شبكة همس الشوق - عرض مشاركة واحدة

21 - 3 - 2014, 02:02 AM

في مكان آخر ..
وعند اسيل .. كانت جالسه بالمحاضره وتطالع بالدكتوره بسرحان ..
تفكيرها كله مشغول بالايام اللي فاتت ..
مقابلتها مع رؤى .. كلام بسام .. روحتهم للمحكمه ..
كل هالاشياء شاغله تفكيرها عن المحاضره وخلتها مو مركزه ابدا ..
دقتها صبى وقالت بهمس: اسيل ركزي شفيج ..؟!
اسيل بهدوء: ماكو شيء ..
طالعت صبى فيها فتره وهي تتذكر كلامها ..
بنت سعد الراهي ..
تنهدت ولفت تطالع في الدكتوره ..
حطت اسيل خدها على ايدها تطالع في الدكتوره وهي تتذكر كلام المحكمه ..
بسام كان عنده بعض الاثباتات فكان لازم يكون هناك اثباتات اكثر ..
والموعد الجاي راح يستدعون ابوها ..
راح تشوف ابوها للمره الثانيه ..
وتسمع صوته للمره الثالثه ..
كلمت بسام وطلبت منه انها ما تروح فقال انه بيحاول ..
هي ما تبغى تقابل شخص فضل وحده غريبه على بنته .. على نطفه منه ..
شخص ما نزل دمعه وحده على فراقها ..
شخص كان يتمنى انها تموت اليوم قبل بكره ..
قطع تفكيرها صراخ الدكتوره على احد الطلاب المشكلجين ..
تنهدت وابتسمت لما تذكرت جامعتها القديمه ..
ندى ولين ووسن وليان وسارا ..
دكتور تركي ودكتوره شاديه ..... الخ ..
غيدا وشلتها .. سامي وشلته .. طارق وشلته ..
اختفت إبتسامتها لما تذكرت آرثر ..
رجعت لها الابتسامه وقالت في نفسها: "الله يرحمك .. كنت شيء جميل بحياتي .. كنت وراح تظل شخص جميل وما ينسى .. الله يرحمك" ..
اختفت ابتسامتها مره ثانيه لما تذكرت راشد وشلته ..
ارعب شخصيه بالجامعه وبحياتها ..
هو الوحيد اللي ما تتمنى تشوفه ..
بس .. بس بصراحه اشتاقت تشوف مضارباته مع خلق الله لأتفه الاسباب ..
كلهم اشتاقت لهم ..
السيء والطيب .. العدو والصديق ..
لفت تطالع في الشباك وهي تتذكر طارق ..
كان واحد من اللي كانوا يآذونها ..
ما تنكر انها اول ما شافته انعجب فيه ..
وقفته .. طريقة كلامه .. ثقته ..
كلها اشياء جميله بس ....
بس غروره وعجرفته خلته يتعامل مع الناس بطريقه حقيره وخصوصا معها ..
هي متأكده من كلامه انه ندم بس لحد الآن هي شايله بقلبها عليه ..
عالعموم الشخصيات اللي مثل كذا صعب انها تثق فيهم ..
دقتها صبى تقول: اسيل هيا الدكتوره طلعت ..
طالعت اسيل فيها وبعدها طالعت بالسبوره ..
فتحت الدفتر وبدأت تكتب اللي كان مكتوب ..
لفوا الضاحكون الثلاثه عليها وقال عايد: هيه اسيل .. اعترفي في منو تفكرين ..؟!
عواد: طووول المحاضره وانتي سرحانه ..
عيد: مره تبتسمي مره تكشري ومره تتطالعي بالدريشه ..
اسيل وهي تكتب: ما كنت ادري انكم رادارات بشريه ..
صبى: ههههههههههههههههههههههه احسن احسن ..
كشر عواد وقال: هيه احنا نتحجى صج ..
عايد: في منو كنتي تفكرين ..؟!
