شبكة همس الشوق - عرض مشاركة واحدة

21 - 3 - 2014, 01:53 AM

|$[ البآرت العشرون الجزء الاول ]$|

ومَاذا لَو كَانت الحَلقْہ الناقِصہ مُؤلِمہ اكثْر ..!!
اكْثر دمَارا .. وَ قسّوه ..!

في الصباح ..
توه خرج بسام من المستشفى وهو اللحين متجه للفندق وتفكيره كله في رؤى ..
خايف انها تسحب عليه وما تجيب اسيل ..
راح يروح الفندق يريح شوي وبعدها إذا ما جات راح يروح هو بنفسه ..
وقف سيارته بعد ما وصل ونزل منها ..
دخل لداخل وطلع المصعد ولما وقف اتجه لجناحه ..
فتح الباب ودخل فإستغرب من سميه اللي كانت صاحيه وتقلب في التلفزيون ..
ابتسم وقال: السلام عليكم ..
وكالعاده ما ردت السلام ..
لفت لجهته وقالت: وين كنت ..؟!
جلس بسام وقال: بالمستشفى .. اتصلت عالتلفون عشان اخبرج بس انتي ما رديتي ..
طالعت فيه فتره بعدها لفت تطالع بالتلفزيون ..
ظل بسام فتره يناظرها بعدها قال: اليوم راح اييب سجى ..
انصدمت سميه ولفت بسرعه تطالع في بسام ..
رمشت بعينها اكثر من مره بعدها قالت: شنو قلت ..؟!
بسام: سجى بنتج راح تيي اليوم ..
طالعت فيه لفتره بعدها قالت: ما ماتت ..؟!
هز بسام راسه بلا وقال: قلت لج من قبل انها حيه ..
ظهر الإرتباك على ملامحها بعدها قامت واتجهت لغرفتها وصفقت الباب وراها بقوه ..
تنهد بسام بعدين طالع في التلفزيون ..
دق الباب فقال بإستغراب: غريبه .. منو اللي بيي ..؟!
شوي قام بسرعه وهو يقول: اكيد رؤى ..
فتح الباب فتفاجئ بباقة زهور بويهه ..
بعد هالشخص الباقه وقال بمرح: سبـــــــرايز ..
انصدم بسام وقال: وليد ..؟؟!!
هز وليد راسه وقال: بشحمه ولحمه .. بالله مو مفاجأه ..
بسام: ياخي مو مصدق .. اللي اعرفه ان ابوك ما يسمح لك تترك الدراسه وتسافر ..
سلم وليد عليه وهو يقول: ههههههههه خلاص ابوي لان قلبه لما قلت له ان صديقي بالمستشفى وخلاني ايي على قطر ..
بسام: تفضل ادخل ..
دخل وليد وحط الباقه على الطاوله وجلس عالكرسي وقال: اوووه وقسم لك وحشه ..
قفل بسام الباب وجلس عنده وقال: ههههههه ادري ..
وليد: هههههه سخيف .. ها شرايك بالباقه .. ترى تعبت وانا الف محلات الورود فقولي رايك بس انتبه لا تجرحني لأني عارف نفسي اني ما اعرف اختار ..
بسام: هههههههههه ياخي وقسم لك وحشه انت وسخافتك ..
وليد: افا .. هذه إهانه غير مباشره ..
بسام: هههههه المهم شخبار دراستك ببريطانيا ..؟!
وليد: والله تمام والحمد لله انا اجتهد زياده حبتين .. هههه لزوم اييب اعلى الدرجات عشان لا اتلقى التهزيء من ابوي ..
بسام: ههه ابوك شخصيته قويه ..
وليد: بقووه .. إيه صح نسيت اقولك سلامات ..
بسام: الله يسلمك ان شاء الله ..
وليد بحماس: صحيح الكلام اللي قلته لي .. لقيت بنت اختك سجى ..؟!!
بسام: يب .. لقيتها امس واليوم راح تيي عندي ..
وليد: وقسم وناسه .. واخيرا .. طيب هي وينها اللحين ..؟!
اختفت الابتسامه من وجه بسام وهو يقول: عند رؤى .. اخت زوجة سعد الثانيه ..
