شبكة همس الشوق - عرض مشاركة واحدة

24 - 3 - 2014, 07:27 PM

الساعه عشر الليل ..
فتح دولابه وطالع في الملابس بهدوء تام ..
اخذ له اول لبس شافه وبدل هدومه ..
اخذ مفاتيح سيارته وطالع فيها بألم ..
يكره هالسياره .. يكرهها كثير ..
هالسياره هي اللي بعدته عن تؤام روحه .. عن حياته ودنيته .. عن اخته ..
ضغط عالمفاتيح بقووه ..
ياليته هو اللي ركب مو هي ..
فتح باب الغرفه ونزل من الدرج وهو يحس بدوخه فضيعه ..
شافته شهد اللي كانت تمسح اعمدة الدرج ..
طالعت فيه بإستغراب .. هذه هي المره الاولى اللي يخرج فيها من غرفته من وقت ما ماتت اخته ..
انتبهت لخطواته اللي كانت مو متوازنه فقالت: أ أء انت فيك شيء ..؟!
طالع فيها ببرود بعدها طنشها واتجه للباب ..
اول ما وصل حس نفسه راح يطيح بس مسك بالباب وتوازن في وقفته ..
جت عنده بسرعه وقالت: لا الواضح انك ابدا مو بخير فلا تطلع .. يمكن تعمل حادث وتموت ..
دفها عنه وهو يقول: انقلعي عني .. مالج شغل ..
اخذ نفس عميق بعدها لف ظهره عالباب وجلس ..
مو قادر يوقف اكثر ..
يحس بإرهاق في كل جسمه ..
طالعت شهد فيه بعدها قالت: تحتاج شيء ..؟!
طالع راشد فيها بنظرات حاده وقال: انتي شنو تبين بالضبط ..؟! لا تعامليني جذي فاهمه ..؟!
هزت راسها بإيه وقالت: طيب ..
سكتت شوي بعدين قالت: ابغى اطلب منك طلب ..
ما رد عليها فقالت بتردد: ابغى اروح عند اخواني ..
انصدم من كلامها فلف يطالع فيها لفتره طويله بعدها قال: طول الاسابيع اللي راحت وانا بحجرتي .. ليش ما شلتي قشج وهربتي ..؟!
ترددت شهد لفتره بعدها قالت: حاولت مره اهرب ففقدت حاسة النظر ...
قاطعها راشد بحده: شايفه جدامج وحش عشان تتحجي بذي الطريجه ..
هزت راسها بلا وهي تقول: لا مو قصدي .. كنت بأقول اني حاولت مره اهرب من عقد انا وقعته بنفسي فعاقبني ربي .. فشلون تبيني اهرب مره ثانيه وهالمره فيه واحد بحاجه لأحد يوقف معه ويساعده .. انا مو بالانانيه ذي .. انا وقعت معاك عقد فعشان جذي ما اقدر اطلع إلا لما تسمح لي ..
طالع فيها لفتره طويله بعدها قال: انا مو بحاجه لأحد .. ومع هذا ما راح اسمح لج تطلعي من هالمجان إلا لما تنتهي مدة العقد .. انقلعي عن ويهي اللحين ..
طالعت فيه فتره بعدها قالت: طيب بس بزورهم .. ابي اشوفهم واشوف متطلباتهم .. هم مالهم احد غيري .. واللي يعافيك يا راشد .. هم الوحيدين اللي بقيوا لي .. هم دنيتي ..
لف وجهه للجهه الثانيه وقال: لا .. اعطي عنوانهم لأي احد وهو ييب لج اخبارهم ويشوف متطلباتهم وانا بادفع الفلوس .. بس طلعه من هني لا ..
نزلت دموعها .. ما تدري من الفرح ولا الحزن ..
ما راح تقدر تشوف اخوانها .. بس واخيرا راشد رضي انها تطمئن عليهم ..
