شبكة همس الشوق - عرض مشاركة واحدة

10 - 3 - 2014, 07:08 PM

في الظهر وفي وقت انتهاء الدوامات ..
ركب راشد سيارته واتجه للبيت وهو حاس بصداع ويبي يريح عالسرير ..
وكلها كم دقيقه ووقف سيارته في الكراج ونزل ..
دخل البيت وكالعاده صرخ بصوته: شهــــــــــــــدوه وويــــــــــــــع ..
وكالعاده جت شهد وقالت: نعم ..
طالع فيها .. اول ما شافها تذكر سالفة انه يبغى يفتش اغراضها ..
جته فكره انه يشغلها بس في نفس الوقت حاس بصداع ووده يرتاح ..
استغربت شهد سكوت راشد اللي دايم ينذر بالسوء ..
شهد في نفسها: "الله يستر منك" ..
راشد: سمعيني عدل ..
شهد: نعم ..
راشد: اليوم الغداء ابيه في ذاك الجناح ..
واشر على جناح قريب من جناح الخدم ..
راشد: الساعه اثنين صحيني عشان ايي اتغدى وانتي في ساعة ما اتغدى تطلعين ترتبين جناحي ومكتبي وما تنزلين إلا اذا خلصتي .. فاهمه ..؟!
شهد: حاضر ..
راشد: ياللا جهزي الغدا وانا بطلع انام شوي .. لا تحسبين حساب روان لأنها بتتغدى مع رفيجاتها ..
شهد: طيب ..
طلع راشد فوق ونام فوق السرير شوي يرتاح بعد ما اخذ مسكن ..
وقفت شهد في مكانها فتره بعدين قالت: احسه اليوم هادي .. حتى نبرته كانت جدا هاديه .. اول مره ما يسب او يهاوش ..
لفت وراحت المطبخ تكمل تجهيز الغدا ..
في غرفتها كانت شادن ماسكه الوان وسيم وتلعب فيها ووسيم يلعبها ..
اما شادي فكان منسدح على بطنه وقدامه ورقه وقلم ويرسم ..
اثير كانت تطلع ملابس عشان تروش اختها شادن ..
طالعت في شادي بإستغراب وقالت: هذي المره الاولى بحياتك تقعد ساعه كامله تذاكر .. غريبه ..
شادي وهو منسجم: اشش .. انا ما اذاكر .. ارسم خطه ضد الدب المتغطرس ..
فتحت اثير عيونها وقالت: مينون انت ولا شنو .. لا يكون قصدك راشد ..؟!
اعتدل شادي في الجلسه وتربع وقال بحماس: شرايج .. اول كنت اسميه دب .. اللحين يبت اسم يديد .. دب متغطرس .. حلو صح ..؟!
جاء وسيم عنده وقال بإنبهار: واااو حلو .. كيف فكرت فيه ..؟!
شادي بحماس: في حصة استاذ عصام .. كنت افكر وافكر عشان اطلع هالاسم .. هههه شافني الاستاذ وطقني على راسي بالمسطره ..
اثير بعصبيه: شادي عن العياره هذي .. اترك راشد بحاله واياني واياك تتسبب في مشاكل اكثر .. بهمجيتك يمكن يكشفنا ويطردنا ..
شادي ببرود: انا ذكي وما بأكشف نفسي بالسهوله ..
اثير بفقد اعصاب: ششــــــــــــــااددي ..
رجع شادي على نفس وضعيته وبدأ يكمل الخطه حقته ..
اثير: اوكي .. اذا يت شهد انا راح اعلمها ..
جلس شادي بسرعه وهو يقول: لا اثير لا تكونين نذله ..
اثير: انا ماني نذله ولا شي .. الهبل هذا لازم تبطله يا استاذ شادي ..
شادي: انا الغبي اللي علمتج .. لو رسمت الخطه بدون لا تدرين يكون احسن ..
اثير: مستحيييل تتوب .. بس شهد هي راح تعرف تتصرف معاك ..
شادي: اووووف والله انج فتانه ..
اثير: فتانه ها ..؟! يصير خير يا شادووه ..
شادي: هههههههههه لا لا صادوه احسن هههههه ..
