شبكة همس الشوق - عرض مشاركة واحدة

22 - 4 - 2014, 05:25 PM

من ..!
شافته جدته يدخل وقصرت على صوت الراديو قالت : من عند الباب ياوليدي ..؟
ابتسم لها وهو يراقب وجهها وتعابيره استعداداً لأي طاريء وتغيير اذا سمعت الخبر ..
قال : ابشرتس يالغاليه .. هذي بنت ولدتس جات للمدرسة اليوم . يعني بكرة ولا بعده بتشوفينها ..!
حست برعده دبت في اطرافها وقشعريرة اكتست جسدها قالت : ياربي لك الحمد ولك الشكر .. الله يبيض جهك ياولد مشعل . اشهد انك سنافي ..!
حلقت عيونها بالدمع .. وتذكرت الولد الغايب المفقود .. واللي اخذته الدنيا منها قبل لاتقر عينها فيه وتطفي جمرة الشوق اللي بداخلها له ..
الله يرحمك ياخالد ويجعل مثواك جنان الخلد ..!
قالته في نفسها وهي تحاول تبعد عن الحزن وتمني نفسها بشوفة بنت ولدها في القريب العاجل ..!
قرب عماد منها ومسح على راسها ولف يده من رى كتفها قال : لودريت ان الدعوة فيها دموع ماكان سعيت في هالامر .
مسحت دمعتها بطرف طرحتها قالت : ياوليدي دموع الفرح عساني افرح بعيالك .
وقف ولد بنتها بعد مارسم لها ا بتسامه خلفها وجع لايمكن تدثره الايام .. الا بقدرة قادر ..!
: وين تبي تروح ..؟
رد عليها وهو يعطيها ظهرها ويلبس طاقيته وياخذ شماغه من فوق الكنب قال : ابي امشي لجده وراي شغلي تركته ماجيته من ثلاث ايام .
: ياوليدي اترك الشغل هذا عنك وتعال ازرع المزرعه ولا افتح لك سوق بيع فيه واشتري بدال الخطوط اللي اهلكت اعمار المسلمين وانت تمهدها رايح جاي .
عدل عقاله على مراية المغسلة القريبه من الصاله ورد بصوت عالي يوصل لجدته الجالسة بصالتها : امر الله عاد ياام ناصر هذا شغلي اللي درسته لي سنين .. انتي بس ادعي لي وان شاء الله ماصاير لي الا اللي ربي كاتبه .
تمتمت بـ : يالله ياربي افتح له ابواب الرزق واهده وارزقه ببنت الحلال اللي تسعده وتقر عيني بعياله .
طلع عماد وخلف جدته وراه بابتهالاتها ودعواتها وحبها له .. وهو آسف على حالها وانه راح يخيب املها ويحطم احلامها ..

