شبكة همس الشوق - عرض مشاركة واحدة

22 - 10 - 2014, 04:34 PM

الجزء السادس والعشرون..
وقت صلاة العشا ..
الاستراحة ..
طلع فهاد جواله يشيك عليه عشان يبي يصلون العشا ويشوف صامت..شاف مكالمات صفا كثيرة حيل حطه بجيبه ..
صلوا العشاء ..ومشى فهاد يدق عليها..
دق مره ..مرتين ..ثلاث ..
ماترد..:طيب ياصفا حسابك معي لما ارجع..
.
.
.
المستشفى..
الولد: ياخي اقسم بالله مدري عنها شي..
موظف الامن:ماراح تروح أجل..
ضاقت بالولد:لحظظه شنطتها ..بالسيارة ..
السكيروتي :امشي معي نجيبها..
مشى معه وجابها وطلع الجوال:شوف اخر رقم دقت عليه ..
الولد:اسمه فهاد ..حتى فيه مكالمات ماردت عليه منها..
دق الولد على فهاد ورد :ليه مارديتي قبل شوي..
الولد:السلام عليكم..
فهاد كان يمشي بالاستراحة وقف :مين أنت..
الولد: لو سمحت ممكن تجي للمستشفى..
فهاد:ليه؟
الولد: فيه بنت هنا لقيتها طايحة ..وجبتها لهنا..والحين
فهاد :آي مستشفى ..
قال له الولد وسكر فهاد ويده ترجف..
فارس مشى له:شفيك ؟
فهاد: واحد دق ويقول البنت يقصد صفا بالمستشفى..
.
.
.
المستشفى..
كان فهاد واقف وينتظر الدكتور يطلع من غرفة الملاحظة..
فارس: ان شاء الله خير..اهدى أنت بس..لو سمحت ياخوي وين لقيتها..
الولد كان مرعوب وهو صغير بالسن:مدري لقيتها طايحة عندنا الباب الخارجي لبيت جارنا ..وكانت تنزف وكلها دم ومنظرها إليييم .. وشلتها وجبتها هنا..
فهاد لما قال الولد شلتها قام ومسكه فارس: مجنننننون أنت الولد انقذ زوجتك وأنت تبي تضربه بدل ماتسلم على راسه وتشكره..
طلع الدكتور وناظرهم بأسف ..
فارس: لو سمحت دكتور صفا شلونها؟
الدكتور: مين ضربها وعذبها ..
الولد: مدري لقيتها طايحة وجبتها..
الدكتور: أنا بلغت الشرطة والحين راح نعرف ..
فارس:طيب شفيها؟
الدكتور:قول وش مو فيها..البنت كلها كسور ورضوض..نزفت دم كثير وتم أسعافها ..والحين بغرفة العناية الفائقة ..وغايبة عن الوعي تماما..
فهاد:غيبوووووبة..
الدكتور:لا الحمدلله..
فهاد :أبي اشوفها ..
الدكتور:بصفتك ؟
فارس: هو زوجها فهاد ..
الدكتور :أفضل ماتشوفها..
فهاد:ليه ؟
الدكتور: أفضل..
فهاد كان واقف جنب اخوه :لا أبي أشوفها..
الدكتور:تفضل معي..
دخل فهاد عقب مالبس اللبس الخاص بغرف العناية الفائقة ..
فهاد : مو زوجتي..
الدكتور : هذي صفا .. بس الاعتداء والكدمات المخلفه له تسببت بهالشي..
فهاد يناظر الدكتور بصدمة ..
الدكتور: تفضل اخ فهاد ..
فهاد: متاكد ..ذي زوجتي..
الدكتور طلعه وكان فهاد يمر بحاله صدمة ..
جلسه فارس ..
جا السكيروتي مع الشرطة ..
.
.
.
ببيت زياد ..
كانت العنود تحوس بمكتبة زياد تدور كتب روايات ..
العنود تسولف مع نفسها: الله الله وش هالكتب ..
فتحت وطاحت على ورق رسايل ..ابتسمت بسخرية من الكلام:ورسايل حب .. وحركات ..
رجعت الكتاب والرسالة بداخلة وشوي تشوف صور لنورة بداخل كتب زياد ايام الجامعة ..بس بعضها صور موب قديمة لنورة ..
رجع زياد وكان يدورها وشاف باب المكتب مفتوح ..دخل وشافها ..
العنود: هلا زياد ..
زياد : ليه تدخلين مكتبي من غير اذني ..؟
العنود :ليه يعني؟
زياد :فيه اداب وذوق تستأذين لان المكتب فيه اشياء تخصني ..
