شبكة همس الشوق - عرض مشاركة واحدة

15 - 3 - 2014, 10:39 AM

تنهدت وسن وهي واقفه عند باب الجامعه وقالت: يا رب يكون اختبار ابله نوال سهل .. الحمارا دايم اسئلته صعبه ..
دخلت لداخل وهي تقول: ليش ما تكون طيبه .. اووف منها ..
سكتت شوي بعدها قالت: يا رب تيي اسيل وتدرس .. هي وايد طيبه .. امس لما يت كان شكلها مررآ غير .. اكيد عندها مشكله ..
ضحك وهو يقول: شفيها كيرلوتا تكلم نفسها ..؟!
لفت وسن ورى وانبسطت لما شافت بسام وقالت: يووه بسام انت هني ..؟!
بسام: ههههه شفيج مبسوطه ..؟!
وسن بإبتسامه: اصلا انا دايما اذا شفتك انبسط ..
بندر: لا لا جذي انا اغار ..
وسن: احسن ..
بسام: ههههههههههههههههه في نص الجبهه هههههه ..
بندر: يا ربـــــــــااه لمــــاذا ..!!!
وسن: بسام بسام بوريك شيء ..
بسام: وشو ..؟!
قلبت وسن في شنطتها بعدها طلعت قلم وقالت: شايف ..؟! قلم سبونج بوب .. دايم القى مراسيم بس ذي اول مرره اشوف قلم فأشتريت تسعه وعشرين قلم ..
فغروا فمهم بدهشه ..
لا ذي البنت غريييبه ..
بسام: وليش تسع وعشرين ..؟!
وسن: عشان اذا خلص واحد آخذ الثاني لييين يخلصون كلهم ..
بندر: هههه طيب لو اشتريتي قلم عشان تصير ثلاثين ..
وسن: مابي .. جذي احس ان اقلامي بس ثلاث حبات ..
بندر: احساسج غريب ..
سكتت وسن شوي بعدها قالت: بسام ..
بسام: هلا ..
وسن: اممم ابي منك مساعده صغنوونه مررررآ ..
بسام: ههه اطلبي اللي تبين ..
وسن: عندي رفيجه احسها مو بخير .. ابي اساعدها .. شلون اساعدها ..؟!
بسام: مين هي ..؟!
وسن: وحده ما قد شفتها ..
بسام: طيب شنو قصدج بـ مو بخير ..؟!
وسن: احسها تعبانه .. واحس ان قلبها يعورها .. وهي كمان وحيده .. ما عندها اهل عساهم بحريقه كبيره .. اكرهم ..
بسام بإستغراب: وليه تكرهينهم ..؟!
وسن: لأنهم هم اللي خلوها وحيده وخلوا كل الناس الحيوانين يكرهوها .. وهم خلوها تبجي وتصير مو بخير ..
طالع بسام فيها فتره يحاول يفهم كلامها ..
وسن: وكمان خلوها تترك الجامعه وصارت بعيده عننا واحنا كلنا نحبها واااايد ..
طالع في بندر فهز بندر كتفه بمعنى ما فهمت ..
رجع نضره لوسن وقال: شلون خلوها وحيده ..؟! وشلون خلوا الناس يكرهوها ..؟! وشلون خلوها تترك دراستها ..؟!
وسن: لأنهم طردوها من بيتهم ..
بسام: وليش .. هي شنو ساوت ..؟!
وسن: مدري .. انا لو اعرفهم جان ضربتهم كلهم ..
بسام: طيب هي فينها اللحين ..؟!
وسن: مدري ..
بسام: عيل شلون تبين تساعدينها ..؟!
وسن: مدري وعشان جذي انا سألتك ..
حس بسام ان السالفه صعبه بس ما حب يكسر بخاطرها ..
بسام: طيب اعطيني اسمها الكامل وانا بأطلع لج مجان بيتها ..
وسن: ما عندها اسم ..
بندر: شلون ما عندها اسم ..؟! حسيت اننا بقصه خرافيه وهالبنت هي عباره عن اللاموجود وتمتلك قدره هائله ونادره .. وهي بالاصل مب من البشر ..
بسام: ياخي مو وقتك ..
