ما نمت وماكنت ابي احد يمسكها عشان ما تخترب وقررت امي تحطها بقزاز عشان مايصير لها شي لكنها ما طولت صامده انهارت بعد ما انهرت انا وفقدت كل شي بعد وفاة امي .. ضرب الطاوله وهو يشهق بضيق : مو بس انهدمت القريه انهدم فيصل وانهدمت كل احلام.... انقطع صوته لما ارتفع صوت شهقاته وانهار يبكي اديم جمدت فعلا جمدت عمرها ماشافته يبكي ولا توقعت انهياره بذا الطريقه نزلت له بسرعه وهي ترفعه : فيصل فيصل تعوذ من ابليس الله يخليك فيصل انا اسفه ما توقعت بتتعب كذا فيصل
ما قدر فيصل يسيطر على نفسه او حتى يتحكم بكت اديم معاه وهي تحاول انه يهدي بس ابدا مافيه فايده بعد ما تعب وانهد حيله رفع راسه وشاف اديم وجهها احمر من البكي خاف عليها لا يصير لها شي : اديم اسف اني تعبتك ما كان..
اديم : اششش لا تقول شي محد يلومك ي فيصل انا اللي اسفه ما كنت ادري بتنهار
وقف فيصل وهو يسندها : من غير شي كنت محتاج هالانهيار والا كنت بموت
اديم؛ بسم للله عليك
فيصل اخذها وطلع وقفل الغرفه اتجه الجناح وهو يحس انه ارتاح شوي اديم : فيصل اذا فيك شي انادي عمي ياخذك المستشفى
فيصل جلس وهو يسحبها تجلس وانسدح بحضنها وهو يغطي عيونه بيدينها : لا لا انا كذا بخير لا تخافين ..ابتسم بحزن: بتتعودين على هالمنظر
بلعت اديم ريقها بخوف وهي تقرا عليه : شلون بتعود !!
فيصل : يعني لا تاخذين على قوتي وصوتي العالي وحركتي الزايده وضحكتي وراها اشياء واشياء محد غيرك شافها ولا احد بيشوفها
حست اديم بمدى ضعف فيصل وخوف من الفقد : لهدرجه كنت متعلق في امك ؟
فيصل: مو بس متعلق انا كان يومي يبتدي بشوفتي لها وينتهي بحضنها عمري ما توقعت غيابها كنت كل ما احتاجها احصلها صعب علي اليوم اللي دورتها ما حصلتها انكسر ظهري لا تسأليني ليش كنت مهووس وحريص على ان محد ياخذ مكانها لما كانت فيه ما كنت احصل فراغ لي ما كنت ازهق اشياء كثيره ما كنت اعرفها واول شي عرفته بعد ما راحت وصار عقده بالنسبه لي : اني ما اتعلق بأحد ..

21 - 1 - 2022, 05:14 PM

..... 237 .....

كمل فيصل كلامه واديم ماهي مستوعبه كيف كل هالحزن مخبى ورا شخصيته وضحكه وهباله كمل كلامه لين غفى وهو باقي فيه تناهيد الحزن واديم اللي ما نامت وهي تراقبه
••
•
بعد اسبوع طلق ابو عادل سهام نهائيا وافتك منها ومحد زعل ابدا على طلاقها اما رائد اللي عرف عن روان كل شي وقرر انه يخطبها اما عساف اللي كان جاهز للملكه ورجع لوظيفته وابتدا من جديد عادل اللي كان مبسوط مع ريمان ومرتاح للاخر وخصوصا انها كانت حامل وهذا شي طيره بالسماء وخلاه محد بفرحته والكل فرحان
اما عائلة ابو مشاري اللي متفشلين من فعلة سهام ومحد له وجه يقابل ابو عادل واهله
فيصل اللي كان مكمل حياته مع اديم وهو ما توقع انه بيوم من الايام بيوصل لهالمرحله من السعاده واديم كذلك
••
•
في جناح فيصل اللي كان يلبس ويجهز للملكه ارتفع صوت جواله بأتصال رائد : هلا ي رائد
رائد: فيصل فيه شي ضروري ابيك تساعدني فيه
فيصل: وشو
رائد: روان
ضحك فيصل: هههههه وش فيها
رائد : بخطبها كلم اديم تكلمها تعطيني رقم اي احد من اهلها اخطبها منه
فيصل : اوووووه اوووه اوووه
رائد : وش فيك
فيصل :خلاااص قررت
رائد : ايه
فيصل : فكرت زين ترا البنت خبله عندي منها نسخه
رائد : مالك شغل
فيصل:هههههه زين زين بكلمها غيره
رائد : احبك
فيصل:وعع ي شينها
رائد : مقبوله ي عديلي
فيصل انفجر يضحك وسكر ولف وهو يدور لاديم راح الغرفه الثانيه دخل :اديم فيه سالفه قو......... اووووه اووووووه اوووووووووه
ضحكت اديم وهي تتخصر: كيف وش فيك
فيصل قرب بهدوء وهو يمسح عيونه: لو سمحتي ي مزه شفتي لي زوجه حامل حالتها حاله ونفسيه اتذكر دخلت هنا
اديم تكتفت وهي تناظره بطرف عين:يقالك ظريف
ضحك فيصل وهو يبوس خدها: هههههه لا بس اهون على نفسي
اديم قرصته بقوه وصرخ فيصل : ايه الحين صرتي زوجتي اللي اعرفها
اديم صرخت: فيصل
ضحك وهو يبوس راسها امزح وش فيك وبعدين وش هالجمال ما تخافين الله فيني يتيم ومسكين ذنبه كبير ترا
اديم : هههه حلوه بس ترا حتى الانسانه الحامل في ذنب بعد
فيصل : وش سويت انا
اديم سحبت للمرايه: كل هالجمال والزين وتقول وش سويت
لف فيصل وهو يضحك : هههههه وش اسوي عشان اكفر الذنب
سكرت اديم عيونه: عيونك هالحلوه لا تفتحها تدري ليش
فيصل :ليش!؟؟
اديم: عيونك شوكة بالقلب توجعني واعبرها
ابتسم فيصل وسحب يدها وهو يبوس : وش تركتي لي عشان اقوله
اديم كانت بتتكلم بس قطع عليهم اتصال رائد زفر فيصل بضيق وقال: قبل هالخبل بيخطب صاحبتك الخبله خليها تعطينا رقم احد من عايلتهم يتواصل معه تراني انقلب خطابه
انفجرت اديم تضحك : زين زين بقولها اليوم المهم ماقلت لي كيف شكلي احس شكلي غلط بالكرشه
فيصل خبط جبينه وهو يعض على شفايفه : شوفي اقسم بالله لو ما كانت ملكة عساف مايشوفون وجهي ولا وجهك حتى كرشتك هاذي ي بنت ي بنت الحلال خافي الله فيني وفي بنات الناس انتي قولي لي وش تركتي للخلق
ضحكت اديم وهي تخبي وجهها: طيب اطلع احسن لنا
فيصل اسرع وهو يبوسها وطلع وهو مغمض لفت اديم تكمل شكلها وهي مستانسه
••
•
اما عند نسرين اللي كان تجهز وهي كل شوي تبكي وتخرب شكلها رمت الكوافيره الفرشه بغضب : الله يخليك خليني اشتغل
ام محمد : نسرين قلبي وش فيك يمه تعوذي من ابليس
نسرين تنهدت وهي تاخذ نفس : خلاص يمه بس مدري ليش فاجأتني دموعي
ام محمد قربت وهي تبوس راسها: معليش يمه عساف كويس صدقيني اعرفه ابن حلال وبيسعدك
نسرين صدت وهي تحاول انها تكون بخير
دخلت ريمان وهي بيدها تفاحه : يمه ضروري اتصلح
ام محمد : ريمان خلصينا انتي عروس وهاذي اول طلعه لك ضروري تتصلحين
ريمان: قلت لعادل قال مو لازم
ام محمد :انتي خلاص سحرك عادل عادل وش عرفه يمه رجال ما يعرف هالامور اتصلحي وتعوذي من ابليس
ريمان تنهدت وجلست وهي ماتبي وكل شوي كان يتصل عادل يتطمن عليها ونسرين متقطع قلبها حزن
••
•
في بيت عساف اللي كان فرحان عشان بيتزوج بس مو فرحان بعروسته صحى على صوت عدنان :مبروك مبروك
لف وهو يحضنه : بدري على المباركه
جات امه بالعود وهي مبتسمه : ان شاء الله زواج الدهر يمه
ابتسم عساف وهو ياخذ العود : ان شاء الله يمه
عدنان :يلا استعجلوا تاخرنا
عساف: يلا يلا
طلعوا وعساف يدعي انه يفرح معها ويعيش بسلام ••

