شبكة همس الشوق - عرض مشاركة واحدة

10 - 3 - 2014, 01:20 AM

كانت دانا منسدحه عالسرير ترتاح بعد ما اعطوها مغذيات وابر عشان فقر الدم اللي عندها كان شديد جدا ..
كانت تسمع الاصوات حواليها يتكلمون بس ما فتحت عينها ولا هي قادره تفتحها .. حاسها بتخدر في كامل جسمها ..
الام: حسبي الله ونعم الوكيل ..
رهف: خلاص يا خالتي اهدأي .. ان شالله بالتقوم بالسلامه ..
الدكتور: اللحين هي تمام .. بس يبغالكم تنتبهوا على اكلها كثير .. الانيميا هذي يت من سوء التغذيه ..
الام: ايه والله من قبل الاختبارات وهي ما تاكل كويس .. ومعظم الاحيان تقول ما اشتهي ..
الدكتور: لا لا مرره مو زين لها .. لا تسمعون لها .. لازم تاكل وتتغذى غصب عنها .. اللحين نسبة الدم عندها هي ٥ على ١٢ .. نسبه واطيه وايد واحتمال تدوخ في اي وقت ..
رهف: طيب ايش الاكلات اللي تنصحنا نأكلها ..؟!
الدكتور: كل الاكل المفيد .. ولازم تبعد عن المشروبات الغازيه لأنها تسبب اكبر ضرر لها .. والمأكولات السريعه والشوكولاته وانواع الحلويات كلها لازم تبتعد عنها .. ولازم تفطر الصباح .. الفطور هو اهم وجبه لها .. والاكل يكون مفيد واعطوها فواكه بين اللحين والآخر .. وانا راح اكتب لها فيتامينات وحديد تاكلها اللحين وبعدين نبدأ نعطيها ابر على فترات عشان ترجع زي اول ..
رهف: مشكور دكتور ..
الدكتور: العفو .. اهم شي الفطور تاكله والغازيات تبعد عنها ..
رهف: ان شالله ..
الدكتور: ياللا اترككم مع المريضه ..
خرج وقفل الباب وراه ..
الام: كله من عادل الله لا يوفقـ....
مسكت دانا ايد امها وقالت بضعف: لا تدعي عليه .. انا الغلطانه يمه ..
الام: صحيتي يا حبيبتي ..
رهف: سلامات دنو ..
دانا بإبتسامه وبتعب: الله يسلمج ..
رفعت رهف جوال دانا وقالت: من الصبح في واحد يدق عليج بس ما رديت ..
دانا: منو ..؟!
رهف: ريان ..
عقدت دانا حواجبها تفكر في السبب اللي يخليه يدق ..
الام: خلاص حبيبتي رهف .. تعبناج وايد معانا وتقدري تروحي البيت ..
رهف: هذي رفيجتي واذا ما تعبت معاها اتعب مع منو .. ورجعه للبيت ماني راجعه ابدا ..
الام: بس انتي من صباح الله خير معانا والساعه اللحين صارت ست المغرب ..
رهف: بقعد لين تصير بخير .. عندكم مانع ..؟!
ابتسمت دانا وقالت الام: لا يا حبيبتي .. بس اهلج اكيد قلقانين عليج ..
رهف: اهلي يعرفون اني هنا ومعطيني الحريه اني اقعد ..
الام: طيب ما معاج نوم ..؟!
رهف: خالتي انتي ليه مصره اني اروح البيت ..؟!
دانا: هههههه ..
الام: لا مو قصدي ..
رهف: اذا عندج سالفه مع دانا وما تبيني اسمع فقولي لو سمحتي يا رهف اطلعي برى شوي لين اخلص ..
الام: لا ما عندي ولا شي ..
رهف: ههههههههههههه اعرف .. ياللا خالتي انا بنزل تحت اشتري شي اكله .. تبيني اييب لج شي ..؟!
الام: لا ياحبيبتي تسلمي ..
رهف: وانتي يا دانا ..؟!
دانا: ابي شي اشربه ..
رهف: مثل ايش ..؟!
دانا: اي شي حتى لو كان بايسن ..
رفعت رهف حواجبها وقالت: بايسن ..؟! ما قد يربتي الجزمه على ويهج ..؟!
