شبكة همس الشوق - عرض مشاركة واحدة

10 - 3 - 2014, 01:25 AM

في منتصف الليل .. كانت جالسه وهي متوتره وتاكل اظفرها الابهام من القلق والانتظار ..
طالعت في ساعتها وقالت: تأخر تأخر كثير .. كل هالوقت اوووف ..
قامت ومشيت رايحه وجايه .. هي فكرت وقررت والليله بتسويها ومافي شي يمنعها ..
لفت للباب تطالع فيه بس ما كان فيه احد .. كانت تنتظره على احر من الجمر ..
وفي نفس الوقت خايفه ان بعد كل هذا الانتظار ما تحصد شي ..
ابعدت هذي الافكار عن راسها وقالت: لا راح يقدر ييبه راح يقدر ..
جلست عالصوفا السودا المستقله وهي تقول: بس تأخر ..
لفت بسرعه على جهة الباب لمن شافته دخل ..
فقامت وقالت بلهفه: ها .. قدرت ..؟!
جاء عندها وقال: طبعا طال عمرج .. وهذا هو رقم موبايل اسيل الرملي ..
ابتسمت بإرتياح .. فعلا قدر يجيب رقمها ..
اخذت الورقه وقالت: مشكور ..
شالت شنطتها ديور السودا وخرجت وركبت سيارتها الهمر وتوجهت لبيتها ..
هي مصممه انها تتأكد ان كانت بنت سميه ولا لا ..
فعشان كذا حجزت موعد في مستشفى خصوصي عشان تآخذ اسيل وتكشف هناك ان كان لها تؤام ولا لا ..

.........................................

في هالوقت في بيت عبد الرحمن الرملي كانت الاجواء هاااديه ..
البيت مظلم والكل في غرفته ونايم ..
مو من عادتهم ينامون بدري في الاجازات بس عشان بكره راح يجي فيصل بدري ..
في غرفة اسيل كانت نايمه وجوالها فوق الكمدينه الصغيره جنب سريرها ..
دق جوالها وهي حست فيه بس ما كان فيها حيل ترد وبعد فتره مدت ايدها وردت ..
اسيل بصوت كله نوم: الو .. مين ..؟!
ابتسمت وقالت: نايمه يا حبيبة الماما ..
استغربت اسيل وعدلت نفسها وقالت: مين انتي ..؟!
قالت بإبتسامه: انا وصايف ولا ما تتذكريني ..؟!
اسيل: منهي وصايف .. سوري ما اعرفج ..
وصايف: بس انا اعرفج يا استاذه اسيل .. واعرف كل شي عنج بالضبط ..
استغربت اسيل وفي نفس الوقت خافت وقالت: مين انتي ..؟!
وصايف: تبين تعرفين مين انا .. انزلي تحت وقابليني في الحوش عشان نتفاهم ..
ارتعبت اسيل وقالت: شتبين ..؟!
وصايف: انا انتظرج تحت يا بنت سميه وتعالي لــــوحــــدك ..
وقفلت السماعه .. طالعت اسيل في جوالها والنوم طار منها وحل مكانه خوف ..
اسيل: منو هذي وشتبي مني ..؟! انزل ولا لا ..؟!
هزت راسها وقالت: ماني نازله واللي فيها فيها ..
نامت وحطت البطانيه فوق راسها وهي تحاول تطنش الامر قد ما تقدر ..
مستحيل تنزل .. ماهي غبيه عشان تنزل لأي شخص يتصل ويقول انزلي ..
" يا بنت سميه "
بعدت البطانيه عن راسها وقالت: سميه ..؟! امي احلام مو سميه .. هذي ثاني مره اسمع فيها اني بنت سميه .. منو سميه ذي ..؟!
حست بداخلها فضول تعرف مين ذي البنت وايش تبغى وفي نفس الوقت خايفه مرره ..
قامت من فوق السرير .. اللي اتصل فيها بنت مو ولد عشان تخاف .. قلبها قارصها بقوه وراح تنزل تشوف مين ..
