شبكة همس الشوق - عرض مشاركة واحدة

10 - 3 - 2014, 01:37 AM

في العصر وفي بيت وصايف ..
اخذت جوالها وجلست عالكنب ..
راح تتصل بفارس اللحين ..
ضغطت الازرار وبعدها ضغطت زر الاتصال ..
مرت ثواني كأنها دهر بعدها جاها صوته يقول: الو ..
وصايف: هلا ..
فارس: اهلين ..
وصايف: كيفك ..؟!
فارس: تمام ..
وصايف: ........................
فارس: منو وياي ..؟!
وصايف: وصايف ..
سكت شوي بعدين قال: كيفج ..؟!
وصايف: الحمد لله ..
فارس: اعرف ليش اتصلتي ..
وصايف: حلو .. طيب ابي افهم ليش اخذتها ..
فارس: ما ينفع الكلام عالتلفون ..
وصايف: اوكي نتقابل في مطعم فوشون الساعه خمسه ..
فارس: طيب .. باااي ..
وصايف: باااي ..
قفلت الجوال وطلعت فوق .. بدلت ملابسها وجهزت نفسها ..
ركبت سيارتها وعلى الساعه خمسه وصلت المطعم ..
جلست عالطاوله وبعد عشر دقايق شافت فارس جاي ..
جلس وقال: سوري عالتأخر ..
وصايف: مافي مشكله ..
فارس: تبغي تاكلي شي ..؟!
وصايف: لا ..
سكت فارس شوي فقالت وصايف: مالك حق تاخذ الاوراق ..
فارس: اختي ولي الحق ..
وصايف بعصبيه: لا مالك حق ..
فارس: اهدأي .. احنا يينا نتفاهم مو نتهاوش ..
سكتت بعدين قالت: استاذ فارس .. انا ابي الاوراق ..
فارس: مدري وين حطيتها .. وحتى لو ادري ما راح اعطيج اياها ..
وصايف: ممكن اعرف السبب ..؟!
سكت فارس فتره طويله يطالع في وصايف بعدين قال: معاج حق .. اسيل مو اختي ..
طالعت وصايف فيه فتره بعدين ابتسمت بعدم تصديق وقالت: كنت عارفه ..
فارس: بس مو متأكده .. ما ابي اعطيج الاوراق لأني ما ابي اخرب حياتها .. واللحين بعد ما تأكدتي وش بتسوين ..؟!
قبل لا ترد سبقها وقال: هي ما تعرف اننا مو اهلها .. هذا يعني انها ما تدري اي شي عن امها سميه اللي تبغينها .. يعني اسيل ما راح تفيدج بشي عشان تنتقمي من سميه .. وثاني شي اسيل وحيده من يوم وعمرها سنتين .. ما عندها اب او ام او اخ او اخت .. عايشه حياة اصعب من حياتج .. عايشه مع عائله تحسبهم اهلها .. عاجلا او آجلا راح تعرف انها لقيطه .. لقيطه لقب قاسي راح يلصق فيها وما يتركها .. وش اصعب من ان الانسان يرمونه اهله من دون اي ذنب اقترفه .. انتي اهلج ماتوا .. هي اهلها رموها .. وش تبغين منها ..؟! تبغين تنتقمين منها لأنها بنت سميه ..؟! وش بتستفيدين ..؟! انا اقولج وش تستفيدين .. حتدخلي النار لأنج بتكوني قاتله .. حتحاولي تهربي من الشرطه والخوف يلازمج .. حيلاحقج الندم وضميرج راح يتعبج كثير ويمكن توصلي لدرجة الانتحار .. ها وش استفدتي ..؟! ولا شي ابدا ..
طالع فيها شوي بعدين كمل: ماتت امج وانتي عمرج حول سبع سنين .. يعني لج حول ١٣ سنه من يوم ماتت امج .. وش صلحتي لأمج طول هالسنين ..؟! دعيتيلها ..؟! او طلبتي لها المغفره والرحمه ..؟! او تصدقتي عنها ..؟! ما سويتي هالاشياء .. سوري بس انتي واضح انج ما تحبي امج .. ما سويتي ولا شي ينفعها .. بالعكس ضريتي امج كثير .. تتوقعين لو انها عايشه بترضى بحالج ..؟! ابعدتي نفسج عن الناس وفرغتي تفكيرج في الانتقام .. امج تتعذب نفسيا في القبر وهي تشوف حالتج جذي .. مقهوره على بنتها .. ترضي لأمج يصير فيها جذي ..؟! اكيد ما ترضي ..