هز وليد راسه بيأس وهو يقول: انت ما تتغير ..
بسام: شتقصد ..؟!
وليد: اقصد انك اكيد كاره رؤى لأن اختها سببت كل هذا لاختك وبنتها صح ..؟! كالعاده إذا كرهت احد لازم تكره العايله كلها ..
بسام: ياخي لا تلومني .. من القهر اللي جواتي غصب عني اكره اي احد يقرب لها ..
وليد: طييب ليييش ..؟! مالهم ذنب ..
بسام: اقولك غصب عني مب بكيفي ..
وليد: مثل سامي صح ..؟!
بسام بإستغراب: من سامي ..؟!
وليد: ولد اخو سعد .. ولد سلطان ..
تذكر بسام وقال بضجر: إيه .. وخصوصا سعد .. محد من عائلته راح احبه ابدا ..
ظل وليد يطالع في بسام لفتره بعدها قال: ما ألوم سجى لو رفضت تسمع لك .. حتى لو كنت خالها ..
بسام: شتقصد ..؟!
وليد: وحده انرمت وتبهذلت وذاقت انواع الإهانات ما اتوقع انها ابدا راح تحب ابوها وامها وتشتاق لهم .. فطبيعي انها راح تكره العايله كلها ومنهم انت ..
بسام: طيب انا شد.....
بعدها وقف كلامه لما فهم ..
وليد: انت شدخلك ..؟! فعلا مالك دخل عشان تكرهك .. مو كأن هالوضع يشبه وضعك مع سامي ورؤى .. مالهم دخل عشان تكرههم .. بسام ترى ما يصير جذي .. مو كويس تحمل احد ذنب احد غيره .. فهمت علي ..؟!
بسام: ما سمعت المثل اللي يقول ذاك الشبل من ذاك الاسد .. ما دام اهلهم بالطريجه السيئه ذي فأكيد تربوا تربيه سيئه كمان ..
وليد: بسام وبعدين ..؟! لا تخلي حقدك عليهم يعميك ..
تنهد بسام وقال: اوكي .. بس وربي من القهر قاعد هالكلام ..
وليد: ها .. قد حصل وقابلت زوج اختك ..؟!
بسام: إيه وكانت اسوء مقابله ..
وليد: ههههههههههه طيب قد قلت لي ان عنده ولد .. قابلته ..؟!

بسام: إياد ..؟! لا ما قابلته ولا ابي اقابله .. قبل جم سنه حصلت بيننا مقابله .. انسان استفزازي ..
وليد: ههههههههه عاد انت هالايام واضح ان حتى الذباب يقدر يستفزك ..
بسام: ههههههه بطل سماجه ..
وليد: اقول بسام طيب انت قابلت سامي .. ولد سلطان ..؟!
هز بسام راسه وقال: ايه .. وقتها كنت مار بالسياره فشفته يتهاوش مع واحد جسمه مثل اجسام المصارعين .. دخلت وساعدته ..
وليد: اخسس يا البطل ..
بسام: مو وقتك ابد ..
وليد: هههههههه طيب شرايك فيه ..؟! والله انه يونس .. ليته يلس يدرس عندنا ببريطانيا ..
بسام: يونس ..؟! مدري عنه لأني ما تكلمت معه .. بس ما يروق لي ..
وليد: ههههههه ماش مستحيل تتقبل احد من ذيك العيله .. بس صج ياخي تكلم معه شوي وربي راح تغير نظرتك إتجاهه ..
بسام ينهي الموضوع: يصير خير ..
وليد: ههههههههههه اوكي .. ياللا استأذن ..
بسام بصدمه: على وين ..؟!
وليد بفيس زعلان: ابوي يقول ارجع لبريطانيا بسرعه ..
بسام: تمزح ..؟!!!!
وليد: لا والله من صج .. قال خذ رحلة ذهاب وإياب في نفس اليوم .. مهما لآن ابوي راح يظل صارم ..
بسام: لا ما يصير جذي .. ما امداك تيلس ولا ساعه وحده ..
وليد: ههههههههههه ياخي يلست ثلاث ساعات ادور لك باقه قمييييله ..