21 - 1 - 2022, 05:14 PM

..... 238 .....

الليل بالحفله بعد ما تمت الملكه الحمدلله عند اديم وروان كانت روان مبسوطه وترقص وتستهبل فاجأتها اديم لما حكت لها عن رائد انصدمت روان :اديم وش تقولين انتي صاحيه
اديم : شوفي فيصل كلمني من فتره وصراحه ما قالي ما اقولك
رووان: اديم صاحيه قلت لك عنه ليش ما تكلمتي
اديم : قالي ما اقولك
روان : انتي كل شي يقوله تنفيذنه لو مره بس اصدميني وقولي طنشت
اديم : مو مشكلتنا الحين وش قلتي
روان حطت يدها على راسها : انتي تدرين مافيه الا عمي ومريض وساكن بالشرقيه من وين اجيبه
اديم ابتسمت : يعني تبين رائد
روان تلعثمت : هبله انتي من قال
اديم : شمعنى كلامك؟! بتفهميني ما اهتميتي من يوم اعلن حبك
ابتسمت روان بهيام: يعني حلو ان احد يحبك كذا من دون سابق انذار
ضحكت اديم : عطيني رقم عمك
روان انحرجت وطلعت جوالها وهي تعطي اديم الرقم جلست بحماس وهي ما تدري ليش ارتاحت له
••
•
اما عند عساف اللي دخل لنسرين بهدوء يعكس خوفه وارتباكه سلم وتقدم وقف جنبها وهو ساكت وابتداء يلبسها الشبكه وهو ساكن ونسرين كذلك رغم انه منجذب لجمالها لكن يدري انها ماهي معاه ابدا طلعو الكل ونسرين منزله راسها ودموعها معبيه عينها تنهد عساف وقال: ادري انك مفكره اني تزوجتك انتقام لو ابي استغل سرك او انك اذا ما تزوجتيني بفضحك لكن احب اقولك تشيلينها من بالك ادري انك مو معي ابدا بس ابقولك عساف معك ما تزوجت نسرين اللي تحب عادل تزوجت نسرين اللي بتكون حبيبة عساف
رفع راسها وبكت نسرين بصدمه من كلامه باس جبينها وهو يمسح دموعها: اتمنى ما تنزل عشان احد لا انا ولا غيري وانا ما اطلب منك تتخلين عن نفسك لكن عطينا فرصه
انسحب بهدوء وانهارت نسرين من كلامه توقعت انه يكسر الدنيا على راسها بس طلع غير وقفت وهي تدق على رائد يجي ياخذها للبيت لانها تعبانه واول مادخلت ارتمت وهي تبكي بحرقه على حظها
اما عساف اللي طلع وهو يحاول يصدق انه مو متضايق من حبها لغيره بس ماعنده الجراءه انه يخوف بنت او يستغلها
اتجه لفيصل وسحبه وطلع برا فيصل: بسم الله وش فيك خلعت كتفي ياخي خف علي ترا انا بصير ابو احتاج كامل اعضائي
عساف مارد فيصل : اووف يبدو انه صار زلزال وش فيه
عساف : اجلس واسكت
جلس فيصل وهو مبتسم وهو يدري ان عساف اذا ضاق يجيبه يجلس ويسكت لين ينفجر ويتكلم وبعد شوي انفلت عساف وهو يسب ويهاوش لكن سكته ضحك فيصل :خير وش فيك تضحك ؟
فيصل : اقولك شي انت ناسيه
عساف: وشو
فيصل: لا تسوي نفسك مصدوم وتوك تدري انت قررت تخطبها وانت عارف علة قلبها اللي المفروض تسويه الحين مو تجلس وتتلحطم وكإنه شي عادي عساف هاذي حياتك مصيرك لا تغلط غلطتيي لكن حاول انك ما تجلس تندب حظك لا اشتغل على انك تمحي عادل من حياتكم وتصنع عساف طيب
عساف سكت وهو يقول : واضح انه ...
سكته فيصل : اششششش واضح انه سهل لا تقول صعب ابد انت على يدينك صفيت البنات ملايين مو قادر على نسرين وبعدين هاذي احسن فرصه ولا تنسى انك تقول دايم ( اذا تبي بنت تحبك بسرعه دور على المجروحه والحزينه )
عساف : تقول !!
فيصل : اقول ونص
وقف عساف وهو يضحك : ياخي ليتك صاير ابو من زمان ومنك فايده
ضحك فيصل ووقف: والله انا مستغرب اني صرت اقول حكم
دفه عساف وراح وتركه ورجع فيصل وهو مستانس ومبسوط
••
•
عند رائد اللي اول ماشاف فيصل جاء ركض واول ماشافه فيصل انحاش وصارت اشكالهم فضيعه وبالاخير مسكه : فيصل وجع والله لو ابي منك سلف ما سويت كذا
فيصل : هههههه اذيتني ي اخي
رائد : وش قلت لك انا
فيصل: كلمت اديم قالت بكلمها وللحين ماردت شسوي لك
رائد : اسألها
فيصل :معليش زوجتي حامل مقدر ازعجها بالاتصالات
رائد :فيصلوه حسبي الله عليك انت خلقه نذل وجاء لك سبب
تو فيصل بيتكلم ودقت اديم
رائد بحماس:رد رد
فيصل بطرف عين :وشو خير خير زوجتي والا زوجتك
رائد. اووه معليش
فيصل راح بعيد وهو يضحك : هلا ابوي واهلي كلهم
رائد : تعقب !!
فيصل : انت بتطس والا شلون
رائد :خلص موضوعي وبعدين لو تبي تفدي المملكه كلها مافيه مشكله
اديم:ههههه قوله اني جبت رقم عمها هو الوحيد وتراه بالشرقيه رجال مريض
فيصل : رائد تقولك البنت ماعندها احد كلهم ميتين وغير كذا ما تبيك
رائد شهق :هاه !
انفجر فيصل يضحك : بسم الله عليك لا تموت علينا امزح امزح

