ودعتك الله لو على قلبي أخطيت
وحاربتني من دون ذنب وخطيه
أحسبك تذكرني إذا أصبحت وأمسيت
وأثرك على فرقاي نفسك هنيه
الله اكبر كيف عني تخليت
من بعد ما علقت روحي البريه
وش غيرك وش بدلك ليه صديت
وأنت الذي بالقلب نبض وهويه
من هو بقى لي بعدما عني اقفيت
وقدمتني للحزن أثمن هديه
كلش تخيلته ولا يوم ظنيت
إنك لحد غيري ولا انتا ب ليه
ويلك من الله كيف بالحب ضحيت
قلبك حجر ما حن يوم عليه
اللي بنينا بعمر في يوم هديت
وأحلامنا ما عاد منها بقيه
إتعد غلطاتي إذا يوم زليت
من دون مدري وين ذيك الحميه
مافيه معصوم الخطا لو تحريت
ولا فيه كامل غير رب البريه
ولو ما أحبك ما نشدتك ولا اطريت
بعدك وصدك وإنتخيتك نخيه
ترجع لقلب يوم بالعقل حبيت
وتترك هل الأحقاد وأهل الوشيه
خايف عليك وخايف منك ياليت
من يوم حبيتك وصرت الضحيه
لا نيب حي بعد هجرك ولا ميت
ولا ني مريض ينعرف بالشكيه
لكني أدرى بحالتي لا ترديت
ولا ينفع الملتاع طبه وكيه
مالي سوى اللي كلما راح ناديت
يا كود يسمعني ويرجع إليه