شبكة همس الشوق - عرض مشاركة واحدة

15 - 3 - 2014, 11:14 AM

في منتصف العصر تقريبا ..
كان متربع فوق السرير ويقلب صفحات الكتاب بطفش ..
تأفف وقال: ليه الوضع هادي جذي ..؟! ملل x‏ طفش ..
قام من فوق السرير وخرج من غرفته يدور عالمشاكل ..
نزل الصاله فشاف ام مساعد جالسه وتطالع مسلسل بالتلفزيون ..
ابتسم وبعدها طلع جري لغرفته ..
دخلها وبدأ يقلب بالادراج وهو يقول: انا متأكد اني شفته هني .. وينه ..؟!
قلب بين الاغراض لين حصل الريموت القديم للتلفزين ..
ابتسم بعدها طلع فوق كرسي واخذ الساعه الجداريه واخذ منها البطاريات عشان يحطها بالريموت ..
خرج من الغرفه وهو يقول: ان شاء الله يشتغل ..
نزل للصاله وشاف ام مساعد على نفس وضعها ..
ابتسم واشر بالريموت عالتلفزيون وقلب القناة ..
وفعلا كان الريموت صالح فأنقلبت القناة ..
عقدت ام مساعد حواجبها بإستغراب وطالعت بالريموت اللي جنبها ..
اخذت ورجعت القناة اللي كانت عليها ..
ابتسم إياد وخفض الصوت للآخير ..
زاد استغراب ام مساعد وضنت ان في الريموت خلل ..
رفعت الصوت وبعدها حطت الريموت وراها ..
ضغط عالازرار وبدأ يقلب بين القنوات ..
انصدمت ام مساعد وقال: شنو اللي قاعد يصير هني ..؟!
طلعت الريموت من وراها وفكت عنه البطاريه لأنها تضن ان الخلل من الريموت ..
بس للأسف استمر التقليب وإياد ماسك ضحكته بالعافيه وام مساعد جالسه بمكانها وهي حددها مصدومه ..
جاء بدر وسحب إياد من إيده وهو يقول بهمس: امش ياللئيم قبل لا تكتشفك امي ..
طلع الدرج ودخله في غرفته وقفل الباب وراه ..
إياد بضجر: بدر ليييه ..؟! والله كنت مستمتع ..
بدر: ياخي ما تعرف تيلس مؤدب .. المهم اللحين تعال ابيك ..
جلس بدر عالسرير فجاء إياد وجلس قدامه ..
بدر: امس اخذت من لينو الاوراق ..
إياد: احس ان الاوراق مالها فايده ..
بدر: طبعا مالها فايده .. احنا طلبناها عشان نشتت لينو ونبين لها اننا صج نبي نطلع معلومات عن شرطي يشتغل تحت جناح ابوها ..
قلب بدر الملف وهو يقول: بس انا لاحظت حاجه ..
إياد: شنهي ..؟!
بدر: كل هالاشخاص اللي يشتغلوا تحت امرته لهم فتره طويله وهم يشتغلوا ذي الشغل وكل ما ياء واحد بيسجل رفضوه وقالوا انهم ما يحتاجوا ناس يدد ..
إياد: اها .. هذا يعني ان الاشخاص المكتوبه اسمائهم بالملف يعرفوا كل شيء عن اعمال ابو جراحوه المخالفه وعشان جذي كان ابو جراح يرفض اي واحد يبي يشتغل عشان لا يكشفه ..
بدر: بالضبط ..
إياد: ههههههههه خبل .. المفروض ما يخلي احد يعرف عن مخالفاته عشان لا ينكشف بسهوله ..
بدر: بالعكس .. يمكن هو متقصد انهم يعرفون عشان اذا احد اتهمه يكونون هالاشخاص واقفين بصفه ..
إياد: صح .. يمكن جذي .. طيب اللحين وش نطلب من لينو ..؟!
بدر: اممم هالمره نبي شيء يفيدنا ..
إياد: اسمع .. الافضل اننا نطلب منها سجلات قضايا ابوها .. اكيد حنطلع ثغرات فيها ..