بسام: صج سخيف .. دامك ما بتطول جان ييت على طول وبلاها باقه ..
وليد: لا ما يصير .. ابي اطلع إنسان ذوق ..
بسام: صج سخيف .. خلاص اطلع وألحق على طيارتك ..
وليد: ههههههه ولا يهمك المره اليايه ايلس عندك ساعتين مو ساعه ..
بسام: هههههههههه وربي مو وقتك ..
قام وليد فقام بسام وودعه وهو يقول: ياللا ذاكر عدل عشان المره اليايه مدة السفره تكون اطول ..
وليد: هههههه لا توصي حريص .. المهم لا تنسى .. خبرني عن كل شيء يصير لك مع سجى اوكي ..؟!
بسام: هههههه اوكي اوكي ..
فتح وليد الباب وهو يقول: ياللا مع السلامه ..
بسام: فمان الله ..
لف وليد بيطلع بس انصدم من البنتين اللي كانوا توهم راح يدقوا الباب ..
إيه هم رؤى واسيل ..
بس اللي صدمه مو وجودهم .. مع لفته طاحت عيونه على اسيل وظل يطالع فيها فتره وهو بقمة صدمته ..
هذه البنت ..!!!
هذه البنت .... مستحييل ..!!
جاء بسام ولما شافهم إبتسم وقال: اهلين سجى ..
ما ردت اسيل عليه لأنها كانت تطالع في نظرات وليد المصدومه بإستغراب ..
انتبه بسام لوليد وقال: وليد شفيك ..؟!
صحى وليد من صدمته وقال: ها .. لا ولا شيء .. استأذن ..
وإبتعد عن المكان وبسام يراقبه بنظراته وقال في نفسه: "شصار لوليد فجأه" ..
قاطعت رؤى تفكيره تقول: هذه هي سجى ويبتها مثل ما وعدتك عشان ما تقول اننا نخلف الوعود ..
طالع بسام فيها وقال بإستهزاء: اها .. شكرا ..
تذكر كلام وليد فتعوذ من الشيطان وقال: مشكوره .. ادخلي يا سجى ..
طالعت رؤى في بسام فتره بإستغراب بعدها ابتسمت وراحت ..
دخلت اسيل لداخل ووقفت تطالع في المكان ..
جذبها شكل باقه الورود فتقدمت وشالتها تطالع فيها ..
قفل بسام الباب وقال: اعجبتج ..؟! يقولوا ان البنات ذوق في هالاشياء فشرايج بتنسيقها ..؟!
رجعت اسيل لمكانها وهي تقول: خايس ..
ابتسم بسام وقال في نفسه: "تم قصف جبهتك يا وليد" ..
جلست على كنبه وقالت: تعيش لوحدك ..؟!
ارتبك شوي وقال: أ أ لا فيه احد معاي ..
طالعت فيه وقالت: منو ..؟!
ما عرف شلون يجاوبها ..
ما راح يقولها امها .. لحد الان مو عارف وش بتكون ردت فعلها ..
راح يعلمها بعد ما يقول كل اللي عنده ..
جلس عالكنبه اللي قدامها وقال: تبين تشربين شيء ..؟!
طلت فيه شوي بعدها قالت: منو ..؟!
تنهد وقال: رفيجي .. ها تبين تشربين شيء ..؟!
هزت راسها بلا وهي ما تزال تطالع فيه ..
سكت يفكر شلون يبدا ومن فين واللي موتره اكثر هو نظرها اللي مصوب عليه ..
بعد فتره قال: انتي كنتي تعيشي لوحدج ..؟!
اسيل: بالبدايه لا .. بعدين ايه ..
بسام: ليش منو كان يعيش معاج اول ..؟!
اسيل ببرود: الينانوه ..
انفجع بسام منها وقال: اعوذ بالله من الشيطان الرجيم .. شنو هذا اللي قلتيه .. ترى هالامور محد يتغشمر فيها ..
اسيل: وانت شايف ويهي ويه واحد يتغشمر ..
هز بسام راسه بلا ..
بعدها ظل يطالع فيها وهو مصدوم من كلامها ..
