شبكة همس الشوق - عرض مشاركة واحدة

21 - 3 - 2014, 01:59 AM

|$[ البآرت العشرون الجزء الثاني ]$|

مع بداية يوم دراسي جديد ..
كان شايل شنطته بإهمال وعلى وجهه علامات الطفش والملل ..
وصل للشله وقال وهو يجلس: السلام عليكم ..
ضحك صاحبه وهو يقول: ههههههههههههه ما ودي اتشمت يا ريان .. ها ليش ما غبت مثل ما قلت لنا ..؟!
ريان: هالمره مو بس امي .. حتى ابوي غصبوني اروح .. يقولون ما عندنا شيء اسمه اجازه للراحه .. يا جماعه صاير لي اسبوعين ورى بعض ادرس فليش ما يعطوني اجازه ..؟!
عدل صالح نظارته وقال: وإجازة الويك آند ما تكفي ..؟!
ريان: مالها متعه .. المتعه الحقيقيه انك تغيب في يوم دراسي .. واااو والله حماس ..
يزيد: هههههههههههه خلاص شكله بدأوا يشدوا عليك ..
ريان: لا يارب ..
عماد: ما علينا المهم ترى سامي ودانا شكلهم ما راح ييوا هالاسبوع ..
عماد: وحشونا المعفنين ..
ريان: الاهم ان صحتها تحسنت وان شاء الله يظل جسمها جذي متقبل للكبد اليديده ..
يزيد: اوووه الله يعين سامي لما يرجع .. عليه دروس كثييره وانا اعرفه ما يحب شيء يتراكم عليه ..
جاء عندهم طالب في هالوقت وقال: هيه ..
لفوا عليه فكمل: الدكتور تركي يبغاكم بمكتبه ..
استغربوا وبعدها لفوا يطالعون في عماد ..
عماد بدفاع: والله ما سويت شيء ..
ريان: عيل ليش يبغانا الدكتور تركي ..؟!
عماد: وانا شدراني ..؟!
يزيد: تفائلوا بالخير .. يمكن يبغانا نساعده بشغله ..
صالح: وليش يطلب الشغله من طلاب مو طلابه ..؟! شكله جدامنا مشكله ..
قام ريان وقال: خلونا نروح ونشوف ..
عماد: اوكي ..
قاموا واتجهوا لمكتب الدكتور تركي وهم يتسائلون عن السبب ..
دق ريان الباب ودخل ..
رفع الدكتور راسه ولما شافهم قال: اهلا .. اهلا بحبايبي المؤدبين .. ادخلوا وقفلوا الباب وراكم ..
طالعوا ببعض بعدها دخلوا وقفلوا الباب وراهم ..
د.تركي: خلوكم واقفين لحد ما اخلص الشغل اللي بإيدي ..
عماد: طيب ليش ..؟!
د.تركي: اشش ..
وبدأ يكمل شغله ..
بعد دقيقه ..
يزيد: يا دكتور تعبنا ..
د.تركي: ......................
بعد دقيقتين ..
عماد: دكتور ريلي تعورني ..
د.تركي: ......................
بعد ثلاث دقايق ..
ريان: محاضرتنا شوي وبتبدأ ..
د.تركي: ......................
صالح: دكتور إحنا شنو ساوينا ..؟!
رفع الدكتور راسه عن الاوراق وقال: ما ساويتم شيء ..
عماد: عيل ليه ناديتنا ..؟!
لم الدكتور الاوراق وطالع فيهم واحد واحد وقال: يعني تصلحوا روحكم ما تعرفوا ..
استغربوا من كلامه ..
هم متأكدين انهم ما صلحوا شيء ..
شوي قال يزيد بهمس لعماد: لا يكون يقصد زوجتك المستقبليه ..؟!
عماد بنفس الهمس: هو شدخله فيها ..؟!
يزيد: عشانك يبتها للجامعه مع انها مو طالبه فيها ..
عماد: لا لا لا ما اتوقع ..
د.تركي: على شنو تتهامسون ..؟!
يزيد+عماد: لا لا ماكو شيء ماكو شيء ..
ريان: يا دكتور ترى مخنا فر من الوسوسه .. إحنا شنو ساوينا ..؟!
د.تركي: قلت لكم ما ساويتم شيء .. شفيكم مصرين ان السالفه هي عقاب لشغله ساويتوها ..؟! لا يكون فعلا صلحتم شيء مو كويس ..