كحت دانا شوي وقالت: ههه لا .. بس ترى البايسن ما يأثر لأنهم توهم نقلولي دم ومغذي ..
رهف: تعرفي الحاشي ..؟! والله حتى لو اكلتي الحاشي ماراح تشربي بعده بايسن .. بايعه عمرج انتي ..؟! الدكتور قال ممنوع الغازيات وما قال اشربيها بعد الاكل ..
ابتسمت دانا وسكتت .. تمووت في البايسن بس بتحاول تتركه ..
رهف: بييب لج حليب المراعي اوكي ..
فتحت دانا عيونها وجت بتصارخ على رهف بس حست بالتعب في جسمها فسكتت ..
خرجت رهف من الغرفه ومشيت في الممر وقابلت في وجهها عادل خارج من المصعد ..
تفاجأت اول ما شافته بعدين ابتسمت بسخريه وقالت: اختك من امس في المستشفى وتوك تزورها ..؟!
طالع فيها ولف الكرسي لجهة غرفة دانا وهو مطنشها ..
مشيت رهف ووقفت قدامه وقالت: الناس يغلطوا والكل يسامح .. بس انت ما تعرف شنو يعني تسامح .. اختك اللي وصلها لهالحاله هو انــــــت يا استاذ عادل ..
عادل: ابعدي بمر ..
رهف: اوكي حأبعد .. بس تدري ان نسبة الدم عندها هي خمسه على ١٢ .. تعرف انها لو نقصة نسبتين كانت حتكون على مشارف الموت .. لا تستغرب .. انت عبالج انك جذي بتأدبها .. لا يا حبيبي انت يالس تدمرها .. طيب وبعدين .. بعد ما تزعل منها وش حتسوي ..؟! مافي في بالك شي .. انتبه هي اختك الوحيده وممكن تضيع منك وانت مجبس راسك ومسوي فيها انك زعلان ..
بعدت عن طريقه وقالت: واذا ضاعت ما تنفع كلمة ياليت ..
مر عادل من جنبها وراح لغرفة دانا ..

في غرفة دانا .. كانت دانا تطالع في السقف بسرحان والام جنبها جالسه تقرأ قرآن ..
لفت دانا بهدوء على امها وقالت: امي ..
الام: هلا حبيبتي ..
دانا: وين عادل ..؟!
تضايقت الام وقالت: حسبي الله ونـ....
مسكت دانا ايد امها وقالت: يمه مو انا قلت لا تدعين عليه .. والله انا الغلطانه وانا اللي لازم تدعين علي ..
الام: مشكلتج يا دانا انج طيبه وايد .. انا عارفه انج غلطانه على قولتج .. بس انتي اشوفج تعتذرين وهو ولا همه .. ما توقعت عادل يتغير جذي ..
دانا: يمه اعذريه .. انا غلطي وايد كبير ويمكن يكون عنده مشكله كمان لأني اشوفه دايم سرحان ويكلم بالموبايل ..
هزت الام راسها بأسف وهي تطالع في دانا ..
دانا: يمه انا صرت بخير وكمان رهف عندي .. يعني مو لازم تيلسين عندي .. روحي البيت اكيد عادل اللحين يوعان وما اكل ..
الام: خليه يتصرف .. الثلاجه مليانه اكل ..
دانا: بس حرام ييلس في البيت وحده .. يمه الله يوفقج روحي عنده البيت ..
طالعت الام في بنتها فتره بعدين قالت: خلاص لمن تيي رهف بخليها توصلني البيت ..
ابتسمت دانا وبعدين غمضت عيونها ترتاح ..
كان عادل واقف قدام باب الغرفه وساكت يفكر بعد ما سمع كلامهم .. بعد شوي دق الباب ودخل ..
عادل: السلام عليكم ..
فتحت دانا عيونها وطالعت فيه .. فرحت لمن شافته جاي ..
الام: عادل .. كيف ييت ..؟!
قفل الباب وقال: بالتاكسي ..
طالع في دانا وقال: كيفج ..؟!
ابتسمت وقالت: الحمد لله تمام ..
قرب الكرسي شوي وقال: اسمعي ..
دانا: نعم ..
عادل: لا تحسبي اني ياي عشان اطمئن عليج .. انت غلطانه لو ضنيتي جذي ..