وسيم: ههههه ايه حلو هههههه تنطق الصاد شين هههه ..
تسدح شادي من الضحك وهو يقول: هههههههه لا تذكرني بأبو كعب اللي في الجاهليه هههههههه ..
عصبت اثير منهم وخصوصا كلامهم المشقلب مثلهم ..
وسيم: ههههههه لا زي الشرير الاخضر في بن تن هههههه ..
مسك شادي بطنه من الضحك وقال: هههههه لمن تعصب تصير زي المغنيه ام كلثوم ههههههههههههههههههه ..
هز وسيم راسه وهو يقول: صح صح ههههه ولمن تاكل مثل الدبا صاحب كونان وتحب اللحم المشوي مثله ههههههههههه ..
شادي: هههههه اذا يت تمشي فتمشي مثل حسين الجسمي ابو كرشه ههههههه ..
وسيم بحماس: ههههه كرشه كرشه ههههه والله يضحك ههههههههههه ..
طالعت فيهم شادن وبدت تضحك وهي طفله مو داريه شسالفه ..
اشر شادي على شادن وقال: ههههههه حتى شدونه ضحكت هههههههه والله انج نكته يا اثير هههههه ..
اثير بصراخ: جــــــــــــــــــــــــــــب ..
اخذت نفس بعدين قالت بعصبيه: هين يا شادي انت ووسيم .. ما اكون انا اثير ان ما ادبتكم ..
وقف شادي وقال بحماس: النحشه يا ولد ..
قام وسيم وهرب وهو يضحك ..
نط شادي فوق السرير وهو يقول: هههه حماس .. شكلج كأنج كونغ اللي في مارتن ههههههههههه ..
قامت اثير وبدأت تطاردهم عشان تأدبهم على قولتها ..
بس الواضح ان الاطفال شياطين ومستحيل يتأدبوا ..!!

اما عن شهد فأنتهت من تجهيز الغدا وطلعت الدرج عشان تصحي راشد ..
دقت باب الغرفه فسمعته يقول: ادخلي يا شهد ..
شهد: يعني صاحي مب نايم ..
دخلت وقالت: الغداء جهز ..
طالع فيها وقال: سمعي .. الغرفه والجناح كله وغرفة تبديل الملابس يبغالها ترتيب شامل .. انا بنزل اتغدى وانتي رتبي ولا تنزلين إلا اذا خلصتي .. فاهمه ..؟!
شهد: حاضر ..
نزل وهي بدأت ترتب جناحه بكل ما فيه ..
دخل غرفة الطعام وقعد فتره واقف بعدين قال: اخاف اضن فيها ضن سوء .. بس هالايام بجد غريبه وكأنها مخبيه شي عني .. لا لازم افتش غرفتها عشان اتأكد ..
خرج ودخل جناح الخدم واتجه لغرفة شهد ..
شافته وحده من الخدامات وقالت: سير راشد .. اي خدمه ..؟!
طالع فيها وقال: انقلعي على شغلج ..
الخادمه: حادر ..
راحت وهي مستغربه من دخول راشد لهالمكان لأنها مو من عوايده ابدا ..
مشي راشد ودخل السيب اللي فيه الغرفه ..
كلها ثواني ووقف قدام الغرفه ..
مسك مقبض الباب وحركه بهدوء وفتح البااب ..
دخل الغرفه وطالع فيها ..
كاااانت فااارغه من اي احد ..
مشي شوي ووقف قدام دفتر والوان ..
جلس ومسك الدفتر وطالع في الاسم ..
راشد: مو كأن هذا اخو شهد .. ايش ياب الدفتر هنا وليش الالوان طايحه عالارض ..؟!
رفع حاجبه بإستغراب وهو يدور بنضره في الغرفه ..
السرير معفوس والالوان عالارض والمخده جنب الدولاب وكوره صغيره حمرا فوق الكمدينه ..
عقد حواجبه وقال: كأن هناك طفل عايش في الغرفه كمان ..
وقف وحط ايده في جيبه ويطالع في كل انحاء الغرفه ..
تقدم من الدولاب الكبير وفتحه ..
كانت كلها ملابس شهد واغراضها ..
قفله وفتح الدولاب اللي جنبه ..
وش اقولكم بالضبط وكيف اوصف لكم ..؟!
