شبكة همس الشوق - عرض مشاركة واحدة

17 - 4 - 2014, 09:47 AM

ركبنا السيارة وانا اعيد عليها الوعد مرة ثانية

عمر = خلاص يامريم .. اوعدك اجي انا ورايد ونحاول معه ... يمكن اذا شاف رايد اخوها يوافق ناخذها

مغطيه وجهها بيديها وتبكي

شغلت السيارة وحركت

الله يعكر مزاجه زي ماعكر مزاجنا

وصلنا بيتي .. ودخلنا ومريم كأنها هدت شوي بعد وعودي طوال الطريق لها

تنهدت وانا افتح الباب لمريم

انا نظاميا صفر على الشمال لنادر وهو اخوي كيف عاد لدانة .. وهي بنت غريبة بالنسبة لي

نزلت مها عباتها والوجه متنفخ من البكا

ابتسمت لها وانا اطالعها وقلت امزح واحاول اعدل المزاج شوي

عمر = له له له .. مايستاهل واحد مثل عمك يخرب وجهك الحلو ( ولفيت ذراعي على كتفها وانحنيت لمستواها اطل على وجهها ) وش ذنبي انا

شوي شوي نزلت مريم راسها بقوة مستحية وهي تضم عباتها لصدرها وكأني شفت شبح ابتسامة

ضحكت ومسكت اكتافها ومشينا اوريها البيت على غرفة غرفة

لين وصلنا عند غرفة رايد ووقفنا عند بابها

ولقيناها مظلمة والمكيف شغال .. وابتسمت وانا اشوف رايد مغطي نفسه بالكامل ونايم على السرير

التفتت لمريم وهي تدقق بالنظر على السرير مستغربة

عمر = هذا اخوك الكسلان

ودخلت الغرفة وشغلت الانوار وكشفت اللحاف عن رايد ولقيته عليه ملابسه الداخلية ونايم

نغزته باصبعي على خصره عشان يقوم .. تحرك رايد وطالعني شوي يستوعب

وبعدها فز جالس

رايد = عمر ( وعلى طول التفت للي واقفة عند الباب وشهق ) مريم ( وقام بسرعة وراح عند اخته ونسى عمر واللي جاب عمر )

شفت رايد يضم مريم ويسلم عليها ويباركلها ولما شاف وجهها واضح عليه البكى سألها بخوف

رايد = شكلك باكية

وعلى طول التفت لي معصب

رايد بعصبية = هيييييه وش مسوي باختي انت

عمر = اهااا بس خل عنك

مسكت مريم يد رايد

مريم = مو هو ياخوي .. بس كنت مشتاقة لدانة

التفت رايد لمريم بصمت

ما ابي اجيب سيرة دانة ومشكلتها الحين وقلت اغير الموضوع

عمر = هييييه تعال انت ووجهك ليه ماجيت الظهر عند بيت جدي .. الكل كان هناك

التفت رايد لي وحط يده على كتف اخته يدخلها الغرفة وهو يرد علي

رايد = عزمني مصعب بس رحت للدوام مواصل وتعبان وماقدرت اجي

طلب رايد من مريم تجلس على سريره وجلست وانا جلست بجنبها ورايد جلس على الارض قبالنا

رايد بفرح = والله انا فرحان يامريم وانا اشوفك معنا الحين

ابتسمت مريم بخجل وسكتت شوي وبعدها رفعت راسها لرايد وعلمته عن دانة وعمي

مريم = رايد انا وعمر قبل شوي رحنا لعمي عشان نطلب منه دانة بس عيا

قطب رايد حواجبه مستغرب

رايد = ليش عيا ( وهز اكتافه ) مب على كيفه .. الحين انا وانتي هنا وش يمنعه ؟

تنهدت وقلت لرايد عن اسباب عمه

عمر = انا ماني محرم لاختكم

التفت رايد لي وهو الى الحين جالس بالارض قبالنا

رايد = انا موجود وهي اصلا توها صغيره ( وقام واقف ) خلاص انا الحين ابروح واجيبها .. عمي زودها معنا واجد