اختفت الابتسامه عن وجه دانا وقالت بحزن: عيل عشان شنو ..؟!
عادل: انا بتكلم وما ابي احد يقاطعني ..
دانا: طيب ..
عادل: انتي بنفسج اعترفتي وقلتي ان خطأج كان كبير .. انتي غلطتي ولازم تتعاقبي .. طلعه من البيت ماكو .. روحه للجامعه ماكو .. موبايلج تعطيني اياه وتلفون البيت ما تلمسينه .. زيارات للبيت من رفيجاتج او اصحابج في الجامعه ماكو .. اذا فيه زواج او عزيمه ما تروحين .. حتى لو تعبتي نييب لج الدكتور للبيت .. تطالعين في التلفزيون ممنوع .. صحيح انه مافي دش بس ولو ممنوع تطالعين .. دريشة غرفتج ما تفتحيها وطلعه للحوش ماكو .. وهذا الامر راح يستمر لين يي نصيبج وتتزوجي وبعدين عاد بكيفج .. فاهمه ..؟!
طالعوا الام ودانا في عادل بصدمه ..
الام بعصبيه: شذا الحجي يا عادل ..؟!
نزلت دانا راسها وقالت: لو سويت هذا الشي راح تسامحني ..؟!
عادل: افكر ..
فسكتت وهي تجاهد دمعتها لا تنزل .. صح هي غلطت بس مو لهدرجه يسوي فيها كذا ..
هزت راسها وهي تقول لنفسها انها غلطت ولازم تتعاقب .. الشي اللي سواه عادل صح في رايها ..
بصراحه هو مو صح بس تحاول تقنع نفسها انه صح .. هذي هي مشكلتها .. اذا غلط الناس تدور لهم اعذار ..
طالع عادل فيها وقال: ما سمعت ردج ..
الام: دانا ماراح تسوي اللي قلته فاهم ..؟!
عادل: اذا ما سوته فأنا راح اتبرى منها ولا عاد بتكون اختي ابدا ..
رفعت دانا راسها تطالع في عادل وقالت: موافقه بس الجامعه ابي اروح لها .. ابي أأمن لك مستقبلك يا عادل ..
عادل: لا ..
فسكتت بعدين جت بتتكلم بس عادل اشر بإيده انها تسكت فسكتت ..
عادل بإبتسامه: افرضي ان الحجي اللي قلته قبل شوي كان صج .. يعني افرضي اني فعلا منعتج من كل شي .. وش بتكون نضرتج لي ..؟!
طالعت فيه ونزلت دموعها وهي تقول: حماااار ..
الام بعصبيه: صج انك سخيف .. اختك تعبانه وانت تستخف دمك ..
جاء عادل عند دانا وسلم عليها وقال: سلامات وانا فعلا آسف على كل شي ..
جلست بالصعوبه وحضنت اخوها وبكت وهي تقول: لا انا آسفه يا عادل .. والله ما اسوي شي من دون ما اقولك و.......
وما كملت كلامها لأنها كانت تبكي .. فتحت رهف باب الغرفه وجت بتدخل بس تراجعت لمن شافتهم ..
قفلت الباب وقالت بإبتسامه: اخس يا رهف .. والله كلامج يأثر .. المهم اللحين ان كل شي صار تمام ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊

في الخور وعند عائلة طارق .. كانت سهام توها صاحيه من النوم ونزلت للصاله تدور طارق بس مالقيته ..
دخلت المطبخ وقالت: قوه يمه .. صباح الخير ..
الام: اي صباح الخير وانتي توج صاحيه .. شوفي الساعه جم ..
طلعت سهام جوالها وقالت: عشره ونص .. طيب الوقت بدري ..
الام: بدري في عينج ..
سهام: يووه يمه انا شسويت لج تخاصميني من صباح الله خير ..؟!
الام: الناس تصحى من الساعه تسعه او ثمانيه وانتي توج تصحين ..
سهام: يا سلام .. اللحين تخاصميني انا وطارق النايم فوق ما تخاصميه ..
الام: مالج شغل في طارق .. لو ينام لين الليل ما تدخلي ..
سهام: اووووف والله لاصحيه من النوم ..
