شبكة همس الشوق - عرض مشاركة واحدة

10 - 3 - 2014, 06:36 PM

في مكان آخر من الجامعه وعند شلة غيدا ..
طالعت غيدا في ساعتها وقالت: باجي ربع ساعه ..
غدير: يا كرهي لها ..
غيدا: لو سمحتي .. كل شي إلا خويتي ما تسبينها ..
غدير: ابي افهم وش يابها عندنا .. كان انطقت في جامعتها ابرك لها ولنا ..
خلود: اللحين لا يفوتكم فيسها لمن تخرج من المحاضره وتشوف حمود ..
غدير وهي تقلد: ياااااي حبيبي حمووود ينتظرني عند الباب .. يا حبني لج والله .. وااااااحشتييييني يا قلبو ..
تهاني: ههههههههههههه الله يقطع ابليسج تعرفين تقلدين ..
طالعت فيهم غيدا بطرف عينها وقالت: اقول بس لا اتوطى في بطنج انتي وياها اللحين ..
خلود: اقول حمود عن هبالتج هذه .. تعالي نيلس وهي لمن تطلع بتييج ..
غيدا: لا .. انا الصباح ييت متأخر وما شفتها .. بجد وحشتني بيشو ..
غدير: بليييز سكتي .. احس نفسي بستفرغ من طاريها .. هالبنت ثقيلة طينه بشكل لا يطاق ..
لفت غيدا على غدير وقالت: انا شقلت .. سبوا اي احد إلا بيشو فاهمه يا آنسه ..؟! وإلا حتشوفي شغلج ..
غدير: يمممه ارتجفت .. يا شيخه طييري ..
غيدا بنفاذ صبر: غددددددير ..
تهاني: بيي يوم وتييج الجلطه يا غيدا ..
طالعت غيدا في ساعتها وقالت: باجي ست دقايق ..
خلود: اللحين تطلع بيشو بلبس لونه بينكي كالعاده ..
غدير: لا لونه بيكون فوشي ..
خلود: لا يا حبيبتي .. هي تحب البنكي كثير ..
غدير: وتحب الفوشي اكثر ..
خلود: طيب تراهنين ..؟!
غدير: اوكي اراهن .. اذا انا فزت فساعة سرماس اللي لبستيها امس بتكون من نصيبي ..
خلود: واذا انا فزت فنظارة بولغآري اللي في جنطتج لي ..
غدير: اتفقنا ..
تهاني: وافرضوا انها كانت لابسه لون ثاني ..؟!
غدير: لا يا حبيبتي .. هي ما تخرج عن هاللونين ينقالج انها ناعمه ..
خلود: مره وحده بس لبست احمر في عيد الحب ..
غدير: عيل يا تطلع بالفوشي او البنكي .. يعني يا انا اكسب او خالد يكسب ..
بعد شوي بدأ الطلبه يطلعون من الكلاس ..
ومن بين هالطلبه كانت بشاير طالعه بقصة شوجي على شعرها البني وبلبسها البنكي الناعم ..
ابتسمت خلود بإنتصار وقالت: ها ..!!
غدير: اوكي انتي كسبتي والنظاره لج ..
وقفت بيشو بدهشه وهي تطالع غيدا حبيبة قلبها وااقفه تنتظرها ..
بيشو: يااااااااي حبيبي حمودي ينتظرني عند الكلاس .. مو قادره اصدق .. ياااا حبني لج والله .. وااحشتيني يا قلبو ..
غيدا: وانتي اكثر ..
وحضنتها غيدا ..
غدير: اللحين هالمليقه بتقعد في الجامعه دايما ..؟!
خلود: ايه .. هي خلاص نقلت ملفها بالكامل ..
غدير: اووووف ..
تهاني: بتكون لزقه صراحتا ..
بيشو بإبتسامه: يااااي شعرج الاحمر لين اللحين مويود .. اموووت على هالشعر ..
غيدا: عالشعر بس ..؟!
بيشو: لا .. امووووت عليج كلج ..
دارت بيشو حول نفسها وقالت: شرايج فيني يا حبي ..؟! عملت دايت وصار جسمي روعه ..