وقفت قدام المرايه تطالع في شكلها .. فابتسمت وهي تشوف قصة شعرها اللي قصتها .. تحس بحماس كل ما شافت شعرها ..
طالعت في لبسها وكانت لابسه بجامه زرقا وهاديه ..
اسيل: انزل لها بالبجامه ولا لا ..؟!
هزت راسها بلا وفتحت دولابها وطلعت لها بلوزه صفرا بكتابات سودا كثيره وغير مفهومه مع بنطلون اسود ..
لبستها وبعدين لبست جزمه سودا لان الجو بارد وسيراميك البيت بارده وارضية الحوش اكيد بتكون ثلج ..
فتحت باب غرفتها بس حست بتردد وخوف .. بغت تبطل وترجع ..
اسيل: بعد ما لبست وتجهزت ارجع .. لا ما ابي يروح تعبي عالفاضي ..
نزلت من الدرج وراحت لباب البيت وفتحته .. فلاحضت وحده واقفه قدام باب الحوش وتطالع في ساعتها ..
اسيل: ليش باب الحوش مفتوح ..؟!
جت اسيل عندها وقالت: نعم شتبين ..؟!
لفت وصايف عليها وقالت: تأخرتي ..
طالعت اسيل فيها وقالت: قد شفتج قبل جذي ..
وصايف: ايه شفتيني ..
مسكتها من ايدها وهي تقول: تعالي ابيج في شغله ..
وسحبتها للسياره وركبتها فيها وبعدين ركبت وشغلت السياره .. كل هذا واسيل مصدومه من حركتها ..
فاستوعبت وقالت: هيه انتي شتسوين ..؟!
حركت السياره بسرعه وقالت: راح اقولج ايش ابي وابين لج انج بنت سميه ..
اسيل بعصبيه: انتي ما تفهمين .. امي اسمها احلام مو سميه .. وقفــــــــــــــــي السياره بسرعه يالجلبــــــــــــــــه ..
اسرعت وصايف وقالت: اطمئني ما راح اخطفج .. انا ابي أأكد لج شي انتي غافله عنه يالغبيه ..
طالعت اسيل فيها .. كلامها غريب ويخوفها .. ايش الشي اللي تبغى تبينه لها .. وايش تقصد بانها بتأكد شي كانت غافله عنه ..
تحس نفسها بتنجن من اللي يصير لها .. بغت تصارخ وتخليها توقف السياره غصب بس في داخلها شي يصرخ بلااااااا ..
فسكتت وطالعت فيها وقالت: شتقصدين ..؟!
وصايف: اللحين تعرفين ..
طالعت في وصايف فتره طويله .. مين ذي البنت اللي دخلت حياتها فجأه وايش تبغى منها ..؟!
وقفت وصايف قدام المستشفى وقالت: وصلنا ..
طالعت اسيل في المستشفى بصدمه وقالت: ليه موديتني المستشفى .. انتي شتبين بالضبط ..؟!
وصايف: ما راح ينقص منج شي لو نزلتي وياي .. انا ابي لج المصلحه ..
اسيل: عن اي مصلحه تتحجين عنها .. انا مب فاهمه شتبين مني ..
وصايف: انزلي وحتعرفي ..
سكتت اسيل وهي تطالع فيها فتره بعيون مضطربه وحيرانه ..
نزلت من السياره وهي ما تدري ايش السالفه وكان بإمكانها انها تعارض بس تبي تعرف ايش تبغى هذي البنت ..

.................................................. ......

في نفس هذا الوقت وفي مكان آخر .. في العصر ..
لا تستغربون انه العصر لأن المكان مو في قطر .. في بريطانيا ..
في بريطانيا وفي ولاية ليفربول بالتحديد .. في قصر سلطان الراهي ..
بناله قصر لأن معظم تجاراته هنا وعشان كذا عنده قصر في بريطانيا ..