وطلعت فوق وفتحت غرفته بقوه ..
كانت الغرفه مظلمه والستاير مقفله وثللللللللج .. كانت باررده مره وشكلها يجيب النوم والاسترخاء ..
سهام: ما شالله نايم ومستريح وانا اتلقى التهزيء .. لو ما سهرت معاه امس جان صحيت بدري وما تهزأت ..
جت عنده وسحبت البطانيه بقوه وتقول: طــــــــــــــــارق قوووووم ..
فتحت الشباك وطفت المكيف ونطت فوق السرير وهزت كتفه بقوه ..
سهام: طارق طارق قوم قوووم طارق ياللا قووم قوم قوم .. طارق بسرعه اصحى وقووم قووم يا طارق قوم ياطارق ياللا قوم ..
انزعج طارق وبعدها وهو يقول بعصبيه: ها .. ها .. ها ابعدي يالجلبه ..
رجعت تهز ظهره بقوه وتقول: قوم قووم الساعه عشره ونص ياللا قوم وبلا كسل قووووووم ..
جلس بعصبيه واخذ مخدته ورماها في وجهها وهو يقول: ابعــــــــــــــــدي يالجلبه قبل لا اراويــــــــــــــــج شغلج ..
سهام: ههههههه والله لازعجك ..
اخذ بطانيته وانسدح وحط البطانيه فوق راسه وهو يقول: طلعي وطفي الليت ..
قامت وفتحت التلفزيون وحطته على قناة فاضيه ورفعت الصوت لآخره وبعدين قلبت فجأه على قناة اغاني ودبكه ..
فز طارق من مكانه من الصوت المزعج اللي طلع فجأه ..
لف على سهام وقال بعصبيه: انتي اش اللي مسلطج علي .. طلعــــــــــــــــي برى قبل لا تندمي وطفي التلفزيون ..
سهام: ههههه والله ما اطلع إلا لمن تصحصح وتنزل ههههههههه ..
طارق بعصبيه: انا ترا ما العب معاج .. طلعي برى يالثوره ..
سهام: هههه ماكو شي اسمه ثوره .. انثى الثور هي البقره ههههه متخلف ..
فعلا عصب وتنرفز .. قام من فوق السرير وهو ناوي شر .. راح يأدبها عشان تبطل هالحركات ..
سهام: هههه عصب عصب ..
ونزلت بسرعه وهي تضحك ..
طارق من اعلى الدرج: سهــــــــــــــــاموه تعالي هني بسرعه ..
سهام وهي تحت وتمد لسانها: اذا فيك خير الحقني ..
طارق: سهامووه انا مو رايق لج .. تعالي قبل لأرمي الجزمه بويهج ..
سهام: ههههه طيب وين الجزمه ما اشوفها ..؟! ههههههه ..
طارق بعصبيه: سهاموه بتيين ولا لا .. انا ماني فايق لبزارين الآحقهم ..
سهام: وليه انا غبيه عشان ايي لحتفي بريلي ..؟!
زفر بعصبيه وغمض عيونه يهدي من نفسه وبعدين فتحها وقال: صج انج بزره ..
طلع ودخل غرفته .. اخذ منشفته ودخل الحمام يتروش ..
سهام: هههههه احمد ربي انه ما حطني في باله .. المهم اني ازعجته ..
طلعت الام من المطبخ وقال: سهاموه شذا الصراخ اللي سمعته قبل شوي ..؟!
سهام بتنهيده: ياذي السهاموه .. ابي اسمع كلمة سهام يا جماعه .. ارحموني ولبوا رغبتي ..
الام: اتوقع اني سألتج فياوبي ..
سهام: هذا ولدج الله يهديه .. يخاصمني ويضربني وانا ما سويت شي ..
الام: جذابه .. مستحيل تكونين بريئه ..
سهام: من جد يا امي .. قال والله لا اضربج مثل ما ضربتيني في الحلم ..
عقدت الام حواجبها وقالت بصوت منخفض: شصار لعقل طارق ..؟!
بعدين رفعت صوتها وقالت: تستاهلين .. مين قالج تضربينه ..؟!
فتحت سهام عيونها بدهشه وقالت: امي من صجك تتحجين ..؟!
