شبكة همس الشوق - عرض مشاركة واحدة - عذبة مثل صوت بو نايف قوية مثل قصيد بن فطيس للكاتبة مؤلفة rwaiii_i

27 - 8 - 2023, 11:22 PM

البارت 15

-جابر-
طلع للملحق وهو يدخل وبعصبيه وصار يرمي كلشي قدامه وصرخ وهو يضرب الجدار بايده ، وطلع جواله الي يدق وهو يرد على عزام الي قال : تمزح انت ولا صادق ؟؟
جابر بقهر : امزح معك
عزام بعصبيه : تستهبل انت شايفني لعبه مره ايه مره لا ؟؟
جابر بنفس عصبيته : اقولك البنت ما تبيك
عزام بعدم تصديق : والله انك كذاب ، جايك البيت
جابر : لا تجيني ولا اشوفك ، وجيب شيخ العصر وتعال خذها
وقفل منه وهو يرمي جواله بالجدار ، وطلع وهو يرجع للبيت وهو يتنفس بصعوبه وكأن ضيقه الدنيا كلها بصدره
طلع لغرفته وهو يناظر الجدار ويتذكر الي صار قبل دقايق
تنهد وهو يفتح دولابه واخذ ملابس ودخل يتروش
—-
ناظرت جوري وردت عليها بكذب : ولاشي بس خايفه من الزواج
ضحكت جوري : منجدك ؟
مزن وهي تمسح دموعها : ايه ، ابي ارتاح العصر صحيني
جوري : تمام
وطلعت وهي تقفل الباب عليها ، وتوجهت لغرفة جابر
وهي تناظره وهو يلبس بدلته ونطقت: جابر
جابر وهو يقفل يعدل البدله : وشعندك
جوري : قلت لمزن شي ؟
سكتت من جابت اسمها ونطق: وانتم كل ما صار فيها شي حطيتوه براسي
جوري : جاوبني ، البنت لقيتها بدورات المياة حقتك وتبكي
لف عليها : وليه تبكي ؟
جوري : ما ادري سالتها قالت لانها خايفه من الزواج وما صدقتها ، قلت لها شي ؟
جابر : ما قلت لها شي ، من جات وهي تبكي ليه مستغربه الحين
وسحب سلاحه وطلع لدوامه
—-
العصر*
صحت مزن وهي تناظر جوري المتحمسة : الله يوم خطبتك وبكره خطبة جابر
توترت من جابت طاريه وقامت وهي تغسل وجهها وتصلي
خلصت وهي تلف على جوري : البسي الفستان ذا
مزن : الحين بس الشوفه صح ؟
جوري : ايه اكيد ، وبعدها اذا وافقت بنسوي الملكه
هزت راسها مزن وقامت وهي تلبس فستان خفيف وتركت شعرها مفكوك ، وقربت من المرايه وهي تحط المرطب وناظرت شفايفها وهي تتذكر جابر
-
"صلوا على محمد"