بندر: عيل شلون ما عندها اسم ..؟!
وسن: عشان اهلها طردوها فصار ما عندها اسم ..
بسام: حبيبتي حاولي توضحين اكثر لأننا مو فاهمين اي شيء .. وبصراحه بدأت السالفه تثير اهتمامي ..
وسن: يعني ان ابوها وامها ناس حيوانين ..
بسام: وضحي اكثر ..
وسن: يعني رفيجتي مررآ تحزن ..
تنهد بسام وقال: كيرلوتا ابي افهم شلون طردوها امها وابوها وليش البنت ما عندها اسم ..؟!
وسن: لأنها لقيطه ..
وكانت كلمتها ذي كافيه لشرح كل شيء ..
لف بسام يطالع في بندر بصدمه بعدها طالع في وسن وقال بهمس: لقيطه ..؟!!!
هزت وسن راسها بإيه وبعدها قالت بحزن: حرام يصير فيها جذي .. هي مررا مسجينه ..
طالع بسام فيها لفتره وبعيون حزينه ..
مو بس بنت اخته ..
حتى رفيجة صاحبته ..
عوره قلبه على هالبنت ..
اكيد متعذبه مثل سجى بنت اخته ..
اكيد تتألم كمان ..
تحسب في نفسه على كل ام واب يرموا ابنهم بالشارع ..
وسن: بسام ..
طالع فيها وقال بإبتسامه هاديه: نعم ..
وسن: شلون اقدر اساعد اسيل ..؟!
بسام بنفس الهدوء: منو اسيل ..؟!
وسن: رفيجتي اللي ما عندها اسم ..
صعقـــــــــه عنيفـــــــــه اصابت بسام ..
صاحبتها اسمها اسيل ..؟!!
هذا الاسم نفسه .. نفس اسم بنت اخته ..
نفس الاسم اللي سموه لسجى ..
مسك كتف وسن بطريقه مفاجئه وهو يقول: عيونها رصاصيه صح ..؟!
انفجعت وسن من طريقته المفاجئه وهزت راسها بإيه ..
بندر في نفسه: "لا يمكن .. هي نفسها بنت اخت بسام" ..
ارخى بسام إيده عن اكتاف وسن وهو يطالع فيها بصدمه ..
شوي حس براحه فضيعه ..
بسام: عندج رقمها او اي شيء عنها ..
وسن: معي رقم الموبايل ..
ابتسم بسام بعدم تصديق وطلع جواله وهو يقول: اعطيني رقمها ..
وسن بإستغراب: تيب ..
طلعت جوالها واعطته رقمها وهو دايركت اتصل على اسيل ..
بس للاسف كان مغلق ..
نزل الجوال عن اذنه وقال: انتوا تتواصلوا معها ..؟!
وسن: دايما نتصل عليها بس ما كانت ترد علينا بعدين ردت على لين ويت امس وزارتنا ووعدتنا انها ترد على اتصالاتنا ..
بسام: امس يت هني ..؟!
وسن: ايه ..
بسام بقهر: ليه ما شفتها ليه ..؟!
طالعت فيه وسن فتره بعدها قالت: ليه تسأل عنها جذي ..؟! انت تعرفها ..؟!
سكت بسام فتره بعدها قال: لا ما اعرفها .. ياللا حأروح المحاضره ..
ابتسم لها وقال: اوعدج اني اساعدها واخليها تنسى كل شيء صار لها ..
ابتسمت له وسن وهي تقول: انت طيب ..
حركت ايدها وهي تقول: باااي ..
وراحت لكلاسها ..
بندر: ليه قلت لها انك ما تعرفها ..؟!
حط بسام ايده بجيبه وقال: اخاف يوصل خبر لسجى انه فيه احد من اهلها يدور عنها وبجذي مستحيل ترد على اتصالات غريبه ولا على صاحباتها .. انا ما راح استفيد وراح ارجع مثل قبل .. خلونا جذي افضل .. واخيرا لقيت خيط قوي يوصلني لها ..
بندر: يا رب تلقها ويرجع كل شيء بخير ..
بسام: الله يسمع منك .. ياللا نروح للمحاضره تأخرنا ..
وراحوا بعدها لكلاسهم ..