الشله بوقت واحد: لا لا لا لا لا ..
طالع فيهم بنص عين فقال ريان: يا دكتور وربي ما ساوينا شيء ..
د.تركي: انت اسكت .. دايم تصلح المصايب وتنكر ..
طالع ريان فيه بيأس ..
مستحيل تتغير نظرة الدكتور إتجاهه ..
طالع في اصحابه بحقد ..
هم السبب ..
ابتسموا اصحابه ببلاهه فقال الدكتور: ليه ما تياوبون على سؤالي ..؟!
يزيد: يا دكتور والله ما صلحنا اي مصيبه ..
د.تركي: اوكي بأحاول اصدقكم .. واللحين سمعت ان سامي مسافر ..
صالح: ايه .. سفره ضروريه ..
د.تركي: طيب وصاحبكم نفيع ..؟!
عماد: شفيه ..؟!
د.تركي: انا اعطيته مهلة اسبوع وبعدين يرجع اخوه عادل يدرس .. بس للأسف مر اسبوع واكثر وما رجع .. ايش السبب ..؟!
طالع فيهم وكمل: تساهلت معكم وعملت حالي ما ادري عن شيء على اساس انكم راح تنهوا المسأله في اسبوع بس ما صار ولا شيء .. اعطيتكم مهله اكبر بس ماكو فايده .. وين عادل ما رجع للدراسه ..؟!
طالعوا في بعض وهم مو عارفين وش يقولون ..
بعدها لفوا كلهم يطالعون بريان وكأنهم يقولوا تصرف ..
طالع فيهم ريان بإستنكار فقال الدكتور: متى بتتحجون ..؟!
بلع ريان ريقه بعدها قال: انا بأقولك ..
د.تركي: اخاف يطلع حجيك جذب زي ما عودتني ..
الشله: ههههههههههههههههههههههههههههههه ..
طالع ريان فيهم بحده فسكتوا ..
د.تركي: اوكي تحجى يمكن تكون توبت من الجذب ..
تنهد ريان بإحباط بعدها قال: عادل مسافر ..
د.تركي: وليش ..؟!
ريان: زي ما قلنا لك انه مشلول فسافر مع سامي لأنه طلع برى فيه علاج لشلله .. اما نفيع فخاف من تهديدك وما صار يي للجامعه تلبية لطلبك .. وبس ..
صفقوا اصحابه له .. عرف يحبكها ..
د.تركي: اللحين ليه التصفيق ..؟!
عماد: لا بس نشجعه وجذي ..
د.تركي: بس بس انا مو ناقص سماجتكم ..
يزيد: شكرا على الإهانه ..
طالع الدكتور في ريان وقال: متأكد من حجيك ..؟!
ريان: طبعا ..
د.تركي: اوكي اول ما يرجع راح اطالع في اوراق علاجه وانت بتتحمل المسؤوليه لو كنت جذاب ..
تورط ريان وقال بسرعه: واصحابي ما راح يتحملوا بعد ..؟!!
د.تركي: انت اللي تكلمت وانت اللي بتتحمل نتيجة حجيك ..
طالع في اصحابه بقهر ..
ليه دايم كل شيء على راسه ..؟!
لو انه غاب اليوم لكان احسن ..
عماد: خلاص يا دكتور نروح ولا باجي ..؟!
د.تركي: انقلعوا .. ويا ويلكم تعملوا مشاكل مالها داعي ..
يزيد: حاضر ..
وطلعوا من عنده ..
تنهد وقال: إن شاء الله يطلع حجيهم صج عشان نخلص ..
طلع له اوراق ثانيه من الدرج وبدأ يشتغل عليها ..
انفتح الباب ودخل طالب وقال: دكتور دكتور ..
د.تركي: نعم شفيك ..؟!
الطالب: إلحق فيه بنات يتهاوشون بالكافتيريا ..
انزعج الدكتور وقال: والطلاب مشاكلهم ما تخلص ..
طلع من المكتب واتجهه للكافتيريا ..
اللي مزعجه بالامر ان الطلاب ما يروحون للمشرف او الوكيل يشتكون ..
لا يجون عنده وكأنه مصلح اجتماعي مو دكتور ..

قبل نص ساعه تقريبا ..
كانت ندى ولين ووسن متجهين للكافتيريا عشان يقابلوا سارا وليان هناك ..
