شبكة همس الشوق - عرض مشاركة واحدة

24 - 3 - 2014, 07:30 PM

الظهر وببيت سلطان الراهي ..
كان جالس بمكتبه يشوف لشغله ..
شرب شوي من الكوفي وقال: وبعدين ..؟!
تكلم الرجال اللي واقف قدامه وقال: يعني بإذن الله في نهاية هذا الاسبوع راح يرجع ..
ابو سامي: اها .. طيب وايش صار على مراقبتك لجاك ..؟!
ابتسم وقال: اطمئن انا اراقبه خطوه بخطوه ومن اليوم اللي سافر فيه سامي صار بس يطلع مع زوجته يتمشى او يلفلف بالسياره حول الدوحه .. تصرفات طبيعيه ما عدا انه يمر على القصر بشكل يومي كل صباح عشان يشوف إذا كان سامي رجع من السفر ولا لا ..
ابو سامي: اسمع .. لما يرجع سامي إياني وإياك يتعرض له جاك وهو في طريجه للبيت .. راح احملك مسؤلية اللي يصير فاهم ..؟!
هز راسه وهو يقول: إيه فاهم .. اطمئن ..
ابو سامي: خلاص اطلع ..
لف وطلع من المكتب ..
تنهد سلطان وقال: شلون افتك من شرك يا جاك ..؟! انت لك سوابق كثيييره على حسب كلام باتريك بس فترة نومتك بالمستشفى شفعت لك كثيير واللحين ماكو شيء اقدر عن طريجه امسكك فيه ..
هز راسه وهو يقول: مو هذه هي المصيبه اللحين ..
طالع في الجريده وكمل: ليه وصلت نفسك لهالحاله يا سعد ..؟!
قرأ العنوان اللي كان موجود بالصفحه الاولى / تهريب اسلحه ، تجارة مخدرات والكثير من الاتهامات ضد التاجر المعروف سعد الراهي ..
ابو سامي: وفوق كل هذا اختفيت .. ناوي تهرب .. طيب ما فكرت بولدك عالاقل ..؟!! وينك انت اللحين ..؟!

........................................

اوتاوا ~ كندا ..
كانت لابسه نظاره شمسيه تغطي معظم وجهها وقبعه صوفيه بسبب الجو البارد ..
الجو بارد ومثلج تقريبا فصار طبعا مشكوك بأمرها لأنها لابسه نظاره شمسيه بجو زي كذا ..
ما اهتمت للشكوك اللي حولها ..
اشترت من محل كافيه كوبين قهوه حاره واتجهت للشقه الموجوده بذي العماره النائيه ..
قفلت الباب وراها واتجهت للغرفه اللي فيها شريكها ..
حطت قدامه كوب القهوه وجلست هي كمان ..
بعدت النظاره عنها وقالت بلغتها الانجليزيه: هيا يا جو .. الجو بارد ويجب ان تشرب شيئا يدفئك ..
طالع فيها جوزيف بنظرات هادئه وقال بصوت هامس: هل عرفتي شيئا ..؟!
هزت راسها بلا وقالت: كلا .. سألت عن ابنك كثييرا ولكن انا حقا لا اعلم ان كان قد مات ام انه ما زال على قيد الحياة .. لكن اطمئن وكن متفائلا فبطلا كأبنك لا يمكن ان يموت بسهوله ..
طالع في الكوب حقه لفتره بعدها قال بنبره حاقده: كله بسببك يا سعد .. اقسم بأني لن اتركك وهذا وعد .. ايها الوغد ..
ابتسمت رينا وقالت: لدي خبر بالتأكيد سيفرحك .. اتعرف برنارد ..؟!
هز جوزيف رأسه فقالت: لقد قابلته وعقدت معه اتفاقا .. سيقوم بتهريبنا بحرا مقابل مبلغ من المال .. سنخرج من هنا فالشرطة تتبعنا ولن تتركنا ..
جوزيف بهدوء: لقطر .. اطلبي منه ان يهربنا لقطر ..
طالعت فيه فتره بعدها قالت: حسننا كما تريد ..

