شبكة همس الشوق - عرض مشاركة واحدة

24 - 3 - 2014, 07:32 PM

الساعه ثمانيه الصبح ..
ظل فتره ساكت يراقب اصحابه بملل ..
تنهد وجلس فتره يطالع فيهم بعدها قال: يا شباب .. انا طفشان وقسم ..
يزيد وهو يقرأ بكتابه: جب .. بعد شوي عندنا امتحان فخلنا نذاكر ..
عماد: بس وقسم ان الوضع ممل اقوى شيء .. انا طفشان .. طفشـــــــان ..
ريان: اشش .. الماده صعبه ويبيلها تركيز ..
عماد بحزن: وينه ..؟! وينه اللي إذا قلت له طفش قال ياللا ورمى الكتاب وراه .. وقسم له وحشه ..
يزيد: ياخي ما تعرف تسكت .. تذمر بعيد عنا .. احنا عندنا امتحان .. ا م ت ح ا ن .. وصلت المعلومه ولا لسى ..؟!
عماد: طيب ليه غاب صالح وخلاني وحدي ..؟!
ريان: عماد بليييز واللي يعافيك اكرمنا بسكاتك .. مو قادرين نركز من هذرتك ..
لف عماد عليه وهو يقول: ريان حس فيني .. وقسم اني راح انطق من الطفش .. ابي شيء حماس .. شيء كوول .. شيء وناسه .. راح اموت لو ضليت جذي .. اصلا .....
وقف كلامه وهو يطالع ورى ريان بعدها قال: هيه هيه هناك مهاوشه ..
لفوا ريان ويزيد فشافوا ناس متجمعين حول اثنين يتهاوشون ..
يزيد بدهشه: هيه مو كأنه ذاك عصوم اللي ييلس ورانا بالكلاس ..؟!
ريان: قوم نشوف شسالفه ..؟!
راحوا فقام عماد وراهم بحماس مع انه ما يعرف هالآدمي ابدا ..
دخلوا ثلاثتهم من بين الطلاب لحد ما وصلوا لعند عصوم وهو واقف يخاصم طالب من سنه رابع ..
دق يزيد كتف ريان وهو يقول: هيه ريان ادخل فرق بينهم ..
ريان: وشو ..؟!!!
يزيد: هذا رفيجك بالكلاس عيب عليك توقف تتفرج ..
ريان: وانت وين تدرس حبيبي .. لا يكون في سواحل افريقيا .. انت بعد معاه في نفس الكلاس .. فرق بينهم انت ..
يزيد: ياخي انا مو من النوع اللي يتدخل بدون سبب .. ادخل انت عشان لو كان التدخل فيه قصف جبهه تنقصف جبهتك انت مب انا ..
طالع فيه ريان بنص عين فبعدهم عماد عن طريقه وهو يقول: وخروا وخروا .. خلوني افرغ طفشي شوي ..
بعدوا عنه وقال ريان: تفضل فرغ حبيبي ..
طالع عماد في اللي يتهاوشون وقال: يا شباب ياللا هدوا الوضع وكل واحد يتيسر ويتوكل على ربه وينقلع .. الهواش مب زين وخصوصا بمجان راقي مثل هالجامعه ..
طالعوا فيه الاثنين بحده فضحك بترقيع وهو يقول: كنت اتغشمر ..
ورجع لمجانه ..
يزيد: بصراحه .. لا تعليق ..!
استاء عماد وقال: صحيح نظراتهم تخوف بس ياخي انا مصر اصلح مشكله عشان افرغ طفشي ..
تقدم مره ثانيه وقال: خلاص بس يا بزارين .. شفيكم تتهاوشوا وكأنكم عيال الابتدائي ..؟! ياللا بطلوا مبزره انت وياه .. بسرعه ترى وقسم لا اكسر راسك انت وياه باحدى حركات الجودو اللي يصلحها جاكي شان ..
كل الطلبه طالعوا فيه .. هذا الانسان شنو يبغى بالحياة ..
قال الشاب اللي بالصف الرابع: انقلع انت قبل لا افرش بويهك البلاط .. ترى انا مو فايق للفاضين المهايطين مثلك ..
يزيد: عماد روح دور جبهتك ..
عماد: اقول ترى محد مهايطي غيرك .. جب بس جب لا تجبرني استعمل حركة الكاراتيه اللي صلحها جاكي شان في فلم هذاك الشيء ..
الشاب: وبعدين معاك ..!!! انت متى بتنقلع عن ويهنا وتفكنا بجاكي الموجود بفلم ذاك الشيء ..؟! ازعجتنا الله يشغلك بنفسك ..
عماد: انتم اللي ازعجتونا بهواشكم .. صج بزرنه .. ياللا تقلعوا على كلاساتكم ..
لف على عصوم وقال: وانت مو انت بكلاس ريان ويزيد ..؟!! وراكم امتحان صعب فليش ما تراجع يا ريال ..؟!
لف عالشاب الثاني وقال: وانت لا تصلح روحك قوي .. روح ضارب اللي هم بعمرك اولا بعدين استفرد عضلاتك عالباجي ..
عصام: انت اللحين تعرف شنو هي اساس المشكله ..؟!
طالع عماد فيه وهو يقول: ابدا ..
عصام بعصبيه: عيل انقلع عنا ترى مو فايق لظرافتك ..
تكتف عماد وقال: ماني مبعد .. انا ابي اصلح بينكم .. ياللا فضفضوا وقولوا شنو اساس مشكلتكم وراح احلها .. فأنا مصلح اجتماعي وناوي اصلح بينكم ..
ريان: عماد اطلع منها قبل لا يفرغوا اللي فيهم فيك ..
تكلم احد الطلاب يقول للي بالصف الرابع: بندر بالله عليك ادب الضريف اللي واقف بينكم ..
عماد بإستهبال: ايه يا بندر بالله عليك اسمع كلام رفيجك ..
ريان: هذا ناوي على نفسه ..
يزيد: هذا عماد وهذه طريجة افراغ طفشه .. الله يرحمه ..
ريان: امين ..
مسكه بندر من بلوزته وقال بتهديد: هذه اخر مره اقولك ابعد عن طريجنا لا اكفخك ..
عماد: هه انصحك ما تفكر اصلا عشان لا استعمل ضدك احدى حركات ....
قاطعه بندر: جاكي شان ها ..؟!!
عماد: لا .. احدى حركات بروس لي ..
بندر بعصبيه: وبعدييين معاك ..؟!!!
عماد: طيب ينفع جيت لي ..؟!
ظهرت شرارة الغضب من عيون بندر فقال عماد: خلاص خلاص نرجع لجاكي شان ولا تزعل ..
لكمه بندر بخده فتراجع عماد خطوتين ورى ..
صفق عصام وهو يقول: برافو برافو يا استاذ بندر .. خلاص اثبت لي انك قوي .. امش برى الجامعه نتفاهم ..
بندر: اوكي .. اوكي ياللا نطلع ..
تقدم عماد بسرعه ووقف قدامهم وهو يقول: وه وو لحضه لحضه .. انا باجي ما تفاهمت معكم .. ممنوع الطلوع لحد ما اتفاهم معكم ..
تكتف بندر وقال: طيب .. وش هالشيء اللي تبي تتفاهم فيه معنا ..؟!
حك عماد خده وهو يقول: اممممم ايه لقيتها .. ابي استرد اللكمه الضعيفه اللي قبل شوي ..
عصام: طيب استرد وخلصنا .. انا شنو دخلني ..؟!
بندر: يرب تمد إيدك بس .. صدقني راح اكسرها ..
عماد: اوه ماي قاد .. سمعتوه ..! قال اكسرها بنبره قاسيه .. من اي كوكب انت ..؟!
واحد من الطلاب: اوه الدكتور تركي ياي ..
مد عماد إيده وهو يقول: ياللا خلاص تفاهمنا .. مع السلامه ..
وراح عنهم والكل يطالع فيه بـ؟؟؟؟؟؟؟؟؟ ..
بعد الطلاب عن طريق الدكتور تركي ..
وفي نفس الوقت تراجعوا يزيد وريان عشان يرجعوا يذاكروا ويطلعوا من المشكله ..
مسكه الدكتور تركي من ورى وهو يقول: لحضه لحضه يا ريان .. على وين شارد يا اساس المشاكل ..؟!
ريان: بروح اموت ..
لف عالدكتور وقال: دكتور شفيك علي .. وقسم هالمره ما صلحت شيء ابدا ..
يزيد: فعلا احنا مالنا دخل .. كنا متفرجين ..
يزيد: عيل انت شريكه كمان ..؟!
يزيد بصدمه: لا لا لا ..
تربع عماد وطالع في كتب اصحابه بعدها طالع في التجمع وقال: مساجين .. الله يكون بعونهم ..