***

اذن العشا وهي متأهبه ومجهزة ..
شعرها الذهبي الناعم فاتحته على اكتافها ولابسه تنورة قصيرة حمرا وبلوزة ابيض وزهري ناعمه وبكم قصير ..
راحت للمطبخ تمشي بدلع وصندلها اللي تزينه الاكسسوارات الناعمه يحدث صوت ويعلن وجودها بأي مكان تتواجد فيه ..
طالعها مشاري وكأنه ملدوغ ولا مصعوق ..
فتح عيونه وكشر وكأن شياطين الجن والانس اجتمعت قدام عيونه ..
: خير ان شاء اشوفك لابسه ومتزينة ... لايكون بتقابلينه .
: مشاري اش فيك .. اكيد بقابله .. مو زوجي ولا نسيت انا خلاص ملكنا .
: سارة انقلعي وغيري هالخرابيط اللي عليك .
طالعت في ملابسها بغرابه قالت : ملابسي مافيها شي .
عض على اسنانه قال بقلة صبر : سارة اسمعي الكلام لاتخليني ارتكب فيك انتي وياه جريمه ..
تدخلت ام مشاري عشان تنقذ الموقف وتهديه على قد ماتقدر ..
: مشاري يمه هدي نفسك ولا يصير الا اللي تبغاه .
ردت سارة : يمه ماله دخل فيني واذا ابوي مو معترض اني اقابل خالد ولا البس كذا خلاص محد يهمني .
مسكها من شعرها قال : اقسم بالله لو ماتروحين وتبدلين ياسارة لتكون نهاية خالد هذا على يدي انا وانا اصلاً ادور الفرصة اللي اشفي غليلي منه .
طالعته امه بخوف قالت : مشاري تراك زودتها .. كرهك لخالد مو طبيعي .. اذا انت شايف عليه شي قول لنا ترانا على بر .
طالع بسارة قال : بالطيب ياسارة روحي بدلي ولا اقولك خليه يجي يسلم و ينقلع مو لازم يشوفك .
خافت سارة ان الموضوع يتأزم اكثر من كذا وانسحبت لغرفتها بدلت ملابسها ولبست تنورة لونها فيروزي طويلة وعليها بلوزة قطنية سماوي وابيض وبكم طويلة وساترة نوعاً ما ..
ونزلت لمن سمعت الجرس يدق .. وتأكدت انه الحبيب المنتظر ..
: خالي محمد عندنا ..؟ كيف جينا على باله ..؟
: جاي يخطبك لولده نادر..!
: اييييش ..؟ اش اللي قاعده تقولينه يمه ..؟
: ادري ياشادن مين نادر ..! بس انا قلت اقول لك على سبب جية خالك محمد . ولا انا مستحيل اخليك تتزوجين نادر .
: هه والله عجب .. يعني يرمي علينا صالح بعدين يرميني على نادر والله لو تشتعل بيني وبينك ياخالي للسما مااخذ ولدك المدمن الصايع .
: المهم الحين تعالي سلمي على خالك وفكينا من المشاكل تراه ماقصر معاي لمن عرف اني متهاوشة مع صالح اليوم ..
: خلاص يمه فرجت الحين صار لي عمان واهل مو زي اول .. !
: تعالي سلمي على خالك بعدين نتكلم في موضوع اهل ابوك اللي طلع لنا فجأة .
طالعت في امها بعتب وقامت لخالها الجالس في مجلس الرجال لوحده .
سلمت عليه وجلست قريب منه وهي تحاول على قد ماتقدر انها في طبيعتها ..
ساد الصمت لثواني وتكلم خالها .. : ها ياشادن اش اخبار التدريس عسى ما يتعب ..؟
: الحمد لله مرتاحه فيه .
فك شماغه وعدله قال : كم وصل راتبك ؟
سؤاله عادي ومتوقع بالنسبة لشادن وامها بحكم انهم خابزين محمد وعاجنينه ويعرفون طبعه زين ..
ردت ببرود وكذب متقن : ثلاثه الاف ونصها يروح في القطه مع المدرسات والنص الثاني للسواق .
: هههههههههه يفرجها ربي ، يفرجها ربي .. بكرة تنقلين وتفتكين من السواق ويزيد راتبك وتاخذين ولد الحلال اللي يستر عليك .
: لا ماعاد ابي انقل .. خلاص انا استقريت هناك .
طالع في امها اللي كانت تترجى شادن انها تسكت وتتقي المشاكل وشر اخوها ..
قال : اش تقول بنتك ياعزيزة ..؟
: ها ..؟ قصدها انها بتسكن عند عمانها هناك .
: عمانها ..؟
تكلمت شادن بجرأة وقوة لأول مرة تحس فيها : ايوه عماني ياعمي .. ولانسيت ان عندي اهل واعمام .
: عمانك لو فيهم خير كان جوك من زمان مو الحين تروحين لهم برجولك ..
: نسيت ياخالي ولا اذكرك .. نسيت لمن عمي ناصر جا وطردته انت وصالح .. نسيت لمن قلتوا ان خالد باع البيت وهذا مو بيته ..
لف راسه عنها قال : وقبل وينهم عن ولدهم .. بعدين اللي سويته هذا عشان امك بغت تموت يوم عرفت ان ناصر يبي ياخذ عيالها منها .
: امي بغت تموت ..؟ ولا عشان تلاقي لصالح الوسخ مأوى وبيت وحرمه وراتب شهري ..؟ .. الله يرحم ابوي ورثه صالح بدون وجه حق .
تكلمت عزيزة ودمعتها متحجرة بعيونها .. : شادن خلاص اسكتي .
خايفه من بطش محمد اخوها اذا زعل .. تعرفه وماتنسى تهديده ووعيده لها ..
التفت عليها وشاف ضعفها اللي يزيد من جبروته وقسوته وبطشه ..
قال : اسمعي ياعزيزة بنتك هذي متمردة .. وشكلها تبي من يربيها من جديد .. لكن ترى ملكة نادر وشادن يوم الاربعاء في الليل لو نادر مو في سوريا كان الليلة ملكت لها على ولدي غصب .. رضيتوا ولا مارضيتوا ..
وقفت شادن بتحدي قالت : لا ياخالي انا مو امي تامرني وتنهاني على كيفك .. ولدك مايناسبني ولا اناسبه وانا ادري ليه تبغاني آخذه .. تبي لولدك وحده موظفه تصرف عليه ..!
: عزيزة بتسكتين بنتك ولا لا ..؟
طالعت عزيزة بشادن اللي متكتفه وكأن محد هامها في الدنيا ولا هي متحسفه على شي قالت : شادن خلاص ادخلي ولاتزودينها ..
نظرة الحزن والخوف اللي بعيون امها دايماً تكسرها ، تهزها وتضعفها كثيير ..
هزت راسها لامها المكلومه والموجوعه .. غياب نايف يكسرها ويحزنها .. وموت ندى للحين جرحه ينزف .. ومابقى الا شادن خايفه عليها حتى من نسمة الهوا لاتجرحها او تضايقها ..
طلعت من المجلس ونفث محمد قوته وجبروته المزيفه قدام ضعف عزيزة : اقسم بالله لو بنتك ماتحسن ادبها لااربيها بطريقتي هذي قليلة ادب ولا بد لها من رجال يعدل اسلوبها .
: خلاص يامحمد توكل على الله ومايصير الا اللي تبغى استنى بس علينا كم يوم .
: انا قلت الاربعاء يعني الاربعاء فاهمه ولا لا ..
طلع وردع الباب بقوة وترك صداه يرن في اذن عزيزة وكلامه يتردد على مسامعها ..