التفتت مريم لي على طول

مريم = تكفى عمر رح معه

بس رايد عارض

رايد = لا مريم خلي عمر يرتاح من مشاكلنا شوي ( والتفت لي ) انا ابطلع الحين خذوا راحتكم

وراح للحمام يتجهز عشان يطلع

التفتت انا ومريم لبعض وقمنا وطلعنا عنه ورحنا لغرفتنا نرتاح

بعد صلاة العشا بفترة

قمت من النوم ودخلت الحمام اغسل وانا مكسل

لبست بنطلون وتيشيرت وقضيت الصلوات وطلعت من غرفتي ادور مريم وانا توني اتذكر ان اغراضها وملابسها بالفندق

شكلي غير ارسل رايد يجيبهم

دخلت الصاله ولقيت مريم جالسة وسرحانه واول ماشافتني قامت واقفة وهي مستحية مني الى الحين وملاحظ الانحناء البسيط بظهرها من اول ليلة شفتها

قربت منها وجلسنا بجنب بعض على الكنبة وحنا ساكتين ..

وانا افكر كيف اسألها عن سبب الانحناء وساكت وهي تفرك يديها وساكته وشكلها مرتبكه

التفتت لها وسألتها

عمر = وش فيك مريوم ؟

همست مريم وهي منزلها راسها

مريم بهمس = رايد تأخر مدري وش سوا مع عمي

عمر = يمكن راح لدوامه وبعدين يروح لعمك

ماردت علي وسكتنا

واخذنا شوي وحنا ساكتين

رجعت التفت لها وانا اتنحنح

عمر = احم .. مريم آآآ .. وش فيه ظهرك ؟

وقفت مريم عن فرك يديها فجأة .. شوي ولفت وجهها عني وهي الى الحين منزله راسها وردت بهمس

مريم بهمس = ظهري دايم يعورني

عمر = وش منه ؟

مريم = مدري ماراجعت المستشفى

عمر = ليه ؟

سكتت مريم شوي وبعدها ردت

مريم = عمي دايم مو فاضيلي

عمر = طيب رايد دايم يكلمك ليه ماتطلبين منه يوديك

مريم = ايه ... آآآ ... بس عمي شوي شديد على طلعاتي ( وسكتت شوي وكملت ) مايخليني اطلع من البيت واجد

سكتت شوي وانا اطالعها

عمر = طيب هذا مستشفى وضروري وانتي ما انتي رايحة تتمشين .. وش عذره عمك مايوديك

سكت مريم شوي وطولت وهي ساكتها

انحنيت اطل على وجهها يوم شفتها طولت

منزله راسها وانفاسها سريعة وتجاهد الدمعة

عمر مستغرب = اذا كان سؤالي يضايقك .. آآآ

فجأة انفجرت تبكي

مريم = ليته على المستشفى وبس .. انا مكاني عندهم المطبخ وبس واذا جلست عندهم اتبرد والا اتفرج على التلفزيون تسمّعني عمتي كلام يسم البدن .. صرت اتحاشاها .. صرت اكره اجلس عندها ( وبكت اكثر وهي تمسح دموعها بيدها ) اشوف مرة عمي وبناتها يطلعون للسوق ويرجعون محملات بالاكياس وانا الاشياء الضرورية يالله تجيني .. المستشفى يقول عذره مو فاضي .. بس فاضي لمرته وعياله .. يكرفوني بالشغل حتى لو تعبانة .. عمتي ماترتاح لين تشوفني اشتغل .. نفسي تشتهي اشياء حرمتني منها .. تراكمت علي الهموم .. بين معاملتهم معي وبين حزني على امي وابوي وفوق هذا تعبانة وزاد علي لما طردوا رايد .. صارت نفسيتي دماااااااار وانا مدري وينه وهو توه صغير .. حرااااااااااام عليه عمي ليه يطرده وهو صغييييييير .. خفت عليه من عيال السوء .. مدري عنه هو حي والا ميت هو ياكل والا يشرب ( وشهقت بقوة تبكي ) والله لولا بنات عمي .. يصبروني ويعطوني اللي احتاجه بالدس وامهم ماتدري ( وبكت اكثر ) كرهت الحياة كلها .. كرهت نفسي ..

