لا تعتذر ما عاد للعذر داعي
.......ما كل زلة ينفع العذر فيها
عذرك عرفته مير صعب اقتناعي
.......بعض المعاذير الردي يعتريها
ماني مراعي واحدٍ مايراعي
.......حتى الصداقة معه ما عاد ابيها
طويت من بحر الصداقة شراعي
.......وبعض الصداقة لا حسافة عليها
بعض الصداقة تشترى ما تباعي
.......وبعض الصداقة ينغبن مشتريها
اطى برجلي فوق روس الأفاعي
.......حتى تموت وسمها يموت فيها
احيا واموت ولا تغير طباعي
.......ولا اذل نفسي للعرب ارتجيها
ضاع الجميل وضاع مدي وصاعي
.......وضاعت معاريفي في شخص نسيها
اسمي في ديوان الرجولة رباعي
.......وجدي وابوي امجادهم محتميها
وعن الوفا والطيب ما شح باعي
.......يوم ان بعض الناس شحت يديها
بذلت للمعروف كل المساعي
.......من صغري وادروب الشرف مهتويها
ولا للحياة الفانية من متاعي
.......كيف الهنا دام الفنا مقتفيها