شبكة همس الشوق - عرض مشاركة واحدة

4 - 5 - 2014, 03:03 PM

البيت خالي عليها ..
بدون امها اللي تملاه عليها
وبدون نايف وحسه ..
وحياتها فارغه الا من همها وهم شريكها ..
المدرسه للحين ماراحت لها تسحب اوراقها وتوقع على نقلها اللي بلغتها نوير انه وصل ..
الساعه تقترب من خمسه وهي مستغله عصر الجمعه بالدعوات لعلها تصادف ساعة استجابة ويستجيب لها ربي ويحقق لها اللي تطلبه ..
فزت من مكانها على صوت نغمة جوالها اللي دق فجأة ..
اخذته بيد شبه ترتعش وابتسمت وهي تشوف اسم عماد على الشاشه وفتحت الخط بــطمأنينة و : الو .
وصلها صوته بمرح وماغاب عنها انه متضايق او حزين : هلااا والله ببنت خالد العنيده ..
ابتسمت قالت : اوووف عنيده مرة وحده ..!
: لو مهب عنيده يمديها في المدينه وماخلتني اجي مااشوف الدرب عشان اجلس عندها .
عضت على شفتها ورجعت خصلتها النافرة من شعرها قالت : لا من جد عماد جاي .
: ايه والله جاي ان ستر ربي عليّ وجهزي لي قهوة وشاهي ترى بيجي ضيوف وماعندي غير الله ثم انتي يبيض الوجه معهم .
قالت بهمه وحماس : ابشر بس متى بتوصل ان شاء الله ..
: الساعه خمس وعشر وانا عند الباب بإذن الله .
طالعت في الساعه الكبيرة المثبته في الجدار وشهقت قالت : يعني بعد خمس دقايق .
ضحك عماد قال : زين افتحي الباب بعد خمس دقايق .
قالت بسرعه : خلاص بخلي الشغاله تفتح الباب والله يحييك ..
: زين يالله مع السلامه .
: مع السلامه .
احتارت تسوي القهوة ولا تروح تلبس وتتجهز ..
نادت على الشغاله قالت لها : حطي القهوة على النار وروحي افتحي البوابه الكبيرة ..
وبسرعه نطت مع الدرج تجري ..
فتحت دولابها وطلعت لها تنورة جينز سماوي وبلوزة الوانها متموجه بين البنفسجي والازرق السماوي .. بكم طويل ..
ماتكلفت في زينتها عشانه ولأن الوقت ماساعدها ..
تعطرت بسرعه ونزلت مع الدرج على صوت دقات الجرس ..
توجهت لباب الفيللا وفتحت الباب ..
دخل عماد ويده في يد جدته ..وهو يقول : ابلشتنا تقول مالي قعدة في بيت شادن مهب فيه .
حضنتها شادن بسرعه وهي ترحب وتهلي وتحس بقلبها ينقبض فرح وحزن لأن جدتها ماقدرت تصبر عنها ..
والثانية تضمها وتدعي لها وتمسح على راسها ..
سلم عماد على شادن وقال : دخلي جدتي ترى المشوار متعبها .. خليها تجلس على الارض عشان تمد رجولها .
مسكتها شادن بيدها ومشت معها وصلتها لمجلس الحريم ..
كانت تستنشق عبقه .. وتشوف اثره ..