البارت الخامس عشر.**
يسوق السيارة بتفكير عميق ...
قطع افكارو صوت الجوال*
اخذ الجوال ورد :الو*
مراد :ايوا الو*
وليد :هلااا والله بمراد كيفك ؟*
مراد :تمام الحمد الله وانت كيفك ؟*
وليد :والله الحمد الله طيبين*
مراد:ياهو فينك؟*
وليد باستغراب :فيني ؟؟*
مراد :اشبك ماجيت يعني*
وليد استغرب اكثر :اجي فين ؟*
مراد استغرب :اشبك ياهو ايش تجي فين ؟ نسيت اننا متواعدين نخرج نسهر سوا ؟*
وليد افتكر :اووو والله نسيت اعذرني والله مررة نسيت انت قلي وينك ذحين؟*
مراد :قريب من الديوانيه*
وليد :طيب ولايهمك اوصفلي مكانها تعرف انا اول مرة اجيكم ياريت بس ترسلي العنوان*
مراد :خلاص ولايهمك دقايق والعنوان عندك يالله نستناك لاتتأخر*
وليد :ان شاءالله اكيد ..يالله مع السلامه*
مراد:مع السلامه*
وليد قفل وحط الجوال جنبو :اوووف استغفر الله انا كيف نسيت وبعدين ايش اقول لاهلي اللي يستنوني وقلك حنتفاهم خليني اكلم ابويا بعدين اشوف يقول ......

تطالع فيها باستغراب*
قامت من مكانها وعيونهم على بعض اتوجهت لممر صغير :نعم ؟*
ياسر صوتو تعب *:مروة انا محتاجك
مروة خافت من الصوت :طيب؟*
ياسر بترجي:مروة الله يخليك*
مروة :لا والله ؟ ليش ماكلمت ربا ؟؟؟ ايش معني تبغاني ذحين؟
ياسر :ربا ؟ مين رباااا
مروة عصبت :لابالله سوي نفسك ماتعرفها حتلعب على مين ياحبيبي*
ياسر :مروة الله يخليك فهميني وقت ثاني انا محتاجك والله حسي فيا *
مروة :انا مشغوله ياياسر ياريت انت اللي حسيت فيا لما جيتك مع السلامه*
قفلت بسرعه وقلبها يدق صوتو يرن في اذنها باين انو محتاجلها .....
اخذت نفس واتوجهت للصاله وجلست بهدوء*
بدور بكل براءه تطالع فيها وتبتسم :اشبك ؟*
مروة ابتسمت مجامله :لالا ولاشي*
بدور ماحبت تدخل مدت يدها وابتسمت :طيب ياجماعه يالله اتفضلو على العشا*
مروة وماريا وقفو وبدور تاشر لتالا وربا :يالله اتفضلو*
تالا وربا ابتسموا ووقفو*
بدور ومروة وماريا مشيو*
تالا بتمشي سحبتها ربا *انفجعت :اووف اشبك؟؟؟*
ربا : اشبها ذيك تطل فيا وهيا تكلم*
تالا مستغربه :انا ايش دراااااني وبعدين احسها يانااس مرررة طيبه*
ربا رفعت حاجبها :انقلعي قلك ياناس امشي امشي بس*
تالا مشيت غسلت يدها ودخلت الغرفه*
ربا لحقتها وجلست تغسل يدها*
لمحتها واقفه تغسل وقفت*
بدور :اشبك على وين ؟*
مروة :لالا بس بجيب شي وجايه*
بدور :طيب لاتتاخري*
بدور تضيف ماريا وتالا ومشغوله*
ربا تغسل ومسررررحه المويه مفكوكة وهيا تفكر في الاسم والنظرات*
وقفت جنبها :انتي من متى تعرفي ياسر ؟*
ربا انتبهت وانفجعت من السؤال *بعد ثواني .... مين ياسر؟؟*
مروة ابتسمت بخبث : افاا ياسر ماتعرفيييه ؟*
ربا مستغربه : مين ياسرر ذا ؟*
مروة غمزتلها :اللي مسك يدك في الملاهي*
ربا عدلت وقفتها وقفلت المويه :لحظه لحظه انتي لازم تفهمي وتفهميني*
اول شي انا ياسر ذا ما اعرفو ولا عرفت اسمو الاا دوبو منك وترا ما اعرف انتي مين ولا ايش تقربيلو واساسا مايهمني هوا مين ولاليا علاقه بيه هوا ما اتجرأ وكلمني الا عشان مرة قبل يوم الملاهي شفتو في مول وهوا اللي حاول يغازلني ولا انا لا اعرفو ولايعرفني*
مروة تسمع ومهي مصدقه :امم ماشاءالله وعلى طول كذا مسكه يد وكلاااام*
ربا :لو سمحتي احترمي نفسك قله الادب ذي اساليه هوا عنها*
مشيت وسابتها ودخلت الغرفه بسرعه*
مروة اعصابها واصله للاخير ومهي مستوعبه شي*

