شبكة همس الشوق - عرض مشاركة واحدة - ليه عمري مالقى لبرده دفى الا دفاكي للكاتبه ذكرى نجديه

30 - 12 - 2014, 02:55 PM

ام محمد ..اللحين ماتقولين لي لمتى وانتي ولطيفه تخططن وماشفنا شي
نوال ..لطيفه اللحين مشغوله تبي تخرب بيت نوف وساره
ام محمد ..يابنتي لاتلحقين سراب واتكلي على الله لاتتكلين على لطيفه او على غيرها
نوال ..انا لايمكن بعد هالتعب والمذله اضيع كل شي بلحظة غباء واندم
ام محمد ..بس هاالتعب يمكن مايجيب نتيجه
نوال ..اذا ماخذت الي ابي بدمر كل شي بطريقي
.................................................. .....................

الفجر وعلى الطايره التي تحمل على اكتافها قلوب محطمه لايكن احدهم للاخر أي مشاعر ولايربط بينهم رابط سوى رابط الزوجيه
ناصر يقرا في وحده من المجلات يشغل نفسه
اما نوف مسنده راسها الي الكرسي ومغمضه عيونها ومع انها فوق السحاب الاان تفكيرها على الاراض رجعت بذكريتها لقبل كم شهر لليوم الي لايمكن تنساه xxxxxه بنفسها وين كان عقلها ليش خانها ذكائها الي الكل يحسدها عليه
ليش سكرت اذنها عن كلام ساره ليش كل شي تقوله ساره تحبه الاكلامها عن نا...استغفر الله العظيم الحين انا على ذمة رجال ثاني ماتدري ليه مع ذكرى نايف الي عاشتها لحالها غزت عينها دمعه غريبه مثل مشاعرها
حست العروق الي براسها على وشك الانفجار ماعدت تقدر تقاوم بسرعه سحبت الشنطه الصغيره الي بيدها وفتحتها وطلعت علبة المسكن منها وفتحتها وحطت بيدها ثلاث حبات
قربت حبات المسكن لفمها لكن حست بيد تسحب يدها استغربت من تصرفه كان لاهي عنها بمجلته وشلون شافها
ناصر ..انتي صاحيه لك يومين تاكلين مسكنات بدون اكل
نوف ..صداع ذابحني
ناصر ..خلاص انادي المضيفه اطلبي اكل وبعدين خوذي الدوا
نوف ..ماقدر اكل نفسي مسدوده
ناصر ..والله انا بريت ذمتي وترى ابوك وصاني عليك عشان كذا رجاء لاتحمليني ذنبك وانتي مانتي بزر تعرفين الصح من الغلط
بعد رده وبدون شعور ابتلعت الحبوب مع ان ناصر مايعني لها اكثر من زوج الاانه كلامه طعنها في الصميم واضاف لها جرح ثاني
وبنفسها ..معذور ياناصر يمكن حاس انك مانت الرجال الي تمنيته اكلت الدوا وهو بدون كلام رجع للمجله

.................................................. .
العصر في بيت ابو سلمان
تروح وترجع وهو ملاحظ لكن ينتظرها تقول بعد ماملت من سكوته وهو دايما يعرفها من عيونها قررت تطلبه مومعقول اظل طول العمر استحي اطلب منه طلب عادي مثل هذا وخصوصا بعد تغييره علي لازام احاول اعود نفسي على مثل هالاشياء
نوره ...سسسلمان
رفع راسه وصار يناظر..نعم
نوره ..ممكن توديني ازور امي
سلمان وقف وقرب لها ..وهذا طلب يحتاج الروحه والرجعه
نوره ..............
سلمان ..ليش ماتكلمين ؟؟
نوره ..اخاف ماترضى
سلمان ..وليش مارضى
..مدري
ضحك سلمان ضحكة استهزا ..لاوالله مؤدبه طيب ليش مادقيتي على فهد
نوره ..وانت !!!
سلمان ..انا وش فيني؟؟ يوه تصدقين نسيت اني زوجك ومسؤل عنك
انحرجت من اسلوبه ..خلاص انا اسفه,, وراحت وتركته
.................................................. .......
في واحد من المستوصفات الخاصه
عبدالله ..طمنينا يادكتوره وش نتيجة التحاليل
الدكتوره..الحمدلله بدت تستجيب للعلاج
لطيفه ..يعني ممكن احمل
الدكتوره ..انتي الحين بديتي تتجاوبين للعلاج لكن بنسبه بسيطه
وان شالله مع استمرار العلاج يصير الحمل
.................................................. .......
وصلو لواحد من الفنادق الرائعه في مدينة بيروت
نزلوا اغراضهم كان الاثنين بلغ منهم التعب مبلغه
وبمجرد وصولهم لغرفتهم دخلت نوف تبدل ملابسها
كان ناصر معترض على السرير ونايم ولاحس فيها
قربت عنده لقت نايم رمت عليه بطانيه
وراحت تريح على الكنب غلبها النوم بدون ماتحس