راح تعرف اخبارهم وتشوف متطلباتهم وخصوصا اختها شادن .. لازم تعرف منو هالطارق اللي طلعها من المستشفى ..
واخيرا راح يطمئن قلبها .. واخيرا ..
فقالت من بين دموعها: شكرا يا راشد ..
طالع راشد فيها شوي بعدها قال بعصبيه: انقلعي عن ويهي ..
هزت راسها بإيه ولفت عشان تروح فسمعت راشد يكح اكثر من مره ..
لفت عليه وقالت: راشد انت بخير ..؟!
راشد بحده: السيد راشد ..
هزت راسها وقالت: اسفه .. طيب انت بخير ..
كح مره ثانيه وهو يقول: تلايطي عن ويهي ..
ترددت بعدها قامت وبعدت عنه ..
طالع في ايده شوي بعدها تحسس جبهته وانصدم لما شافها حاره ..
تأفف وهو يقول في نفسه: "مو وقته اصخن .. ابي اطلع من البيت .. ابي اروح لها .. ابي ازورها" ..
جت عنده شهد مره ثانيه واعطته كوب مويه وحبتين سابوفين وقالت: هذا مفيد .. بس تراه يسبب تخدر في الجسم لفتره وبعدها بإذن الله تصير بخير ..
طالع فيها شوي بعدها اخذ الحبوب والكوب وقال: انقلعي ..
قامت وقالت: تبغى ازهب لك العشاء اللحين ولا بعدين ..؟!
راشد: ما ابغى عشاء ..
شهد: بس انت لازم تاكل شيء .. اكلك وايد قليل .. راح ييك انيميا وهذا شيء مو كويس ..
راشد بعصبيه: عيل صلحي اي شيء وانقلعي ..
هزت راسها بإيه وقالت: طيب ..
لفت وراحت للمطبخ ..
بلع الحبتين وشرب بعدها كوب الماي ..
قام وانسدح على اقرب كنبه وغمض عينه يرتاح ..

========================================

في صباح اليوم اللي بعده وببيت ام فيصل ..
كانوا فارس واسيل وريما ياكلوا الفطور على نفس الطاوله ..
طالع فارس في اسيل وقال: يعني بتروحين ..؟!
هزت راسها بإيه وقالت: بسام بيي ياخذني .. باجي اشياء كثيير نصلحها منها هويتي ..
ريما: اسيل ما راح تكملي دراستج بجامعتنا ..؟!
هزت اسيل راسها بلا وهي تقول: الجامعه ذيج وايد حلوه .. صاري وصبى والضاحكون الثلاثه ووصايف فيها ..
فارس بإستغراب: وصايف ..! الاسم مو غريب علي ..
هزت اسيل راسها بإيه وقالت: هي البنت اللي كانت تعرف كل شيء عن امي .. واللي كانت بالبدايه تبغى تنتقم لموت امها مني ..
فارس: غريبه .. مو هي كانت في نفس جامعتنا ..؟!
إبتسمت اسيل وقالت: نقلت .. تقول جامعتكم مليانه مصايب هههه ..
فارس: هههههههههههه سبب غريب ..
هزت راسها بإيه وقالت: ومع هذا فأنا مشتاقه للجامعه كثير .. ندى ولين وليان وسارا و ههههه كارلوتا .. الدكتور تركي والدكتوره شاديه .. شلة غيدا المزعجه وشلة سامي الاشد إزعاج .. راشد الشعلان ومشاكله .. وشله ما اعرف اسمها بس هههههه بس كل الاولاد اللي فيها كشخه ..
ريما: ايه اعرفهم ذيج الشله .. زميلتي ريندا كانت مينونه بذاك اللي دايم يعمل سبايكي ..
اسيل: هههههههه حتى سارا معجبه بنفس الشخص مع انه برايي ذاك المكدش احلى ..