منسدح على السرير ...
اتنهد من قلبو : والله وحشتني ذي البنت*
بس مني عارف كيف اوصلها واساسا ايش حتقول عليا اكلمها ذا الوقت لالا بلاش*
بعد دقايق *من التفكير يتقلب يمين ويسار مو راضي يجيه النوم .....*
طيب بس اتطمن مافيها شي*
مسك جوالو وارسلها (مساء الخير)*

معصبه ومهي مع اللي حولها ابدا*
سمعت الجوال بس طنشت*

جلس بتوتر وبدا يقلق:اشبها ذي ماترد*
ارسلها (اسف اذا ازعجتك )
(بس حبيت اطمن )*

صوت جوالها خلاهم يطالعو فيها*
تالا اشرتلها تقفل الصوت*
ربا مسكت الجوال وشافت المسجات*
الرقم غريب*
(مين ؟؟)

طالع في اللي ارسلتو واستغرب :بسم الله اشبها ؟؟؟*
ارسلها*
(اشبك مسرع نسيتيني )*

ربا مهي فايقه ابدا*
(استغفر الله حتتكلمي او حتتكلم وتقولي مين ولا ترا حنزل )*

مفجووع من كلامها*
(اشبك ياماريا ؟ معقوله ماعرفتيني؟)*

ربا تطالع وشهقت :ياااويلي*

مروة وبدور يتكلمو*
تالا وماريا طالعو فيها باستغراب *:اشبك ؟؟*
*
ارسلها (عموما اسف اذا ازعجتك بس حبيت اطمن واعرف ايش صار لجوالك تصبحي على خير يارب )*

ربا مفجوعه ارسلت بسرعه (لالالا استتتتتنى)*
اشرت لماريا*
ماريا استغربت واشرت:ايش في؟؟؟*
ربا نزلت للصاله وماريا وراها*
ربا :تعالي الحقي دكتورك كلمني ورديت عليه خليتو يقول خلاص اسف اذا ازعجتك*
ماريا شهقت : ااااااحمد ؟؟؟؟؟؟*
ربا : ايوا حبيبك*
ماريا دفتها : ياشيخه روحي بعدين نتفاهم*
سحبت الجوال وعينها كل مالها توسع من الفجعه والمحادثة اللي بينهم*
*
ارسلت ( احمد اعذررني بس انا اول ارسلتلك من جوال صحبتي فهيا اللي ردت عليك اسفه والله انا اللي اعتذر )*

احمد ارتاااح*
( لالا ماعليك حصل خير بس اصلا انا الغلطان ارسلت قبل لا اتاكد )*

ماريا تشوف الرد ( ياااقلبي انت ) قالتها بشويش وكتبتها بدون ماتحس واترسلت*

احمد يطالع مفجوووع وكل شويه يقرا يتاكد بلع ريقو وقلبوو راح فيها ماعمرو سمع كلام حلو تنح في الشاشه وماعرف ايش يرد*

ماريا تطالع في الشاشه صرررخت *ورمت الجوال : رباااااااااا يااااااااويلي ربا الحقيني شوفي ايش ارسلت والله بالغلط انا مدري كيف اترسلت*
ربا مفجوعه : هيييييي وجع يوووجع بليسك جواااااااااالي قدو مكسر خلللقه*

ماريا يدها على قلبها : ارسلتلو بالغللللللط*

ربا مسكت الجوال وتدورو تشوف في شي صارلو ولا لا*
فتحت الجوال وقرت المحادثة *
تطالع مفجوعه وضحكت : حررركات ايش ذا ؟؟ (غمزتلها) والله يطلع منك كلاام هذا وهوا محترم ومسكين مايتكلم*
ماريا : رباااا مني نااااقصتك ذحين ايش اسوووي؟؟؟؟؟*
ربا مستغربه : ايش ايش تسوي عاادي مسكين خليه يسمع كلمه حلوة منك تلاقيه فقد الامل*
ماريا ملامحها خوف : من جد ما ارسل شي والله بيفهمني غل
قاطع كلامها صوت الجوال*
ماريا تطالع في ربا : رررد رددد*
ربا مسكت الجوال تبا تفتحو*
ماريا نطت فوقها : جيييييبي والله ماتشوفي*
ربا تضحك وتبعد منها : وريني يالله*
ماريا تحاول تاخذو بالقوه : ربااااا يا....سيبيه*
ربا بعدت بقوه وجريت وتضحك : من جد ما اخليك تاخذيه لين اشوفو*
ماريا تجري وراها : رباااااااااا خلااااص بلا هباله جيبيييي بشوووف*

