موج البحر في حالة الجزر والمد=كنّه يمنتج ( مشهد(ن) سينمائي )
تشوف هذي تبني وهذي .. تهدّ=احقاب والعرض الصباحي مسائي
للشمس والقمرى مع غبّته ودّ=والارضي أرضي والفضائي فضائي
والارسال متواصل من الغد لـ الغد=ما يقطعه حتى .. الفراغ الهوائي
يا بحر ياليتك عليّ تقدر .. تردّ=وتشعر بـ احاسيسي وتسمع ندائي
أنا هديّه .. والهديّه ( ما تنردّ )=بـ روحي .. وتواجدي وانتمائي
جيتك وانا مُعدم ومن شافني صدّ=ومهدد بـ تنفيذ حكم(ن) قضائي
وملح(ن) غطى ساحل وملح(ن) وطى خد=كن الله آمرنا .. نشكّل ( ثنائي )
وبقدرة اللي لا شريك(ن) ولا ندّ=انت الوحيد اللي قدرت احتوائي
ما يوجد المخلوق فـ الكون هالقدّ=في ما رواه الترمذي والنسائي
وان شك في ما قلت ملحد ومرتدّ=يناظره طالب من .. ( الابتدائي )
ويقول ردّ الروح لو فـ اصبع اليد=لا فصلت من الجسم فصل(ن) نهائي
يا بحر كل(ن) قال غدرك مـ له حدّ=والبُعد عنْك أكبر علاج(ن) وقائي
وانت اللي افضالك مـ تحصى وتنعدّ=كلمة ( وفي ) ما هي بـ كلمة مُرائي
عيال حوّا كـلهـم .. من ظهر جدّ=لـكــنّ انا اول واحد(ن) .. برّ مائي
ذكي ومن بيني وبين الغبا ( سدّ )=بس الصحيح اللي نكبني ( ذكائي ) !