شبكة همس الشوق - عرض مشاركة واحدة

21 - 3 - 2014, 01:57 AM

بالليل الساعه بعد 11 ..
وفي المستشفى عند طارق ..
كانت الغرفه مظلمه وهو حاط ساعده على عيونه ويفكر ..
اليوم كلم الدكاتره واستعجل عليهم في مسألة طلوعه ..
والحمد لله بعد عدة جدالات راح يطلع بعد خمس ايام ..
تنهد وهو تفكيره في شهد ..
يبغى يطلع بسرعه عشان يطلعها من عند ذاك المستبد ..
وكل اللي عليه في هالوقت هو انه يدعي لها انها تكون بخير ..
إبتسم لما تذكر زيارة انس له اليوم ..
كان يشتكي من شادن ..
كل ما عملت شيء يوديها عند الجيران عشان ينظفوها ..
صاير محرج وبقوه من الجيران ..
بس هم عادي الوضع عندهم ..
بالعكس يبغوها تقعد عندهم اكثر ..
هم زوجين لهم خمس سنوات وما جاء لهم اي ابن فعشان كذا كان ما عندهم مانع ابد ..
شوي تذكر مهند .. ورزان ..
شصار عليهم ..؟!
وده يعرف اخبارهم ..
واخيرا وصل تفكيره لحد البنت اللي ملكت كل تفكيره ..
الى اسيل ..
تنهد بمراره وهو يتمنى يشوفها ..
يبغى يطلع بسرعه عشان يروح لها ..
هالمره إذا راح لها ما راح يتركها لحد ما يقول لها عن كل مشاعره ..
راح يعتذر للمره الثانيه ..
راح يقول لها عن كل شيء ..
حاول ينسى ويفكر بشيء ثاني لأن التفكير فيها يتعبه كثييير بس ما قدر ..
يحبها .. اكثر من اي شيء ..
وراضي فيها حتى لو كانت بدون اصل بس ...
بس المشكله انها هي مو راضيه فيه ..
مو راضيه ..
شلون يقنعها ..؟!
مو بس يبغاها تسامحه ..
هو يبغاها تكون له كمان ..
بس خايف انها ترفض مره ثانيه ..
شوي تذكر سامي ..
آخخ ذاك الشخص وده يخلص عليه ..
لحد الآن مقهور لأنه ضحك عليه ووتره وخلاه يعتقد ان له علاقه مع اسيل ..
بس اللي اكتشفه انه كان يبغى بس يستفزه .. واسيل كانت تحب آرثر ..
آرثر اللي انتشر خبر موته بالجامعه ..
حاول يوقف تفكيره عشان ينام ..
صار يقطع اغلب الوقت بالنوم لحد ما تخلص فترة وجوده بالمستشفى ..

........................................

