مجموع الأوسمة: 17

البارت 30 والأخير


-جابر-
خلص تدريب ورجع للبيت ونام للعصر
وصحى وطلعوا هو ومزن لجل تشتري اغراض الجامعة
مزن : اذا جيت اشتري لاب كوت لازم تجي معي ونختار مع بعض
جابر بضحكة : بشتري معك وبعيش معك اجواء تخصصك لسنة الامتياز باذن الله
ابتسمت مزن : بأذن الله
ورجعوا للبيت بعد ما خلصوا اغراض مزن
على وصولهم وصلوا عزام وجوري
نزل جابر وهو يكلم عزام : فنجان شاهي ؟
عزام : مره ثانية ، وراي تحقيق
جابر : اي تحقيق ؟ وش ماسك انت ؟
عزام : التحقيق الي ما كملته انت ، بيوم حادثك
جابر : اجل خله وبكمله انا
وبعد سوالف حرك عزام لبيتهم
—
طلع لغرفة وشاف مزن تقيس ملابسها
لفت عليه وهي تسأله : انت مشتري البلوفر ذا ؟
جابر وهو يتأمل البلوفر عليها : ايه
مزن بضحكة : اسفه بسرقه لونه اعجبني
جابر وهو يفصخ ثوبه : كل ملابسي حلالك
ابتسمت وهي تفتح الاكياس وتجرب التيشيرتات رفعت نظرها لجابر : شف ذا حلو ؟
رفع عيونه عن جواله وهو يناظر التيشيرت الازرق الي مبرز بياضها اكثر : ايه وشكلي بسرقه
مزن بضحكة : نتشارك بلوفرات بس
قرب منها وهو يطلع شعرها من تحت التيشيرت : شاركيني كلشي يخصك مو بلوفراتك بس
بادلته النظرات وبابتسامة : اذا ما شاركتك كلشي يخصني اشارك مين ؟ انت الوحيد بحياتي الي احب اشاركه كل لحظاتي وحياتي
انرسمت ابتسامته وسحبها من خصرها ورفع ايده لخلف رقبتها وهو يقرب منها ويطبع قبلاته على شفايفها بكل هدوء ورضا
—
طلعت من المطبخ وهي تسوي شاهي لها وقعدت بالصاله
دخلت على رقمه وهي ترسل له : حطيت رقمك بالفحص لما طلبوني رقم ثاني عادي ؟
كان واصل للمركز وطلع جواله من جيبه من حس باهتزاز وقرا رسالته وهو يرفع نظره لصاحبه : ابو خالد ، رح انا بناوب عنك
صاحبه : الله يجزاك خير وعساك على قوة
ابتسم له عزام وقرا رسالتها وهو يرد عليها : عادي ، كيف كان الفحص ؟
جوري : يوتر شوي بس ان شاء الله تكون النتايج مرضيه
عزام : متى قالوك بيرسلون النتايج ؟
جوري : بكره بنفس الوقت
عزام : بأذن الله مقبوله
جوري : يارب ، فيني نوم بس ابي اقعد لتسعه صباح عشان اشوف النتيجة
عزام : عطيني معلوماتك وانا بدخل الموقع وبدق عليك لو طلعت
جوري : مراح تنام ؟
عزام : لا مستلم