شلون كانت تسكن مع جن .. لحد الان هو واثق انها تستهبل ..
حاول يتناسى وقال: اها .. طيب من فين كنتي تصرفي على نفسج ..؟!
اسيل ببرود: الشرطه تصدقت علي ..
انكسر خاطره على كلامها اللي يبين قد إيش هي موجوعه بعدها قال: شتحبين اناديج .. بأسيل ولا سجى ..؟!
فقالت: اسيل ..
بسام: اوكي اسيل اسمعي .. اليوم راح اخذج للمحكمه واطلع لج اثبات وجود واطلع هويه .. بتكونين انسانه موجوده ولج مكانتج ..
انتظرها ترد بس كانت على نفس وضعيتها تطالع فيه ولا شالت نظرها عنه ..
بسام: اكيد قالت لج رؤى عن سالفة اختها سحر صح ..؟!
هزت راسها بإيه من دون لا ترد ..
بسام: كلامها صحيح .. بداية المشكله كانت من جهة اختها اللي اسمها سحر .. بس بعدين صارت من جهه اخرى ..
تنهد وكمل: بالبدايه كان الزواج بين ابوج وامج زواج رسمي .. ابوج ما كان يحب امج وامج ما كانت تحب ابوج .. بعد الزواج مشاعر ابوج ما تغيرت اما امج فبدأت تحب ابوج .. مرت سنه وبعدها ييتي انتي .. ومع هذا كانت ملاحضه سميه ان ابوج ما كان مبسوط كثييير .. ما كانت فرحته باهته وبعدها اكتشفت انه يحب وحده تشتغل عنده بالشركه وناوي يتزوجها .. واكتشفت انه طلبها للزواج بس هي رفضت لأنه متزوج وعنده بنت .. كلمت ابوج وقالتله انا زوجتك وذيك السحر انساها فقال مستحيل وقرر انه يطلق سميه لأنه من الاساس ما كان يحبها .. بس الصدمه الثانيه ان سحر ما وافقت .. تقول انا ما ابغى يكون لأولادي اخت مو مني .. بمعنى انها ما تبغاج اصلا .. ما تبغى احد يشاركها بسعد ..
ناظر في اسيل اللي ما زالت تطالع فيه وبنظرات جامده ..
تنهد وكمل: ذيك الفتره حصلت الكثبيير من المشاكل .. مات فيها ابوي لأنه كان مريض بالقلب .. وبعد عدة اشهر مات فيها ابو سعد موته طبيعيه .. زادت الاوضاع سوء وسعد كان مستعد يطلق سميه ويوديج تعيشين عند امج بس سحر رفضت وقالت ما ابغى وخلاص مو لازم تتزوجني لأني مستحيل اتزوج واحد عنده بنت .. ما ادري وش اللي كانت تبغى توصله سحر بكلامها .. وكأنها تقول تخلص من بنتك لو كنت تبغاني .. وبوسط كل هالمشاكل امي اشترت فله صغيره وخلت اختي تسكن فيها عشان تريح فيها نفسيتها .. اختي نفسيتها انقلبت جدا وصارت مكتئبه ودووم تبجي .. كانت تحب سعد كثييير .. جدا .. لدرجة انها وبلحضة تهور كانت بتذبحج بس امي لحقت عليها .. وامي قالت لي انها ذاك الوقت خافت على اختي اكثر منج .. بعد جم شهر انتي مرضتي بمرض وحطوج بالمستشفى .. اختي راحت تزور سعد عشان تتوسل له انه ينسى سحر ويرجعوا يعيشوا مع بعض .. رفض وقال انه راح يتزوج سحر لو ايش ما صار .. يعني لو ايش ما صلحت ما كان راح يغير رايه ..
سكت فتره بعدها كمل: بعدها استسلمت للامر وقالت خلاص تزوجها بس لا تطلقني وانا اوعدك اني ما احمل بعد هذا .. وافق وقال طيب ما راح اطلقج بس هذا راح يحصل فقط إذا بنتج ماتت من المرض ..