وسن: تيب واللي ما يعرف شنو يساوي ..؟!
لين: اقول .. روحي موتي .. ماكو شيء تعرفين له بالعالم ..
بوزت وسن وقالت: اسكتي .. انا سألت ندى مو انتي ..
ندى: طيب اسمعي .. تعالي اليوم عندي بالبيت وانا اعلمج .. راح تتعلمي بسهوله لأنه وايد سهل ..
وسن: اوكي ..
لين: بسهوله ..؟!!! اتحدى ههههههه ..
ندى: لين وبعدين معاج ..؟!
لين: هههههههههه اوكي بأسكت هههه ..
دخلوا للكافتيريا واتجهوا للطاوله اللي فيها سارا وليان ..
جلست لين وقالت: فاتكم نكته من نكت وسن ..
سارا: وشو ..؟!
وسن: غبيه ..
لين: هههههههههه الدكتور قالنا نعمل بحث بالسي دي .. وعشان نعمله لازم نحمل تطبيق عاللاب .. ههههههههه وسن ما تعرف شلون تحمل هههههه ..
سارا: ههههههههههههههههه ..
ليان: سامجه .. فيه ناس كثيير ما عندهم خبره في الاجهزه والانترنت ..
لين: اعرف .. بس هي دلوعة ابوها وعايشه لوحدها المفروض تكون عارفه هالاشياء ..
وسن: وانا شاللي يدريني ..؟! ما احب ايلس عالكومبيوتر .. دايم ألعب بموبايلي او اطالع بالتلفزيون ..
لين: البنت تطورت .. كانت تقول اتالع واللحين صارت تقول اطالع .. عقبال تيب وسرسور هههههههههههههه ..
سارا: ههههههههههههههههه اه يا بطني ..
وسن: مره سامجات ..
لين: ههههههه تتذكرون اول ما يات .. سألتنا وش يعني سامجات .. اقولكم البنت في مرحلة التطور ..
ندى: بس يا لين .. لا تضايقين البنت بكل تصرف تسويه ..
لين: هههههههههههههه اوكي اوكي ..
ليان: اسمعوني .. ترى هالايام احس بملل مب طبيعي ..
سارا: ايه والله .. طفش في طفش ..
ليان: عشان جذي ودي نتفق نطلع لأي مجان في اي يوم ..
وسن: وناسه .. وين بنطلع ..؟!
ليان: مدري اي مجان ونتصل على اسيل عشان نتقابل كلنا ..
لين: وقسم حماس .. خلاص نتصل عليها ونشوف وين تبغانا نطلع ونتجمع هناك ..
ندى: حلو وان شاء الله ترد هالمره لأنها نادر ترد ..
سارا: ان شاء الله ..
وسن: إيه بنات على طاري اسيل نسيت اقولكم حاجه ..
ندى: وشهي ..؟!
وسن: اليوم شفت بسام بس ما قدرت اكلمه لأنه كان يتكلم مع دكتور ..
لين بنص عين: هذا هو الشيء اللي تبغيه تقوليه ..
وسن: بأطنشج .. المهم بغيت اسأله عن اسيل لأنه اول قالي انه راح يساعدها .. اذا شفتوه علموني ..
ندى: اوكي .. واللحين دور مين تييب لنا طلباتنا من الكافتيريا ..؟! ترى يوعانه ..
ليان: دور لين ..
لين: بطني يعورني ما اقدر ..
سارا: عذرج هذا حفضناه صم ..
لين: اووف طيب هات وش تبغون ..؟!
كل وحده اعطتها فلوسها وقالت طلبها ..
وبعدها راحت لين تشتري فقالت وسن: حرام تشيل كل هذا وحدها .. تعب ..
سارا: ههههههههه عيل روحي ساعديها ..
قامت وسن وقالت: تيب ..
وراحت فقالت سارا: هذي من يدها .. لو انا ما رحت ..
ندى: البنت حساسه وحست بتعب لين فقالت انها بتساعدها وش فيها ..
سارا: لا ابد مافيها شيء بس مستحيل اتعب نفسي بيوم مو يومي ..
ليان: ههههههههههههه هذا لأنج ....... ولا حرام مابي اكمل ..
سارا بنص عين: وش بغيتي تقولين ..؟!
ليان: ههههههههههه خلاص بطلت ..
تذكرت سارا شيء فصرخت تقول: لا بنـــــــات ..