-قصيد-
توترت من قالوا رُفع ايقاف الرحلات ومن سحبها صاحب التاكسي ، مشت معه واملها في معن ، صفت وراء المسافرين وكل مالها تتلفت وتناظر البوابة ، انتبهت عليه من قال : انتي متواصله مع احد ؟
قصيد بتوتر : وانت اعطيتني فرصه اتواصل
صاحب التاكسي وهو يناظر عيونها الي تراقب البوابة : لا تنسين كلامي ، لو صار للي ببطنه شي وطلعتيها لغيري بتفقدين حياتك وحياة احبابك يا قصيد
لفت عليه من قال اسمها وهي تناظره بحقد ولفت وهي تشوف الي دخل من البوابة عرفت هيئته بالثوب ، وما قدرت تشوف وجهه بسبب الكمام الي لابسه
انتبه صاحب التاكسي على حركاتها ولف وهو يشوف الي يمشي باتجاههم ورجال الامن بجنبه ، ناظر رهام الي فزت من شافت معن ونطقت : معن !!
ابتسمت قصيد من شافته وشهقت من قرب منها صاحب التاكسي وهمس باذنها : الي ببطنك مو بس كبسوله والي بلعتيها غير عن الي بلعتها صاحبتك ، لا تطلعينها لاحد لصالحك ، لو طلعتيها حتى انتي بتكونين بنفس الجريمة وبقول انك متعاونه معي
ودفها وهو يركض بالمطار وركضوا وراه رجال الامن
وقفت مكانها بصدمه من كلامه ، وصارت تتنفس بخوف
—
ركض لها وهو يمسكها قبل تطيح وبخوف : فيك شي ؟؟ سوا لك شي ؟؟ وشقالك الكلب
رفعت وجهها له وهي ودها تعلمه لكن خافت ونطقت : خفت انك ما تجي
ناظرها وهو منتبه لنظرات الناس وبعد عنها : امشي وراي
ولف على رهام الي ركضت لدورات المياة وهي تستفرغ الكبسوله "اكرمكم الله"
مشت قصيد وراء معن وهي تحط ايدها على بطنها ونزلت دموعها وهي خايفه على نفسها ، انتبهت على رهام الي جات وقالت : شفيك تبكين
قصيد بتوتر وبتصريف : لا متوتره من الي صار بس
ومشوا وراء معن وركبوا بسيارته وشهقت من صرخ : وش مركبك معه ؟؟
قصيد بتنهيده وهي تلف على الشباك : لا تسألني اسئله مالها عندي جواب
معن بعصبيه : ايه صرفي ، انتي مستوعبه وين كنتي بتروحين ؟؟
تدخلت رهام وهي تسأل قصيد بخوف : طلعتي الي بلعتيه؟؟
توترت قصيد وسكتت لثواني ، ولفت على معن الي سألها : وش الي بلعتيه ؟ وش اعطاك الكلب ؟؟

-مزن-
نزلت مع جوري وهم يسلمون على ام عزام وجلست مزن بجنب جوري وهي متوتره من نظرات ام عزام
ام عزام وهي تناظر مزن بابتسامة : انتي مزن؟
مزن بتوتر : ايه
ام عزام وهي تناظر ملامحها وشعرها: بسم الله ماشاءالله
همست جوري لمزن : جبتي رأس الام كيف الولد
ضحكت مزن بخفيف ، وناظرت ام جابر من قالت : مزن عزام يبي يشوفك
توترت وزدات نبضات قلبها ، وقامت وهي تسحب جوري معها
جوري : وش دعوه انا الي العروس ولا انتي
مزن بخوف : خلاص كنسلت مابي ادخل
وعلى كلمتها دخل جابر وهو متجاهلها ويكلم جوري : جيبي الشاهي
ركضت جوري للمطبخ ، ووقف وهو ينتظرها ومتجاهل الي واقفه عند باب المجلس ومعطيته ظهرها، رفع راسه لامه الي قالت : شفيك يا بنتي ادخلي الولد ينتظرك
ولف عليها وهو يناظرها ، لفت وهي تناظره
بادلها النظرات وهو متجاهل كلام امه : جابر خذ الشاهي واطلع
بلع ريقه وناظر امه : انتظر الشاهي
ام جابر : اجل غض بصرك لين يخلص
ورجعت للصاله ، نزل نظراته للارض وهو ينتظر جوري
ما قدرت تدخل ولفت وهي تتقدم بتدخل المطبخ ومسكها من خصرها قبل تمشي وهو يلفها له وناظرها بتأمل لثواني وحس على نفسه ونطق : ادخلي ، محبوبك ينتظرك
توترت من نظراته ونطقت وهي مرتبكه : خلاص معاد ابي ، خايفه
جابر : قولي انك ما تبينه ، لا تقولين خايفه
رفعت راسها له ونطقت : لا ابيه مثل ما تبي ديما
شد على خصرها وسحبها لصدره : ماتبينه بس تبين تردين حركاتي لك وتتزوجين خويي ، عارف وداري للحين حاقده علي ، واذا انك تبينه ليه خايفه تدخلين ؟
توترت من كلامه و حطت ايدها على صدره وهي تدفه : ماني خايفه
وخزته وهي تلف وفتحت باب المجلس ودخلت على عزام
لف على جوري واخذ منها الشاهي ، وهو متجاهل الصدمه بنظراتها بعد الي سمعته
—
ارتكبت من نظرات عزام وجلست وهي تناظر الارض
عزام بابتسامه وهو يناظر كل جزء فيها : تستحقين نتضارب عشانك ، ومن سعد حظي اني كسبتك