سكت شوي بعدين قال: فرحي امج .. خليها ترتاح .. غيري من نفسج يا وصايف .. الله قدر ان امج تموت .. لو ان الله ما قدر جان سميه ما قدرت تقتلها .. عندج اعتراض على قدر الله ..؟!
طالع فيها ينتظرها ترد بس كانت منزله راسها وما تكلمت ..
فارس: اكيد ما عندج اعتراض .. وصايف حالتج افضل من حالة ناس كثير .. شوفي مثلا افريقيا .. عندهم مجاعه عنيفه .. ومع هذا صابرين .. انتي في نعمه يا وصايف .. في بلد آمن وصحتج تمام وعندج فلوس .. قارني نفسج باللي حواليج .. قارني باسيل مثلا .. حياتج احسن منها كثير .. عندج اصل وعندج اسم تفتخري فيه .. شايفه كيف انج في نعمه ..
غمضت عيونها وحطت راسها عالطاوله تبكي بصوت مسموع .. حزن فارس عليها .. قام وجلس جنبها ومسح على ظهرها يهديها ..
فارس: خلاص يا وصايف .. احنا في مطعم والناس يطالعون فيج ..
وصايف وهي تبكي: لو سميه ما دخلت في حياتنا جان ما صار اللي صار ..
فارس: لو ما دخلت سميه جان دخل واحد غيرها وصار اللي صار .. كل اللي يصير بيد الله مو البشر .. اتعوذي من الشيطان لأنه هو اللي يوسوس لج ويخرب حياتج ..
كملت بكي وما ردت ..
سكت شوي بعدين قال: انتي عندج عم صح ..؟!
هزت راسها بايه وقالت: بس تخلى عني وتركني .. وكله عشان ابوي تزوج امي من دون ما يشاوره .. لمن اتصلت عليه وانا صغيره قال شدخلني فيج ..
فارس: ما عاد اتصل مره ثانيه يعتذر ..؟!
وصايف: .................................
فارس: يعني اتصل .. وسكوتج يعني انج طنشتي اعتذاره .. الله غفور رحيم .. هذا عمج يا وصايف .. غلط وعرف غلطته فليش ما تسامحينه ..؟! سامحيه وروحي عيشي عنده .. عند بنات عمج .. اخرجي من القوقعه اللي حابسه نفسج فيها .. في ناس كثير ماتوا اهلهم ومع هذا فهم يعيشون احسن عيشه .. فوضوا امرهم لله وعوضهم عن فقدان اهلهم بالسعاده .. فوضي امرج لله وحتشوفي الراحه من عند ربج .. هذه الدنيا .. مصير كل انسان الموت .. بس تختلف الاسباب .. وانتي مصيرج الموت .. وعاد شوفي نفسج وش عملتي لآخرتج ..؟!
رفعت راسها من الطاوله ومسحت دموعها ولفت تطالع في فارس ..
ابتسم وقال: فكري في كلامي يا وصايف ..
قامت اخذت شنطتها وطلعت من المطعم ..
دخلت السياره ورمت نفسها عالمقعده تبكي .. تبكي على كل شي ..
هي في ضياع ومو عارفه وش تسوي ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊

في صباح يوم جديد على ابطالنا .. يوم السبت .. وفي بيت ابو فيصل ..
صحيوا من الصباح عشان دواماتهم في الجامعه .. هذا اول يوم في الترم الثاني ..
في غرفة ريما .. جهزت نفسها بالكامل وهي تفكر ..
بكره راح تضطر تخرج مع ياسر لاحدى المطاعم ..
تحس بخوف بس شجعت نفسها .. عادي واذا خرجت وش بيصير .. ولا شي ..
شجعت نفسها بهذه الكلمات ..
اخذت شنطتها من ديور ونزلت تحت فشافتهم يفطرون ..
جلست معاهم وهي تقول: هااااي ..
وبدأت تاكل ..
الاب: الاوادم يقولون السلام عليكم مو هاااي ..
ريما: وات ايفر .. << اي شي << ..