ندى: بسم الله شفيج ..؟!
ظهر الحزن على وجهها وقالت: مات ..
انصدموا من كلامها وقالت ليان: منو اللي مات وشلون ..؟!
سارا: كان رايح من ورى اصحابه وتهاوش مع شله ولما رجع صدمته سياره ومات قدام عيون اصحابه .. والله حرام ليش جذي وقسم بكيت معهم ..
ندى: آح حرام .. بس منو ذا ..؟!
سارا: بطل المسلسل الكوري .. اللي يقهر انه مات بنهاية الحلقه الثانيه .. وقسم انه اطلق شخصيه ومره تعجبني .. قهروني الجلاب ليش موتوه جذي ..
ليان+ندى: ؟؟؟؟؟؟؟؟؟!
لفت ليان على ندى وقالت: هل يجوز قتلها شرعا ..؟!
ندى: دوري عالحكم واذا يجوز ناديني اساعدج ..
سارا ببرائه: شفيكم ..؟!

وعند مدخل الكافتيريا ..
كانت غيدا داخله وفاتحه محفضتها تطلع الفلوس وهي تقول: مابي .. ولا عاد تفتحي الموضوع معي مره ثانيه ..
تنهدت تهاني وقالت: بس والله ما يرضيني اشوف الشله مفككه جذي .. غدير اليوم غايبه وهذا مو من عوايدها وخلود نفسيتها اليوم زفت .. بالله تعالي وتحجي معاها .. نبغى نرجع اصحاب مثل قبل ..
اتجهت غيدا لشباك الكافتيريا وهي تقول: انا عارفه خلود شلون بترضى بس انا خلاص مستحيل ارجع وحده ملعونه .. اذا تبغيها فروحي عندها بس ترى انصحج انج تتركي هالتشبه لأنه ما راح يفيدج ..
تهاني: ما عندي مشكله اتركه بس راح يزعلون باجي الشله ..
غيدا: عيل خلي رضاهم يفيدج بآخرتج ..
لما قربت من الشباك صقعت بوسن اللي كانت محمله الوجبات بإيدها فطاحت كلها ..
التفتت غيدا بتعتذر بس سبقتها وسن تقول: هيييه خبله ما تشوفي ..
لما شافتها غيدا قالت بلعانه: احسن .. هيا لميهم يا ماما ..
عصبت وسن وكانت بترد بس سبقتها لين تقول بعصبيه: غيداؤؤه وويع .. انتي الغلطانه وانتي اللي لازم ترفعيهم ..
غيدا: عشتو .. هذا اللي كان ناقص .. اقول طيروا بس ..
لفت عالشباك بس مسكتها لين من كتفها ولفتها بحده وقالت: وين رايحه حبيبتي .. ماما وبابا ما علموج انج إذا غلطتي تعتذري ..؟!
غيدا: لئه .. ماماتي وباباتي ما علموني .. ممكن تعلميني يا ابله ..؟!
عصبت لين من اسلوبها المستفز فقالت وسن: لين خلاص طنشيها .. هي غبيه وسخيفه .. وخلاص انا لميت الاغراض ..
غيدا: شطوره حبيبتي .. ها يا قلبو لين .. سمعتي شنو قالت رفيجتج المدلعه ..؟! واللحين ممكن تبعدي لأني ابي اشتري وغير جذي انتي عامله فوضى هنا والطلاب ورانا يستنونا نخلص عشان يشتروا ..
لين بحده: صدق المثل اللي قال ان الرد على السفيه مذله .. انا اللي غلطانه لأني رديت على سفيهه مثلج ..
غيدا: محد سفيه هني غيرج فألتزمي حدودج واعرفي مع منو تتحجين ..
لين بإستهزاء: ليه منو تكونين يا حضي ..؟! وحده من اعضاء البرلمان ولا ولية العهد ..!!
غيدا: ها ها ها ترى مره سامجه .. محد ضحك ..
لين: ما طلبت ضحكج اللي يلوع الجبد .. خليج ساكته ابرك لج ولنا ..
تهاني: غيدا خلاص خلينا نروح ..
غيدا: طيب كلمي ذي اللي واقفه بطريجي .. مسويه قلق هني ..
لين: صج انج وحده تافهه .. تعالي يا وسن ..
وسن: اسمي كارلوتا ..
لين: اوووووه مو ناقصتج انتي بعد ..
