أنا اللي ناسيٍ همي إلين اذكرك واشقابك
وأجاهد عبرةٍ حنت على ذكرى مواجعها
تحن لشارعٍ هادي على جنبه سكن بابك
تسابق دقته .. دقات قلبٍ ما توقعها
أسير ليمته خايف وأحس إنك على اعصابك
وأقصر خطوتي لافكار .. ارتبها واضيعها
أنا وشلون اببدى كيف أقاوم وحشة غيابك
وأداري عبرتي قدام بسماتٍ تصنّعها
ترى يوم أنظر كفوفك وامدح نقشة خضابك
أخاف ارفع نظر عيني واسيل دمعتي معها
اشوف الكحل من عينك يسيل وكحل ثيابك
أنا ودي دموعك في يميني لو تجمّعها
وأبشربها عسى تشفى جروحٍ كلها اسبابك
جروحٍ بالحشى يا ويل قلبٍ ساكنٍ معها
رواية موعدٍ قفا زمانه.. وانت قفابك
نعم حبيت اراجعها وأكررها واسمعها
وأنا اللي ناسيٍ موتي تحت جفنيك واهدابك
عزاي دموع عينك يوم هلّت لي مدامعها
|