في مثل هالوقت وببيت امه ..
كان شادي ووسيم جالسين بالصاله ويتابعون مصارعه ..
شادي بحماس: ايوه بسرعه ثبته ..
وسيم: لا لا بسرعه اطلع يا بانك .. لا تخليه يفوز عليك ..
شادي: لا بسسرعه صلح الحركه القاضيه .. بسرعه يا البطل ..
نزلت ام طارق من الدرج ولما شافتهك قالت: وبعدين وبعدين ..؟! مو انا قلت لكم ناموا ..
شادي بإندماج: اشش لحضه لحضه اللحين بيسويها راندي ..
وسيم بخوف: لا لا لا .. قوم يا بانك قوووم ..
جت الام وطفت التلفزيون فصرخ شادي ووسيم: ليـــــــه ..؟!!
ام طارق: جب .. انا إذا قلت كلمه تنسمع فاهمين ..؟!
شادي بهدوء: إحنا عشاننا ما عندنا اب ولا ام يالسين تتـ....
قاطعته ام طارق: بس .. حركتك ذي صارت قديمه .. غيرها ..
تأفف شادي وقال: عادي باجر راح يعيدونها بالظهر وراح اشوفها ..
وسيم: بأنام وادعي ان سي ام بانك يفوز على راندي اورتن ..
شادي: ههههههآي مستحييييل .. انسى ..
ام طارق: ياللا بسرعه فوق ..
تاففوا اثنينهم وطلعوا لغرفهم ..
اخذت جوالها من فوق التلفزيون واتصلت على سهام فردت سهام: هلا والله بأمي الغاليه ..
الام: سهاموه متى بتيين ان شاء الله ..؟! بسرعه بنت عمتج باجر عندها موعد بالمستشفى ولازم تصحى بدري .. صج انج مزعجه ..
وقفلت الجوال ..
تنهدت سهام وقفلت الجوال وهي تقول: وتستمر المعاناه ..
ضحكت بنت عمتها لمياء وقالت: صدقيني تحبج بس هذول هم الامهات ههههه ..
سهام: ههههههههه تصدقين مره تعبت ووقتها كانت خايفه علي .. استظرفت وقلت ها انتي تحبيني وايد .. بس بعدها ما حسيت إلا بالطراق اللي لفني حول نفسي عشر مرات هههههههه ..
لمياء: هههههههه وقتج غلط ..
سهام: هههه بقوه ..
قامت وقالت: ياللا انا رايحه .. معليش نسيت انج باجر وراج موعد ..
لمياء: يالله بودي تيلسي اكثر بس امج نادتج .. وبخصوص الموعد عادي ماكو مشكله لو نمت متأخر .. تعودت ..
سهام: عيل مع السلامه ..
لمياء: صح نسيت اسألج ..
سهام: وشو ..؟!
لمياء: شصار على بنات خالي عمر .. شهد وشادن ..
سهام: طارق قبل فتره كلمني وقال ان شادن عنده وبعدين بييبها هي وشهد ..
لمياء: ان شاء الله ييوا بسرعه .. ههههه بس غريبه .. مو على اساس انج تضاربتي ويا طارق فشلون اتصل عليج ولا اتصل على امج ..؟!
سهام: ههههههه غصب عنه يتصل علي .. وما يقدر يتصل على امي لأنها زعلانه عليه ..
لمياء بإستغراب: ليه ..؟!
سهام: زعلانه عشان سالفة البنت اللي اسمها اسيل ..
هزت لمياء راسها بلا وهي تقول: حرام عليكم خلوه يصلح اللي هو يبغاه .. اللقيطه تراها انسانه مثلنا .. وكلامه صح .. كلام الناس ما يهم واللي يمشي وراهم ما راح يرتاح ..
سهام: انا لحد الآن مستغربه .. لو انا بمجانج جان كرهتها هالاسيل ..
لمياء: وليه اكرهها ..؟! انتم بس ماخذين الامر بحساسيه زياده عن اللزوم .. هو ما قال انه بيتزوجني ولا شيء عشان تتوقعي اني بأزعل إذا حب له وحده ثانيه .. عادي كل واحد بالدنيا ياخذ نصيبه ..
سهام: امممم انتي طيبه وايد عكسي .. حتى طارق بنفسه قال انج وحده عاقله وبتفهمي ..
لمياء: هههههه اوووه من قدي .. طارق مدحني .. يا شيخه لما تسمعي ولد يمدحج تحسي انه احلى من لما بنت تمدحج ..
سهام: هههههههههههههههههههههه فعلا لأننا تعودنا على مدح البنات بس مدح الاولاد نادر وعشان جذي نحسه مميز ..
لمياء: هههههه ياللا واللحين روحي لا تزعل خالتي وتاخذ بخاطرها ..
سهام: اوكي مع السلامه ..
لمياء: مع السلامه وسلميلي على اثير والكتاكيت الاثنين ..
سهام: هههههه والله احبهم .. يونسوني ..
بعدها طلعت واتجهت للبيت اللي ما يفصل بينهم إلا جدار ..
فتحت باب البيت وقالت: اسيل .. بالبدايه كنت كارهه فكرة ان طارق يتزوجها عشان لمياء .. بس فعلا كلام لمياء صحيح .. عيل ما راح استفيد إذا كرهتها ..
صعدت لغرفتها ودخلت ..
ابتسمت لما شافت ان اثير لساتها صاحيه ..
نزلت وجابت اشياء من المطبخ عشان تكمل السهره معاها ..

