شبكة همس الشوق - عرض مشاركة واحدة - عذبة مثل صوت بو نايف قوية مثل قصيد بن فطيس للكاتبة مؤلفة rwaiii_i

27 - 8 - 2023, 11:24 PM

البارت 16

-جابر-

دخل البيت وانتبه لنور المطبخ المشتغل وصوت الضحكات ، مشى وهو يتوجه للمطبخ وشافها وهي تطبخ
وتضحك وصوت عزام سبب ضحكاتها ، وقف مكانه وهو يتخصر ويناظرها وسرعان ما عدل وقفته من قال عزام : كنتي حلوه بالشوفه ، عيونك احلى شي شافته عيني ، وشعرك الله لو تدرين كم احب الشعر الطويل وسحرني شعرك ، كنتي جم
قاطعه صراخ مزن من تقدم جابر وهو يسحب الغلايه وكب المويه الي فيها على جوالها ، ودف الجوال من الدولاب للارض وانكسر ، ورفع نظره لها ببرود : انتظريه يجيب لك واحد ثاني
ومشى وهو يفتح الثلاجه وسحب مويه وهو يصب له ومتجاهل الي وافقه ومنصدمه من الي سواه ، رفعت نظرها له : تستهبل ! الجوال ماله ساعه من اعطاني اياه !
جابر وهو يسحب الكوب : الراتب بعد يومين ، انتظري يشتري لك ، ليه بتموتين اذا ما كلمتيه ؟
مزن وهي تناظره بحقد : لا بالعكس انت الي بتموت اذا ما خربت علي
جابر بهمس : الحمدلله عارفه
ورفع راسه لها : وش طابخه ؟
مزن : مستوعب اني مخطوبه وانك بكره بتخطب وما يجوز حتى تكلمني ؟؟! او تسمع صوتي ؟ مستوعب ولا اقعد اعلمك كلشوي ؟
جابر : اجل تكلمي بالاشارة سهله ، دوبك مخطوبة اعجبتك الكلمة وصرتي تستعرضين بها ؟
مزن : ههه تضحك بسم الله عليك ، ايه عاجبتني اذكرك باسم خطيبي بعد ؟
ناظرها لثواني لحتى توترت من نظراته واعطته ظهرها وفتحت الفرن وهي تطلع المعكرونه ، سحب الملعقه وتقدم لها بجوع : بتاخذين اجر فيني
توترت من قربه وناظرته : ابعد ماهي لك
جابر بجوع وناظرها : عند الجوع لا اعرفك ولا تعرفيني
وسحب الصينيه وطلع للحوش ، انصدمت من حركته ولحقته وهي معصبه : بلا مبزره ماهي لك ، جوري تنتظرني فوق هات
جابر : نادي جوري بدالك لو ما تبين
تقدمت له ونزلت ايدينها بتشيل الصينيه ومسكها بسرعه وهو يسحبها وطاحت بجنبه ، ناظرها وهو يتأمل شعرها الي كانت واضحه لمعته من نور القمر بليله قمرا ، ناظر عيونها بتأمل ، تم على وضعه وهو مستمتع بالنظر لتفاصيلها ، وكانت تبادله النظرات وهي تتأمل ملامحه عن قرب لاول مره بكل هدوء ودقه ، انتبه لنظراتها له ونطق : يجوز لك تتأمليني لكن لا تحرّمين النظر لك