ربا تجري وتحاول تفتح الجوال*

ماريا تجري واخذت المخده ورمتها عليها*
جات في ربا : اااااااااه فجعتينييي*
ماريا مسكت يدها بقوة وسحبت الجوال وجررريت على الحمام*
ربا تلحق وراها*
ماريا قربت من الحمام تبا تدخل*
ربا مدت رجلها وكعبلتها*
طاااحت على وجهها *وصرررخت*
ربا خااافت وصنمت في مكانها*
*
ماريا مسكت الجوال وهيا تتالم وفتحت تقرا*
( ما ادري ايش ارد بصراحه وقفتي قلبي بكلمه يعني يمكن تستغربي مني بس ما اعرف والله من جد ما اعرف ايش ارد ومررة مني قادر اعبرلك عن اللي حاسو بكلامك )*

ماريا : ااااه ياقلللببي فداااك الطيحه ياشييخ*

ربا اطمنت واتوجهتلها بسرعه وسحبت الجوال*
خرجت تالا مستغربه: هيي انتو اشبكم فضحتونا صوتكم واصل لين جووا*

ماريا قامت :حسبييي الله على بليسك ياربا كسرتينييي*

ربا تقرا ومبتتتتتتتتسمه : يااربي ياماريااا ارووووحلك كلااام اصيرلك جمممل طلع احسن منك*
ماريا ارتبكت : ربا انكتمي*
تالا تطالع فيهم : مين هوا ذا ؟*
ربا استوعبت : يختي تعالي شوفي بالله ياتالا واحد قالب التويتر كلو بكلامو قامت ماريا مسويه انها تجاريه كتبت كلمتين ورد عليها بعشرة*
ماريا تطالع وماسكه ضحكتها*
ربا تقلب في الجوال ولارفعت راسها عشان لاتنفضح*
تالا تحرك راسها باسف: صغااار وربي مررة*
امشو قدااامي الحريم جوا وانتو هنا استهبال*
ماريا دخلت بسرعه*
تالا بصوت حازم : ربااااا*
ربا قفلت الجوال : طيب طيب جااايه*

قاعد مهموووم يفكر فيها ويفكر في اللي سواه فيها :ياارببي والله تعبااان مرررة مهي حاااسه بيااا*
قام ومحتتتاج احد يواسيه يقرب منو يحسسوا بالامان ...حاسس بالوحده كانت ماليه عليه حياتو بس ساابتو وباين انها كرهتو ....
رما نفسو على السرير وملامحو مهموومة*

جوالو يدق ماعبررو ولاطل فيه*
بعد دقايق الجوال رجع يررن*
ويرن ويرن*
مسك الجوال بطفش :استغفر الله ام الازعاج مرررة مني فايق لاحد*
شاف الاسم وحاول يطنش بس رد يمكن شي يواسيه : الو*
انس باستغرااب: ايوا الو*
ياسر : ايوا انس*
انس : اشبك ياواد اشبو صوتو كذا؟*
ياسر :تعباان*
انس: اشبك تعبان ايش في؟؟؟؟*
ياسر : انس والله ياشيخ مرررة مهموم*
انس : طيب طيب اسمع ايش رايك تجيني*
ياسر :اجيك وين ؟*
انس : امم في مركز انا موجود فيه انا حوصفلك اياه انت تعال بس في شغله ابا استشيرك فيها*
ياسر بطفش: ياشيخ مررة مو وقت استشارة منت شاييفني شويه وارمي نفسي مرررة واصل ترا*
انس يحاول يهديه: معليه ياهو بس دقايق لو ما ارتحت ارجع*
ياسر اتافف : خلاص طيب يصير خير*
انس : يالله استناك لاتتاخر*
ياسر : طيب خلاص سلام*
انس: سلام*

قفل منو وقام واتجهز ونزل ....