حطيت يدي امسح على راسها ورصيتها على صدري اضمها

عمر بألم = خلاص مريم .. انا من زمان اعرف عن معاناة رايد مع عمه .. خلاص يكفي حاولوا تنسون

غطت مريم وجهها بصدري وتبكي بحرقة

مريم = مابي دانة تصير عندهم يوم واحد .. خايفة يعاملونها مثل ماعملوني .. والله ابنجن اذا ماخذتها من عمتي

رصيت راسها اكثر على صدري

عمر = لا تخافين .. الحين رايد يجيبها ..

وتنهدت وانا اضم مريم اللي تبكي

ما اتوقع رايد يقدر على عمه .. وسكتت افكر بطريقة نحل مشكلة دانة

وقعدنا نحتري رايد وحنا ساكتين

مريم تدعي بخوف .. وانا ساكت وافكر

و بعد ساعة من الانتظار.. شرف الاخ ويد قدام ويد ورا

شهقت مريم وقامت واقفة لما شافته دخل علينا بدون دانة

مريم = وين داااااااااااااانة ؟

طالعت رايد اللي منزل راسه وشكله هو الاخر توه باكي وبصعوبة نطق

رايد بقهر = عيا .. تهاوشت معه بس عيا راسه يابس ( ورفع راسه لمريم ) عذره عمر مو محرم لها

مريم بخوف = لاااا لاااا .. ابي دانة .. ماارتاح و دانة بعيد عنيييييي .. خايفة عليها من عمتييييي

نزلت راسي بصمت اكمل تفكير ومريم تبكي ورايد يحاول يهديها

قمت وطلعت من الصاله ودخلت غرفة امي وقفلت على نفسي واتصلت على عمي ابو سامي شوي وجاني صوته

وبعد السلام

عمر = عمي فيه موضوع ابي اكلمك فيه وابي مساعدك

سكت عمي مستغرب وحسيته يحتريني اقول اللي عندي

عمر = عمي انت تعرف ان اخو زوجتي ساكن معي

عمي مستغرب = ايه ادري ياولدي

تنهدت ودخلت بالموضوع

عمر = والحين زوجتي واخوها يبون اختهم الصغيرة تصير معهم بالبيت .. عمي انا ماعندي مانع بس كلمنا عمهم اليوم وراكب راسه عيا يخلي اختهم معهم بنفس البيت

سكت عمي ومارد وكملت كلامي

عمر = عمي ابيك تكلمه بالعقل

عمي = والعقل تصير مع عمها .. الله يهديك بس

سكتت وانا فاهم مقصدهم بس هذا اذا كان عمهم الكلب صدق همه الحرام و الحلال .. وين مافكر بالحرام يوم ياكل حلالهم

عمر = عم انت ماتدري وش سوا ابو بندر مع زوجتي واخوها .. والله ياعم انه ماكل حلالهم وباع بيتهم وحارمهم من كل شي .. اخوانها الحين خايفين على اختهم الصغيرة

سكت عمي حسيته تورط معي .. توه مزوجني ومن اول يوم ازعجه بمشاكلي

عمر = انا فكرت وقلت نجيه من طرف زوجته

عمي = كيف يعني نجيه من طرف زوجته ؟

عمر = ابي عمتي ام سامي وجدتي يكلمون الحرمة ... وتراهم عايلة همها الفلوس .. انت شايف كيف طلبت 10 الاف لها وهي لا هي ام زوجتي ولا شي .. عمي تكفى قل لعمتي ام سامي تروح لها وتكلمها

وقعدت اقنع عمي لين وافق بالفكرة ووعدني خير

نزلت لرايد ومريم وعلمتهم وبصعوبة هدت مريم وهي تدعي نجاح الفكرة

وكل شوي تسأل بخوف بينها وبين نفسها ياربي هي تعشت والا لا .. هي ماتنام الا عندي اكيد مانامت الى الحين

وانا ورايد شغالين نطمنها