الـــــــذهــــــول .....
الـــــــدهشـــــــه .....
الصـــــــدمـــــــه .....
التفـــــــاجـــــــــئ .....
الاســـــــتغـــــــراب .....
عـــــــدم التصديـــــــق .....
وكل شي صار مع راشد .....
المفروض لمن يفتح الدولاب يشوف شي من اغراض شهد ..
شنط او ملابس او مناشف او اكتسوارات او اي شي ..
بس شلون وكيف وليش يشوف قدامه آدمـــــــي ..؟؟؟!!!
ايه آدمي .. بشر .. انسان .. كائن حي .. ابن آدم ..
لا لا شكلي اتخيل .. هذا اللي كان يدور في باله ..
بس هو ما يتخيل .. فعلا قدامه ولد ..
لابس بنطلون ازرق قاتم وتيشيرت اخضر ..
راشد بصراخ: مـــــــن انـــــــت ..؟!
ارتعب وكعادة هذا الصغير بكى ..
بكى وما قدر ينطق اي شي ..
راشد: لا تبجي وقول من انت وليش هنا وكيييف ..؟!
حطت اثير ايدها على فمها تمنع خروج صوت شهقتها المفاجئه ..
اثير في نفسها: "شافه .. شاف وسيم .. لا يا ربي .. يا ربي" ..
حضنت اختها شادن وهم ما يزالون في الحمام ..
دخلت عشان تروش اختها ..
سحب راشد وسيم من ايده وطلعه برى الدولاب ..
قفل الدولاب وقال بعصبيه: ممكن تفهمني .. من انت ومن فين ييت ..؟!
شهق وسيم وقال: انا .. انا وسيم ..
وكمل بكي .. عقد راشد حواجبه وقال: وسيم ..؟! لحضه .. لا تكون اخو شهد ..
هز وسيم راسه بإيه وهو يبكي ..
جن جنون راشد وعصب بطريقه فضيعه ..
سحبه بإيده وطلع برى الغرفه بخطوات سريعه ..
بكى وسيم اكثر من مسكة راشد اللي شوي وتخلع ايده ..
خرج للصاله الاماميه وصرخ بأعلى صوته: شـــــــهــــــــــــــــــــــــــــدووووه يالــــــجلبــــــــــــــــــــــــــــه ..
سكت شوي بعدين صرخ مره ثانيه: شــــــــــــــهــــــــــــــدوووه يالــــــــــــــملعــــــــــــــونــــــــه انــــــــــــــزلــــــــــــــي بســــــــــــــرعــــــــــــــه ..
ارتعبت شهد من صراخ راشد ونزلت له بسرعه ..
اول ما نزلت رمى راشد وسيم عالارض قدامه بقوه وقال بحده: منــــــو ذا ..؟!
طالعت شهد فيه واول ما شافته ارتعبت .. خافت .. انصدمت ..
حست ان ابواب الدنيا كلها انقفلت قدامها ..
راشد بصراخ: ياوبــــــــــــــي ...!
ارتجف جسمها ورجولها ماهي قادره تشيلها فطاحت عالارض ونزلت راسها بإنكسار وقلة حيله ..
اما وسيم فبدأ يصيح ويبكي .. راشد طيحه بقوه وعشان كذا احتك وجهه بالارضيه وانقشرت شفايفه ونزل الدم ..
راشد بضبط اعصاب: يعني تعرفين من هو هالآدمي ..؟!
رفعت نظرها ناحية وسيم اللي يبكي وهو ماسك شفته ..
حست بالالم لمنظر اخوها الصغير وهو كذا ..
رفعت نظرها لراشد اللي واقف وعلامات الغضب والعصبيه كلها على وجهه ..
هي عارفه انه اللحين راح ينفجر ويبدأ يهاوش ويخاصم ويضرب .. حافضته زين ..
جتها نوبة ضحك .. ودها تضحك ..
مو المثل يقول شر البلية ما يضحك ..
هي ودها تضحك على حالها وحضها اللي واقف في وجهها دايم ..
نزلت دموعها بضعف .. اللحين شلون تطلع من هالورطه ..؟!
طالع فيها وسيم بعيونه المليانه دموع وقال بصوت طفولي باكي: شهاااد .. فمي يوجعني ..