انس ارسلو العنوان
ياسر يقرا ومستغرب : ايش ذا المكان غريبه*

بعد دقايق وصل للعنوان *يطالع في المركز من برا ويقرا اللوحه *مفجوع : دار ايتام واحتياجات؟؟؟؟؟؟؟؟؟؟؟؟*
مسك جوالو واتصل : ايوا الو انس انا تحت*
انس نزل :طيب يالله اهو شايفك*
قفل الجوال واتوجهلو وفتح الباب ودخل : سلااام*
ياسر : وعليكم السلام*
انس : اشبك ياهو والله اقلقتني عليك*
ياسر : لالا ولاشي بس في كم شي جايبلي الهم المهم انت ماعليك ذحين قلي ايش ذا ؟*
انس مستغرب : ايش ايش ذا ؟*
ياسر طل في المركز*
انس فهمو : اهاا قصدك المركز .. والله شوف انا صارلي فترة هنا*
ياسر مستغرب : ايش تسوي ؟؟؟؟؟
انس : والله انت عارف يعني وضعي كيف ابويا وامي توفو ويعني خالي مايقدر يشيلني تعرف الظروف كيف*
ياسر :طيب؟؟؟*
انس : فوالله خالي عرض عليا اني اشتغل هنا وانا سالت وقالولي انو في سكن وجامعه وشغل في نفس الوقت فقلت ليش لا اشتغل وادرس واسكن ولا اثقل على خالي واهو الحمد الله ماشيه اموري*

ياسر: وساكن كذا ببلاش؟*
انس :لاهوا طبعا في شروط يعني اللي اصغر من الجامعه سكن ودراسه ببلاش طبعا بس انا اشتغل وادرس ونص راتبي يرجع للمركز*
ياسر عين على الطريق وعين على انس: اهااا*
انس : طيب المهم بسالك*
ياسر : امم؟؟*
انس : رائد ياشيخ مختفي مررة والله مو من عوايدو سمعت من حارس الشاليه انو مسافر بس غريبه اول مرة يسافر ومايقلي*
ياسر : والله مني عارف بس من جد زمان عنو طيب ماحاولت تتصل ؟*
انس : اتصلت كذا مرة مايرد او مغلق*
ياسر : اهااا والله ما ادري بس الله يعينو على ما ابتلاه تلاقيه في مصيبه اعرفووو انا مايختفي الا في المصايب الله يستر بس*
انس : الا على سيرة المغلق ومايرد عندك شاحن ايفون؟*
ياسر : ايوا اهو ليش؟ غيرت جوالك؟*
انس : غيرررت ميين لاياشيخ*
مد يدو وطلع الجوال وشحنو*
ياسر مستغرب : اجل جوال مين ذا ؟
انس : وحدة*
ياسر مفجوع : جوال وحدددة؟؟؟*
انس : اشبك اشبك اكلتني ايوا وحده اعطتني اياه*
ياسر طالع في انس : انس مو عليا ذي الحركات جوال مين ذا وكيف صار معاك؟*
انس : اعوذ بالله مافي شي يتخبى عليك*
ياسر : انت اللي ماتعرف تخبي من شكلك اصلا مبين انو معاك مصييه*
انس : في بنات جامعه يشتغلو في المركز مشاريع وكذا يعني مصممات ديكور وذي الشغلات وينفذو اعمالهم عندنا وفي بنت اخذت غرفتي وتصمم فيها بس طبعا وقت مانخرج احنا هما يدخلو يشتغلو بس اليوم الصباح اتاخرت عن الجامعه ولما خرجت من الحمام لقيت شنتطتها محطوطه على الطاوله واخذت الجوال وخرجت قبل ماتجي*
ياسر يسمع وكل شويه ينفجع اكثر : ياسلام وتاخذ جوالها كذا ؟؟؟ سرقه؟*
انس: سرقه ايش ياعمي انا بس اخذتو لاني مالقيت شي ثمين اخذو*
ياسر : وليش تاخذ اصلاااا مين ذي البنت عشان تاخذ منها*
انس:بيني وبينك البنت دخلت مزاجي بس مو مرررة يعني عاجبني اخلاصها في الشغل واندماجها بس مرة قلتلها بشتغل معاك او اساعدك بس رفضت واستصغرتني فحبيت اردلها اياها وبس*
ياسر: وكيف حتردها؟*
انس : تسالني انا ؟؟؟ انا جايبك ليش ؟ اصلا ما اعرف كيف استخدمو ذا الجوال*
ياسر جنب سيارتو*
ومسك الجوال ولما شحن انفتح*
ياسر ماسك الجوال ويطالع : من جدك انت ايش جوال الهبل ذا ايش تبغا فيه اصلا عندك ميه طريقه وطريقه*
انس : اقلك شوف شوف وبس*
ياسر : اصبر خلينا نشوف اللي جاها والله البرامج ضاربه عندها تويتر واتس كيك ودنياا*
فتح الكيك*
يطالع في المحادثات مالقى شي*
فتح التوبتر*
لالا ايش ذا( دكتوري احمد )
بالله شوف ايش الكلام والدنيا*
انس : ايووووووا هذا دكتورها في الجامعه شفتو اول يوم لهم والله شكلهم وراهم شي ذولا*
ياسر يقرا: بس والله محترمين باين مرررة*
انس : انت ايش دراك يمكن بينهم اشياء غير ذا*
ياسر يقرا ومندمج : اقلك انت شفتو بعد ذا اليوم ؟*
انس ؛ لا ليش؟*
ياسر : باين انو سابها وراح اشتغل في مكان ثاني*
انس : اووف*
ياسر خرج وفتح الواتس : اايييهي عاد ذا الكلام فيه مايخلص بالله ايش تبغا منو*
انس: انت مالك صلاح ورينا وبعدين يصير خير*
ياسر يفتح المحادثات : والله امها ترا قالبه عليها عشان الجوال شكلها مهي داريه انو ضيعتو*
انس يضحك : طيب اللي بعدو*
ياسر فتح بدور : والله مدري مين ذي بدور بس تقول مستنيتها واتاخرت شكلها اليوم رايحه عندها*
انس : طيب ؟ ايش حستفيد من ذا ذحين ؟*
ياسر يقلب : انا ادري عنك*
فتح المحادثة : ربا يالله ياكثر الناس اللي تلاقيهم في جوالات البنات المهم هذي تقول شوفي صور
وقف كلامو لما شاف الصورة بعد الجوال من بينهم وجلس يطالع ومفجوع*
انس : هييي انت اشبك كمل واشبك اخذت الجوال ؟*
ياسر متنح ومستغغغررب : اسمها ربااا*
انس يطالع فيه : ربا مين مارررريا اسمها ماريا*
ياسر طالع فيه : هاا ؟*
انس *اتأفف : اقلك جيب جيب الجوال انت مامنك فايدة وييينك يارائد والله محد يخارجني غيرو*
ياسر مسك الجوال بقوه : استنى شويه*
جلس يقرا المحادثة ومو مستوعب من وين تطلعلو ذي من كل مكان