طالعت غيدا فيها وقالت: ايوه جذي صايره احلى من اول ..
بيشو: اصلا انا عمري ما فكرت اسوي دايت .. بس قلت ان حمودي حبيبي يحب الجسم النحيف فصلحت دايت لعيونج ..
غيدا: جم صار وزنج ..؟!
بيشو بتفكير: اممممم ٤٨ ..
غيدا: لا لا .. انا ابي ٤٦ ..
بيشو: من عيوني حبيبتي .. انزل كيلوين بس عشانج ..
غيدا: ايوه هذه هي الخويه ولا بلاش ..
لفت بيشو عالشله وقالت: يااااااي نسيتكم .. والله صايرين تخققون وتهبلون ..
سلمت عليهم بحماس وهم سلموا من دون نفس ..
بيشو: اخسس يا تهاني .. صايره بووي وانا مدري ..
ابتسمت تهاني ابتسامة تسليك ..
مسكت بيشو ايد غيدا وقالت: حمودي هذا اول يوم لي هنا في الجامعه وابيك تعرفني عليها ..
غيدا: من عيوني ..
لفت غيدا عالشله وقالت: يالله تعالوا ..
غدير: لا تكفيين ما نبي ..
بيشو بحماس: إلا إلا تعالوا معنا .. حمااااااااس وانا امشي بين اربع بويات .. احس نفسي خطيييييره وااايد ..
غيدا: خلاص خليهم .. بالعكس احسن عشان ما ينكدون علينا ..
بيشو: صح صح معاج حق ..
فراحوا .. حطت غدير ايدها على وجهها وقالت بقرف: مليقه مليقه ملييييقه واااااااايد .. اكرهههههها ..
خلود: كلنا نكرها .. مدري وش عاجب غيدا فيها ..
اما عن بيشو قالت: اممم حبيبتي ..
غيدا: هلا ..
بيشو: وين اسيلوه ..؟!
غيدا: ههههههه شفيج تقولينها بقهر ..؟!
بيشو: مدري .. كل ما اتذكر انج قضيتي الاجازه معها انقهر ..
غيدا: ههههههههههههههههههههههههههههههههههههههه ..
بيشو: غييييدا لا تضحكين ..
غيدا: اموووت عاللي يغارون ..
بيشو: بجد غيدا وينها ..؟!
غيدا: مدري .. اذا شفتها بقولج ..
بيشو: طيب هي حلوه ..
غيدا: صراحتا ما احب الجذب .. ايوه حلوه وايد ..
وقفت قدام غيدا وقالت: مالي مالي شغل ابي اشوفها اللحين ..
حطت غيدا ايدها على اكتاف بشاير ومشيت معاها وهي تقول: يا حياتي حتى لو كانت حلوه فأنا مستحيل اطالع فيها .. صدقيني احبج وما راح اطالع في غيرج .. واسيل هذي لعلمج تراني اكرهها وايد لأني احس انها مغروره ..
بيشو: بجد ..؟!
غيدا: اكيد ..
بيشو: بس هم انا ابي اشوفها ..
غيدا: ههههه من عيوني ..
بيشو: هي صف جم ..؟!
غيدا: اولى ..
بيشو: يعني اصغر مني ..
غيدا: يعني بزره .. يالله خلينا نغير السالفه لأني ما احب اتكلم عنها ..
بيشو: اوكي .. طيب وين سامي ..؟!
غيدا: مدري .. من ايام الاختبارات وهو مختفي .. وكل ما اسأل اصحابه يصرفوني وما يياوبون ..
بيشو: طيب بهذلتيه زي ما قلتي ولا لا ..؟!
غيدا بقهر: لا ..
بيشو: اوووف قهر .. طيب هو وينه .. ابي اشوفه ..
غيدا: هههههههه اقولج مختفي ..
بيشو: يوووه نسيت ههههه صج اني خبله .. بس بجد ودي اشوفه لأنو ما عمري شفته ..
غيدا: شفيج مصره انج تشوفينه ..؟!
بيشو: ابي اشوف الشخص اللي حبيتيه في يوم من الايام .. ابي اعرف شنو المميز فيه عشان تحبينه .. بجد انا حاقده عليه ..