.......................................
المغرب في شقة نايف
كان نواف يكلم مها
مها ..ودي اجي للرياض مدري ليه احس اني مشتاقه لها
نواف ..مابقى شي وتجين لزواجي
مها ..احس الايام تمشي بطئيه
نواف ..وانتي ليش مستعجله ترى انا المعرس
مها ..ودي اشوفك معرس واشوف عيالك بس اسمع ترى اول بنت اسمها مها
نواف ..لاحول مصدقه اسمي بنتي على اسمك عشان تطلع مثلك
مها ..ليش وش فيني؟؟؟
نواف ..ابد سلامتك بس شينه وخبله ومطيوره
مها ..هين يانواف انا كذا بس اخوي نايف هو الي بيسمي على اسمي
نواف ..والله عاد كيفه اذا بيظلم بنته هوحر
مها ..اقول الشرهه علي الي اكلم واحد مثلك وسكرت بوجهه
نواف ...هههههههههه انا اقول هبله بس ماحد مصدقني
نايف ..ياخي انت اشفيك عليها
نواف ..مصدقه عمرها اسمي بنتي على اسمها
نايف ..وانت مصدق عمرك بنت تطلع احلى من مها
نواف ..خلاص انا قلت لها اذاجا نايف بنت يسمي عليك
نايف ..خلني القى امها بعدين ادور لها اسم
نواف ..البنات اكثر من الهم على القلب بس انت الله يهداك مقفله معك
نايف ..نواف رجاء غير الموضوع لين نخلص من عرسك
نواف ..اتمنى اتزوج انا وياك مع بعض
نايف ..صدقني حنا مسيرين ماحنا مخيرين والي الله كاتبه يصير وماندري يمكن مكتوب لي شي ماحد يتخيله ولايخطر على البال !!
.................................................. ..........
قام من النوم بعد حوالي ساعتين صلى المغرب وقرر يقومها يمكن تقدر تتغدا هوالان مسؤل عنها وهي امانه عنده والى الان ماقدر يعاملها كزوجه حاطه ذراعها على وجهها قرب منها ووقف قريب منها
ناصر ..نوف نوف نوف لكن ماحست بنداءه مسك يدها ورفعها عن عيونها وصار يتامل بملامحها الي ماتجرا يدقق فيها وهي صاحيه
بدايه من رموشها الظليله وخشمها الي مثل سلة السيف وشفايفها الريانه وشعرها الاشقر المنثر على رقبتها وصدرها الي كان يطلع وينزل بامان ..يالله يانوف لو قلبي بكيفي ماكنت اخترت غيرك ياليت ربي يزرع حبك في قلبي واقدر ارتاح واريحك يحدث نفسه بالي كان يتمناه مسك يدها الصغيره وضغط عليها حست بحركته وفتحت عيونها وبسرعه جلست وهو ترك يدها كانه مسوي ذنب
نوف ..ناصر خير بغيت شي
ناصر ..ابد بس ندهتك ماصحيتي
نوف ..آسفه ماحسيت كنت تعبانه
ناصر ..عادي بس يالله قومي صلي
نوف..خلاص بقوم وبدت على وجهها علامات الالم
ناصر ..لاتقولين تبين مسكن
نوف ..الصداع مو راضي يتركني
ناصر ..الحين قومي تجهزي عشان نطلع نتغدى برى
نوف ..مالي نفس بس احس اني مخنوقه وصدري ضايق كانت تتكلم ودموعها تلمع داخل عيونها
مايدري ليه تعاطف معها وبصوت كله حنان ..طيب وش تبين اسوي لك!!
حست انه مهتم فيها ..ودي اطلع اتمشى
ناصر.. بس انتي تعبانه ماتقدرين تمشين سكتت ماحبت تناقشه وقامت تتجهز عشان تطلع معاه
.................................................. ...............
..وشلون خطرت على بالك بعد هالمده
..اشتقت لك وقلت اعرف اخبارك
..الحمدلله عايشين
..واخبارك مع زوجك ان شالله مرتاحه
..آآه بس وش اقولك دمروا حياتي بزواجي من ولد عمي
..طيب وش بتسوين الحين
..الحين انا ببيت اهلي وماراح اتنازل عن الطلاق
..واهلك موافقين ؟؟
..اهلي بعد ماشافوا معاملته معي يبونه يطلقني حسوا اخير بس بعد ماطاحت الفاس بالراس
..لاتقولين كذا انتي حلوه وصغيره والف من يتمناك
..بس انا ماتمنيت الاواحد
..طيب لاتنازلن عن حبك
..بس تزوج واخاف ان يحب زوجته وينساني
..لاتخلين له فرصه ينساك وخليك دايما قريبه من عيونه ترى البعيد عن العين بعيد عن القلب
..خليني اخلص من هالعله وارجع اتفضى لناصر
..واي معلومات عن زوجته انا بالخدمه تراها قريبة بنت خالتي وتعرف عنها بلااوي
.................................................. ...................
العصر وفي بيت ابو سلمان
جالس ابو سلمان وساره ونوره
وبعد ماتصلت عليهم نوف وتطمنوا عليها
سلمان ..يبه ترى انا بكره بروح للشرقيه
ابوسلمان ..خير وش عندك
سلمان ..اشغال اخلصها وارجع بعد حوالي خمس ايام
ساره ..سلوم حبيبي وش رايك تاخذني معك مشتهيه اشوف البحر
سلمان ..لاماتصلحك الرطوبه انتي من فصيلة الزواحف لازام تعيشين ببيئه صحراويه
ساره بصراخ ..انا من فصيلة الزواحف يالعنز
سلمان ..ايه اذا بمشيك اوديك للربع الخالي الظهر حتى تمارسين حياتك الطبيعيه
ساره ..يبه اسمع وش يقول عني
ابوسلمان ..انتي تجيبين الكلام لنفسك ولااحد يروح للشرقيه بهالحر
سلمان يوجه كلامه لنوره ..وانتي اذا بتروحين لاهلك تجهزي لاني بروح من الصبح
سكتت وماردت عليه سلمان تغير كان يعرفني من نظرة عيوني احيانا احسه يفهمني اكثر من نفسي يعني مايدري ان يضايقني اني مادري عن سفرته الاقبلها بيوم ولو ماكنت موجوده مادريت لين يسافر
قامت من عندهم وهي تعتقد انه مايعرف وش الي ضايقها
لكن سلمان عارفها زين ومتعمد تصرفاتها.
.................................................. ........