================================================== ==================

عماد وصالح راحوا للمحاضرتهم ..
اما دانا فجت اليوم للجامعه بعد ما طلعت من المستشفى وهي اللحين في كلاسها وباقي شوي وتخلص محاضرتها ..
اما ريان ويزيد الآن جالسين في مكان الشله ويسولفون لأنه باقي ما جات محاضرتهم ..
طاحت قدامهم شنطه فرفعوا راسهم وشافوا سامي واقف وحاط ايده بجيبه ..
يزيد: ههههه تصدق يا سامي .. اشوفك وانا يالس ووراك الشمس احسك طالع خققه ..
ريان: غريبه مافي هاااي كالعاده ..
طالع سامي فيهم بهدوء بعدها قال: وين اروى ..؟!
استغربوا سؤاله هذا فقال ريان: وش درانا عنها .. بس شفيها اخلاقك ..؟! احسها قافله ..
لف سامي وجهه عنهم وبدأ يلف بنضره بين الطلاب يدور عنها ..
شكله هادئ ظاهريا بس في صدره نيران تشتعل ..
وده يذبحها بإيده ..
ريان بإستغراب: شفيه ..؟!
يزيد: مدري عنه ..
ضغط سامي على اسنانه اول ما شافها وقال بقهر: الحقييره ..
وبعد كلمته ذي اتجه لها وعصبيته مغطيه على عقله تماما ..
ريان: هذا وين رايح ..؟!
يزيد: ويهه يقول انه بيتضارب ..
ريان: قوم قوم نلحق عليه لا يسوي لنا مصيبه ..
وصل سامي لأروى اللي كانت تمشي مع صاحباتها ..
مسكها من كتفها ولفها عليه بعنف وقبل لا تستوعب صفقها كف قوي خلى كل الطلاب اللي حواليهم يسكتوا ويطالعوا فيه ..
انصدمت وقبل لا تستوعب الموقف صرخ سامي بوجهها يقول: انسسانه مو معقوله .. حقيره وسسافله ..
وقف ريان ويزيد يطالعون في سامي وهم مصدومين من تصرفه ..
اروى بصدمه: سامي ..
سامي بعصبيه: انجبــــــــي ولا تنطقـــــــي اسمي على لسانج القــــــذذر .. ابي افهم انتي شنو نوعيتج ها ..؟! شلــــــــون تقولي عن نفسج انج حـــــــامل مني شلـــــــــون ..؟!!
انصدموا الطلاب وطالعوا في اروى وبدأوا يتهامسون ..
اما اروى فتمنت ان الارض تنشق وتبلعها من قوة الموقف المحرج ..
سامي بعصبيه: ابي افهم انتي شلون ترضيها عن نفسج ..؟! عمـــــــري ما شفت بنت تشوه سمعتها بلسانها .. انتي واطــــــيه وفي قمة السفاله .. تشوهي سمعتج خلاااص بالطقـــــــاق بس انا شنو دخلني ها ..؟!! صج انج وحده تـ##### وزباله ..
فتحت فمها بتتكلم بس سكتها بكف قوي وهو يقول: انجبـــــــــي يالوقحـــــــــه ..
صرخت في وجهه وهي تقول: اسكت اسكت .. اللي يمد إيده على بنيه مب ريال ..
فار دمه وشد على قبضته ولكمها بقوه لدرجة انها طاحت عالارض ..
سامي: واللي تشوه سمعتها وسمعت غيرها مب انسانه .. حتى الحشرات افضل منج يالواطيه .. انتي شنو بالضبط ..؟! ما عندج كرامه .. ما عندج ضمير .. ما عندج احاسيس ..
صرخ في وجهها: انتي لو تموتي افضل لج عشان تريحي نفسج من دنائتج ..
اشر بأصبعه حول الطلاب كلهم وهو يقول: شايفه كل هالطلاب ..؟! كلهم عرفوا شنو هو مستواج .. وكلهم حيحتقرونج .. بس مع هذا لساتني مقهور منج يالجلبه ..
تفل في وجهها وهو يقول: انتبهي تضهري جدام ويهي لأني وقتها راح انهي حياتج ..
لف وراح برى الجامعه بعد ما اخذ شنطته ..
عضت اروى على شفتها وبعدها رفعت نضرها تطالع في الطلاب فشافت نظراتهم اللي كلها استحقار ..
على طول قامت وطلعت من الجامعه ..
غيدا: والله سامي مرعب في امور زي جذي .. عبالي انه ما تفرق معاه ..
غدير: غسل شراع اروى غسل ..
خلود: هههه حمود وش تتوقعي يسوي اذا عرف ان ذي فكرتج ..؟!
حركت غيدا إيدها بلا مبالاه وهي تقول: ما يهمني ..