-قصيد-
رجعت نامت من راح معن ، وصحت بنص الليل على اتصال
عقدت حواجبها وردت : مين ؟
معن : الي قالك انتظري اتصال مني
عرفته وعدلت جلستها : وش جاب اتصالك ؟
معن : ابوي يبي يستضيفك عندنا ، لجل يعتذر ومنذا الاشياء
قصيد : ما اقدر ، لازم ارجع بكره للسعودية
معن وهو يعدل جلسته : بدري على روحتك ، ما انصحك ترفضين دعوة ابوي
قصيد: مضطره ، اهلي عرفوا اني سافرت بدون علمهم ، لازم ارجع
معن باصرار : ما راح ترجعين
قصيد : لا والله ! بكفيك هو
معن : لو تبينها كذا ايه ، وبعدين بتقعدين لحتى اطلع لك جواز جديد الكلب اعدم جوازاتكم
قصيد بتنهيده : لا مستحيل ، وربي بموت على ايد ابوي لو طولت زياده
معن : الله يعينك ، بس مافيه روحه لحتى اطلع لك جواز ، وبتجين الصبح عندنا جهزي نفسك
قصيد بخوف : مستحيل ، اخاف مراح اجي
معن : داري تخافين مني ، بس ما عليك ما راح تشوفيني كثير تعرفين مشغول وكذا
قصيد : شف الثقه
ضحك معن : المهم بتجين وبخليهم يسوون لك فحص شامل ، الي بلعتيه مو شي سهل
قصيد : شدعوه مافيني شي ، حيه اُرزق
معن : اشوفك بكره
وقفل منها وبدا يخلص اشغاله وهو يفكر فيها
-
بالصباح *
ما نامت من التوتر وناظرت رهام : الحين المفروض اكون رزينه وما اتكلم كثير زي عادتي ، واكون هاديه ، بس اخاف يستفزوني ما راح امسك نفسي
رهام بضحكة : الله يشفيك ، امسكي نفسك انتي تقدرين ولا تعصبين من اتفه شي
قصيد : مستحيل معن يعصبني كثير
رهام : طبعا بتسوين نفسك ما تعرفينه ولا راح تكلمينه ، يويلك لو يدرون ان بينكم شي
قصيد بخوف : شلون وش اسوي معرف اتصرف ، تستهبلين معرف احد هناك غيره، وتقولين سوي نفسك ما تعرفينه بروح فيها
قاطعها رساله معن : السواق ينتظرك تحت

"صلوا على محمد "

-مزن-

حست على نفسها من كلام جابر ، وبعدت عنه وهي تدخل لداخل بسرعه وبكل توتر ورجفه ، طلعت لغرفة البنات
وشافت جوري تحط ماسك ولفت على مزن : ها وين الاكل ؟
مزن بتوتر : اكله اخوك
عقدت حواجبها : تستهبلين ؟ خير ياكله والله ما ياكله
ونزلت وهي تدوره وطلعت للحوش وشافته قاعد على جواله وياكل بهدوء ، تقدمت لعنده بعصبيه : خير يالاخ الاكل لنا
جابر وهو مشغول بالجوال : توها اول لقمة حياك
جوري : واضح اول لقمة ، قوم ارقد وراك خطبه
رفع راسه عن الجوال وهو يناظرها ، تنهد لثواني وحط الملعقة ، انتبهت جوري بملامحه الي تغيرت من جابت طاري الملكة وقعدت وهي تناظره : شفيك لا يكون ما تبي ؟
جابر : ايه مابي
جوري : وليه ما تبي ؟
جابر : مزاج ، وما لقيتوا الا ديما تحجزونها لي ؟
جوري وهي تحجر له : السبب ديما ولا احد ثاني ؟
بادلها النظرات وقال : وش قصدك ؟
جوري بخوف من نظراته : مدري قلت يمكن في بالك وحده ثانيه
جابر : واذا في بالي وحده ثانيه بفتك من الخطبة ؟
جوري : مدري ، امي تبي ديما الا اذا اقنعتها
وقامت وهي تسحب الصينية : على العموم حتى الي في بالك مغصوبه
رفع راسه بسرعه وهو يناظرها : انتي لك ساعه تلمحين
ومسكها من ايدها : والله ما تروحين
قعدت جوري : وجع الصينيه
اخذها منها جابر وهو يلف عليها وبفضول : مين الي بالي ؟ وشدراك انها مغصوبه ؟
انصدمت جوري من حماسه للموضوع وفضوله وردت عليه : كلنا ندري مين الي في بالك ، وش دراني ؟عرفت منها
جابر بخوف وهو يناظرها وهو متوتر : كلكم تدرون انها مزن؟
ناظرته لثواني وهي منصدمه من اخوها : ايه، لو تبي الصدق امي ما تدري حتى جنى يعني بس انا
بعد عنها : انقلعي ، توك تقولين كلنا وطلعتي بس انتي
وقام وهو يسحب جواله وحطه بجيبه ومشى وسرعان ما توقف من قالت جوري : اقصد كلنا يعني انا ومزن