قال واحد من الطلبه: استاذ .. اساس المشكله بين عصام وبندر ..
يزيد: سمعت يا دكتور .. مو احنا ..
ريان: لا تحاول .. هو خلاص شايف اننا اساس المشاكل وما راح يشيل هالفكره من راسه وخصوصا انا ..
د.تركي: وينهم عصام وبندر ..؟!
بندر: نعم دكتور ..
عصام: انا عصام ..
د.تركي: يعني اساس المشكله هو انتم ها ..؟!
بندر: مو بس احنا .. حتى رفيج هالاثنين يستاهل العقاب ..
طالع الدكتور في ريان ويزيد وقال: رفيجكم ..!! عيل اكيد سامي ..
هز ريان راسه وهو يقول: للأسف .. العقل المدبر لشلتنا هو السبب بكل مصايبنا .. عماد اللي متورط مو سامي المسجين ..
د.تركي: عماد ..؟!!
قالت وحده من الطالبات: دكتور صحيح عماد تتدخل بس هو بالاساس كان يبغى يفرق بينهم .. نيته الاصلاح بينهم وهو اللي منعهم من انهم يتضاربوا ويكملوا هواشهم برى ..
بندر: بس يستاهل العقاب ..
البنت: لا ما يستاهل .. انت مقهور منه لأنه وقفك .. حتى انك ضربته وما رد وضربك لأنه مو في نيته الهواش ..
تكتف الدكتور وقال: اها .. اللحين فهمت .. بسرعه يا استاذ انت وياه روحوا للمرشد واحكوا له مشكلتكم وهو يتصرف .. من الان ما راح افوت لأحد .. ياللا بسرعه ..
طالعوا ببعض بعدها راحوا للمرشد ..
لف الدكتور على ريان ويزيد وقال: وانتم ليه ما تصلحوا بينهم بدل ما تكونوا متفرجين ..؟! طبعا عاجبكم الوضع .. اي شيء يسبب الازعاج او المشاكل غصب عنكم تحبوه وتتمنوا انه يستمر ..
هز راسه بيأس بعدها رجع لمكتبه ..
تفرقوا الطلاب وكل واحد رجع للمكان اللي كان فيه ..
شافهم عماد من بعيد جايين فقال: اهلييييين اصحابي .. وفجأه صرتوا كسالى وتهتموا بالمضاربه اكثر من دراستكم .. طحتوا من عيني ..
طالعوا فيه بعيون ناريه فإبتسم بترقيع وقال: عفوا .. انا رايح للحمام ..
وراح قبل لا يفرغوا غضبهم فيه ..
المفروض ما يلومونه ..
هو طفشان ويبغى يفرغ طفشه وبس ..