غيدا: خلاص حبيبتي بيشو انسي السالفه .. عشاني ..
بيشو بإبتسامه: اوكي عشانج بس ..
تذكرت شي ونطت بحماس وقالت: ياااااي نسيت .. حبيبي وين شلة سامي ..؟! ابي اشوف اللي اسمها دانا وتسوي نفسها ولد .. متحممممسه اشوفها ..
غيدا: اوكي امشي لأني اعرف وين يجلسون ..
بيشو بحماس: ياللا ..
فمشيوا لين قربوا من مكان الشله ..
غيدا: مو مويوده ..
بيشو بإحباط: لاااا ..
غيدا: يمكن غايبه .. خلاص باجر اوريج هيه ..
بيشو: كان نفسي اشوفها ..
غيدا: هههه خيرها في غيرها ..
بيشو: اووووف ما لقيت تغيب غير اليوم .. بجد قهر ..
غيدا: ههههه خلاص افردي ويهج .. مو حلو عليج وانتي مكشره ..
ابتسمت وقالت: من عيوني .. جم حموود عندي ..؟!
غيدا: ههههههههههههه ..
بيشو: يا حبني لج وانتي تضحكين ..
غيدا: ياللا امشي اوريج على الجامعه ..
بيشو: ياللا .. ووريني هذاك اللي اسمه راشد الشعلان .. ابي اشوف هو ليش مهايطي ..
غيدا: غايب هو وشلته ..
بيشو: اووووف شفيهم غايبين اليوم ..؟!
غيدا: حضوض ..
بيشو: طيب وريني ذاك اللي في كلاسكم .. اللي اسمه طارق على ما اتوقع ..
وكملت بسرعه: لا تقولين غايب ..
غيدا: هههههههه لا مو غايب .. اذا شفته اوريج ..
بيشو: اوكي ..
فلفوا الجامعه وورتها كل شي .. بس ما قابلت في طريقها لا اسيل ولا غيره ..

================================================== ==================

في الظهر وفي غرفة ريما ..
كانت فاتحه الدولاب تختار لها لبس ..
ريما: الساعه خمس راح نتقابل في مطعم جراند كافيه ..
تنهدت وقالت: ازمه وبتعدي ان شالله .. بس مدري ليش انا خايفه ..
طلعت لها لبس ورمته عالسرير ..
مشيت وجلست عالسرير وغاصت في افكارها ..
فتــــــــــــــــــــــــــــره طويلــــــــــــــــــــــــــــه مــــــــــــــن الصمــــــــــــــــــــــــــــت ..
ساعــــــــــــــــــــــــــــه ..
ساعتيــــــــــــــــــــــــــــــــــــــــــن ..
ثــــــــــــــلاث ساعــــــــــــــــــــــــــــات ..
مرت ثلاث ساعات وهي ساكته وجالسه بصمت وتفكر ..
رفعت راسها بهدوء وطالعت في الساعه الجداريه ..
كانت تشير عالساعه ١٣ : ٤ ..
تنهدت للمره الثانيه واخذت ملابسها وبدلت هدومها ..
بعد ما خلصت وقفت قدام المرايه وبدت تصلح شعرها ومكياجها واكتسواراتها ..
كشخت نفسها عالآخر جدا ..
طالعت في شكلها وابتسمت برضى ..
ريما: كل شي تمام ..
اخذت شنطتها وسحبت نظارتها الشمسيه ولبستها ..
خرجت من غرفتها ونزلت من الدرج فكان الاب وفارس واسيل موجودين ..
ريما: هاااااي ..
الاب: وعليكم السلام ..
ريما: بابا لا تفشلني ..
فارس: اخسس ياذي الكشخه .. وين رايحه ..؟!
الاب: شفيكم اليوم ..؟! فيصل من اذان العصر راح لحفلة اخوياه .. وانتي بعد وين بتروحين ..؟!
ريما: رايحه لرفيجتي شذى .. اليوم عيد ميلادها ..
اسيل: خذيني انا وفارس ..
فارس: ايه نفسي اروح ..
ريما: مع نفسكم ..
اسيل+فارس: ههههههههههههههههههههههه ..