بدر: حلو بس المشكله ان لينو اكيد بتقول شتبغون منها لأننا بالاصل قلنا اننا نبغى نصيد واحد يشتغل عند ابوها مو ابوها ..
إياد: امممم انا بأتصرف وقتها ..
بدر بشك: متأكد ..؟!
إياد: ههههه اممما تشك فيني يا بدر ..؟! انت اكثر واحد عارفني فأطمئن ..
بدر: اوكي .. انا توني اتصلت عليها وراح نقابلها عند مدرستها اللحين .. بس اسمع .. لا تنسى تسحب خمس آلاف لأنها تبغاها كمقابل ..
إياد: اوكي ماكو مشكله .. بس مو كأنها طماعه شوي ..!!
بدر: هههههههههه مرره ..
قام إياد وقال: خلاص انا حأبدل هدومي واييك ..
بدر: اوكي ..
راح إياد لغرفته وبدل ملابسه بعدها نزل فشاف ام مساعد جالسه وتطالع مره في التلفزيون ومراات في الريموت ..
إياد: هههههههههههههه ..
سمعت ضحكته فلفت وشافته خارج من البيت ..
ضاقت عيونها وهي تراقبه ..
راح ترتاح منه بأي طريقه ..
اخذت تلفون البيت واتصلت على رقم ..
شوي نزل بدر وقال: امي مع السلامه انا طالع ..
ام مساعد: مع السلامه ..
خرج بدر وركب مع إياد وانطلقوا للمكان المحدد ..

في ذاك المكان كانت لينو وسيمو جالسين ينتظروهم ..
لينو: غلط .. مره غلط ..
طالعت فيها سيمو بإستغراب وقالت: شنو اللي غلط ..؟!
لينو: المفروض هم اللي ييون بدري واحنا اللي نتأخر مو العكس .. قههر ..
سيمو: بالعكس .. لو تشوفي الافلام جان عرفتي انه البنت دووم تيي بدري والشاب دايم يتأخر عن الموعد ..
تنهدت لينو وقالت: هذا اذا كانوا بيطلعوا في موعد .. بس هنا احنا في بزنس والمفروض هم ييوا اول ..
سيمو: لا .. المفروض احنا لأن من عادة البنات هم الاهتمام اما الشباب فمهملين ..
لينو: ماكو فايده من اقناعج ..
سيمو: اقول لينو سمعتي آخر خبر ..؟!
لينو: وشو ..؟!
سيمو: صفصف .. بنت عمي وصايف تقول انها بتغير جامعتها ..
لينو بإستغراب: وليش ..؟!
سيمو: مدري عنها .. تقول ملييت ..
لينو: مليت ..؟! من شنو ملت ذي ..؟!
سيمو: تقول جامعه ممله والطلاب فيها مملين وغير جذي تقول ان الجامعه دووم تصير فيها حرائق وهي عندها الربو وتتعب كثير ..
لينو: آها .. يب من حقها تغير .. بس احسه صعب انها تتعرف على صاحبات يدد و....
سيمو: هههههههههههههه ..
لينو بإستغراب: شفيج تضحكين ..؟!
سيمو: اصلا هي ما تحب تصاحب احد فعشان جذي ما عندها اصحاب ..
لينو: بنت عمج غريبه ..
سيمو: وايد ..
لينو: كاهم يوا ..
لفت سيمو فشافتهم يوقفوا سيارتهم وينزلوا منها ..
سيمو: بصراحه هم واايد كشخه ..
لفت لينو فمها بقرف وقالت: ما عندج ذوق ..
سيمو: ههههههه اطمئني انتي احلى فمو لازم تغارين ..
لينو بإستنكار: اغار من شنو ..؟!!
إياد: هـــــــــآإآي ..
سيمو: هـــــــــااااي ..
اعطتها لينو نظره فقالت سيمو بهمس: كنت ارد عليهم ..
إياد: هههههههههههههههه البنت تعاملنا كأعداء ..
لينو: ها ها ها بايخ ..
إياد: ههههههههههههههههههههه ..
