سقا الله زمانن زال وبالذاكره مازال
......................فداه العمر لو راح الاول على التالي
قبل من عوايدنا نعشق السهر لا طال
....................معي بكل يوم وليله اقرب من اظلالي
تنام بعيوني فارعه ماعليها شال
....................سترها الغلا والخوف من عين عذالي
وفجأه بلا موعد صحينا على زلزال
....................اخذ كل شي ولا ترك غير غربالي
بقا بيننا يمكن تواصل بقايا وصال
...................تجيني بعد مده تدور عن اوصالي
مجرد سلام ومانسيتك وكيف الحال
..................هذا اخر الغالي وحقه وهو غالي ؟
واذا مر وقت ولا لفى منها مرسال
....................وبديت التفت عن حالها شوي في حالي
عن الوم والشرهه رسايل علي تنهال
......................من يدينها واحسها تسولف قبالي
يقولون : مايبكي على المقفيه رجال
.....................وانا اقول : جعل قلوبهم مالها والي
على وين ماراحت اسوق القدم رحال
......................اخيل المدى والدرب موحش وبلحالي
ادور حدر غيمة مواعيدها همال
......................ولا شفت منها غير موعد مع اهمالي
خلاص انتهينا مابقا للسنين امال
.......................بعد ماقصر مرسالها مات مرسالي
هي الحين..! صارت راعية بيت وام عيال
......................وانا االحين..! مثل اول على خبرها حالي
|