فارس: شكلج متحمسه للدراسه ..
ريما: No ..
اسيل: بس شكلج يقول انج متحمسه ..
فيصل: خلاص كلوا وانتم ساكتين ..
فسكتوا وبدأوا ياكلون .. بعدين ركبوا السياره وراحوا للجامعه ..
دخلت ريما الجامعه واتجهت لصاحباتها ..
ريما: هااااااي صبايا ..
مرام: اهلييين ..
سلموا عليها وقالت شذى: النفسيه اليوم تمام ..
ريناد: عكس ايام الاختبارات ..
مرام: فعلا .. اللي يشوفها ايام الاختبارات ما يصدق انها هذه نفسها ..
جلست ريما وقالت: بالله عليكم مين اللي نفسيته صح ايام الامتحانات .. اوووف الله لا يعيدها من ايام ..
ريناد: ههههه وانتي الصاجه ..
شذى: غريبه ييتي اليوم .. مو من عادتج تيين اول الايام في الفصل الدراسي ..
ريما: امممم تقدري تقولي انه مززاااج ..
مرام: وين قضيتي الاجازه ..؟!
ريما: اممم رحنا لمزرعة عمي والبحر وبس .. الاجازه قصيره وما يمدينا نروح مجان ..
ريناد: يعني ولا وحده منكم سافرت غيري .. انا تميزت عنكم ..
ريما: ليه وين سافرتي ..؟!
ريناد: سافرت للكويت عشان يدتي هناك نزورها ..
ريما: اها .. طيب بنات بسألكم سؤال ..
شذى: وشو ..؟!
ريما: لو مثلا تبين تسافرين لمجان وتطولين فيه حول شهر ولوحدج .. كيف تقنعي اهلج ..؟!
شذى: شهــــــــــــــر ..؟!!
ريناد: اسمعي .. قولي ان نفسيتج تعبت وبتسافرين عند يدتج تقعدين شهر .. ومن هناك عاد تقدرين تروحين للمجان اللي تبينه ..
ريما: بس يدتي ساكنه مع خالتي سعاد ..
ريناد: طيب ام ابوج ..
ريما: ماتت من زمان ..
مرام: انتي ليش تبين تسافرين ..؟!
ريما: سوري هذا سر ..
شذى: اسرارج ذي ما وراها غير المصايب ..
ريما بضبط اعصاب: شكرا هذا من ذوقج ..
اخذت شنطتها وقالت: بروح للكافتيريا ..
راحت قبل لا يقولون شي ..
ريناد: شكلها زعلت ..
شذى: بس انا ما قلت شي يزعل ..
مرام: ترى ريما بسرعه ينقلب مودها .. لا تشيلوا هم ..

.................................................. .........

اما عن اسيل اتجهت لصاحباتها ..
اول ما شافتهم صرخت: هاااااااااااااااااااااااااااااااااااي ..
لفوا عليها وصرخت لين: وحشتينــــــــــــــي ..
وسلمت عليهم وانواع الصراخ والاشواق اللي طلعت ..
ندى: اليوم اسيل مبسووووطه ..
اسيل: والله كانت نفسيتي زفت بس شفتكم انبسطت ..
لين بثقه: مشكوره مشكوره .. كنت عارفه اني مهمه بحياتج ..
اسيل: اخسس يا الثقه .. ارحمينا بس ..
لين: اطمئني اطمئني حأرحمكم لا تشيلي هم ..
اسيل: اقول مناك بس ..
لفت على ندى وقالت: وين ليان وسارا ..؟!
لين: ليان ههههه مسجينه مصخنه ..
اسيل: ههههههههه حرااام ..
ندى: من حقها تصخن .. ما تشوفون الاجواء كيف بارده هالايام ..
اسيل: عقبال لين تصخن وتفكنا ..
لين: لاا .. احلفي بس ..
اسيل: هههههه طرطعت .. المهم سارا طيب وين ..؟!
ندى: اتصلت وقالت بغيب ..
اسيل: غباء .. ليش يغيبون ..؟!
لين: ربع الجامعه غايبين لأنه اول يوم ..
اسيل: ليه حاسبتهم ..؟!
لين: ها ها اعرف انج تتطنزين .. بس ترى ما تضحكين ..
اسيل: احد قالج تضحكين ..؟!
