ياسعود يامشكاي ويش التدابير
لاتشتكي جور السنين وشطفها
جور السنين يحل ويمر ويصير
راجع حياتك واكثر الناس شفها
الناس لاحقها من الوقت تاثيير
وتصبر على باس السنين وصلفها
تميل ميلات المقادير وتغير
وان وصفت بتعذب اللي وصفها
فحرص على قرب الرجال المناعير
الـلي دروب المرجله تحترفها
تلقى بخوتهم معزه وتقدير
ومجالسٍ مادنـست من عرفها
تاقف معك لو همك اكبر من النير
وبعزمها حتى الصعاب اتعسفها
ولا قدر الله ثم رمتك المقادير
الرجل منهم وقفته لا وقفها
تسوا لها فزعة صفوف وطوابير
ماهوب لا شاف الصمايل حرفها
يقلط على الشده كما سالم الزير
وتامن به الديره وهو في طرفها
لامازهمته قام يشتح كما الطير
لاضف جنحانه وكفه عكفها
واهل الردى مالك وراها مداوير
جنب مجالسها وجنب ولفها
و اضحكتلك في السنين المياسير لابد في وقت القسا تكتشفها
تفِرح بك الشمات لو ذنبك اصغير
وتحتار في اصغر غلطةٍ تقترفها
ويصير همك كبر هضبة شمنصير
لكن جنب معرفتها وعفها
لانذال رفقتها مهونه وتقصـير
وتِكثر عنا نفسك وتكِثر حسفها
فالرفقه اللي ماتدلك على خير
آللّه يلعنها ويلعن جدفها
ولا ترادع جاهـلين المحاضير
ولو تعترض لك كلمة اللاش طفها
واحفظ السانك لو بلوك المعاثير
الكلمه اللي دون ميزان خفها
يجوز ترمي كلمة دون تفكير
والصبح سودان القلوب اتخطفها
واصدر لياما عفت صدارت ابعير
لاترتجيها واطلب الله خلفها
وترا النصيب يصيب مافيه تغيير
لو تجبد امواج البحر وتغرفها
وعذر الرجال الوافيه خله ايصير
ابيك تعذرها وتقبل وسفها
العذر يقبل لاحصل فيه تبرير
امن الرجال اللي صريحٍ هدفها
في كل شي قد تجوز المعاذير
الا على اعراض الرجال وشرفها
اقولها وانا الذي سلوتي غـير
البعد عن ضيق البيوت وكنفها
اسج في خبت كسته النواوير
حيثه ظفر روحي وحيثه نصفها
واسواق الاسهم والذهب والدنانير
لو سلموها في يديّ اصطرفها
ينوبها ملحاٍ من ابل المناصير
ارعابها زهر الفياض وقطفها