عيد: يمكن تفكر باهلها اللي هجوا وتركوها .. من حقهم الويه يسبب الرعب ..
صبى بعصبيه: جب لا تتكلموا عنها جذي ..
اسيل: طنشيهم .. خلاص تعودت على اسلوبهم الاهبل ..
عواد: انتي ليش دايما تسبينا ..؟!
عايد: طبيعي دامها رفيجة المتوحشه وصايف ..
عيد: على طاري التوحش .. سمعتم آخر خبر ..
عواد وعيد بإهتمام: وشو ..؟!
عيد بوجه بائس: دكتورنا رجع .. الدكتور الغثيث رجع ..
عواد وعايد بصدمه:شنــــو ..؟!!!!
ضمت صبى إيدها ببعض وقالت بحماس: الدكتور راكان رجع .. ونآآسسه ..
رفعت اسيل تطالع فيهم وقالت: رجع من فين ..؟!
صبى بحماس: راح لجامعه ثانيه يدرس فيها كدكتور بديل وقبل اسبوعين كان عنده اجازه مرضيه واللحين رجع .. اعشق هالاستاذ .. بالمره يينن ..
عواد: يينن طل .. هذا دايم يكرشنا ..
عيد: ويفشلنا ..
عايد: ويطقطق على راسنا ..
اسيل: هو شاب صح ..؟!
صبى بنفس الحماس: يب .. نص بنات جامعتنا خاقين عنده ..
عواد: بس هالمغرور فشلهم وقال انه خاطب وحده وراح يظل يحبها لحد ما يموت ..
عيد: مره مغرور ..
عايد: ومتعجرف ..
صبى: ووسيم ..
اسيل: كان يدرس بجامعة ***** ..؟!
عواد: ايه ليته يلس هناك وريحنا ..
عايد: يا رب ينتقل لجامعه ثانيه بأسرع وقت ..
عيد: او يتقاعد ويفكنا ..
صبى: لا حرام باجي بدري ..
اسيل: دكتوركم ما قد لبس ثوب صح ..؟!
عواد: حتى انتي لاحضتي .. فعلا ملابسه كلها بناطيل وكأنه مب دكتور ..
عايد: امنيتي اشوفه بثوب وغتره ..
عيد: امنيه مستحيله ..
صبى بحماس: انتم اصلا تغارون منه .. والله ماكو دكتور بمثل كشخته ..
وللحضه ظلوا ساكتين بعدها لفوا كلهم يطالعوا بأسيل ..
استغربت اسيل من نظراتهم وقالت: شفيكم ..؟!
عواد: شدراج ان دكتورنا شاب ..؟!
عايد: وانه يدرس بجامعة ***** ..
عيد: وعن نوعية ملابسه ..؟!
صبى: ساحره ..
ابتسمت اسيل وقالت: لا بس كان يدرس بجامعتنا .. شفته اكثر من مره مع انه ما يدرسني .. ومره من المرات تكلمت معاه لما سألني عن اثنين كانوا يتهاشون جدامي .. اسلوبه خورافي ..
صبى بحماسها المعتاد: وااااااو حتى انتي معجبه فيه .. وقسم انه خطييييير صح ..؟!
إبتسمت اسيل لها فقال عواد بضجر: دكتور طل .. بلا خطير بلا بطيخ ..
عايد: هههههههههههههههه الكلمتين راكبين على بعض ..
عيد: ههههههه فعلا .. خطير وبطيخ ههههههه ..
عواد بغرور: شرايكم ..؟! ترى متعوب عليها ..
صبى بإبتسامه: والله حلوه .. انت دايم تطلع اشياء جميله ..
اسيل: نو كومنت ..
دخلت وحده للكلاس وقالت بحماس: الدكتور راكان الدكتور راكان راح يي اللحين ..
صرخوا معظم الطلبه بحماس ومنهم صبى ..
عواد: ناقصين عقل ..
عيد: بقوووه ..