ريما: وقسم حتى انا اقولها ان ذاك اكشخ بس بكيفها مو راضيه تاخذ برايي ..
هز فارس راسه وهو يقول: اهتمامات البنات غريبه ..
ريما+اسيل: هههههههههههههههههههه ..
دق جوال اسيل في هالوقت فطالعت في الاسم بعدها قالت: بسام وصل .. مع السلامه ..
فارس: راح تيين مره ثانيه صح ..؟!
ابتسمت وقالت: اكيد راح تشوفوني إلا اذا مت ..
فارس بسرعه: لا تقولين مثل هالحجي .. راح نشوف بعض وهذا شيء اكيد ..
اسيل: ان شاء الله .. مع السلامه ..
حضنتها ريما وهي تقول بهمس: اسيل اتمنى انج صج ما تكوني شايله بقلبج علي شيء ..
اسيل بصوت منخفض: ابدا .. انتي اختي .. ومالي اخت غيرج .. يكفيني انكم ما غيرتم راييكم فيني بعد ما عرفتم من اكون .. احبكم وايد ..
ابتسمت ريما وبعدت عنها وهي تقول: مع السلامه ..
اسيل: مع السلامه ..
طلعت لبرى وشافت سيارة بسام واقفه ..
جت وركبت جنبه وهي تقول: السلام عليكم ..
حرك بسام السياره وهو يقول: وعليكم السلام .. ها انبسطتي ..
لفت عليه بترد بس وقفت كلامها لما شافت لصق جروح تحت شفته على اليسار وقالت بصدمه: شنو ذا ..؟!
بسام: ها ..!! ا بس لأنه تهاوشت شوي مع ناس .. لا تشيلي هم ..
اسيل: ناس ..!! يعني تهاوشت مع جماعه مو واحد ..!!!
تنهد بسام وقال: اسيل لا تشيلي هم .. ما صار إلا الخير .. المهم اني انتهيت من كل شيء ..
اسيل: شنو هذا اللي انتهيت منه ..؟!
سكت بسام فتره طويله بعدها قال: الوقت مو مناسب اني اقولج .. اسيل ابيج تيين وياي لمجان ..
اسيل: وين ..؟!
تردد بسام شوي بعدها قال: لأمي .. امنيتها تشوفج يا اسيل ..
لفت اسيل وجهها للجهه الثانيه وقالت: اعذرني .. ما اقدر ..
بسام: اسيل .. امي بالمستشفى وحالتها وايد صعبه .. امي ندمانه على اللي صار .. وتبي تشوفج لأنها حاسه ان نهايتها قريبه .. اسيل لا تكوني قاسيه جذي .. لا تعامل الناس بمثل ما عاملوج .. إذا هي اذتج فلا تآذيها انتي ..
هزت اسيل راسها وهي تقول: انت تطلب مني المستحيل .. هي ما آذتني .. هي دمرتني .. ما اقدر فلا تجبرني يا بسام ..
فسكت بسام وبعد مده قالت اسيل: بسام انا اسفه .. عارفه انها امك وكلامي ممكن يضايقك بس اعذرني ..
بسام بهدوء: عادي ماكو مشكله .. انسي السالفه ..
لفت اسيل وطالعت في وجه بسام بعدها قالت: نسيت اسألك .. انت استأجرت لي جناح ثاني لأنك قلت انه فيه احد وياك في نفس الجناح .. منو هو هالواحد ..؟!
بسام: بعدين اقولج لأن الوقت مو مناسب ..
هزت راسها بإيه بعدها قالت: لما ييتك انا ورؤى في ذاك اليوم كان فيه واحد طالع من عندك ..
بسام: هذا رفيجي وليد .. ليش تسألي ..؟!
اسيل: لا ماكو شيء بس ...
تنهدت وكملت في نفسها: "نظراته لي كانت غريبه .. انا ما اتذكر اني قد شفته فليش انصدم لما شافني ..؟! سالفته مره محيرتني" ..