21 - 1 - 2022, 05:16 PM

..... 239 .....

رائد حذفه بالجزمه وفيصل يضحك : تقولك مافي الا عم بالشرقيه وبيموت قريب الحق او لا تلحق
رائد : بذمتك
اديم انفجرت ضحك:حرام عليك
فيصل : والله وهذا رقمه 05..........
اخذ رائد الرقم وراح وفيصل باقي يضحك عليه
••
•
انتهى اليوم والكل مستعد يرجع لان وراه احلام تنتظره وكل واحد رمى عن عاتقه همه عند
فيصل واديم اللي اول ما دخلت ارتمت بتعب : اتكسرت رجولي يالله
ارتمى فيصل بجنبها: راسي بينفجر صدااع
اديم : فيصل
فيصل لف وهو يدفن وجهه بشعرها المتناثر : عيونه وروحه وقلبه وكل شي
اديم ابتسمت: لا تضيع الموضوع كذا
فيصل :زين وش هو موضوعك
اديم : شوف امس حلمت اني جبت بنوته تجنن ي فيصل وتحمست لها صراحه
ضحك فيصل وهو يبوس بطنها: طيب !!
اديم : اقول يعني اذا جبت بنوته وش بنسميها
رجع فيصل ينسدح وهو يضحك : ادري ما تحبين اسم فدوه
اديم تورطت : مو كذا بس
فيصل كمل يضحك: لا تموتين ما بزعل ادري اسم وحده ما تطيقينها مو عشان امي
اديم :هههههه الحمدلله خفت تفهم غلط
فيصل :لا كنت عاارف وعشان كذا احب اطمنك واقولك بنسميها حنين
قطبت اديم :حنين !
فيصل: ايه حنين احب هالاسم كثير
اديم :وانا بعد احبه
فيصل: بس احب اديم اكثر
قرب لها وهو بيموت من حبها لكن ابتعد لما اندق الباب : يالله مين
نواف: انا
فيصل وقف وراح للباب : اوف ي نواف وش فيك
نواف كان واقف وهو لابس بجامته ووبتسامه غبيه: ابي اديم
فيصل:نعم
نواف دف فيصل ودخل وراح لاديم سكر الباب فيصل وهو مصدوم :خير انت لا احم ولا دستور ومن سمح لك تدخل ما تستحي تدخل على زوج وزوجته
نواف : والله مو شغلك اديم قالت اذا زهقت ارفس الباب وادخل
فيصل: ايه عشانه على كيفك انت واديم لو سمحت لم نفسك واطلع والا والله
اديم : فيصل شفيك عليه وش سوا لك جاي عشاني
فيصل رفع حواجبه :انا ابي انام مابي ازعاج
اديم:نام هاذي الغرفه محد بيزعجك وبنجلس هنا ونسولف
نواف: لا بنلعب بس بدون صوت
اديم ابتسمت وهي تحضنه: ابشر من عيوني
فيصل انقهر: هيه انا بنام هنا مابي ازعاج وبعدين انت ترى صرت رجال واديم بتتغطى منك
اديم انفجرت ضحك عليه وقفت وراحت وهي تهمس له: بسم الله عليك وش فيك لا ينط لك عرق
نواف وقف وهو متكتف : لا ما بتتغطى مني
فيصل :نوافوه اديم حامل تبي تنام وترتاح وهذا يعني اقلب وجهك
نواف: عادي بنام معها
فيصل :ايش لا لاااااا الحين اعلمك شلون تنام
وقفت اديم وهي تخبي نواف وراها: فيصل وش فيك عليه ترا صغير
فيصل بطرف عين: يلا بس قالت صغير
اديم بتحدي : بينام عندي وبس
فيصل نزل لها : وشو تتحديني يعني
اديم اخذت نواف وراحت وهي تنسدح وتضمه بحضنها: بكيفك فكر اللي تفكر المهم بينام معي
ضحك نواف ضحكه مستفزه وهو يحضن اديم وفيصل انقلب وجهه احمر : نوافوه اذا عدت كلامي تدري وش بيصير فيك هيا لم نفسك وابعد ضايقتها انسانه حامل ترا ما تتحملك
نواف: شتبي وش حارك انت وبعدين اديم انا مضايقك
اديم : لا بالعكس
نواف :يعني انت مضايقنا
فيصل رفع حواجبه:اييييش
اديم ضحكت : خلاص لا تطولها وتعال من شوي تعبان بتنام
فيصل لف بزعل : مابي انام مع ناس مستفزين
ضحكوا بأستفزاز ورجع فيصل وهو يدف نواف وجلس بجنب اديم : احترم نفسك نوافوه والا وربي انادي ابوي واقوله انك مقتحم خصوصيتي
جاء نواف ودف فيصل وجلس بجنب اديم : انا اقول تنام ازين
انحمس فيصل منه وقام وهو يتحلطم :زين زين انا بسكر كل النور وانام ولو يجي لكم جن الارض كله ما تصحوني ولا اسمع ازعاج ولا حرف فاهمين ماني مسؤول عن اللي بيصير
سكر كل النور ورجع لمكانه وهو اصلا مايحب الظلام وخايف وانسدح بقهر اما نواف واديم اللي ما طقوا خبر وبعد نص ساعه بطبيعة الوضع كانوا تعبانين ونام نواف ولف فيصل لما حس انه نام سحب الجوال وهو يكشف:اديم صاحيه
اديم : ايوه وش تبي !!
كشف فيصل على نواف وشافه غاط بسابع نومه سحبه بشويش وبعده على طرف وجاء مكانه واديم تناظره بذهول : لا تقولي من جد غيران من نواف
فيصل حط عينه بعينها وهو رافع حاجبه : قلت لك ايه غيران وبغار لين اموت
اديم: فيصل مجنون انت اخوك هذا وبعدين بزر
ابتسم فيصل بهمس : حتى ولدي اللي ببطنك انا غيران منه
ضحكت اديم وهي ماهي قادره تصدقه :وربي مجنون ..