وفي مكان مو بعيد عنهم ..
داخل اسوار السجن الكبير بتلك المنطقه ..
كان جالس والألم واضح على ملامحه ..
كل الادله ضده ..
مافي اي امل للخروج ..
راح ينسجن .. وفترة سجنه طويله ..
راح يعيش بمكان مظلم وموحش مع ناس شرسه ومخيفه ..
هذا جزائه .. هذا جزاء اللي صلحه بحياته ..
ان الله يمهل ولا يهمل ..
قسوته على وحده يتيمه ..
شربه للمحرمات وسهراته مع اصحابه ..
تجارته المحرمه وسعيه للمال مهما كان اصله وطريقة اخذه ..
اللحين جاء دور الجزاء ..
فترة سجنه الطويله ذي هي كتكفير عن ذنوبه كلها ..
والعقاب الاقسى بيكون يوم القيامه ..
غمض عيونه وهو يستغفر بداخله ..
خلاص تاب ..
تاب من قبل لا يدخل السجن ..
تاب من قبل لا يسافر لهالصفقه اصلا ..
بس نيته للسفر هالمره كانت غير ..
كانت نيته هو تكفير لذنوبه ..
كان يبغى يطيح بشركة نوسترادا ويفك الناس من شرها وبعدين يستقيل ويبلغ عن شركة سعد ..
هو تاب بس العقاب كان لابد منه ..
لو انه تاب من بدري بس للأسف ما صحي على نفسه إلا من بعد ما مات ابوه ..
صحي على نفسه بعد فوات الاوان ..
ابوه ..
لحد اللحين صورة ابوه محفوره براسه ..
نظراته والدماء والجروح المنتشره بجسمه والحروق كمان ..
همساته وهو يوصيه على امه واخوانه ..
شهقته وفراقه عن العالم ..
تنهد بمراره .. ندمـــــــان ..
ما قدر يبر ابوه ..
مات ابوه وهو ما قدر يبر فيه ..
ليته بس يرجع عشان يعامله احسن معامله ..
ليته يرجع عشان يشيله بعينه ..
لو يرجع ما راح يتركه لحضه وحده ..
ما راح يصرخ عليه ولا يتأفف من كلامه ..
راح يخليه وملك ويكون له خادم تحت رجله ..
بس خلاص فات الاوان ..
ما صحي إلا بعد ما فات كل شيء وصار في مرحلة الندم والتمني ..
حتى وصيته ما قدر ينفذها ..
امه واخوانه ما صار لهم احد من بعده ..
منو بيصرف عليهم ومنو بيشوف متطلباتهم ..؟!
حتى لو كان لهم عم فهو ولي امرهم والمفروض ما يخليهم عاله على احد ..
المفروض ما يخلي احد يصرف عليهم غيره ..
هذا المفروض يصير بس كان في غفله وما صحي إلا بوقت متأخر ..
متأخر وبقوه ..