ندى: شفيكم اليوم تتناجرون ..؟!
اسيل: مدري .. بس والله وحشتوني ..
لين بصراخ: مطـــــــــــــــــــــــــــر ..
لفت اسيل بسرعه وهي تقول: بجد ..؟!
لين: لا امزح .. ههههههه ..
اسيل: غبيه ..
ندى: شكلج تبين مطر ها ..؟!
اسيل: تونا في بداية الشتاء .. ان شالله تنزل ثلوج بدل امطار ..
لين: ليش عبالج انج في سويسرا مثلا ..؟!
اسيل: آآآآه ودي اسافر خارج ربوع بلادي ..
ندى: هههههه عجبتني ربوع بلادي هذه ..
لين: وين ودج تسافرين ..؟!
اسيل: اممم .. ودي اروح باريس واليونان وكندا ولندن اممم وكمان المكسيك وبريطانيا واسبانيا وسويسرا و و .. وودي اشوف البيت الابيض ..
ندى: ههههههههه لا اسيل مب صاحيه اليوم ..
لين: اقول اسيل شرايج نسطو انا وياج على هالبيت الابيض ..؟!
اسيل: اممم طبعا موافقه ..
لين: حددي الزمن والوقت وانا اييب الخطه ..
اسيل: والمصاريف على ندى اوكي ..
لين: اوكي اتفقنا ..
قامت ندى وهي تقول: هههههه اقول انتي وهيه امشوا للكلاس واتركوا هالاحلام لأصحابها ..
فراحوا للكلاس ورموا شنطتهم على الطاوله ..
اسيل: بنات والله واحشتني الجامعه ..
لين: اقول .. قسم بالله طفشتينا .. كل شي واحشج .. شكلج حفضتي هالكلمه طول الاجازه وييتي تسمعيها لنا ..
اسيل: ههههههه حرام عليج بس بجد كل شي وحشني ..
لين بضجر: اوووف ردت وقالت وحشني ..
اسيل: ههههههههههههههههههههه ..
........ بإستهزاء: ههههههه السالفه مره تضحك ..
لفوا ورى وشافوا واحد ..
ندى: اهلين ناصر ..
اسيل بعصبيه: نعم شتبي بعد .. ما يكفي سماجتك اللي في النادي ..؟!
ناصر: يووه يوه شفيج شبيتي .. انا ياي ابارك لكم النجاح للترم الاول ..
اسيل: مشكور ما نبي ..
طالعت ندى في اسيل بإستغراب .. اما لين فكانت عارفه لأن ليان قالت لها ..
<< هذا ناصر اللي قابلته في النادي هي وليان اذا كنتم ناسين <<
ناصر: العفو .. بس ممكن اعرف ليش تكرهيني ..؟!
لين: من الله كرهتك .. ممكن تفارق عن ويهنا قبل لا تندم يا الاخو ..
ناصر: اللحين انتي شدخلج ..؟!
عصبت لين فقالت اسيل: رفيجتي واللي يمسني يمسها .. فاهم ..؟!
ناصر بتفكير: امممم يمكن ..
اسيل باشمئزاز: صج صج مليق ..
راح ناصر عنهم وهو يقول بلا مبالاه: مو اكثر منج ..
اسيل بقهر: ينررررررفز ..
لين: وبقوه .. بس طنشيه ..
ندى: اللحين ابي افهم شفيكم عالريال ..؟!
اسيل: واحد وقح وما احبه ..
ندى: طيب احد قال حبيه ..
اسيل: ندددددى بلييييز روقينا ..
ندى: هههههه والله واضح انج على اخر اعصابج ..
لين: هههههههه وين الفرح وواحشني .. شكلها طارت ..
سكتت اسيل فتره بعدين قالت: انا اليوم مبسوطه وما ابي شي يعكر علي .. يصطفل هالناصر ..
لين: ارحمينا ياللي تسيطر على اعصابها ..
دخل الدكتور تركي وهو يقول: السلام عليكم ..
ترتبوا الطلاب وردوا عليه: وعليكم السلام .. كيفك يا دكتور ..؟!
د.تركي: تمام .. كيفكم انتم وكيف اجازاتكم ..؟!
ردوا باصوات مختلفه: تمام .... كئيبه .... نايس ..... قصيره مرره ..... حلوه كثير واستمتعنا .......... الخ ..