في الطريق ...
مسك جوالو واتصل ..: الوو*

جالس في الصاله بين امو وابوه *مسك الجوال ورد : الو هلا مراد*
مراد : هلا وليد اسمع*
وليد : ايوا ؟*
مراد : ترا رحت الديوانيه والشباب راحو اغلبهم مشغولين ايش رايك نخرج نتعشى برا ؟*
وليد : لا لا مافي داعي تسلم انا كنت حتصل عليك واعتذر منك عندي كم شغله مع الاهل وماحقدر والله*
مراد؛ اهااا لالا عادي خذ راحتك يالله ان شاءالله مرة ثانيه*
وليد: ان شاءالله*
مراد : *طيب يالله مع السلامه *

قفل منو ..
ابو وليد وام وليد في الصاله على الكنبه ووليد مقابلهم*
ابو وليد : ها ياولدي ايش قلت؟*
وليد موطي راسو ومرتبك : والله انتو ايش رايكم ؟*
ابو وليد طل في ام وليد :هذي امك شوفها اناا قلتلك رأيي*
ام وليد انتبهت بعد ماكانت مسرحه : والله ياولدي مدري ايش اقلك بس يعنيي (وطت راسها واترددت في الكلام )
وليد خاف :ايش ؟؟*
ام وليد : يعني ياولدي انت عارف تالا ابوها في الرياض يشتغل وامها في غيبوبه الله اعلم حتصحى ولالا ويعني اخوها وانخطف ويعني والله انا امك وابا مصلحتك اتمنالك البنت اللي يكون عندها اهل ام واب واخوان تحس انك خطبت بنت اهلها حولينها وكذا وبعدين ايش رايك عندي لك كم بنت ماشاءالله جمال واخلاق واهلهم طيبين يعني بنت ناس و
قاطعها ابو وليد :بس يا ام وليد خلينا نسمع رأي وليد اكلتيه بالكلام*
ام وليد : ايش اكلتو انا امو وابا مصلحتو وابالو الشي الكويس*
ابو وليد : طيب اصبري*
طالع في وليد ؛ ها ياولدي ايش رايك في كلام امك*
وليد متنح ومو مستوعب اللي قالتو امو ماكان متوقع انها ترفض : بس يا امي ابوها موجود ايش يعني لو في الرياض وامها يا امي اختك اتفائلي بالخير وادعيلها وان شاء الله تقوم وبالنسبه لاخوها ذي قصه قديمه خلاص نسيناها ومحد عارف يمكن يجي اليوم اللي يلتقي بيهم ويعني ماكنت اتوقع تقولي كذا على بنت اختك احنا اهلها وانا حكون سندها تكفيني هيا مابا اهل ولاشي*
ام وليد: بس ياولدي انا
ابو وليد قاطعها : خلاص يا ام وليد خلي الولد على راحتو الموضوع ماحينحل كذا*
طالع في وليد : اسمع ياولدي انت فكر اليوم وخذ راحتك واستخير وفكر في كلام امك وشوف ايش المناسب وبكرة نتفاهم*
وليد قام مهموم : طيب ان شاءالله ..يالله انا داخل انام*
ام وليد : وليد اشبك اختك مين حيجيبها ؟*
وليد افتكر : طيب ان شاءالله ذحين حروح اجيبهم*
اتوجه للباب وخرج للسيارة*
فتح الباب وجلس ورجع راسو على ورا ويفكر ...
فتح جوالو ويشوف الكلام اللي بينو وبينها وقلبو يوجعو مع كل جمله عمرو ما اتخيل انو في شي يوقف في طريقو*
غمض عيونو وفي قلبو بقهر (يارب )*
رما الجوال جنبو ومشي*