مادام سلطان الراهي في قطر اذا وبلا شك هو ان القصر بيكون فاضي ومافي احد ..
بس القصر ما كان فاضي لأن سامي سلطان الراهي كان موجود فيه ..
مو بس هو لحاله لأن القصر مليان بالخدم والحراس والمشرفين اللي يوصل عددهم بالمئات ..
وللأسف كلهم يتكلمون باللغه الانجليزيه اللي اخونا سامي ما يفهم فيها شي .. مافي غير ثلاث اشخاص يتكلمون عربي ..
كان الجو في بريطانيا بارد وسقوط الثلج عندهم ما يوقف ابدا ..
كان واقف وهو لابس جاكيت الفرو الثقيل لين فوق ركبته ولاف على رقبته ايشارب ثقيل بسبب البرد ومدخل ايده بجيب البالطوا ويضحك بهدوء ..
كان قدامه منظر غصبه انه يضحك .. كان واقف قدام النافوره .. بس النافوره كانت مثلجه والمويه اللي فيها صارت متجمده ..
سامي: هههههههه اول مره اشوف نافوره مثلجه جذي هههههه ..
طلع ايده من جيب جاكيته ولمس المويه وابتسم .. في قطر نافورتهم ما كانت تتجمد ابدا واللحين متجمده .. استمتع وهو يشوف شكلها كذا ..
تنهد ولف وطالع في الجو وفي الثلج اللي مو راضي يوقف ..
طفش ..
يحس بطفش وملل واختناق مو طبيعي ..
يبغى يرجع لقطر .. اشتاق لبلده بشكل مو طبيعي .. اشتاق لاصحابه ..
يتمنى انه ودعهم عالاقل قبل لا يسافر ..
بس سلطان الراهي سحب جواله ومنعه من الطلعه لين سافر ..
نفسه يتصل فيهم بس ما عنده ارقامهم ومو حافظ رقم اي واحد فيهم .. ابتسم وهو يتذكرهم ..
اشتاق لريان وبروده ولمن يساعده في مشاكله .. نفسه يكون موجود ويحكيه عن طفشه ..
اشتاق ليزيد وعصبيته اذا شافه مع بنت او مع اروى ولمن يسحبه من عندهم ..
اشتاق لعادل وهدوئه وطيبته .. يتمنى يكون موجود عشان يحرجه زي دايم ..
اشتاق لعماد وخاصتا لمن يقول طفشان وهذا يعني انه يبغى مقلب او شي حماس يسويه ..
اشتاق لصالح وفلسفته ودفرته وخاصتا ساعته اللي ما تفارق ايده ابدا ..
تنهد تنهيده طويله طالعه من قلب وجلس على كرسي الخشب ..
سامي: لو اتذكر رقم واحد فيهم يكون حلو .. بس المشكله اني ما اتذكر اي شي والخدم هنا كلهم انجليزيين .. مافي غير ثلاثه اشخاص ماهم متعاونين معاي عشان اطلب منهم يطلعولي رقم واحد من ربعي ..
حط ايده على خده وهو يطالع في الجو اللي كان برررد بشكل لا يطاق بس هو ما همه .. حتى لو تعب ماهمه ..
جاء عنده واحد من الخدم وقال: raw cappuccino ‎..<< تفضل الكابتشينو << ..
مافهم سامي وش يقول بس شاف بإيده كوب كابتشينو فقال: مابي شي واذلف عن ويهي ..
الخادم: what are you say ‎..‎?‎‎! I‎'m not anderstand arabic ‎..‎‏>‏‏> مالذي تقوله ‏..؟‏! انا لا افهم العربيه << .. ‎
طالع سامي فيه .. هو حده متضايق ومو فاضي لواحد يتفلسف عليه بالانجليزي ..
سامي: شكلك اكمخ وما تفهم وش اقول .. انقلع عن ويهي قبل لا اعصب ..
طالع فيه الخادم نضرة بلاهه ومو فاهم شي ..