21 - 1 - 2022, 05:17 PM

..... 240 .....

سحب فيصل ذراعها وهو يحاوط فيه نفسه : ومن جهه ثانيه تقدرين تقولين ما احب الظلام
اديم : انت متاكد انك صااحي رجال شكبرك تخاف من الظلام
فيصل : ايه ما احبه واخاف منه ولا احب اجلس به لحالي
ضحكت وهي تحضنه وهي تشوف ان مافيه فرق بينه وبين نواف بالحال
••
•
اما رائد اللي بأسرع ما يكون اتصل على عم روان وكان شايب تعبان وطلب انه يشوفه وقبل طبعا وتواعدوا بعد يومين يجي رائد لشرقيه رمى نفسه وهو يحس انه فرحان حتى لو ماعرف عنها كل شي بس يكفي انه بيتزوجها
••
•
اما عند عادل اللي كان طول ماهو في الطياره وهو ساند ريمان اللي اول ما اقلعت الطياره وابتدت تتعب وترجع بعد شوي هدت وعادل خايف فعلا : ريمان حبيبي انتي كويسه
ريمان : احسن من قبل
عادل: هانت كلها ساعه ونوصل وترتاحين
ريمان: والله لو عارفه بيصير فيني كل ذا ما حملت
تنح عادل وبعدها انفجر يضحك عليها ولفت ريمان تناظره بحزن: حرام عليك تضحك عشان مو فيك ولا انت حاس بشي من اللي فيني
باس يدها عادل وهو يضحك باقي : والله حاس بس ضحكتيني بكلامك وكأنه شي بقرارك هذا شي ربي كاتبه
دفته ريمان وهي تتحلطم وعادل يضحك
••
•
وبعد 5 شهور في جناح فيصل اللي كان نايم وصحى على صراخ اديم ونواف نط مثل المجنون وركض برعب : اديم وش فيك اديم
اديم اللي كانت جالسه وهي تصرخ وتبكي : الحقني ي فيصل بموت بولد بولد
صرخ فيصل مع صراخها وجاء ابو عادل يركض وفتح الباب:فيصل وش فيكم
فيصل لف لابوه برعب : اديم بتولد
ابو عادل: اسرع خذها للمستشفى وانت تصرخ مثل الحريم
انفجع فيصل وركض لها وهو يحملها ويغطيها بالعبايه ونزل بسرعه ومعاه ابوه وقابلتهم منى اللي رمت اللي بيدها: اديم يمه وش فيك
فيصل صرخ: بنولد بنولد
منى: هااااه
فيصل : اقصد بتولد عميمه ابعدي
ركضت منى معاهم وطاروا للمستشفى ومن هناك جاء ابو مشاري وام مشاري واتعبى الممر منتظرين وفيصل يدور مثل المجنون وبعد فتره طلعت الدكتوره وهي تضحك :مبروك جابت بنوته وهي بأحسن حال
صرخ فيصل وهو ينطط ويضحك والكل يناظر فيه ويضحكون كان حماسه مو طبيعي بالقوه سلم عليهم ودخل بسرعه لاديم لما خرجت من العمليات شافها نايمه وهي تعبانه باس راسها وطلع ركض للحضانه دخل مع الممرضه ومعاه منى ويده ترجف شاف بنته صغيره وجميله حيل ضحك بحب وهو يلف لمنى ويحضنها: الحمدلله ي عميمه الحمدلله
ابتسمت منى وهي تبعده اخذت البنت بحب وهي ترفعها لفيصل : شوف ما اجملها
ضحك فيصل وعيونه مليانه فرح مختلط بدموع : بعد عمري شوفي كيف صغيره عميمه
منى: خذها
فيصل :لا لا اخاف اطيحها ماعرف احملها
منى : اجلس اجلس
جلس فيصل ويده ترجف حطتها منى بحضنه ورفعها وهو خايف حضنها بشويش وهو يمسح دموعه: يا ليت امي شافتها ي عميمه
منى خبطت على كتفه: الله يرحمها بالجنه تشوفها ي حبيبي
تنهد فيصل بفرح: الحمدلله على كل حال
دخل من وراه ابو مشاري وابو عادل وام مشاري واخذوها وهم فرحانين فيها ومبسوطين ولاحظوا دموع فيصل بس محد علق
••
•
عند عساف اللي طلع من شقته اللي اثثها وهو مبسوط انه انتهى من كل شي وينتظر يوم زواجه اللي هو ( بعد اسبوع ) ضحك لما شاف رائد متصل: هلا يالحبيب
رائد: هلا ي النسيب كيف امورك
عساف: عااال شصار معك
رائد : خلصت اليوم كل شي باقي نروح لفيصل لا يسوي سالفه
عساف: ايه ادق عليه ما يرد
رائد: زين توكل بروح اطمن على الحب
عساف: الله معو حبيبي
سكر رائد بحماس ودق على رقم حفظه عن ظهر غيب يحبه حيل ويحب صاحبته ردت روان بحب : اهلين ي مزعج اهلين
رائد:افااا انا مزعج
روان: ايوه مزعج قلت لك قبل الزواج مابكلمك ولكن ما تسمع هذا زواجنا بعد اسبوع ومصر تدق
رائد بهمس :لاني احبك
ضحكت روان: لا تحاول بسكر الحين وراي مليون شغله
تنهد رائد: اصلا حبيت اسمع صوتك بس
روان: بعد مازبطت هههههه
ضحك رائد : زين يلا وعدنا الاسبوع الجاي
روان : زين
رائد :احبك
روان ضحكت: وانا احبك
سكر رائد وهو مبتسم ولف لما حس احد وراه وشاف نسرين واقفه: اذا خلصت بتوصلني الصالون
رائد :نوصلك ليش ما نوصلك كم عندي نسرين
ابتسمت نسرين بحزن واتجهت لسياره دق جوالها وردت : الو
عساف: اهلين بالحلوين كيفك
نسرين: الحمدلله وانت
عساف : انا وش فيني
نسرين: كيفك
ابتسم عساف: حالي من حالك

21 - 1 - 2022, 05:21 PM

..... 241 ......