الاب: عيل انتبهي على نفسج ولا تتأخرين ..
ريما: من عيوني .. بااااي ..
خرجت من البيت وركبت سيارتها ..
ريما: اوووووف احس بصداع .. نسيت آخذ حبه .. خلاص لمن ارجع ان شالله لأني ما راح اتأخر ..
حركت السياره وراحت لمصيرها اللي بيغير حياتها ١٨٠ درجه ..
بعد ثلث ساعه وقفت السياره قدام باب المطعم ..
نزلت .. دخلت المطعم من هنا .. وجاء واحد عند سيارتها من هنا ..
طلع سكين وشق الكفره من تحت بحيث انه محد يلاحظ ..
ابتسم وقال: حلو ..
دخلت ريما المطعم وراحت للطاوله اللي اتفقوا عليها ..
جلست وبعد خمس دقايق لاحظت واحد جاي لناحيتها ..
ريما في نفسها: "هذا هو ياسر .. ياربي شفيني خايفه ..؟! انا ريما الرملي والمفروض ما اخاف من اي احد" ..
جاء ياسر بكشخته ورزته واول ما شافها ابتسم وقال في نفسه: "آخ آخ تهببببل" ..
ياسر: اهلا ريما ..
ريما: اهلين ..
جلس وقال: كيفج ..؟!
ريما: تمام ..
ياسر: تبين تشربين شي ..؟!
ريما: عصير برتقال ..
نادى ياسر النادل وطلب منه اثنين عصير برتقال ..
ياسر: كيف الجامعه وياج ..؟!
ريما: الحمد لله تمام ..
ياسر: انتي وش تخصصج ..؟!
ريما: جغرافيا ..
ياسر: كيف هو معاج .. صعب ولا سهل ..؟!
ريما: هو كلامه كثير بس انا احبه ..
ياسر: اهم شي انج مرتاحه فيه ..
جاء النادل وحط العصيرات وريما تطالع في ياسر بتفكير ..
ريما: "غريبه .. احس اسلوبه تغير شوي .. احسه هادي ومحترم .. وش قصته" ..
ياسر: اشربي عصيرج ..
ابتسمت واخذت العصير وشربت منه شوي ..
كانوا هادين والصمت هو سيد الموقف ..
كل واحد فيهم يطالع في الثاني ويفكر ..
كل واحد فيهم يرتب افكاره اللي في مخه ..
ياسر كان متوتر جدا وريما لاحظت توتره واستغربت ..
ياسر بتردد: ر ريما ..
ريما: نعم ..
سكت ياسر فتره طويله بعدين قال: انا طلبت اشوفج لسببين بس ..
طالعت ريما فيه بإهتمام ..
ياسر: السبب الاول هو ....
وسكت فقالت ريما: تكلم شفيك ..؟!
ياسر: طيب .. السبب الاول هو لأني ابغى اقول لج شي .. ريما انا .. انا ....
سكت فتره قصيره بعدين قال: ريما انا آسف ..
عقدت ريما حواجبها بإستغراب ..
ياسر بإرتباك: انا آسف على كل شي سويته لج .. ريما انا اعترف .. انا اذيتج كثير .. انا بهذلتج كثير .. انا عذبتج كثير .. انا بجد اعتذر .. كنت اناني .. حطيتج في بالي وقلت اني بوصل للي ابغاه مهما كان .. ادمنتج مخدرات عشان تنصاعين لأوامري .. كنت جشع واناني وحمار .. كل تفكيري كان جشع .. الشيطان سيطر علي بشكل مو طبيعي .. ريما انا بجد آسف ..
ابتسمت ريما بإستهزاء وقالت: التمثليه هذه ما تمشي علي فاهم ..
نزل راسه وقال: لا تصدقيني .. بس ابيج تحلليني وتسامحيني .. ابيج تسامحيني على كل شي .. ومن بعد هذا فراح نفترق .. انتي في حالج وانا في حالي .. كنت بصراحه ناوي اذلج وانزل اسم اهلج في الارض .. كان عندي مليون طريجه وسوسها لي الشيطان عشان أأذيج ..