انقهرت لينو منه وتنرفزت بس مسكت اعصابها واظهرت البرود ..
لينو: ليش تأخرتم ..؟! المفروض نتقابل بالصبح مو بالعصر ..
سيمو بإنزعاج: ايه ليش تأخرتم ..؟! لو ييتوا بدري جان اللحين احنا بالملاهي نتونس .. اوووف ..
إياد: هيـــه لينو انا عرفت اسمج .. اكيد لانا ..؟!
لفوا كلهم يطالعوا في إياد .. وقته مرره غلط ..
لينو: تستهبل انت ..! اللحين احنا نتكلم بسالفه وانت ياي بسالفه غير ..
إياد: ههههههههه غيرتي السالفه لأن يوابي صح ..
لينو: طبعا غلط ..
إياد: عيل ليلى ..؟!
لينو: كمان غلط ..
إياد بضجر: طيب خديجه ..؟!
سيمو: ههههههههه مرره بعيد ..
لف إياد عليها وقال: رفيجتج شسمها ..؟!
سيمو: اسمها لينو ..
بدر: خلاص يا إياد .. عاجلا او آجلا حنعرف اسمها ..
طالع إياد في لينو لفتره بعدها قال: المره اليايه بأييب اسمج صح ..
لينو بإبتسامه: انتظرك ..
بدر: خلونا اللحين نرجع لشغلنا ..
سيمو بتأفف: لا بلييز خلونا نسولف .. اكره التكلم بجديه والشغل ..
لينو: سيمو لا تنسي ان معاها خمس آلاف وحنصرفها الليله ..
ابتسمت سيمو وقالت: طيب بس لا تطولوا ..
طالعت لينو فيهم وقالت: قبل لا تقولوا ايش طلبكم .. الفلوس جاهزه ولا لا ..؟!
إياد: اطمئني جاهزه ..
لينو: آها ..
طقطقت شوي بالعلك بعدها قالت: وش تبون ..؟!
بدر: نبي كل ملفات القضايا اللي مسكها ابوج .. وبس ..
رفعت حاجبها وقالت: ابوي ..؟! اتوقع انكم تبون تصيدون واحد يشتغل عند ابوي مو ابوي .. فليش تبون القضايا ذي ..؟!
طالع بدر في إياد وكأنه يقول جاوبها ..
طالع إياد في لينو بعدها قال: سؤالج يدل على غبائج ..
لينو بإستغراب: شنو ..؟!
إياد: القضايا اللي نبغاها لها علاقه بالشخص اللي نبي نصيده ..
لينو: كيف ..؟!
رفع إياد حواجبه بدهشه وهو يقول: كيف ..؟!!!! معقوله ما تعرفين كيف ..؟!!!
شكت لينو بنفسها من كلامه ..
هي تحس انه مافي علاقه بس الولد يقول انه فيه واندهش لمن ما عرفت وش العلاقه ..
هذا يعني انه فيه علاقه ..
شغلت مخها عالسريع تفكر فقال إياد بنفس دهشته: لينو مو معقول ما تعرفين ..؟! انتي بنت ضابط شرطه فكيف ما تعرفين ..؟!
لينو بثقه: إلا عارفه بس كنت ناسيه ..
إياد براحه مصطنعه: واااه حسبت انج غبيه ..
لينو: هه ..
دخل إيده بجيبه وطلع محفظته وطلع منها خمس آلاف ..
وقبل لا يتكلم سحبت سيمو الفلوس وهي تقول: وااااااو واخييرا بنستانس ..
بدر: اوكي بجذي انتهينا .. اذا طلعتي الاوراق اتصلي علي ..
إياد وهو يحرك إيده: بااااااي ..
لفوا وراحوا للسياره ولينو تراقبهم ..
طالعت سيمو فيها بعدين طالعت في مكان عيونها ..
سيمو: لينو شفيج تطالعي في إياد ..؟!
لينو: ها .. لا ماكو شيء .. المهم خلينا نروح اللحين ..
سيمو بمرح: اوكي ..

لف بدر على إياد وقال: ههههه خليتها تشك في نفسها ..