-قصيد-
تصورت مع رهام ورجعوا لجناحها من كثروا الضيوف
قصيد بتوتر : احس مكياجي راح
رهام : لا ما راح اهدي شفيك توترتي
قصيد : مدري احس توترت شوفي ايدي ترجف
رهام : انا بنزل بجيب لك اكل لا تدوخين علينا وبشوف خالتي وورد وبرجع
ونزلت رهام وارسلت قصيد لمعن : الساعات تفصلنا متوتر مثلي ؟
—
معن *
كان الكل بقسم الرجال تحت الضيافة على اكمل وجه ، والكل متواجد ويتسائل عن غياب معن الي مختفي
تقدم احمد وهو يسأل عمه : عمي وين معن الشيخ وصل ؟
ابو معن :مدري وينه ، دقيت عليه ما يرد ، دق دق عليه
—
كان بطريقه من قصر اهله لقصر ملكته لكن اختلفت خطته من اتصل عليه وكيله وهو يذكره بالمؤتمر الصحفي الي نسى انه يأجله ، والي كان يضم رؤساء ونواب دول عربية ،ما قدر يأجله وهو اهم مؤتمر كان يجهز له من شهور ويوصيه عليه ابوه
غير وجهته لمقر المؤتمر ، ووصل ونزل بكامل أناقته وريحته البخور والعود الفاخر سابقته بالمؤتمر ، دخل وهو يسلم على الروساء وجلس بوسطهم وامام الكاميرات ، ما كان باله مع المذيعة الي كانت ترحب من جديد ، وباله مع ملكته وقصيد وابوه
بدون ادنى اهتمام للكاميرات طلع جواله الي يدق وكان احمد
قفل المكالمة وكان بيقفل جواله لكن قرأ اشعار قصيد من ارسلت : وينك ؟ سند يقول الشيخ وصل لكن انت مختفي
توتر معن وقفل جواله من انتبه للمكان الي هو ومن صوت الكاميرات ، كان يدعي يخلص المؤتمر بسرعه والمذيعة تستعجل باسئلتها ، لكن كان الوقت بطيء والنواب ردودهم كانت سياسيه ودقيقة وما قدر يصبر اكثر وقرب من المايك وهو يرد على سؤال المذيعة بابتسامة : انا اسف واطلب منكم تعذروني لكن اليوم ملكتي والوقت ما يسمح لي ارد على اسئلتكم السياسية ، اعتذر بشدة حبيبتي تنتظرني
وقام وهو يعطف بشته ومتجاهل الكاميرات والصحفيين وتباريك النواب الي بجنبه ، وطلع بسرعه وهو مستعجل وركب سيارته وحرك على القصر
—
ركضت رهام لجناح قصيد من انتشرت مقابلة معن
دخلت عليها وشافته تروح وتجي بالجناح : ما يرد ما يرد
رهام : شوفي شوفي
ركضت لها وهي توريها المؤتمر رفعت الصوت وهي تسمع كلامه وتتأمل ابتسامته
رهام بابتسامة : وين تلقين شخص جريء يقول حبيبتي بمؤتمر ويعترف قدام الناس انه يحب ، يا بختك فيه بس
حضنتها قصيد : ويا بختي فيك
—
وصل للقصر اخيرا ودخل بسيارته وهو يناظر عيال اعمامه واعمامه واقفين برا وينتظرونه ، نزل من سيارته بعد ما ضبط شكله وعدل بشته ومشى وهو يدخل المجلس الي كان يضم اكبر عدد من الرجال ناظرهم والقى سلامه وتقدم وهو يجلس بجنب الشيخ وبداوا بطقوس العقد بعد ما سأله الشيخ على حاله

-جوري-
ما نامت وجلست تسولف مع عزام للصباح
وهم ينتظرون رسالة الفحص مع بعض ، قامت تسوي لها فطور وهي تكلمه مكالمة ، فتحت البيضة وطاحت على الارض وصرخت من وصلها اشعار الرسايل وبصراخ : جات جات الرساله
عزام بخوف : الله يخرشك لابس سماعه
جوري بضحكة : اسفه تحمست
عزام بنفس ضحكته : يالله ادخلي وعلميني النتيجة
تنهدت جوري بخوف : يالله بسم الله
ودخلت الرسايل النصية وهي تغمض عيونها : يارب يارب
عزام بضحكة : اخلصيي لا توتريني
فتحت عيونها وابتسمت من قرات الرساله وبدون اي مقدمات صرخت : نجحت نجحح الفحصص
من صرختها قام من مكانه وهو متحمس معها وناسي انه بالمركز وتحت انظار العكسر : كفووو
صارت تدور بالمطبخ وهي فرحانه ، وفرحتها تشابه فرحة عزام
عزام بفرحه : بتصيرين بقائمة المسؤول عنهم بالدورة
جوري : ما فهمت ؟
عزام : انا المسؤول عنك بالدورة ودورتك بتكون بمكة
جوري : صدق متى؟
عزام : ما ادري لسى ما ارسلوا لنا الوقت
—-
صحت وهي تسحب جوالها وفزت وهي تركض لدورات المياة
وتروشت على السريع وطلعت وهي تجفف شعرها وتجهز لبسها
صحى من اشعة الشمس بعد ما فتحت مزن الستاير : الساعة كم ؟
مزن : لا تسألني متاخره متاخره من اول يوم اكيدد
ولفت على صوت الباب الي دق ودخلت جنى : تعرفين ترسمين ايلانير ؟
مزن : ليه ما صحيتني احسني مره متاخره
جنى : لا مره بدري ما عليك
مزن : اوف قمت مفزوعه
جنى وهي تناظر لبسها : اخس اخس وشذا الكشخه
مزن : صدق حلو ؟
جنى :ايه
ركضت مزن للي طلع من دورات المياه وهي توقف قدامه وتعطيه ظهرها : لبسني اياه
مسح على عيونه ولبسها سلسالها وتوجه وهو يفرش سجادته ويصلي الفجر ، سحبت مزن الايلانير وهي ترسم لجنى
وبعد دقايق خلصوا وطلعت جنى لغرفتها وتقدمت مزن وهي توقف بجنب جابر الي كان واقف قدام المرايه ويضبط بدلته وهي تلبس الحلق وتناظره بتأمل وهو يرش عطره ويلبس ساعته
وناظرها بتسأول : افطرتي ؟
مزن : لا
جابر : وبتروحين وانتي مو ماكله شي ؟
مزن : ما يخالف بنشتري شي على طريقنا
جابر : يالله انتظرك بالسيارة واستعجلي عشان يمدينا نشتري فطور

