شبكة همس الشوق - عرض مشاركة واحدة

24 - 3 - 2014, 07:22 PM

|$[ البآرت العشرون الجزء الثالث ]$|

وانْتَهى كُلُّ شيءِ . . !

الساعه 40 : 10 ..
وعلى ذاك الخط السريع ..
موقفه كان جدا سيء ..
لف نظره يطالع في الملف اللي جنبه ..
يبغى يروح للمركز عشان يسلمهم إياه ويطيح بعدها سعد في شر اعماله ..
بس شلون يقدر والسيارات الخمس هذه محاوطته من كل جهه وتجبره يمشي عالمسار اللي هم يبغوه ..
طالع في عداد السياره ..
السرعه صارت تحت الستين وكل مالها تنزل ..
عض على شفته وهو يقول: انسان واطي ..
تباطئت سرعة السياره اللي قدامه بشكل كبير فاضطر يتباطئ هو كمان لحد ما ........
لحد ما توقفت السياره تماما ..
سحب الملف ودخله تحت المقعده وهو يقول في نفسه: "هذا راح يأخرهم شوي" ..
نزل يحيى من سيارته ونزل معاه الراكب اللي كان جنبه واتجه لسيارة بسام ..
كان يمشي بهدوء وكلام سعد يدور في باله ..
"امنعوه بأي طريقه"
"باي طريقه"

ابتسم وهو يقول: امرك ..
وقف قدام شباك بسام ودقه بهدوء ..
ظل بسام فتره قصيره بعدها نزل قزاز السياره ..
يحيى: اهليين بسام ..
بسام: إيه .. وبعدين ..؟!
يحيى: اولا انت بموقف لا تحسد عليه واللي بمكانك مو يحترم .. لا يتوسل اللي جدامه انه ما يآذيه فعدل اسلوبك لأن هذا من مصلحتك ..
طالع فيه بسام بهدوء ولا رد عليه ..
مد يحيى ايده وهو يقول: وين الملف اللي سرقته من غرفة فيصل ..؟!
بسام: عن اي ملف تقصدون ..؟!
يحيى: استاذ بسام .. المره اليايه إذا تصنعت الغباء انت بنفسك عارف وش ممكن يصير لك .. فوين الملف ..؟!
ظل بسام ساكت لفتره بعدها قال: معاي .. بس ما راح اعطيكم إياه .. ورئيسكم راح يطيح بشر اعماله وانتم بتلحقوه ..
يحيى: معاك ..؟!! عيل هاته يا استاذ ..
بسام: بصراحه انا مو عارف شنو الوصف اللي يليق فيك .. قلت لك ما راح اعطيك إياه فإفهم يا ذيل الاستاذ سعد ..
عصب يحيى وفتح باب السياره وهو يقول: انزل .. ياللا انزل ..
نزل بسام من السياره وقفل الباب بهدوء و ....
وفجأه وبطريقه سريعه وبمهاره واضحه ضرب يحيى واللي معاه باحدى الاساليب اللي تعلمها في معهد الكارتيه ..
ضربهم اثنينهم فطاحوا عالأرض ومن هنا نزل الرجال اللي كانوا بالسيارات الاربعه الباقيه ..
قام يحيى وهو ماسك بطنه بألم وقال: حط في بالك انك انت اللي بديت ..
رجع بسام خطوه لورى وهو يشوف ما يقارب عشر رجال او اكثر شوي يتقدمون منه ..
لو ان السيارات مو واقفه حول سيارته كان ركبها وهرب عنهم ..
بسرعه تقدم واحد منهم ناوي يلكم بسام فإبتعد بسام عن طريقه وبكوعه ضربه على ظهره فطاح وصقع وجهه في كفرة السياره ..
التفت بسام ومسك إيد الشخص الثاني وضرب بطنه بركبته فطاح وهو يتألم ..
اتجه له اثنين بيضربوه فرفع رجله وضرب الاول بقوه على جهة الثاني وطاحوا اثنينهم ..
قام اللي كان طايح عن الكفره ومسك إيد بسام عشان يثبته وفي نفس الوقت اتجه واحد لبسام عشان يضربه فإلتفت بسام وخلى ذاك الشخص يضرب اللي كان ماسك إيده ودف الاول برجله فصقع بالسياره وطاح ..