الام: ايه .. وياللا قولي لأخوج يي يتريق لأن الريوق جاهز ..
سهام بخوف: ها .. لا لا وقت ثاني .. اقصد انا بحط الريوق عالطاوله وانتي ناديه ..
الام: اقول نادي اخوج وبلا هذره زايده ..
ودخلت داخل .. تنهدت سهام وطالعت فوق ..
سهام: الله يستر .. ان شالله ما يكون معصب ..
طلع الدرج وكان باب غرفته مفتوحه شوي ..
دقت الباب بهدوء وقالت: طارق ممكن ادخل ..
طارق: شذا الادب اللي هل عليج فجأه ..؟!
فتحت الباب ودخلت وكان لابس بنطلون بس وينشف شعره بالمنشفه ..
سهام بإبتسامه: نعيما ..
اخذ طارق قميص رصاصي ووقف قدام المرايه وهو يقفل الازارير وقال: لو عدتيها قسم بالله راح تشوفين يوم اسود .. فاهمه ..؟!
سهام: من عيوني وهذي آخر مره ..
طارق: مثل البزارين .. قدامي تسوين انج البنت المؤدبه ولمن تبعدين تقعدين تهددين وتنرفزين .. شكنتي تبين ..؟!
سهام: امي تقول الريوق جاهز ..
لبس ساعته واتجه للباب وهو يقول: لا تنزلين قبل لا ترتبين غرفتي ..
لف عليها وقال بحده قبل لا ترد: مابي اعتراض ..
سهام: حـ حاضر ..
ابتسم وبعدين خرج من الغرفه ونزل تحت ..
راح لعند طاولة الاكل وشاف امه توها تجلس ..
سلم على راسها وقال: قوه امي ..
الام: الله يقويك ..
جلس وقال: اكيد انتي اللي سويتي الريوق ..
الام: طبعا .. مو اختك اللي صحيت متأخر اليوم ..
طالع طارق في امه بعدين ابتسم وقال: الساعه عشره اسمها متأخر ..؟!
الام: ايه ..
طارق بصوت منخفض: احمد ربي اني ما ادرس هنا ..
الام: شقلت ..؟!
طارق: لا لا انا اقول الله يهداها سهام المفروض تصحى بدري ..
الام: ايه فعلا .. الا هي وينها اللحين ..؟!
طارق: انتي اتريقي ولا تهتمي فيها ..
فبدأت الام تاكل وقالت: كيف الجامعات في الدوحه ..؟!
طارق: تمام ..
الام: والله ما ودي انك تدرس هناك بس وش اسوي .. الجامعات هنا مليانه وكمان يمدحون جامعات الدوحه مره ..
طارق: خلاص كلها سنه ونص وارجع هنا ..
دخلت سهام وشهقت وهي تشوفهم ياكلون ..
سهام: نذااااالــــــــه .. ليه ما تنتظروني ..؟!
طالع طارق فيها وقال: انا اللي قلت خلنا ناكل ونطنشج .. عندج مانع ..؟!
ابتسمت وقالت: لا اكيد ما عندي ..
جلست وبدأت تاكل ..
الام: طيب انت مرتاح هناك ..؟!
طارق: الحمد لله مرتاح وايد ..
سهام: طارق كيف جامعتكم هناك ..؟!
طارق: حلوه وكبيره و......
سهام: لااااااا انا اقصد الطلبه اللي فيها .. يعني جم عدد اصحابك ..؟! ومين الناس اللي تهاوشت معاهم ..؟! والكافتيريا زحمه ولا لا ..؟! ومين من الطلبه الله تكرههم ..؟! وجم عدد الدكاتره المليقين ..؟! و ابي اعرف جامعتكم هاديه ولا فيها مشاكل ومضاربات واكشن ..؟! ياوب ..
طارق: تصدقي اني بشر ..
سهام: اكيد بشر .. تستخف دمك ..
طارق: حلو انج تعرفين اني بشر ومو آله عشان ارد على هالكم الهائل من الاسئله .. اسألي سؤال سؤال عشان اقدر اياوب ..
سهام: اوووف طيب .. الجامعه اكشن ولا دراما ولا رومنسيه ..؟!
طارق: لا مرعب ..
سهام: ها ها بايخه ..