وفي مكان مو بعيد عنهم كانت دانا واقفه وعيونها ما زالت مصوبه عالمكان اللي كان سامي واقف فيه ..
دانا في نفسها: "البنت ذي مستحيل تكون من البشر ..!! شلون ترضى هذا على نفسها ..؟! شلون ..؟!"
ضاقت عيونها بحزن وهي تقول في نفسها: "تضايق سامي وبقوه وهذا دليل على ردت فعله العنيفه ذي .. حرام عليج يا اروى .. ليش تسيئي للناس جذي" ..
طالع ريان فيها فتره بعدها لف على يزيد وقال: لو كان حجي سامي صج فتستاهل اروى ..
يزيد بقهر: من زمان وانا اكرهها .. ياليته ذبحها افضل ..
ريان: يذبحها مره وحده ..؟!! بطل شطحات .. ياللا وقت محاضرتنا ياء وشكل سامي ما يبي يدرس اليوم ..
طالع يزيد في ريان شوي بعدها راحوا على كلاسهم ..
تنهدت دانا ولفت عشان تروح للكافتيريا بس شافت في وجهها الاستاذ راشد الشعلان ..
راشد وهو يطقطق اصابعه: اهلين عادل اهلين ..
دانا بقهر: انت ..؟!!
ايمن: لا اخوه ..
راشد: شش انا ما عندي اخوان ..
ايمن: ياخي طوف ..
راشد: انا مب اخوك ..
ايمن: ياليل ابو لمبه ..
راشد: لا تسرق جملتي ..
متعب: هههههه ايمن الافضل انك تسكت ..
ايمن: هو ذا ..
طالع راشد في دانا وبعدها قال: له له له .. ارتعبت من هالنظرات .. حتى شوف شلون جسمي يرتعش ..
دانا بحده: متى تنسجن وتتعاقب على كل افعالك يالمجرم السفاح ..؟!
راشد بنظرات حزينه: يا شباب انا تأثرت من الموقف .. هاتوا المناديل ..
دانا بقهر: سسافل ..
طالع راشد فيها فتره وقال: انت عبالك اني ناسي ..؟! لا يا حبيبي انت في قائمتي وبالمرتبه الثانيه بعد بسام .. حأندمك .. حأخليك تطلب رحمتي ..
دانا: تخسى ..
فار دم راشد ومد ايده ووجه لها لكمه عنيفه بس جاء واحد قدامه ووقف لكمته بإيده ..
ابتسم ذاك الشخص وقال: لحد الآن ما تركت حركاتك الصبيانيه يا رششود ..
اول ما شافه راشد قال بعصبيه: مهند ابعد عن طريجي ولا تتدخل ..
هز مهند راسه بلا وقال وهو يطالع في دانا: مستحيل اخليك تمد ايدك على هذا الــولــد ..
وشدد على كلمة ولد وهو يطالع فيها بإبتسامه ..
نشف الدم بعروقها وهي تطالع فيه ..
لا يكون عارف كل شيء عنها ..
مستحيل ..!!
راشد بإستهزاء: لا يكون اخوك الصغير وانا مدري ..؟!
مهند: يمكن ..
راشد بعصبيه: تستهبل حضرتك ..
لف على دانا وقال: اذا كنت ريال تعال وايهني ولا تختبيء ورى هالغبي يا الجبان ..
دانا: انت آخر واحد يتكلم عن الجبن يالجلب .. لو كنت ريال جان سلمت نفسك للشرطه يالحقير ..
عصب راشد واتجه لها عشان يفرش فيها التراب بس وقفه مهند وهو يقول: رشود يا بابا بطل .. انت الغلطان فأهجد ..
راشد بعصبيه: مهندووه وويــــع .. ياخي هدني بروحي ..
مهند بإبتسامه: انا مو اخوك فلا تقول ياخي ..
فارت اعصاب راشد وقال ما بين اسنانه: لا تــقــلــدنــي يالــجــلــب ..
طالع فيه مهند بنظراته البارده وما رد عليه ..
لف راشد نظره لدانا يطالع فيها بحده ..
فتح فمه بيتكلم بس سبقته دانا تقول: حط في بالك يا راشد انه ما راح يمر يوم بحياتي ما ادعي فيها عليك ان ربي يذوقك عذاب اكبر من اللي ذقناه .. تأكد من هالشيء ..
رفع راشد حاجبه وهو يقول: يالهي .. لحد الآن انا ارتجف .. كلماتك ترعبني ..
طالعت فيه بحقد بعدها لفت فقال راشد: هيه انتظر وين رايح ..؟! انا باجي ما بردت حرتي فيك ..
لفت دانا وطالعت فيه بنظرات غريبه ..
مين المفروض يبرد حرته في الثاني ..؟!
طبعا هي فليش يقول جذي ..؟!
طالعت فيه لفتره بعدها راحت ..
راشد: هين يا عادل .. اقدر الحقك وافرش فيك التراب بس ....
طالع في مهند وكمل: بس جدامي مركبه فضائيه اكيد راح تزعجني ..
رفع مهند حاجبه وهو يقول: انت نادر تشبه بس اذا شبهت تبدع ..
ربت على كتف راشد وهو يقول: اليوم كنت مؤدب .. اتمنى تستمر جذي ..
وبعدها راح لجهة كلاسه ..
راشد بقهر: هالمهند يبيله كسر رقبه .. اكرهه ..
عزوز: طيب ليش ما تضاربت معاه ..؟!
راشد: مابي ..
وكمل في نفسه: "قد تضاربت بس دايم يهزمني هزيمه ساحقه" ..
راشد: ياللا عالكلاس .. المحاضره بدأت من خمس دقايق ..
سليم: ايوه صح ..
وهم متجهين للمحاضره مر واحد من جنب راشد ..
سحب راشد الولد من ياقة بلوزته وقال بحده: انت قد الحركه ذي ..؟!
خاف الولد اول ما شاف راشد وقال بخوف: انا ايش سويت ..؟؟!!
راشد بعصبيه: تستهبل انت وشكلك ..؟!
الولد بخوف: والله والله ما سويت شيء ..
فضربه راشد بقس على وجهه وبعدها مسكه مره ثانيه وقال: وتجذب بعد ها ..؟!
فقال الولد: خلاص انا آسف ما عاد اعيدها .. آخر مره ..
راشد: لا اشوفك المره اليايه تعيدها لأني ما راح اسامحك ..
الولد: حاضر ..
ففكه راشد وهو يقول: عشان المره اليايه تتعلم انك اذا شفت راشد مار لازم تسلم ..
انصدم الولد منه فهز راسه بإيه وراح بسرعه ..
دخل راشد ايده بجيبه برضى وبعدها راح للكلاس ..

================================================== ==================

الظهر وبالمدرسه الثانويه للاولاد ..
كانت الحصه السابعه ومدرس الرياضيات واقف ويشرح ..
إياد بطفش لبدر: اووف .. عمري بحياتي ما شفت رياضيات في الحصه السابعه ..
بدر: اكيد ماكو بس عشان الاستاذ يبي يعوض الايام اللي كان غايب فيها فعشان جذي يستلف حصص ..
إياد: يعني ضاقت فيه الدنيا ومالقى غير السابعه ..
هز بدر كتفه ..
طالع الاستاذ في الطلاب وقال: منو يحل المسأله ذي ..؟!
بدأوا الطلاب يرفعون ايدهم ويشاركون ..
إياد في نفسه: "ايش النشاط الزايد هذا ..؟! صج مهسترين" ..
شوي تذكر كلام اسيل ..
" العربي والحساب وايد سهل فليش ما تجتهد فيه "