========================================

بعد منتصف الليل ..
دق منبه جوالها فقامت بتثاقل وقفلته ..
طالعت في الساعه بعدها قامت واخذت لها حبه وشربت بعدها كوب مويه ..
هي حاليا تمر بفترة زكام ولازم تاخذ الدواء حقها اول بأول وبمواعيده ..
بعد ما خلصت رجعت تنام ..
حطت راسها عالمخده وحاولت تنام بس ...
بس طار النوم ..
تأففت وقالت: لازم اغير وقت الدواء عشان لا اتقروش جذي بالليل ..
قامت واخذت كتابها ونزلت لتحت ..
راح تعمل لها شيء تاكله وتراجع الدرس اللي اخذته اليوم لأنها ما فهمته عدل ..
مرت من جنب باب الصاله واستغربت لما شافت ضوء طالع منه ..
فتحت الباب فشافت ان الانوار طافيه ما عدا شاشة البلازما وقدامه عالكنبه بنت عمها جالسه وحاضنه رجلها وتطالع بالتلفزيون بسرحان ..
جت عندها وقالت: سيمو ..!! غريبه صاحيه هالحزه ..؟!
سيمو بهدوء: انا اصلا ما نمت ..
استغربت وسألتها: ليش ..؟! عسى ماشر شفيج ..؟!
ضمت رجلها اكثر وقالت بهمس: مضايقتني حالة رفيجتي لينو .. ابوها واخوها انسجنوا وهي مريضه وصارت ما عاد تقدر تحمل ابدا .. كل ما اتذكر حالتها احس اني راح ابجي ..
جلست جنبها وحطت إيدها على كتفها وقالت: ادعي الله انه يفرج همها .. المشكله لا ولدت بذره صالحه بوسط عائله فاسده .. الله يكون بعونها ويخفف عنها ان شاء الله ..
سيمو بهمس: والله تكسر الخاطر يا صفصف .. دايم اشوفها قويه ومتماسكه بس اللي صار كسرها .. يعني ابوها ما فكر بحال بنته لما عمل جذي ..؟! اخوها ما اخذ بالاعتبار نفسية اخته قبل لا يعمل جذي ..؟! صارت وحيده .. وفوق هذا مريضه بمرض مؤلم .. مؤلم وايد ..
تنهدت وصايف وقالت: خلاص سيمو اهدأي وادعي لها .. حزنج ما راح يفيدها .. الله فوق وما راح يتركها لحالها .. رحمة الله واسعه وراح يحفضها ويحميها ..
هزت راسها بإيه وقالت: صفصف ..
وصايف: هلا ..
سيمو: مو قادره انام من كثر التفكير فيها .. هي اعز صحباتي ..
وصايف: ونعم الصاحبات اللي مثلج .. بس لازم تنامي وراج باجر جامعه ..
ابتسمت سيمو وقالت: ههههه وراي مدرسه مب جامعه ..
وصايف: هههه معليش لخبطت ..
سيمو بهدوء: كنا مقررين اننا اذا دخلنا الجامعه نكون مثل بعض .. نفس التخصص وبنفس الكلاس ونشتري نفس الجنط والشوزات ..
ابتسمت لها وصايف وقالت: وان شاء الله امنيتكم تتحقق ..
سيمو: ان شاء الله ..
وصايف: ياللا قومي على حجرتج وتذكري وذكريها ان سجنهم ماهي نهاية العالم .. راح يطلعوا بعدين وهم تائبين ان شاء الله ويرجعون لها صالحين ويعيشوا باحسن عيشه .. وما بعد الشدة إلا الفرج ..
هزت سيمو راسها وقالت: صفصف انا راح ازورها باجر .. تعالي وياي وقولي لي هالكلام اللي تقولينه لأني ما اعرف ارتب حجي مفيد مثلج ..
ابتسمت وقالت: اوكي .. واللحين روحي لحجرتج ..
سيمو: طيب ..
باستها وقالت: تصبحين على خير ..
وصايف: وانتي من اهل الخير ..
طلعت سيمو لغرفتها فتنهدت وصايف وقالت: الله يكون بعونها .. حالتها صعبه ..
قامت وراحت للمطبخ تاخذ لها شيء تاكله ..
فتحت الثلاجه وطالعت فيها شوي ..
اكتفت بعلبة بيبسي ما تدري لمين بس بكره راح تعوض صاحبها ..
رجعت للصاله واخذت الريموت وقلبت في التلفزيون شوي ..
من زمان عن التلفزيون .. اذا جلست عليه فهي ما تقلب إلا على اكشن او تو ..
شافت في طريقها مسلسلات خليجيه فإبتسمت وقالت: هالممثلين لين اللحين عايشين ..!!
اخر عهدها بالمسلسلات كان في الاعدادي تقريبا فعشان كذا تحس الممثلين قديمين وبقوه ..
في النهايه قررت تستقر على قناة العربيه عشان ما يشغلها التلفزيون عن المذاكره ..
فتحت كتابها وطالعت فيه شوي ..
ظلت فتره مو قصيره وهي تطالع في الكتاب بسرحان بعدها قالت بهمس: الله يرحمج يمه .. الله يرحمك ابوي .. نتقابل بالينه بإذن الله ..
ابتسمت وقالت: اخذت مني امي وابوي بس عوضتني بالصحه والعقل والامان وبعم ماكو اطيب منه وببنت عم شفافه وطيوبه .. فشكرا لك على كل شيء ..
فتحت على صفحة 127 وبدأت تقرأ الدرس اللي اخذته اليوم عشان يثبت بمخها وتفهمه ..

========================================