رفعت شهد عيونها عليه وقالت بحنان: لا تخاف يا حبيبي .. شوي ويروح ..
مع كل كلمه نطقتها كانت دموعها تنزل وصوتها يبان فيه الرجفه اللي حاسه فيها ..
رفع راشد حواجبه وقال: يعني هذا اعتراف صريح انج تعرفينه ..
نزلت راسها وهزته بإيه ..
فار دمه وجاء عندها وسحب شعرها القصير وهو يقول بعصبيه: ليــــــــــــــه ..؟! ليه هو هنا يا استاذه ..؟! ابي افهم ليش يايبته هني ..؟!
مسحت دموعها بظهر كفها وهي تتألم من شد راشد لشعرها ..
مسكت بلوزته بترجي وهي تقول: آسفه والله آسفه وهذي آخر مره .. امانه لا تآذيه .. اضربني انا بس هو خله .. آمآنه يا راشد ..
شدها اقوى وقال: طبعا حأضربج وهذي ما فيها كلام .. بس ابي افهم ليش يايبته هني ..؟! ياوبـــــــــــــي ..
سكتت شوي بعدين قالت: كان تعبان فيبته عندي عشان اهتم فيه ..
عصب ورماها عالارض بقوه وقال: وتعترفي انج خالفتي اوامري واستغفلتيني .. انا طوفه عندج عشان تسوي جذي .. متـــــــــى اصلا خرجتي من البيت وكيف وعن طريج مين ..؟! شهد انا ابي اعرف شلون صار جذي ..؟!
جلست بالصعوبه وكتفها يؤلمها من الطيحه وقالت: لأنه .. لأن رقم موبايلي عندهم فدقوا وانا استأجرت تاكسي ويبت اخوي وسيم عندي عشان اهتم فيه .. آسفه .. راشد والله ما اعيدها ..
عض على شفته بقهر وقال: يعني بجد انا طوفه ومالي اي قيمه .. تخرجين برى البيت وتييبين اخوج وتسكنينه هني من وراااي يا استاذ شهد .. قلتي لنفسج ان راشد غبي وما علي فيه ..
هزت راسها بلا فقال بعصبيه: جــــــــــــــب .. انتي تماديتي كثير يا شهد .. لولاي جان متي انتي واهلج من اليوع ومع هذا تخالفيني بكل شي .. وربي كنت حاس انج مخبيه شي عني .. توقعت سارقه شي من عندي اثاريج مخبيه اخوج عني .. لو سارقه جان عذرتج لأن فقيره وتحتايين فلوس .. بــــــــــــــس تستغفلينــــــــــــــي بالطريجه ذي مستحيل اعذرج ابدا .. شتبيني اسوي فيج ها .. شتبينــــــــــــــي اسوي ..؟!
وقف وسيم وجاء قدام راشد وقال وهو يبكي: لا لا تضربها .. شهد مسجينه يالدب المتغطرس .. والله ما نعيدها .. بالله عليك سامحنا ..
عصب راشد وقال: شنو ..؟! دب متغطرس ..؟! اللحين اللي يعتذر يقول جذي يالجلب ..
وسيم: ايوه ..
عصب وشاله من بلوزته وقال: عيل مجانك مو هني .. دور لك عن بيت يضفك ..
ورماه عالارض وقال بصراخ: اطلع برى البيت ولا اشوفك هني .. بسرعه ..
فتحت شهد عيونها وجت عند راشد ومسكته من ايده وقالت بترجي: راشد .. راشد بلييز لا .. انا بوصله للبيت وخلاص .. راشد واللي يسلمك لا تكون قاسي جذي .. الله يخليك يا راشد ..
دفها راشد عنه وقال: جب .. انتي تنجبين وما تتكلمين .. عقابج باجي ما ياج .. صبري علي شوي ..
لف على وسيم اللي يبكي وقال: وانت ما تسمع شنو قلت ..؟!
وسيم وهو يشهق: ويـ ـن ارو ح ..؟!
راشد بعصبيه: روووح لجهنم .. المهم ما اشوف رقعة ويهك في هالبيت ..
وقف وسيم وطالع في شهد اللي منهاره عالارض وتبكي ..