عقد حواجبه شوي بعدها رفع ايده وقال: انا يا استاذ ..
لف الفصل كله يطالع فيه بصدمه ..
إياد يشارك في حصة رياضيات ..؟؟!!!!!
لا يمكن ..
الاستاذ: انت شنو ..؟!
إياد: ابي اشارك ..
انصدم الاستاذ .. على باله انه بيروح الحمام او يروح للمدير كعادته ..
الاستاذ: تقصد انك تبي تحل المسأله اللي بالسبوره ..؟!
إياد: يب ..
الاستاذ: متأكد ..؟!!!
إياد: شفيكم مصدومين ..؟! حرام اشارك مثلا ..؟!
طالع فيه الاستاذ فتره بعدم تصديق بعدها قال: طيب قوم ..
قام إياد وراح للاستاذ وبدر يراقبه وهو مو مستوعب ..
من متى إياد مهتم بالرياضيات ..؟!
اخذ إياد الطبشوره من إيد الاستاذ ووقف قدام المسأله يطالع فيها ..
لف ورى وطالع في الطلاب اللي هاجدين ويراقبونه ..
لف عالاستاذ وقال: اذا حليتها شنو تعطيني ..؟!
الاستاذ: اذا حليتها صح فراح اعطيك درجه كامله في المشاركه ..
ابتسم إياد وقال: خوش هديه .. اوكي راح احله صح ..
ضحك دافور الفصل وقال: اممما إياد يحل مسأله حسابيه ..!! كثروا منها هههه ..
لف إياد وطالع في الولد وقال: هههههههه اخسس يابو سنون مكسره .. تعرف تهرج هههههههههههههه ..
عصب الولد منه وقال بعصبيه: إيـــــــــادوه ..!
إياد: ههههه انتبه بس لا يتكسر الطقم كله ..
الاستاذ: خـــــــلاص ..
ابتسم إياد بعدها لف يطالع في المسأله ..
إياد في نفسه: "بأحاول احب الرياضيات مثل ما قالت سهى .. اممم خلوني اعتبر ان المقام اللي بالطرف الايمن هو سامي .. والبسط انا .. هههه وناسه سامي يشيلني .. والعدد الصحيح اللي ينبنا هو دانا قاعده تشجعني .. كفو والله يا بنت الحفله التنكريه" ..
اشر سهم جنب العدد الصحيح وحط حرف D‏ نسبه لدانا ..
بعدها حرف E‏ عند البسط نسبه له ..
وبعدين حرف S‏ لسامي ..
طالعوا الطلاب فيه بإستغراب ..
بدر في نفسه: "هذا شنو يسوي" ..
إياد في نفسه: "واللحين نروح للطرف الايسر .. خلوني اعتبر ان المجهول هو لينو لأني ما اعرف اسمها .. اممم وهذا ريان .. وهذا ......" ..
وبدأ يرسم في باله الشخصيات وبعدين بدأ يحل ..
إياد في نفسه: "لازم في النهايه اخلي سام خسران" ..
بعد كم دقيقه لف عالاستاذ وقال: خلصت ..
طالع الاستاذ في الحل وبعدها قال: بصراحه انا مو مصدق .. فيه خطأ صغير بس الحل النهائي صح ..
إياد: هههههههه بسم الله علي انا دايم مبدع هههه ..
الاستاذ: بس عندي سؤال صغير ..
اشر عالاحرف الانجليزيه وقال: شنو ذا ..؟!
إياد: ههههههه استاذ الله يصلحك اللقافه مب كويسه ..
ضحك الاستاذ وبعدها دق الجرس فقال: ياللا يت الصرفه .. مع السلامه ..
اخذ اغراضه وطلع ..
راح إياد عند بدر وقال: شرايك فيني ..؟!
بدر: ياخي اذهلتني .. ما توقعتك بتحل ..
إياد: ههههههههه ياللا نروح عالبيت .. حدددي نعسان وابي انام ..
بدر: لا قبل لازم نمر على مدرسة لينو ..
إياد: لييه ..؟!
بدر: الصباح اتصلت علي وقالت انها يابت الاوراق ..
إياد: يووه ودي اقابلها بس ما اقدر اليوم .. ابي انام ..
بدر: هههه اوكي روح البيت وريح وانا بآخذ الاوراق والحقك ..
إياد: اوك ..
خرجوا من المدرسه وكل واحد ركب سيارته وراح في طريق ..
طالع إياد في جواله وقال: ليه ما دقت سهى ..؟! شكلها ما عرفت الاجابه .. اصلا السؤال مرره سهل ..
بعد فتره وصل ووقف سيارته بالحوش ..
نزل من سيارته وطالع فيها ..
اعتفس وجهه وهو يقول: اصلا هم غشاشين .. ليش سياراتهم تكون بالكراج وانا بالحوش ..؟!
شوي ابتسم وقال: ماكو مشكله .. راح استولي على كراجهم مثل ما استوليت على غرفة مساعد ..
حس بروح معنويه عاليه وهو يفكر بالموضوع ..
دخل البيت فشاف ام مساعد في الصاله ..
كانت جالسه عالكنب ومغمضه عيونها وكأنها غفت بدون لا تحس ..
جاء إياد عندها وطالع فيها وقال: نايمه ..
طالع فيها شوي وبعدها طالع حواليه وبعدين رجع يطالع فيها ..
ابتسم بمكر وقال: ذي فرصتي ..
نزل شنطته من على ظهره وبدأ يفتش فيها لين طلع قلم تخطيط ٢m‏ ‏..
قام وقرب من عندها ..
فك القلم وكتب على خدها بالخط العريض المايل (( ♥ Eiad )) ..
إياد: وه فديت اسمي .. هههههه يا ربي متى تقوم ..؟! ابي اشوف ردت فعلها ههههههههه ..
قفل القلم وحطه بالشنطه وبعدها لف يطالع فيها ..
يحس بنوبة ضحك فضيعه بس ماسك نفسه بالعافيه ..
شال شنطته وطلع فوق لغرفة مساعد اللي صارت له ..

