شبكة همس الشوق - عرض مشاركة واحدة

22 - 10 - 2014, 04:21 PM

.
.
.
اليوم الثاني ..
سيارة فهاد ..
فهاد: غريبة طلع كرت العائله بدري..
أبو صفا: أذا مافيه زحمه يطلع بدري بنفس اليوم .. وأذا زحمه اليوم اللي عقبه ..
وقفوا قبال المسجد ..
أبو صفا: امش عند هالمسجد ونصلي بمسجد ثاني..
فهاد : ورى الحين راح تقيم الصلاة ..
ابو صفا: فهاد حرك ..
فهاد : تعوذ من ابليس وانزل .. الا الصلاة .. لو جات شاحنة وشالتنا وش الفايدة ..
نزل فهاد ونزل عمه مكره ..!
صلوا العصر ..
ومسك شخص أبو صفا وقعد يسلم عليه ويسأله عن أحواله وعلومه ويسأله عن صفا وفهاد يخزه خير يسأل عن زوجتي ..
الرجال: خاف الله ورى ماتخلي منيرة (ام صفا) تشوف صفا ..
أبو صفا مرتبك : بعدين بعدين ..
فهاد : اقول وش لك بـصفا ؟
خالها : أنت وش لك فيها ؟
فهاد متزفز: زوجتي ..
خالها: ياللي ماتخاف ربك تزوج البنت وامها ماتدري..
أبو صفا جاته ام الركب وكان ساكت ..
فهاد: تكفى كانك تدل طريق لبيتها دلني عليها..
خالها: ابشر بعزك .. بتجي امها من تبوك نهاية رمضان .. متعوده دايمن تقضي العيد بالرياض ..
فهاد : ياجعلك للجنه على هالخبر..
أبو صفا طاح عليهم ..
انفجع فهاد وشاله مع خالهم ..
ببيت أبو صفا ..
كان جالس ومعه هبوط حاط بالضغط ..
خال صفا: كل ذا لان صفا بتشوف امها ..
أبو صفا: لا تقولون لصفا .. ماأبيها تشوف ..
خال صفا: لا راح تشوفها .. البنت الحين شورها بيد رجلها ..
فهاد كان جالس يناظرهم ..
أبو صفا: ماتدري ان امها مهيب مرتي الثانية ..
فهاد بهدوء: لاتدري وكلنا ندري ..
أبو صفا: أيشششششش..
فهاد: اللي سمعته ..
خال صفا عطى فهاد رقمه :سجله عندك ..
سجله فهاد وعطاه رنة :خلاص أجل ذا رقمي ..
خال صفا: بيننا اتصال..
طلع من بيت أبو صفا ..
أبو صفا قام معصب ..
كان فهاد واقف ومستغرب ..شوي سمع صراخ وركض من غير احساس لداخل..وشاف صفا تحت رجل أبوها ويضربها بعده عنها وقوم صفا وحطها ورى ظهره : حرام تكون أبو ..
عمه صفا كانت تبكي هي وأخوانها ..
أبو صفا نفسه بد ينقطع : خــ ــ ـــذها وتنقلع من بيتي ..
فهاد بعصيبه : ومن قالك بخليها .. حسبي الله عليك من أبو ..
لف على صفا: اطلعي جيبي عباتك وتعالي معي..
طلعت لغرفتها وأخذت عباتها وشنطته والجوال ونزلت بسرعة ..
أبوها: انقلعي ..
مرت أبوها: حررررام عليك كيف تطردها ..
أبوها: خليها تنلقع .. لبست عباتها وطلعت مع فهاد ..
طلع فهاد وهو حاس ان اليومين اللي مرت علمته اشياء ماكان يتوقعها ابد .. مر فندق واستأجر وحمد الله انه طلع كرت العايلة ..
فهاد يمسح دموعها :خلاص صفا .. اسمعي بقولك خبر راح ينسيك كل هم..
صفا حطت يدينها على وجهها وتبكي ..
فهاد بعد يدينها وجلس عند رجولها وبهدوء: اليوم العصر وقفنا عند مسجد واعترض أبوك ..المهم ربك كتب ننزل ونصلي العصر فيه.. وصلينا وتالي جا رجال سلم على أبوك وكان شوي مرتبك وقعد الرجال يسأل عنك ويقول اسمك المهم سألته وش له فيك ورد بمثله وتالي قلت له أنك زوجتي ومن هالكلام الين عرفت انه خالك .. وأخذت رقمه وهو كذلك .. ويقول امك راح تجي تقضي عيد الفطر هنا ..