-قصيد-
قرأت رساله معن وناظرت رهام : السواق برا، بعدين تعالي انتي وين بتروحين ؟
رهام : ما عليك ما دخلت اعلام عبث ، لي صحبات هنا بطلع معهم وبرجع للفندق ، المهم انتي طمنيني
طلعت قصيد ، وركبت مع السواق وتوجه لقصر اهل معن
توترت وهي تمسك ايدينها ، وتقرا اذكارها ، وبهمس لنفسها : امسكي اعصابك وخليك محترمة
ولفت على الشباك من انفتحت البوابة ودخل السواق
وسعت عيونهاوهي تناظر النخيل الي مزين الطريق بأكمله والمساحة الواسعة ويتوسطها الزرع الاخضر
اندهشت من المنظر وهي تقول : واو ماشاءالله
حست على نفسها من وقف السواق عند باب القصر
فتحت الباب ونزلت من السيارة ، وابتسمت للعاملة الي فتحت لها الباب ، دخلت للـبيت ومن العيب أن يقُال عنه بيت ، كان قصّر من على بعُد مئة متر تنبع منه رائحة الغناء الفاحش ونعيُم الدنيا الغارقين به
فتحت فمها بأندهاش
مساحته واسعه .. والهدوء يعم المكان ، والانوار تنُير المكان بأكمله بضوء اصفر خافت مُريح للعين ،
الثريا المُتدليه من السطح والواضح بأنها بقيمة مئات الألوف ، ماكان تعبيرها الا أنها تفتح فمها بأندهاش ماتقدر تخفي حتى كادّ يسقط فكها من ذهُولها ، صحت من انبهارها على صوت ام معن الي صافحتها : شرفتينا بحضورك
ابتسمت قصيد ونطقت : الشرف لي
ام معن : تفضلي
مشت معها ودخلوا بصالة واسعة جدا وبديكور وتصميم راقي ، جلست قصيد وهي متوترة
ام معن : وش تشربين ؟
قصيد بتوتر : مويه
ابتسمت ام معن ولفت على العاملة ، وطلعت العاملة وهي تجيب طلبها
ام معن : خذي راحتك ، واعتبري المكان مكانك ، انتي ضيفتنا ولا نبيك تستحين عن شي في خاطرك
قصيد : ما تقصرون ، والله يعطيكم العافية ومشكورين على الاستضافة
وناظرت البنات الي دخلوا بكل زينتهم وطلتهم وهم يسلمون على قصيد
العنود بصدمة : انتي الي صورتي اختي تهاني ؟
قصيد بضحكة : ايه
العنود : يا محلا الصدف ، رفضتي تحضرين الملكة وجابك الله عندنا
ضحكت قصيد وهي تحاول تخفف من توترها ورجفتها
رفعت راسها من سمعت صوته من عند الباب وهو يكلم العاملة : الضيفة وصلت ؟
ابتسمت بخفيف وحست توترها خف ورجفتها توقفت
وناظرت العنود الي قالت : معن ترا الضيفة بنفسها تسمعك
ابتسم وطلع لجناحه وهو يرسل لقصيد : كان المفروض انا الي افتح لك الباب بس تأخرتي وطلعت اسوي شغلة ، بس ما يخالف استضافتك عندنا بتطول والجايات اكثر
قرات رسالته وردت عليه : انا متوتره ابي ارجع