.................................................. ...........................

اما عن بدر فكان واقف عند المدرسه وقدامه لينو وصاحبتها سيمو ..
لينو: غريبه وين رفيجك ..؟!
بدر: بالبيت .. ماهو شرط يي ..
لينو: اها .. اسمع انا طلعت الاوراق بس بغيت اسأل وش تبغوا منها ..
بدر: مثل ما قلنا اول .. فيه شرطي يشتغل تحت ايد ابوج ودووم متصيد لنا فإحنا نبغى نعرف مخالفاته اللي يخبيها عشان نبلغ عنه ونفتك منه ..
ابتسمت لينو وقالت في نفسها: "الى متى بتستمرون بالجذب .. انا حأكون وراكم وراح اعرف مقصدكم الحقيقي" ..
سيمو: هههههه مساجين شكله يأذيكم ..
بدر: وايد ..
فتحت لينو شنطتها وطلعت الاوراق واعطته وهي تقول: وهاهي الاوراق اللي طلبتوها بين إيدكم .. وشهو طلبكم الياي ..؟!
اخذ بدر الاوراق والابتسامه على وجهه بعدها قال: باجر راح اتصل عليج واقولج ..
ابتسمت لينو وقالت: لا تنسى ان كل شيء بثمنه ..
تنهد بدر وقال: جم تبين ..؟!
لفت لينو على صاحبتها وقالت: جم اطلب ..؟!
سيمو: اممم خمسه آلاف ..
لينو: خوش طلب ..
لفت على بدر وقالت: خمس آلاف ..
ميل بدر فمه وهو يقول: مو كأنه كثير ..؟!
تكتفت لينو ورفعت حاجبها تطالع فيه ..
لينو: لا تنسى اني ضد ابوي ..
تنهد بدر وقال: اوكي لما تييبي الاوراق راح ندفع ..
سيمو: لا لينو لا توافقي .. احنا نبي نصرف الفلوس في الويك آند ..
هزت لينو كتفها وقالت: رفيجتي قالت لا توافقي ..
طالع بدر في سيمو بقهر وكأنه يقول وش دخلك ..
سيمو: ههههه اعرف انك حاقد .. بس انا ما يهمني غير الوناسه ..
بدر: اللي بيدفع هو إياد بس مو مويود اللحين ..
لينو: وقت ما تدفعوا راح اييب اللي تبغوه .. التأخير مب بصالحكم ..
ابتسمت بخبث وكملت: يمكن الشرطي اللي تبغوا تصيدوه اهو اللي يصيدكم ..
تنهد بدر وقال: اوكي .. باجر اتصل عليج ونتفاهم ..
سيمو: اتصل بالصبح عشان العصر نروح عالمول ..
بدر: لا مو الصبح ..
سيمو: إلا الصبح ..
بدر بقهر: على شنو مستعيله ..؟!
سيمو: ههههه عالوناسه ..
بدر: خبله ..
لينو: ما دام رفيجتي قالت الصبح فخله الصبح لأني ماراح استقبل اتصالات بالظهر او بعده ..
طالع بدر فيها فتره بعدها قال: ايش اسلوب الذل اللي بديتي تستعمليه ..؟!
لينو بإبتسامه: لا تنسى انكم بدوني ما تقدروا ..
لفت وراحت هي وصاحبتها سيمو ..
سيمو: يسسس ونااسسه .. باجر لازم نتمشى بالمول والمطاعم والملاهي وكل شيء مثل المره اللي فاتت ..
لينو: يب .. وحنصرف الفلوس كلها ..
سيمو: ههههههه مع اني مو فاهمه شغلج معاهم بس هالشغل وناسسه ..
ابتسمت لينو ..
حتى لو شرحت لصاحبتها كل شيء فما راح تهتم لأن صاحبتها ما تعرف للامور الجديه ابد ..
راح يدخل الكلام بإذنها ويطلع باليوم الثاني ..