اختبصت نسرين اللي ماهي عارفه كيف ترد على طيبته اللي مغرقها فيه فهم عساف سكوتها وقال: المهم اتصلت بقولك ان مع رائد حاجه لك انتبهي لا ياخذها عليك
قطبت حواجبها : وايش هي
عساف : اذا شفتيها تعرفين مع السلامه
سكر وجاء رائد وبيده هديه سكرت نسرين عيونها وهي تتنهد بألم رائد: خذي هاذي من عساف
اخذتها وهي تمسح دموعها وابتدت تفتحها وابتسمت على العقد اللي جابه لها كان فخم وناعم بنفس الوقت تنهدت وهي تسحب جوالها وكتبت رساله وهي ترجف لكن تحاول ترد شي لعساف يطيب خاطره وبنفس الوقت تعطي نفسها فرصه ( عساف مشكور على العقد تعبت نفسك ي روحي مره اعجبتني )
عساف شاف الرساله وكان يتوفى من الفرحه رد بسرعه وهو مبتسم ( ولو ي عين عساف يرخص لك الغالي )
سكرت نسرين لما صفر رائد : وصلنا ي كناري
ضحكت ونزلت لصالون وهي تستعد انها فعلا تلتفت لعساف وتترك عادل اللي لو مدري وش يصير مستحيل يكون من نصيبها
••
•
اما عند اديم اللي صحت على ازعاجهم وفيصل ونواف اللي كأنهم ضراير انتبه فيصل انها صحت و قرب وهو مبتسم ويضحك: جعل والله ما يصحى غيرك
اديم ابتسمت وهي تناظر حولها : وش جبت
فيصل : حنين
ضحكت اديم بفرح لانها رفضت تسوي سونار تبي تشوف اذا ولدت انتبهت لوجود الكل حولها
ابو مشاري : اديم يبه الحمدلله على السلامه وتتربى بعزكم
ابو عادل : الحمدلله على السلامه ي اديم
نواف اقتحم الجو وركض وهو يحضن اديم: الحمدلله على السلامه ادوم
فيصل طارت عيونه وهو يصرخ : نوافوه ي خبل قم فارق من هنا الادميه تعبانه
نواف مارد وهو يرجع يحضن ريم وقف فيصل وسحبه ورماه عند ابوه : يبه امسك ولدك عني ترا ازعجني ازعجني
ابو عادل: وش تبي انت هو عند اديم
فيصل :ي سلاااااام واديم تعبانه
منى وقفت وهي تشد اذن فيصل : انت مافيه احد مثلك على الغيره
فيصل تكتف وهو يهز رجله : انتم وش تطلبوني زوجتي ترا
قطع عليهم دخول الممرضه بالبنوته ركضوا كلهم عليها بفرح وفيصل خاق عليها اخذتها ام مشاري واعطتها اديم اللي على طول بكت اول ماشافتها
فيصل لف لنواف: شوف مستعد اخليك تجلس عند اديم طيب وتنام بعد واذا تبي تجلس مع البيبي بعد مافي مشكله
نواف تكتف : والمقابل
فيصل : تطلع لي خطه نوقف فيها سيل الدموع
ابو مشاري : لا تراهن ولا تعذب قلبك ما بتوقفها عجزنا قبلك
فيصل لف لاديم مسحت دموعها وهي تضحك البنت في حضنها نسى كل شي بيقوله وهو يناظرهم بحب ترك كل شي وراح جلس بجنبهم
والكل ماهم مستوعبين ان فيصل صار ابو قطع عليهم اتصال عساف اللي اول ما بلغه فيصل بالخبر فجر السماعه صراخ وماهي الا دقايق وجاء رائد وعساف وهم فرحانين طلع لهم فيصل وحضنوه كلهم بفرح ويباركون له
رائد : فيصلوه جيبها بنشوفها
فيصل : معرف احملها والله
عساف: قول لاي احد يجيبها بشوفها
دخل فيصل وهو مبتسم اتجه لابوه وهو واضح ان وراه شي : يبه
ابو عادل: خير وش وراك
فيصل :معليش تاخذ حنين بيشوفونها برا
ابو مشاري: سميتها حنين
فيصل ابتسم: ايه حنين ان شاء لله
منى: مو حلو ي فيصل
فيصل ضحك : ادري مو حلو مره بس له معنى عندي وعند اديم
ابو عادل : وانت ليش ما تحملها
فيصل: شوف يبه انت تعرف عمري ما حملت بزر وبعدين يعني انا ما علي احملها بس تعرف عساف ملقوف بينط علي وبعدين يطيحها انا اقول انت احملها وانا احميك
ضحك ابو مشاري : انت مستعد تإلف مليون قصه المهم ما تطلع ما تعرف
ضحك فيصل وقف ابو عادل اخذ حنين وطلع وفيصل عايش دور البدي قارد
هجموا عساف ورائد على ابو عادل وهم يبوسون في حنين
فيصل : هييييه انت وياه ابعدو اكلتوا بنتي ما تتحمل بوساتكم
عساف: فيصلوه كأنه ضيعت نفسك
رائد : بقوه
فيصل ضحك : يعني الانسان يخاف على بنته
عساف: هين عطني سنه بس وتشوف اذا ما جاء طفل يغطي على بنتك
رائد : وانا بعد
ضحك ابو عادل : ايه بدا التحدي يعني
فيصل: يؤسفني اقولكم بتفشلون بنتي سر محد يسوي زيها
عساف غمز لفيصل: متأكد
ابتسم فيصل وهو يضربه ورجعوا لحنين وبعد شوي جاء عاادل اللي كان طااير من الفرحه عساف : ايه جاء الثاني شهالعيال ي عمي ماشاء الله واحد يستلم واحد يسلم باقي ننتظر دور عادل وطفله
فيصل رفسه وعادل شده من شعره: ودك تحضر عرسك مكسر صح
عساف: وجع كسرتوني ي متوحشين
ابو عادل: اذكر الله لا نسحب بنتنا ونتركك تجلس

21 - 1 - 2022, 05:22 PM

.... 242 ......