.................................................. .
..انت ماتقول لي لمتى وانت زعلان ترى كان مافيه غيرها
..السالفه ماهي بالبنت القضيه فيك انتي وبكذبتك
..انا بغيت له الخير
..بغيتي له الخير وانتي ماخليتيه ياخذ الي يبيها
..يكفي انت تورطت فيهم
بعصبيه وبصوت عالي ..لطيفه انا ماسمح لك اللحين ساره زوجتي والي يمسها يمسني
لطيفه ..مصير الايام تثبت لك اني على حق وان نايف حظه احسن من حظك
نواف ..ليه انتي وش شايفه عليهم
لطيفه ..ماله داعي اقولك بخليك تكتشفها بنفسك
تقول كلامها من غير برهان مجرد زرع للشك بقلب نواف
نواف..ماراح اصدقك يالطيفه بس تدرين اتمنى لو الزمن يرجع كم شهر
لطيفه ..وش بتسوي ؟؟
نواف ..كنت قلت لنايف عن كذبتك عليه
لطيفه ..تبي تقنعني انك ماقلت له انا حاسه انه زعلان من شي
نواف ..وهو عرف بس ماهو مني
لطيفه ..من قاله
نواف ..فهد الي قاله ومثل ماقال الكذب حبله قصير لابد يوم ينكشف
....السلام عليكم
التفتوا لنايف الي باين انه سمع شي من حديثهم
لطيفه ونواف ..وعليكم السلام
نايف بنظره ونبره غريبه ..وشلونك يام ريان
بارتباك وكانها ماودها تحط عينها بعينه الغاضبه ..الحمدلله انت شلونك
نايف ..ماشي الحال
دق جوال نواف وطلع مع صديقه الي ينتظره برى
لطيفه بعد تردد..وش دعوه ماعاد نشوفك ماعاد تزورني
نايف ..مشاغل
لطيفه ..لاانت زعلان
نايف باستهزاء ..ليش انتي سويتي شي يزعل
لطيفه ..ماصارت ياخوي اخسركم اثنينكم عشان بنت
نايف ..البنت راحت بطريقها الله يوفقها لكن الي حز بخاطري انك ماكنتي قد الثقه الي عطيتك وفتحت قلبي لك
لطيفه ..غصبا عني ياخوي
بغضب ماتعودته منه نايف حتى وهو غضبان هادي ..وش الي يجبرك تكذبين علي ؟؟ وهو يصفق يدينه .. قولي اكرهم وانتهينا
لطيفه..انت لو تدري ياخوي كان تشكرني اني كذبت عليك وماخليتك تاخذها
نايف بعصبيه ..لطيفه تكلمي زي الناس
لطيفه ..لاتجبرني اتكلم كلام ماحب اقوله لكن بتعرف اني ماخنت ثقتك ويكفي نواف الي تدبس فيهم
نايف ..لاتحطينهم بذمتك
لطيفه ..اصبروا وشوفوا انت واخوك
مصره على مخططاتها القذره وحقدها صار يزيد نايف استغرب من الي قالته معقوله خلت الافكار تدور براسه بدون ماتكلم كلام واضح لكن وبعد موقفها معاه ماعاد يقدر يثق بكل شي تقوله