وسيم بصراخ: ما احبك .. دب متغطرس ..
وطلع جري برى ..
رفعت شهد راسها وقالت بصراخ: وسيــــــــــــــم وقــــــــــــــف .. وسيــــــــــــــــــــــــــــم ..
قامت بسرعه تلحقه ..
بس للاسف هذه هي الحقيقه المره ..
اخوها الصغير راح يتشرد ..
وهي راح تلاقي عذابين ..
واحد من راشد والثاني عشان اخوها ..
اي مصير راح تلاقي شهد في حياتها حاليا ..؟!
وشلون راح تتحمل اكثر ..؟!

================================================== ==================

في مطعم جراند كافيه .. المطعم المفضل عند سامي ..
دخله هو وريان عشان يتغدوا فيه ..
جلس ريان وقال: طيب فيه مطاعم احلى من هذي بكثير ..
ابتسم سامي وقال: اعرف بس سبحان الله ما اعجبني غير هذا .. احسه حلو و .. و مدري .. المهم انه عجبني ..
ريان: ههههه اوكي براحتك ..
اخذ سامي المينو وقال: شتبي تتغدا ..؟!
ريان: طيب على حساب مين .. عشان اذا كان على حسابي اقتصد في الطلب .. اما على حسابك اتمنذل شوي ..
سامي: بجد خسيس .. اوكي على حسابي بس بليز اقتصد ..
ريان: هههه لا لا على حسابي .. انت توك راجع من سفر والمفروض اغديك على حسابي ..
سامي: اوكي براحتك ما راح امانع ..
رفع ريان حاجبه الايمن وقال: جذي على طول .. عالاقل حاول واحلف مو توافق بسرعه ..
سامي: هههه احب الاختصار ..
طلبوا الغدا وبدأو ياكلون ..
ريان: اقول سامي ..
سامي: نعم ..
ريان: ابوك سفرك عشان سالفة بنت عمك صح ..؟!
سامي: تقريبا ..
سكت ريان شوي بعدين قال: سوري .. ما كنت ادري ان الامور بتوصل لذي الدرجه ..
طالع سامي فيه وقال: لا .. انت مو السبب .. لا تحمل نفسك المسؤوليه ..
ريان: سامي لا تحسبني صغير وتضحك على عقلي .. انا زرت ابوك البيت وعرفت اني انا السبب الرئيسي في سفرتك .. مدري شأقولك بس بجد يا سامي ما كنت ادري ان الامور بتوصل لجذي ..
سامي: خلاص يا ريان هذي سالفه قديمه وانتهينا منها ..
طالع ريان فيه فتره .. بجد حاس بالذنب .. لو انه ذاك اليوم ما اصر على سامي يفتش في اغراض ابوه كان ما صار اللي صار ..
سامي يغير الموضوع: ريان فاتك مين قابلت في بريطانيا ..؟!
ابتسم ريان بهدوء وقال: مين ..؟!
سامي: ابو اسيل .. البنت اللي عيونها رصاصيه .. تتذكرها ..؟!
ريان: ايه اتذكرها .. البنت اللي كرشتك .. مستحيل انساها ..
سامي وهو يضغط عالكلمات: انــا مــحــد كــرشــنــي ..
ريان: هههههه اوكي اوكي .. طيب شصار بعدين ..؟! قابلت اسيل ..؟!
سامي: لا .. شفت ابوها بس ..
ريان: خساره ..
سامي: فعلا .. والله انقهرت ..
ريان: طيب شسويت مع ابوها ..؟!
سامي: سألته عن اسيل فقال انا ما عندي بنات .. هههه حدة صوته تشبه صوت ابوي اذا عصب ..
ريان: طيب ليش يقول ما عندي بنات ..؟!
هز سامي كتفه وقال: يمكن يحسبني ابي اخطب بنته ..
هز ريان راسه وقال: لا ما اضن .. اسمع يمكن تكون غلطان .. انت شدراك انه ابو اسيل ..؟!
سامي: عيونه زي عيون بنته ..
ريان بإستنكار: بس ..!! علبالي شفت تطابق الاسماء او سمعت اسمه بالصدفه .. ياخي فيه مليون عين رصاصيه في العالم ..