اما بدر فكان يطالع فيهم لين اختفوا بعدها قال: هالبنت مو سهله ..
ركب سيارته واتجه للبيت ..
لما وصل نزل ودخل البيت فسمع صوت امه من المطبخ تقول: ميـــــن اللي يـــــاء ..؟!
بدر: انــــــا بـــــــدر ..
الام: بـــدل هدومـــك وانـــزل عشـــان تتغـــدا لأن كلهـــم يـــوا ..
بدر: طيـــب ..
طلع لغرفته وبدل ملابسه وبعدها راح لغرفة مساعد عشان يكلم إياد بس كان ياخذ دش ..
فنزل لغرفة الاكل وشاف ابوه واخته بشاير واخته لبنى جالسين ..
بدر: السلام عليكم ..
الاب: وعليكم السلام .. المستفز اللي فوق ياء قبلك .. ليش تأخرت ..؟!
جلس بدر عالكرسي وقال: كان عندي شغله سويتها وييت ..
بشاير: شنو هالشغله ..؟!
بدر: خاصه ..
بشاير: الله يستر .. انت وإيادوه ذا ما وراكم إلا المصايب ..
ابتسم بدر وما رد عليها ..
دخلت الام للغرفه ومعها صينية البازيلا وقالت بعصبيه: لبنوه وويع .. ليه ما تيين تساعديني بالمطبخ ..؟!
لبنى: كل ما إجيت من الجامعه وادخل منشان اساعدك ترفضي وتئولي انك بتخافي احط لك إشي عالاكل او ......
قطعت كلامها فجأه وهي مصدوومه ..
الكــــــــــــل فغـــر فمه يطالعون في وجهها ..
الام بعصبيه: انجبي يالخبله .. عالاقل نضفي الصحون .. غبيه ..
حطت الصينيه بعدها طالعت فيهم وهي مستغربه من جمودهم ..
الام: شفيكم ..؟!
دخل إياد والمنشفه على رقبته وهو يقول: هـــــــــااي ..
طاحت عيونه على الام وعالكلام اللي كتبه بخدها ..
ما قدر يمسك نفسه وضحك: هههههههههههههههههههههههههههههههههه اووه يا خاله هههههههه انتي تحفه فنيه هههههههههههههه ..
قفل الاب فمه بقوه يمنع نفسه من الضحك ..
اما لبنى فلفت وجهها للجهه الثانيه عشان تخفي ضحكتها عن ام مساعد ..
اما بشاير وبدر ضحكوا من الشكل ..
حست الام بعصبيه فضيعه وهي تطالع فيهم ومو فاهمه شيء ..
لفت على إياد وقالت بعصبيه: نعم .. شفيك تضحك يا ويه البومه ..؟!
إياد: ههههههههههههههه اللحين صرتي كشخه دام اسمي مويود ههههههه ..
وقفت بشاير من الضحك بعدها قالت لأمها: امي .. الخبل ذا كاتب اسمه على ويهج ..
انصدمت الام من كلامها فسحب إياد المرايا اللي عالدولاب وحطها قدامها وهو يقول: حسنا لنرى من هي اجمل امرأة بالبلاد هههههههههه ..
زادت صدمت الام وهي تشوف وجهها بالمرايه ..
ابعد إياد المرايه عنها وهو يقول: اعذريني فهناك من هي اجمل منك ههههههههههه ..
ضغطت على اسنانها بعصبيه وهي تشوف إياد يضحك من قلب ..
اعصابها فارت ووصلت حدها من هالولد ..
مو قادره تتحمله وتتحمل مشاكله اللي يستمتع فيها وهو يسويها ..
لفت على لبنى وقالت بعصبيه: قومــــــي وييبـــي الاكل ..
وطلعت بعدها من المكان ..
قامت لبنى وراحت تجيب باقي الاقل ..
بشاير: صج ان حركتك قمه في السخافه ..
إياد ببرود: عيل ليه ضحكتي ..؟!
لفت وجهها بقهر وسكتت ..
بدر: إياد حرام عليك .. اللحين بتكرهك ..
إياد ببراءه: كنت امزح معها .. قد سويت هالحركه بأبوي وما كرهني .. ما كنت اعرف ..

اما الام فكانت عند المغاسل وتنضف خدها بقوه وبعصبيه وهي ناويه نيه سيئه تجاه إياد ..
تحملته كثير بس اللحين لا ..
مستحيل تسكت اكثر ..
مستحيل ..

================================================== ==================

كان جالس عالكرسي حقه وحاط رجل على رجل ويطالع فيها ..
حاس بقهر وعصبيه فضيعه ..
وده يروح لها اللحين ويفرش فيها التراب ..
طالع في شكله شوي ..
إيده اليسرى مكسوره وجسمه كله رضوض ووجهه كله جروح ..
له يومين بالمستشفى من بعد ما انضرب ضرب جامد ..
ضغط على اسنانه بقهر وقال في نفسه: "هذي هي الهديه ها .. من متى اصلا عندها اخوان وشلون ..؟! وكيف يكون اخوها غني جذي وهي عايشه في شقه قذره مثلها .. هين يا اسيلوه" ..
إيه مقهور ويبي يطلع حرته فيها ..
بس كل ما تذكر الولد وتهديده يبطل ..
ما يقدر ينكر انه خايف منه ومن جماعته ..
بس اللي قاهره ان الولد اصغر منه بكثييير ..
كل ما تذكر انه انضرب منه ينجن جنونه ..
دايم يكون المسيطر ودايم يذل الناس من حوله ويحركهم على كيفه ..
بس هالبزر ....... آآخ مقهور ..
طالع في اسيل اللي ترتب الملابس بحقد ..
لازم يطلع كل حقده فيها لأنها السبب ..
بس اكيد بعدها راح تتصل بالولد وبعدين الله اعلم وش بيصير فيه ..
اذا لازم يفكر بطريقه ثانيه ..
بطريقه ما تقدر اسيل تفتح فمها وتعلم احد ..
" اسمعني عدل يالجلب .. لو تقرب خطوه وحده بس منها راح تندم طول عمرك .. هذا اذا كنت بتعيش يا بابا .. تذكر مين انا ومين اكون .. إياد الراهي يا خويلد "