.................................................. ........
بالمطعم طلب ناصر غدا راقي وقعد ينتظر الطلب
تناظر للورد الي على الطاوله وناصر يفتش بجواله
سمع نغمه يعرفها ابتسم ..حيالله ام ناصر
ام ناصر ..الله يحييك
ناصر ..وش اخبار اهل الرياض
ام ناصر ..الرياض واهلها مشتاقين لك
ناصر ..تشتاق لهم العافيه
ام ناصر ..ولهت عليك ياوليدي
ناصر ..هههههه اذا تبين الحين احجز على اول طياره وارجع لك
ام ناصر بضحكه ...لالا ياوليدي استانس انت وزوجتك وانا الله يعيني ماصدقت يجي هاليوم
ناصر ..الله يخليك لي يالغاليه
ام ناصر ..ويخليك لي يانظر عيني وشلون نوف
ناصر ..الحمدلله
ام ناصر .. ماعجبني وجهها ذاك اليوم
ناصر.. تطمني مافيها الاالعافيه
اخذت وحده من الورد الي كانت تتفرج عليه وصارت تشمها وراحت بدنيا ثانيه بينما كان يكلم امه ويتفرج عليها مشهد ملائكي اعجبه وتمنى يستمر وبدون مايحس انظاره تعلقت عليها
ام ناصر ..زين هي قريبك من عندك ؟؟
ناصر ..اي يمه هذي هي
ام ناصر ..عطنياها بكلمها
ناصر وبصوت هادي ماحب يخرب هاللحظه..نوف
نوف بعد ماصحت من سكرتها ..هلا
ناصر ..خذي امي بتكلمك
نقلت الورده من يدها اليمين لليسار ومسكت الجوال بيدها اليمين
وبكل نعومه ..هلا خالتي
تحرك الورده بيدها بهدوء وتتكلم بنعومه وتبتسم بعذوبه
خلصت من المكالمه ومدت الجوال لناصر واخذه
نوف ..امك تبي تكلمك
رجع يكلم امه كان مكان يدها دافي وريحتها عالقه بالجوال كانت ريحه رقيقه وهاديه مثلها
قدم لهم الجارسون الاكل ورتبه على الطاوله الي بينهم وطلع
تتفرج عليه وكالعاده تسبح بفلك ثاني بينما ناصر بدا بالاكل
ناصر ..ليش ماتغدين
نوف ..مالي نفس بس باشرب العصير
ناصر ..لا هالمره بتاكلين
نوف ..صدقني مالي نفسي
ناصر قرب نفسه شوي لها وبابتسامه ..واذا قلت لك علشاني
اظطربت نوف وحست بحراره بجسمها مع ان الجوبارد
لكن ابتسمت له مع ان عيونها تدور تبي تبعد عن نظراته الي تحاصرها
ناصر ..هاه وش قلتي؟؟
نوف وهي تاخذ الملعقه ..خلاص
.................................................. .....................