إياد: هههههه يب .. وراح تفر مخها لين تتعب .. وشدراك يمكن يطلع فيه علاقه صج ..
بدر: ههههههه يمكن .. كل شيء جائز ..

================================================== ==================

اخذت نفس عمييق وهي تدعي ربها انها تلقاه ..
لفت المطبخ كله ولحد الآن ما حصلته ..
ولا حصلت اي شيء مناسب ..
حست نفسها شوي وتبكي ..
جلست عالكرسي وحطت راسها بين إيدها بتعب ..
جت عندها وحده من الخدم وقالت: شهد ايش فيه ..؟!
قالت بهمس: مالقيته ..
الخدامه: اكيد ما راح يلقى لانه مافيه ..
تنهد وقالت: طيب شسوات ..؟! شادن حييل تعبانه وماكو هنا اي مخفض حراره للأطفال .. شنو اساوي ..؟!
الخدامه: طيب قول لروان .. هي واجد طيبه ..
شهد: ما اقدر .. راشد هددني اني ما اقرب منها ..
الخدامه: راشد واجد شرير .. طيب روح لروان وراشد ما يدري ..
شهد: ما اقدر .. هو طول وقته يالس بالصاله وراح يشوفني اذا طلعت لفوق ..
جت خدامه ثانيه وقالت: طيب حطي مويه بارد على بيبي صغير ..
شهد: من الصباح وانا احط واللحين المغرب والحراره نفس ماهي .. ما انخفضت ..
حست بالعبره تخنقها وهي تقول: اخاف تموت ..
طالعوا الخدم ببعض ومو عارفين وش يقولون عشان تهدأ ..
قامت شهد ورجعت لغرفتها عند اختها ..
شافتها على نفس حالها .. نايمه وآهآت المرض تطلع من شفتها الصغيره ..
اخذت المنشفه من على راسها وبللتها بالمويه بعدها بدأت تمسح على راسها ورقبتها وصدرها عشان تخف حرارتها ..
شهد: يارب لطفك .. يارب تتحسن حالتها بسرعه .. يارب مالي غيرك ..
جلست عندها حول ساعه وهي تدعي ربها وتبلل جسم اختها بالمويه بس مافي فايده ..
مسحت شهد دموعها اللي كانت تنزل من عيونها وهي حددها خايفه ..
تخاف اختها تموت قدام عيونها مثل ما ماتت امها قدامها ..
قامت وطلعت برى الغرفه واتجهت لراشد ..
هي عارفه جوابه بأنه راح يرفض بس هي راح تترجاه ..
راح تحاول فيه .. هذه اختها مو اي احد ثاني ..
راحت للصاله وشافته كالعاده يتابع فلم مضاربات عالتلفزيون ..
وقفت عنده وقالت: لو .. لو سمحت ..
راشد: خيير ..
شهد: ممكن طلب ..؟!
راشد: لا مو ممكن ..
سكتت وهي تطالع فيه بعدها قالت: بس هذا ضروري ..
راشد: قلت مو ممكن ما تفهمين ..؟! شكل داخل راسج جك فاضي مو عقل .. الله يخلف على ام يابتج ..
بلعت ريقها عشان تمنع دموعها من النزول ..
ظلت واقفه عنده على امل انه يحس ويسألها ايش تبغين ..
بس للأسف اعتبرها مجرد زهريه او تحفه فنيه ..
مر حول ساعه وبعدها انتهى الفلم اللي يبغاه ..
فقلب على قناه ثانيه تعرض المصارعه وبدأ يتابعها ..
شهد: ابي اكلمك .. والله ضروري ..
لف عيونه عليها وشاف عيونها حمرا وكأنها كانت تبكي ..
راشد في نفسه: "شفيها تبجي بعد .. اقص لسانها اذا قالت انها تبي تشوف اخوانها .. خدامات آخر زمن" ..
راشد: خيير .. شتبين ..؟!
ارتاحت شهد كثير لما رد عليها وقالت: واللي يخليك ابي اودي اختي للمستشفى .. حرارتها مرتفعه وماكو هنا اي دواء ينفع لها .. اخاف تموت .. هي لساتها صغيره ..