دخل عليهم الدكتور ولما فتح فمه بيسلم انهالت عليه كميات من الصراخ والحماس والكلمات المتداخله اللي ما قدر يفهم اي شيء منها ..
حط كتبه على المكتب وقال بصوت عالي: خلاص خلاص يا جماعه .. اهدأوا ترى توني طالع من اجازه مرضيه وتعبان ..
هدي الصراخ وحل مكانه عبارات الخوف على صحته والحمد له عالسلامه ..
د.راكان: اوكي انا تمام .. وربي تمام فممكن تهجدوا ..
عايد: اكره هالآدمي ..
صبى: تكرهه ..!! صج ما عندك سالفه ..
عواد: عايد صاج .. غثيث ..
هدي الطلاب فقال الدكتور: اوكي واخيرا راح اعرف اسلم .. السلام عليكم ورحمة الله وبركاته ..
الطلبه: وعليكم السلام ورحمة الله وبركاته ..
وحده من الطالبات: دكتور والله وحشتنا وايد ..
طالب آخر: اول ما سمعت انك راح تيي كنت راح اعمل حفله .. صج فقدناك يا دكتور ..
طالبه ثانيه: سلامات يا دكتور ليش كنت بالمستشفى ..؟!
وحده ثانيه: يقولون انك صلحت حادث ..
طالب اخر: وبعضهم يقولون حصلت حريقه وتأذيت ..
وحده من الطالبات بخوف: دكتور انت بخير ولا لا ..؟!
د.راكان: يا كثر اسئلتكم .. يب الحمد لله صرت بخير .. حصل لي شيء دخلني للمستشفى بس بفضل الله شفيت وهذاني واقف جدامكم ..
فقالت وحده من الطالبات: دكتور قول لنا شنو صار لك ..؟!
د.راكان: قلت لكم حادثه صغيره والتفاصيل مب مهمه ..
طالبه بإلحاح: دكتور بالله علمنا ..
عواد: خلاص قال مو لازم اقول التفاصيل .. صج انكم نشبه ومهتمين لشيء سخيف ..
ابتسم الدكتور راكان وقال: اوووه المعيدين الثلاثه .. احوالكم كيف ..؟! وحشتوني يا حلوين .. وقسم اني لحد الآن كل ما اشوفكم اتذكر حلاوة العيد ..
ضحك طلاب الفصل فقال عايد: والله ذي مشكلتك ..
د.راكان: لا لا ذي قويه .. هذا بدل ما تتحمد لي بالسلامه .. ترى قبل يومين طلعت من المستشفى ..
صبى بخوف: سلامات ما تشوف شر ..
لف د.راكان يطالع في الكرسي اللي جنب عواد واستغرب لما ما شاف صبى فقال: الكيوت اللي تكلمت قبل شوي وينها ..؟!
رفعت إيدها وقالت: انا هني ..؟!
طالع ورى عايد وقال بإستغراب: ليش غيرتي مجانج ..؟!
ابتسمت وقالت: عشان اكون ينب رفيجتي اليديده ..
لف وطالع في اسيل فقال واحد من الطلبه: هاذي طالبه يديد يا دكتور ..
طالبه ثانيه: اسمها اسيل ويتيمه ..
طالب ثاني: لا يقولوا انها لقيطه مب يتيمه ..
عواد: كانت في نفس الجامعه اللي انتقلت لها مؤقتا ..
طالع في اسيل لفتره بعدها قال: اسيل عبد الرحمن ..؟!!
انصدمت من سؤاله .. هذا عارف اسمها ..
شوي اختفت صدمتها لما تذكرت كلام وصايف ..
قالت لها ان الجامعه كلها تعرف عنها ..
عواد: لا .. اسمها اسيل محمد ..
اسيل: كلامك صحيح يا دكتور ..
ظل الدكتور يطالع فيها فتره بعدها لف على الطلاب وقال: ياللا واحد منكم يقولي شنو اللي اخذتوه من الدكتور السابق .. وايش اللي فهمتوه واللي ما فهمتوه ..؟!