اسيل: بسام لا توصلني للجامعه ..
استغرب بسام وقال: ليش ..؟!
اسيل: وصلني لشقتي القديمه .. لي اغراضي الجامعيه فيه .. باخذها واروح من هناك لجامعتي مشي وانت روح لجامعتك عشان ما تتأخر ..
بسام: لا لا راح انتظرج عشان اوصلج ..
اسيل: انا راح اطول .. فروح لأنك حتى لو انتظرتني ما راح اركب معاك ..
ابتسم وقال: اوكي انتي حره ..
لف السياره واتجه للشقه وخلال عشر دقايق وصل ..
نزلت فقال: انتبهي على نفسج ..
اسيل: اوككي ..
طلعت لفوق ودخلت لشقتها ..
فتحت الدواليب وبدأت تطلع اغراضها القليله ..
حطتها كلها بشنطه وبعدين اخذت كتبها وحطتها بشنطتها الجامعيه ..
بعد ما انتهت جلست عالكنبه ترتاح وشغلت التلفزيون شوي تطالع فيه ..
بعد خمس دقايق قامت وتركت الشنطه اللي فيها اغراضها واخذت بس شنطتها الجامعيه وطلعت ..
قفلت الشقه بالمفتاح فسمعت صوت واحد يقول: اسيل هني ..!! لازم نعمل بارتي وايد كبير ..
لفت ورى فشافت باسل متكي على باب شقته وبإيده الايباد حقه ..
طنشته وطلعت المفتاح من باب شقتها وحطته بالشنطه فقال باسل: تصدقين .. من بعد ما رحتي صرت اصحى واروح للمعهد متأخر .. وقسم فقدتج ..
اسيل: اللحين انت شتبي ..؟!
باسل: ولا شيء .. بس متى بترجعي تعيشي هنا ..؟!
اسيل: مالك شغل ..
باسل: لئيمه .. وعلى طاري اللؤم .. ترى قبل فتره ياء اخوج إياد لهني وسأل عن وحده من دون اصل فقاله الموضف انه فيه وحده اسمها اسيل محمد استأجرت شقه .. ياء ودق عالشقه بس للأسف ما كنتي مويوده ..
طالعت اسيل فيه فتره فقالت: فيه سؤال من اول ابي اسألك إياه .. انت شلون عرفت اني سجى مع اني ما تحجيت وياي ولا سألتني عن اي شيء ..؟!
ابتسم وقال: من عيونج .. خبرتني سيرو ان اخت إياد لها نفس عيون اخوها ولما شفت عيونح عرفت انج سجى وخصوصا ان رؤى تدور عنج وانتي من دون اصل ..
اسيل: بس انا كنت دووم حاطه عدسات عشان لا اطلع شاذه واسمع من الناس كلام واشاعات فوق اني لقيطه .. فشلون عرفت اني سجى ..؟!
باسل: اول يوم شفتج فيه كانت عيونج رصاصيه وبعدين استغربت لما شفت انها صارت سوداء .. احم ومره من المرات دخلت لشقتج وفتشت فيها وفعلا لقيت علبة عدسات فتأكدت ..
عصبت اسيل من تصرفه .. صدقت رؤى .. هالشخص تصرفاته مو طبيعيه ..
شوي استغربت .. هي ما تتذكر انها نزلت عدساتها ابدا ..
لحضه .. لما راحت مع صبى والاغيياء الثلاثه لقصر ابوها ..
ايه صح صكت هي بواحد وطاحت احدى عدساتها ..
وبعدها لما رجعت البيت قابلت باسل لأول مره ..
مرت من جنبه واتجهت للدرج من دون لا تقول شيء فقال وهو يقلب بالايباد: طيب صحيح الخبر المنتشر بالانترنت ..؟!
لفت عليه فقال: يقولون ان سعد الراهي .....
قاطعته اسيل: ما ابغى اسمع اي شيء عنه ..