عساف رفع يده وانسحب : ابد ماشاء الله تبارك الله
انتهى وقت الزياره وابتدوا الكل يروحون شوي شوي ولا باقي الا فيصل اللي مو قادر يروح من عند اديم ناظرته اديم : فيصل انتهى وقت الزياره ترا وبيجون يسحبونك الحين
فيصل : نفسي ابات عندك مو مطاوعني قلبي اترككم
اديم: ي دلوع امي راحت بتجيب اغراض وبترجع يعني ماعلي خوف
فيصل: افهمها طرده يعني
ضحكت اديم:لا بس روح وبكره من بدري تعال
فيصل : اوك افترضي ان امنت بالله ورحت كيف ادخل البيت لحالي من دونك
اديم : خذ نواف معك
فيصل حذفها بشماغه: انتي وش بلاك متصحره اقل شي ردي علي بحب ورومانسيه
اديم انفجرت ضحك: والله ياخي انسانه طالعه من ولاده ومزاجي زيرو وش تنتظر مني
فيصل : يعني بتجلسين 40 يوم تعيدين الهيكله بالاحساس
ضحكت اديم:هي بالضبط
ضحك فيصل وقرب وهو يبوس جبينها :انتبهي على نفسك اوك واي شي يصير دقي على اوك
اديم : اوك
طلع فيصل وراح للحضانه ناظر في بنته من بعيد وهو مبتسم وطلع وبوجهه للمقبره دخل وهو مبسوط اسرع لقبر امه وجلس نزل وهو يبوس التراب : يمه اليوم ربي رزقني بنت يمه يووه يمه ليتك شفتيها جمييله يمه حيل جميله بس تدرين سميتها حنين هههههه يمه شفتي كيف صرت فرحان وسعيد توقعت اني بعدك ما اشوف الايام الحلوه بس الحمدلله
وقف وطلع وهو مبسوط لاخر المراحل دخل البيت بحماس وطلع بسرعه لجناحه وشاف نواف هناك تكتف وهو مبتسم: عطيتك وجه صح
نواف: اصلا ما تقدر تستغنى عني
فيصل نط جنبه: فتره شهر وبعدها بتظف وجهك
نوااف: ماهي مشكله اظف وجهي وبعدها اروح ازوج ابوي
ضحك فيصل : ماهمني انا خلاص عندي بيت وعيال انت اللي بتروح فيها
جاء عادل من عند الباب : هل تسمحون لي بالدخول
فيصل : غريبه خرجت من وكرك
عادل: تقدرون تقولون عزوبي الليله
نواف: وينها خبلتك
عادل: احترم نفسك
فيصل : جاوب وبعدين نتفاهم معه لانه مره مطينها
عادل : عند امها
فيصل وقف وهو يدق اصابعه : على الله توكلنا
نواف نط وهو يدري انهم بيكفخونه وركض وراه عادل اللي مسكه وثبته واهذ فيصل كوب الحليب اللي كان بالطاوله وكبه عليه ونواف يصارخ وطبعا نذالة فيصل حاضره كب الباقي على عادل وانقلبوا عليه طلع وهى يصارخ بضحك ويركض وطلع ابو عادل على الصوت وتخبى وراه فيصل وعادل ونواف اللي كان قاصدين فيصل وبالغلط انكب الشاهي على ابوهم وصرخوا كلهم
فيصل : اوووووه اووووه يبه لا ترضى الهزيمه ردها لهم العاقين
جمدوا نواف وعادل وخايفين ان ابوهم زعل وصرخ ابو عادل: تعال هنا انت وهو نزولو وهم ساكتين وقفوا قباله وراح ابو عادل بعد ما هزأهم ورجع وبيده سطل مويه وكبه عليهم وهو يضحك استوعبوا انه متفق مع فيصل وابتدت حرب المويه والصراخ عبى البيت والضحك وبعد ساعه دخلت منى على صوتهم وهي تركض مفجوعه شهقت لما شافت حالة البيت اللي يرثى لها وقفوا لما شافوها وهم يضحكون منى: لا ي ربي انجنيتوا انهبلتوا هاذي افعال يسويها ناس كبار وعقال
عادل: وش فيك ي عميمه جالسين ننبسط وفرحانين ومستانسين
منى : وش تستانسون هااه طلال وش صار لك ي ابن الحلال وش صار مو معقوله انت تسوي كذا
فيصل نزل من فوق وهو يبوسها : وش فيها عميمه الانسان وده يرفه عن نفسه
منى: اسكت انت انا مستعده احلف انه من تحت راسك انت
ضحك فيصل وانسحب وهو كب عليها شوية مويه وركضت وراه وهي تتحلف فيه
وبعد شوي وقفوا وهم يضحكون ووقفت منى : شوفوا مزحنا استانسنا الحمدلله الحين يلا بتساعدوني بالتنظيف
فيصل انسحب : انا انسان تعبان بنام
عادل: وانا بعد
ابو عادل : وانا
انسحبوا كلهم وتركوا منى ونواف يحوسون بالبيت
••
•
عدا الاسبوع واحواله كانت جدا جميله فيصل اللي كان 24 ساعه مسنتر عند اديم وبنته ومسوي حوسه عليهم اما عساف اللي كان فرحان فرح الدنيا وهو يشوف نسرين بهالاسبوع متغيره حيل وصايره كويسه معاه حمد ربه ان اموره تعدلت قبل الزواج
اما رائد وروان هالاثنين كانوا متفقين بشكل فضيع وكأنهم يعرفون بعض من سنين وامورهم ماشيه تمام
اديم كان الحال بها جدا سعيده اوك زعلانه على سهام وماتعودت على غيبتها بس وجود فيصل ومشاغباته اللي تنسيها وين هي ومن معاها مخليتها ناسيه الدنيا
اما عادل اللي كان مكرس كل حياته لريمان وطفله الجاي وريمان اللي كانت ماهي قادره تستوعب كمية السعاده اللي هي فيها واخيرا حصلت السعاده اللي انحرمت منها ••

21 - 1 - 2022, 05:22 PM

..... 243.....