رفعوا كلهم اياديهم بحماس والدكتور يلف بعيونه عليهم عشان يختار واحد دافور اضمن ..
في النهايه وقف الطالب اللي اختاره وبدأ يقول للدكتور راكان كل شيء ..
صبى بهمس: اسيل ..
اسيل بهدوء: نعم ..
صبى: الدكتور شكله يعرفج صح ..؟!
هزت اسيل كتفها وهي تقول بلا مبالاه: يمكن ..
صبى: وناسه .. يا حضج ..
ابتسمت اسيل بهدوء وما علقت ..
بعد ما انتهى الطالب من شرحه فتح الدكتور كتابه وبدأ يطالع فيه ..
فقالت وحده من الطالبات: دكتور بالله لا تعطينا اليوم شيء ..
تكلم طالب ثاني وقال: إيه يا دكتور خلنا نسولف وحكينا عن الجامعه اللي رحت لها ..
طالبه ثانيه: ايه كيف هي وايش احلى .. اكيد احنا صح ..؟!
احد الطلاب: إيه زمان في الترم الاول سمعت ان احد الجامعات اللي هني انتشر فيها غاز .. هي نفس جامعتك ولا لا ..؟!
وحده من الطالبات: ايه نفسها .. دكتور واللي يسلمك حكنا عن اللي صار ..
د.راكان وهو يقلب: آشش لا تقرقرو كأنكم بقر .. خلوكم هاجدين ..
عايد: ما راح تتغير .. لازم تسبنا وكأنك مو دكتور .. ياخي ريحنا ولا تعطينا شيء اليوم ..
د.راكان وهو لساته يقلب بالكتاب: آشش يا حلاوة بقره .. لا تتكلم ..
عايد بهمس: تبن ..
صبى: احسن تستاهل .. منو قالك تضايق الدكتور بحجيك .. تراه دكتور مب طالب ..
عايد: انتي خبله ما عليج شرهه ..
صبى: اعرف اني خبله بس هذا ما يعني اني غبيه .. جب ولا تضايق الدكتور مره ثانيه ..
اسيل: خلاص اهجدوا .. شفيكم بديتوا تتهاوشوا من وقت ما ياء الدكتور ..؟!
عواد: عشان تعرفين انه شؤم علينا ..
صبى: جب لا تسب الدكتور لأعلمه ..
اسيل: خلاص قلت اهجدوا .. انتم اصحاب مب اعداء ..
عيد: قولي لها هالكلام مب احنا ..
اسيل: انا اوجه الكلام للكل مو لاحد محدد ..
لف الدكتور نظره وطالع في اسيل اللي كانت تتكلم مع ابطال النينجا الاربعه وظل يطالع فيها لفتره ..
بعدين طالع في الطلاب وقفل الكتاب وقال: الدروس انتم ماشين فيها تمام وهذا شيء كويس وعشان جذي ما راح اعطيكم شيء اليوم ..
صرخوا الطلاب بحماس وعبارات الشكر منتشره بالمكان ..
جلس عالمكتب وقال: راح نقضي هذا الوقت في السواليف شرايكم ..
استانسوا اكثر .. ومن هنا بدأوا ينهالوا عليه بالاسئله وهو حده متلخبط ..
ما يعرف يجاوب على مين ولا مين ..
لكن في النهايه كانت هالساعه والربع من وقت المحاضره جميله جدا للطلاب وللدكتور ..
ولأسيل كمان ..

========================================

الظهر وعند بوابة الجامعه ..
جاء موعد خروج الطلبه وبدأوا يخرجون وهمهم بيتهم وبس ..
طلع احد ابطال روايتي وهو شايل شنطته بطريقه عشوائيه ومتجه لسيارته ..
ركبها والابتسماه على وجهه يسمع للطرف الثاني اللي يكلمه بالجوال ..