-قصيد-

توترت من سؤال معن ونطقت وهي تحاول تصرف : ممكن تحرك لاني تعبانه ومصدعه وابي ارتاح
معن وهو متنرفز : بحرك بحرك ، قاعد لك انتي وتصريفاتك ، تحسبيني مو ملاحظ
وحرك وهو يتوجه لاحدى الفنادق ، ونزل ونزلوا معاه البنات ، فتح الجناح ودخلت قصيد ، ومسك رهام قبل تدخل وهو يسألها : وش الي بلعته ؟
رهام : الكلب اعطانا شي كانه كبسولات وقالنا ابلعوها ولا تطلعونها الا في بنغلاديش
وسع عيونه بصدمه وفتح الباب بسرعه وهو يدخل شافها تفصخ عبايتها وسحبها بسرعه وبخوف ؛ طلعتيها ؟؟؟
خافت من انفعاله ونطقت : وش اطلع ؟
معن بعصبيه : لا تجننين طلعي الي في بطنك اخلصي روحي لدورات المياة
بعدت عنه وقالت وهي تناظر عيونه : ما اقدر
معن بغضب : لا تقدرين تقدرين
وسحبها لدورات المياة ودخل معها وهو يوقف وراها : طلعيها اخلصي ، دخلي ايدك بحلقك لحتى تستفرغين
هزت راسها ب لا وتجمعت الدموع بعيونها : ما اقدر افهمني ما اقدر
صرخ وهو خايف عليها : تقدرين ، ما تدرين هاذي وش ؟؟ بتأثر فيك اذا ما طلعتيها ، اخلصي طلعيها
صرخت بنفس صراخه : ما اقدر قلتلك ما اقدر ما راح اطلعها
ودفته وهي تطلع ، وشهقت من طلع وراها وهو يسحبها للجدار : بتطلعينها ولا اتصل على الجمارك يطلعونها منك غصب ، مجنونه انتي بتروحين فيها
بكت وهي تناظره : ما راح تفهمني ، بس انا ما اقدر ولا ابي اطلعها
غمض عيونه من دموعها ونطق بهدوء وهو يمسك وجهها : الي بلعتيه ما يصلح يطول في بطنك بتموتين ، لو بلغ عليك ما راح اقدر اساعدك ، طلعيها وخليني ارفع امر بالقبض قبل يتقدم علي بخطوة ويدخلك معه بجريمته ، افهميني لو بلغ عليك بتدخلين معه السجن
بكت وهزت راسها بالرفض :ما اقدر معن ما اقدر افهمني
ضرب الجدار بايده : وش مهددك فيك الكلب ، انتي عندي مراح يصير لك شي بس طلعيها لجل اتصرف
سكتت وهي تناظره ودموعها الي تتكلم
ناظرها ونطق : ساعة وراجع لك ما طلعتيها بطلعها بالغصب
وطلع وهو يقفل الباب بعصبيه وغضب
-
شهقت وهي تبكي وجلست على الارض وهي تحضن رهام الي ركضت لها ونطقت بوسط شهقاتها : رهام افهموني انا خايفه ما اقدر مااقدر اطلعها ، لا تضغطون علي ما راح اطلعها

"صلوا على محمد"