يوم الزواج في جناح فيصل اللي كان واقف يراقب اديم لفت اديم وهي مبتسمه:لو مخليني عند اهلي ما كان احسن
فيصل : لا ما كان احسن وبعدين انا مابي احضر شي مهم كذا وماتكونين جنبي
ابتسمت اديم وهي ترجع ترتب شكلها وسكرت عيونها بقوه اول ما سمعت صوت حنين اللي بكت من بوس فيصل : يوه ي فيصل وقتك تصحيها
فيصل تورط ما توقعها تصحى: اسف والله ما توقعتها بتصحى
اديم : اصلا وش ذا البوسه مسكينه اوجعتها
فيصل اتكى وبعبط : ليه حاسدتها ابوها وببوسها والا معلنه تخصيص للبوس انه لك بس
اديم قربت واخذت حنين وتقدمت وهي تحطها بحضن فيصل ؛ ايه ما دام حاسدتها ي ابوها سكتها انت
راحت وتركت فيصل اللي تورط ولا عرف يحملها : اديم تعالي خذيها ترا بطيحها
اديم : مو شغلي انا حاسدتها
ضحك فيصل وقام وهو يمشي بشويش : ي بنت الناس امزح معك خذيها والله معرف اتصرف
طنشته اديم وراحت تلبس ورجع فيصل يمشي بشويش وجلس برعب وهو يحاول يسكتها وقطع عليه دق الباب :مين
منى: انا
فيصل :تعالي عميمه حياك
منى: شفيها تبكي
فيصل؛بستها وبكت
منى سحبت اذنه : وانت ماتعرف تبوس زي الاوادم حرام عليك باقي بزر توجعها ترا
اديم طلعت : ايه قوليله ي عميمه كل ما اقوله يقول حاسدتها
ضحكت منى وهي تاخذ حنين من فيصل: يلا انا باخذها تحت وانتم اجهزوا ترا تأخر الوقت
طلعت منى وتركتهم تقدم فيصل وهو يدندن بصوته وراء اديم اللي مطنشته وقرب وهو يحضنها: يعني شوفي المفروض ما تزعلين يعني انا لو مكانك بحسدهم وبغار حتى اني حسدتها
اديم :وتقول لا احد يقولي مجنون
ضحك فيصل وقرب وهو يبوسها وفجاءه ضرب الشباك وفز فيصل برعب واسرع وفتحها شاف عساف ورائد تحت: خير
عساف: انزل يلا راح الوقت
فيصل : باقي بودي اديم
عساف: اخلص باقي بنروح نسوي لنا اشغال
فيصل : يلا وجع
سكر ورجع وهو يدور اديم بس تفاجاء انها لبست عبايتها ونزلت سحب شماغه وهو مقهور ونزل : عميمه وينها اديم
اديم طلت من ورا: وش فيك
فيصل : وين عقالي !
اديم ؛ على الكنبه
فيصل: ما حصلته
اديم: انا بنفسي تركته لك
فيصل: ما حصلته
منى: اطلعي دوري له ي حبيبتي هذا زين مو مضيع نفسه
طلعت اديم وطلع فيصل واول ما دخلت المصعد دخل فيصل وهو مبتسم اديم : وش فيك
فيصل طلع عقاله من تحت الشماغ وهو باقي مبتسم اديم : مو من جدك
مارد فيصل اللي وقت المصعد وقرب وهو مشتاق لها اكثر من اي وقت ثاني باسها بشغف طلع فيه كل شوقه من اول ما عرفها وابتعد وهو يقول : معليش ي ام حنين احتاج دافع يخليني اكمل يومي
ضربته اديم بقهر لانه خرب مكياجها وطلعت وهي تصلح مكياجها ونزلت بقهر وطلعوا للقاعه
••
•
الساعه 1:30
اكتمل الحضور والكل تواجد بالقاعه والكل مستانس عند الرجال كان عساف ورائد يستقبلون التهاني وسط طقطقة فيصل اللي كان واقف بينهم وهو فاغر يضحك طول الوقت
اما عند الحريم كان الجو جدا جميل ورايق بدون اي ازعاجات والكل بعد مبسوط
فوق عند نسرين اللي كانت هاديه نوعا ما لكنها خايفه من حياتها من عساف وكيف بتواجهه اليوم وهو يدري بكل ماضيها
اما روان اللي كانت مبسوطه ولا فيه شي منكد عليها الا انها وحيده مافيه احد من اهلها دخلت اديم وهي مبتسمه: عروستنا كيفها
وقفت روان وهي تحضن اديم بحزن: الحمدلله تمام بس شوية توتر
اديم :ههههه خليك هاديه لا تحوسين نفسك وبعدين انتي تعرفين رائد كويس ماله داعي تتوترين
روان نزلت راسها بضيق : مدري احس اني ضعيفه بدون اهل
اديم :اششش لا تقولين كذا احنا اهلك افا عليك بس
روان ابتسمت وهي تحضن اديم بحب دخلت مروى وهي تصفق بحماس : مبروك روان
حضنتها روان وهي فرحانه بجمعة اهل اديم حولها
••
•
اعلنوا دخول عساف ورائد وكل واحد راح لعروسته عساف اللي تجمد ولا قدر يدخل كل شي فيه يرجف حس انه تردد وخاف من اللقاء الصعب بالنسبه له كان وده ينسحب ويروح لفيصل بس صحى على صوت امه : عساف ادخل يمه
تقدم بخطوه ثقيله ودخل واول مارفع راسه غمض بقوه واخذ نفس ( اااااااااااخ مني اااااخ وين رميت نفسي انا وين واضح ي عساف انك خسران واضح ) تقدم وهو يسحب رجوله باس راسها وهو يقول :مبروك
ماردت نسرين واعلنوا بداية زفتهم ومسكها وتقدموا لسلم اللي بينزلون منه واول ما تخصص الاضاءه عليهم وصدحت انغام الزفه شدت نسرين على يده :عساف ..

21 - 1 - 2022, 05:23 PM

..... 244 ......