كمل بهدوء: بس انا صحيت ووعيت .. شفته .. شفته .. شفت اللي ناوي اسويه فيج باقرب الناس لي .. اختي .. اختي يا ريما في المستشفى .. اختي مدمنه وحامل كمان ..
انصدمت ريما من كلامه ..
ياسر بهدوء: انصدمت .. كأن احد صفقني كف صحاني من الضياع اللي كنت فيه .. نفس الخطه الحقيره اللي حبكتها لج .. حبكها واحد غيري في اختي .. ندمت وندمت قد شعر راسي واكثر كمان .. بس وقت الندم راح .. اختي يا ريما .. بجد حسيت بحرقة القلب وحرقة الدم .. حسيت بشعور اهالي البنات اللي كنت أأذيهم .. حسيت في الوقت الضايع ..
رفع راسه .. هنا عاد .. انصدمــــــــــــــــــــــــــــــــــــــــــت ريما ..
كل شعر جسمها وقف من الصدمه ..
اول مره بحياتها تشوف شي زي كذا ..
اول مره بحياتها تشوف ولد يبكي ..
كانت عيون ياسر حمرا والدموع متجمعه فيها ..
حست بقشعريره تمر بجسمها ..
كلامه .. صوته .. عيونه .. دموعه .. كل هذا اثر فيها ..
كل هذا قلب موازينها وكيانها ..
كل هذا لخبطها بقوه ولخبط شعورها ..
تحسه مكسور ومجروح وضعييف ..
ما تعودت انها تشوفه كذا ..
حست ان قلبها حن عليه وعلى شكله ..
كسر خاطرها وبقوووه ..
ياسر بهدوء وهمس: ريما بلييز سامحيني .. مستعد اسوي كل اللي تبينه بس سامحيني .. ذنوبي كثيره وابي اكفرها .. ريما انتي اكثر وحده اذيتها .. ادمنتج مخدرات يا ريما .. والله اني مستعد لأي شي تطلبينه بس المهم تسامحيني ..
ارتبكت مره منه .. ما تدري وش تسوي ..
تفاجأت .. ما توقعت ان مقابلتهم بتكون كذا ..
تذكرت كل شي .. ادمنها مخدرات ..
ذاقت العذاب الوان ..
اعتزلت الناس ..
تدهورت في دراستها ..
شكوا الناس فيها ..
حست بالعبره تخنقها .. هي اللحين مــــدمــــنــــه .. وش بيفيدها اسفه ..
ريما بضعف: بس انت اذيتني كثير و.....
ياسر بترجي: آسف .. اعرف اسفي ما راح يفيدج بس اعذريني .. انا محتاج لشي يكفر ذنوبي .. انا تبت يا ريما والله الشاهد على كلامي .. ريما انتي مسامحتني ..؟!
طالعت فيه وحست نفسها عاجزه قدام شكله ..
دموعه تنزل ويترجاها انها تسامحه ..
عقلها رافض .. هو ما يستحق ان الناس تسامحه .. كبريائها ما يسمح انها تسامحه ..
بس قلبها وآه من هالقلب .. قلبها يقول سامحيه .. انسان ندم وتاب لله فليش نحقد عليه ..
عايشه في صراع ما بين عقلها وقلبها ..
مو داريه تطيع مين ..
نزل ياسر راسه واخذ منديل ومسح دموعه بإيد واضح انها ترتجف ..
هنا عاد .. قلبها طغى على عقلها ..
ريما: انا .. انا مسامحتك ..
رفع راسه لها بحركه سريعه وقال: ايش ..؟!!
ريما: انا سامحتك ..
ابتسم بشكر وقال: مشكوره يا ريما مشكوره وايد .. والله مو عارف وش اقول .. انتي اسديتي لي خدمه ما انساها طول عمري ..
ريما بحزن: وانت وش اسديت لي ..؟! الادمــــان ..
ياسر بهدوء: آسف ..
طالع فيها وقال: طيب محتاجه مساعدتي بشي ..؟!
ريما: لا ..
ياسر: اسمعي .. اقرأي القرآن وتقربي من ربج واكيد راح يساعدج .. استعيني بالطب بالاعشاب والطب القديم وراح تطلعي من هالورطه باذن الله ..
