شبكة همس الشوق - عرض مشاركة واحدة - سرقتك بالزمن لحظه وعشتك بالفراق اوقات روايه سعوديه روعه لاتفوتكم

1 - 8 - 2012, 08:59 PM

عد لين ثلاثه وقال بهدوء :-البتول
انخرش قلب البتول لانها تخاف من اخوها او نقدر نقول تحترمه مره لانه كان بمكان ابوها ... اخوها الي ياما حن عليها اخوها الي كان عون لها الي عمره ماقصر عنها بشي ..صحيح محد يجي وياخذ مكان الابو لكن ماجد غير ، ماجد محور حياتها وكل شي فيها ... مسحت دموعها وفتحت الباب ..
قالت بادب :-هلا ماجد
ماجد :-ممكن ادخل
البتول وهي تحاول تخفف من خوفها :-ها...اي ايه ممكن ليه لا
دخل ماجد وجلس على الكرسي الي جنب سريرها قال بهدوء وماخفى عليه تاثيره الكبير على اخته :-انا راح ادخل مباشرة للموضوع وبعدين معك
بلعت ريقها من الخوف سبحانه الي حط رهبته العظيمه بقلبها رغم ان ماعمره رفع يده عليها ولا رفع صوته حتى لكنه كذا شخصيه حازمه شديده جديه وتنزل الرهبه في قلوب الناس حتى المقربين منه ..
قال وهو يحاول يمسك نفسه لا ينفعل :-انتظر ردك
البتول فيها احيانا نزعات متمرده حتى على ماجد الي يرهبها .. قالت بثقه :-ماسويت شي شسويت انا
قال بعصبيه لكن صوته ما ارتفع لحظه عن مستواه الطبيعي :-البتول
خافت وضاعت علومها :-انـا...انـ
وفكتها مناحه وجلست تبكي ... ناظرها ماجد بضيق وهو يقول في نفسه "الحين الواحد ماياخذ من الحريم لا حق ولا باطل من ورى حركات البكا ذي "
جلست تصيح وتنتفض كسرت خاطره وقال بحنيه :-البتول اذا بتجلسين كذا ماراح افهم منك شي
مسحت دموعها وبعد جهد جهيد قالت :-ماجد
ابتسم :-عيونه
ابتسمت ورجعت بكت من نبرة الحنيه الي سمعتها في صوته وحستها من نبرته وشافتها بعيونه
تعوذ من ابليس ... اليوم ذا باين من اوله ...
قالت بانفعال :-انا مابي اتزوج بندر
قال بهدوء :- انتي الحين زوجته
قالت بانفعال وهي ترجع شعرها الاسود الطويل ورى بقوه :-ابي الطلاق مابيه
طلعت عيون ماجد قدام وفز من مكانه قال بقوه :-طلاق
خافت وقالت بهمس :-ا .. ايه
قال وهو يناظرها بقوه :-ليش وش الاسباب
قالت بتمرد :-كذا مابيه
عصب ماجد منها ومن عنادها ودلعها :-كيف كذا مابيه
البتول بصراخ :-كذا مزااااااااااااااااج
رفع يده بيضربها لكنه مسك نفسه فاخر لحظه وهو يتذكر وصية ابوه له قبل لا يموت .. انكمشت على نفسها وغمضت عيونها تنتظر الكف وحرارته على خدها ...
لكنها فتحت عيونها على مسكته ليدها من فوق قال وهو يهمس بعصبيه عشان امه ماتسمعه وتتنكد :-اسمعي يا بنت بندر الف وحده تتمناه والحين هو زوجك رضيتي ولا مارضيتي وان سمعت أي اعتراض او كلام من كلامك الفاضي الي تعودت عليه لا تلومين الا نفسك
قالت وهي تبكي :-بس ياخوي.....
هزها :-ولا كلمه انتي ماتعرفيني زين يا البتول لا تخليني اتصرف معك بطريقه لا انتي ترضينها ولا انا ارضاها بعد يكفي بس انها امنية ابوي وقراره الله يرحمه
فك يدها وطلع قبل لا يمد يده لانه حس بنفسه قريب من هالتصرف
صرخت :-لو ابوي حي ما رضى على الي تسويه فيني وينك يا بوي ...