========================================

المغرب وعند فارس ..
كان جالس على احد الكراسي المنتشره وواضح انه مهموم ..
جلست جنبه ام غيدا وحطت إيدها على كتفه وقالت: خلاص حبيبي إذكر ربك وادع لها بالشفاء .. قدر الله وما شاء فعل ..
هز فارس راسه بهدوء من دون لا يرد عليها ..
تنهدت وطالعت في ولدها معاذ وكأنها تقوله قول شيء ..
تردد معاذ لانه مو عارف وش يقوله او كيف يخفف عنه ..
تقدم عند فارس وقال: فارس خلاص انت لازم ترجع البيت .. ما يصير من امس وانت هني وما نمت .. ربك قدر فأدعي لها بالشفاء لعل الله يستجيب دعوتك .. فيه كثييير ناس مرضوا بنفس المرض والحمد لله هم اللحين عايشين وباحسن صحه ..
ابتسم فارس بألم وهو يقول: هذا اسمه سرطان .. منو هم اللي شفوا منه ..؟! ناس ما ينعدوا عالاصابع .. مو قادر اصدق .. هي اللي بقيت لي .. مالي غيرها ..
ام غيدا: بس يا حبيبي سرطان عن سرطان يفرق .. احمد ربك واشكره ان السرطان اللي عند امك سرطان حميد مو خبيث .. العلاج بإذن الله موجود و .....
قاطعها فارس بهدوء: إيه موجود علاج .. وعلاج راح يشفيها بإذن الله .. بس بشرط ان كان مجان الورم مو بمجان حساس .. وورم امي بمجان حساس يا خاله .. يعني الجراحه نسبة نجاحها ضعيفه وايد ..
تنهدت ام غيدا وما عرفت وش تقول ..
بعد شوي قال فارس بألم: كانت دايم تعبانه ومصدعه واطرافها مخدره .. ليه ما اصريت اني اوديها للمستشفى قبل لا يكبر الورم .. ليييه ..؟! ابوي مات بسببي .. واللحين امي بتموت بسببي كمان ..
معاذ: لا لا يا فارس .. استهدي بالله .. لا تكون ضعيف جذي .. لا تخلي الشيطان يأثر عليك بوساوسه .. مرضها صعب بس لله القدره على كل شيء .. قوي ايمانك بالله ..
سكت فارس لفتره بعدها قال: لا إله إلا الله ..
ام غيدا: واللحين لازم ترجع البيت وتريح شوي .. من امس وانت بالمستشفى الله يهديك ..
هز راسه بلا وهو يقول: ما راح اترك امي .. ما اقدر ارجع لبيت مافيه حس لأي احد من اهلي ..
طالعت ام غيدا فيه بحزن بعدها قالت: طيب عالاقل روح ريح حالك شوي وبعدها تعال هني .. لجسدك عليك حق .. لازم ترتاح ..
تنهد فارس وقام وقال: مشكوره يا خاله تعبتج وياي كثييير ..
ام غيدا: لا لا هذا حق الجار على جاره .. ما سويت شيء .. وياللا خلنا نرجع ..
فخرجوا من المستشفى ..
راحت ام غيدا مع ولدها وفارس ركب السياره واتجه للبيت ..
بعد ما وصل راح للباب وفتحه بالمفتاح اللي معاه ..
دخل وجلس على اقرب كنبه وهو يطالع في البيت اللي صار .. فارغ ..
تعوذ من ابليس وقام وطلع فوق لغرفته ..
فتح باب الغرفه وظل واقف يطالع فيها بإستغراب ..
شوي تحول الإستغراب إلى صدمه لأنه واضح ان الغرفه تفتشت قبل مده مو طويله ..
بس شلون ومين فتشها وليش ومتى ..؟!
فتح دولابه بسرعه وشاف شنطة اللاب موجوده وشاف محفضته كمان موجوده ..
إذا اللي فتش البيت ما كان يبغى يسرق ..
طلع من غرفته وراح لغرفة امه وبرضه فيه شوية اغراض مو بمكانها ..
فتح درجها وشاف ان علبة ذهبها موجوده ..
تلخبط وتشوش تفكيره ..
يسمع عن اقتحام المنازل كثيير بس ما توقع انه بيوم من الايام راح يواجه نفس السالفه ..
طلع وراح لغرفة فيصل وفتح الباب ..