اخذ نفس سريع .. صعب يستمر كذا ..
اتجه لناحيته هالمره ثلاث اشخاص والرابع والخامس وراهم فضرب الاول بس الثاني لكمه بوجهه فترنح بسام واسند ظهره على السياره ففاجأه الثالث بلكمه ببطنه والرابع بلكمه بوجهه والخامس لفه وثبت إيده فحاول بسام يفلت بس ما قدر ..
يحيى: غلطان إذا كنت تضن انك راح تفلت يا بسام ..
تقدم لعند بسام ولكمه بقوه في خده وهو يقول: هذا رد دين على لكمتك قبل شوي ..
لكمه مره ثانيه وهو يقول: وهذا على كلامك الوقح ..
لكمه مره ثالثه وهو يقول: وهذا على عجرفتك وغرورك ..
حس بسام بالألم وحاول مره ثانيه انه يفلت إيده من الاثنين اللي كانوا مثبتينه بس ما قدر ..
رفع رجله وضرب رجل اللي وراه بقوه فتألم ذاك الرجل وارخى مسكته على إيد بسام فأستغل بسام هذا الشيء وسحب إيده اليمنى ولكم فيها الرجال اللي كان ماسك ايده الثانيه ..
تقدم منه اثنين بسرعه عشان يمسكوه فبعد عن طريق الاول ولكم الثانيه بركبته فحس بالثالث يلف بإيده على رقبة بسام فضربه بسام بكوعه على بطنه وبعد ما فكه اعطاه لكمه عنيفه بوجهه ..
ما طول على هالحال لأنه ثلاث تقدموا منه وقدروا يثبتوه بعد ما طيح واحد منهم ..
عض على شفته بقهر .. فعلا صعب يتغلب على اكثر من ثلاث اشخاص ..
احتدت نظرات يحيى وهو يقول: انت ما تفقد الامل .. المره اليايه إذا فكرت تقاول راح .....
ضربه بلكمه عنيفه بخده وهو يقول: تندم ..
تألم بسام ونزل الدم من فمه فإبتسم يحيى وهو يقول: فعشان جذي خلك عاقل ومؤدب يا مدلل عائلة العاصي ..
طالع بسام فيه وقال: انت انسان جبان تختبئ خلف رجالك .. إذا كنت فعلا ريال وايهني وخل رجالك على ينب ..
هز يحيى راسه وهو يقول: لا لا هالاسلوب اشوفه كثيير بالافلام .. تحاول تستفزني عشان اوافق على كلامك .. حتى لو كنت اصغر مني فأنت متعلم بفنون الدفاع عن النفس عكسي انا .. فلا تحاول تستخدم معاي هالاسلوب لأني مب غبي مثل اللي تشوفهم بالافلام ..
إبتسم بسام وهو يقول: غبي ..!!! لا غلطان .. اللي بالافلام مب اغبياء .. ذولا رجال بمعنى الكلمه مب حريم ..
تنرفز يحيى من كلامه ولكمه بوجهه اكثر من لكمه وهو يقول: جب .. لسانك السليط هذا يبغاله قص يا ولد العاصي .. انت مو راضي تعقل او تستسلم ..
توقف عن لكمه وهو يقول: اللي بمجانك يتوسلون لي اني ارحمهم مو يتصرفوا مثل جذي ..
بسام بإستفزاز: يتوسل ..!! مصطلح ما قد إستعملته بحياتي .. فعلا كل يرى الناس بعين طبعه ..
عصب يحيى ومد إيده بيلكمه فنزل بسام راسه فجت اللكمه بوجه الرجال اللي كان مثبت إيده اليسرى ..
بسرعه سحب إيده ولكم الثاني بقوه وبعدها لف على يحيى واعطاه لكمه غيرت ملامح وجهه وبعدها ضربه برجله فطاح عالارض فإبتسم بسام وهو يقول: فعلا غبي ..
بعد بسرعه عن طريق الرجال اللي كان بيضربه فصقع وجهه بقزاز السياره وطاح بالارض ..