قفل باب السياره وقال: والله مو عارف شلون اشكرك يا عصام .. فعلا انت خدمتني خدمة العمر .. ما اعرف شلون راح اردها لك ..
شغل السياره وطلع من الجامعه وهو يسمع لكلام عصام فقال: ههههههه ما يعجبني التواضع اللي جذي .. بس جد مشكور وما قصرت .. ان شاء الله اردها لك في وقت شدتك .. واللحين مابي اصرف عليك وخصوصا انها مكالمه دوليه .. مع السلامه ..
تكلم عصام فإبتسم وبعدها قفل الجوال ..
رماه عالمقعده جنبه مع الشنطه واختفت الابتسامه عن وجهه اللي من النادر تنشاف الابتسامه فيه ..
وقف قدام العماره اللي فيها شقته ونزل من السياره ومعاه شنطته وجوال ..
طلع لفوق ودخل للشقه ورمى نفسه عالكنبه وهو حاس بإرهاق كبير ..
اليوم كان متعب متعب لاقصى درجه ..
اربع محاضرات بيوم واحد وفترة البريك مره قصيره ..
تذكر اخته الصغيره رزان ..
قام من فوق الكنبه وفتح الباب بهدوء على اخته فشافها نايمه ..
قفل الباب وراح لغرفته ..
شغل المكيف وانسدح فوق السرير وهو يفكر في امه ..
لازم يلقى اقرب فرصه يسافر فيها لبريطانيا يطمئن عليها ..
توه صاحبه يعرفه من زمان ويدرس هناك اتصل عليه وطمنه على صحة امه اللي صار يهتم فيها ومع هذا يبغى يروح ويشوفها ..
اشتاق لها ..
ماله فتره طويله من طلعته من السجن ووقتها كان مشتاق لها بقوه ..
كلها فتره قصيره حتى ابتعدوا عن بعض مره ثانيه ..
التفت بعيونه وطالع في صورة رزان وهي طفله ..
طالع في صورة اخته الصغيره والوحيده ..
اخطأ كثييير بحقها ..
ما اهتم لها .. ولا لمشاعرها ولا ....
تعوذ من الابليس وهو يحاول ينسى السالفه كلها ..
غمض عيونه حتى ينام ويريح جسمه ..
عقد حواجبه وهو يتذكر الحادثه اللي صارت قبل كم شهر ..
انتشر في ذاك الصباح إشاعه عن طالبه اسمها اسيل عبد الرحمن ..
وقتها انصدم من تصرف طارق لما ضرب ناصر اللي انشر هالإشاعه ..
وبعدها بكم اسبوع صدف انه راح لمحل ملابس ووقتها حصلت مهاوشه بين مدير المحل وزائره وبعدها مدير المحل نادى بأسم اسيل وطلب منها تبدل التيشيرت عشان ينهي المشكله ..
بعد ما سمع اسم اسيل على طول تذكر الطالبه اللي انتشرت الإشاعه بإسمها فسأل الموضفه عن اسم اسيل فقالت له انها اسيل عبد الرحمن ..
ابتسم وهو يقول: ما كنت اتوقع ان ذوق طارق معقد جذي .. يحب وحده لقيطه وكمان تشتغل .. ماكو شيء يجبره يحبها فليش اختارها من بين بنات العالم .. ما انكر انها حلوه بس فيه كثييير احلى منها ..
طنش الامر وهو يقول: طول عمره وهو تفكيره غريب وتصرفاته اغرب .
تنهد وقال بهمس: انسان غريب ..

........................................

ومن جهه اخرى توه انس رجع من الجامعه وطلع للدور اللي فيه شقتهم الجديده ..
راح للشقه المقابله ودق الجرس ..
فتحت فيه وحده بمنتصف العشرينات ولما شافته قالت بضيق: رجعت ..؟!
ابتسم بإحراج وهو يقول: ايه وابغى الطفله اذا سمحتي ..