-جابر-
لف على جوري وقال : لو انها تدري ما وافقت على عزام
جوري وهي تشيل الصينية ومشت له : وش عرفها المسكينة بمشاعرك وحسبتك تحب ديما ، والبنت طبعا ما راح توقف مستقبلها عليك وانت ما تحركت
ناظر اخته ونطق : ليه توك تقولين ذا الكلام ؟ تعرفين ان ما بيدي حيله ورضا امي اهم ما عندي
جوري : قلت بس اعلمك يعني
ودخلت وهي تنادي مزن ، ردت عليها مزن من الدور الثاني : هلا ؟
جوري : تعالي يالله ناكل
نزلت مزن بكل جوع ودخلت وهي تجلس جوري وتأكل معها
جوري وهي تناظرها : علمت جابر
شرقت مزن وضربتها جوري ، لفت على جوري : علمتيه ب وش؟
جوري : علمته اننا ندري انه يبيك
مزن بصدمه : يبيني ؟؟ توني اعرف
جوري : بلا كذب انتي وياه ، ندري انكم كلكم تبون بعض بس تكابرون ، وانتي وافقت على عزام بعذر مستقبلك وهو موافق على ديما بعذر رضا امي ، ولا واحد فيكم راضي يتنازل ولا مستوعبين انكم بتدمرون مستقبلكم بعاندكم
انصدمت مزن من كلامها ونطقت: بس رضا امه اهم ، مابيه يتزاعل معها بسببي
جوري : وانتم شدراكم ان امي بترفض اذا كلمها برغبته
سكتت مزن وهي تشوف انها معها حق
كملت جوري : مزن انا مابي جابر يتزوج وحده ما يبيها احنا عانينا من نفسيته ومابيه يظلم ديما معه ، صدقيني لو تنازلتي وقلتي له انك تبينه بيتصرف ، اخوي عنيد ومستحيل يتكلم لك لو انه بيموت من الحب
مزن : تبيني اقوله انا ابيك واخرب خطبته ؟؟!! مستحيل
جوري : يا غبيه ، بتندمين صدقيني ، صارحيني انتي تحبينه ؟
توترت مزن من سؤالها : مدري
جوري :مافيه مدري ، ايه او لا ، تحسين انك مرتاحه معه عكس عزام ؟ تحسين انه تبينه ما تبين عزام ؟
تنهدت مزن ونطقت بكل صراحه : ايه
وقامت وهي تغسل ايدينها ، وناظرت جوري الي سكتت
مزن : شفيك ؟
جوري : روحي يا غبيه انا بغسل المواعين وبلحقك ، اول مره اشوف اثنين يحبون بعض واغبياء
ضحكت مزن وفتحت الثلاجه وسحبت قارورة موية وطلعت ، انتبهت لصوته من غرفة امه : يمه انا مابي ديما ، لا تخليني اظلم بنت الناس معي ، خليها تشوف طريقها والله يوفقها
ام جابر بعصبيه : ليه ما تبيها البنت ما يعيبها شي ، علمني ليه ما تبيها وش ناقصها
جابر : ابي غيرها

"صلوا على محمد "