هني انصدم وبقوه ..
كانت الغرفه معفوسه فووق حدر والاغراض متناثره في كل مكان ..
وبوسط كل هذا كان فيه رجال جالس قدام درج يفتش فيه ..
لف الرجال بحركه حاده اول ما انفتح الباب وانصدم لما شاف فارس ..
رجع فارس خطوه ورى فطلع هالرجال الملثم بالشماغ سكين من جيبه وقال: آشش خلك واقف مجانك لأخلص عليك ..
ارتعب فارس ..
هذه اول مره يواجه موقف مثل كذا بحياته ..
تقدم الرجال من وقال: انت اكيد اخو فيصل .. الاوراق المهمه الخاصه بشغله وين يحطها ..؟! ياوب ..
فتح فمه وقال: انا .. انا مب فاهم شتقصد ..؟!
الرجال بحده: اخوك فيصل وين يحط الاوراق الخاصه بشغله .. الكلام واضح فلا تضيع الوقت ..
لف فارس عيونه بالمكان وقال: و .. وليش تسأل ..؟!
تقدم الرجال من فارس اكثر والشر يطلع من عيونه وقال: جب وياوب ..
بصراحه خاف فارس منه ..
حرامي ومسلح وواضح انه ما عنده مشكله لو قتل احد ..
فقال: بغرفته ..
الرجال بعصبيه: جذاب .. مالقيت شيء لا في غرفته ولا في البيت كله .. بسرعه ياوب قبل اتهور واذبحك ..
فارس: انا ما جذبت .. واتمنى تطلع لأن اللي انت تسويه راح يوديك السجن اكيد ..
هز الرجال راسه وهو يقول: لا انا مو ساذج مثل اخوك عشان الحقه للسجن .. هذه اخر فرصه .. وين الاوراق ..؟!
انصدم فارس من كلامه وقال بخوف: سجن ..؟!!! انت عن ايش تتكلم ..؟!! شلون سجن ..؟!
في هالوقت اندق جرس البيت فأسرع الرجال ودف فارس عن طريقه ونزل وهرب من الباب الخلفي للمطبخ ..
جلس فارس وهو ماسك كتفه بألم بس ما كان حاس فيه لأن تفكيره في اخوه فيصل ..
السجن ..؟!!
فيصل راح السجن ..!!!
ظل فتره جالس على حاله بعدها قال بهمس: مو غريبه .. مو هو اصلا يهرب اسلحه ومخدرات .. هذا شيء طبيعي ..
وكمل بهمس اكثر: شيء طبيعي ..
عض على شفته بألم ..
عائلتهم قاعده تتدمر ..
تتحطم ..
اهله قاعدين يبعدون عنه واحد ورى الثاني ..
صاير يتوقع انه في نهاية المطاف راح يعيش لوحده ..
قطع تفكيره صوت الجرس المتكرر ..
قام من مكانه وقفل غرفة فيصل ونزل تحت ..
فتح الباب فقالت ام غيدا بخوف: شفيك تأخرت ..؟! خوفتني عليك ..
فارس: ماكو شيء .. لا تشيلي هم ..
ام غيدا: ان شاء الله .. اسمع .. بعد ما تبدل هدومك وتنام .. لا تنسى لما تصحى تيي لعندنا تتعشى ..
فارس: لا يا خاله مو لازم .. انا راح اكل لي اي شيء ..
ام غيدا: مو بكيفك .. احنا ييران وهذا هو حق اليار على ياره .. راح ننتظر الساعه تسع ونص ..
استسلم فارس يقول: طيب .. تامرين امر ..
ابتسمت وقالت: ها تبغى شيء ..؟!
فارس: لا مشكوره ما قصرتي ..
ام غيدا: عيل إذا احتجت شيء قولي ولا تستحي .. مع السلامه ..
فارس: مع السلامه ..
قفل الباب بعدها وقف يطالع في البيت ..
راح للمطبخ وشاف ان القفل الخارجي للباب الخارجي مكسور ..
قفل الباب واسند وراه شيء ثقيل وقال: اكيد هم من جماعة فيصل .. اتمنى ما عاد ييوا مره ثانيه ..
طلع لفوق بعدها دخل غرفة فيصل وفتح الدولاب اللي شاف فيه الاوراق قبل ..
بس انصدم لما ما لقى لها اثر ..
ليش ..؟!
اذا كانوا هالجماعه ما اخذوها إذا مين اخذها ..؟!
ما طول بالتفكير كثير لأن جسمه مرهق جدا ..
قفل الباب وراح لغرفته ينام ..