لف برعب وهو اول مره يخاف من احد يناديه: نعم
نسرين : اسفه على كل شي صار ادري انك مو قادر تنسى اللي تعرفه وادري انك مو متقبل الماضي ادري ضايق لكن من جد اسفة انا تعلقت بسراب وصحيت على نفسي بفضلك اوعدك عساف ان مهما طال الزمن فيني مايرجع عادل لقلبي واوعدك ان ماغيرك بيكون فيه واوعدك اوفيك حقك كامل ومشكور على اللي جالس تسويه وتتحمله
بلع عساف ريقه وهو وسط صمت مذهل وقلبه اوجعه من طريقة اعتذارها كملت نسرين : واوعدك احبك
غمض عساف وهو يسوي كل ترتيبات الزفه بكل انطواعيه وعقله مو معه ومجرد مبتسم لا غير وخافت نسرين من صمته وبعد ما تصوروا وطلعوا توجهوا للفندق وعساف ما نطق ولا حرف
••
•
عند رائد اللي كان عكس عساف كان يسابق الخطوات عشان يوصل غرفة روان دخل وهو مبتسم واتسعت ابتسامته لما شافها واقفه وحولها حريم بس ما عرف الا اديم اللي تقدمت ووقفت قباله وهي تقول : رائد بوصيك بشي ولازم تستوعبه زيين روان لازم تكون بعيونك ولاا تزعلها ولا تضيق خاطرها مهما كان السبب واعرف انه لو ضاقت بتحصل قبالك شي فوق طاقتك
رائد رفع حاجبه وهو مبتسم : تهديد واضح وصريح ي فيصل 2
اديم : ادري بتحفظها لكن النصيحه بجمل
انسحبت هي والحريم وتركتهم ضحك رائد : قال فيصل مجنونه ما صدقت
رفعت روان راسها بحب لاديم : انتبه وخذ كلامها بعين الاعتبار
ضحك رائد وقرب وهو يبوس روان : ما همني شي قد ماهمني انك معي
نزلت روان راسها بخجل وابتسم رائد وتقدم لما سمع صوت الزفه ونزلوا وهو طاير فيها فرح وواضح بعيونه الفرحه كان مبسوط وهي بعد ماصدق خلص ترتيبات الحفله والتصوير وطلعوا للفندق
••
•
عند عساف اللي اول مادخل الفندق اخذ علبه مويه وهو يشرب بشكل يفجع كان يحس نفسه مخنوق على عطشان ومايدري كيف يتصرف لف وشافها واقفه ومنزله راسها وشكلها بتبكي نزل المويه واتجه لها بهدوء عكس التوتر اللي يلعب في عروقه :نسرين
رفعت راسها وهي تناظره ابتسم عساف بحب وتقدم بهدوء وهو يحضنها : مابغيت اسمع شي من اللي سمعته من شوي مابي وعود ولا ابي عتب مابي شي من كل شي قلتيه انا بس ابي شي واحد ابيك تكونين معي وانا اقولك اني ما خطبتك الا بعد ما رميت كل شي ي نسرين وراء ظهري لا تهتمين لشي بس اهتمي فيني
شدت عليه نسرين وهي تبكي ابتسم وهو يهديها سحبها تجلس وهو يقول : لا تبكين وتضيقيني عليك خلاص مابي هاالدموع مره اسمعيني زين الحين بيجي العشاء بنتعشى ونروق وننسى كل شي كل شي ونبداء من جديد طيب
نسرين هزت راسها برضى وقف عساف وهو يطلب العشاء اما نسرين انسحبت تبدل ملابسها وهي راضيه عن اللي صار وماتبي تتذكر كل شي
••
•
اما عند روان ورائد اللي كانوا متافهمين جدا وعايشين ليلتهم بكل حب وزي مايبغون يبدون حياتهم بالحب بدوها
••
•
انتهى الزواج والكل رجع لمكانه وهو يدعي لهم بالفرح والسرور عند فيصل اللي كان واقف قبال بيت ابو مشاري : ليتك ترجعين معاي البيت كفايه كذا
اديم : فيصل خلاص عاد والله ما اقدر اتصرف مع حنين لحالي ابي امي تساعدني
فيصل: زين نتركها عند امك ونرجع
اديم ضحكت : فيصل بالله عليك انت صاحي مستحيل اترك بنتي
فيصل: عند امك ترا
اديم قربت وهي تبوسه ونزلت وهي تأشر له ينتظر تنهد فيصل بضيق وواضح انه بيقضي ليلته لحاله تفاجئ بأديم اللي رجعت وهي تضحك وركبت بسرعه : يلا يلا
فيصل : وش فيك
اديم :ههههه بسرعه قبل تصيدني امي
فيصل حرك وهو يضحك وقف عند اقرب اشاره : وش صار
اديم سحبت جاكيت فيصل اللي وراء وهي تلبس : لاحظ اني جايه معك والدنيا برد بنسهر للفجر وترجعني فيصل:هههههه شغل مراهقين
اديم: ايه
فيصل كمل وهو يضحك وطوى ليله هو واديم وهم يفرون بالسياره لما اذن الفجر ورجعها : استانست بالسهره معك اديم هانم
اديم ضحكت : شفيك مو معجبك
فيصل : والله كأنك مو زوجتي
ضحكت اديم: ولو مره نعيش هالطيش
ضحك فيصل وهو يبوسها: يلا يلا خليني الحق الصلاة بالمسجد ..

المواضيع المتشابهه لموضوع: عيونك شوكة في القلب توجعني و عبرها للكاتبة ديم الراشد مكتملة لموضوع: عيونك شوكة في القلب توجعني و عبرها للكاتبة ديم الراشد مكتملة
الموضوع	كاتب الموضوع	المنتدى	مشاركات	آخر مشاركة
حروفك سرقتني من بين الحضور اهيم بك دهرا ولا اكتفي للكاتبة ثرثره صامته مكتملة	همسه الشوق	همس للقصص وحكايات وروايات	42	11 - 7 - 2024 07:31 AM
عزاي إنك رجاي العذب لو كل الدروب عثور للكاتبة اديم الراشد	همسه الشوق	همس للقصص وحكايات وروايات	85	19 - 2 - 2022 08:50 PM
وظائف بشركة الراشد عبد الرحمن الراشد إدارية لحملة الدبلوم و فوق بعسير	همسه الشوق	همس للوظائف في جميع القطاعات	2	20 - 10 - 2021 05:06 PM
ياشجون القلب لو تدري بإن قلبي يعشق عيونك	حنين الأشواق	همس الشعر والقوافي	4	30 - 9 - 2021 03:25 AM
روايه خاني وذليته للكاتبة مشاعل الراشد	جروح الم	همس للقصص وحكايات وروايات	65	8 - 6 - 2018 01:24 PM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

عيونك شوكة في القلب توجعني و عبرها للكاتبة ديم الراشد مكتملة

همس للقصص وحكايات وروايات