"صلوا على محمد"

-قصيد-
توترت من قالوا صار دورك توقعين دخلت عليها العنود بالعقد توترت قصيد واخذت القلم وهي تقرا اسمه وتتأمل توقيعه
وسمّت بالله وهي تطبع حبر توقيعها بجنبه سلمت على العنود الي قالت : مبروك ويا بخت اخوي فيك
قصيد بابتسامة : الله يبارك يروحي
وطلعت العنود وقامت وهي تحضن رهام وهي تصرخ : واخيرا واخييرا صرت لهرهام ارتبطت فييه
رهام وهي تمسح دموعها الي خانتها : الله يوفقك
بعد دقايق قالوا لها وقت زفتها توترت وهي تشيل فستانها الاسود ولبست كعبها الي نزلته من التوتر ومشت مع رهام وهم يطلعون من جناحها ومشت وهي تشد على الورد الي بايدها اشتغلت موسيقى هادية وزادت نبضات قلبها ومشت لجهة الدرج بخطوات هادية وصلت لقمة الدرج وهي تناظر المعازيم بلعت ريقها ونزلت بخطواتها وهي حاسه بنظرات الكل الي زادت توترها وصلت اخيرا لمكانها المخصص وقعدت وهي تبتسم وقامت من جات ام معن تسلم عليها وتبارك لها وتقدموا بنات اعمامه وهم يسلمون عليها وشوي شوي انتهت من السلام وقامت من قالوا صار وقت تدخلين على معن قامت وهي متحمسه وبنفس الوقت متوترة قامت لحالها وتوجهت لغرفة الي هو فيها ناظرت وراها ما لقت احد وركضت لجهة الغرفة قبل تفتح الباب شافته من جاء باب الرجال ولفت وهي تركض بفرحه لجهته اتسعت ابتسامته من شافها بكامل اناقتها وطلتها وفتح لها احضانه وحضنها من ركضت لجهته وشد على خصرها وهو يدور فيها وهي تهمس له وبدموع : اخيرا اخيرا معن اخيرا
بعدها عن حضنه وهو يناظرها : اي والله اخيرا ياروح معن وقلبه
ونزل نظراته لشفايفها المرسومة بروج احمر ومقدر يقاوم وقرب منها وهو يطبع قبلاته بشفايفها بكل حُب وتعبيرا عن فرحته
ابتعد عنها وهو يناظرها بحب : اخذتك من ابوك وصرتي من نصيبي وباخذك معي لندن الحين عندي شغله مهمه ومابيك تفارقيني دقيقة من بعد ما ارتبط اسمي باسمك
ابتسمت قصيد : ولا انا بسمح لك تفارقني
سحبها من ايدها وشد عليها وطلعوا من احد الابواب الخلفية للقصر وشاف الكل داخل المجلسة شد على ايدها وركض معها رفعت فستانها وهي تركض معه وركبوا سيارته ولف عليها : والحين تقدرين تطلعين بدون علم اهلك من صرتي حُرمي
قصيد وهي تشهق : اصبر جوالي امانه ارسل لرهام تجيبه
معن بضحكة : هذا همك الحين ؟
قصيد بضحكة : بوثق بكلشي تعرفني مشهوره
طلع جواله وهو يرسل لرهام وماهي الا دقايق ووصلت العاملة وهي تعطي قصيد جوالهاوحرك معن وهو يتوجه للمطار وعلى لندن ، كانت تصور لحظاتها معه وتصور شكله بالبشت مسكت ايده وصورت كم صورة ونزلتها بحسابها وكتبت : ابتدت احلى لحظاتي مع اميري من تعليق وانتهت قصتنا بزواج الاميرة بالامير â‌¤ï¸ڈ