طالع في نظرات اسيل فشافها جامده فقال في نفسه: "ما يصير جذي .. انصدمي اعملي شيء بس لا تكتمي كل هذا بداخلج .. انتي تتعبي نفسج اكثر من اول .. الله يعينج" ..
طول ما كمل فقالت اسيل بهدوء: وبعدين .. شصار بعد ما باعني ابوي ..؟!
انكسر خاطره على جملتها فقرر انه يكمل وقال: يت اختي عند امي وعلمتها بهذا .. سميه وقتها كانت مخيره بأصعب قرارين .. يا بنتها يا زوجها .. بس للأسف اختارت زوجها بحجة انها يلست معاه فتره اطول من بنتها .. وقتها تمنت انج تموتي عشان ترجع لزوجها .. اسبوعين مر وانتي كنتي مريضه بعدها صحتج تحسنت .. امي الله يهديها وقتها ما كان هامها إلا مصلحة بنتها ونفسيت بنتها .. كانت تدعي بكل صلاه انج تموتي .. ولما تحسنتي ما قالت لبنتها هالشيء .. قررت انها تقتلج بأي طريجه .. كانت تقنع نفسها انج طفله ولسى ما وعيتي عالدنيا وان قتلها لج كان بهدف انساني وهو حالت بنتها سميه .. كانت تقنع نفسها ان ما عليها ذنب لو قتلت طفله .. إيمانها كان ضعيف .. ووسوسة الشيطان اثرت عليها كثيير .. راحت للمستشفى ونيتها هي قتلج بس وقتها انقلبت كل الاوضاع .. حصل شيء محد كان يتوقعه ..
بعد جملته الاخيره سكت وهو يرتب الكلمات في راسه ..
بعد شوي كمل: اتجهت لغرفتج بس ما لقتج .. ما لقيت غير ورقه مكتوب عليها بعض كلمات .. واضح انه تهديد .. ناس خطفوج وطلبوا فديه مبلغها كبير وتحت رقم موبايل .. امي هني شافت انه الفرج ياء .. خبت الورقه وبلغت عن اختفائج .. بحثوا بكل مجان من المستشفى وبرى المستشفى .. ظلوا شهور يدوروا عليج بس محد لقاج .. سميه صحيح حزنت بس بعدها شافت ان هذا فرج وراحت لعند سعد وقالت له خلاص انتي اختفيتي وراح ترجع له بس اللي صدمها هو سعد اللي فاجأها بالطلاق .. تدهورت نفسيتها اكثر وحبست روحها بالفله وبعد فتره قتلت جارتها فأضطرت امي انها توديها لمستشفى الطب النفسي ببريطانيا .. مرت سنوات على إختفائج وبعدها طلع لج شهادة وفاة .. ابوج ما اهتم وتزوج سحر وامج بالمستشفى .. اما امي بعد مرور سنوات حست ان هالشيء يثقل على قلبها وقبل جم شهر اعترفت لي بكل شيء .. فاللي اعتقدنا انه صار هو ان اللي خطفوج لما محد اتصل عليهم رموج في اقرب مجان عندهم ولقاج واحد ورباج .. وهذه هي كل القصه ..
عم الصمت عالمكان كله ..
اسيل ملامحها الخارجيه جامده ..
اما بسام فكان سرحان بأفكاره ..
شوي عقد حاجبه ..
زاد إنعقاد حاجبه وهو يقول في نفسه: "فيه حلقه ناقصه .. احس انه فيه شيء ناقص .. فيه شيء بالحكايه مو مقبول" ..
ظل سرحان وافكاره ملخبطه ..
فيه جزء بالقصه مو داخل مخه ابدا ..
ابدا ..
يحسه شيء وهمي .. باهت ..
ليش ..؟! شفيه ..؟!
قطع سرحانه وقوف اسيل ..
طالع فيها وهو يقول: وين رايحه ..؟!
اسيل بهمس: للبيت ..
اندهش من كلامها ووقف يقول: انتي شقاعده تقولين ..؟! لا ما راح تروحين .. انسي امر الشقه خلاص راح تعيشي عندي بعد ما اطلع لج إثبات وجود ..
اتجهت للباب بخطوات هاديه وهي تقول بصوت هامس: ما ابغى ..