العنود : اوك معليش اسفه ..
زياد :وش استفدت عقب مادخلتي للمكتب ..
العنود: قلت لك اسفه ..خلاص عاد .. تبيني احب راسك ويدك عشان تقبل العذر ..
زياد بعصيبه: مشكلة قله الذوق ..
العنود:هيييييييييييي ماقليل ذوق غيرك.. تحترم نفسك ولايكثر.. قلت لك اسفه.. شايل هم لا اخرب ذكرياتك مع نورة والصور والرسايل وذكريات ايام الدراسة .. وبعدين مادخلت افتش كنت ابي كتب روايات ..
مرت من جنبه : أكرهك ..
طلعت وزياد كان معصب لحقها : عاد ميت عليك ..
العنود لفت عليك ووقفت: لاتكفى حبني موت علي ..
زياد : آييييييه تأكدي من شعوري..
العنود : متأكدة من زمان لاتخاف..
طلعت ولحقها لغرفتهم :أنتي ليييه تفتحين المكتب وتقلبين بالكتب حقتي..
العنود :قلت لك كنت أبي كتب روايات ماتفهههههههههم ..غبي أنت غبي..
زياد هزها: لاتكلميني كذا ..
العنود بصوت أعلى: ماتبي احد يقولك عن غبائك وكذبك .. لا أنت غبي وكذاب معي أنا بالذات ..
زياد دفها بعيد عنه:اعوذ بالله من ابليس..ادحري الشر واسكتي..
العنود: منننننننب ساكتة.. كل تراب واطلع ..
زياد :عننننننننننود ..
العنود دخلت للغرفة وصكتها بأقوى شي ..
زياد:افتتتتتتحي..
العنود أخذت الريموت واغلقتها نهائيا : انثبر عندك ..
زياد :طيب طيب يالعنود ..
العنود:لاروعتني .. انقلع بس..
رمت نفسها على السرير :باقي يحببببها ..أكرهه زياد ونورة وأكررررررهني ..
.
.
.
بالمستشفى..
فهاد :مدري أنا وديتها لاهلها .. لحظظظه أبوها متأكد أبوووها ..
الملازم محمد: أبوها يسوي فيها كل بهالتقارير..
فهاد على السرير الخاص بالفحص لانه تعبان : أبوها متأكد..
جلس فهاد ..
فارس: خل المغذي بيدك الين يخلص..
فهاد:لا بروح ليه يعذبها ..
فارس بحزم: قلت لك لا ..الشرطة راح تشوف شغلها..
فهاد: فارس..
فارس: قلت لك اقعد الين يخلص المغذي..
الملازم محمد: عطني عنوانه ..
كتب فارس العنوان لانه يعرفه ..وعطاه..
.
.
.
اليوم الثاني..
ببيت زياد ..
كان نايم بالجناح على الصوفا ..قام :آخ رقبتي ..
دق على الباب مافتحت له العنود ..
زياد:افتحي ابي اخذ شاور ورانا صلاة جمعة ..
العنود مانامت فتحت الباب ..
زياد مسك يدها..
العنود بعصيبه:فكككككك ..
زياد: ترى أحبك تكفين سامحيني..
العنود:بجد تحبني ..

تحبني ..واقول من زود لطفـك
.. شكراً صدقت والف شكراً على الكذب!!

زياد:آيييه أحبك ..
العنود عيونها لمعت: كذااااب أنت ماتحب غير نورة ..
طلعت من الغرفة ..
ناظر بمكانها وراح يجهز لصلاة الجمعة..
.
.
.
العصر..
المستشفى..
فهاد: لييه ماصحت..
الدكتور: البنت كلها كسور ..ورضوض .. ونزفت كثير ..
فهاد :وش نسوي ؟
الدكتور: خلها تحت رحمه الله .. ماتدري وش صار على سالفه الاعتداء عليها ..
فهاد: الحين بطلع للشرطة وبشوف السالفه ..
طلع فهاد مع اخوه للشرطة ..
الشرطة ..
كان ابو صفا جالس واعترف بكل شي ..
فارس مسك فهاد: توسخ يدك فيه .. خله للشرطة تدكه بالحبس الين يخيس ..
جلس اخوه بالقوة ..
أبو صفا : بنتي ولاهوب بشغلك .. وأبيه يطلقها ..
فهاد تفلت من اخوها وقام وضرب عمها ..بعدوه العسكر واخوه ..
فارس: فهااااااااااااااد اهدى شوي ..