طول الجلسه وهما يطالعو في بعض بحقد*
اتوترت من نظراتها وقامت*
بدور تطالع فيها : اشبك؟*
مروة تطالع في ربا: يالله انا استأذن*
بدور: ليييييش ؟؟ بدري والله ماشبعنا منك*
مروة ابتسمت مجامله ؛ لالا حبيبتي خلاص مرة ثانيه ان شاءالله لازم نمشي*
لمى قاعده بين تالا وبدور طالعت بحزن في امها : ماما مانبا نروح*
مروة اعطتها نظرة : خلاص ياماما قومي*
لمى قامت بحرن*
بدور : ليش خللليها*
ربا تطالع في الارض (في قلبها ) تخلخلت عظام بليسها*
مروة ؛ لالا ماينفع*
ربا (منفعه تنفع بليسك بالنار يارب )*
بدور ماحبت تضغط عليها : طيب خلاص زورينا مرة ثانيه*
مروة؛ ايوا اكيد حبيبتي*
ربا ( حبه تحب بليسك وسلسبيل اهلو )*
مروة سلمت على تالا وماريا*
وقفت قبال ربا ومدت يدها : يالله سلام*
ربا بصوت واطي : الله لايسلم بليسك*
مروة : ايش قلتي ؟*
ربا ابتسمت مجامله ؛ لالا سلامتك قلت بدري لسا*
مروة : بدري من عمرك*
ربا في قلبها ( ان شاء الله عمري اطول من عمرك )*
مروة خرجت ووراها بدور*
مروة تتصل على السواق ... مايرد*
بدور ؛ اشبو السواق مايرد؟؟؟ *
مروة : لالا ولاشي حرسلو رساله اصلا تلاقيه برا انا كلمتو اول*
مروة لبست عبايتها وخرجت*