نواف ملتهي بتجهيزات عرسه وبمكالمات ساره
وساره مصره ماتجهز الى ان تجي نوف
ناصر ونوف الى الان ماصار بينهم مواقف تذكر
نايف دافن نفسه بمشاريعه وشغله الي كبر وصار بحاجه لمتابعه
لطيفه همها مازال التخريب على نوف وساره
فهد اصبح يفكر كثير بالبنت الي شافها يوم ملكة نواف والي الان ماعرفها
هدى <بنت خالة ناصر >تطلقت من زوجها بعد اصرار اهلها ولان تفرغت لنوف وناصر وتجددت علاقتها مع نوال
.................................................. .
خلصت عشا
..الحمدلله
رفع راسه لها وابتسم لها وهو يحط الاكل بفمه
كتفت يديها على صدرها وصارت تلتفت في ارجاء المطعم
ناصروهو يمسح يديه بالمنديل الي على الطاوله ..انتي سجلتي بالجامعه
انتبهت لسؤاله ..اي خلاص بقى بس اداوم
ناصر ..كلها اسبوعين وتبدا الدوامات
نوف ..بس مالي خلق على الدراسه
نزل الكاس بعد ماشرب منه ..كم نسبتك
..95%
..اجل لو لك خلق على الدراسه كم تجيبين
ابتسمت له ..قل ماشالله
..ماشالله لاله الاالله ولاحول ولاقوة الابالله
..ايه كذا ترا مايحسد المال الااصحابه
جملتها الاخيره ادخلت عليه شعور يعني انا وهي واحد
..يلاه نمشي
..يلاه
خمس ايام وهم كل يوم يطلعون ويرجعون بآليه بدون نقاش بدون مزح علاقتهم رسميه لابعد حد
.................................................. ......
يدورون في البيت الي تقريبا انتهى وصار جاهز
نواف ..تصدقه احسه كبير على
فهد ..عاد الي يسمعك يقول بيتك وش دخلك انت كبير ولاصغير
نواف ..ياخي وش فيكم على كل ماتكلمت هبيتوا فيني
نايف ..ماعليك غيران منك لانك اصغر واحد تتزوج في العيله
فهد ..الا صدق وش الي مخليك مستعجل على الزواج
نايف ..مطيور الله يكفينا الشر
نواف ..بكره لاكبروا عيالي الناس بيقولون انهم اخواني تعرفون كيف انا افكر
فهد يوجه كلامه لنايف ..اخوك هذا عجزت لافهم وشلون يفكر
نايف ..حتى انا والله ماعرفت للحين
نواف ..ماتدرون يمكن الله له حكمه بهالشي
التفت فهد لنايف مستغربين من الي قاله وكملوا فرجه على البيت واطلعوا
.................................................. .........
يتابع برنامج على التلفريون
افتقدها لها مده بالغرفه راح للغرفه شافها منهمكه بترتيب مادرت بدخوله عليها
ناصر..وش قاعده تسوين ؟؟
نوف بروعه وهي حاطه يدها على صدرها ..بسم الله الرحمن الرحيم روعتنني
..لها الدرجه مرعب
نوف ..لا موقصدي بس كنت ساهيه وانت دخلت علي فجئه
ناصر بعد تردد ..طيب ماتبين تطلعين ..؟؟
نوف ..وين ؟
ناصر ..مدري ونتمشى
نوف ..مالي خلق
ناصر بهدوء وباسلوب استفزازوهويكتم غيضه ..وانتي للاكل مالك نفس وللطلعات مالك خلق
لقى ثغره يقدر ينفس فيها الضيقه الي يحس فيها هذي حياة شخص مبتدي حياه جديده ومع انسانه مثل نوف جمال واخلاق وادب فيها المواصفات الي يتمناها أي شاب بشريكة حياته لكن دايما اقول الله يسامحك ياقلبي عجزتني ولاجيت لي على مابي
استغربت منه وش الي غيره الظاهر فيه شي يوقف بيني وبينه ندمت على كلامها ..آسفه خلاص اذا تحب نطلع عادي نطلع
استحت من نفسها وعرفت انه متضايق من تصرفاتها بس صدقني ياناصر انا اتصرف غصب عني حاولت انسى صدقت ساره يوم قالت الكلام سهل آآآآآآآآه ياساره ليتك قريبه ماحد يقدر يوصل لداخلي غيرك ولافيه انسان يحس فيني كثر ماتحسين فيني انتي
عرفتيني اكثر حتى من نفسي ياليت هاليومين ينطون والقى نفسي معاك وقريبه منك
ناصر ..لاماله داعي لاتجبرين نفسك
.................................................. ........................
..متى بتسافر
بدون لايلتفت ..اليوم المغرب
..بس انت قبل شهر رحت
التفت لها بعصبيه ..والله عاد هذا شغلي ولازام اسافر كل مده ويكون بعلمك باقي شهرين وارجع اداوم هناك
..خلاص انا آسفه ماتحب المواجهه ولاعندها جراءه للنقاش
..اذا بتروحين لاهلك تجهزي عشان اوصلك
وهي ماشيه برى الغرفه ..لا انا باجلس هنا
..براحتك
..................................................