========================================

اليوم اللي بعده وبالظهر ..
كانت جالسه وتهز نفسها ودموعها على خدها ..
غطت وجهها بإيدها وبكت ..
كيف ما تبكي وهي هالايام تعيش لحضات اسوأ من الكابوس نفسه ..
ولدها ..
قطعه منها راح يموت ..
وعلى إيد زوجها حبيبها وروحها ..
التفتت ناحيته وقالت بصوت باكي: Jack Please, do not do this .. it's very dangerous .. my son will die inevitably << جاك ارجوك لا تفعل هذا .. انه خطير جدا .. سوف يموت ابني لا محاله << ..
طالع جاك فيها وقال بحده: Seley is enough .. I will not be relieved until that child dies .. it's only a matter of time and comes back from his trip and after that will be sent to hell << سيلي هذا يكفي .. لن ارتاح حتى يموت ذاك الطفل .. انها فقط مسألة وقت ويعود من سفره ذاك وبعدها سأرسله إلى الجحيم << ..
قامت وراحت عند زوجها ومسكت إيده وقالت برجاء: Jackie darling .. that you really love me Forget him .. let him live in peace Please << جاكي حبيبي .. ان كنت تحبني حقا فإنسى امره .. دعه يعيش بسلام ارجوك << ..
مسك وجهها بين ايده وقال: Yes, I love you .. you are spiritual, sun and my life and this will not allow a stranger to share my love .. will finish his order and then live in peace with our Tolar daughter and her little girl Flora beauties << اجل احبك .. انتي روحي وشمسي ودنيتي ولهذا لن اسمح لأحد غريب ان يشاركني بحبك .. سوف ننتهي من امره ومن ثم نعيش بسلام مع ابنتنا تولار وصغيرتها الجميله فلورا << ..
تقوست شفتها فقال: Ashh do not cry .. believe me .. we're going to live a happy life after the finish of that child's life .. let's smile << شش لا تبكي .. صدقيني اننا سوف نعيش حياة سعيدة بعد ما ننتهي من حياة ذاك الصغير .. هيا ابتسمي << ..
وبعدها قام ودخل لغرفته ..
شهقت وحطت إيدها على فمها وكأنها تمنع نفسها من البكي ..
تحبهم اثنينهم ومو قادره تفرط بأي واحد فيهم ..
ولا واحد ..

≤♦ انتہــــــــــــى ♦≥

لہنا نوصل لنہاية البارت العشرون الجزء الاول ..
هالمره مافيہ قفلہ تقہر .. بس اوعدكم ان البارت الجاي احط قفلتين مب وحده ..
ادري اني لئيمہ ههههههههههہ ..

توقعاتكم وآرائكم ..
هالبارت اقصر بشوي من اللي قبلہ بس احداثہ اقوى صح ..؟!
ياللا اشوفككم الخميس الجاي بإذن المولى ..
اختككم / l.. 9ờỜờ9ǎ

|$[ نهاية البآرت ]$|