بس للأسف قدروا يثبتونه مره ثالثه وهالمره ثلاثه اللي مسكوه عدل والرابع راح عند رئيسهم يحيى وهو يقول: انت بخير ..
قام يحيى وهو يقول: ابعد عني ..
طالع في بسام بنظرات شرسه والابتسامه ما زالت على وجهه بسام مع انه متألم اكثر من يحيى ..
تقدم منه يحيى ومسكه من رقبته وهو يقول بحده: انت شنو بالضبط ..؟! شنو اللي تبيه ..؟! شكلك تبي تموت صح ولا انا غلطان ..؟!
ما رد عليه بسام عشان لا يبان صوته المخنوق من قبضة يحيى ..
لف يحيى وهو يقول: سامح طلع الملف من سيارته بسرعه ..
سامح: طيب ..
راح من الجهه الثانيه وفتح الباب وبدأ يدور على الملف وبسام يراقبه بعيونه وهو يتمنى انه ما يلقاه ابدا ..
بعد دقيقتين طلع سامح والملف بإيده فعض بسام على شفته بقهر ..
ابعد يحيى ايده عن رقبة بسام ولف على سامح عشان ياخذ الملف منه فمد بسام رجله وضرب يحيى بقوه فطاح على الارض ..
سحب إيده من اللي ماسكينه بس ما قدر .. ضرب ارجلهم برجله بس ما اهملوا إيده ولا مره ..
قام يحيى وهو يمسك دقنه بألم لأنها احتكت بالارضيه ..
لف على بسام بعصبيه بس في اللحضه الاخيره قدر يتجاوز رجل بسام اللي كانت بتصبيه ..
بسام: يالجبان واجهني بسرعه .. لا تكون رخمه ..
عصب يحيى وقال: جب .. لو تفتح فمك مره ثانيه صدقني راح اقطع لسانك فاهم ..؟! انا مو فاضي لكلام اطفال ..
بسام: بس هذا الطفل اللي تتكلم عنه غير ملامح ويهك .. ليه ما تاخذ حقك ..؟! تعال اضربني وخذ حقك ..
ابتسم يحيى وهو يقول: حركه قديمه .. قبل شوي استعملتها معاي وضربتني بريلك ..
عض بسام على شفته بقهر فكمل يحيى: بس دامك مصر اني اضربك فمافي مشكله ..
اشر عالرجال الاربعه اللي كانوا واقفين على يمينه وهو يقول: لبوا طلبه ..
تقدموا اربعتهم جهة بسام وفجأه هجموا كلهم في نفس اللحضه ..
قدر يضرب اثنين منهم برجله وبعدها استفردوا فيه الاثنين الباقين ..
ظلت الابتسامه على وجه يحيى بعدها لف على سامح وقال: هات الملف ..
اعطاه سامح الملف فاخذه وفتحه وبدأ يقرأ اللي فيه ..
وفعلا كان هو الملف المطلوب .. كل الاشياء اللي تدين سعد موجوده وكل الادله صارت بإيده ..
صارت سالفة الإطاحه براس سعد مستحيله من دون هالاوراق ..
لف الاربعه واشر لهم انهم يوقفوا فوقفوا ..
حرك الملف وهو يقول: كنزك اللي كنت تبغى تحميه طار يا ولد العاصي ..
طالع بسام فيه بنظرات لا تحمل اي انفعال او شيء ..
استغرب يحيى وقال: شفيك مو منفعل او مقهور ..؟!
ابتسم بسام فزادت دهشة يحيى وتقدم من عنده ومسكه من بلوزته وهو يقول: شذي النظرات الواثقه وذي الابتسامه ..؟! شسالفه ..؟!
بسام: ليه ما سمعت ..؟! اسمع عدل ..
عقد يحيى حاجبه وشوي بدأ يسمع صوت جوال يدق ..
لف على سيارة بسام يطالع فيها .. هذا جوال بسام يدق ..
لف على بسام وهو يقول: شيعني هذا ..؟!
بسام بإبتسامه: هذا يعني ان مروان وصل الاوراق الاصليه للشرطه واتصل علي عشان يبلغني انه وصل بأمان ..