البنت: طيب شرايك تروح ترتاح والعصر تيي تاخذها افضل ..؟!
انس: لا مو لازم .. ما ابي ازعجج اكثر انت وريلج ..
البنت بسرعه: منو قال انها تزعجنا .. الشيء الوحيد اللي يزعجنا هو ويهك لما تيي لأننا نعرف انك بتاخذها .. شوف خلها عندنا لمن العصر افضل .. انت مرهق من دوام الجامعه واكيد تبغى تنام وهي اسم الله عليها مرجوجه ومصحصحه واكيد ما راح تخليك تنام براحه ..
تورط انس وما عرف كيف يرد عليها ..
هالطفله امانه وما يقدر يرتاح وهي بعيده عنه ..
وفي نفس الوقت مو قادر ياخذها بالقوه من بين زوجين لهم خمس سنوات ينتظرون يجيهم اطفال ..
ابتسم وهو يقول: لا تحرجيني بس الطفله امانه عندي وما راح اقدر انام وهي برى البيت .. اتمنى تتفهمي موقفي ..
تنهدت وقالت: طيب .. اللحين اييبها ..
دخلت وبعد فتره جابت شادن اللي كانت لابسه لبس جديد وبإيدها دب وردي ..
اول ما شافت انس ضحكت فابتسم لها واخذها من ايد البنت وقال: مشكوره ما قصرتي ..
البنت: العفو .. وإذا كانت محتاجه لأي شيء او انت تورطت معاها فلا تتردت تييبها لعندي ..
انس: طيب .. واللحين استئذن ..
البنت: اذنك معك .. باي شدوونه ..
ضحكت لها شادن وبعدين دخل انس للشقه وقفل الباب وراه ..
حط شادن عالكنبه ودخل لغرفته يبدل ملابسه ..
نزلت شادن من فوق الكنبه وراحت للتلفزيون وضغطت على زر التشغيل ..
ضحكت لما شافته اشتغل بس ما كان على قناة افلام كرتون ..
فلفت بالصاله تدور عالريموت فشافته في النهايه جنب التلفون ..
بدت تضغط الازرار بعشوائيه عشان تقلب على قناة كرتونيه ..
خرج انس من الغرفه وابتسم لما شاف شكلها ..
لفت عليه واشرت عالتلفزيون وهي تقول: كتون .. ابى ..
اخذ الريموت من ايدها وهو يقول: تبغي افلام كرتون ..
هزت راسها وهي تقول: ايه ..
جلس انس عالكنبه وهو يقول: اوكي ..
ابتسمت وجلست جنبه وطالعت في التلفزيون ..
قلب انس على قناة سبايس تون وقال: تبغي هذه ..؟!
هزت راسها تقول: ايه ..
انس: طيب .. مع انه هالكرتون احسه ما يناسب الاطفال ..
طالع في التلفزيون شوي بعدها قال: لا لا فيه كثييير محاضرات تتكلم عن الطفل وعقليته .. اخاف لما تكبر تطلع سفاحه من مشاهدتها لهالانمي اللي اغلبه قتل ..
قلب على قناة ثاني فصرخت شادن: ليييييييه ..!!!
انفجع من صراخها وقال: بسم الله .. لا ابد مو طفله والله .. اعذريني بس لازم اقلب وادور لج عن توم وجيري او السنافر ..
بوزت وبدا تبكي فتورط انس وقال: خلاص خلاص اهدأي شفيج .. اللحين اقلب لج عليه ..
ورجعه عالقناة اللي كانت عليها فابتسمت ووقفت جنبه واعطته بوسه وبعدين رجعت لجلستها ..
انس: على قد ما انتي عنيده بس تيننين ..
قام واخذ له من غرفته مخده واللحاف ورجع للصاله ..
صار الظهر ينام دايم بالصاله عشان لا يتركها وحدها ..
انسدح وتنهد وهو يقول: ان شاء الله يطلع طارق بالسلامه وياخذج انتي واختج لعند اخوانج الباجين ..