رفع راشد حواجبه وقال: لا يكون تقصدين ذيج البزره ..؟! ههههه حتى البزارين يعرفون يمرضون ..
شهد: ..................................
راشد: سوري ما راح اخليج توديها للمستشفى ..
شهد بسرعه: وليييش ..؟! هي مرره تعبانه ..
راشد: انا مو فاتح هي ملجأ ايتام واراعيهم .. شكلي راح اتصل بأحد الملاجئ عشان ييوا وياخذوها وارتاح منها ..
شهد بصدمه: شنـــــــــو ..؟!
راشد: ايش اللي شنو ..؟! مو ابوها وامها ميتين وهي تحت السن القانوني ..!! عيل مجانها في الملجأ ..
هزت شهد راسها بصدمه ..
هذا ايش يقول ..؟!
اكيد يستهبل ..!!
مستحيييييل ..!!
شهد: خلاص مابي اوديها المستشفى واعتبر اني ما طلبت منك اي شيء ..
راشد ببرود: اوكي .. بس القرار اللي اخذته مافيه تراجع ..
شهد: لا راشد واللي يخليك .. هي اختي وما ابيها تعيش وتتربى في ملجأ .. راشد واللي يسلمك لا تساوي جذي ..
طالع راشد فيها وقال: عندج اقارب ..؟! عم او خال او جد ..؟!
هزت شهد راسها بلا ..
راشد: عيل ماكو احد غير الملجأ تعيش فيه .. وهذا اخر كلام فما ابي اسمع نفس ..
ارتجفت شفتها وهي تقول: راشد واللي يعافيك لا تسوي فيني جذي .. خل عندك قلب وحس فيني .. حط نفسك بمجاني وراعي مشاعري .. ذي اختي .. مالها احد غيري وانا مالي احد غيرها .. مو كافي اخواني اللي ما اعرف شنو هي اخبارهم ..؟! مو كافي عيشتي السوداء اللي معيشني إياها ..؟! مو كافي اني يتيمه ومالي سند بحياتي ..؟! انت شنو بالضبط ..؟! قلبك مصنوع من شنو ..؟! ليه قاسي ..؟! ليه ما تحس بأحد ..؟! ليش انت جذي ..؟! عالاقل هالمره بس تنازل .. لا تسوي جذي .. خل اختي تعيش عندي .. بالله عليك يا راشد خلها عندي ..
طالع راشد فيها ببرود وقال: اولا لا تناديني راشد حاف .. ثانيا انا ما اتنازل لخدامه .. ثالثا انا لما اقول مابي اسمع نفس فأسمعي الكلام ولا تعاندين .. رابعا انتي عيشتج زفت فالافضل لاختج انها تعيش عدل .. خامسا انكتمي وانقلعي عن ويهي لأنج ثورتي اعصابي فلا تحديني اقوم وأأدبج ..
عضت على شفتها تمنع شهقاتها تطلع وهي تطالع فيه ..
لفت وجهها وراحت لغرفتها ..
راشد: عبيطه ..
لف وطالع في التلفزيون ببرود تام ..
وما كان داري ان اليوم اللي بيندم فيه على تصرفاته صار قريب ..
قريب جدا ..

================================================== ==================

في آخر الليل ..
كانت لابسه بدله رياضيه عنابيه ورافعه اكمام رجلها لركبتها وبإيدها كرة سله ..
عضت على شفتها وهي تطالع في السله بتدقيق وبعدها جريت خطوتين ونطت ورمت الكره بس للأسف ما دخلت ..
تذمرت وهي تقول: اوووف ما قدرت ادخل غير مره من عشر محاولات ..
اخذت الكوره ورجعت للمكان اللي دايم تسدد منه وقالت: هالمره لازم ادخلها ..
اخذت نفس عميييق وبعدها جريت ورمت الكوره بس للاسف ما دخلت ..
..........: هههههههههههه لا تحاولي يا سيرو .. انتي قصيره وهالرياضه للطوال فقط ..