وقف قدامها وحط إيده على اكتافها وقال: اسيل .. ارفعي راسج وطالعي فيني ..
رفعت راسها وطالعت فيه ..
هز راسه بلا وهو يقول: ليش ..؟! اصرخي .. ابجي .. لا تشيلين بقلبج وتدعين اللا مبالاه .. ما يصير تصلحي بروحج جذي .. لا تعذبين نفسج .. اعرف ان هذا صعب عليج .. صعب وبقوه .. امج وابوج كل واحد فيهم كان يتمنى موتج عشان سعادته ..
بعدها كمل بهدوء: ويدتج حققت لهم هالامنيه ..
لف إيده على اكتافها وقربها من صدره وهو يقول: فضفضي وقولي كل اللي بقلبج ..
طلعت شهقتها غصب عنها وهي متكيه راسها على كتفه ..
صوته .. وإلتفاف إيده حولها ..
هذا الحنان اللي كانت تتمنى انه يرجع لها ..
نزلت دموعها وارتجف صوتها وهي تقول: اكرههم .. اكرههم ..
بسام في نفسه: "من حقج .. مهما كان هذا ماضي بس ..... بس للأسف لحد الان محد منهم يبغاج .. ولا واحد فيهم .. سميه لحد الآن تطالع فيج على اساس انج الدخيله الثانيه اللي خربت حياتها .. وابوج من اقذر واقذر الاشخاص اللي قابلتهم" ..
ابتسم وقال: من حقج تكرهيهم .. بس ابدا مو من حقج انج تكرهيني صح ..؟!
ما ردت عليه فكمل: مثل ما قال وليد .. لا تحمل العائله كلها ذنب واحد سيء فيها .. عيل مو من حقج انج تكرهيني وتعانديني .. راح تظلي عندي .. الحاله اللي انتي فيها سيئه واكيد ما راح تفكري بشكل صحيح بس لازم ترجعي وتعيشي عندي انا خالج وتسترجعي هويتج ..
شهقت وهي تقول: مابي ... مابي .. مابي اسمي يرتبط فيهم .. مابي اكون من نفس العائله اللي هم فيها .. لازم تفهمني .. كرهت نفسي .. كرهت حياتي .. تشردت بالشارع .. اهانني الصغير والكبير .. ذلني فلان وعلان .. الكل استحقرني .. ناظرني وكأني حشره .. مرات انام من الجوع .. ومرات اصحى وانا تحت اشعة الشمس ....
ارتجف صوتها وهي تكمل: ابغى اموت .. ما ابغى اعيش اكثر .. ما ابغى هالدنيا .. ليش ما ذبحوني .. مو هم يتمنون موتي عيل ليش ما ذبحوني ..؟! ياليت امك لحقت علي وقتلتني .. ياليتها عملت جذي ..
بسام بهدوء: بس .. الكلام اللي تقولينه غلط .. ايه تعذبتي بس تذكري ان الله كان معج طول هالفتره اللي راحت .. ربج معاج لحضه بلحضه وثانيه بثانيه .. هم اللي عملوه فيج راح يتجازوا عليه .. امج دخلت مستشفى الطب النفسي لها اكثر من عشر سنوات .. يدتج صارت مريضه وبالمستشفى وابوج قريب .. قريب راح يتعاقب وينال جزاءه ..
رفعت اسيل راسها المليان بالدموع وقالت: شنو قلت ..؟!
بسام: اي كلام تقصدي ..؟!
اسيل: انت قلت ان امج لها اكثر من عشر سنوات بالمستشفى .. ليه هي حيه ..؟!
سكت لفتره بعدها قال: ايه .. ولحد الآن ما تشافت من مرضها بشكل تام ..
نزلت راسها وظلت ساكته ..
تردد بسام شوي بعدها قال: اسيل .. بخصوص امي اللي هي يدتج .. تراها ندمت على كل اللي سوته وتبي تشوفج ..
ابتسمت وقال: وإيش يفيدني ندمها ..؟! بيرجع لي كرامتي ..؟! ولا إنسانيتي ..؟! ولا راح ينسي الناس حقيقتي ..؟! ولا راح ينسيني الجوع والفقر والذل والاهانه اللي عشتهم ..؟! ما راح يفيدني .. ابد ..