-مزن-

استحت من كلام عزام ونزلت راسها باحراج
عزام : تبين الصدق انا مستعجل بامور الزواج ، واذا انتي موافقه ودي نسوي الملكة بعد شهر ، واذا تحبين نتكلم في الموضوع بالجوال ما عندي مشكلة
ناظرته مزن ونطقت : ما عندي جوال
ناظرها بهدوء لثواني وابتسم : يرخص لك ، نجيبه لك
بادلته الابتسامة بهدوء ونزلت نظراتها وهي تتنهد بهدوء وبعدها قامت : عن اذنك
قام عزام معها وهو يناظرها من فوق لتحت والابتسامة ما فارقت محياه ونطق : الله يعجل بالملكة
استحت مزن وطلعت بسرعه وتوجهت لغرفة البنات
لحقتها جوري وهي تناظرها : وشصار ؟
مزن : ابد قال بجيب لك جوال ، ويبي الملكة بعد شهر
ناظرتها جوري ببرود وقامت وهي تقفل الباب بالمفتاح
ورجعت لها وهي تقعد قدامها : مزن انا سمعت كلامك انتي وجابر عند المطبخ
بلعت ريقها مزن وناظرتها بصمت ، وكملت جوري وهي تسالها: بينكم شي ؟
مزن بسرعه : ابدا
جوري : مزن انا مو غبيه ، لقيتك بغرفته تبكين وسالتك وقلتي عشانك خايفه تبين الصدق ما صدقتك ، وملاحظة نظراتكم لبعض ونظراتك بالذات لديما ، كلذا وما بينكم شي ؟
تنهدت مزن وناظرتها : ما ادري وش اقولك ، لاني ما ادري عن مشاعر اخوك ولا عن مشاعري تجاهه
جوري : انتي موافقه على عزام بكل رضاك ؟
سكتت مزن لثواني ونطقت : مو برضاي
جوري : اجل ليه وافقتي ؟ مزن مستوعبه انه شافك ؟ وموافق عليك ويبي الملكة بدري ، مستوعبه انك بتتزوجين واحد انتي مو راضيه ولا مقتنعه فيه
تنهدت مزن ونطقت : مردي اقتنع فيه ، وبعدين الولد مافيه شي ولا ناقصه شي ، بشوف حياتي معاه والله يوفق اخوك
سكتت جوري وهي تناظرها وثم نطقت : الحين عرفت ليه جابر قال ما يبيها
مزن بسرعه : لا لا جوري انا مالي دخل بقرارته مالي دخل
جوري بضحكة : ماني غبيه مثل ما لاحظت نظراتك له انتبهت لنظرات اخوي لك ، وتدرين سالني ليه بكيتي لما لقيتك بغرفته
عقدت حواجبها مزن : ماله دخل ابدا مو معناته سال ليه بكيت يعني بيننا شي !
جوري وهي تقوم : جابر ما يسأل الا اذا كان مهتم ، تعلميني في اخوي ؟!