وقفت *متكتفه وجنبها لمى *
*تحاول كذا مرة تتصل بس مايرد ؛ استغفر الله وينو ذا*
انوار سيارة في حيهم المظلم جات عليهم*
مروة تطالع ؛ اهو شكلو جا*
قربت من السيارة وشهقت*
لمى لما شافتو ابتسمت*
وقف السيارة وخرج منها ...*
لمى جريت عليه : بابااا مرراد*
مراد طالع فيها وابتسم : يااااهلااا والله بلمووو*
حضنها وحملها : وحشتتتيني*
لمى : وانت اكثثثر*
مراد : فين حتروحي ؟ليش ماتجلسي عندنا لسا مالعبت معاك *
لمى طالعت في امها : ماما ماتباني اجلس خلتنا نقوم بسرعه*
مروة متفشللله
مراد طالع في مروة : ليش بدري اشبكم ؟*
مروة ارتبكت ؛ لالا خلاص ذحين جاي السواق*
لمى كلمتو بشويش في اذنو : قلها ابا اجلس عندكم*
مراد طالع في لمى وضحك*
طالع في مروة : طيب خلي لمى تبات عندنا اليوم*
مروة ؛ لالا ايش تبات مافي داعي خلاص حنروح*
مراد : لالا انا حجيبها بكرا لين بيتكم*
مروة ساكته مهي قادرة تقول شي*
مراد : طيب اشبكم واقفين مستنين احد ؟*
مروة : والله مستنيه السواق بس ما ادري اشبو ماجا*
مراد حط لمى في الارض ومسكها من يدها*
فتح باب سيارتو وجلس لمى جنبو وشغل السيارة : يالله انا حوديكم*
مروة انفجعت : لالا السواق جاي ذحين*
مراد بدون مايطالع فيها: اقلك اركبي ماعندنا احد يروح مع سواقيين ذا الوقت*
مروة انبكمت وبعد ثواني اتوجهت للسيارة وركبت بتوتر*
مراد مشي على طول*
مروة : يعني ماكان في داعي خلا
قاطعها مراد : وين عنوان البيت ؟*
مروة انقهرت : في حي ...شارع ....*
بعد ثواني ....*
وصل للشارع*
يطالع يمين يسار : وين اوقف بالضبط ؟؟؟*
مروة اشرت على الفندق : تحت فندق ....
مراد استغرب ووسكت واتوجه للمكان*
وقف سيارتو ...*
مروة : يعطيك العافيه تعبناك معانا*
مراد : لاتعب ولاشي*
مروة : يالله لمى انز
قاطعها مراد : لمى حتبات عندنا*
مروة نزات بدون ماتتكلم*
وقف السيارة ونزل*
يطالع من بعيد ومستغررب ويحارل يستوعب الملامح*
مراد حرك سيارتو ومشي*
طالعت في العمارة ولفت على الفندق طالعه*
اتوجهلها لاشعوريا : مروة*
مروة لفت بسرعه *وغيرت ملامحها للجديه ؛ نعم ؟*
ياسر : مين ذا اللي نازله من سيارتو وبنتك ليش معاه ؟*
مروة فتحت عينها : وانت ايش دخلك بصفتتتك مين تسال ؟؟؟؟؟؟*
ياسر عصب : ردي عليا احسلك*
مروة : لا والله تعال اعطيني كف احسن*
ياسر طالع فيها واتنهد : مروة مين اللي كنتي معاه ؟*
مروة. ساكته ....
ياسر : منتي طالعه لين اعرف*
مروة : لا والله ايش رايك احكيك يومي ايش سويت فيه وايش اكلت ومع مين اتكلمت ،؟*
ياسر قرب منها*
مروة رجعت على ورا بخوف : لو سمحت اوقف بعيد*
ياسر : اذا ما اتكلمتي والله ماحبعد*
مروة : مع نفسك*
ياسر قرب اكثر*
مروة ترجع على وراها : خلااااص خليك مكاانك*
ياسر : مين ذا ؟*
مروة : زوج صحبتي*
ياسر : وزوج صحبتك تخلي بنتك تروح معاه ذا الوقت وكمان ترجعي معاه لحالك ؟*
مروة *رفعت صوتها ؛ انكتم موو شغلك قله حيا
خلصت كلامها علي كف تبعتو صرختها .....*
ياسر اعصابو فلتتت ويتنفس بسرعه*
مروة ماسكه مكان الكف والدموع في عينها ؛خلاص كذا اخذت حقك ؟؟؟؟ ارتحت كذا ؟ تباني اريحك اكثر ؟ اقلك مين ذا ؟؟؟؟ هذا حبيبي ياياسر حبيبي*
اعطتو ظهرها ومشيت بسرعه طلعت الفندق وسابتو وراها واقف وكل اللي يدور في بالو (حبيبي ....حبيبي....)*
*