انصدم يحيى وفتح الاوراق اللي معاه فكمل بسام بنفس إبتسامته: اللي كان معاي هو نسخه من الاوراق وكنت ناوي اوديها للشرطه وبعدين اعطيهم الاصليه اذا طلبوها .. بس تفاجئت من مراقبتكم لي وتتبعكم وعرفت اني مستحيل اوصل لهناك .. حاولت وحاولت ولما فقدت الامل اتصلت بمروان وقلت له ياخذ الاوراق ويوصلها للشرطه بأسرع وقت وانا راح أأخركم قد ما اقدر ..
زادت ابتسامته وهو يشوف وجه يحيى المصدوم وكمل: وفعلا قدرت أأخركم .. استفزيتك بالكلام عشان لا تكشف حقيقة الاوراق .. لو كشفتها جان اتصلت بأتباعك عشان يمنعوا مدير اعمالي من انه يوصل للشرطه وبعدها فعلا كنزي اللي ابغى احميه راح يطير .. طول الوقت كنت قلقان وخايف انكم تكتشفوا ان الاوراق نسخه قبل لا يتصل مروان ويطمني بس للأسف .. حتى بعد ما اخذتم الاوراق ما انتبهتوا انها نسخه مب الاصليه .. كان قلقي بدون فايده ..
اختفت إبتسامته وكمل: عشان المره اليايه تفكروا مليون مره قبل لا تلعبوا معي .. ماكو مواجهه طلعت منها خسران يا استاذ يحيى .. انت ورئيسك راح تباتون بالسجن .. ليلة سعيده حبايبي ..
ضغط يحيى على الاوراق وملامحه تحمل الصدمه والعصبيه والخوف وكل المعاني الملخبطه ..
طالع في بسام وقال بصوت غاضب: راح تموت هني يا الحقيييييير ..
دخل القلق والخوف لقلب بسام لأن يحيى واضح انه فعلا مو ناوي يتركه ..
وفجأه طلعت علامات الصدمه والدهشه على وجوه الجميع وهم يسمعوا صوت سيارات الشرطه تقترب منهم ..
يحيى بحده: الحقييييير .. واستدعيت الشرطه بعد .. بسرعه اهربوا ..!!!
وبسرعه انطلقوا كل اتباعه وكل واحد ركب بالسياره اللي نزل منها وابتعدوا عن المكان ..
وقفت سياره عند بسام والسيارات الثلاث الباقيه راحت تلحق بسيارة يحيى واتباعه ..
نزل الشرطي واتجه لبسام اللي كان مصدوم من الوضع ..
كيف .. شلون ..؟!
هو ما استدعى الشرطه .. ومروان ما يعرف مكانه اصلا عشان يستدعي الشرطه ..
اصلا مروان ما يعرف انه طايح بورطه مع جماعة سعد ..
إذا مين ناداهم ..؟!
جاء الشرطي عنده وقال: بسرعه إذا كان معاك سلاح فسلمه لي ..
هز بسام راسه وهو يقول: لا ما معاي .. اصلا انا كنت المستهدف واللي هربوا هم اساس المشكله ..
نزل الشرطي سلاحه وقال: اوكي تعال معانا المخفر عشان نسمع اقوالك ..
بسام: طيب بس .. بس شدراكم عنا ..؟!
الشرطي: فيه واحد بلغ انه فيه خمس سيارات يستهدفون شاب وواضح انهم ناويين يقتلوه ..
بسام: منو ..؟!
الشرطي: ما ادري .. ما علموني بإسمه بس قالوا لي انه فيه شاب بلغ عن حادثة شغب ..
بسام: شاب ..!!
طلع الشرطي الاصفاد وكبل إيد بسام وهو يقول: اعذرني وحتى لو كنت بريء فالحذر واجب وان شاء الله تطلع منها ..
هز بسام راسه ولحق بالشرطي وركب ورى جنب شرطي ثاني كان بالسياره ..
طلع الشرطي جهازه وبدأ يقول تقريره لرئيسه في العمل ..
تنهد بسام بعدها قال بهدوء: واخيرا .. انتهى كُل شيء ..

========================================