طالعت ريما فيه وابتسمت وقالت: مشكور ..
ابتسم وقال: العفو ..
وكمل في نفسه: "والله انج خبله يا استاذه" ..
شربت شوي من العصير بعدين قالت: وش السبب الثاني ..؟! انت طلبت تشوفي لسببين صح ..؟!
ياسر: ايوه ..
سكت شوي بعدين قال: خدمه .. ابيج تسوين لي خدمه .. انتي بكيفج اذا تبغين او لا ..
ريما: شنهي ..؟!
ياسر: اختي .. اختي هيفا .. اللي ادمنت مخدرات ..
ريما: شفيها ..؟!
ياسر: من يوم ما طلعت من المستشفى وهي جالسه في استراحة العائله .. قافله حياتها على نفسها .. صايره كئيبه وما ترد على احد .. امي واخواتي عندها يحاولون يخرجونها من اللي هي فيه .. بس هي صنم ولا حياة لمن تنادي .. تحسب ان اللي صار لها هو نهاية العالم .. ولد خالي خطبها بس هي رافضه .. ولد خالي عارف بكل شي وراضي فيها لأنه يحبها ويشوف ان اللي صار لها مو بإيدها .. بس هي رافضه ..
ريما: مينونه ..
ياسر: فعلا .. قلنا لها ابدأي حياة يديده بس هم رافضه .. اخواتي وخالاتي وامي إلى الآن وهم عندها يقنعونها بس ما غيرت رايها .. ريما انتي شخصيتج قويه .. ممكن خدمه اذا ما عليج امر ..
ريما: وشهي ..؟!
ياسر: تكلمين اختي وتقنعينها .. اهلي كلهم عندها وما قدروا .. تقدري تروحي معهم وتحاجين اختي .. اذا ما تبغين فأنا ما راح اغصبج ..
طالعت ريما فيه فتره وقالت: اوكي ..
تفاجأ .. ما توقع انها بتوافق بسرعه ..
ياسر: مشكوره .. مشكوره .. مشكوره وايد يا ريما ..
قامت وقالت: وين عنوان استراحتكم ..؟!
قام وقال: امشي ..
حاسب وطلع فقال: الحقيني بسيارتج ..
ريما: اوكي ..
راح لسيارته وركبها ..
ياسر: قلت لكم اني اقدر عليها .. البنات يبغالهم واحد يبجي جدامهم عشان يصدقون ويحنون هههههه ..
شغل سيارته وقال: ثواني بس وتيي ..
فأنفتح باب السياره اللي جنبه وقالت: سوري بروح معاج .. سيارتي خربانه شوي ..
ياسر بإرتباك: بس .. بس اخاف من نقاط التفتيش ..
ركبت وقفلت الباب وهي تقول: احنا في العصر وكمان انا راكبه جنبك مو ورى عشان نكون في محل شبهه ..
ياسر: خلاص براحتج ..
حرك السياره واتجه للاستراحه وتتلاعب على شفتيه ابتسامه ماكره ..

انتهى الجزء الاول من البآرت الثامن ..
والسؤال هو سؤال واحد ..
:؛: وش ممكن يصير لريما ..؟!
ايه صح باسأل وش رايكم بالشخصيه الجديده وسن ..؟!
وجبت شي جديد في النهايه وهي اني احط مقاطع من الجزء الجاي .. بجربها اذا اعجبتكم بداوم عليها ..

:؛: راشد: اسمعوا .. عادل هذا انا راح اسأله ..
:؛: ريما بصدمه: فـ فـ فـيـ ـ ـصـــ ـصـ ـل ..
:؛: وليد: اتوقع اني سمعت بسام قال شي عن الراهي ..
:؛: طارق: مو هذا بيت عمر العالي ..؟!
:؛: الشرطي: عيل شرف معنا عالمخفر ..

اشوفكم بأذن الله يوم الاربعاء في الجزء الثاني من بارتنا الثامن ..
:؛: صـرﺦـة ﺂﻟـﻣ̝̚ـﺷـﺗﺈقـہ :؛:

|$[ نهاية الجزء ]$|