-معن-
ركب سيارته وهو يتوجه للمطار ، وبعد دقايق وصل
دخل للادارة وهو يتفقد الكاميرات وسط خوف الموظفين من حضوره وطلبه المُفاجئ ، وسع عيونه من عرف صاحب التاكسي ، طلع بعصبية وهو يتصل على وكيل اعماله : جهز لي قائمة سواقين ابوي
وتوجه لقصر اهله ، وهو يدخل على ابوه وسلم عليه
وقعد وهو يسرد له الي صار وبدا يساله عن السواقين الي وظفهم عنده
ابو معن بتفكير : واحد فقط الي اعطيته الجنسية ، وبعد ما فصلته طردته للخارج
معن : يبه بينك وبينه شي ؟
ابو معن بتفكير : الي اذكره يا ولدي اني رفضت اعطي اهله الجنسيه وبعدتها طردته
تنهد معن : متاكد انه كان فقط سواق ؟ ما دخلته ولا وريته شي من اعمالك ؟ ولا سمع منك شي ؟
ابو معن : يا ابوك كنت اتكلم واتصل بالسيارة واكيد انه يسمعني
معن : وين كنت مسكنه ؟ كنت تأمنه على شي؟
ابو معن : معن انت فيك شي ؟ وين بيسكن غير سكن السواقين ؟ الي اذكره كانت بنت عمه وحده من الخدم تقرب له
ضرب معن رجله وقام وهو يطلع بسرعه ويتوجه للفندق
طلع لجناحه قصيد وفتح الباب وهو يدخل يدورها
شافها نايمه وقرب منها وهمس باسمها بهدوء وهو يصحيها : قصيد ، قصيد ، قصيد
ناظرها من فتحت عيونها وهي تناظره بصمت
معن بخوف : قومي ، ابيك
خافت قصيد من نبرته الخايفه ومن ملامحه وعدلت جلستها وهي تسحب اللحاف وتناظره : شفيك ؟
تنهد معن : طلعتي الي في بطنك ؟
هزت راسها ب لا وهي تبادله النظرات
معن بهدوء : لازم تطلعينها ، قصيد الي فيك مو بس بتضرك، بتضرني معك
ومسكها قبل تعطيه ظهرها وتدخل تحت اللحاف
سحبها من السرير ووقفها قدامه وهو يناظر عيونها : افهميني الكلب كان سواق ابوي وصار بينه وبين ابوي مشكله متاكد ومليون في الميه الي في بطنك شي يخص ابوي ، قصيد ابوي لو بلغ عليه بتروحين فيها مع الكلب خليني اساعدك واقلب الطاوله عليه ، انا معك وانتي عندي والله ما يلمسك بني ادم وانا بجنبك
بكت قصيد وهي تناظره : معن هددني يقتل كل الي احبهم جوازي معه متاكده بيوصلني باي طريقه ، خايفه يقتلك او يقتل سند واهلي ، معن ما شميت ريحه ملابسي من خذيتني المجنون رش علينا بنزين ، انا خايفه يسوي فيك او في اهلي شي
مسك وجهها : ، مثل ما انتي تخافين علي وانا خايف عليك ، انا وعدتك والي خلقك ما يجيك شي وانتي عندي لو احط عندك حراسه مشدده ، والكلب ماسكه ماسكه ، بس خليني امسكه قبل ابوي وقبل يعترف ويورطك معه

-مزن-
نامت بعد حديثها مع جوري ، وصحت بالليل على صوت جوري : مزن مزن مزن
فزت وهي تناظرها : شفيك ؟؟
جوري : عزام برا ويبيك
مزن بصدمه : الحين ؟!! وش جابه ؟
جوري : مدري قومي شوفي ، قبل يجي جابر
مزن : واذا جاء جابر ؟ ترا خطيبي
جوري بضحكة : قولي لجابر كذا وبتشوفين اسنانك بايدك ، ما يحب ذي الحركات ولا يحب نطلع عند الرجال حتى لو يقرب لنا ، وحتى لو انه غايب عن البيت يكرهه نطلع لرجال سوا نعرفه ولا ما نعرفه ، وبعدين خطيبك جاي بوقت غلط لو يشوفه جابر يويله
قامت مزن وهي تغسل وجهها ، وسحبت جلالها ونزلت
طلعت وهي تشوفه واقف وبايده كيس ، عقدت حواجبها وتقدمت بهدوء : هلا ؟
لف عزام بابتسامه : اهلين
سكتت مزن وهي تنتظره يتكلم وناظرته وثم نطقت : بغيت شي ؟
عزام بفهاوة : هاه ايه ، قلتي ما عندي جوال وجبت لك
مزن بصدمه : بالسرعه ذي ؟
عزام بضحكة : ما قلتلك مستعجل ، على الاقل يكفيني صوتك ليوم الملكة
توترت مزن وهي تاخذ منه الكيس الي مده لها وقال : انتظر اتصالك ، سجلت رقمي عندك
واستاذن وطلع ، وقفت وهي تناظره بصدمه وبعدها دخلت وهي تطلع لجوري بسرعه
جوري : وش يبي ؟ وش الكيس ذا
مزن بصدمه : قلت ما عندي جوال وراح جاب بنفس اليوم !! يمه بسم الله يخوف
جوري وهي تسحب الكيس : اخس يا الولد شكله كاش
مزن : معرف استخدمه ، ليته ما جاب ، المهم جيعانه بنزل اجيب اكل
جوري وهي تتفقد الجوال : ول ول ، الاخ مجهز كلشي ما يمديك حتى تصرفين ، ما خلا برنامج ما حمله
سحبت مزن الجوال : وش ذي ؟
جوري : برامج بعلمك عليها بعدين ، المهم سوي اكل وجيبي لي معك ، بنام وراي خطبه
ناظرتها مزن بهدوء من جابت طاري الخطبة وقامت وهي تنزل للمطبخ وهي تتفقد الجوال وتنرفزت وهي تقفله وبدات تسوي لها اكل ، بوسط انشغالها اتصل جوالها وردت ووصلها صوته : فاضيه ؟
مزن : قاعده اطبخ
عزام : حلو اطبخي ، وبقعد اسولف معك
ضحكت بخفيف وحطت مكبر الصوت وهي تحط الجوال بجنبها وبدات تسولف معه وتطبخ ، ومو منتبه لصوت باب البيت الي انفتح