نوال ..ابشرك هدى تطلقت
لطيفه ..يمكن نست ناصر
نوال ..لا مانسته واختك ماقصرت خليتها ترجع تحن لحبها الاول
لطيفه ..عاد انتي ماينخاف عليك ماتنوصين على خراب البيوت
نوال ..انا ماراح استفيد شي من طلاق نوف وحتى ساره بس انا اسوي الي انتي تبين
لطيفه ..ماتقصرين يابنت خالتي
نوال ..بس ترى مافيه شي بدون مقابل كل شي له ثمن
لطيفه ..ولايهمك انا زرعت الشك بقلبه من ناحية نوف
نوال ..انتي تروحين وترجعين على نوف نوف خلاص تزوجت ماعلينا منها
لطيفه ..يالغبيه ان شك فيها عرف اني كذبت عليه عشان استر على شي اكبر ويرجع يثق فيني ويوافق على الي اقوله عليه
نوال ..صدق انك داهيه
لطيفه ..ههههههههه بعض ماعندكم
.................................................. ...........
تسبحت وطلعت وهي ناويه تعتذر منه مهما كانت ردت فعله ورغم الجفا الي بينهم هو زوجها ولازام تحرص على رضاه
مازال على وضعه قربت له بخطوات متردده
نوف بخجل ..ناصر !!
ناظر لها بطرف عينه بدون مايلتفت له ..نعم
نوف ..ماتبي نطلع نتمشى
ناصر ..مالي خلق
وطت راسها ومسكت يدها اليمنى باليسرى وصارت تلعب باظافرها الناعمه وابتسمت رفعت راسها مره ثانيه
نوف ..ناصر انا آسفه
ناصر ..على ايش
نوف ..على اني زعلتك
ناصر ..والمطلوب
نوف ..نطلع نتمشى وقامت وبعفويه مدت يدها له
انقاد معها مثل الطفل واقترب منها كانت انفاسه تلفح وجهها ارتبكت من قربه وهو ريحتها دوخته يراقب عيونهاالنجلا وشفايفها المورده صدرها كان يطلع وينزل بسرعه طوقها بيديه العريضه اختفت باحضانه بسبب صغر حجمها اخذ يقترب منها لكن فجئه كانه اقترف ذنب وكانها محرمه عليه فيه شي يبعدها عنها ويحول بينه وبين حياته معها ربما الحب الي الي مامات داخله قرب نوف احياه وتذكر هدى ونوف بين احضانه وبسرعه ابعدها عنه
بصوت مرتجف ..خلاص البسي بسرعه خلينا نطلع
شعور الخجل والخوف تبدل الي شي ثاني ليس له اسم
استغربت من حركته عزت عليها نفسها ان تكون غير مرغوب فيها
حست نفسها مفروضه عليه وهذا اصعب شعور يشعر به انسان

.................................................. .....