هذي كانت آخر كلماته وبعدها راح هو والجماعه اللي معه ..
خالد في نفسه: "اسم الراهي هذا مو بسيط فعشان جذي لازم اخذ حذري .. وفي نفس الوقت مستحيل تكون اسيل اخته لأنها من عائلة الرملي" ..
رفع عيونه وطالع فيهم وقال: اسمعوا .. اليوم شغلنا بيكون لحد الساعه سبع المغرب وبعده حينقفل المحل عشان بيصلحوا فيه صيانه وييبوا ديكورات يديده .. فعشان جذي من الساعه ست ابعدوا الملابس ورتبوها بكراتين عشان نطلعها .. اوكي ..؟!
ليلى: طيب ..
طالعت اسيل في خالد بعدها رجعت لشغلها ..
اليوم وفي اي لحضه راح تجي الشرطه لعندها وتنسجن ..
وحتظل بالسجن الين يجي فاعل خير ويدفع هالمبلغ كله ..
بس ٧٥٠ الف مو بسيطه ..
هذا مبلغ كبييير ..
اهلها اللي كانت تعيش عندهم ماكانوا يملكوا هالمبلغ ..
ما عندها غير كم ألف و .....
٥٠ ألف من المسمى بأخوها ..
بس ما تبي تستعملهم ..
ما تبغى اي شيء من جهة ابوها ..
هي مو بكيفها بس قلبها مو راضي انها تاخذ ..
تنهدت بعمق ..
خلاص هذا قدرها ولازم ترضى فيه ..
دخولها للسجن شيء مؤكد ..
لفت وطالعت في خالد ..
ارتاحت كثير لما شافته بذي الحاله ..
اخذ إياد حقها وبزياده ..
قطع تفكيرها صوت جوالها ..
طلعته وشافت رقم غريب ..
ذي المره الخامسه اللي يتصل فيها هالرقم ..
وذي المره الخامسه اللي تطنش فيها الاتصال وما ترد ..
مستحيل ترد على اي رقم ..
فقط صاحباتها راح ترد عليهم لأنها وعدتهم ..
اي رقم ثاني ما راح ترد عليه ..
ابـــــــــدا ..
حطت الجوال عالصامت ورجعت تكمل شغلها ..
جواد كان يشتغل وكل شوي ينظر لأسيل نظره خاطفه ..
حاس بالذنب لأنه شهد ضدها ..
بس هذا اخوه ..
اذا شهد معاها فأخوه بيكون مصيره الاصلاحيه ..
فعشان كذا مافي بإيده شيء يقدر يسويه ..
كل اللي يقدر عليه هو انه يدعي لها ويدعي ان الله يسامحه ..
اما ليلى حاسه بتأنيب الضمير لحال اسيل ..
هالبنت ما صلحت لها اي شيء ..
بالعكس اعتبرتها صاحبتها وسولفت معها ..
ومع هذا ما وقفت معها بمشكلتها ..
ليلى في نفسها: "سامحيني يا اسيل .. انا عارفه ان اللي سويته غلط وانج ما تستاهلي بس غصب عني .. خالد انسان مو سهل .. مابي اضيع عائلتي واتسبب لهم بالاذى .. اسيل واللي يسلمج سامحيني" ..
لفت اسيل ولاحضت نضرات ليلى لها ..
ابتسمت لها اسيل وقالت: ليلى لا تحملي نفسج اي شيء .. انا عارفه ان خالد هددج وعارفه قد إيش خالد انسان قذر .. انا مو زعلانه عليج ..
حست بالعبره تخنقها من كلام اسيل ..
لفت وجهها بسرعه عشان ما تبان دموعها ..
اختفت ابتسامة اسيل وقالت في نفسها: "بس لو انا بمجانج ما اسكت .. لازم اقول الحق وما اخاف من احد .. الله راح يكون بصفي .. انا راضيه باللي فيه لأن ربي معاي وهذا شيء يكفيني" ..
لفت وطالعت في خالد فأنتبه لها وقال: خيير تطالعين ..؟!
اسيل بإبتسامه: شكلك حلو ..
فارت اعصاب خالد من كلامها وقال بقهر: الحقيييره ..
لفت وجهها عنه وقالت في نفسها: "يستاهل .. بس للأسف طباعه زي ماهي وما تغيرت" ..
تنهدت بعمق ولفت تطالع بالباب ..