سامي: بس ماكو مثل عيونها في قطر .. لأن العرب عيونهم تكون سودا او عسليه او بنيه .. عيل اكيد هو ابوها .. حتى رسمة العين نفسها ..
سكت سامي شوي وقال: ريان .. اسيل ليش عيونها رصاصيه ..؟!
ريان: مدري .. يمكن فيها عرق اجنبي ..
سامي: طيب انا يدي اجنبي .. ليش عيوني مو ملونه ..؟!
ريان: مو شرط .. مو كل واحد عيونه ملونه يصير نسله عيونهم ملونه كمان ..
سامي: خساره .. نفسي في عيون خضرا او زرقا ..
ريان: حشى قطو مو انسان ..
سامي: ههههههههههه ..
قطع ضحكته صوت رنة جواله ..
طالع ريان في الرقم وقال: هههه جمس بوند يتصل بك ..
ميل سامي فمه وقال: شيبي ذا ..؟!
ريان: رد وشوف ..
سامي: مابي .. هذا يحب يغث وبس .. اكيد بيسألني ليش تأخرت ..؟!
ريان: طيب ليه ما تغثه انت ..؟!
سامي: حاولت بس ما اقدر .. اعصابي تتلف بسرعه واتنرفز ..
ريان: ههههه الله يعينك على نفسك ..
حطه سامي عالسايلنت وهو يقول: ما راح ارد .. مدري متى راح افتك من ويهه ..
ريان بإبتسامه هاديه: في طريجه تفتك فيها من مراد ..
طالع سامي فيه وقال: وشهي ..؟!
ريان: تتزوج وتستقر في بيت لوحدك ..
فتح سامي عيونه وقال بإستنكار: اتــزوج ..!!!!! انت مهبول ولا شنو ..؟!
ريان: لا مو مهبول .. شاللي ناقصك .. الف بنت تتمناك ..
اعتفس وجه سامي وقال: اكيد مينون .. شوف شكلي كيف .. مستحيل اتزوج وانا جذي ..
طالع ريان في سامي وقال: بس انا اشوف شكلك عادي ومافي اي شي ..
سامي بعصبيه: ريــــــان لا تستغبــــي .. انت فاهم قصدي عدل ..
لفوا كل اصحاب المطعم جهة سامي يطالعون فيه ..
ريان: اهدأ .. الناس يطالعون فيك ..
لف سامي وجهه بضيق وسكت ..
شوي بعدين ضحك .. ضحكه ممزوجه بقهر وبألم وبضعف ..
طالع في ريان وقال بألم: تتذكر لمن قلت ان يدي اجنبي فليش عيوني مو ملونه .. نسيت اقول ان امي بعد اجنبيه .. يعني فيني عرقين اجنبي ..
ريان بهدوء: سامي خلاص خلنا نغير السالفه ..
ارتجف صوت سامي وقال بضعف: اكــرهـ ـها .. اكرههـا وايـ ـد ..
انخفضت نبرة صوته وقال بهمس: ريان انا تعبت .. متى اموت ..؟!
ريان: لا يا سامي لا تقول جذي .. تعوذ من ابليس ..
سامي بقهر: اتعوذ من شنو ولا شنو .. هو ابليس السبب في كل شي .. لا ابوي هو السبب .. حتى امي ..
سكت وقال: ريان بلييز خلنا نغير الموضوع بسرعه .. مابي اتذكر شي ..
طالع ريان فيه بعدين قال: بجد الله يعينك على نفسك .. حابس نفسك في قوقعة الماضي .. اوكي انا معاك انه شي موجع وانه ما راح ينتهي إلا اذا مت .. بس مو معاك انك تسوي في نفسك جذي .. قل لن يصيبنا إلا ما كتبه الله لنا .. هذا ابتلاء من عند ربك عشان يختبر عباده .. سامي اللي انت تسويه اسمه قنوط من رحمة الله .. ما يصير جذي يا سامي ..
سامي: ايه .. على اساس اني مو انسان وما عندي مشاعر ..
ريان: لا يا سامي انا ما قصدت جذي ..
طالع سامي في ريان فتره وقال: بس صح انت يبتها .. انا فعلا مو انسان .. كيف نسيت ..؟!