سامي: خادم اهبل وانا اهبل منك ..
سكت يدور له كلمه انجليزيه يقولها .. ابتسم لمن لقاها ..
سامي: Go .. << اذهب << ..
الخادم: But the place is cool ‎.. << لكن المكان بارد << ..
سامي بعصبيه: انا قلت Go انت ما تفهم ..؟!
هز الخادم راسه بخوف ودخل ..
سامي: غبي .. يا حب الخدم للتفلسف بلغة الخواجه ذي .. اوووف ..
على قد ماهو عصبي صار عصبي اكثر ونادرا يضحك او يبتسم ..
رفع راسه وشاف المطر بدأ ينزل بغزاره ..
سامي: كيف الشتاء في قطر ..؟!
قام لأن المطر كان يتساقط بغزاره شديده .. دخل القصر ونزل جاكيته اللي كان غرقان من الماي ..
وبعدين حرك شعره الطويل بإيده عشان يجففه من المويه ..
جلس عالكنبه وقال: ابغى رقم واحد منهم بس .. بس رقم واحد ..
تأفف وهو يحاول يتذكر بس ما قدر ابدا ..
سكت شوي وابتسم غصب عنه لمن تذكر شي ..
سامي: عادل .. رقم عادل .. لمن اخذت الرقم كتبته ورى دفتر الحساب ..
قام بسرعه وراح جري لغرفته .. سحب شنطته الكبيره وجلس متربع عالارض بحماس .. فتح الشنطه .. هذي الشنطه خاصه بالدراسه واغراض الدراسه ..
فتحها وبدأ يدور في الدفاتر والكتب والملازم اللي قدامه ..
سامي: ان شالله ما رميته ان شالله ما رميته يارب ..
وقف فجأه واخذله نفس وبعدين: آآآتسســـــــــــــــــــــــــو ..
عطس مرتين ورى بعض وقال: اووووف ما امداني ايلس شوي .. على طول زكمت ..
رجع يدور وعفس الشنطه فوق حدر عشان يدور على هالدفتر ..
سامي: لا مو معقوله ابدا .. شهالحظ المنيل بستين نيله ..؟! اوووف ..
طالع في الشنطه بإحباط .. دور ودور ومالقى الدفتر ابدا ..
كان هناك خيط يوصله باصحابه بس هالخيط انقطع وصار سراب ..
ابتسم وسحب الدفتر من وسط الكتاب وقال: هههههآآي كشفتك .. ليه كنت تختبي بوسط الكتاب يالملعون ههههههههههههه ..
انبسط وفتح الصفحه الاخيره من الدفتر وانشق حلقه من الابتسامه لمن شاف رقم عادل ..
اخذ جواله وسجل الرقم واتصل عليه بسرعه وبحماس ..
جته رنه دوليه وبعدين انقهر لمن سمع ان الجوال مقفل ..
سامي بقهر: ليش ليش .. مو وقته انه يقفل موبايله .. ليه ما يخليه مفتو ....... آآآآتسسســــــــــــــــوو ..
عطس مره ثانيه .. وبعدها رمى جواله على السرير و لم الكتب ودخلها في الشنطه بإهمال ..
رجع الشنطه مكانها وبعدها فتح باب غرفته عشان يخرج بس وقف ..
سامي: يمكن يفتح جواله ويشوف مكالمتي ويدق ..
ابتسم واخذ جواله وحطه في جيب بنطلونه ..
فأنتبه ان اطراف بنطلونه غرقانه .. فتح دولابه واخذله ملابس ..
سامي: بآخذ لي دش مره وحده ..
دخل الحمام ومن شدة الحماس دخل الجوال معاه ..
حطه فوق رف المغسله وقال: اخاف يدق وانا اتروش وما اقدر ارد عليه وتفوتني المكالمه .. اذا كان معاي في الحمام اقدر ارد بسرعه ..
ابتسم برضا على تفكيره وقال: بسم الله علي اعرف افكر ..
وبعدها بدأ يستحم ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