========================================

بعد مرور اربع وعشرين ساعه ..
الساعه 12 الظهر ..
كان واقف ويدقدق بجواله لحد ما يخلصون من شغلهم ..
واخيرا .. شوي وينتحر من الملل ..
قدم له الموضف ورقه وقال: وقع بالاسفل لو سمحت ..
اخذ القلم من ايد الموضف ووقع في نهاية الورقه بعدها قال: خلاص اطلع ..؟!
الموضف: خلاص تقدر تطلع استاذ طارق ..
دخل الجوال بجيبه بعدها طلع وركب سيارته ..
اتجه مباشرة للعماره اللي استأجر فيها انس شقه لهم ..
وقف سيارته وطالع في العماره .. من زمان مستأجرها انس واللحين بس راح يشوفها ..
بس كويس ماهي بعيده عن الجامعه وهذا اهم شيء ..
طلع فوق وفتح الشقه بالمفتاح اللي اعطاه إياه انس اليوم قبل لا يروح للجامعه ..
دخل لداخل واتجه لشنطته .. فتحها وبدأ يدور بين اغراضه وبعدها طلع الاوراق اللي تثبت قرابة شهد له ..
راح يروح اللحين لبيت ذاك الراشد وياخذ شهد من عنده ..
المفروض تكون اللحين هي وشادن عند امه بس اللي صار اخره كثيير ..
طلع من الشقه وقفل الباب ..
تذكر كلام انس بأن شادن يتركها عند الجيران ..
بغى يطمئن عليها قبل لا يروح بس بطل ..
نزل لسيارته وحرك متجه لقصر راشد ..
تأفف وهو يدور بين اغراضه على عنوان بيت راشد ..
مشكلته ان يضيع الشيء بسرعه ..
دق على سهام وبعد فتره ردت وهي تقول من غير نفس: نعم .. خير ..
لحد الان متزاعله معاه من وقت المهاوشه اللي صارت بينهم قبل لا يسافر ..
طارق: ماكو بنت عاقله ترد على اخوها الكبير بذي الطريجه .. ياللا عدلي اسلوبج اشوف ..
سهام بعناد: مابي .. وما راح اعدله إلا بمزاجي .. بسرعه قول شنو تبي قبل لا اقفله بويهك ..
رفع طارق حواجبه وقال: انتي متى بتكبرين على حركات البزارين ذي .. بسرعه اعطيني عنوان رشيدان وخلصيني ..
سهام بعصبيه: انت جم مره تضيعه ها ..؟! مالك فتره طويله من اخر مره طلبته مني .. وين راح ..؟!
طارق ببرود: صوت بومه وقسم .. هات العنوان قبل لا انا اللي اقفل الموبايل بويهج ..
سهام: ياخي قفله انت اللي تحتاجني مب انا .. ولعلمك ترى الر..... ألو ..
قفل طارق الجوال وحطه جنبه واتجه للحي اللي فيه راشد ..
هو يتذكر المنطقه بس للأسف ما يتذكر موقع البيت ..
راح ينتظر العنوان من سهام ..
ابتسم لما سمع صوت رساله ..
فتحها ولقاها من سهام ..
سحب على السب الموجود فوق وبعدها قرى العنوان ..
رجع الجوال مكانه واتجه لبيت راشد ..
واخيرا راح ينسدل الستار على قصة شهد وراشد وطارق ..
بس وش بتكون احداث المشهد الاخير ..؟!

انتهى بارتنا المليء بالاحداث اللي تعتبر مفاتيح لاحداث اكثر إثاره ..
آرائكم + توقعاتكم ..

|$[ نهاية البآرت ]$|