طارق: ما البايخ إلا انتي واسئلتج .. هذي جامعه مو فلم ..
سهام: انا اقصد هل جامعتكم فيها مضاربات ومقاتلات ولا هاديه وحزينه وكئيبه ولا فيها حركات ورومنسيه وحب ..
طارق: اتوقع ان فيها اشباح ودماء .. سهــــــــــــــــام اسألي عدل عشان اياوب عدل ..
سهام: اووووف طيب جامعتكم من اي نوع ..؟!
طارق: اتوقع انه من نوع الحرير او القطن .. ما اتذكر صراحتا ..
سهام: طــــــــــــــــارق انا سألت عدل فياوب عدل رجاءا ..
لف على امه وقال: امي .. شخبار عمتي ام لمياء ..؟!
فغمزت سهام وقالت: عمتى ولا لمياء ..؟!
طالع طارق فيها وقال: سهام ان ما سكتي وبطلتي هالحركات ما تلومين إلا نفسج ..
فسكتت سهام لأنه باين عليه عصب ..
الام: الحمد لله تمام واولاد عمتك كلهم بخير و ..... اووووه حلو اني تذكرت ..
طارق: شنو اللي تذكرتيه ..؟!
الام: من اسبوعين كنت انتضرك تيي عشان اقولك عليه .. هذي امانه وابيك تساعدني ..
استغرب طارق وقال: شقصدج ..؟!
الام: سهام وين الضرف اللي اعطيتج اياه قبل اسبوعين وقلت لج ارفعيه ..
سهام بإبتسامه: واااو .. قلتي سهام وما قلتي سهاموه ..
الام بعصبيه: سهــــــــــــــــاموه وويع وين الضرف ..؟!
سهام: اووف ما اكتملت فرحتي ..
بعدين سكتت وقالت: اي ضرف ..؟!
الام: سهاموه لا تهبلين فيني .. الضرف اللي اعطيتج وقلت ارفعيه لين يي طارق وبعدين اعطيني اياه .. وينه ..؟!
سهام بإستغراب: بس انا ما اتذكر انج اعطيتيني اي ضرف ..
فأندهشت الام وقالت: الضرف البني اللي فيه اوراق تخص عمك .. الضرف هذاك وايد مهم وقلتلج احفضيه ولا تضيعيه .. تذكري وين حطيتيه ..
سكتت سهام وهي عاقده حواجبها تفكر وامها تنتظرها تتذكر .. وطارق يطالع فيهم مستغرب ..
طارق في نفسه: "عن اي ضرف يتكلمون وليش هو مهم .. وكمان عمي مات من فتره طويله فكيف تكون الاوراق تخص عمي" ..
سهام: ايييه صح تذكرت .. الضرف اللي قلت بقرا اللي فيه بس خاصمتيني وقلتي لا تلمسينه ابدا ..
الام بإرتياح: ايه هو .. واخيرا .. طيب قومي ييبيه ..
سهام بإبتسامه: بس ما اذكر وين حطيته ..
الام: ايــــــــــــــــش ..؟!!
سهام: اعطيني فرصه افكر اليوم وادور عنه واكيد بلقاه ..
الام: الشرهه مو عليج .. الشرهه على اللي يعطيج شي تحفضينه عندج ..
طارق: امي ..
الام: نعم ..
طارق: الضرف هذاك شفيه ..؟!
الام: خل اولا الست سهاموه تلقاه وبعدين اوريك الاوراق والاثباتات واقولك ..
عقد حواجبه .. اوراق واثباتات .. شي غريب ..
الام: وانتي بسرعه كلي وروحي دوري عالضرف في كل مجان .. لج فرصه لين باجر وإذا مالقيتيه ياويلج مني ..
سهام: حاضر ..
الام: بسرعه ابلعي وخلصينا ..
قام طارق وقال: الحمد لله شبعت .. ياللا انا رايح ..
سهام: وين رايح ..؟!
طارق: يلعن ام اللقافه ..
سهام: لا بجد وين بتروح ..؟!
طارق: بروح غرفتي ..
سهام: بايخ .. عبالي بيروح مجان حماس ..
طارق: ههههههه ..
طلع فوق وراح لغرفته ..
اما سهام فأكلت بسرعه وبعدين بدأت تدور على الضرف ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