كان واصل لباب غرفتها مسك طرف الباب بيده وضغط عليه بقوه كملت كلامها الي يجرح حتى لو كانت اخته الصغيره وجاهله ومن هالكلام :-ايه ايه لو ابوي حي ما تكبرت علي عشان بندروه خويك
وهنا وبس ...
فار طبعه الحامي وراح لها بسرعه ومسكها مع يدها وهو يصارخ لاول مره حتى البتول نفسها خافت موت منه :-اسمعي سنين وانا اسمع هالكلام الي مامنه فايده وربي ان بندر السنافي خساره فيك
قالت بقلة ادب نظرا لانها وصلت لمرحلة التبلد والتمرد :-اشبع فيه انا مستغنيه عنه
الي مايعرفونه ان امهم كانت واقفه برى وسمعت كل شي ...
صرخ ماجد :-انا مليت منك هذا جزى التربيه ..
البتول وهي تصارخ :-هذا حلال ابوي مو حلالك
كان كلامها كان زي طعنة الغدر الي تغافل الواحد نست ايام السهر والتعب لما كان يجي من الجامعه تعبان ويمرها بغرفتها ويلقاها مريضه ويرمي كتبه ويركض بها لاقرب مستشفى حتى امه ماكانت تدري عنه ..
نست يوم كانوا البنات يزعجونها بالمدرسه وترجع ودمعتها على خدها وبمكالمه وحده للمديره انحلت المشكله وماتعرضت بعدها لاي مضايقات ...نست ونست ونست اشياء كثيره
التفت لجهتها وقال بصوت مافيه ملامح ومعالم :-شقلتي
البتول لا انفعلت تروح كل اخلاقها الحلوه في لمحه بصر :-الي سمعته انت مو متفضل علي بشي
لاول مره يرفع يده لكن صرخة امه منعت كفه عن وجه البتول التفت بعيون فيها من الحزن مثل التعصيب والزعل ..
قالت امه بوجه شاحب :-لا يمه لا تضربها
قال بكل صوته الي لاطلع في مكان عمه السكون والترقب :-عشان خاطرك يمه بنسى الي قالته لكن يكون في معلومها (وجلس يناظرها بقوه) ان زواجها من بندر راح يكون بالعطله الطويله يعني لا انتظار لوظيفه ولا يحزنون
انصدمت البتول وشوي وتنهار قالت بدلع وبكا :-يمه
جمدت امها قلبها وقالت :-الي تشوفه يمه
طلعت عيونها قدام تزلزل الكون تقول لهم تكرهه تحقد عليه ليش مايفهمون الاهل يدورون راحه بناتهم وهم رجعيين في تفكيرهم واذا كانت هذي رغبه ابوها هذا مايعطيهم الحق في تجاهل رغبتها ..
صرخت :-ماراح اتزوجه لو اخر يوم في حياتي
مر من جنبها وقال وهو ماشي :-لا جيتك اشاورك ذيك الساعه قولي رايك ..
قال لامه يوم صاار جنبها :-راح نتكلم انا وانتي بكره الصبح قبل لا اروح الدوام لاني الحين تعبان وابي انام
طلع من الغرفه مايشوف قدامه مايكفي الي صار له اليوم تطلع له اخته بافلامها الهنديه المعتاده
دخل غرفته ورمى الشماغ على السرير يبي يتمدد يرتاح يفرد ظهره شوي ...فك ازارير ثوبه وترفق على اخر زر لسى صدره مورم ويعوره يحمد ربه انه ماجاه كسر ولا تهشم صدره وانطبق على قلبه ورئته ...
دق الباب تحمل الالم وسكر ثوبه :-ادخل
دخلت امه الغرفه وقالت بعيونها الحنونه :-يمه انت بخير
ابتسم :-الحمد لله
سكتت امه لانه ماراح يتكلم ماجد وتعرفه قالت بحنيه :-نم وارتح انت لك يومين في الدوام مهلك نفسك وبكره الصبح بيننا كلام
ماجد بهدوء :-ان شاء الله
ماصدق امه طلعت من هنا الا ويحط راسه على طول ...
>>في بيت ابو متعب
قالت ام بندر وهي تصب لزوجها قهوه :-تفضل
كان سرحان بعالم ثاني ... كررت كلامها :-ابو متعب تقهو
التفت يم زوجته وام عياله الي عاشرته خمسين سنه على الحلوه والمره ، اخذ الفنجال منها ..