جالسه في الصاله وصوت ضحكهم مالي البيت*
ماريا متحمسه : بنات اتخيلو امي كانت تكلم تلفون ومتوترة*
خرجت اشرب مويه ولما شفت وجهها الا والا اعرف اشبها*
المهم طال عمركم رايحه جايه مترت الصاله مابقي بلاطه ماعديتها*
وامي وجهها كل مالو يصير احمر وفيها ضحك *: ان شاءالله اكيد انا حكلمها واشوف رايها وحردلك خبر*
والله من ساعه ماسمعت ذي الجمله وانا خلاص افكر ايش حفصل موديل فستاني وايش اختار لون مسكتي*
المهم امي قفلت السماعه ونادتني*
انا هنا نطيت عندها وجلست*
امي تطالع فيا وتضحك : اسمعي هذي ام عادل اتصلت*
انا هناااا قلبي طاح : طيب؟*
امي : لا بس اتصلت تخطب*
انا عاد لساني سبقني : موافقه*
امي فتحت عيونها : ايش موااافقه ؟*
انا انبكمت ؛ لايعني اقصد ايش السالفه ؟*
امي سلكتلي كالعاده: طيب اتصلت تبا ساسي لسواقهم اتخيلي وجلست تضحك*
انا اتحطمت احلامي في لحظه انا قدني افكر اعزم مين وايش القاعه تقلي ساسي*
المهم ساسي اتزوجت وانا اشتغلت بدالها*
ماريا تطالع فيهم والكل ساكت*
حطت يدها عند رقبتها : طيب اجبرو خاطري واضحكو*
ربا تطالع في ماريا بحزن: اسمعي ماريا ترا*
ماتضحكي
ماريا : ربا جبهتي الله يحفظك مو قدام الناس *
*ربا تطبطب على ظهرها : عادي حبيبي من يومك ماعندك كرامه*
ماريا : خفيييييي علينا ياللي كرامتها محفوظه ومصانه*
ربا : ايوا طبعا*
ماريا ؛ وبخصوص اللي صار في بيتكم اليوم ؟*
ربا جوال يرن *اخذت الجوال : ايوا وليد*
وليد صوتو لايحسد عليه : انا تحت*
ربا انفجعت من الصوت : طيب طيب ذحين نازلين*
وقفت : يالله تالا وليد تحت*
تالا وقفت : طيب يالله نشوفكم على خير*
ماريا : هييي وانا مين حيرجعني*
ربا : انت اول شي دوري كرامتك بعدين تعالي اتكلمي *
ربا لبست عبايتها وجرررريت على الباب*
تالا لبست عبايتها ولحقتها*
دخلو السيارة*
ربا تضحك : الله يستر بتذبحني شكلها*
تالا تضحك : حرام عليك ماخليتيها في حالها*
وليد في عالم ثاني كل اللي يسمعو صوتها وصوت ضحكتها*
بعد دقايق*
ربا تطالع في وليد : اشبك ساكت ؟*
وليد : ايش تبيني اقول ؟*
ربا وتالا استغربو : لا يعني استغربت سكوتك اشبك في شي ؟*
وليد مايطالع فيهم : لا مافي شي*
ربا حست انو موطبيعي سكتت*
تالا بدات تقلق وتخاف اول مرة تشوفو كذا ماجا في بالها شي تموت وتعرف اشبو*
بعد دقايق وصلو للبيت*
وقف السيارة*
تالا نزلت*
ربا بتفتح الباب ...وليد بقهر : امي ماوافقت*
ربا سابت الباب ودارت عليه بشويش طالعت فيه : على ايش؟*
وليد : تالا
رباا صنمت : كيف ماوافقت ؟*
وليد ضرب بقوة على البوري*
ربا بعدت يدو بسرعه : اشبك يااااهو فضحتنا*
وليد سااااكت*
ربا : طيب فهمني ليش ماوافقت ؟*
وليد مد يدو لباب ربا وفتحو *: اخرجي*
ربا مصنمه : هاا؟*
وليد بحزم : ربا اخرررجي*
ربا : *طيب فين رايح ؟*
وليد : مو شغلك*
ربا خرجت وعبايتها طارت من سرعه وليد*
واقفه تطالع فيه وقلبها يوجعها : الله يستر*

الغرفه باااااردة*
نايم على الكرسي بتعب*
حاطه يدينها على طرف السرير ونايمه*
الهدووء مالي المكان*
صوت جهاز القلب الصوت الوحيد ..
عيون تنفتح باقل من مهلها ... ترمش بشويش وبتعب*
اصابعها تحاول تحركهم بشويش*
لحظات مرت وعيونها تدور في المكان*
بعد ثواني ....
بلعت ريقها وفتحت فمها بشويش صوت كلو تعب : انا ... وين ؟؟؟*
رفعت يدها بشويش وتطالع فيها وتحرك اصابعها*
تطالع في المكان وجات عينها على المنزله راسها على السرير*
تفتح عيونها بشويش وتحاول تتكلم : انتي...*
انتي مين ؟؟؟*
حركت رجلها اليسار : اااه*
رجولها متأثرة بالحادث والعمليات*
فتح عيونو على صوت المها : يطالع فيها مستغرب : ريم اشبك ؟*
دارت عيونها عليه وتحاول تفتحها : مين انت؟؟ وين انا ؟؟*
قبل لاتروح عينو على مكان الصوت نبضات قلبو وقفت من الخووف ...
بعد لحظه استيعاب عيونو جات عليها وانصدم: تالييييييين؟؟؟؟؟؟*
قامت بسرعه وتدور راسها يمين يسار : ايش في ايش في؟؟؟*
يطالع في تالين ومو عارف يوصف ولا يتكلم : تالين ؟؟؟*
دارت عيونها عليها ووقفت بصدمه :تااااااااااالين ؟؟؟؟؟؟؟؟؟؟؟؟؟؟؟*
(انتهى البارت الخامس عشر )