-قصيد-

قفلت جوالها من تقدمت العاملة وهي تعطيها كوب الموية ، شدت على الكوب لجل تخفي رجفتها
وناظرت ام معن الي قالت : بنوديك لجناح الضيوف لجل ترتاحين وتاخذين راحتك
ابتسمت قصيد وقامت معها من قامت ، طلعت مع ام معن على طلعة معن من جناحه ، ناظرها وهي تمشي بجنب امه ، بلع ريقه واستوقفهم من قال : شرفتينا بحضورك
توترت قصيد وهي حاسه بنظرات ام معن لها ونطقت : الشرف لي
معن وهو يناظر امه : الوالد يبي يشوف ضيفتنا ويتكلم معها
ام معن : بنخليها بترتاح ، وبعدها بتنزل له
معن وهو يناظر قصيد : لا تقصرون بالضيافة
انتبهت قصيد لنظرات ام معن لهم واشرت لمعن بعيونها وهي تغمز له ، انتبه لغمزاتها لكن ما فهمها وفهم شي ثاني ، ومر من جنبها وهو يضحك ، عصبت من ضحكته
وتقدمت مع ام معن وهي تدخل جناح الضيوف ، اخفت انبهارها وهي تشكر ام معن وقفلت الباب من اعطتها ظهرها ، ولفت وهي تتأمل الجناح ومساحته والوانه الراقية وتصميمه الفريد ، تنهدت وهي تقول : اهخ يا ابوي لو تدري وين انا بس
وقطع عليها رساله معن ، وطلعت جوالها من شنطتها وهي تفتح رسالته وكان يقول : وحتى ببيتي تغازليني اثقلي شوي
ضحكت من فهمها غلط وكتبت : محد يدري اننا نعرف بعض ، لا تقعد تناظرني كذا ، ما لاحظت نظرات امك ؟
معن : لا
قصيد : لاحظها مره ثانيه ، وسوي نفسك ما تعرفني
معن : على اساس اعرفك كثير
سكتت لثواني وهي تقرا رسالته وثم ردت : ما فهمت ؟
معن : اعرف اسمك ، وتعرفين اسمي ، لكن ما نعرف غيرها ، الي حفظته عنك انك تطلعين بدون علم اهلك
ضحكت قصيد وسجلت له : ما لقيت الا ذا الشي تحفظه عني
ابتسم من سجلت وسجل مثلها وهو يقول : صرتي عندي ، ابي اعرف اشياء واحفظ اشياء عنك ، لو تسمحين
ابتسمت وكتبت :وانا بعد معرف غير انك امير
معن : لو طلبت اشوفك لجل تعرفين واعرف الكثير بتجين ؟
قصيد : الحين وببيتك مستحيل !!
معن : مو الحين ، بس ارسلك تعالي
قصيد : بشوف
وحطت جوالها وهي تفصخ عبايتها وتنهدت بجوع : غبيه حتى فطور ما افطرتي

-جابر-

كان يكلم امه ويحاول يقنعها برفضه التام لخطبته من ديما ، ناظر امه من قالت : ومين فيه غيرها ؟ مين فيه احسن من ديما وتبيها ؟
توتر وهو خايف من ردة فعلها ونطق بتردد : مزن يمه
ام جابر بصدمه : مزن ! ما لقيت الا خطيبة خويك وصاحبك ؟؟
جابر بعصبية : كنت ابيها من قبله بس انتي ربطتيني مع ديما ورضاك
ام جابر : ما تأخذ غير ديما ، مزن مخطوبة والله يوفقها ، ما تخاف ربك تخطب على خطبة خويك ؟
انفعل جابر وقال : يمه قلتلك ابيها من قبله بس الكلب خطبها ، وديما ما ابيها ولا ابي اظلم بنت الناس معي ، عارف وداري تحبينها وتعزينها ، بس عيال عمي كثير وما وقفت علي
ام جابر : لا وقفت عليك ، البنت حاجزينها لك وانت بالثانوي وبتاخذها يعني بتاخذها ، ومزن خلها تشوف طريقها والله يوفقها
جابر : ما خذيت مزن ماني ماخذ غيرها
وطلع وهو معصب من قرارات امه ، ناظر الي واقفه عند الدرج وتقدم لها وسحبها من ايدها : الحين ترفضينه الحين ، بتصل عليه وقولي له مابيك
مزن بخوف من ملامحه ونبرته : رضا امك اهم
ضرب صدرها بقهر : لو رفضتي عزام كان ما عايرتني بالخطبة على خطبة خويي ، ارفضيه ، لك ساعة وانتي واقفه هنا واكيد سمعتي الي قلته ما يحتاج اقولك ليش ابيك ترفضينه
مزن : تزوج ديما البنت حلوة وتستاهلها ، لا تزعل امك والسبب انا
جابر بعصبية : محد سألك اذا حلوه ولا لا ، انتي تبيني مثل ما انا ابيك ؟ صارحيني لجل ما اتعنى لك وبالاخير القى الصد
توترت من نظراته ومن سؤاله وكانت بتنطق لكن قاطعتها جوري : ايه تبيك وقالتها لي
ناظر اخته وطلع جواله : اجل قولي للشيخ باي باي
اتصل على عزام وهو ينتظر رده ،
وبعد ثواني وصله صوته : وشعندك بعد ؟
ناظر جابر في مزن وهو ينتظرها تنطق ، توترت وهي تناظر جابر الي غمض عيونه من تكلمت ام جابر من عند باب غرفتها : ان تدخلت بزواج البنت ولا خليتها ترفض زوجها ، وما تزوجت ديما ماني امك ولا انت ولدي ، ولاني راضيه عنك
رمى جواله من اعلى الدرج للاسفل بعصبية وصرخت مزن
وهي خايفه من انفعاله وملامحه الي تغيرت وعروق جبينه الي برزت من قال : ان كانك رابطه زواجي مع وحده ما ابيها يمه ، فانا للعزوبية لين تشوفين الشيب براسي