..لاتسمحين لوحده غيرك تاخذه بارد مبرد وانتي طول عمرك تحبينه وهو يحبك
هدى ..ماراح اخليها تهنى فيه ناصر يحبني ولايمكن ينساني
نوال بابتسامه خبيثه ..ايه كذا تعجبيني
لها مده توسوس لها مثل الشيطان وتحرك الغيره والشر داخلها
هدى ليست انسانه سيئه لكن الظروف والقسوه الي شافتها من اهلها ومن زوجها وفشلها صنع منها انسانه ثانيه ونوال تنبش قبور الماضي وتحيي الذكريات
اذا قل الدين واضمحلت الاخلاق واصبحت الغايه تبرر الوسيله ترى اشخاص على اتم الاستعداد ان يدوسو من في طريقهم ليصلواالى مبتغاهم موجه من الشر تجرف من كان في طريقها لتحطمها ثم تبعثره وللاسف هذه ليست احرف تسطر على اورقنا او شخصيات نرسمها في خيالنا انما حقائق نراها كل يوم منذ ان خلق الله الخلق الى ان يشاء الله

..............................................

في غرفة نوره تناظر للجوال تستناه يدق المفروض انه وصل اللحين له خمس ساعات من سافر ليش طيب مايتصل يطمني عليه ليش طيب انا ماتصل عليه لا لا اخاف يقول كلمه تضايقني وانا ماني ناقصه
دق باب غرفتها كانت ساره
..ادخلي ياساره
طلت براسها من ورا الباب ..وش قاعده تسوين ؟
نوره بملل ..ولاشي جالسه
ساره ..انا طفشانه ليش ماتطلعين للصاله نجلس مع بعض
نوره ..خلاص روحي وانا طالعه وراك
ساره ..استناك لاتسحبين على ومشت للباب
نوره ..ساره ؟؟
ساره..هلا
نوره ..لالا خلاص مافيه شي
رجعت لها ساره وهي مبتسمه ..لاتخافين اتصل
نوره ..صدق
ساره ..اجل اكذب عليك كلم ابوي من حوالي ساعتين
نوره ..من ساعتين طيب ليش ماطمني عليه
ساره ..والله مدري وش اقولك بس
نوره..خلاص يا ساره لاتقولين شي روحي وانا لاحقتك
.................................................. ....

بعد طلعه قصيره وقف السياره الي استاجرها عند واحد من المراكز التجاريه الكبيره
ناصر ..انزلي
نوف ..وين !!
ناصر ..وش تشوفين للسوق
نوف ..بس انا ماني محتاجه شي
ناصر ..بشتري لامي هديه وابغاك تختارينها
نزلت معاه لانها ماتملك ان ترفض
مشوا بالسوق يدخل المحلات وتدخل معاه
اعجبته ساعه نسائيه معروضه بالمحل طلب من البائع يطلعها له ..لوسمحت باشوف الساعه هذي
البائع ..حاضر
ناصر ..نوف وش رايك بالساعه هذي
نوف ..حلوه بس لوكانت فضي احلى
ناصر ..لوسمحت فيه نفس الموديل فضي
البائع ..طبعا فيه
ناصر.. خلاص طلعها وغلفها
التفت لنوف شافها ماخذه زاويه بالمحل تستناه يخلص ..وانتي ماتبغين شي
نوف ..لا
ناصر ..طيب مابتاخذين هديه وقبل لايكمل
نوف باندفاع ..لمن لامي ؟؟
ماعرف وش يقول لها اوكيف يواسيها او أي كلمه ممكن تنقال في هالموقف حاسب على الهديه وتوجه بنظره لها
نوف ..خلصت
ناصر ..انا خلصت بس انتي ماشريتي شي
نوف ..صدقني ماني محتاجه شي
ناصر ..طيب مابتاخذين لاهلك شي
نوف ..مدري
ناصر ..لازام حتى مايقولون عني بخيل
ودخل واحد من المحلات ودخلت وراه اشترت لاهلها هديا وطلعت ماحبت تعانده وفضلت انها تسايسه
.................................................. ...........