د.تركي بإبتسامه: المهم انكم اخذتم راحه من الروتين الممل ..
وحده من الطالبات: كيف الاجازه معاك يا دكتور ..؟!
د.تركي: حلوه ..
واحد من الطلاب: وين سافرت ..؟!
د.تركي: ما خرجت برى قطر ..
واحد من الطلاب: فعلا محد يقدر يطلع والاجازه هالصغر ..
وحده من الطالبات: يبغالنا نصلح مظاهرات عالاجازه ونلحق بأخواننا المصريين ..
واحد من الطلاب: اوكي نبدأ يوم الجمعه بعد الظهر ..
صاحبه: اوكي صار .. مين معاي ..؟!
واحد ثاني: إنا واضمن لكم عشرين شخص معاي ..
د.تركي: بس بس .. ميانين انتم ولا شنو ..؟!
واحد من الطلاب: يا دكتور نتغشمر ..
د.تركي: اوكي تغشمروا بس مو في الامور السياسيه .. خطر لو احد سمعكم ..
وحده من الطالبات: يووه الدكتور تركي يخاف من السياسه ..
صاحبتها: لا لا ما اصدق ..
جاء بيرد الدكتور بس انفتح الباب في هذا الوقت ..
لفوا كلهم يطالعون وكانت بنت واقفه واول مره يشوفونها في الجامعه ..
اسيل: مين ذي ..؟!
ندى: مدري ..
وطالعوا فيها .. كانت كييوت بكل ما تعنيها الكلمه ..
لابسه سكيني اسود وبلوزه كت صفرا عليها رسمه كبيره لسبونج بوب ..
وملامح وجهها جدا ناعمه .. شعرها اسود قصير عاملته اثنين بطريقه عشوائيه وحاطه شرايط صفرا على شكل فيونكه وماسكه بإكتافها شنطتها سبونج بوب كمان ..
يعني كيييييييييييوت لآخر درجه ..
د.تركي: عفوا .. منو انتي ..؟!
طالعت فيه البنت وقالت: هذا كلاس الدكتور تركي ..؟! << طبعا لا يفوتكم الراء لأنها قالته بدلع .. يعني البنت دلوعه << ..
د.تركي: ايوه ..
مدت البنت بوزها شوي وهي تطالع في الكلاس بعدين لفت عالدكتور تركي وقالت: تيب انا طالبه يديده ..
طالعوا الطلاب فيها وقالت اسيل لندى ولين: ههههه شايفه كيف كلامها ..؟!
لين: دلوعه يا ربي .. كلش وحرف الطاء والراء ..
ندى: بس الدلع لايق عليها وبقوه ..
اسيل: احسها طفله ..
لين: فعلا ..
د.تركي: اهلين .. طيب عرفينا بنفسج ..
طالعت فيه بإستغراب وهي رافعه حواجبها وقالت بدهشه: ما تعرفني ..؟!
استغرب واستغرب الفصل معاه ..
د.تركي بإستغراب: لا ما عرفتج ..
هزت راسها بدهشه وقالت ببراءه: مو معقوله .. اكيد تمزح ..
طالع فيها بتدقيق بس ما عرفها وقال: لا ما امزح ..
البنت: تيب انت دكتور يديد ولا قديم ..؟!
ابتسم على كلمة قديم فقال: لا قديم ..
البنت: عيل اكيد لازم تعرفني ..
د.تركي: طيب مين انتي ..؟!
ابتسمت وهي تقول: انا ...................

وانتهى اخر جزء من بارتنا السابع ..
انتظروني في البارت الثامن باجزاءه الثلاثه اللي تحوي على مفاجئات كثيره ..
من زمان ما حطيت اسئله وهذه هي اسئله ..
:؛: وصايف .. وش بتتوقعون ردت فعلها من كلام فارس ..؟!
:؛: سامي .. مين هالشخص اللي قابله .. هل فعلا يكون عمه ..؟!
:؛: ضاري وجراح ويزن .. مين هم وشقصتهم بالضبط ..؟!
:؛: بسام .. كيف بتكون حياته في الدوحه بشكل عام ..؟!
:؛: مين هالطالبه الجديده .. وش دورها في الروايه ..؟!

:؛: صرخة المشتاقه :؛:

|$[ نهاية البارت ]$|