ونزلت من الدرج ..
هز كتفه وهو يقول: هي حره ..
دخل لشقته وعيونه عالايباد يقلب فيه ..

خرجت اسيل من العماره واتجهت للجامعه بخطوات سريعه عشان تلحق عالمحاضره ..
دخلت للجامعه واتجهت لكلاسها وهي تطالع في ساعتها ..
تأخرت خمس دقايق عن اول محاضره ..
والمشكله انها محاضره للدكتور راكان .. في الايام اللي راحت شافت عقابه للطلاب المتأخرين ..
عقوباته محرجه بصراحه ..
دخلت للكلاس وقالت: السلام عليكم ..
لف الدكتور راكان على جهتها وقال: ليش التأخير ..؟!
اسيل: اممم ييت مشي ..
طالع فيها شوي بعدين قال: اوكي ادخلي ولا عاد تتأخري مره ثانيه ..
استغربت اسيل من كلامه فقالت وحده تعاقبت امس: دكتور ليش .. هذا ظلم ..
فقال الدكتور: اعرف .. بس انا حر .. وابغى افوت هالشي لها .. زي ما تقولون بسبب المعرفه القديمه اللي بيني وبينها ..
لفوا كلهم يطالعوا في اسيل بفضول اما اسيل فاتجهت لكرسيها وهي تقول في نفسها: "عشانه سألني ذاك اليوم عن المهاوشه صارت معرفه قديمه .. انسان غريب" ..
جلست على كرسيها فقالت صبى بحماس: اسيل شنو اللي بينج وبينه ..؟! يوووه يا حضج يعرفج من اول ..
طلعت اسيل كتابها وهي تقول: لا تصدقيه .. هو يبالغ ..
لفوا الثلاثه يطالعون فيها فقالت: نعم .. خير ..
طالعوا فيها شوي بعدها لفوا لقدام ..
تنهدت اسيل وحطت إيدها على خدها تراقب الشرح ..
بعد ما انتهت المحاضره لم الدكتور اوراقه وقال: لا تنسوا العمل اللي طلبته منكم ..
الفصل: حاضر ..
لف على اسيل وقال: اسيل امشي برى ابييج ..
استغربت اسيل من طلبه فقامت من مكانها وطلعت وراه تحت انظار الطلاب ..
قفلت باب الكلاس ومشيت وراه لحد ما وصلت لمكتبه ..
جلس عالكرسي وقال: ايلسي ..
جلست فقال: انتي كنتي بالجامعه اللي ادرس فيها صح ..؟!
اسيل: ايه ..
د.راكان: طيب ليه نقلتي هني ..؟!
ترددت اسيل فقال: تتهربين من الاشاعه صح ..؟!
اندهشت من كلامه بعدها قالت: ايه ..
طالع فيها فتره بعدين قال: شعلاقتج بطارق ..؟!
انصدمت من سؤاله وقالت: طارق ..؟!!
د.راكان: ايه .. رفيج انس بالصف الثالث ..
لفت وجهها وقالت: ما بيني وبينه اي علاقه ..
د.راكان: اذا كان كلامج صج عيل ليه اول ما انتشرت الاشاعه قام ودخل بمضاربه مع اللي انشرها .. الطالب اللي انشرها اشتكى لي منه ..
لفت اسيل عليه بعدها قالت: وانا شدخلني .. اعذرني يا دكتور اذا كنت بتتكلم بهالموضوع فأنا ابغى اطلع ..
د.راكان: اوكي انتي حره .. اصلا سؤالي كان بدافع الفضول ..
قامت اسيل وقالت: تآمر بأي شيء ..؟!
هز راسه بلا فطلعت من المكتب ..
ظل فتره يطالع في الباب بعدها طلع اوراقه وبدأ يشوف شغله وهو يقول: ما راح اخلي السالفه تعدي .. فضولي ذابحني ..