صفا تشهق : تمزح صح؟
فهاد :لا والله .. حتى شوفي ..(طلع جواله ) هذا رقم خالك ..(ابتسم) تدرين أني ماعرفت شسمه ..
مابتسمت ..فهاد قام وجلس جنبها :ابتسمي عاد .. امك ولقيناها ..
ابتسمت على خفيف ..
فهاد : نزلي عباتك ..
شدتها أكثر عليها وخافت ..
فهاد ابتسم: صفا مهوب فهاد اللي يستغل الظروف .. لاتخافين .. نزليها الين نفطر وتالي نشوف وش نسوي..
ناظرته..
فهاد: احلف لتس وأنا صايم ماراح اسوي لتس شي .. تطمني..
نزلت عبايتها وكانت لابسه برمودا وتشيرت ماسك عليها ..
فهاد انهبل معها بس تعوذ من ابليس : مو برد ياصفا ..
صفا: عادي..
قام فهاد ونزل شماغه وطلب لهم فطور ..
.
.
.
بعد الافطار ..
عنود تناظر نورة :طيب..
نورة :هذي رسالته ..
العنود: قولي هو رجال ويخون ممكن تنبلع .. بس أنتي شلون تخونين نفسك واهلك وزوجك..
نورة سكتت..
العنود خذت الجوال منها :معليش بس بخاطري زياد يشوفها ..
صورت العنود الرسالة بدقة عاليه ووضحت المضمون والرقم وكان نهاية رقم زياد ..
نورة :على فكرة ترى فيه مقطع صوت لما كلم وبارك لي..
العنود :ارسليه ..
نورة: ماغرتي..
العنود : مهيب عنود اللي تغار .. لو فيك شي زود عني كان غرت.. بس للأسف زياد ماحط عينه الا عليك ..ارسلي المقطع..
ابتسمت نورة وهي تناظر العنود ببرود وارسلت لها ..
العنود: شرأيك نفس ماتبين تخربين بيني وبين زياد .. أرد لتس الحركة وتوصل هالصور لـ عبدالاله ..
نورة :لااااا .. حرام ..
العنود: حرمت عليك عيشتك .. بجد حقيرة ..
نورة: لاتكفين .. عاد زوجي ملتزم..
العنود : افكر فيها واقلبها بمخي ..
مشت العنود للمطبخ .. ونورة رجعت للحريم ..
سارة: وينك؟
العنود: كنت مع نورة.. وجن وطلال متى راح يجون ؟
سارة: مدري..
العنود: الله يحفظهم .. صفا من زمان عنها ؟
سارة : خل ندق عليها ونشوفها من ملكت ماشافنها..
العنود: مصدومة من سالفه الملكة..أبوها حيل غريب..
سارة: الله يعوضها بـفهاد..
العنود كانت تشرب قهوة وباين انها مهمومة..
سارة:قالت لتس شي نورة؟
العنود رفعت عيونها : لا.. تعالي نروح للصالة..
.
.
.
الفندق..
فهاد : ماراح نطلع من هنا الين تخف هالكدمات بوجهك ..
صفا ناظرته..
فهاد: بعد التروايح راح نمر المستشفى ونأخذ أي شي يخففها وتالي نطلع نسهر الين الفجر ونرد ننام ..
صفا: اوك.. طيب تقدر تكلم خالي؟
فهاد: ايه من عيوني..
طلع جواله ودق عليه .. وتالي عطاه صفا اللي كلمته ويالله مسكت نفسها.. صكت الجوال ..
فهاد: صفا العرس بخليها بالعيد وماعاد بوه الا اسبوع واقل يمكن.. كلمي صديقاتس واطلعي معهم جهزي ..
صفا كانت ساكته ومنحرجة منه ..
فهاد: على فكرة مفروض المهر أعطيه أبوك .. ومفروض عنده.. بس فجأني بالملكة فالمهر بالبنك وقالي اليوم أني أعطيك اياه ..عشان كذا عطيني رقم الحساب واحوله ..
صفا: لاخله..
فهاد:لاوين.. مهرك لازم يكون الليلة بحسابك .. لما نطلع راح امر واحوله لتس..
دق جواله وكان فارس ..
فهاد: فارس أنا مشغول..
فارس: الله أكبر.. تراك ساحب علي من امس يبو ..
فهاد: بجد مشغول..