لفت سيرين فشافت خالتها رؤى داخله لهالصاله الرياضيه ..
سيرين: بس مالي شغل .. ما احب اخسر ابدا .. شيء يقهر ..
جلست رؤى على الكرسي الابيض وحطت اوراقها على الطاوله وقالت: استسلمي يا قلبي ..
سيرين بعناد: مستحيل .. ابي اتعلم هاللعبه ..
رؤى: هههه اسمها رياضه مو لعبه ..
سيرين: كلها واحد ..
هزت رؤى كتفها وبدأت تشتغل بأوراقها ..
رمت سيرين كورتها وجت عند رؤى وقالت: شنو تساوين ..؟!
رؤى: اشتغل زي مانتي شايفه ..
سيرين: طيب شنو هالشغل ..؟!
رؤى: مناقصه ادرسها عشان اشوف ان كانت مناسبه لشغلي ولا لا .. عشان ان كانت مناسبه احاول قد ما اقدر انها ترسي علي ..
سيرين: آها .. اممم شغلج يطفش ..
رؤى: ههههه للأسف ما برد على جاهله مثلج ..
اعتفس وجه سيرين وهي تقول: انا مب جاهله ..
رؤى: اوكي مب جاهله واللحين متى بتنامين يا بعدي .. الساعه صارت اثنين ..
سيرين: عادي باجر مب مدرسه ..
رؤى: انتي حره ..
سيرين: اممم اقول رورو ..
رؤى وهي تكتب بالورق: هممم ..
سيرين: ابي اقولج شيء ..
رؤى: طيب دقيقه ..
سيرين: اوكي ..
خلصت رؤى الكتابه بعدها قالت: ها شنو تبين ..؟!
سيرين: خطيبج ياء اليوم .. بس قلت له انج في شغلج ..
رؤى: اها .. طيب انا عارفه .. واحد من الخدم قالي ..
جلست سيرين عالكرسي وقالت بحماس: رورو متى تتزوجون ..؟! ابي يي عرس عشان اتنكس فيه انا وصاحباتي لووول ..
رؤى: ههههههههه باجي بدري ..
سيرين: وييين بدري يا شيخه .. هو مستعيل وانتي تماطلين ..
ابتسمت رؤى وقالت: ما راح اتزوج إلا لما اشيل الحمل الثقيل اللي بظهري .. فاهمه ..؟!
سيرين بإحباط: طيب تخيلي انهم ماتوا .. بجذي بتضيعين عمرج بدون فايده ..
سكتت رؤى فتره بعدها قالت: ان شاء الله ما يطلع حجيج صج ..
تنهدت سيرين وسكتت ورؤى رجعت لشغلها ..
بعد فتره قالت سيرين: اقول رورو .. قبل جم يوم شفت بدر وإياد عند مدرستنا ..
رؤى بإستغراب: شنو يبوون هناك ..؟!
سيرين: مدري .. لما ييت بسألهم راحوا .. صرخت وناديتهم بس محد رد ..
سكتت شوي بعدين كملت: شكلي طلع غبي ..
عقدت رؤى حواجبها تفكر بعدها اجلت التفكير ورجعت لشغلها ..
قامت سيرين وقالت: خلاص ببطل كرة سله .. ابروح العب بلياردو ..
انفجرت رؤى ضحك وهي تقول: هههههههههههههههههههه لحد الآن عندج امل هههههه ..
سيرين: ههه يب وامل قوي .. بعد ثلاث أيام حتشوفي اني انا بأفوز عليه ..
رؤى: اوكي نشوف ..

** رؤى عبد الكريم .. عمرها ٢٥ سنه .. ذكيه ورئيسة اعمال ولها شهره بالخليج .. شخصيتها قويه وقلبها ابيض وطيبه حيل .. مخطوبه من سنتين لواحد يشتغل بالشرطه **

** سيرين محمد .. عمرها ١٧ سنه في الصف الثاني ثانوي .. مرجوجه وتحب الوناسه حييل .. اذا احد غلط عليها تغسل شراعه .. امها وابوها ماتوا وهي صغيره فصارت تعيش مع خالتها رؤى **