فهاد :كلببب ذا أبو .. أنت ليه سويت فيها كل ذا.. وش ذنبها ؟
دخل الملازم محمد :فهاد ممكن تهدى وأنا اخوك ..
جلس ومعها كل الاوراق : راح نحيل والد صفا لهئية الادعاء والحق العام..وتصير القضية عندهم ..
فهاد: وراح يفلت ..
أبو صفا: هذي بنتي ..
فهاد بعصيبه : وأذا بنتك .. تسوي فيها كل ذا.. ليه قولي وش سوت خاف الله ..
فارس : فهاد .. فهااااااااد.. خلاص .. بيأخذ جزاه .. وأن فلت منه بهالدنيا بيأخذه بالاخره عند ربك .. مايظلم أحد ..
أبو صفا لف وناظر فارس بقوة ..
فارس: جزاك عند ربي ..
الملازم محمد: كل الاوراق راح نحيلها بكرة السبت وتصير القضية عندهم..
.
.
.
ببيت أبو فارس ..
فارس : مدري يمه بس البنت حالتها ماتسر..
ام فارس تمسح دموعها: ياعيوني عليها .. حسبي الله عليه من أبو مايخاف الله ..
نزل فهاد ..
قامت له امه : فهاد اصبر ياعيون امك..
فهاد: أنا غبي هي قالت لي ماابغى اروح بس اصريت عليها لازم تروح والحين وينها بالعناية المركزة ..
فارس : الحمدلله جات على كذا وأنا أخوك .. مشينا ..
طلعوا من البيت ..
بسيارة فارس ..
دق عمه :هلا عمي ..
أبو امل : كيف حالك ..
فارس: بخير جعلك بخير..
عمه: الحمدلله .. الموضوع اللي خبرك وكلمني ابوك عليه ابشرك البنت وافقت ..
فارس بعد الجوال: ياشين هالخبر بس ..
رجع الجوال لاذنه : اييه .. خلاص اجل امرك ياعم لاخلصت كم شغله وعاد أبغى اشوف البنت بس مهوب اليوم..
عمه ضحك : تم ..
فارس: تسلم .. مع السلامة ..
سكر من عمه وسب سبه قوية ..
فهاد كان منسد راسه على المرتبة : وافقت امل..
فارس: آيييه ياخي ماعندها كرامه .. اقولها مابيها تقوم تستخير ..
فهاد: يمكن خيره..
فارس حط يديه على ذقنه : مهوب على رجال أن تزوجتها ..
فهاد ابتسم ..
فارس: ابتتتتتتسم يالغالي ..
.
.
.
ببيت أبو طلال..
جناح أم وأبو طلال..
ام طلال تبكي : ولدي فيه سرطان..وأنا آخر من يدري..
أبو طلال :اذكري الله ..الحمدلله هو تعالج..
ام طلال: لااله الا الله .. كيف تعالج ؟
أبو طلال: وهالسفرة على بالك وين كان ؟ كان يتعالج..
أم طلال: يانور عيون امه .. يتعالج واحنا ماندري..!
أبوطلال: يقول مانبي نشيل همه..عاد حبيت ابلغك قبل مانسافر لامريكا عشان اطمن نفسي..
أم طلال: ووجن تدري؟
أبو طلال :هي من قالت لي..
أم طلال: وليه ماقالت لي..
أبو طلال: كيف تقولك البنت يالله قالت لي.. مسكينة تركها ولما رجع ماقال لها بعد هي كشفت هالشي بالصدفة ..
.
.
.
ببيت زياد ..
العنود من كلمت شهد وعرفت منها الخبر وهي حايسة كلمتها واخذت اسم المستشفى ولبست عباتها ..دقت على سارة :هلا سارة اجهزي الحين بمرك.... ايييه .. لما امرك اقولك .. دقي على غدير طيب .. سلام ..
نزلت من الدرج بسرعة ودموعها على خدها من خوفها على صفا ..
زياد: على وين ان شاء الله ..
العنود سفهته وكلمت لبس عباتها ..
زياد :على وين ..
العنود: مهوب شغلك ..
زياد لاحظ أنها تبكي : شفيك ..
العنود : آووووووووووووف بعد عني ..
زياد : احد صاير له شي .. تكلمي لاتخليني على اعصابي..
العنود حطت نقابها :مالك شغل فاهم مالك شغل.. أو تدري بروح للمستشفى ..
زياد: احد فيه شي؟
العنود: خلالالالاص خلالالاص ياحبك للهذره ..
زياد بعصيبه: موب طالعه الين اعرف مين بالمستشفى؟
العنود :صديقتي ارتحت ..
بعدته عن طريقها وطلعت ..
.
.
.