ولما كانت بتروح مدت غيدا رجلها فترنحت لين وكانت بتطيح بس تماسكت باخر لحضه ..
لفت بعصبيه ناحية غيدا فشافتها تطالع بالجهه الثانيه وتصفر ..
لين بعصبيه: انتي شفيج بالضبط ..؟! مصخنه ولا مينونه ..؟! ردي يالجلبه ..
لفت غيدا عليها وقالت: انا حره عشان المره اليايه تحترمين نفسج وتعرفين انتي مع منو تتحجين .. اولا انا اكبر منج .. ثانيا فيه فرق شاسع بينج وبيني يا عيون ماماتها ..
لين: انتي شكلج تبين تقلبيها هواش صح ..؟!
غيدا: اعترف اني من هالنوع بس اليوم نفسيتي زفت وما ابي .. فتقلعي عن ويهي ..
عصبت لين اكثر ومدت ايدها ودعست باقوى ما عندها على رجل غيدا وهي تقول: اوككي بأتقلع ..
غيدا: آآآي يالججلبه .. قسم انج حقيره .. تعالي هني اعلمج حدودج ..
لفت لين عليها وقالت: تعلميني شنو ..؟! عيدي بالله ما سمعت .. انا اعرف حدودي عدل .. ومستعده كمان اعلمج يالفاشله ..ق
د.تركي بعصبيه: غيـــــــدا ليـــــــن ..!!
لفوا الكل وشافوا الدكتور تركي واقف وواضح على وجهه العصبيه ..
طالع فيهم وكمل: خلاص .. صاروا المشكلجين بالجامعه معروفين .. ما اتوقع انه باجي احد ما يعرف ويوهكم .. اللحين انتم مبسوطين من العمايل اللي تسوها .. عمايل تسود الويه .. خساره انكم من طلابي .. لو احد سألني عنكم راح اتبرى ..
وسن: دكتور معليش سامحهم .. هما ما كانوا يقصدوا .. بس عشان .....
د.تركي: ما ابغى اسمع مبررات .. مهما كان السبب فرفع الصوت والشتم الوقح والصراخ ماله مبرر .. كان الوضع راح يزيد للهواش لو ما ييت صح يا محترمات ..؟! خساره فيكم اسم بنات ..
طالع فيهم لفتره بعدها قال: اعرف اني غلطت لأني يالس اهاوشكم جدام الكل بس تستاهلوا .. لعل هذا يكون سبب في هدايتكم مع ان الامل مفقود تماما وخاصتا فيج يا غيدا ..
غيدا: دكتور لا تحدد احد .. هاوش بصفه جماعيه ..
رفع الدكتور حاجبه وقال: يعني ما عندج مشكله تتهاوشي ..؟!
لين: اصلا وحده مثلها ما عندها ..
غيدا: عدال انتي المفعمه بالاحاسيس والمشاعر ..
لين: جب .. لا تفتحي فمج قبل لا ....
د.تركي: لا حلفت عليكم تتهاوشوا جدامي .. ما عليكم راح اكون الحكم وراح احكم بعدل ..
ضحكوا الطلاب كلهم على كلامه فقالت لين: معليش اسفه ..
لف طالع في غيدا فقالت: سوري وان شاء الله ما تنعاد ..
د.تركي: اتمنى يكون حجيكم صج .. ترى انا متساهل وياكم بزياده .. المره اليايه راح اكون شديد فحطوا هذا ببالكم ..
وسن: شكرا دكتور .. والله انك طيب مررآ .. احبك ..
تنهد الدكتور .. كلام هالبنت غصبا عنه يخليه يهدأ وتهدأ اعصابه ..
طالع فيهم شوي بعدها لف وراح ..
لفت وسن على لين وقالت: حلو الدكتور ما سوى لكم شيء ..
تبادلت لين وغيدا النضرات الشرسه وبعدها تفرقوا ..
جلست لين عالكرسي وهي تقول: حقيره ..
ندى بعصبيه: تستاهلي وياليته عاقبج .. انتي ابد ما تتوبين ..
لين: الآدميه هذي تقهر ومستحيل اسكت لها ..
ليان: بس المفروض تمسكي نفسج .. شكلج ما راح تتوبي إلا لما تنفصلي ويطردوج ..
لين: عادي بروح ادرس عند اسيل ..
طالعوا الشله فيها بإحباط ..
مافي فايده من الكلام معها ..
ابدا مافي فايده ..