ريان بعصبيه: انت بتينني يا سامي .. ابي افهم شلون تفكر ..؟!
تنهد سامي وقال: افكر مثل ما يفكرون الناس .. خلنا ناكل بسرعه .. الاكل برد ..
طالع ريان فيه بعدين بدأ ياكل ..
الجو كان جدا هادي إلا من اصوات الملاعق والشوك ..
انتبه سامي لجواله اللي كان النور يولع ويطفى .. وهذا دليل انه فيه مكالمه ..
اخذ الجوال وقال: هذي المره السابعه يتصل ..
ريان: طيب رد ..
رد سامي وقال: خير ..
مراد ببرود: الخير في ويه عدوينك ان شالله .. وين انت ..؟!
سامي: المريخ ..
مراد: لا بجد .. طيب ييب لي تذكار من هناك ..
سامي: قول شتبي وخلصني ..؟!
مراد: بزنس مان على غفله .. المهم تعال البيت بسرعه ..
سامي: وليش ان شالله ..؟! لا يكون مشتاق لي ..
مراد: واااايد .. عالعموم ابوك يقول تعال بسرعه عشان عمك عندنا ..
سامي بصدمه: ابو بنت عمي ..؟؟؟!!!
مراد: شهالسؤال الغبي ..؟! مادامه عمك فأكيد بيكون ابو بنت عمك ..
سامي: اوكي اوكي ياي ..
وقفل فقال ريان: شسالفه ..؟!
سامي: عمي عندنا في البيت ..
ابتسم ريان وقال: عيل طل فيه زين .. اكيد بيكون يشبه بنت عمك ..
سامي: اكيد .. باااي ..
وخرج بسرعه فأبتسم ريان وهو يقول: تغير موده بسرعه ..
قام وحاسب عالاكل وبعدين طلع وراح لبيته ..
اما سامي فركب السياره وكالعاده اسرع بسرعه جنونيه واتجه للقصر ..
وصل سامي للقصر من هنا وانتهى الجزء الاول من هنا ..
وهاهي اسيل اخيرا اكتشفت بأنها لــقــيــطــه ..
- كيف بتعيش .. وشلون راح تتحمل هاللقب الموجع .. ووين بتروح .. وعند مين ..؟!!
اسئله كثيره تدور حواليها .. بس اكيد حياتها الآن صارت اصعب من الاول ..
وش هي توقعاتكم عنها ..؟!!
- ياللا سخرية القدر .. خالها يسأل عنها ويدور عنها وبعدين يلتقون في مكان واحد وكل واحد فيهم يكلم الثاني ومع هذا محد يعرف الثاني ..
واللحين جاء وقت الاسئله ::
- مات ابو فيصل وطلعت اسيل من البيت .. هل هذا الشي بيأثر في تصرفات ام فيصل او فيصل ..؟! وفارس اذا طلع هل راح يرضى باللي يصير او انه راح يلحق بأبوه في العالم الآخر ..؟!!
- اسيل لقيطه .. هذا اللي سمعته غاده .. هل راح تعلم احد او تسكت ..؟!!
- آرثر غايب .. ما يرد على اتصالات اسيل .. ما حضر زواج ريما .. شصار له بالضبط ..؟!!
- وش هالرساله المفاجئه اللي جت لطارق وليش انقلب وجهه .. وش هي علاقته ببسام اللي اول ما شافه تذكره ..؟!!
- شهد وراشد ووسيم .. مثل ما قالت شهد .. لعبة القط والفار لازم تنكشف وهذه هي انكشفت .. وش مصير شهد ووش مصير اخوها الصغير وسيم ..؟!!
- واخيرا سامي اللي مازال يتذكر ماضيه المؤلم وما راح ينساه .. هاهو الآن متجه لقصره عند عمه .. وش هي الاحداث المثيره اللي بتصير ..؟!
اوكي طولت في الاسئله بس بجد البآرت كان مليان احداث ..
وان شاللـه البارت الجاي حتجيكم قنبلـــه قويـــه وغير متوقعه ..
ياللا اشوفكم في الجزء الثاني من البآرت التاسع ..
صديقتكم: صصرخةة االمشتااققةة ..

|$[ نهاية الجزء ]$|