-مرور زمني-
بدأت جوري بالتدريب تحت مسؤولية ومراقبة عزام الي كان يراقبها من بين المتدربات كان يراقب كل تحركاتها ونفسيتهاكانت تنام تصحى وتبدا تدريب وعلى هذا الجدول لمدة اربعة شهور تدريب ما حست فيها وبمرورها وهي تقضي مية وعشرين يوم مع عزام وفي كليوم تكتشف وتتعرف على شخصيته كانت تكلمه بين فترات الاستراحة واحيان تسهر معه وتتغيب عن التدريب برضاه
تعرفت على انحاء الحرم كله معه كانت تاخذ جواله وتصور لحظاتهم مع بعض وتصور شكلها بالبدلة وتتصل على اهلها من جواله لعدم السماح لهم باستخدام الجوالات بالدورة
تعرف على شخصيتها واسلوبها وش تحب وش ما تحب تعرف عليها اكثر من الاوقات الي قضاها معها وهو يتمنى ما تنتهي الدورة ويكون المسؤول عنها لفترة اطول وكل دعوة تدعيها وتخص انتهاء الدورة بسرعة كان يردد بداخله ( اللهم لا تُعجل بانتهاء الدورة واسألك اللهم تأخيرها) .
بعد اسابيع انتهت دورتها وهي تركض معه لخارج الحرم
شافت اهلها وركضت وهي تحضن امها وتسلم عليها بكل شوق
حضنت جابر الي ناظرها بكل فخر ودق لها التحية : تستاهلينها يالجندي اول
ابتسمت له وهي تدق له التحية ورجعت مع اهلها لبيتهم وهي تسرد لهم كل شي صار
بعد اسبوع من انتهاء دورتها تقدم لخطبتها عزام والفرحه ما توسعها تحس انه حبته اكثر وتعلقت فيه من الشهور الي قضتها معه واكتملت فرحتها من لبسها خاتمها وحددوا زواجهم مع زواج جابر ومزن الي حجزوا تذاكرهم لسويسرا بعد خطبة عزام وجوري وهم يقضون اجازاتهم مع بعض ويخططون لزواجهم بكل هداوة ويبتعدون عن اجواء الدوامات ، صار جابر بالنسبه لها حبيب وصديق وزوج كانت تعتبره كلشي بحياتها وتقوله كل حدث يصير معها وكان يعيش معها ايامها بالتخصص ويساعدها بدراستها ويقضي اكثر اوقاته معهاوكأنها عوضته عن وحدته واكتئابه الي كان يعالجه بحبس نفسه بالملحق تعلق فيها لدرجة تبرع بكليته وهو عارف كل العواقب والاضرار الي ممكن تصيبه ما غلت عليه كليته وتبرع لها لجل تعيش وتبقى معه لاخر انفاسه وعوضها عن زوجها الي ما تعرفت عليه ولا قضت معه اي لحظة تُذكر صار لها العوض بعد اهلها الي توفوا وعن اهل قريتها الي تبروا منها كل يوم بيوم يزيد ويتجدد حبهم لبعض وتعلقهم ببعض بعد كلشي صار لهم من بداية قتله لزوجها لنهاية تبرعه بكليته لها .
انتهت قصص ابطالي بخطبتهم لبعض
انتصر الحب الي كان عبارة عن بنيان من افعال وليس اقوال
انتصر بايتاء البيوت من ابوابها ، انتصر بالثقة وثم الحب وثم الخطبة ، وانتهى بالايفاء بالوعود واخُتتم بتلبيس الخواتم ، كانت بدايته خيانه ثقة اهل وانتهى بحضور الاهل لخطبة ابناءهم â‌¤ï¸ڈ
•
•

-
-
-

وَلَقَدْ آتَيْنَا دَاوُودَ وَسُلَيْمَانَ عِلْمًا وَقَالَا الْحَمْدُ لِلَّهِ الَّذِي فَضَّلَنَا عَلَى كَثِيرٍ مِنْ عِبَادِهِ الْمُؤْمِنِينَ)

-بارت فارغ-

| لن اكتب نهايات لا يقراها القارئ ولن يتخطاها الكاتب |
|سحر البدايات محى روعة النهايات |

- كُتبت وتمت بحُب-
ابيحوا ما احببتم سيُقرا بكل حُب
ظ،ظ£/ظ£/ظ،ظ¤ظ¤ظ¤
â‌¤ï¸ڈ

النهاية