تجرح حبيبك دوم وتقول مدري
طيب متى تدري اذا قيل لك مات
وفر دموعك يبي يجي يوم وتجري
اذا رجعت ومارجع لك زمان فات
يوم اموت ومايضل غير ذكري
وغاض الندم يفتح قديم الملفات
تبي تجي وترش بالدمع قبري
وفي وقتها ماني محتاج دمعات
بتقول لي اسف وتسكت وتسري
وليا سريت بترجعك بعض الاصوات
لا صاحوا الاموات ماعاد بدري
وليا التفت وجيت ماردوا اموات
مافاد بك تلميح وجهي وشعري
ولا فاد صوت عتاب مليان عبرات
حطمتني بجروح وانا بصبري
لجلك صنعت من الجروح ابتسامات
كم جيت لك مكسور وزودت كسري
اقسى من جروحك لا طنشت بسكات
وانا محال اعاتبك يوم ادري
اخاف اجرح خاطرك بالعتابات
اسكت واخليها على الله واشري
خاطرك لو قلبي تشققه صيحات
انا اعطيتك يالغلا كل عمري
وتبخل تراضي خاطري بالكلمات
شفني اذا زعلتك على طول عذري
جاهز ونابع من حنان وقناعات
مافيه شي يسوى الزعل لاتهذري
خل نستغل العمر والعمر لحظات
العمر يجري مثل ما الدمع يجري
مادامنا مع بعض ليش الآهات
خلنا نوفر حزننا دام ندري
نبي نتفارق يوم ونذوق حسرات
قبل الندم وقبل يضايقك هجري
اصنع معي ذكرى جميله للأوقات
وان كان ماهمك كياني وقدري
على الاقل للحب قدر وكرامات
وان كنت تستانس ليا ضاق صدري
اجرح على كيفك جروحك مسرات
اجرح حبيبك يبي يجي يوم تدري
لا قلت وينه والقبر جاوبك مات
"