تنهد وقال: اسيل .. اسيل كل الناس يغلطون و....
قاطعته اسيل تقول: ما ألومك لو دافعت عنها لأنها امك .. بس انا عارفه ومتأكده انك عارف حجم الغلط اللي هي سوته ..
رجعت كم خطوه ورى وكملت: طيلت الايام اللي راحت وانا اقول لنفسي اني مستحيل اسامح احد .. ولا احد من عائلة امي وابوي .. ولا احد ..
سكتت شوي وبعدت نظرها عنه وكملت: بس كل مره اتراجع غصب عني .. بالبدايه قابلت اخوي اللي اسمه إياد .. قابلته وبعد ما راح عرفت انه اخوي .. ما قدرت اكرهه مع اني حلفت اني اكره العائله كلها .. ما قدرت اكرهه .. واللحين انت .. كل ما احاول اكرهك ما اقدر .. بس اعذرني .. ما كرهتكم لأنكم مالكم ذنب .. بس اللي لهم ذنب اعذرني لأني ما راح اسامحهم .. ابدا .. امك واختك وزوج اختك واللي اسمها سحر .. ما اقدر اسامحهم فلا تحاول ..
طالع بسام فيها فتره بعدها قال: ما راح اجبرج .. بس اسيل .. انا لازم اطلع لج هويه .. لازم ارجع لج اصلج .. اتمنى انج ما ترفضي ..
هزت راسها بلا وهي تقول: ما ابغى وقد قلت لك اسباب كثيره لرفضي .. ما ابغى اسمي يرتبط بأسمهم .. وغير جذي انا ما راح استفيد شيء إذا رجع لي اصلي .. راح اظل وطول عمري ذيج اللقيطه .. اللقب ما راح ينساه الناس وانا كمان ما راح انساه .. ما راح استفيد .. راح اظل جذي واعيش جذي انتظر موتي عشان ارتاح ..
هز راسه وهو يقول: لا .. تفكيرج مو سليم .. منو بالعالم يتمنى يظل جذي ..؟! اوكي انا معج انو الناس ما راح ينسوا سالفة انج لقيطه .. بس عالأقل راح يعرفوا ان لج عائله تنتمي لها .. يعرفوا ان وراج اهل .. ووقتها راح يعرفوا ان لج اصل ومحد راح يتكلم عن تربيتج .. راح ينعرف عند الناس انج ضعتي من اهلج يعني انتي مو بنت حرام .. اصعب شيء بالحياة إذا كنتي بنت حرام بس انتي مو جذي .. احمدي ربج عن نعمة الإنتماء .. انتي لج عائله ولج شرفج بس غيرج لا .. فيه ناس كثير مصايبهم اعظم من مصيبتج فأشكري ربج على اللي انتي فيه .. اشكريه ..
اسيل: الحمد لله والشكر ..
بسام: إيه جذي .. مهما صار ومهما كان خلي شكر نعمة الله دووم على لسانج .. واللحين .. شرايج نروح نطلع لج إثباتات .. بس ترى السالفه راح تطول كثيير ..
لفت نظرها وطالعت فيه .. وكان واضح عليها انها تبغى تقول شيء بس متردده ..
بسام: شوفي .. ترى من وقت ما دخلتي وانتي بس تطالعين فيني وواضح انج تبين تقولين شيء بس متردده .. عادي تحجي ..؟!
ترددت فتره بعدها قالت: كيف حالك ..؟! اقصد انك بالأمس تأثرت بالنار فكيف صارت حالتك اللحين ..؟!
ابتسم وطالع فيها فتره فحست بالإحراج وقال: اطمئني .. صرت تمام .. كانت آثار سطحيه ..
اسيل: اها ..
مد إيده وهو يقول: ها .. بتروحي معي ..؟!!
ترددت كثيير .. كلامه مقنع بس هي مو قادره تقتنع ..
طالعت فيه شوي بعدها قالت بهدوء: طيب ..
ابتسم ومسك بإيدها وقال: هيا ..

..........................................