فارس أخذ بخاطره: توك مملك وسحبت علي .. يالله سلام ..
سكر فارس..
فهاد ابتسم: مشكلة شكل أخوي راح يغار منك ..
ضحكت صفا..
فهاد : روحي على هالضحكة .. اضحكي يابعد عمر فهاد ..
صفا كانت بعيده شوي عنه ورحمها الله لما دق جوالها وقامت تكلم ..
وكانت غدير ..
صفا جالسه على السرير : المهم شسوي؟
غدير: ذا زوجك يعني عادي.. تدرين الليلة خليه يوديك لبيت العنود ..
صفا: مقدر .. لان قالي راح نطلع..يالله مرآ طيب .. بشكل يفوق الوصف..
غدير :ياقلبي الله يتمم عليك..طيب بكرآ..
صفا: اوك ..
غدير: أتركك الحين .. انتبهي لنفسك ..
صفا: اوك ..سي يآ..
.
.
.
مكة ..
بفندق مقابل الحرم ..
وجن كانت تضحك على طلال وعزوز ..
طلال: تعالي العبي معنا..
وجن : الحمدلله اقعدي احبي مثلك أنت وولدك .. كبرتم ..
طلال :ههههههههههههههه شوفيه مستانس..
وجن: باين شوف الابتسامة..
قعد يلاعبه وتالي جلس جنب وجن .. اللي قعدت تعطيه حلا وتـأكله..
طلال: شوفي نظرات الغيرة بعيون ولدتس..
وجن:ههههههههههه هاتي عزوز حبيب امه .. تعال ..
كان زعلان..
وجن قامت له: حبيبي عزوز ..خلاص لاتزعل ..
عزوز :كخ ..
وجن: مين كخ ..
عزوز يأشر على أبوها ..
ضحكت وجن :عيب هذا بابا .. الحين راح أكلك أنت..
طلال: موب هين .. تراها زوجتي قبل مانعرفك..
وجن:هههههههههههههه حرام عليك ..
قعدت تأكله ..
طلال: بكرة رحلتنا الفجر للرياض ..
وجن:اوك ..
طلال: وجن شفيك ؟متضايقة ؟
وجن :لاحبيبي ..
طلال: منيب مرتاح ..أحس فيك شي ؟
وجن: لا روحي ..
طلال: ان شاء الله يكون مجرد توهمات..
وجن: صدقني طلال مافيني شي.. لاتحاتي لبآ قلبك..
.
.
.
ببيت أهل ريما ..
فطر عناد عندهم وكان جالس ينتظر ريما .. دخلت سلمت وجلست ..
عناد : تعالي جنبي ..
طالعته :مرتاحة هنا ..
عناد ابتسم وقام :ولاتزعلين نجيك ..
جلس جنبها : اخبارك ..
ريما :تمام ..
عناد : وحشتيني ..
سكتت..
عناد: مافيه وحشتني ..
انحرجت ريما ..
عناد مسك كفها ويده تحرك دبلتها وعيونه تناظرها: اسف على ذيك المره..
ريما:ماصار شي ..
عناد :كنت دفش شوي.. بس ياريما هم تسببوا بأذى أغلى ناسي شهد ..وأكيد شفتي الاذى اللي تعرضت له منهم ..
ريما : كل شي براحتك هذي حياتك ..
عناد : لا أنتي بجد زعلانة .. أحنا سوى .. وحياتنا وحده ..
ريما : بعد الزفة تصير وحده ..
عناد: حتى الحين .. ريماي ..
ناظرته ..
عناد: طاح الحطب ..
ابتسمت ..
عناد : فديتك ..
قام جاب كيس هدايا فخم ..:هذي هديه لتس وان شاء الله يعجبك ذوقي..
ريما: تسلم ..
عناد: ومن قالت تسلم لي..الاسبوع الجاي عرسنا..
ابتسمت بخفيف ..
عناد : الله يقدرني وأسعدك ..
ريما: وأنا بعد ..
.
.
.
ببيت أبو عبدالله ..
بعد التروايح ..
العنود تعبت من كل خيانات زياد .. أثقلها بالهموم.. جرحها .. وكل جرح بشكل ولون ..
كان ببالها هالتصرف من عطتها نورة المقطع وشافت الرسالة .. شي بقلبها لازم يبرد ..
زياد: عنود شفيك تناظريني كذا..

العنود من غير حس أدنى باللي تسويه رفعت يدها وصفقته على وجهه ..
.
.
.