أقبلت لابسه تاج الحيا والوســـام
ياهنيالها بالتــــاج ووسامهــا
&&
تبتسم تخلط الوان الرضا بالخصـام
حي رسم الحيا مـحلا تبسّامهــا
&&
لعنبو جدها عيت ترد الســـــــــلام
واكتفت بالإشارة ترفع ابهامها
&&
من حلا ريقها ذابت حروف الكـــلام
وخايفه لايـذوب من الحلا لثامها
&&
خايفه لو حكت وابدت غلا واهتمام
صوتها يوقظ الفتنة من نيامــهــا
&&
والغلا لو تثنّى وانحنى واســتقام
واضحٍ في معالمها وبعـلامـــهـا
&&
بين رغبه وخوف من العتب والملام
ودّها تـعتـلي في قمة اهرامــها
&&
ماتلام الفخـورة لا حشـا ماتـــــلام
تفتخر من تقود الشــمـس بلجامها
&&
حقها .. لو تعالت فوق متن الغمام
لعنبو من عـلى كثر الفخر لامــها
&&
هي ضيا ليلة القدر وصـباح اللثام
هي وقايع حقيقتها من اوهامــها
&&
في نظرها قلوبٍ جرحتها السهام
وصورةٍ راسـمتها لفارس احلامـها
&&
كلما الليل غمّض في عيونه ونـام
تسهره ترسم الصورة بمرسامهـا
&&
وكلما غرّد القمري وناح الحـمـام
واقبلت .. قامت الدنيا مع قيامها
&&
عاهلة تملك اوصاف الحسن والقوام
مملكتها جسدها وعرشها عظامها
&&
غير خجلى الخدود وغيرهالإحتشام
ماسـبى ولا أسر روحي ولا هامها
&&
لا هدى .. لا جواهر .. لا منى .. لا رهام
كلّـبـوهن جواريـها وخـــدّامـــــها
&&
هي خيول الفكر والفارسه والحسام
هي بيوت القصيـد ومصدر الهامها
&&
من بياض الصباح ومن ســواد الظلام
تنسج خـــيوط فتنتها وهندامــها
&&
تلهم الطفل معنى الغربلة والهيــــام
والبــلابـل تعلمها من انـغامــــها
&&
تكتب الوقت والتاريخ بالإبتســــــام
وان بغت تشطب التاريخ باقدامها
&&
تذبح وخدها يجرح بريش النعـــــــام
ترسم ورســمها بيدين رسّــــامها
&&
بأجمل ايامها حزة وعمر ومقـــــــام
لعنبو من غدر فيـــها ومن ضامها
&&
لعنبوها جميلة .. وا عليّ الحــــــرام
انـها قاتـلـتـنـي باجمل ايــامــها
&&
آه من هالعيون وطرفها المـستهــام
ضعت انا بين رعــشتها وسلهامها
&&
ذابل الرمش يا عين المـهــا والغــرام
ما سـهر في ليالينــا ولا نامـهـــا
&&
بين مرّ الفراق وبين حلو المنــــــــام
كل نـظرة تصـوم وتبطـل اصيامها
&&
يا عيـــــــون الأدب والقدر والإحترام
توهــتــني عـيونك في تبسّامـها
&&
كنت أدوّر كلام .. وكان عندي كـلام
ويوم جيت اتكلم ضاع قــدامـــــها
تحياتي للجميع