قالت له :-علامك مهموم وسرحان
قال ابو متعب وهو يعدل نظارته العريضه على وجهه الي جعده الزمن لكن وقاره بقى زي ماهو ..:-والله افكر في هالعيال وفي مستقبلهم
ام بندر :-ههههههههه أي عيال الله يسلمك ..كلهم كبروا
ابو متعب :-بلا المسؤوليه ماتزيد الا اذا كبروا
ام بندر –يا ابن الحلال اترك عنك الافكار الي ترفع ضغطك وسكرك وتتعب صحتك وبعدين اصغر عيالنا كلهم جود وجود حرمه الحين وهذي اخر سنه لها بالجامعه
قاطعها بوجه مهموم :-اخوي سلمان الله يرحمه امن مستقبل بنيته البتول وان وش سويت لمستقبل بنتي
قالت ام بندر بضيق :-صالح علامك موسوس اليوم ...
قال بكابه :-انتي عارفه ان المرض الي بكبدي كل يوم يزيد وانا موب دايم لها
خنقتها الغصه والله لولا حلفه بالطلاق عليها لتعلم عياله عشان يعرفون ان ابوهم مريض بالكبد :-لا تقول كذا
ابو متعب :-انا ما انكر ان متعب حنون وقلبه كبير لكنه مايعرف لجود مثلي وراح يقسى عليها واجد وعارف طبع بندر الحامي ولابيه يتمشكل مع اخوه غير العيال الباقين ...
سكتت ام بندر هنا معه حق عيالها وتعرفهم ...
ام بندر :-يعني وش السواة نخطب لبنتنا ...
طقت الفكره براسه شلون مافكر فيها من زمان ... ناظرته ام بندر وعرفت ان كلامها الي تو ما مر عليه مرور الكرام وانه دخل داخل هالعقل الي لا يكل ولا يمل من التفكير والتحليل والقرارات ..
قالت بصدمه :-بتخطب لبنتنا ..
سكت ابو متعب ومارد عليها ..وفي هاللحظه دخل عليهم بندر ...
"السلام عليكم صباح الخير" ثم حب راس امه وابوه
ابوه "صباح النور "
بندر " كيف حالك يبه اليوم "
ابوه " الحمد لله زين بشر جهزت للرحله "
بندر "-ايه كل شي زين والخيام راح تسبقنا بيوم للموقع الي اختاره ماجد "
ابتسم ابوه "اذا ماجد الي مختاره فاكيد انه موقع طيب "
بندر "ههههههههههه والله اني عارف انه مايجوز لك الا شغل ماجد فقلت احترم نفسي واخليها عليه"
ابوه :-هههههههه فيكم الخير كلكم بس ماجد يعرف الي يجوز
"ماجد ماجد الحين اهلي ماعندهم سيره الا هو "
دخلت جود الغرفه وكتبها على يدها بتروح الكليه "صباح الخير"
حبت على راس ابوها وعلى راس امها وجلست
ابوها :-صباح النور يبه ..
اخذت لها كاسه شاهي على السريع ووقفت عشان تطلع للسواق امها :-يمه افطري كلي شي
جود بابتسامه حلوه :-تاخرت يمه عندي محاضره بعد ربع ساعه..
امها :-براحتك بس انتبهي على نفسك
جود :-من عيوني سلام
الكل "وعليكم السلام"
لبست عبايتها وتغطت وطلعت للسواق ومعها اخوها يزيد الي يدرس بالثنوي ويروح معها لانها ماتركب مع السواق بلحالها ...
يزيد :-يا الله صباح خير ..
جود :-هلا والله شفيك تقولها من ورى خشمك
يزيد :-هههههههه كشتك علامها طايره
جود :-ههههههههههه قم ضف وجهك هذا يسمونه تجعيد يا جاهل
تذكرت :-بعدين تعال كيف شفت كشتي وانا متغطيه
يزيد :-ههههههههه شفتك قدام المرايه وانتي تلبسين عبايتك طبعا ما تنلامين ألي يشوفك يقول ماشافت مرايات بحياتها
جود :-ههههههههههههههههه كيفي حره
يزيد وهو يزين كتبه على يده :-طيب ياحره اركبي تاخرنا
ركبوا السياره وراحو ..
*
*