بعد ثلاث ايام
الساعه وحده ليلا
البيت كان هادي وكل الي في البيت ناموا
كانت بغرفتها تتفرج على التلفزيون سمعت صوت بالصاله الي برى وصوت دربكه وقفت بدون شعور وصارت بصالة جناحها الصغيره قربت للباب وحطت اذنها قريبه منه لعلها تسمع شي يعلمها عن مصدر الصوت غريبه ساره نايمه من ساعه وعمي نايم من زمان يمكن احد منهم قام اروح اشوف واقول لعمي بس صعبه اصحيه يمكن مافيه شي ادق على جوال ساره لالا باستنى شوي صارت تدور بالغرفه سمعت الصوت يقترب زاد خوفها جلست على الكرسي في الزاويه
تحرك مقبض باب الجناح لكن الباب كان مقفول سمعت صوت المفتاح بالباب وقبل لاتستوعب دخل عليها يحمل شنطة ملابسه واللاب توب بسرعه قامت من مكانها
..هذا انت ؟؟
استغرب من وجهه الي راح لونه ..السلام عليكم
جلست على الكرسي ..وعليكم السلام خوفتني
ببرود اتقن تمثيله ..اشك بصراحه
تركها ودخل يبدل
الجمله الي قالها اهانتها وينك ياسلمان وين رحت وخليتني مع هالانسانه الي ماعرفه انسان اسهل شي عنده اهانتي وجرحي
بس لو ترجع ماراح ازعلك لكن انا الي ضيعتك من يدي وانا الي راح ادفع الثمن

يا بحر في داخلك روحي تدومي
وسط دره قولها لي دوم .. همي
على الشاطي ومع الغروب
وخيوط الشمس المنسدله على الاراض تعلن عن رحيلها
منظر الغروب يستحضر الذكريات ويرجعنا الى الماضي ويهيج الجروح التي لم تلتئم
واقف بقامته الطويله ينظر للبعيد ك
ومولج يده بجيبه ورافع اطراف البنطلون ويلعب بالرمل برجله كان يسبح مع ذكريايته وبأمسه نسى اليوم ونسى الانسانه الي وراه
لا تنظر بعيد تنتظر شي مايجيك...........انظر تحتك يمكن تلاقي مبتعاك
ايضا كانت مسافره للبعيد وتلعب بالرمل الدافئ من دفئ الشمس كانها تعد حباته دخلت في عالم ثاني الاثنين كانوا اجساد متقاربه لكن ارواحهم بعيده كل البعد عن بعضها ولكن من بين زحمة افكاره خطرت على باله التفت لها وكتف ايديه على صدره وهله واخذ يتاملها بهدوء وهي مازالت على نفس وضعيتها جرته خطوته لها غموضها سبب عنده فضول لاكتشافها جلس قريب منها وهي بنفس الوضع تقلب الرمل بيديها ضم رجوله لصدره
وبصوت هادي يتناسب مع المكان والزمان والاشخاص ..بايش سرحانه
استغربت من نفسها كانها كانت نايمه غابت عن الاصوات والالوان وقطعت الجبال والبحار ووصلت لدوله ثانيه ولمكان ثاني ولناس ثانين ونست قربه استغربت بعد من قربه ناظرت له نظره بارده لاتحمل أي مشاعر ..بالدنيا
جوابها خلق سؤال ثاني ..الدنيا كبيره وين بالتحديد
صعب ترد والاصعب تشكي له الي مضايقها..اشتقت لاهلي<<< وبصوت يرن فيه الحزن ..اشتقت لامي
صار يفكر ويكلم نفسه ويعاتبها .. حاس فيك يانوف ماقدرت احسسك بالفرحه او خفف عنك شعور الغربه بالعكس يمكن زادت من قربي >>رفع يد وحطها على كتفها ..انتي متضايقه من وجودك معي <<ماتدري ليش سئلها ولاتعرف بايش ترد عليه بس حاولت تكذب عليه وعلى نفسها حرام اعيشه بهمي يكفي صبره علي ..لا بالعكس بس ماتعودت ابعد عن اهلي انا حتى صديقات قريبات مالي انا عالمي محصور باختي وبنت عمي <<كانت تحاول تفتح له قلبها وتشجعه يمحي الضياع الي تعبها وتقربه منها سرح فيها كنت البراءه تشع بعيونها الناعسه كانت طفله بجسد امراءه ..اظلمت الدنيا نمشي
بدون معارضه ..يلاه
كل واحد منهم يلقي اللوم على نفسه ويعتقد انه سبب تعاسة الاخر ماكانوا يعرفون ان علة كل واحد داخله