طالعت فيه وشافته منسدح عالارض فضحكت ووقفت فوق الكنبه ونطت عليه ..
انس: آآآه يا شادن ..
شادن: ههههههههههههههههههههههه ..
وبدأت تهز نفسها فوقه وتتقلب عاللحاف وهي تضحك فغصبا عنه ضحك وبدأ يلعبها ..
الاطفال هم معنى الجمال ..

========================================

بالليل الساعه عشر وربع ..
كان سعد الراهي جالس في مكتبه ويطالع في الرجال اللي قدامه بنظرات حاده ..
اعتذر الرجال للمره الثانيه وهو يقول: اعذرني ما انتبهت وقتها .. كنت مشغول ادور على الملفات في غرفة فيصل ولا انتبهت انه فيه احد دخل للبيت ..
وللمره الثانيه ما رد عليه سعد ..
مو قادر يصدق ان اللي يوضفهم عنده اغبياء لهالدرجه ..
هو امره يفتش عالملفات اللي بغرفة فيصل ومن دون لا احد يدري بس الغبي اللي قدامه ما انتبه ان اخو فيصل رجع ..
بعد فتره طويله من السكوت قال سعد: اطلع اللحين من هني ..
الرجال: حاضر ..
لف وطلع من المكتب ..
شبك سعد إيده ببعض وهو يقول: وين ممكن تكون راحت ..؟! اتمنى كل شيء يصير لها إلا انها تقع بإيد بسام ..
ظهر الإنزعاج على وجهه وهو يقول: إذا طاحت بإيده فكل التدابير اللي اخذتها صارت رماد وراح اتورط ومستحيل اطلع منها ..
دق جواله في هذا الوقت فرد وهو يقول: نعم يا يحيى ..
يحيى: بسام توه خرج من الفندق وبإيده ملف طال عمرك ..
انصدم سعد وهو يقول: ملف ..!!! اكيد الاوراق كلها بداخله .. امنعووه .. امنعووه بإي طريقه كانت فاهم ..؟!
يحيى: حاضر .. اعتمد علي ..
قفل سعد الجوال وضغط عليه بقوه وهو يقول: كنت حاس .. بس مستحيل تفلت ابدا .. مستحيل اسمح لك تصلح اللي براسك ..
تنهد واخذ له نفس عمييييق ..
لازم يهديء من نفسه .. لان يحيى شخص ينوثق فيه ..

........................................

اما عن إياد ..
فكان توه طالع من السوبر ماركت وبإيده علبة كود رد ..
اتجه للسياره وتفكيره كله باللي صار اليوم العصر لما لقى الشقه اللي تسكنها اسيل ..
دق الباب ودق بس محد رد ..
ليش وين راحت ..؟!
الوقت كان عصر وهذا يعني انها رجعت من الجامعه إذا ليش ما فتحت الباب ..
طلع المفتاح من جيبه وشوي ما حس إلا بواحد مسك كتفه ولفه بقوه على جهته فصقع ظهر إياد بالسياره وطاح الكود رد من إيده ..
جراح بحده: واخيرا طلعت من بيتك يالفأر الجبان ..
تألم إياد من ظهره بس قال وهو يطالع في الكود رد: لا .. شوف شنو صلحت بالكود حقي ..
دعس ضاري برجله على العلبه وهو يقول: انجب فاهم ..؟!
طالع إياد فيهم ..
هالمره بس ضاري وجراح .. يزن مو موجود ..
مسكه جراح من تيشيرته وقال بحده: شلوووون ..؟! شلوون عملت جذي ها ..؟!
استغرب إياد من كلامه ..
هذا عن شنو يتكلم ..؟!
لا يكون لينو علمته كل شيء صار ..؟!
لا مو ممكن ..
ضاري بعصبيه: لما نتحجى ياوبنا .. شلون قدرت اصلا توصله ..
لف إياد وطالع في ضاري والإستغراب كل ماله يزيد ..
