كثير احلام عشناها ولا منهـا تحقـق شـي
نحاول نسرق الفرحه من ايدين الزمن والهم
تعبنا من هجير الوقت نركض مع شتات الفي
نبي نوصل إلى الفرحه نبي نوصل وفينـا دم
جمعنا بالسهر احلام وشتتها بـزوغ الضـي
كأن الحلم بالدنيا طفـل عايـش يتيـم الأم
مجاديف الامل راحت على بحرِ تراقص غي
بحر غدار لا يمكن عليـه ان الشمـل يلتـم
طلبتك
يابحر رده ابي اشعـر بأنـي حـي
سئمت الصمت في وجه الحياه الممتلي بالذم
ابي من هالزمن يجبر بخاطر هالحلوم شوي
تعبت اجمع محاصيلي هموم ودمعتين وغـم
رحل حزن البشر عنهم رحل عنهم تواجد في
كأن الحزن بالدنيا بحالي بـس انـا مهتـم
امانه ياحزن صدري كفايه بالخفـوق الكـي
كفايه حظي العاثر ولا عمـره معايـه تـم
متى اصحى واشوف الحلم لو مره تحقق لي
انا مليت يادنيـا ومثلـي كـم خذلتـي كـم
كثير احلام عشناها ولا منهـا تحقـق شـي
تحقق بس يادنيا جـروح وعبرتيـن وهـم