"صلوا على محمد"

-قصيد-
ناظرت في معن من بعد كلامه وتوجهت لدورات المياة من قال : طلعيها ما راح يجيك شي وانتي عندي
وقف عند الجدار ينتظرها وهو متوتر ، انتبه لرهام الي دخلت وهي تناظره : وشصار ؟
معن : وافقت تطلعها
رهام بتوتر : اختها اتصلت علي واهلها يسالون عنها
عدل وقفته وهو يناظرها : جايه بدون علم اهلها ؟
رهام وهي متوتره من نظراته : ايه
غمض عيونه وتنهد : خليها تطلع على خير الحين
ولفوا على الي طلعت وهي تمسح فمها والتعب واضح بعيونها ، ناظرت معن وهي تفتح ايدها الي كان فيها شريحه ذاكرة ، وسع عيونه بصدمه وناظرها : مجنونه انتي مدخله ذي ببطنك ولا شفتيها من عطاك ؟
قصيد : كانت بكبسوله حسبتها حبوب
دخل معن دورات المياة وهو يسحب مناديل وتقدم لقصيد وهو ياخذ الذاكرة وناظرها : بتقعدين هنا لحتى اتصل عليك
وطلع بسرعه وهو يرد على وكيل اعماله : وشصار ؟
الوكيل : تم القبض طال عمرك ، وحاليا بالتحقيق
معن : ابوي لا يدري انا بعلمه ، وقابلني عنده ابعطيك شي تفحصه لي
وقفل وهو يركب سيارته وتوجه لقصر ابوه ، وصل وهو ينزل وشاف اهله كلهم مجتمعين ويتوسطهم ابوه
تنهد وهو يلقي سلامه على الكل وقعد بجنب ابوه
ابو معن : وشصار معك ؟
معن وهو يناظر الارض : ابشرك بالتحقيق
ابو معن : والبنت الي معه مسكتوها
رفع راسه بسرعه وهو يلف على ابوه : يبه البنت ضحيه مهيب معه
ابو معن : وانت وشدراك يمكن انها متعاونه معه
معن بتوتر : انا حققت بالموضوع بنفسي ، سواقك جنسيته بنغالي والبنت سعوديه اصل وفصل ، اخذها من المطار وكان بيسفرها ويزور جوازها ، لو ما بلغت كان راحت فيها
تنهد ابو معن : دامك محقق في الموضوع ، اجل الامور تمام ، وجيب البنت واستضيفها عندنا لجل نعتذر عن الي صار لها بسببنا ، ونقوم بالواجب على اكمل وجه
ابتسم معن : ابشر

يتبع.....

شَمسُ البلاد معجب بهذا