-قصيد-
كانت تكلم رهام وتصور لها الجناح : بنت انا جيعانه بس مستحيه اقولهم
رهام بضحكة : قولي لاميرك يفرش لك الارض اكل
قصيد : استحي على وجهك وش اميري
رهام : هذا الصدق ، بغيتي تموتين من الخوف عليه لو ما اقنعك كان رحتي فيها وانتي خايفه عليه من تهديد الكلب ذاك
قصيد بحياء : صدق كان واضح خوفي ؟
رهام بضحكة : اي والله ، ولا بعد تبكين يعنني
قصيد بضحكة : انقلعي ، بدال ما تعطيني حل لجوعى تطلعين فضايحي
رهام : خلاص اطلبي من برا
شهقت قصيد بضحكة : احلفي ! تبينهم يطلعوني ، شكلي بنام على جوعي ، يالله انقلعي صاحيه من الليل
وقفلت من رهام وتوجهت للسرير وهي تنام ومتجاهله جوعها
بالليل*
صحت على اتصال معن ، ردت بنوم : ها
معن : بعدك نايمه ؟ انزلي ابوي يبيك والكل يبي يشوفك
قامت قصيد : صبر وش يبي ، انا اتوتر
معن : انا موجود ، بس تعالي
قفلت منه وهي تغسل وجهها وتصلي ، وبعدها عدلت شكلها ونزلت ، سمعت اصوات كثير بالمجلس من بين اصوات رجال وبنات ، توترت وارسلت لمعن : خلاص ما بدخل صرفهم
معن : ادخلي ولا تتوترين ، وخليك جاهزة لاسئلة ابوي
قصيد وهي واقفه وراء باب المجلس : وش اسئلته بعد ، برجع انام
معن وهو يحاول ما يلفت انتباه احد : ادخلييي، يويلك لو رحتي
قرأت اذكارها واخذت شهيق وهي تبلع ريقها ، وتقدمت وهي تدخل والقت سلامها الي كان سبب في صمت الكل والتفافهم لها ، رد الكل السلام وتوترت وهي تجلس بجنب العنود ، رفعت راسها لابو معن من قال : شرفتينا يا بنتي ، ومن المحبة نستضيف اهل السعودية الحبيبة
ابتسمت قصيد وردت : لي الشرف ، المحبة متبادلة ونعتز فيها
ابو معن : اعتبري البيت بيتك ولا تستحين كل الخدم تحت امرك ، مابيك ترجعين السعودية وتقولين نقصوا علي شي
ضحك الكل وضحكت وهي ترد عليه : شوفتكم واستضافتكم لي هي الكمال ولو فيه نقص فهو بعيوني
ابتسم ابو معن من ردها ، وتوترت وهي تأخذ كوب القهوة من القهوجي ، ناظرت معن الي قاعد بوسط اخوانه وعيال عمه ، فتح جواله وارسل لها : تعرفين ردود دبلوماسية من وراي ؟
قصيد بتوتر : احسني جبت العيد
معن : رجفتك واضحه من فنجانك ، اهدي واعتبري انك قاعدة بوسط اهلك
قصيد : الكل يناظرني تبيني اضحك وما اتوتر
رفع راسه وهو يناظر الكل وكان بالفعل كلهم يناظرونها من بنات وعيال ، ضرب عيال عمه : استح على وجهك انت وياه ، غض بصرك

"صلوا على محمد"

يتبع.....

شَمسُ البلاد معجب بهذا