لكمه جراح بوجهه وهو يقول: انطق ..
تألم إياد من لكمة جراح المؤلمه فمسك إيد جراح وابعدها عن بلوزته وهو يقول: انا مب فاهم عن شنو تتحجون ..
مد إيده ولكم جراح وهو يقول: والمره اليايه لا تلكم بدون سبب ..
جن جنون جراح فوق ماهو معصب اصلا ..
ضرب قبضته على قزاز السياره جنب راس إياد وهو يقول: إياد انا اليوم واصل حدي وممكن اعمل شيء محد كان متوقع اني اعمله فلا تخليني اتهور افضل لك فاهم ..؟! واللحين ياوب .. شلون قدرت توصل له ها ..؟!
طالع إياد فيهم فتره وهو يفكر ..
بعدها حط إيده بجيبه وقال: اسمع .. انا صج مب فاهم شيء من اللي انت تقوله بس بغيت اقولكم شيء ..
سكت فتره بعدها كمل يقول: انا تعبت من الوضع اللي انا فيه .. توني صغير وما تعديت السن القانوني ومع هذا انضربت اكثر من مره وانجرحت اكثر من مره .. ما عاد فيني اي قدره عالتحمل .. خلاص فكرت كثيير ومستعد اعطيكم كل اللي تبغوه بشرط انكم تمسحوا المقطع وما تنشروه ..
طالعوا جراح وضاري فيه بصدمه ..
ما توقعوا ابدا انه بيوم من الايام راح يستسلم او يقول هالكلام ..
وكمان .....
قرب ضاري وهمس بإذن جراح فإبتسم جراح وهز راسه بإيه وإياد يراقبهم بحذر ..
جراح: اوكي .. موافقين على شرطك ..
إياد: خلاص .. وانا اللحين مستعد ادفع لكم كل المصاريف اللي تحتاجونها .. وكمان راح اخلي ابوي يشتري لكم الاستراحه اللي انتم فيها عشان ما تكونوا شايلين هم صاحب الاستراحه من انه يكشفكم ..
جراح: خوووش والله .. يعجبني كلامك ..
إياد: بس اولا .. امسحوا المقطع ..
ضاري: وإيش اللي يضمن لنا انك ما تسحب علينا ..؟!
إياد: ماكو ضمان بس انتم تعرفوني إذا قلت شيء فإني انفذه ..
طلع جراح جواله وهو يقول: طبعا طبعا واثقين فيك ..
فتح عالاستيديو وورى إياد اسم المقطع وهو يقول: اهو راح نمسحه جدام عيونك ..
ضغط على ديلييت ومسحه وإياد يراقبه ..
جراح: ها .. رضيت ..؟!
ابتسم إياد وقال: كويس ..
جراح: واللحين اركب السياره ..
إياد: وليش ..؟!
جراح: عشان نروح كلنا للإستراحه وتشتريها مثل ما قلت لنا .. لا يكون ناوي تسحب علينا لأنك بجذي تحفر قبرك ..
إياد: بس لازم اروح البيت واقول لأبوي ان ....
قاطعه ضاري: لا لا ما نبغى هالاسلوب .. تعال معنا وكلم صاحب الاستراحه مبدئيا وباجر خل ابوك يوقع عالاوراق الرسميه .. عشان نضمن انك ما تعمل شيء يزعجنا ..
طالع إياد فيهم فتره بعدها قال: اوكي ..
طالع جراح وضاري في بعض بإبتسامه وبعدها ركب جراح جنب إياد وضاري ورى ..
شغل إياد السياره وهو يقول: بس لا تنسون ترجعون لي حق الكود رد اللي كبيتوه علي ..
ضاري بإبتسامه غامضه: إطمئن .. راح نرجعه اضعاف اضعاف ..
طالع إياد في انعكاس صورة ضاري عالمرايه وهو يقول في نفسه: "إبتسامته مو مريحه ابدا" ..